Titu 1:4 - Sateré-Mawé

⁴ En ni Titu uhaꞌyru sese Iesui mohey hap kaipywiat katupono aimimohey ti wẽtup ok yn toineꞌen mote i pote wẽtup ok yn aito. -Etum no egyiꞌat hap uhaꞌyru Titu pe areꞌe mesup mesuwe Aiꞌywot Tupana pe. Iꞌewyte imowepiit kahato hap etum o uhaꞌyru Titu pe areꞌe mesup mesuwe Tupana pe Iesui Uhehakyeraꞌat hat pe wuatꞌi Porekuat pe.

Titu 1:4 ပူးပေါင်းရင်းမြစ်များ

Iruka 2:11

Pyno mio tuwemoherep taꞌyn morekuat Tawi etawa Perẽi me ehehakyeraꞌat hat eipotypot eikaꞌiwat e.

Iuwãu 4:42

Miꞌi hawyi teꞌeroꞌe -Mana iꞌatuꞌe saꞌawyꞌi ti ehenoi uruepe hawyi uruimohey raꞌyn maꞌato koitywy imienoi hap kaipyi uruimohey raꞌyn iꞌatuꞌe. Pywo Miꞌi ti mesuwat yi totiat woꞌoehakyeraꞌat hat urutoꞌe.

Humanu 1:12

Atikyꞌesat Iesui mohey hap etiat uruwoꞌomoesaika moesaika hap itote Tupana. Putꞌok urutoꞌe itotiat hawyi urutunug neran Humanu ywania ewatnuaria wẽtup miit ewy Esaꞌyru mohey hap upi.

Humanu 1:7

Miꞌi hap atiwan mesuwat uimiwan ehewowi Humanu ywania. Mio tã areꞌe Tupana pe -Uruꞌywot kahato En. Esaꞌyru ti Emipoꞌoro sese urukaꞌiwat nuat. Miꞌi pote ahẽtup eset upi Esaꞌyru set upi etum no tapyiꞌaria Humanu ywania pe egyiꞌat kahato hap are. Ereineꞌen no hegyiꞌat iꞌatuepiat rakatno etum no ewese hap yt kat saꞌup i tapyiꞌa Humanuꞌin me are. Etunug no miꞌiria woꞌowese haria wo aikotã Esaꞌyru ewese hap ewy are Tupana pe.

2 Kuriniu 12:18

Saꞌawyꞌi atipoꞌoro mehin Titu ehewowi wẽtup ok imohey hat wywo. Miꞌi hawyi tuwat raꞌyn eikyꞌe haype. Yt karãpe i mehin Titu ehekat toikyꞌesat. Katupono mehin Titu hawyi uito urutukupteꞌen wẽtup miit ewy yn urutukupteꞌen wẽtup wanetup hap yn uruto. Uito worohoꞌokyꞌe iꞌewyte mehin Titu eikyꞌe aikotã worohoꞌokyꞌe hap ewy te eikyꞌe. Uhaipepiat sese miꞌi. Uheko ewy te iꞌewyte miꞌi yt karãpe i eimaꞌat.

2 Kuriniu 2:13

Itote turan atikat kahato aheywyt Titu katupono atikuap teran iwẽ pyi aikotã aikotã eweikupteꞌen hap koꞌi. Atikat aat kaꞌap maꞌato yt atipuẽti i hawyi uiꞌarot kahato areineꞌen itote. -Kat pote yt tuut i Titu are yn uiwepe. Miꞌi hawyi areꞌe itotiaria pe -Pyno areto raꞌyn yi Masetunia kape are miꞌi hawyi areto raꞌyn.

2 Kuriniu 4:13

Saꞌawyꞌi morekuat Tawi toꞌe -Woromohey sese En Tupana. Miꞌi pote atimoherep En wuatꞌi miitꞌin me uhehay wo. Yt atoiat kuap i uhepiat emohey hap e morekuat Tawi. Miꞌi ewywuat kahato aito imohey hap ete. -Uruimohey sese En Tupana. Miꞌi pote uruimoherep En wuatꞌi miitꞌin me watoꞌe. Yt uruatoiat kuap i En watoꞌe.

