Wiripu 1:10 - Sateré-Mawé

¹⁰ Etum iꞌatuepe esaika hap poꞌog wakuat airo hamo. Miꞌi tã etunug pote eꞌewy tukupteꞌen yt kat i saꞌag nug hap iꞌatukai. Miꞌi tupono Esaꞌyru taꞌaipok Morekuat no mesuwat yi kape turan uwe waku uwe yt e hamo Wiripu piaria emohey haria yt teꞌeruwemoti hin i miꞌi hap eꞌat pe.

Wiripu 1:10 ပူးပေါင်းရင်းမြစ်များ

Mateu 16:23

Mio tã e pote Iesui tuwemorem Peteru kape hawyi toꞌe -Erẽtem no uikaipyi ahiag e katupono en wyti aikotã nu toineꞌen muap tote aipysatpun hanuat ewy neꞌi. Miꞌi tupono ti ewat ewanetup hap mesuwat rotiaria miitꞌin wanetup hap ewy neꞌi. Yt Tupana woꞌonapin hap ewy hin i.

Mateu 26:33

Miꞌi pote Peteru toꞌe -Uito aru yt karamuo hin i aremoti epupi e. Yne iraniaꞌin eꞌatoiat pykai uito yt karamuo hin i aru woroꞌatoiat En e Peteru.

Iuwãu 1:47

Maꞌato putꞌok e irane turan Iesui ti taꞌakasa raꞌyn Natanaeu kape hawyi toꞌe -Meiẽ meipe ti raꞌyn tuut aiꞌywania Isareu ywania sese hãpyk kahato rakat e.

Iuwãu 3:20

Yt nakuap i nug haria yt ikyꞌesat i neꞌi ariãty e. Taꞌatukyꞌesat pya kahato taꞌatukawiat hẽtyhot hap katupono taꞌatuminug saꞌag koꞌi moherep hap yt taꞌatukyꞌesat i haype e.

Iesui Potmuꞌeria 24:16

Nimo pyi te mesup te yt atiꞌaparap teran i uhepiat imohey hap ete kat pote yt aremoti hin i uipyꞌa pe miitꞌin mupi e. Taꞌi Tupana tikuap pywo uiꞌe hap e.

Humanu 12:2

Waku watum aipiit Tupana kape. Yt naku i watunug ne aikotã mesuwarotiat Tupana yt kuap i haria wanetup saꞌag hap ewy ainapin saꞌag ewywuat. Yt naku i watuwat iꞌatuehay upi kat koꞌi kat koꞌi saꞌag nug hamo. Waku poꞌog watoꞌe Tupana kape -Etihep uiwanetup hap wyi mesuwarotiat saꞌag wanetup hap hawyi uiwanetup hap etimopakup i ewat ewywuat. Uipyꞌa pe uiꞌakag me uipiit pe uiwanetup hawe ereineꞌen Tupana uipytꞌat nug hatno. Miꞌi hawyi ewanetup hap eiam mo areineꞌen neran. Mio tã eweiꞌe Tupana pe pote eweikuap kuap Tupana mikyꞌesat koꞌi kat som tutunug neran hap nug hamo. Kat som imowepiit hap kat som hãpyk sese imikyꞌesat ewywuat hap mio tã eweiꞌe Tupana pe pote.

Humanu 12:9

Karãpe watiꞌatukyꞌe miitꞌin pote waku watiꞌatukyꞌe kahato aipyꞌa pyi yt kat aheso hap wywo i. Waku watopyhuꞌat haiwot rakat ewy maꞌato yt miitꞌin ete i. Waku ahaiwot rakaria ewy watopyhuꞌat aiminug saꞌag hap koꞌi ete. Maꞌato waku watikyꞌesat kahato waku nug hap koꞌi. Yne wakuat waku watat maꞌato yt naku i hap waku watipun.

