Titu 2:13 - Sateré-Mawé13 Miꞌi hawyi Iesui putꞌok e hap eꞌat yn naꞌyn wahekatup Tupana motypot eꞌat sese raꞌyn. Taꞌi Uhetupana iꞌewyte Iesui Ahehakyeraꞌat hat poꞌog wuatꞌi kai putꞌok e irane. Putꞌok e hawyi ikahu hap sese watikuap taꞌyn. Mekewat eꞌat pe ti wahekatup kahato turan tuut. အခန်းကိုကြည့်ပါ။ |
Titu 2:13
42 ပူးပေါင်းရင်းမြစ်များ
Pywo pe ti uwe uwe mesuwat yt naku i hap eꞌat koꞌi turan uhehay pupi tuwemoti yt uimohey haria i. Miꞌi haria pupi ti aru uito iꞌewyte aremoti wy mekewat eꞌat pe karãpe uito eheykeꞌetno ariot i raꞌyn Morekuatno atipy piaria wywo Tupana wat hẽtyhot rakat pe imehit rakat piat turan. Miꞌi hap eꞌat pe ti aru uito Eheykeꞌet aremoti uipupiat wemoti haria pupi e Iesui muap upiaria pe.
-Tupana uito ti emipoꞌoro Pauru atikyꞌesat kahato etiꞌatupowyro iraniaꞌin ywania kape ekuap hamuat hap ete. Koitywy iꞌatuꞌarot potꞌi wywo tukupteꞌen. En yn waku iꞌatumowepiit kuap hanuat. Esaꞌyru kape yn teꞌeruwanetup taꞌatuhekatup haype are. Uiꞌywot mekewat ewat wuatꞌi eꞌat piat woꞌomowepiit hap yn waku etum iꞌatuepe. Esaꞌyru mohey hap kaipyi etum no iꞌatuepe iꞌatuwanetup saꞌag hap monik hap Esaꞌyru mohey hap kaipyi are. Papai etum o Epaꞌãu Wakuat iꞌatuepe poꞌog poꞌog yne eꞌat pe. Etimoesaika miꞌiria Epaꞌãu Wakuat kaipyi are. Epaꞌãu Wakuat kaipyi atikyꞌesat taꞌatuhekatup Esaꞌyru uut hap aat kaꞌap. Uruꞌywot Tupana etimowepiit kahato uheꞌywytꞌin uheinytꞌin tawa wato Huma piaria.
Karãpe watoꞌe -Pywo ti aru taꞌi tutunug ni aru toꞌe hap ewy watoꞌe miꞌi hawyi Ipaꞌãu Wakuat topyhuꞌat kahato ahepe tutum ahepe Topaꞌãu. Miꞌi hawyi aipyꞌa wepiit kahato topyhuꞌat katupono Ipaꞌãu -Worokyꞌe en worokyꞌe en e hap yn topyhuꞌat. Miꞌi hawyi ahatek hap neꞌi yt aimoꞌarot kuap i raꞌyn katupono watomohey te ahatek pykai.
Ahoꞌopot kahato mesuwe uito Pauru. Koitywy ahoꞌopot hap eꞌat kahato. Koran ni miitꞌin mimosoꞌopot koꞌi kahato watoineꞌen maꞌato Iesui motypot hap eꞌat pe Tupana mimotypot no kahato watopyhuꞌat. Mekewat eꞌat pe aito iꞌewyte Tupana mimotypot kahato wo watopyhuꞌat. Aimotypot Iesui wywo hap eꞌat pe aru poꞌog iwato mesup eꞌat piat wahoꞌopot mesuwarotiat. Taꞌi waku watoꞌe ahoꞌopot kahato hawe -Koitywy ahoꞌopot kahato Iesui wanikap po upi maꞌato typy sakpo are poꞌog Tupana mimotypot no areineꞌen wuatꞌi eꞌat piat ahoꞌopot hap saꞌup waku watoꞌe.