2 Kuriniu 7:6

Maꞌato miꞌi turan aimowepiit hat Tupana tipoꞌoro raꞌyn urupowyro hat mehin Titu are. Putꞌok e hawyi urumowepiit kahato.

2 Kuriniu 8:16

Uruwyriaꞌin tawa Kurintiu piaria uruiꞌatukyꞌe kahato eipe. Koitywy aiwy Titu eikyꞌe aikotã urukyꞌe hap ewy. Eipowyro hap yn iwanetup hawe. Tupana tunug naꞌyn Titu eikyꞌe kahato hatno. Miꞌi pote waku wahewaku Tupana kape.

2 Kuriniu 8:23

Uito hawyi mehin Titu aikotã wẽtup miit ewy yn urutukupteꞌen eheropat hamo. Uiwy kahato mehin Titu are. Koitywy atipoꞌoro miꞌi iraniaꞌin wywo ehewowi. Tuwat yne hawyi areto. Miꞌiria uheꞌyianme tuwat. Waku eweiꞌatumohey miꞌiria katupono Iesui mohey haria yne. Tupana motypot yat piaria mipoꞌoro kat pote Aikaꞌiwat motypot haria sese iꞌatuꞌairo. -Eiwehytꞌok eweiꞌe o iꞌatuepe aikotã eimikuap sese koꞌi piat ewy are.

2 Kuriniu 8:6

Saꞌawyꞌi uruipoꞌoro mehin Titu -Toꞌiro watiꞌatunug tawa Ierusarẽi miaria ihakyꞌeꞌi rakaria powyro hamo e. Pyno uruikuap mekewat yi Masetunia piaria iꞌatuegyiꞌat kahato hap ete hawyi urutoꞌe -Pyno waku watipoꞌoro i raꞌyn mehin Titu imohey haria tawa Kurintiu piaria napin aikotã waku watum ihakyꞌeꞌi rakaria pe hap etiat hamo urutoꞌe. Waku watunug imohey i haria yi Masetunia piaria ewy e hamo iꞌatuegyiꞌat hap wywo urutoꞌe. Miꞌi hawyi uruipoꞌoro i raꞌyn ehewowi.

Karasia 2:3

Mekewat eꞌat pe ahenoi uiꞌe hap iraniaꞌin miat hap eꞌat pe uiwy mehin Titu toineꞌen uiwywo itote Iesui potmuꞌeria 12 ok takaria pyꞌasetpe. Wẽtup ywania Titu toineꞌen mekewat Kereku ywania yt Iuteu ywania i maꞌato. Miꞌi ete yt kat iꞌatuꞌe hin i Iuteuria Iesui mohey haria akag koꞌi -Yt naku i en eꞌahit sokpe toineꞌen ne. Yt uruꞌywania ewy i e hap yt iꞌatuꞌe i. Yt naku i eko yt iꞌatuꞌe i. Waku uruto ewy etunug no iꞌewyte yt iꞌatuꞌe i aiwy Titu pe. Waku kahato atipuẽti itote.

Karasia 3:26

Tupana mepytꞌin no watukupteꞌen wẽtup miit pakup ewy Aikaꞌiwat Iesui mohey hap kaipyi watoꞌe.

Karasia 3:28

Aito miitꞌin yt aiwoꞌoꞌewy hin i watukupteꞌen iraniaꞌin Iuteu ywania e hap koꞌi iraniaꞌin yt Iuteu ywania i iraniaꞌin ihainiaꞌin haryporiaꞌin iraniaꞌin gaꞌiwaria iraniaꞌin miit emiitꞌin. Maꞌato miꞌi pykai watoineꞌen Iesui mohey hap kaipyi wẽtup piit ewywuaria yn imohey haria sok aito pote are.

Ewesu 1:2

Pyno mio tã ahẽtup ehewowi Aiꞌywot Tupana kaipyi iꞌewyte Aikaꞌiwat Iesui kaipyi -Etum o ewese hap tawa Ewesu piaria pe emohey haria pe are iꞌewyte etiꞌatupoityro kahato miꞌiria are ahẽtup Tupana pe iꞌewyte Iesui pe ehewowi uiwyriaꞌin are.

