Wiripu 3:1 - Sateré-Mawé

¹ Pyno ahenoi kurin hawyi toran naꞌyn uimiwan. Uheꞌywytꞌin uheinytꞌin atikyꞌesat kahato Aikaꞌiwat Iesui eimowepiit kahato hap. Miꞌi eimowepiit hamuat ahẽtup tope. Saꞌawyꞌi worohoꞌonapin uimiwan me -Toꞌiro eiwemowepiit katupono Iesui mikyꞌeria kahato eipe are raꞌyn ehepe saꞌawyꞌi. Miꞌi uiꞌe hap areꞌe i ehepe aikotã areꞌe saꞌawyꞌi ehepe areꞌe i raꞌyn eiwemowepiit ro are. Yt aremoti hin i aikotã saꞌawyꞌi uimiwan me areꞌe typua i typua i ahenoi eiwemowepiit ro e hap ete katupono atikyꞌesat kahato einapin uhepiat hap topyhuꞌat kahato eiwanetup hawe. Miꞌi hawyi yt uwe i eimaꞌat kuap einapin wẽtup etiat hamo. Yt pywo rakat i etiat hap yt uwe i einapin kuap.

Wiripu 3:1 ပူးပေါင်းရင်းမြစ်များ

Mateu 5:12

Maꞌato miꞌi pykai waku eiweipiit eiwehum yn naꞌyn katupono Tupana kai iwato kahato imiium ehepiatnuat atipy pe. Katupono saꞌawyꞌi wuaria Tupana ehay moherep haria ti eiꞌewyte hoꞌopot haria tukupteꞌen.

Iruka 1:47

Uipaꞌãu iwepiit kahato toineꞌen kat pote Tupana kaipyi tuut uhehakyeraꞌat hap pote.

Humanu 5:11

Miꞌi pote -Watuwehum kahato ewowi Tupana watoꞌe. Urukaꞌiwat Iesui urunug naꞌyn ewy ok wo. Waku kahato uruipuẽti En watoꞌe katupono uruwy ok nug naꞌyn En watoꞌe.

2 Kuriniu 13:11

Uiwyriaꞌin uhekatuwyria kuekatu atipoꞌoro ehewowi. Toran naꞌyn uimiwan mesuwe. Waku pe eweikupteꞌen. Yt kat i iꞌaparap ehepiat hap eheineꞌen hap ete hap wywo eweikupteꞌen. Wẽtup ok miit ewywuat eweikupteꞌen imohey hap ete. Eiwoꞌomowepiit ro eiwoꞌopowyro hap ete woꞌowese hap ete. Miꞌi ewy ewetunug pote eiwepiit kahato katupono Tupana wuatꞌi kyꞌe hat toineꞌen eipyꞌasetpe eimowepiit sese hamo.

Ewesu 6:10

Pyno Uito Pauru. Waku raꞌyn uimiwan. Ahenoi hit hawyi toran naꞌyn are. Pywo uiwyriaꞌin Aikaꞌiwat Iesui aimoesaika kahato hat toineꞌen. Miꞌi pote -Urumoesaika ro emohey hap ete waku watoꞌe Iesui pe. Waku watopyhuꞌat wẽtup miit ewy aiwanetup hawe Mehin waku watoꞌe Iesui pe. Uinug o hesaika kahato rakat waku nug hap ete waku watoꞌe Aipotypot pe.

Wiripu 3:3

Aito yt miꞌiria mohey haria hin i katupono Tupana Paꞌãu sese aipiit pe Aipotypot Iesui mimoieineꞌen aito pote waku kahato Iesui waku kahato Iesui e haria aito. Maꞌato iraniaꞌin ahemusin ãpy sokpe tek hap ete yn miꞌiria iꞌatuehay. Yt watiꞌatumohey hin i miꞌiria katupono wẽtup kawiat aito Iesui mohey haria. Wẽtup ywania ewy yn watopyhuꞌat katupono Tupana titek taꞌyn aiminug saꞌag sio toĩ ahemusin ãpy sokpe sio yt. Pyno Tupana miehakyeraꞌat koꞌi raꞌyn aito katupono imohey haria aito pote.

Wiripu 4:4

Pyno uiwyriaꞌin woꞌomowepiit haria ewywuaria wo o eweikupteꞌen. Wuatꞌi eꞌat pe waku -Tupana urumowepiit hat kahato En waku watoꞌe aat kaꞌap. Tupana urumowepiit hat kahato En waku watoꞌe Tupana pe are.

