Mateu 5:18 - Sateré-Mawé18 Pywo pe ti areꞌe mesuwat yi aat waty waikiru koꞌi ikahuro pykai ti aru Tupana ehay moherep haria nimuaria miwan koꞌi tukupteꞌen ne. Yt tuweityk hin i raꞌyn e. Pywo pe ti itig hap iwan hit koꞌi Tupana ehay miwan etiat Muisei miwan Tupana ehay moherep haria miwan topyhuꞌat aru wuatꞌi eꞌat pe. Yt karãpe i aru Tupana ehay miwan miat ikahuro e. Pyno ti yt uwe i ipyhyp kuap Tupana e hap koꞌi -Atunug aru e hap koꞌi taꞌi Tupana tunug kuap yne yne toꞌe hap ewywuat e. အခန်းကိုကြည့်ပါ။ |
Mateu 5:18
82 ပူးပေါင်းရင်းမြစ်များ
Uipotpoꞌororia karãpe wẽtup tawa piaria eimohan eiꞌatuuka hamo miꞌi hap eꞌat pe waku eweiwat wẽtup tawa kape iraꞌyn iraniaꞌin muꞌe hamo. Maꞌato karãpe eimohan ehewanikaptia eiꞌauka hamo pote waku eweiwat wẽtup tawa kape iraꞌyn. Katupono ti pywo pe areꞌe ehepe miꞌi tã taꞌatunug ehetiat pykai yt eipo hep kuap i Isareu etawa piaria muꞌe hap ete.
Pywo pe ti areꞌe ehepe saꞌawyꞌi wuaria Tupana ehay moherep haria iꞌatu kahato iꞌewyte iraniaꞌin ywania kaipywiaria Tupana mohey haria ti teꞌerehaꞌat teran kahato koran wuat eiꞌakasa hap koꞌi kape maꞌato yt aikotã kuap i teꞌeraꞌakasa. Iꞌewyte teꞌeruwanetup teran kahato koran wuat eimikuap koꞌi koꞌi kape wen maꞌato yt teꞌeruwanetup kuap i.
Mio tã iꞌatuꞌe pote Iesui tiꞌatuwesat -Taꞌi kat pote ti eiperia yt uimohey kahato i pote. Pywo pe ti areꞌe ehepe uimohey ehepiat aikotã mekewat mikoi Mutata iãꞌỹi kurin kat ewywuaria eweikupteꞌen pote karãpe eweiꞌe -Ereto ro meiũpe pyi eweiꞌe mekewat yityꞌok pe pote meremo toto raꞌyn e. Pyno miꞌi tã uimohey ehepiat hap pote pywo ehesaika hap putꞌok e yne nug hamo e.
Miꞌi pote Iesui tiwesat -Karãpe yi ipakup turan karãpe Uito Eheykeꞌet araꞌapyk Morekuat eꞌamyap tote wuatꞌi miitꞌin miat uimotypot hamo miꞌi turan ti aru pywo eweikupteꞌen uiꞌyatype 12 morekuat eꞌamyap tote uiwywo aiꞌywania Isareu ywania tok pe wẽtup ywania wẽtup ywania porekuatno aru eweikupteꞌen uwe yt naku i uwe waku e hamo e.
-Uiwyriaꞌin e eweimohey ro Tupana haty wo yt kat i eweimohey saꞌag neꞌi wywo uiminug ewywuat ewetunug kuap hamo e. Maꞌato poꞌog iwato uiminug kai ewetunug kuap e. Taꞌi uwe uwe meiũwat yityꞌok pe toꞌe -Ereto ro meiũpe pyi yꞌy wato kape hawyi minꞌere ro yꞌy pe eweiꞌe Tupana mohey hap yn nywo miꞌi pote ti aru toto raꞌyn meremo eiꞌe hap ewy imohey hap ewy e.