Korosi 1:2

Miꞌi pote kuekatu e hap atipoꞌoro ehewowi. Iꞌewyte aiwy Timoteu tuwehay poꞌoro ehewowi urumiwan me. Uruhẽtup ehewowi -Uruꞌywot Tupana etum no woꞌokyꞌe hap woꞌowese hap tawa Korosi piaria pe urutoꞌe. Ereineꞌen o itote hegyiꞌat kahato Esaꞌyru mohey haria piat hatno urutoꞌe.

1 Timoteu 1:12

Pyno uiwepiit kahato arehum kahato Aikaꞌiwat Iesui ete Wuatꞌi Porekuat ete katupono Miꞌi hum tesaika hap uhepe tehay moherep hamuat. Arehum kahato tuwete katupono uiꞌairo teꞌeropat hat miitꞌin muꞌe hamuat.

2 Timoteu 1:1

Timoteu mesup uimiwan atipoꞌoro kuekatu uiꞌe hap. Uito eꞌywot Pauru mekewat Aipotypot miꞌairo tehay moherep wuatꞌi miitꞌin miatnuat hat. Karãpe etomohey Iesui hawyi pywo Aiporekuat sese ere o wuatꞌi pe. Miꞌi pote ti aru ereineꞌen wuatꞌi eꞌat pe Tupana wywo ere o katupono mio tã e hap ti saꞌawyꞌi te Tupana tomoherep uhepe.

2 Timoteu 1:2

Taꞌi uhaꞌyru sese ewy ereineꞌen Timoteu. Worokyꞌe kahato en. Aiꞌywot sese ti Tupana iꞌewyte Aikaꞌiwat sese ti Iesui. Aat kaꞌap mio tã are Tupana pe -Waku etipowyro ro Timoteu egyiꞌat hap kaipyi. Waku erahaꞌat Timoteu kape ikyꞌe hap wywo are. Iwanetup hap wẽtup yn etum iwepiit hamuat are Tupana pe meiũpepyi eupi.

2 Timoteu 4:10

Katupono aiwy Tema uiꞌatoiat raꞌyn. Kat pote tekat poꞌog kyꞌesat Tupana kawiat haype. Miꞌi pote tawa Tesaronika kape toto. Aiwy Kesente toto yi Karasia kape. Titu ti toto raꞌyn tawa Taumasia kape miꞌi tupono waku eriot meikowo.

Titu 1:3

Heꞌat putꞌok e raꞌyn hawyi Tupana timoherep taꞌyn uhepe tehay -Atum aru wuatꞌi eꞌat piat eheineꞌen hap Uhaꞌyru mohey haria pe e Tupana ahepe. -Koitywy woropoꞌoro en Pauru uhaꞌyru etiat sehay moherep hamo katupono woromohey en inug hamo e uhepe. Miꞌi tupono ti atimoherep Haꞌyru wuatꞌi ywania pe Tupana e hap ewywuat. Ahehakyeraꞌat Tupana piat hap Iesui mikyiꞌat moherep hat areineꞌen mesup uito. Uito ti Pauru.

Titu 2:13

Miꞌi hawyi Iesui putꞌok e hap eꞌat yn naꞌyn wahekatup Tupana motypot eꞌat sese raꞌyn. Taꞌi Uhetupana iꞌewyte Iesui Ahehakyeraꞌat hat poꞌog wuatꞌi kai putꞌok e irane. Putꞌok e hawyi ikahu hap sese watikuap taꞌyn. Mekewat eꞌat pe ti wahekatup kahato turan tuut.

2 Peteru 1:1

Uito ti Peteru Aipotypot Iesui eropat hat sese uito. Uito Iesui mipoꞌoro miitꞌin muꞌe hanuat ihay moherep hat uito. Uito ti 12 ok hap Iesui emiit uito. Iꞌewyte imohey haria napin hat uito. Aimimohey ikahu rakat moherep hat uito. Hekat kahato rakaria ewywuaria watukupteꞌen katupono imohey hap saꞌup iwato kahato hap ewy topyhuꞌat imohey hap kaipyi. -Uhaꞌyru mohey haria ti eipe uiwanetup hawe uipyꞌa pe e Tupana ahepe. Miꞌi pote atum yne wakuat ehepe e Tupana.