Wiripu 4:8

Kurin poꞌog ahenoi hawyi waku. Uheꞌywytꞌin uheinytꞌin watipyhyp aiwanetup hap yt naku i hap. Miꞌi hawyi wẽtup kape yn aiwanetup hap. Wakuat kape yn watuwanetup aikotã miitꞌin miat wakuat rakat ewy aiwanetup hap aikotã pywuat wanetup hat ewy aikotã miitꞌin mimotypot kahato hap wanetup hap ewy aikotã hãpyk kahato rakat ewy waku watuwanetup. Waku ihainia haryporia weꞌeg nakaria ewy watuwanetup. Waku iwese kahato rakat ewy aiwanetup hap. Miꞌi hawyi -Meimuẽwaria wyti waku kahato rakaria iꞌatuꞌe hap ewy waku aiwanetup hap. Kat e hap kat e hap poꞌog poꞌog waku miꞌi ewywuat waku watuwanetup. Kat e hap kat e hap ete Tupana -Waku e pyno miꞌi hap ete waku watuwanetup aat kaꞌap.

1 Tesaronika 4:1

Uruwyriaꞌin koitywy uruhẽtup kahato ehupi poꞌog poꞌog Tupana mowepiit haria wo eweikupteꞌen hap Iesui mikyꞌesat ewy kahato. Uruikuap taꞌyn ti koitywy Tupana mowepiit haria wo raꞌyn eweikupteꞌen. Miꞌi tã raꞌyn pykai ti uruhẽtup poꞌog poꞌog ne.

1 Tesaronika 5:16

Yne eꞌat pe waku watuwehum Tupana kape.

Tiaku 1:2

Uiwyriaꞌin karãpe putꞌok e ahete aikotã aikotã mikyryꞌi hap hoꞌopot hap ahãꞌãg hap miꞌi pote waku watuwehum kahato Tupana kape.

1 Peteru 3:8

Pyno mesup ahenoi teran uiwenapin hap yne Iesui mohey haria pe. Mio tã are aikotã wẽtup miit ewy waku eweikupteꞌen eiwanetup hawe. Waku woꞌokyꞌe kahato haria wo eweikupteꞌen are. Waku eipyꞌa pe eiwoꞌokyꞌe eiwoꞌope are. Waku eiwoꞌokyꞌe Iesui mohey haria pote aikotã eheywytꞌin eheykeꞌetꞌin eheinytꞌin kyꞌe hap ewywuat are. Aikotã eikywytꞌin eikypyꞌytꞌin ehekiꞌitꞌin kyꞌe hap ewy wẽtup mepytꞌin sok ewy waku eiwoꞌokyꞌe are. Karãpe hoꞌopot hap putꞌok e wẽtup ok Iesui mohey hat ete hawyi etipowyro o miꞌi. Iꞌewyte karãpe iraniaꞌin hatek pote etipowyro miꞌi eipyꞌa pyi ikyꞌe hap wywo. Waku eweikupteꞌen eiwese kahato iraniaꞌin etiat rakaria wo. Waku eweiꞌe iraniaꞌin Iesui mohey haria pe -Wẽtup yn aimimohey uhyt mana eweiꞌe o are. Ereke uhyt mana mimi eweiꞌe. Eraꞌapyk o eweiꞌe. Miꞌi hawyi hegyiꞌat rakaria wo aru eweikupteꞌen Iesui mohey hap wywo are.

1 Peteru 4:13

Karãpe putꞌok e ahãꞌãg hap ahatek hap miitꞌin mikyryꞌi hap aiꞌahuu hap yne mekewat koꞌi putꞌok e pote waku meremo watuwemowepiit hawyi waku watoꞌe Tupana pe ahoꞌopot hap putꞌok e hawyi -Tupana koitywy atikuap taꞌyn Esaꞌyru Emipoꞌoro uruporekuat nuat hoꞌopot hap. Yt atikuap yne i maꞌato ahoꞌopot hap kaipyi atikuap Emipoꞌoro hoꞌopot hap. Waku kahato atuꞌu Iesui ewy mekewat hoꞌopot koꞌi waku watoꞌe Tupana pe. Meiũran aru atikuap Esaꞌyru uruporekuat nuat putꞌok e mesuwe wuatꞌi mimotypotno tuwemoherep mesuwe. Miꞌi hap eꞌat pe uimowepiit hap sese wuatꞌi eꞌat piat hap toineꞌen waku watoꞌe Tupana pe.

2 Peteru 3:1

Typua raꞌyn atipoꞌoro uimiwan ehewowi uiwyriaꞌin. Iꞌewyte mesuwat uimiwan aikotã saꞌawyꞌi einapin hap ewywuat rẽ. Yt eweiwaure teiꞌo aikotã saꞌawyꞌi hoꞌowasat rakaria ewy eweikupteꞌen. Koitywy ti eiwanetup hap yt ipit pit hin i raꞌyn toineꞌen. Pyno o yt eweiwaure teiꞌo aikotã saꞌawyꞌi hoꞌowasat rakaria eweikupteꞌen eiwanetup hawe hap. Iꞌewyte yt eweiwaure teiꞌo aikotã meiũran tuut eimaꞌat hanuaria ikahuro turan wuat hap ete. Miꞌi ti aru Tupana ehay etiat wekyryꞌi hat e hap.