Miꞌi pote apo are ehepe uwe som pyno toꞌywot mikyꞌesat nug hat sio watꞌyp sio yian e Iesui Tupana motypot yat piaria akag koꞌi pe. Miꞌi hawyi taꞌatuwesat -Taꞌi yian yn inug toꞌywot mikyꞌesat iꞌatuꞌe. -Pywo pe ti miꞌi tã e Iesui. Pywo pe ti miitꞌin morekuat saꞌup sat haria iꞌewyte haryporia yt iweꞌeg i rakaria teꞌeruwehytꞌok Tupana etama pe eiꞌowokai te e.
Pyno karãpe eiwemosyꞌat ehehay Tupana wywuat hamuat turan yt naku i ehemoꞌarotꞌi miitꞌin piat ikuap hamo iraniaꞌin uito poꞌog e haria ewy katupono miꞌiria ti inug teꞌeremosyꞌat turan iꞌatuꞌarotꞌi torannia miitꞌin mono ikuap uruwemosyꞌat hap taꞌatuꞌe haype. Maꞌato pywo pe areꞌe ehepe miꞌi haria ti aru ipuẽti miitꞌin piat taꞌatumotypot hap yn.
Miꞌi pote karãpe hatek takat putꞌok e ehete turan waku eweipowyro kahato maꞌato yt miitꞌin piat eimotypot yt hamo i. Yt naku i eiwanetup hawe -Atipowyro miꞌi miit wuatꞌi ehamo pote mio uimotypot kahato miitꞌin mesuwe yt naku i eweiꞌe. Yt naku i ehehay eiwanetup hawe eimowato wuatꞌi ehamo eiminug wakuap koꞌi wo e. Kat pote miꞌiria ti Tupana motypot yat pe tuwehytꞌok kahato Tupana motypot haria ewy teꞌeruwaꞌatunug wen maꞌato yt pywo pe i. Taꞌi miꞌiria wyti getap upi oken upi Tupana motypot hap taꞌatunug wen miitꞌin ehamo maꞌato yt pywo pe e. Miꞌi hap ewy ewetunug mote wyti aru yt kat i ti aru Tupana kaipywiat eimotypot hap atipy pe e.
Maꞌato tawa piaria yt iꞌatuwese i ehete yt teꞌeruwanetup teran i eimienoi uhetiat kape miꞌi pote eweiwat i raꞌyn iꞌatuetawa pyi e. Eiwenoꞌẽ hamo waku meiẽwat tawa sawiu eipy etiat koꞌi eiwepypitpitꞌok kahato iꞌatuehamo. Miꞌi tã ewetunug hawyi ti aru taꞌatukuap taꞌyn Tupana etiat yt taꞌatuwese i hap e Iesui topotpoꞌororia 12 ok takaria pe. Miꞌi hawyi tuwat raꞌyn typyꞌok tuereto tawa koꞌi upi Iesui yatypepyi ihay enoi hamo.
Saꞌawyꞌi sese ti ahaꞌaseꞌi pot Atãu saꞌyru Apeu ehaꞌaseꞌi Kaĩ tiꞌauka toꞌywyt Tupana mohey hat Apeu. Toipun kahato toꞌywyt suu yi tote. Saꞌawyꞌi Tupana mipoꞌoro aseꞌi Sakaria eiꞌywotꞌin miꞌauka wo toineꞌen. Tupana motypot hap ete toineꞌen turan. Taꞌi toineꞌen Tupana motypot yat ete yt pya hin i yparakai kai turan taꞌatuꞌauka. Pyno mesup te ti eiperia eiꞌywotꞌin ewywuat eweikupteꞌen ne e.
Pywo heropat haria taꞌatukaꞌiwat ekatup haria iꞌatuwepiit kahato raꞌyn putꞌok e taꞌatukaꞌiwat hawyi. Taꞌatuhekatup haria taꞌatukaꞌiwat mipoityro haria wo teꞌeropyhuꞌat. Miꞌi i hawyi tokaꞌiwat toeropat haria pe -Waku kahato eiperia e. Eweiꞌapyk to hawyi eheropat hatno areineꞌen eipoi hamo e. Yt iꞌatuket kai hin i taꞌatukaꞌiwat ekatup haria.
