Titu 2:14 - Sateré-Mawé

¹⁴ Ahehakyeraꞌat hat Iesui ikuꞌuro raꞌyn ariaꞌyp posak ete aikawiatno. Yne yt nakuap i nug saꞌag po pyi aihep hamo ikuꞌuro. Tupana watnuaria wo ainug neran pote wakuaria wo aito hap toikyꞌesat. Miꞌi pote aihep taꞌyn saꞌag nug hap po pyi aimowaku hamo raꞌyn. Koitywy Ahehakyeraꞌat hat iwepiit kahato raꞌyn.

Titu 2:14 ပူးပေါင်းရင်းမြစ်များ

Mateu 1:21

Pyno meiũran ti aru mana Maria mepyt tumoherep ihainia hit wakuat sese rakat e. Miꞌi waku ehetꞌok Iesui are. Katupono miꞌi ti temiitꞌin ehakyeraꞌat iꞌatuminug saꞌag pywiat hamo.

Mateu 20:28

Uito Eheykeꞌet wuatꞌi miitꞌin eropat hat kahato areineꞌen wuatꞌi miitꞌin powyro hat e. Uito Eiporekuat koro areineꞌen wen maꞌato yt iraniaꞌin morekuaria ewywuat i. Iꞌewyte atum irane uheineꞌen hap saꞌup miitꞌin kyiꞌat Tupana watnuat hamo e Iesui topotmuꞌeria pe.

Mateu 3:12

Ipo pe ti toineꞌen awati iãꞌỹi airo hap ypꞌype. Miꞌi hawyi toiporeraꞌat hãꞌỹi hawyi toheiam nug naꞌyn hawyi tohytmoĩ raꞌyn waku puo maꞌato mekewat iꞌape koꞌi ti toiwuk taꞌyn yt karãpiat i hasep takat aria pe.

Iuwãu 10:15

Aikotã Uiꞌywot uikuap kahato hat toineꞌen. Iꞌewyte Uito Uiꞌywot kuap hat areineꞌen. Miꞌi hap ewy uihũria kyꞌe kahato hat areineꞌen pote uiꞌauka hamuat iꞌatuehakyeraꞌat hamo e.

Iuwãu 6:51

Uito ti atipy kaipywiat man miitꞌin moieineꞌen hamuat e. Uwe uwe miꞌi man iꞌu miꞌi hat ti aru toineꞌen wuatꞌi eꞌat pe e. Mekewat uimiium man wyti uipiit e. Atum aru uipiit miitꞌin moieineꞌen hamuat e Iesui.

Iesui Potmuꞌeria 15:14

Pywo ti rat Simau henoi aikotã mio Tupana Paꞌãu teke kuap wuatꞌi ywania Tosaꞌyru mohey haria pya pe e. Toikyꞌesat yne ywania kaipywiat tomiꞌairo tomohey haria e.

Iesui Potmuꞌeria 15:9

Taꞌi toimohãpyk yne wyti iꞌatuwanetup saꞌag hap koꞌi Tosaꞌyru mohey raꞌyn hawyi e.

Iesui Potmuꞌeria 20:28

Pyno eiweꞌeg wo o. Eweiꞌapykok Tupana hũria Tupana Paꞌãu miium eipo puat koꞌi. Eweiꞌatupoi o Tupana hũria Iesui mikyiꞌat tosuu wuat koꞌi ihay wo Tupana emiitꞌin e.

Iesui Potmuꞌeria 9:36

Miꞌi hawyi tawa Iope pe wẽtup ok haryporia Iesui mikyꞌesat nug hat toineꞌen. Miꞌi ti mana Turaka e hap het rakat. Miꞌi haryporia inug waku kahato aat kaꞌap. Toiꞌatupowyro kahato miitꞌin miwaure koꞌi. Toiꞌatupoi hesyꞌat rakaria. Iwese kahato hap toimoherep yne ihakyꞌeꞌi rakaria pe. Toiꞌatupowyro hatek takaria. Tekareꞌen ahyt toimoꞌẽ yt hekat i rakaria pe. Wẽtup het Tapita iꞌatuꞌe Kereku pusu kuap haria.