2 Peteru 1:11

Miꞌi hawyi ti aru mekewat eꞌat putꞌok e turan -Ereke ro e Tupana. Aikotã aiwy sese pe watoꞌe -Ereke ro watoꞌe hap ewy ti aru topyhuꞌat. Miꞌi hawyi ti aru itote watukupteꞌen naꞌyn wuatꞌi eꞌat pe raꞌyn aikope Iesui toineꞌen Aiporekuat no ahehakyeraꞌat hap tote. Miꞌi hawyi ti aru Aikaꞌiwat yat pe raꞌyn watukupteꞌen.

2 Peteru 2:20

Maꞌato tukupteꞌen yt naku i nug hap atoiat haria Iesui kuap haria maꞌato meiũran teꞌeraꞌaipok i mekewat saꞌawyꞌi wuat seko saꞌag kape raꞌyn mesuwat yi totiaria wemohun hap kape i raꞌyn. Miꞌi hawyi ti aikotã kiã eꞌyni piatnuaria ewy tukupteꞌen. Miꞌi hawyi ti yt teꞌeruwenoꞌẽ kuap i iraꞌyn mekewat taꞌatuminug saꞌag hap saꞌawyꞌi wuat kaipyi. Miꞌi hawyi taꞌatuminug saꞌag hap koꞌi po pe i raꞌyn tukupteꞌen. Miꞌi hawyi poꞌog poꞌog saꞌag saꞌawyꞌi wuat kai teꞌeropyhuꞌat.

2 Peteru 3:18

Pyno eiwemotag o Tupana ehay wo hegyiꞌat hap kaipyi are iꞌewyte Tupana eikyꞌe hap kaipyi. Ahehakyeraꞌat hat Aipotypot Iesui mohey hamo eiwemotag o. Imohey kahato haria wo eweikupteꞌen hawyi ihãite kahato rakaria eipe. Imohey hap upi ihay wakuat upi yn atikyꞌesat eweikupteꞌen uito areꞌe ehepe uimiwan me ahenoi.

2 Peteru 3:2

Aikotã saꞌawyꞌi wuaria mienoi iwan miat Tupana ehay ewy putꞌok e. Aikotã uruto Aikaꞌiwat Iesui potmuꞌeria e hap ewy.

1 Iuwãu 5:14

Karapeĩ wahẽtup Tupana pe imikyꞌesat ewy hawyi watikuap taꞌyn ahehay Tupana ewaure kaꞌa pe teke raꞌyn ahehay. Miꞌi hawyi watuwehum aat howawi aimiẽtup ium hat kape.

Iuta 1:3

Uimikyꞌe kahato koꞌi eipe. Saꞌawyꞌi arehaypoꞌoro teran ehewowi aikotã Iesui ahehakyeraꞌat hap kuap hamo. Uimiwan ehowawiat nuat atunug neran maꞌato Tupana Paꞌãu -Yt etiwan neiꞌo miowat Iuta e uhepe. Apuete Iuta maꞌato waku etiwan wẽtup aikotã aikotã hap etiat e uhepe. Waku wẽtup sehay yn naꞌyn etipoꞌoro uimohey haria pe. Miꞌi hawyi worohoꞌomuꞌe teran Tupana Paꞌãu mienoi uhepiat ewywuat yn naꞌyn. Pyno koitywy eipe Iesui miꞌapykok yne. Koitywy uimiwan me worohoꞌonapin Tupana Paꞌãu e hap einapin hamuat wo. -Uimepytꞌin atikyꞌesat kahato eweimoheg eipyꞌa pe Uhaꞌyru mohey hap e Ipaꞌãu ahepuo are. Yt eipohep neꞌi teiꞌo imohey hap ete maꞌato eweimohey poꞌog poꞌog yne eꞌat pe Uhaꞌyru Iesui e ahepe. Aikotã saꞌawyꞌi eweimohey haty wo hap ewy poꞌog poꞌog eweimohey te wuatꞌi eꞌat kape e Tupana ahepe. Aikotã suraraꞌin tunug yne taꞌatuꞌakag koro ehay miꞌi haria ewywuat ro eweikupteꞌen Uhaꞌyru mikyꞌesat koꞌi nug hamo e Tupana Paꞌãu ahepe mesup are. Uito Iuta eiwy sese eimuꞌe raꞌyn are waku.