Humanu 16:17

Tukupteꞌen Iesui mohey ran haria maꞌato mesuwat yi tote yt naku i rakaria katupono woꞌoehay uuka teran sehay wuat haria tukupteꞌen. Taꞌi miꞌiria taꞌatupatꞌok patꞌok teran kahato aito hap taꞌatukyꞌesat kahato. Miꞌiria aimoꞌakagꞌaia taꞌatuehay wuat hap taꞌatuehay wo. Yt Iesui kyꞌe hap kaipyi i maꞌato wẽtup mohey hap kape wẽtup sehay kape aimoꞌakagꞌaia teran. Typy mohey hap nug hamo yt Aimimohey Iesui ewy i taꞌatumoherep yt aimimohey sehay yt ewy i yt aimuꞌe hap saꞌawyꞌi wuat Iesui potmuꞌeria piat yt aimuꞌe hap ewy i aimuꞌe. Yt naku i. Uiwyriaꞌin karãpe miꞌiria ewywuaria putꞌok iꞌatuꞌe eipyꞌasetpe ehepiat Iesui mohey hap nug kowoꞌi kowoꞌi hanuaria eiweꞌeg wo o miꞌiria pupi. Miꞌiria putꞌok iꞌatuꞌe turan waku eweikuap meremo iꞌatuepiat eimaꞌat reran hap hawyi yt eweiwat i iꞌatuehay upi. -Urumuꞌe ro uhyt mana yt eweiꞌe teiꞌo iꞌatuepe. Iꞌatuehay pupi eweikenꞌẽ o. Uiwyriaꞌin Iesui mohey haria eipe pyno worohoꞌonapin haty puo yt eweipomeꞌeg teiꞌo ehewaure kaꞌa woꞌopatꞌok patꞌok Iesui mohey haria etiat iꞌatumoꞌakagꞌaia hap kaipywiaria kape.

Humanu 2:18

Urumikuap yne kat som Tupana tikyꞌesat miitꞌin tunug hap watoꞌe wuatꞌi ywania pe. Uruikuap kahato Tupana miwan kaipyi kat som waku kat som yt naku i hap watoꞌe. Uruikuap kahato urupyꞌa pe kat e hap yt pywuat i hap katupono Tupana e hap miwan miat tutum uruepe watoꞌe iraniaꞌin me.

Humanu 7:16

Miꞌi hawyi atunug yt naku i turan uiwanetup hap -Waĩꞌe uhepe -Yt etunug Tupana mikyꞌesat ewy hin i e uiwanetup hap. Muisei piat ainapin hap yt ewy hin i uiwanetup hawyi -Yt etunug neiꞌo e hap ete yn Atiꞌaparap.

Humanu 7:22

Mekewat uito sese atikyꞌesat kahato Tupana ehay e hat uipap kahato Tupana piat ainapin hap upi.

Humanu 8:7

Karãpe watopyhuꞌat mesuwarotiaria ewy aiwanetup hawe hawyi yt watunug hin i Tupana mikyꞌesat koꞌi. Yt watunug hin i ainapin miwan miat. Pyno watikuap Tupana ehay hawyi -Pyno atunug Tupana mikyꞌesat watoꞌe maꞌato yt watunug kuap i wahãꞌãg pykai katupono aimikyꞌesat yn aiwanetup hawe yt Tupana mikyꞌesat hin i. Miꞌi pote mesuwarotiat miit ewy aimikyꞌesat koꞌi watunug hawyi yt naku i nug haria wo watopyhuꞌat. Watunug Tupana ahewanikap mo.

1 Kuriniu 1:8

Koitywy Aikaꞌiwat aimoheg kahato tehay wo. Yt watoiat kuap i ahepiat imohey hap wuatꞌi eꞌat pe pote. Miꞌi tã ti tutunug mesuwat yi kahuro hap kape. Miꞌi hawyi meremo taꞌaipok i Aipotypot Wuatꞌi Mimotypot no. Aikaꞌiwat Iesui putꞌok e hap eꞌat pe turan -Yt kat i saꞌag atipuẽti miꞌiria ete e Iesui ahetiat.

1 Kuriniu 10:32

Waku aheineꞌen yt uwe maꞌat hatno i. Waku watopyhuꞌat yt Iuteu ywania aparap hatno i. Yt naku i Iesui mohey hap auka hat watopyhuꞌat aiminug koꞌi kaipyi. Iꞌewyte iraniaꞌin ywania aparap hatno yt naku i watopyhuꞌat. Yt naku i watoineꞌen Iesui mohey haria Tupana yat piaria maꞌat hat neꞌi.