Karasia 1:4

Iesui tikyꞌesat kahato ti miitꞌin ehakyeraꞌat hap. Toikyꞌesat kahato iꞌatuminug saꞌag kaipywiat teꞌeraꞌaipok hap. Miꞌi hamo tuweium ariaꞌyp posak ete Toꞌywot mikyꞌesat ewy. Miꞌi hamo Tupana tum Tosaꞌyru aiꞌapiheg hap u hamo aiminug saꞌag koꞌi hep hamo.

Karasia 2:20

-Uito yt atunug i te emikyꞌesat ewy aiꞌe hamo are. Tupana mikyꞌesat ewy atunug neran kahato wen maꞌato uhesaika hap yt toineꞌen i te uipiit pe inug hamuat watoꞌe hap watikuap are. Miꞌi pote Iesui kape waku watokosap hesaika hap sat hamo are. Yt tuwemikyꞌesat ewy i ikuꞌuro ariaꞌyp posak ete Iesui maꞌato Tupana mikyꞌesat ewy ikuꞌuro ariaꞌyp posak ete watoꞌe are. Miꞌi hap ewy atunug neran wen. Koitywy uipytꞌat teran kahato Iesui Paꞌãu wo. Miꞌi pote koitywy uimikyꞌesat koꞌi hokpap yne raꞌyn. Uikaꞌiwat Iesui mikyꞌesat koꞌi nug hamo yn naꞌyn areineꞌen koitywy are. Mesup ti koitywy Tupana Saꞌyru mohey hatno yn areineꞌen. Koitywy wẽtup ok uikyꞌe hat motypot hamo yn naꞌyn areineꞌen watoꞌe.

Karasia 3:13

Taꞌi Tupana tikuap kahato aipyꞌa piat iꞌaparap hap koꞌi. Miꞌi kaipyi ariaꞌyp posak kape Tupana tipoꞌoro Tosaꞌyru aiꞌapiheg hap u hamo. Tosaꞌyru suu wo toihep tokuasa hap pya raꞌyn aikai. -Uwe ariaꞌyp ete tomosatꞌe pe ikuꞌuro miꞌi uikuasa topyhuꞌat e Tupana saꞌawyꞌi miitꞌin me. Pyno koitywy Tupana pyꞌahok hap yt kat i ahete aikawiatnuat ikuꞌuro raꞌyn ariaꞌyp ete pote. Miꞌi hawyi ikai toineꞌen naꞌyn iwese hap.

Ewesu 1:11

Yne tomikyꞌesat ewy Tupana saꞌawyꞌi aiꞌairo raꞌyn tomikyꞌesat ewy. Miꞌi hawyi ainug tosakiꞌytꞌin no tosaꞌyruꞌin no Aheykeꞌet Aikywyt Iesui ewywuat ainug wẽtup miit mepytꞌin koꞌi ewywuat ainug naꞌyn aito watimohey Iesui hawyi. Tomikyꞌesat ewy tutum aru ahepe topowatꞌyp yne yne. Hekat kahato rakaria wo watopyhuꞌat wuatꞌi eꞌat pe aikotã toꞌe saꞌawyꞌi wuat hap ewy raꞌyn tutum ahepe.

Ewesu 2:10

Saꞌawyꞌi Tupana topo wo ainug. Koitywy Haꞌyru mohey haria watopyhuꞌat wẽtup ywania ewy yn naꞌyn watopyhuꞌat. Ainug hap eꞌyian mete Tupana toꞌe -Meiũran aru atipowyro kahato uimikyꞌesat nug neran haria e. Wakuaria sok ewy aru atunug miꞌiria e saꞌawyꞌi tuwepe.

Ewesu 5:2

Aikotã Aipotypot Iesui aikyꞌe kahato saꞌawyꞌi aikyꞌe kahato te. Aikyꞌe kahato hawyi aikyꞌe hap upi ikuꞌuro. Tutum naꞌyn heineꞌen hap aikawiatno hap aikotã saꞌawyꞌi wuaria tum taꞌatuhũria aria pe Tupana mowepiit hamo. Miꞌi hap ewy ikuꞌuro ariaꞌyp posak ete aikyꞌe kahato haype. Aikyꞌe sese hat Iesui pote ikuꞌuro aiꞌapiheg hap u hamo. Miꞌi pote aikotã aikyꞌe hap ewy waku watikyꞌe iraniaꞌin aikuꞌuro hap kape.