Pyno yt imohey i haria mesuwarotiaria hoꞌowasat rakaria wo teꞌeropyhuꞌat. Ahiag topyhuꞌat iꞌatuetupana wo. Miꞌi hawyi karãpe wahenoi sehay wakuat aikotã Tupana tipoꞌoro Tosaꞌyru Aiporekuat no hap etiat iꞌewyte karãpe watimoherep yne Iesui etiat Tupana moherep hat sese etiat Tupana ewywuat rakat miꞌi hap etiat wahenoi turan -Yt eweimohey teiꞌo miꞌi. Yt eweimohey teiꞌo miꞌi e ahiag iꞌatuwanetup hawe yt toikyꞌesat i miꞌiria teꞌeropyhuꞌat Iesui haria pote. Ahiag iꞌatuewa hik hap ewy iꞌatuete yt toikyꞌesat i Iesui kapiat iꞌatuꞌakasa hap pote.
Saꞌawyꞌi sese iꞌypyryp sese turan Tupana toꞌe -Ereineꞌen no hẽtyhot hap e. Miꞌi hawyi toineꞌen naꞌyn hẽtyhot hap. Koitywy miꞌi hap ewy tutunug aiwanetup hawe. Aipotypot Iesui Tupana eꞌariãty ewywuat toineꞌen. Karãpe watomohey Iesui hawyi Tupana heremo topyhuꞌat aiwanetup hawe -Worokuap kahato En mesup Tupana watoꞌe. Esaꞌyru En wẽtup miit ewy yn watoꞌe. Koitywy watikuap ewaku hap watoꞌe.
Pyno aiwy raꞌyn Tupana. Yt nakuap i watoiat raꞌyn hawyi waku aikyꞌe hat sese watomohey wuatꞌi eꞌat pe. Saꞌawyꞌi watikuap mekewat Iesui etiat sehay wakuat ehay hawyi watomohey raꞌyn Iesui. Miꞌi hawyi watoineꞌen aru wuatꞌi eꞌat pe e hap ewy watomohey. Miitꞌin teꞌeruwekyryꞌi ahetiat pykai imohey hap yt watoiat hin i. Iheg me kahato watoineꞌen imohey hap ete. Saꞌawyꞌi watomohey kahato. Pyno koitywy yt naku i raꞌyn imohey hap watoiat sehay waku kahato Iesui etiat. Miꞌi atikuap saꞌawyꞌi hawyi uheropat kahato aat kaꞌap wuatꞌi miitꞌin kape miꞌi moherep hamo aikope aikope miitꞌin tukupteꞌen hap upi yne ywania pe ahytpok miꞌi ehay wakuat mesuwat yi wato hap oktan. Miꞌi hamo yn uinug uito Pauru.
Koitywy Tupana toꞌe -Saꞌawyꞌi yt uwe i kape atimoherep uhehay pakup e. Kurin ikuap haria saꞌawyꞌi maꞌato koitywy Uhaꞌyru mohey haria kape atimoherep taꞌyn uhehay ikahu kahato rakat sehay hekat rakat wuatꞌi ywania mesuwat yi totiat kapiat sehay wakuat e. Saꞌawyꞌi migꞌi wo toineꞌen maꞌato mesup atimoherep taꞌyn ehepe e Tupana ahepe. Etunug no Uhaꞌyru Eporekuat no eipyꞌa pe pote eweikupteꞌen aru uhehamo mesuwe atipy pe uimimotypot koꞌi wo e Tupana ahepe.
Uhekatuwyria gaꞌatpo mekewat sehay pywuat wakuat Iesui etiat putꞌok e ehetawa pe hawyi eiwewaure kaꞌa kahato. Eweikuap taꞌyn hawyi -Taꞌi miꞌi watomohey pote ti watoineꞌen aru wuatꞌi eꞌat pe atipy pe eweiꞌe raꞌyn Tupana e hap ewy eweiꞌe. -Tupana atunug aru eꞌe hap ewy eweiꞌe. Mio tã eweiꞌe raꞌyn hawyi Iesui mohey haria sese eweipyhuꞌat. Waku kahato katupono iꞌewyte woꞌokyꞌe kahato haria kahato eweipyhuꞌat eipe.
Karãpe taꞌaipok i raꞌyn mesuwat yi kape hawyi aito wataꞌaipok iwywo te ipiit piat ieineꞌen haria aito hap ewy. Wẽtup miit ewy yn naꞌyn watoineꞌen mekewat eꞌat pe. Iwywuat iwemoherep mesuwe pote watuwemoherep e. Mekewat eꞌat pe Iesui motypot hap eꞌat kahato iꞌewyte aimotypot hap eꞌat katupono imohey haria aito ipuꞌi kawiat ewywuat aito pote. Miꞌi hap eꞌat pe -Pywo iꞌatuꞌe iraniaꞌin yt imohey i haria.