1 Kuriniu 8:13

Pyno uito yt karãpe i atuꞌu miꞌu puꞌi mekewat uipotmaꞌat hap pupi katupono yt atikyꞌesat i uiwyꞌok wẽtup ok Iesui mohey pakup hat maꞌat hatno areineꞌen. Yt atimaꞌat reran i uheꞌywyt uheinyt uheꞌykeꞌet pote -Waku atoiat miꞌu puꞌi tupanaria motypot hap areineꞌen iꞌatuwywo turan areꞌe yn uipyꞌa pe.

2 Kuriniu 1:12

Yt karãpe i uruiꞌatumaꞌat eipe tawa Kurintiu piaria. Poꞌog hãpyk torannia kai hap ewy urutukupteꞌen eipyꞌasetpe. Tupana motypot hap yn urutunug itote. Yt uruweꞌeg hap kaipyi i urupotpap ehehamo maꞌato Tupana urumoweꞌeg hap kaipyi uruimotypot Tupana miitꞌin pyꞌasetpe. Yt uruhepap hap kaipyi i maꞌato Tupana tum uruepe tegyiꞌat hap tomisepap nug kuap hamo hawyi hesaika hap wywo uruimoherep wakuat itote saꞌawyꞌi. Miꞌi pote uruminug ete Tupana urupowyro hap kaipyi uruimotypot Tupana itote saꞌawyꞌi. Miꞌi hawyi miitꞌin teꞌeruwehum kahato Tupana kape. Yt uruewawi i maꞌato Tupana kape yn teꞌeruwehum uruminug wakuat upi. Miꞌi hawyi Tupana kape teꞌeruwehum hawyi urumowepiit kahato kat pote uruminug kaipyi Tupana motypot hamo urutukupteꞌen mote.

2 Kuriniu 2:17

Tukupteꞌen Tupana ehay moherep haria maꞌato yt pywo pe i rakaria. Yt Tupana kyꞌe hap wywuat sese haria i aimuꞌe maꞌato ahekat kyewi neꞌi -Mio tã e Tupana iꞌatuꞌe maꞌato yt miꞌi tã e hin i pykai taꞌatuꞌywyk neꞌi. Maꞌato ahehay mio tã watoꞌe -Tupana tipoꞌoro raꞌyn Tosaꞌyru ahehakyeraꞌat hamo watoꞌe. Miꞌi pote waku watunug Iesui Aiporekuat no watoꞌe aipyꞌa pyi watoꞌe. Urukaꞌiwat mowepiit hamo yn uruiꞌatumuꞌe miitꞌin koꞌi.

2 Kuriniu 6:3

Koitywy Aikaꞌiwat ehay moherep haria raꞌyn aito. Miꞌi pote waku aiweꞌeg wo kahato watoineꞌen. Kat pote karãpe watiꞌaparap pote miitꞌin teꞌeruwekyryꞌi kahato Aikaꞌiwat Iesui ete iꞌewyte ahete. Miꞌi hawyi yt uwe i tuwanetup teran ahehay kape.

2 Kuriniu 8:8

Pyno -Ewetum no yt areꞌe i haty wo ehepe. Yt ewetum i pote yt naku i yt areꞌe kuap i ehepe. Eipyꞌa pyi ewetum ihakyꞌeꞌi rakaria tawa Ierusarẽi miaria piat hap iꞌewyte iꞌatukyꞌe kahato wywo hap uruikyꞌesat. Miꞌi hawyi Tupana tikuap ehegyiꞌat hap tokyꞌe kahato hap. Waku watimoherep imohey haria yi Masetunia ewy ehegyiꞌat hap.

Karasia 5:11

Uiwyriaꞌin uito arepotmuꞌe kahato Iesui kuꞌuro ariaꞌyp posak etiat hap ete. Miꞌi eweimohey pote toineꞌen eheineꞌen pakup i hap are. Maꞌato miꞌi hap ete toꞌokyryꞌi kahato. Yt karãpe i arepotmuꞌe wen -Eremusin ãpy sokpe tek ehehakyeraꞌat hamo pote waku yt karãpe i areꞌe ehepe. Mio tã ahenoi pote yt toꞌokyryꞌi hin i katupono Iuteuria taꞌatumikyꞌesat ewywuat pote.

