Titu 3:2 - Sateré-Mawé

² Iꞌewyte yt uwe teiꞌo eweiꞌatuehay moweukaꞌi ereꞌe o. Iꞌewyte miitꞌin wuatꞌi wywo o eiwese eweikupteꞌen ereꞌe o Titu. Iꞌewyte waku eweikat ewy ewese hap wywo. Iꞌewyte eiperupꞌi kahato yn o yne miitꞌin ete eweikupteꞌen ereꞌe o Iesui mohey haria pe.

Titu 3:2 ပူးပေါင်းရင်းမြစ်များ

Mateu 11:29

Pyno torannia uimohey haria eiwemohapap to uhete kat pote uito waku kahato areineꞌen iperupꞌi kahato rakat. Miꞌi hap kaipyi eweipuẽti kuap aru eiwemohy hap sese.

Iesui Potmuꞌeria 23:5

Miꞌi hawyi Pauru tiwesat -Yt atikuap i wyti paꞌi koro meiũ hap uiwyriaꞌin katupono miwan me -Yt ehay koꞌi koꞌi teiꞌo eiporekuat ete e ti ainapin hawe e Pauru.

1 Kuriniu 6:10

Seroꞌok e haria yt uwe i itote. Yt hegyiꞌat i rakaria yt uwe i. Iꞌewyte yt uwe i aru woꞌeromopusu hat miitꞌin mohit hat itote. Yt uwe i -Uiatno yn mo e hat iꞌewyte imopẽꞌã rakat.

1 Kuriniu 9:19

Yt uwe i uikyiꞌat kuap saꞌup mo are. Yt uwe i -Urumuꞌe ro urumikyꞌesat ewywuat pote saꞌup iwato urutum epe Pauru e haria. Uito ti Tupana mikyiꞌat uito are. Tupana po pyi yn arenuk teren. Yt kat i miitꞌin wanetup hap uikai maꞌato Tupana wanetup hap wywo yn worohoꞌomuꞌe are. Yt kat i eikat kyewi hap wywo worohoꞌomuꞌe. Uito areineꞌen wuatꞌi miitꞌin eropat hat katupono atekyi teran wuatꞌi miitꞌin Iesui kape pote.

2 Kuriniu 10:1

Uito ti eimuꞌe hat sese saꞌawyꞌi wuat. Haꞌawyte Tupana uipoꞌoro ehewowi. Miꞌi turan worohoꞌonapin perupꞌi puo aikotã Aikaꞌiwat Iesui ainapin hap ewy aikyꞌe hap wywo. Saꞌawyꞌi ihakyꞌeꞌi hakyꞌeꞌi rakatno uito areineꞌen eipyꞌasetpe turan poꞌog yi kape. Maꞌato koitywy areineꞌen pya eikai. Miꞌi pote worohoꞌonapin uimiwan me haty wo uiwemotypot wywo.

2 Kuriniu 12:20

Pyno areto i raꞌyn wyti ehewowi aikotã itotiat hap kuap hamo. Arekenꞌẽ kahato putꞌok uiꞌe turan eiwuꞌuka hap pupi. Yt worohoꞌopuẽti teran i yt eiwoꞌowese i turan neꞌi. Maꞌato worohoꞌopuẽti eiwoꞌoehay ewaĩ ewaĩ turan neꞌi pote arekenꞌẽ kahato areineꞌen eiꞌapiheg hatno neꞌi tet pupi. Yt naku i worohoꞌopuẽti eiwoꞌoehaꞌywyi ehekat koꞌi etiat turan neꞌi. Iꞌewyte eiwoꞌope eimopyꞌahak turan neꞌi yt naku i worohoꞌopuẽti yt eiwoꞌowesat i eiwoꞌope turan neꞌi. Iꞌewyte yt naku i eiwoꞌoewa pe eiwoꞌowese maꞌato eiwoꞌoꞌokpe wo ehehay saꞌag hap ete turan neꞌi worohoꞌopuẽti hap. Yt naku i worohoꞌopuẽti eiwoꞌoweukaꞌi turan neꞌi. Iꞌewyte eiwoꞌohoiro hoiro turan neꞌi. Arekenꞌẽ wuꞌuka hap etiat -Uito poꞌog eikai eiꞌe turan neꞌi.

Karasia 5:22

Maꞌato Tupana Paꞌãu mikyꞌesat ewywuat watunug hawyi woꞌokyꞌe haria wo watoineꞌen. Woꞌomowepiit haria wo watoineꞌen. Woꞌokuap haria kahato wo watoineꞌen. Miit perupꞌi wo watoineꞌen. Woꞌowese haria wo watoineꞌen. Aiwoꞌopiat aiꞌe hap nug haria wo watoineꞌen.