Taꞌi uhaꞌyru sese ewy ereineꞌen Timoteu. Worokyꞌe kahato en. Aiꞌywot sese ti Tupana iꞌewyte Aikaꞌiwat sese ti Iesui. Aat kaꞌap mio tã are Tupana pe -Waku etipowyro ro Timoteu egyiꞌat hap kaipyi. Waku erahaꞌat Timoteu kape ikyꞌe hap wywo are. Iwanetup hap wẽtup yn etum iwepiit hamuat are Tupana pe meiũpepyi eupi.
Pyno Timoteu woronapin kahato haty wo Tupana ehamo Aipotypot Iesui ehamo -Etimohey kahato o Tupana ehay ereꞌe o epotmuꞌeria pe. Yt ewẽpohep hin i neiꞌo miꞌi hap ete. Yt epohepap pykai i yt epohep teiꞌo iꞌatumuꞌe hap ete. Katupono tuut irane Aikaꞌiwat uwe waku uwe yt naku i rakaria hap enoi hamo ihãite rakaria kape iꞌewyte map haria kape.
Karãpe wateput turan seput hat akag toꞌe -En poꞌog ihyha rakat e wuatꞌi ehamo. Miꞌi hap ewy ti meiũran Aiꞌakag Iesui toꞌe irane uhepe -En ni wakuat kahato Tupana wanetup hawe e irane uhepe maꞌato yt uhepe yn i maꞌato iꞌewyte uwe uwe tokyꞌe haria pe torannia -Atiꞌatukyꞌesat Iesui taꞌaipok i e haria pe.
En ni Titu uhaꞌyru sese Iesui mohey hap kaipywiat katupono aimimohey ti wẽtup ok yn toineꞌen mote i pote wẽtup ok yn aito. -Etum no egyiꞌat hap uhaꞌyru Titu pe areꞌe mesup mesuwe Aiꞌywot Tupana pe. Iꞌewyte imowepiit kahato hap etum o uhaꞌyru Titu pe areꞌe mesup mesuwe Tupana pe Iesui Uhehakyeraꞌat hat pe wuatꞌi Porekuat pe.
Miꞌi hawyi yt karamuo i ikuꞌuro i raꞌyn Uhaꞌyru katupono wẽtup mo yn miitꞌin ikuꞌuro e. Miꞌi pote Miꞌi Miit Uhaꞌyru wẽtup mo yn ikuꞌuro hawyi mesup huut hap yn naꞌyn toineꞌen aru emiekatup e. Saꞌawyꞌi tokuꞌuro hamo tuut miitꞌin kape e. Maꞌato meiũran aru yt tokuꞌuro hamo i tuut tohekatup haria kape. Katupono Uhaꞌyru yt typuat ikuꞌuro rakat i e. Uhaꞌyru tuut wyti aru tomiehakyeraꞌat koꞌi moherep hamo e Tupana ahepe Tosaꞌyru Iesui ete.
Saꞌawyꞌi Aipotypot Iesui ikuꞌuro hawyi Tupana timoieineꞌen guꞌuro pyi. Saꞌawyꞌi yt watomohey hin i aikuꞌuro hawywiat aheineꞌen i hamuat hap. Maꞌato mesup koitywy watomohey kahato kat pote Aiꞌywot Tupana tihep taꞌyn Aikaꞌiwat ikuꞌuro hap kaipyi. Miꞌi pote koitywy -Waku kahato En Tupana. Poꞌog wakuat torannia kai urutoꞌe kat pote egyiꞌat kahato uruepe. Urukyꞌe kahato En. Poꞌog poꞌog torannia miitꞌin kai urukyꞌe hat En katupono etihep taꞌyn urukaꞌiwat hyp hawyi urutoꞌe.