1 Timoteu 1:15

Timoteu ahenoi teran epe sehay pywuat sese rakat sakpo aimimohey wuat. Mio tã are Aikaꞌiwat Iesui tuwemoherep mesuwe yi tote yt nakuaria i atuehakyeraꞌat hamo tuwemoherep. Miꞌi atikuap kahato katupono uito poꞌog yt nakuat i wuatꞌi kawiat paĩ are.

1 Timoteu 2:10

Waku poꞌog maꞌato eiwepainug eiwanetup hawe eiwese sese hap wywo iꞌewyte waku eweiwepainug waku nug hap wywo -Uito Iesui mohey hat sese eiꞌe hap enoi hamuat.

1 Timoteu 2:6

Putꞌok e raꞌyn ahehakyeraꞌat hap eꞌat hawyi Aikaꞌiwat ikuꞌuro raꞌyn aikawiatno hamo tuweium naꞌyn ahepe. Miꞌi kape wataꞌakasa raꞌyn hawyi watikuap kahato wuatꞌi ywania Tupana tiꞌatukyꞌesat kahato tomiehakyeraꞌat no hap watikuap taꞌyn.

1 Timoteu 6:18

Wakuap nug haria wo o eweikupteꞌen ereꞌe. Waku eipotpap kahato wakuap nug hap koꞌi ete yn. Hegyiꞌat rakaria wo o eweikupteꞌen ere. Yt hekat i rakaria tukupteꞌen eimikuap pote eweimoꞌẽ miꞌiria pe ehekat ere o hekat rakaria pe Iesui mohey haria pe.

Titu 2:7

Iꞌewyte en Titu poꞌog wakuap nug hamo ereineꞌen itotiaria kurum iwasuria kai hawyi ti aru -Pyno waku watunug Titu ewy iꞌatuꞌe kurum iwasuria. Tupana ewy ereineꞌen iꞌatumuꞌe haype yt kat i eso hap wywo. Epyꞌa hãpyk wywo etiꞌatumuꞌe Titu.

Titu 3:8

Pywo kahato ti mesuwat uimienoi paĩ. Miꞌi tupono Titu etiꞌatunapin kahato epotmuꞌeria -Waku watuwanetup kahato aikotã aru watunug waku hap ete ereꞌe o iꞌatuepe katupono waku nug haria wo watoineꞌen mote Tupana mowepiit kahato haria wo watopyhuꞌat. Iꞌewyte waku miitꞌin powyro kahato rakaria wo watopyhuꞌat ereꞌe o Iesui mohey haria pe Titu.

Epereu 1:3

Tupana Iãꞌãkap Sese Haꞌyru yn iꞌewy sese rakat. Wẽtup Miit ewy yn iꞌatueko wẽtup yn iꞌatumikyꞌesat koꞌi wẽtup yn iꞌatumotypot hap toꞌokupitu. Tosaꞌyru esaika hap wo toimopyhuꞌat yne atipy koꞌi mesuwarotiaria iꞌewyte atipy piaria Haꞌyru inug koꞌi yne yne. Toꞌywot ehay upi toimoesaika yne yi aat waikiru koꞌi waty Haꞌyru esaika hap mo inug iheg me. Iꞌewyte Tosaꞌyru suu wo aipit pit hap aiminug saꞌag toikoho yne. Iesui tipuruk yne aiminug saꞌag hawyi -Waku eraꞌapyk mesuwe uipo sese kai uiꞌyatype atipy pe e. Waku eraꞌapyk mesuwe uhepiat emotypot hap tote e katupono woronug En Wuatꞌi Wuatꞌi Porekuatno poꞌog poꞌog wuatꞌi kawiat hesaika rakatno e Tupana Tosaꞌyru pe.

Epereu 10:24

Iꞌewyte waku watikyꞌe iraniaꞌin Iesui mohey haria. Waku watiꞌatupowyro aiwyriaꞌin imohey haria. Waku watoꞌopowyro wẽtup yat piaria ewy. Waku watoꞌonapin aiwyriaꞌin -Toꞌiro watoꞌokyꞌe watoꞌe aiminug wakuap mywo. Waku ahegyiꞌat hap kaipyi watiꞌatuekyi iraniaꞌin Iesui mohey haria wo.

