Wiripu 2:12 - Sateré-Mawé12 Uhekatuwyriaꞌin uimikyꞌeria kahato eipe. Saꞌawyꞌi areineꞌen eipyꞌasetpe eimuꞌe hamo. Mekewat eꞌat pe worohoꞌonapin kahato kat som kat som Tupana tikyꞌesat ewetunug hap. Miꞌi hap eꞌat pe waku pe eweikupteꞌen. Einapin hap ewetunug yne maꞌato mesup yt areineꞌen i eipyꞌasetpe katupono morekuat woꞌopyhik hawe areineꞌen miꞌi pote yt uwe i uito eipyꞌasetpe. Miꞌi pykai ti atikyꞌesat kahato eweikupteꞌen uhehay upi. Yt uwe i uito itote pykai ewetunug o einapin hap koꞌi are maꞌato poꞌog poꞌog saꞌawyꞌi wuat kai uiꞌe hap ewy atikyꞌesat kahato ewetunug wakuat nug hap koꞌi. Waku eweikenꞌẽ yt naku i nug hap pupi Aikotã aityry hap ewy eikenꞌẽ hap. Waku watunug Tupana mikyꞌesat koꞌi yn Tupana mihakyeraꞌat aito pote. Waku watoineꞌen Tupana mihakyeraꞌat koꞌi wo watopyhuꞌat. Miꞌi hawyi karãpe miitꞌin teꞌeraꞌakasa aiminug wakuat kape hawyi -Pywo iꞌatuꞌe miꞌiria ti Tupana mihakyeraꞌat koꞌi wo iꞌatuꞌe. အခန်းကိုကြည့်ပါ။ |
Wiripu 2:12
41 ပူးပေါင်းရင်းမြစ်များ
Taꞌi Tupana tum aru tomohey haria pe tomotypot haria pe tomikyꞌesat nug hanuaria pe wuatꞌi eꞌat piat iꞌatuieineꞌen hap sese tomepytꞌin saꞌup e. Miꞌiria yt iꞌatupohep hin i Tupana motypot hap ete. Taꞌatuminug wakuap koꞌi wo taꞌatumotypot aat kaꞌap. Yt karãpe i iꞌatukuꞌuro miꞌiria ete e. Katupono tomotypot saꞌup Tupana tum miꞌiria pe wuatꞌi eꞌat piat iꞌatuieineꞌen waku hap.
Urumikyꞌeria uhekatuwyria yt eweitoiat teiꞌo ehepiat Iesui mohey hap. Waku eweikupteꞌen motꞌi o iwywo e yne eꞌat pe. Poꞌog Tupana mikyꞌesat ewy ewetunug no katupono watikuap taꞌyn ahaꞌup iwato tutum aru aipotpap iwato hap oktan. Watikuap taꞌyn aiminug Tupana mikyꞌesat ewywuat hap wuatꞌi eꞌat piat topyhuꞌat.
Koitywy mehin Titu eikyꞌe kahato hat poꞌog poꞌog saꞌawyꞌi wuat kai. Miꞌi pote ehewowi yn iwanetup hap. -Taꞌi miꞌiria Tupana mikyꞌesat nug haria e yn uruepe ehepiat pe. Yt toiwaure kuap i ehowawiat tuwanetup hap. -Uimotypot kahato miꞌiria e. Yt toimoto hin i tuwanetup hawe. Aikotã paa e haria ewy eweikupteꞌen itote -Ereke mehin ereke mimi eweiꞌe yn tope. -Hegyiꞌat kahato rakaria e yn uruepe ehepiat pe. Miꞌi hawyi ehewowi yn tuwanetup kahato.