Are paĩ mio raꞌyn eiweran eweipyhuꞌat areto hawyi. Yt naku i hawuo eweikupteꞌen aru. Miꞌi hawyi yt eweiꞌakasa hin i uhowowi aru maꞌato meiũran ti aru esaipepiaria aiꞌywania Iuteuria -Waku kahato Tupana Mipoꞌoro Sese Ahehakyeraꞌat hat iꞌatuꞌe aru uhetiat pe hawyi miꞌi hap eꞌat pe aru araꞌaipok ehewowi i raꞌyn e Iesui tuwak hawuo.
Miꞌi hawyi Iesui toꞌe -Pywo ti eꞌe hap Peteru e. Worohoꞌokuap kahato eipe e. Pywo ti rat uwe uwe eipe ewy uikyꞌe poꞌog poꞌog toꞌyat kai toty kai teharyꞌi kai toꞌywytꞌin kai tomepytꞌin kai topotpap kai hawyi toto uhehay Tupana piat Aiporekuat nuat e hap moherep hamo miꞌi hat eipe ewywuaria wyti aru waku pe tukupteꞌen wuatꞌi eꞌat pe atipy pe e Iesui.
Poꞌog iwato kape erehaꞌat e. Meiũran eraꞌakasa aru atipy teꞌokenhypꞌok pe. Miꞌi kape ti aru tuwat tuwat yi kaipyi Tupana potpoꞌororia atipy piaria iꞌewyte teꞌeraꞌaipok aipok aipytyp kape e. Uito ti mekewat muap atipy kape e. Uito miꞌi uiꞌe hap eraꞌakasa hawyi poꞌog uimohey hap topyhuꞌat mekewat -Araꞌakasa en eweran turan Wiku yp og me uiꞌe hap kawiat e Iesui.
-Koitywy yt ewehẽtup kuap i te uhepe eimikyꞌesat koꞌi maꞌato areto hawyi ewehẽtup kuap uhepe e. Maꞌato ti aru putꞌok e eipowyro pakupꞌi hanuat Tupana Paꞌãu. Miꞌi hawyi waku ewehẽtup Uiꞌywot pe eimikyꞌesat koꞌi -Tupana eweiꞌe o Esaꞌyru Iesui e hap het rakat mohey haria uruto eweiꞌe o. Miꞌi hawyi uhet upi tutum ehepe kat koꞌi kat koꞌi eimiẽtup oktan uimikyꞌesat nug wywuat pote e.
Ahenoi teran wẽtup pywuat hap epe Peteru e. Saꞌawyꞌi te ti emikyꞌesat ewy yn ereineꞌen e. Taꞌi eweꞌok kytyt hap etopag hawyi ewyry aikowo aikowo emikyꞌesat ewy yn etunug saꞌawyꞌi e maꞌato meiũran ti aru epoꞌoro hawyi epo etitorok hawyi iraniaꞌin neꞌi esokpe pag haria wo teꞌeropyhuꞌat. Iꞌewyte aru ereto raꞌyn aikowo aikowo yt epap i hap kape e Iesui Peteru pe.
Miꞌi hawyi Uito Iuwãu arahaꞌat mekewat Morekuat Porekuat Akag apyk hap kape. Araꞌakasa hawyi -Ikahu kahato heꞌamyꞌap are. Ikytsig kahato are. Miꞌi hawyi arahaꞌat howa kape. Ikahu kahato rasig paĩ are. Poꞌog ikahu aat waikiru waty koꞌi kai iꞌewyte mytyyp koꞌi kai poꞌog ikahu areꞌe. Miꞌi hawyi aat waikiru waty koꞌi mytyyp koꞌi teꞌeruwemoti kahato hawyi teꞌeruwemig ipupi hap ewy poꞌog ikahu iꞌatukai pote poꞌog hẽtyhot poꞌog imehit iꞌatukai. Miꞌi rakirẽ poꞌog arahaꞌat waikiru waty aat mytyyp kape. Maꞌato miꞌi turan yt araꞌakasa hin i raꞌyn iꞌatuewowi yt taꞌatueiam note hin i raꞌyn apo paĩ pote areꞌe.
ကြော်ငြာတွေ