Epereu 9:14

Maꞌato Aikaꞌiwat Iesui suu poꞌog hesaika yn suu kai mohag wo. Saꞌawyꞌi Aikaꞌiwat tum yne topiit Tupana pe ahaꞌup mo. Saꞌawyꞌi ikahu rakat aihũ yn waku aimiium mo yt kat i hatek takat yt kat i iꞌahuu hap rakat. Ipe kyt hap ihãite sese rakat yn ni waku e. Miꞌi hap ewy Iesui poꞌog waku mohag wo katupono yt kat i saꞌag tuete Tupana tipuẽti. Ihãite putꞌok e kahato turan tutum topiit. Pyno koitywy watomohey Iesui hawyi Aihũ Aimiium Tupana piat hap ewy topyhuꞌat. Miꞌi watum Tupana pe hawyi yt kat i hin i aheha yi kape hap. Yt kat i aiwemoti hap aiminug saꞌag kapiat hap ete. Aihũ Aimiium Ikahu Rakat Iesui pote.

Tiaku 4:8

Pyno karãpe watikyꞌesat watukupteꞌen Tupana wywo miꞌi pote waku watuwat Tupana kape aimikyꞌesat ẽtup hamo. Aiwanetup hap kaipyi aipyꞌa pyi ahehay hawyi tuut ahowawi aimikyꞌesat ewy. Miꞌi hawyi aikotã watuwei aipit pit potiat hap ewy raꞌyn yꞌy pe waku miꞌi hap ewy waku watoꞌe Tupana pe -Uiꞌywot uikoho Esaꞌyru suu wo uimiꞌaparap saꞌag koꞌi waku watoꞌe. Uipo ti iminug yt naku i hap koꞌi pote uipo ipit pit hap ewy. Miꞌi pote etikoho uipo yt naku i nug hap hep hamo waku watoꞌe. Uiꞌywot atipy piat pe uiwanetup hap uipyꞌa piat typy sehay potiat uipiit yt naku i topyhuꞌat. Miꞌi pote etikoho kahato uhepiat iꞌaparap hap koꞌi yne waku watoꞌe Tupana pe.

1 Peteru 1:18

Miꞌi tupono waku watikoho kahato aiminug saꞌag koꞌi Aikaꞌiwat suu wo. Waku watimoweityk yne aiminug saꞌag koꞌi are. Ahekat yt ahehakyeraꞌat kuap i kat pote ahekat yt toineꞌen motꞌi i pote. Meiũran ahekat ipyyp iꞌytyk topyhuꞌat aikotã ahewahi aiminug imehit rakat ewy parata kawiat uru kawiat ewy. Porap neꞌi imehit maꞌato meiũran yt ikahu i hap ewy raꞌyn topyhuꞌat. Miꞌi koꞌi wo yt watikyiꞌat kuap i aheineꞌen wuatꞌi eꞌat piat hamuat hap are. Uiwyriaꞌin saꞌawyꞌi wuaria aiꞌywania aiꞌywotꞌin tikyiꞌat teran wuatꞌi eꞌat piat taꞌatuieineꞌen hamuat hap. Kat pote taꞌatunug neran Tupana mowepiit hamuat taꞌatuesokpe ete taꞌatumiꞌu ete taꞌatueko ete maꞌato yt putꞌok e hin i muap Tupana kapiat ete. Koitywy watikuap yt miꞌi kaipyi i ahehakyeraꞌat hap aheineꞌen wuatꞌi eꞌat piat hamuat hap are.

1 Peteru 1:22

Uiwyriaꞌin karãpe Aipotypot suu topyhuꞌat aheha ete aipy ete aiwanetup hawe aipiit ete miꞌi hawyi ikytsig kahato rakat ewy topyhuꞌat aikai. Yt saꞌawyꞌi wuat aiminug saꞌag koꞌi ewywuat hin i. Miꞌi hawyi waku watunug yne Tupana mimoherep tomikyꞌesat koꞌi pywuat koꞌi waku watunug. Yt watunug kuap i wen maꞌato Tupana Paꞌãu aimoesaika kahato mekewat pywuat sehay nug hamo are. Waku Tupana Paꞌãu ainug miitꞌin kyꞌe sese haria wo yt kat i aheso hap aipyꞌa piat miitꞌin kyꞌe hap wywo maꞌato aipyꞌa pyi miitꞌin kyꞌe sese hap yne ahesaika hap wywo. Waku watiꞌatukyꞌe miitꞌin Tupana Paꞌãu aimoesaika hap kaipyi are.