Karasia 6:1

Uiwyriaꞌin Karãpe wẽtup ok yt naku i iꞌaparap hap inug miꞌi pote waku wẽtup ok toto Tupana Paꞌãu sehay wywo iꞌaparap hat napin perupꞌi wuat hamo. Miꞌi hat wyti waku kahato inug maꞌato waku miꞌi rakirẽ tuweꞌeg wo raꞌyn toineꞌen tepiat iꞌaparap hap pupi iraniaꞌin napin rakirẽ.

Karasia 6:10

Pyno ti waku watikat aikotã iraniaꞌin powyro hamuat. Waku ti yne watunug wakuap torannia miitꞌin me. Maꞌato ti Iesui mohey haria ti waku poꞌog watiꞌatupowyro wakuap no. Uiwyriaꞌin ewehehaꞌat ro uipo wuat uimiwan iwatoꞌin kahato rakat kape.

Ewesu 4:2

Yt naku i watoꞌe aiwanetup hawe -Uito poꞌog iraniaꞌin imohey haria kai yt naku i watoꞌe. Pyno toꞌiro watoineꞌen hãpyk kahato rakaria wo. Waku watuwepotpap Aikaꞌiwat kape aiperupꞌi wywo yt kat i aipyꞌahak hap mywo waku are. Waku watimoherep iraniaꞌin miitꞌin kyꞌe hap yne aiminug koꞌi ete are. Waku watiꞌatukyꞌe iraniaꞌin yt iꞌatuwese i pykai.

Ewesu 4:31

Watimoꞌarot kahato Tupana Paꞌãu karãpe aipyꞌahak iraniaꞌin ete pote. Miꞌi pote waku watoiat mekewat yt naku i haiug nakaria are. Yt naku i watuwehum haryporia kape ihainia kape ipiit kyꞌesat hap wywo ahewaire teran hap wywo. Miꞌi watunug mote Tupana Paꞌãu aipiit pe iꞌarot kahato hap ewy are. Yt naku i watopotwesat ahehay pirik hap wywo ahehay saꞌag wywo. Yt naku i marakꞌa wo watoineꞌen. Miꞌi tã watoineꞌen mote miꞌi tã watunug mote Tupana Paꞌãu moꞌarot hat watoineꞌen.

Wiripu 4:5

Iꞌewyte ti waku yt ipyꞌahak takaria wo i watukupteꞌen e. Waku yne miitꞌin wesat hatno watoineꞌen. Yt eweiwaure teiꞌo Aikaꞌiwat uut hamuat hap eꞌat katupono taꞌaipok irane Aiꞌakag koro are. Miꞌi pote waku wakuaria ewy watukupteꞌen wuatꞌi eꞌat pe.

1 Tesaronika 2:7

Uruto ti Iesui potpoꞌororia sese maꞌato miꞌi pykai urumotypot ro urupoi ro yt urutoꞌe i ehepe. Perupꞌi popuo urutukupteꞌen eipyꞌasetpe aikotã aity aimoperupꞌi moperupꞌi temi ete hap ewy.

1 Timoteu 3:11

Iharyꞌi waku rakat yn waku. Iꞌewyte yt naku i iharyꞌi marakꞌa poityꞌi rakat neꞌi. Waku iharyꞌi iweꞌeg kahato rakat sehay pywuat piat yn ihay rakat.

1 Timoteu 3:3

Yt naku i mahy se kuap hat iꞌewyte marakꞌa yt naku i. Waku miitꞌin ete iperupꞌi kahato rakat woꞌowese hap etiꞌairo. Yt naku i kareꞌen kyꞌesat hap kape yn iwanetup hat.

Tiaku 3:17

Maꞌato Aiꞌywot atipy piat iweꞌeg sakpo toineꞌen. Miꞌi ti aimuꞌe kahato aipyꞌa pe toweꞌeg hap yt ahiag wat ewywuat hin i. Mio tã e ahepe -Pywuat kahato eweikupteꞌen no Uiꞌewy e ahepe. Woꞌowese haria wo ro eweikupteꞌen e. Woꞌokyꞌe haria wo woꞌopowyro haria wo woꞌowesat kahu hanuaria uiꞌewy o eweikupteꞌen o e ahepe. Waku woꞌokyꞌe hap moherep hanuaria wo eweikupteꞌen e ahepe. Waku wakuat nug haria wo eipe e. Waku yt wẽtup ok i miit mohit hanuaria wo eweikupteꞌen no e ahepe. Waku yt typy ehay rakaria wo eweikupteꞌen e. Waku toꞌoꞌewyꞌewy wuatꞌi miitꞌin kyꞌe haria wo eweikupteꞌen e ahepe aimuꞌe kahato hat atipy piat Aiꞌywot.