Karãpe watimoherep sehay wakuat Aipotypot etiat miitꞌin me miꞌi turan waku aiweꞌeg wo o aikotã aikotã watoineꞌen iꞌatupyꞌasetpiat turan. Waku iweꞌeg kahato rakaria ewy watoineꞌen. Yt naku i watiꞌatumuꞌe miitꞌin yt naku i nug haria aito pote. Aimimuꞌeria yt tikyꞌesat i ahehay Iesui etiat taꞌatupuẽti yt naku i nug haria aito pote. Yt teke i iꞌatuewaure kaꞌa pe wakuat Iesui etiat aheineꞌen hap yt ikahu i pote are. Atikyꞌesat kahato wakuaria wo o eweikupteꞌen sio areineꞌen eipyꞌasetpe sio yt. Waku eweikupteꞌen wakuat nug haria wo o itote yt uiwywuat pykai i. Miꞌi hawyi yt areineꞌen i eipyꞌasetpe pykai sehay wakuat atikuap aru iraniaꞌin wẽ pyi ehetiat eiminug koꞌi piat hap wyti aru hap atikuap. -Taꞌi yt taꞌatuꞌatoiat hin i te Iesui mohey hap iꞌatuꞌe aru uhepe. Toꞌoꞌewyꞌewy wẽtup miit piit ewy iꞌatupotpap e hap aru atikuap wy ehetiat. Taꞌi suraraꞌin ewy tuꞌuka kahato saꞌag ete e hap aru atikuap wy. Iꞌewyte taꞌatukyꞌesat yne miitꞌin Iesui ehay wakuat mohey haria iꞌatuꞌe aru uhepe meiũpe yt heremo i areineꞌen eipyꞌasetpe pykai are.
Saꞌawyꞌi watomohey Iesui hawyi Tupana miehakyeraꞌat hanuaria watopyhuꞌat. Tohaꞌawynug ahehakyeraꞌat hap hawyi yt aiꞌatoiat hin i e. Yne eꞌat pe haꞌawytepyi mesup te mukiꞌite ahehakyeraꞌat kuap hat Iesui topyhuꞌat. Poꞌog poꞌog yne eꞌat pe aimoesaika kahato tewaku hap nug hamo. Ahehakyeraꞌat kahato haꞌawyte mesup te Haꞌyru taꞌaipok Aipotypot no hap kape mesuwat yi kape taꞌaipok hap kape ahehakyeraꞌat hamuat wuatꞌi eꞌat piat hap kape. Yt uheso hin i are. Topyhuꞌat kahato aipyꞌa pe Iesui wuatꞌi eꞌat pe. Ipotpap kahato aiwanetup hawe aimoewaku kahato hamo. Yne eꞌat pe miꞌi hap koꞌi wyti waku watomohey e.
Uiwyriaꞌin atipoꞌoro teran aiwy Timoteu ehewowi katupono atikyꞌesat kahato atikuap teran aikotã eweikupteꞌen hap sio waku sio yt hap kuap hamo katupono miꞌi atikuap hawyi uimowepiit kahato hap topyhuꞌat. Miꞌi pote atipoꞌoro teran uhaꞌyru Timoteu ehewowi. Miꞌi pote ahẽtup Aipotypot Iesui kape -Etipoꞌoro Timoteu aiwyriaꞌin tawa Wiripu piaria kape are aat kaꞌap ahẽtup. Miꞌi hawyi atimohey kahato Aikaꞌiwat Iesui tipoꞌoro meremo Timoteu ehewa wiat hap. Meiũran ti aru taꞌaipok hawyi uimowepiit kahato hap topyhuꞌat imienoi.
Eheꞌyi Masetunia pe mio iꞌatu kahato Iesui mohey haria tukupteꞌen. Haꞌawyte areto raꞌyn iꞌatuewowi sehay Iesui etiat wakuat moherep hamo wuatꞌi tawa pe kat e hap kat e hap upi. Mio koitywy ahokꞌiwat yne tawa pe Iesui mohey haria teꞌeruwaꞌatunug tuereto maꞌato yt kat i te taꞌatupoꞌoro uhowowi taꞌatumiium koꞌi. Maꞌato eipe Iesui mohey haria tawa Wiripu piaria ewetum kahato raꞌyn uhepe. Eweipatꞌok kahato uhepe ehekat koꞌi.
Yt ehẽku kaipyi yn i ti tuwẽtem ehepiat Iesui mohey hap maꞌato yne kaipyi tuwemoherep. Miꞌi tupono urutuwehum kahato Aiꞌywot atipy piat kape. Yt waureꞌurutoꞌe hin i ti urukyꞌe ehepiat hap iꞌewyte miitꞌin kyꞌe ehepiat hap ete Aipotypot Iesui mohey hap kaipyi. Iꞌewyte eipotpap hap koꞌi yt uruiwaure hin i.