1 Peteru 2:12

Iraniaꞌin teꞌerahaꞌat kahato ahowawi sio pywo pe watomohey sio yt hap kape. Miꞌi pote aheineꞌen hap mesuwarote aikotã Iesui ewy hãpyk kahato rakat ewy waku watopyhuꞌat are. Uiwyriaꞌin waku watunug hãpyk kahato iꞌatuehamo. Miꞌi pote meiũran hoꞌopot hap eꞌat putꞌok e iꞌatuete hawyi meremo taꞌatumohey aikotã aito hap ewy. Miꞌi hawyi Tupana motypot hap ete aikotã aiꞌewy tukupteꞌen hãpyk kahato watunug wakuat pote. Mesup iꞌatumikyryꞌi hamo watoineꞌen watomohey Iesui pote -Yt naku i nug haria iꞌatuꞌe maꞌato yt pywo pe i. Katupono aikotã wẽtup ywania miꞌiria tukupteꞌen yt Tupana ywania hin i yt aiꞌe hap ewywuat i miꞌiria.

1 Peteru 2:9

Maꞌato aito ti aikotã wẽtup ywania Tupana miꞌairo wẽtup ywania ewywuat koꞌi aito. Kat pote Tupana saꞌyruꞌin sakiꞌytꞌin aito. Miꞌi pote Tupana aiꞌairo tepaꞌi koꞌi wo maꞌato yt mesuwarotiat paꞌi koꞌi ewywuat i. Katupono aito morekuaria ewy watopyhuꞌat Tupana wanetup hawe. Aitoria aikotã wẽtup tama piaria ewywuat Tupana eꞌyi kaꞌiwaria aito. Aiwanetup hap koꞌi yt mesuwarotiaria minug koꞌi mesuwarotiaria wanetup hap koꞌi ewy hin i. Miꞌi pote -Eiperia yt miit ewy i iꞌatuꞌe ahepe. Miꞌi pote Tupana motypot hap yn watikyꞌesat mesuwarote. -Waku kahato uruetupana watoꞌe iraniaꞌin me. Saꞌawyꞌi urutukupteꞌen aikotã iꞌypyryp we hap ewy. Maꞌato mesup urutukupteꞌen hẽtyhot puo hap ewy. Saꞌawyꞌi Tupana yt heremo hin i uruepe. Koitywy heremo hap ewy urupyꞌa pe uruimohey pote.

1 Peteru 3:18

Saꞌawyꞌi Aipotypot Aiporekuat Iesui miitꞌin mikyryꞌi hamo topyhuꞌat mesuwarote aikotã aikotã taꞌatunug saꞌag tuwete waku rakat pykai taꞌatuꞌauka. Maꞌato yt kat i saꞌag tutunug pykai tohoꞌopot kahato. Maꞌato aiminug saꞌag upi tohoꞌopot. Iesui hãpyk kahato rakat maꞌato ikuꞌuro yt hãpyk i rakaria mohãpyk hamo. Ikuꞌuro muap nug hamo Toꞌywot Tupana kapiat muap nug hamuat. Koitywy toineꞌen muap Tupana kapiat Iesui hoꞌopot hap kaipyi. Yt hãpyk i sese rakat toimohãpyk kuap taꞌyn. Pyno ipiit ikuꞌuro ariaꞌyp posak ete maꞌato miꞌi hawyi Tupana Paꞌãu timoieineꞌen Aikaꞌiwat.

1 Iuwãu 1:7

Maꞌato watopyhuꞌat hẽtyhot pe Aikaꞌiwat ewy pote pywo pe watoineꞌen. Miꞌi pote ti iwywuat aiwoꞌowese hap topyhuꞌat kahato are. Miꞌi hap kaipyi ti Tosaꞌyru Iesui suu wo Tupana tikoho yne aiminug saꞌag koꞌi. Mekewat kat koꞌi kat koꞌi aiminug saꞌag koꞌi toiꞌatukoho aat kaꞌap ahewyry Iesui wywo imikyꞌesat ewywuat pote. Miꞌi hawyi tomikyꞌesat nug haria watopyhuꞌat.