Ewesu 4:15

Iuteu eko iꞌewyte waĩꞌiꞌatuꞌe hap koꞌi yt Tupana miwan ewy i toimoweityk miꞌi hawyi towatno tutunug mote Iuteu ywania iꞌatupyꞌahak kahato ehete kat pote yt iꞌatueko yt ewy i raꞌyn aheko pote iꞌatuwoꞌonapin hap koꞌi iꞌatuwoꞌoewaĩ hap koꞌi. Miꞌi pote iꞌatupyꞌahak -Waĩ waĩꞌiꞌatuꞌe maꞌato yt eweiwat i waĩꞌiꞌatuꞌe hap upi hawyi woꞌoꞌewanikaptia wo eweikupteꞌen. Typy ywania eweikupteꞌen saꞌawyꞌi. Miꞌi hawyi putꞌok e Aikaꞌiwat Iesui hawyi toiꞌatukay kay yne miitꞌin tuwewawi yne ywania. Miꞌi hawyi tutunug yne miitꞌin Tupana ywania wo. Koitywy ipatꞌok yne ywania Iuteu ywania eiꞌywania iraniaꞌin ywania tukupteꞌen Iesui mohey haria. Miꞌi hawyi watukupteꞌen mesup yne yne raꞌyn wẽtup piit ewy Iesui wywo woꞌowese rakaria raꞌyn watopyhuꞌat.

Ewesu 5:10

Pyno waku watikat kat som Aikaꞌiwat tikyꞌesat hap. Miꞌi hawyi waku watunug imikyꞌesat ewy imowepiit hamuat aikotã aimikoi hewo kahato aimowepiit hap ewy.

Ewesu 5:27

Miꞌi pote aito imohey haria yne watopyhuꞌat iharyꞌi ewywuat maꞌato aikyiꞌat eꞌyian mete ainug ikahu kahato rakat ewy iweꞌeg kahato rakat ewy. Yt karãpe i iꞌaparap hat ewy ainug tehay wo. Ihay yꞌy ewywuat aikoho hap maꞌato ihay ainug ihãite kahato rakat ewywuat ipe ikahu rakat ewy ipiit kahu rakat ewywuat teharyꞌi ewy ainug. Aipiit yt ipit pit hin i hap ewy ainug imohey haria yt kat i saꞌag ahete aiwei tehay wo hawyi.

Ewesu 6:24

Tupana ereineꞌen hegyiꞌat kahato rakatno emohey haria pe katupono Esaꞌyru urukaꞌiwat Koro Iesui kyꞌe kahato haria miꞌiria are. Etiꞌatukyꞌe teꞌen neꞌi miꞌiria katupono Emipoꞌoro uruporekuat kyꞌe wuatꞌi eꞌat piat haria miꞌiria areꞌe aat kaꞌap Tupana pe mesuwe woꞌopyhik hawe. Worohoꞌokyꞌe eipe are.

Wiripu 1:16

Maꞌato iꞌatu kahato uikyꞌe haria. Miꞌiria tikuap taꞌyn Tupana miꞌairo uito hap. Taꞌatukuap Tupana uipoꞌoro tehay wakuat moheg miitꞌin wanetup hawiat miitꞌin pya piat tehay pywuat kuap hamo. Miꞌi pote uikyꞌe haria miꞌiria.

Wiripu 1:6

Saꞌawyꞌi watomohey Iesui hawyi Tupana miehakyeraꞌat hanuaria watopyhuꞌat. Tohaꞌawynug ahehakyeraꞌat hap hawyi yt aiꞌatoiat hin i e. Yne eꞌat pe haꞌawytepyi mesup te mukiꞌite ahehakyeraꞌat kuap hat Iesui topyhuꞌat. Poꞌog poꞌog yne eꞌat pe aimoesaika kahato tewaku hap nug hamo. Ahehakyeraꞌat kahato haꞌawyte mesup te Haꞌyru taꞌaipok Aipotypot no hap kape mesuwat yi kape taꞌaipok hap kape ahehakyeraꞌat hamuat wuatꞌi eꞌat piat hap kape. Yt uheso hin i are. Topyhuꞌat kahato aipyꞌa pe Iesui wuatꞌi eꞌat pe. Ipotpap kahato aiwanetup hawe aimoewaku kahato hamo. Yne eꞌat pe miꞌi hap koꞌi wyti waku watomohey e.