Maꞌato yt uiwẽpohep hin i Iesui mohey hap ete waĩꞌiꞌatuꞌe pykai. Uiꞌauka pote uiꞌauka maꞌato yt uipohep hin i te. Katupono Tupana tiꞌatuehakyeraꞌat teran kahato tomiꞌairoria ahoꞌopot kahato Iesui mohey iꞌatuepiat hamuat pykai. Miꞌi hap kaipyi Tupana tiꞌatuehakyeraꞌat miꞌiria. Miꞌi hawyi Iesui kahu hap ewywuaria raꞌyn tukupteꞌen iwywo wuatꞌi eꞌat pe raꞌyn.
Aikotã watehaꞌat seput haria kape hap ewy aheꞌyian miaria Tupana mohey haria teꞌerahaꞌat ahowawi atipy kaipyi aikotã som watopyhuꞌat Tupana mohey hap ete hap kape teꞌerahaꞌat. Iꞌatu kahato miꞌiria ahowawiat sehaꞌat haria. Atipy kape tuwat raꞌyn aheꞌyian miaria saꞌawyꞌi wuaria Tupana mohey sese haria sehaꞌat ahowawiat haria. Taꞌi ipotyi rakat yrysakag aiꞌakag etiat wywo pote yt aihyha hin i aikohyeput turan. Aiminug saꞌag yrysakag howapy kahato aiꞌok pe tote hap ewy aiwanetup saꞌag hap ipotyi hap ewy. Aiꞌakit hamuat wateput turanuat hap ewy maꞌato yt kat i ipotyi hap pote wateput kuap aihyha kahato aiminug saꞌag watipun hawyi. Miꞌi pote waku watiꞌokhytpun aiminug yt naku i nug hap koꞌi. Miꞌi rẽ waku watomohey Tupana haty wo yne aipyꞌa pe. Miꞌi watunug mote seput haria ikohyeput haty wo rakaria ewy watopyhuꞌat. Maꞌato ahepiat aiꞌaparap kahato imohey hap etiat pote aikotã ipotyi hap aiꞌaparap hap ewy. Aikotã seput hat teput hap ete yt waure i hatek pykai ipy sero pykai hap ewy waku watomohey -Putꞌok are aru paĩ an waku watoꞌe hap yn aiwanetup hap. Waku watomohey potꞌi yt kat i iwaure wo wuat neꞌi hap wywo aiwanetup hawiat hap wywo.
Saꞌawyꞌi -Eweiwehytꞌok o eheꞌyi Kanaꞌã pe e Tupana aheꞌyian miaria pe. Waku itote eiwemohy e maꞌato -Yt iꞌatuꞌe. Miꞌi hawyi howasat rakaria wo tukupteꞌen yahig note. Yt naku i mio tã watoꞌe Tupana pe. Waku watoꞌe -Taꞌi urupap kahato eupi waku watoꞌe. Urutuwemohy teran kahato ewywo waku watoꞌe. Yt naku i ahoꞌowasat hap topyhuꞌat nagnia ewy uiwyriaꞌin.
Uito ti Peteru. Uimikyꞌeria sese eipe. Miꞌi pote atikyꞌesat kahato ewetunug uimikyꞌesat ewy. Atikyꞌesat kahato eweiꞌatoiat yne ehewaire hap kyꞌesat hap koꞌi eipiit mikyꞌesat saꞌag koꞌi. Karãpe wẽtup ok ehãꞌãg hawyi -Yt atikyꞌesat i eweiꞌe. Taꞌi aimikyꞌesat saꞌag koꞌi aipyꞌa piat toineꞌen aat kaꞌap hawyi meiũran yt kat i Tupana kyꞌe hap toineꞌen aikai kat pote mekewat aimikyꞌesat saꞌag koꞌi tuꞌuka kahato Tupana mikyꞌesat hap wywo aipyꞌa pe. Mesuwat rotiaria ewy yt naku i watopyhuꞌat kat pote atipy piaria aito pote. Ahewyry mesuwarote wen maꞌato ahetama sese yt mesuwarote i. Miꞌi pote yt naku i iraniaꞌin mikyꞌesat ewywuat watunug saꞌag iꞌatuwywo.
Pyno eiwemotag o Tupana ehay wo hegyiꞌat hap kaipyi are iꞌewyte Tupana eikyꞌe hap kaipyi. Ahehakyeraꞌat hat Aipotypot Iesui mohey hamo eiwemotag o. Imohey kahato haria wo eweikupteꞌen hawyi ihãite kahato rakaria eipe. Imohey hap upi ihay wakuat upi yn atikyꞌesat eweikupteꞌen uito areꞌe ehepe uimiwan me ahenoi.
ကြော်ငြာတွေ