Uiwyriaꞌin waku ahoꞌopot hap katupono miꞌi kaipyi Tupana tikuap tomohey sese sio yt haria aito are. Mesuwarotiat miitꞌin tikat kahato mekewat nu mehit rakat hekat kahato rakat kawiat uru e hap het rakat. Maꞌato iꞌytyk kahato iꞌatumipuẽti yi puat pote. Miꞌi hawyi taꞌatupag aria pe hawyi ihywop taꞌyn hawyi iꞌytyk hap toto yne. Miꞌi hawyi imehit hawyi ikahu kahato mekewat nu uru kawiat. Miꞌi hap ewy kahato aito uruwyriaꞌin are. Uito ti Peteru uhepiat hoꞌopot hap uhatek hap miitꞌin mikyryꞌi hap aria ewy iꞌytyk uhepiat hap ewy hep hamuat. Miꞌi hawyi poꞌog hesaika rakat areineꞌen Tupana motypot hamuat. Wahoꞌopot turan mekewat Tupana motypot hap Tupana kapiat aiwehum hap poꞌog poꞌog aimoesaika saꞌawyꞌi wuat kai are. Meiũran aru Aikaꞌiwat Aipotypot Iesui tuut mesuwat yi kape tuut Morekuat nuat hamo. Miꞌi hap eꞌat pe ti aru aitoria watukupteꞌen imehit rakaria ewy aikotã mekewat uru mehit hap ewy are. Kat pote wahoꞌopot hap kaipyi waku pe raꞌyn watoineꞌen. Miꞌi hawyi aikotã hekat rakaria ewywuaria wo watoineꞌen mekewat nu imehit rakat ewy watoineꞌen mekewat eꞌat pe aru Iesui uut hap eꞌat pe ti aru. Miꞌi hap eꞌat pe urumowepiit kahato mesuwarotiat uruepiat hoꞌopot hap katupono yt uruiꞌatoiat hin i Iesui mohey uruepiat hap urusatek pykai uruꞌahyk ahyk pykai iꞌewyte urupyhik pykai uruꞌatuꞌuka pykai are.
Uito ti Peteru Aipotypot Iesui eropat hat sese uito. Uito Iesui mipoꞌoro miitꞌin muꞌe hanuat ihay moherep hat uito. Uito ti 12 ok hap Iesui emiit uito. Iꞌewyte imohey haria napin hat uito. Aimimohey ikahu rakat moherep hat uito. Hekat kahato rakaria ewywuaria watukupteꞌen katupono imohey hap saꞌup iwato kahato hap ewy topyhuꞌat imohey hap kaipyi. -Uhaꞌyru mohey haria ti eipe uiwanetup hawe uipyꞌa pe e Tupana ahepe. Miꞌi pote atum yne wakuat ehepe e Tupana.
Pyno eiwemotag o Tupana ehay wo hegyiꞌat hap kaipyi are iꞌewyte Tupana eikyꞌe hap kaipyi. Ahehakyeraꞌat hat Aipotypot Iesui mohey hamo eiwemotag o. Imohey kahato haria wo eweikupteꞌen hawyi ihãite kahato rakaria eipe. Imohey hap upi ihay wakuat upi yn atikyꞌesat eweikupteꞌen uito areꞌe ehepe uimiwan me ahenoi.
Uito ti atimohey kahato. Miꞌi pote eipe atikyꞌesat uiꞌe eweimohey kahato hap. Tupana ti yt puo hin i eikai uiꞌe tomohey hap ium ehepiat hamo. Tupana tum neran aikyꞌe hap miꞌi pote toꞌiro watikyꞌe Aikyꞌe hat. Waku watuweium Tupana pe aikyꞌe hamo. Waku Tupana yt wahowaĩ i aikyꞌe teran tipyt. Taꞌi waku ti Aikaꞌiwat wahekatup wuatꞌi eꞌat pe. Miꞌi hap yn ti waku uiwyriaꞌin. Tupana mipoꞌoro ahetiatno ihakyꞌeꞌi kahato tutum toineꞌen wuatꞌi eꞌat piat hamo. Miꞌi pote waku watikyꞌe Aikyꞌe hat are.
Uiwyriaꞌin Iesui mohey haria meiẽ ewehehaꞌat ro Aikaꞌiwat Iesui tuut raꞌyn teiam ywyhig me. Taꞌi yne yne teꞌeraꞌakasa. Iꞌewyte ipiit suk haria iꞌauka haria teꞌeraꞌakasa kahato howawi. Ewehehaꞌat ro teꞌeruwak kahato wuatꞌi ywania yt imohey i haria teꞌerokenꞌẽ haype kak iꞌatuꞌe. Maꞌato aito imohey haria wahekatup kahato. Waku eriot Mehin waku eriot Mimi watoꞌe. Iꞌewyte aitoria 7 tawa piat Tupana motypot yat piaria pe yi Asia totiaria pe Iesui tuwemoherep wy.
ကြော်ငြာတွေ