Tiaku 4:11

Uiwyriaꞌin yt naku i ahehay saꞌag wẽtup ok ete iraniaꞌin ete katupono Tupana toꞌe miwan me -Eiwoꞌokyꞌe ro eiwoꞌope e. Miꞌi pykai watimohit neꞌi wẽtup ok iraniaꞌin ehamo pote -Yt naku i meiẽwat miit watoꞌe pote Tupana woꞌonapin hap pun hanuaria wo watoineꞌen katupono yt iꞌe hap ewy hin i watunug mote. Uiwyriaꞌin yt naku i watimohit wẽtup ok ahehay yt naku i rakatno. -Etiꞌatumotypot ro iraniaꞌin e Tupana saꞌawyꞌi miwan me. Karãpe watiꞌatusatyꞌi satyꞌi miitꞌin ahehay wo hawyi watiꞌaparap kahato Tupana piat ainapin hap yt watimotypot i aiwy pote. Miꞌi hawyi watimohit Tupana piat ainapin koꞌi katupono aiꞌe hap aiwenapin hap saꞌag yn watunug. Poꞌog waku watunug ainapin hap sese Tupana iweꞌeg sese rakat piat ainapin hap. Yt naku i eweiꞌatumohit wẽtup ok miit e Tupana pote.

1 Peteru 2:1

Pyno uiwyriaꞌin waku watoineꞌen Tupana mepytꞌin no ipakup i rakaria ewy kurin nakaria ewy. Aikotã mihy sym haria ewy watukupteꞌen katupono Tupana mimoherep pakup i koꞌi raꞌyn aito. Miꞌi tupono waku watoiat yne aiminug koꞌi saꞌawyꞌi wuat yt naku i hap koꞌi. Mekewat miitꞌin maꞌat hap koꞌi mekewat miitꞌin mohit hap koꞌi mekewat typy sehay nug hap koꞌi mekewat iraniaꞌin ekat kyꞌesat hap koꞌi mekewat sehay saꞌag nug hap koꞌi mekewat miitꞌin ekat kyꞌesat hap koꞌi uhehayꞌywyi hap koꞌi waku watoiat yne aikotã watoiat ahesokpe yt ikahu i rakat hap ewy waku watoiat.

1 Peteru 3:10

Uiwyriaꞌin eweikupteꞌen mesuwarote iwese kahato rakaria wo iwepiit sese rakaria wo eweikupteꞌen are. Maꞌato eheineꞌen hap mesuwarotiat iꞌewyte wepiit hap ikahu sese hap koꞌi eweikyꞌesat pote eiwenapin ihay nug hap ete iraniaꞌin wywo. Eweimuꞌe ro ehẽku sehay wakuat nug hamo are. Karãpe ehẽku ihay teran saꞌag nug hap ete pote -Waĩꞌeweiꞌe o ehẽku pe. Karãpe ehẽku timohit reran iraniaꞌin mote -Waĩꞌeweiꞌe o ehay saꞌag nug hap ete.

1 Peteru 3:8

Pyno mesup ahenoi teran uiwenapin hap yne Iesui mohey haria pe. Mio tã are aikotã wẽtup miit ewy waku eweikupteꞌen eiwanetup hawe. Waku woꞌokyꞌe kahato haria wo eweikupteꞌen are. Waku eipyꞌa pe eiwoꞌokyꞌe eiwoꞌope are. Waku eiwoꞌokyꞌe Iesui mohey haria pote aikotã eheywytꞌin eheykeꞌetꞌin eheinytꞌin kyꞌe hap ewywuat are. Aikotã eikywytꞌin eikypyꞌytꞌin ehekiꞌitꞌin kyꞌe hap ewy wẽtup mepytꞌin sok ewy waku eiwoꞌokyꞌe are. Karãpe hoꞌopot hap putꞌok e wẽtup ok Iesui mohey hat ete hawyi etipowyro o miꞌi. Iꞌewyte karãpe iraniaꞌin hatek pote etipowyro miꞌi eipyꞌa pyi ikyꞌe hap wywo. Waku eweikupteꞌen eiwese kahato iraniaꞌin etiat rakaria wo. Waku eweiꞌe iraniaꞌin Iesui mohey haria pe -Wẽtup yn aimimohey uhyt mana eweiꞌe o are. Ereke uhyt mana mimi eweiꞌe. Eraꞌapyk o eweiꞌe. Miꞌi hawyi hegyiꞌat rakaria wo aru eweikupteꞌen Iesui mohey hap wywo are.