Wiripu 2:16

Katupono watimoherep kahato miitꞌin me muap Tupana kapiat aikotã waikiru hẽtyhot wãtym muo hap ewy watopyhuꞌat. Meiũran Aipotypot Iesui putꞌok e mesuwat yi tote yne aiminug moherep hamo sio waku sio yt e hamo. Miꞌi hap eꞌat pe uimowepiit haria wo eipe katupono miꞌi hap eꞌat pe wuatꞌi ehamo -Miꞌiria ti uhemiit sese. Miꞌiria ti uhehay moherep haria sese e aru Iesui ehepiat. Mio tã toꞌe hawyi uimowepiit kahato hap topyhuꞌat katupono eipe uimimuꞌeria sese pote. Taꞌi arehum kahato itote katupono yt eweipun hin i einapin uhepiat hap. Miꞌi hawyi Tupana tuwehum kahato topotpap nug haria ete.

1 Tesaronika 3:13

Eiwoꞌokyꞌe kahato pote Tupana eimoesaika wakuat nug hamo aikotã toꞌowywuat hamo. Miꞌi pote ti aru karãpe Tupana tuut Tosaꞌyru wywo teropat haria wywuat turan ehewaku kahato hap toipuẽti eikai katupono miitꞌin kyꞌe kahato haria eipe pote. Miꞌi hap uruikuap taꞌyn uruto Pauruꞌin.

1 Tesaronika 5:21

Karãpe wẽtup ok aimuꞌe turan waku watuwanetup -Tupana e hap ewy sio waku watoꞌe aiwanetup hawe. Ipaꞌãu kaipyi pote waku watoꞌe yt pote watiꞌairo hawyi waku yt nakuat i watipun.

1 Tesaronika 5:23

-Tupana etiꞌatupowyro o uruwyriaꞌin itotiaria. Etiꞌatumoperupꞌi wakuap nug hamo are. Uruikyꞌesat tawa Tesaronika piaria emohey haria wuatꞌi kupteꞌen hap. Etiꞌatumopakupꞌi iꞌatuwanetup pakup i hamo are. Miꞌi hawyi yt kat i iꞌatuwanetup saꞌag hap kapiat hap uruikyꞌesat uruꞌywot urutoꞌe. Uruikyꞌesat miꞌiria ewatno yn hap urutoꞌe. Miꞌi tã etunug mote ti aru karãpe Esaꞌyru emipoꞌoro uut turan yt kat i iꞌatuminug saꞌag huut turan etipuẽti aru urutoꞌe yn Tupana pe.

1 Iuwãu 4:1

Uiwyriaꞌin yt eweimohey teiꞌo yne woꞌomuꞌe haria -Uito Tupana Paꞌãu eiam iꞌatuꞌe pykai. Waku eweikat i kat i miꞌiria sio Tupana Paꞌãu eiam sio yt hap kuap hamo. Katupono iꞌatu kahato woꞌomuꞌe haria mesuwat yi totiaria yt pywo piat haria i katupono wẽtup paꞌãu iꞌatupiit pe.

Iesui Aru E Hap 2:2

Uimohey haria tawa Ewesu piaria worohoꞌokuap kahato eipe. Uipotpap nug kahato haria eipe are e. Yt eipohep hin i uheropat hap ete e. Yt eweikyꞌe hin i yt naku i nug hap neꞌi. Atikuap eheko waku hap. Karãpe wẽtup ok putꞌok e eimuꞌe hamo turan hepama ihay eweimohey sio uhehay wo sio yt hap kuap hamo e. Maꞌato yt uhehay i neꞌi pote meremo -Eso i rat eweiꞌe tope. Ewehãꞌãg kahato mekewat sio Tupana mipoꞌoro wẽtup miit sio tuwehay pyi neꞌi hap kuap hamo e.