1 Iuwãu 1:9

Maꞌato watoꞌe Tupana pe aipyꞌa pyi -Uiꞌywot atiꞌaparap kahato epe uhehay wo uiminug saꞌag wo watoꞌe pote aimohãpyk kahato. Miꞌi hawyi -Waku pe ereineꞌen mesup e ahepe watoiat yne aiminug saꞌag hawyi. Tupana aikyꞌe kahato pote toineꞌen kahato aikawiatno hamo. Yt aiꞌatoiat teran hin i watiꞌaparap topiat pykai aikyꞌe kahato. Aiꞌapiheg hamuat pykai aikyꞌe hap wywo aiꞌapiheg are.

1 Iuwãu 3:2

Uimikyꞌeria koitywy ti aito Tupana mepytꞌin naꞌyn. Taꞌi yt watikuap hin i ti aikotã miat aheineꞌen hamuat hap. Iesui uut hawyi ti aru watikuap aikotã me watoineꞌen hamuat katupono topiit ewy ti ainug hamuat. Miꞌi hawyi ti aru mekewat eꞌat pe wataꞌakasa raꞌyn Iesui sese. Miꞌi hawyi ti aru watopyhuꞌat aikotã iꞌewy raꞌyn are.

Iesui Aru E Hap 1:5

Tupana Esaꞌyru sese Iesui kaipyi ahẽtup etipoityro emohey haria. Etum no iꞌatuepe i woꞌowese hap are epe. Wuatꞌi Porekuat no En poꞌog poꞌog iraniaꞌin kai are. En ni wuatꞌi eꞌyian mete wuat guꞌuro pywiat ieineꞌen i hat. En ni pywo yn e hat. Iesui En ni urukyꞌe hat sese katupono Esuu wo urupiit pit hap etikoho yne torannia uruminug saꞌag are. Ekuꞌuro hap urukawiatno hap.

Iesui Aru E Hap 5:9

Miꞌi hawyi araꞌakasa typyꞌi kahato miitꞌin Ihũ Hit motypot haria itote. Miꞌi hawyi teꞌeruwepy kahato iraniaꞌin nywo. Maꞌato iꞌatuwepy hap ipakup takat -Waku kahato En Tupana Hũ iꞌatuꞌe. -Waku kahato En iꞌatuꞌe. Ewaku hap putꞌok e mekewat miwan okpoꞌi porap hamo. Waku etiꞌokpoꞌi porap hawyi etimoherep uruepe Mimi Uhyt iꞌatuꞌe. Ewaku hap yn putꞌok e Tupana mimosatꞌe hap hep hamo iꞌatuꞌe. Ewaku hap yn iwato hap oktan iꞌokman miat miwan moherep hamo eꞌauka urukawiatno pote iꞌatuꞌe Saꞌawyꞌi esuu topyhuꞌat Tupana piat urukyiꞌat towatnuat hawe iꞌatuꞌe. Katupono wuatꞌi mesuwarotiat ywania kaipyi uruhoꞌoekyi Tupana emiit no wuatꞌi miitꞌin wẽtup pusu wẽtup pusu kuap haria iꞌewyte wuatꞌi miitꞌin yt toꞌoꞌewywuat rakaria kaipyi iꞌewyte wuatꞌi miitꞌin wẽtup seko wẽtup seko mohey haria yt toꞌoꞌewy ewywuat i rakaria kaipyi iꞌewyte wuatꞌi yt toꞌoꞌewywuat i iꞌatupiit ete iꞌatueko rakaria kaipyi uruhoꞌokyiꞌat esuu wo iꞌatuꞌe. Iꞌewyte wuatꞌi setama kaipyi uruhoꞌokyiꞌat wuatꞌi ipe hun ipe kytsig ipe hup rakaria kaipyi uruhoꞌoekyi Tupana emiit no Esuu wo iꞌatuꞌe teꞌeruwepy puo wuatꞌi ywania Tupana Mipoꞌoro Aihũ Kuteiru ewywuat aikawiat ikuꞌuro rakat kape.