1 Peteru 4:4

Koitywy aiwyriaꞌin saꞌawyꞌi wuaria -Kat pote uruꞌatoiat iꞌatuꞌe. Kat pote yt etunug i te aikotã saꞌawyꞌi etunug hap ewy iꞌatuꞌe. Toꞌiro uhytꞌiꞌin manaꞌin piꞌãꞌin kurumꞌin iꞌatuꞌe ahepe maꞌato -Yt watoꞌe. Toꞌiro iꞌatuꞌe maꞌato yt watuwat i hawyi iꞌatuehay saꞌag ahete. Taꞌatukyꞌesat watunug saꞌag aikotã taꞌatunug hap ewy.

2 Peteru 2:10

Tupana timoma yne raꞌyn tawa Sutuma tawa Kumura piaria. Katupono Tupana yt tikyꞌesat hin i iꞌatuwat iꞌatuieineꞌen hap. Wuatꞌi yne taꞌatupuꞌi mikyꞌesat ewy yn taꞌatunug wuatꞌi haryporiaꞌin wywo wuatꞌi ihainiaꞌin wywo. Taꞌatupiit mikyꞌesat hap koꞌi yn taꞌatunug toꞌope toꞌope. -Yt kan hamo i Tupana mikyꞌesat hap koꞌi taꞌatuꞌe haype. Taꞌatumikyꞌesat ewy yn taꞌatunug. Yt taꞌatumotypot hin i Tupana waĩꞌe hap iꞌewyte miitꞌin waĩꞌe hap yt taꞌatumotypot i. Yt teꞌeruwemoti hin i taꞌatuminug saꞌag hap koꞌi ete. -Atunug mote atunug e haria yn. Taꞌi miꞌiria ti toꞌokyryꞌi kahato neꞌi wakuaria ete. Iꞌewyte atipy piaria ete toꞌokyryꞌi. Taꞌi atipy piaria ti sakpoꞌe ikahuria iꞌewyte poꞌog hesaika rakaria. Miꞌi pykai wemuꞌe haria yt pywuat i enoi haria -Uruto poꞌog iraniaꞌin kai iꞌatuꞌe yn iꞌewyte mio tã iꞌatuꞌe atipy piaria pe.

Iuta 1:10

Yt naku i watopyhuꞌat aikotã tawa Sutuma hawyi tawa Kumura eko ewy. Itotiaria yt teꞌerokenꞌẽ hin i atipy kaipywiaria pupi. Iꞌewyte miꞌiria taꞌatumikyryꞌi kahato yne akag koꞌi etiat haria. Yt taꞌatukuap i Tupana esaika hap pykai iꞌatuehay saꞌag neꞌi. Yne akag koꞌi ete iꞌatuehay saꞌag. Taꞌi miꞌiria ti aikotã gaꞌapy piaria haiwot rakaria ewy tukupteꞌen katupono torannia miitꞌin akag koꞌi ete iꞌatuhuhaꞌi neꞌi iraniaꞌin mimotypot koꞌi ete. Yt taꞌatukuap i waku rakaria haype hawyi yne wakuap koꞌi ete iꞌatusaiwot. Miꞌiria ti Tupana miꞌatusatyꞌi satyꞌi koꞌi katupono tuweupiaria raꞌyn taꞌatuminug saꞌag ete yn teꞌeremoehapap. Miꞌiria iraniaꞌin moweukaꞌi taꞌatueso wywuat haria. Miꞌiria wakuap sese koꞌi yt kuap i haria aikotã awyato miit auka hat ewywuaria iꞌatueko. Miꞌi pote miitꞌin miꞌauka wo teꞌeropyhuꞌat awyato auka hap ewywuat are. Iꞌatuhaiwot popuo syꞌat iꞌatuꞌe yt nakuap i utui hap ete hawyi teꞌeruwewi teꞌeruweꞌauka.

Iuta 1:8

Iꞌewyte yt naku i watopyhuꞌat miꞌiria ewywuat uiwyriaꞌin. Miꞌiria ti aat kaꞌap teꞌeruwanetup hawe ikat aikotã me waku taꞌatunug saꞌag hap iꞌewyte miitꞌin maꞌat hap kape. Miꞌi pote iꞌatumuꞌetu ti saꞌag yn naꞌyn are. Miꞌi hap kaipyi ti taꞌatupiit ete iꞌatumikyryꞌi kahato katupono waire waire hap yn iꞌatuwanetup hawe. Miꞌi pote ti taꞌatunapin neran iraniaꞌin taꞌatueko nug hamuat. Iꞌatusaiwot kahato Tupana ete taꞌatupyꞌa pe. Iꞌatuhuhaꞌi neꞌi pote waĩꞌiꞌatuꞌe Tupana pe. Iꞌewyte torannia morekuaria ete yne tuꞌisaria ete iꞌatusaiwot iꞌatuhuhaꞌi yn naꞌyn. Iꞌewyte Tupana emiitꞌin atipy piaria ete iꞌatumikyryꞌi. Yt teꞌerokenꞌẽ hin i ahiag mupi are.