Iuwãu 3:3 - Sateré-Mawé3 Maꞌato Iesui tiwesat -Pywo pe ti areꞌe epe uwe uwe iꞌywaĩꞌĩ pakupꞌi miꞌi haria yn ni teꞌeropyhuꞌat Tupana emiitno e. Pywo ti wemoherep pakup i haria yn tukupteꞌen aru atipy pe aikope Tupana toineꞌen Morekuatno hap tote are e. အခန်းကိုကြည့်ပါ။ |
Miꞌi pote apo are ehepe uwe som pyno toꞌywot mikyꞌesat nug hat sio watꞌyp sio yian e Iesui Tupana motypot yat piaria akag koꞌi pe. Miꞌi hawyi taꞌatuwesat -Taꞌi yian yn inug toꞌywot mikyꞌesat iꞌatuꞌe. -Pywo pe ti miꞌi tã e Iesui. Pywo pe ti miitꞌin morekuat saꞌup sat haria iꞌewyte haryporia yt iweꞌeg i rakaria teꞌeruwehytꞌok Tupana etama pe eiꞌowokai te e.
Pywo pe ti areꞌe mesuwat yi aat waty waikiru koꞌi ikahuro pykai ti aru Tupana ehay moherep haria nimuaria miwan koꞌi tukupteꞌen ne. Yt tuweityk hin i raꞌyn e. Pywo pe ti itig hap iwan hit koꞌi Tupana ehay miwan etiat Muisei miwan Tupana ehay moherep haria miwan topyhuꞌat aru wuatꞌi eꞌat pe. Yt karãpe i aru Tupana ehay miwan miat ikahuro e. Pyno ti yt uwe i ipyhyp kuap Tupana e hap koꞌi -Atunug aru e hap koꞌi taꞌi Tupana tunug kuap yne yne toꞌe hap ewywuat e.
Mio tã watoꞌe pote Tupana aiꞌywotno topyhuꞌat. Tupana yn aimoherep kuap tosaꞌyruꞌin wo tosakiꞌytꞌin no. Mesuwe toineꞌen aiꞌywot aiwemoherep hap kaipyi. Maꞌato watimohey hawyi Aiꞌywot atipy piat toineꞌen aiꞌywotno. Yt aiwekaipyi i watopyhuꞌat kuap Tupana mepytꞌin no. Yt watuwemoherep kuap i aiwekaipyi Tupana mepytꞌin no katupono Tupana kaipywiat yn imepytꞌin wo teꞌeruwemoherep.
Poꞌog iwato kape erehaꞌat e. Meiũran eraꞌakasa aru atipy teꞌokenhypꞌok pe. Miꞌi kape ti aru tuwat tuwat yi kaipyi Tupana potpoꞌororia atipy piaria iꞌewyte teꞌeraꞌaipok aipok aipytyp kape e. Uito ti mekewat muap atipy kape e. Uito miꞌi uiꞌe hap eraꞌakasa hawyi poꞌog uimohey hap topyhuꞌat mekewat -Araꞌakasa en eweran turan Wiku yp og me uiꞌe hap kawiat e Iesui.
Pyno yt imohey i haria mesuwarotiaria hoꞌowasat rakaria wo teꞌeropyhuꞌat. Ahiag topyhuꞌat iꞌatuetupana wo. Miꞌi hawyi karãpe wahenoi sehay wakuat aikotã Tupana tipoꞌoro Tosaꞌyru Aiporekuat no hap etiat iꞌewyte karãpe watimoherep yne Iesui etiat Tupana moherep hat sese etiat Tupana ewywuat rakat miꞌi hap etiat wahenoi turan -Yt eweimohey teiꞌo miꞌi. Yt eweimohey teiꞌo miꞌi e ahiag iꞌatuwanetup hawe yt toikyꞌesat i miꞌiria teꞌeropyhuꞌat Iesui haria pote. Ahiag iꞌatuewa hik hap ewy iꞌatuete yt toikyꞌesat i Iesui kapiat iꞌatuꞌakasa hap pote.
Mekewat hemusin ãpy sokpe sio yt rakaria kape sio Iuteuria eko nug yne haria sio yt hap kape teꞌeruwanetup. Miꞌi haria ti yt kat no i Iesui pe. Maꞌato ti tokaipywiat miit ipakup sio yt hap kape yn ni ihaꞌat Iesui. Imopakup hap toineꞌen sio yt hap kape yn tehaꞌat. Yt kat i imopakup hap toipuẽti pote toimopakup i.
Taꞌi Tupana yn ti Ahehakyeraꞌat kuap hat. Aito ti yt watiꞌatuehakyeraꞌat kuap hin i aiwewi. Iꞌewyte aiminug wakuap koꞌi ti yt putꞌok e i ahehakyeraꞌat hamuat kyiꞌat hamo. Tepiat ahehakyꞌeꞌi hap kaipyi yn ti Tupana ahehakyeraꞌat kuap. Iꞌewyte aiminug saꞌag ipit pit kahato hap koꞌi Tupana yn ikoho kuap. Iꞌewyte ti tutum ahepe Topaꞌãu Wakuat Sese raꞌyn. Miꞌi hawyi ti tosaꞌyruꞌin no tosakiꞌytꞌin no ainug Topaꞌãu wo. Miꞌi hawyi ti koitywy ipakup i rakaria wo raꞌyn watoineꞌen. Tupana tunug ni tuweran miꞌi tã hap ahetiat tuwepyi.
Maꞌato Aiꞌywot atipy piat iweꞌeg sakpo toineꞌen. Miꞌi ti aimuꞌe kahato aipyꞌa pe toweꞌeg hap yt ahiag wat ewywuat hin i. Mio tã e ahepe -Pywuat kahato eweikupteꞌen no Uiꞌewy e ahepe. Woꞌowese haria wo ro eweikupteꞌen e. Woꞌokyꞌe haria wo woꞌopowyro haria wo woꞌowesat kahu hanuaria uiꞌewy o eweikupteꞌen o e ahepe. Waku woꞌokyꞌe hap moherep hanuaria wo eweikupteꞌen e ahepe. Waku wakuat nug haria wo eipe e. Waku yt wẽtup ok i miit mohit hanuaria wo eweikupteꞌen no e ahepe. Waku yt typy ehay rakaria wo eweikupteꞌen e. Waku toꞌoꞌewyꞌewy wuatꞌi miitꞌin kyꞌe haria wo eweikupteꞌen e ahepe aimuꞌe kahato hat atipy piat Aiꞌywot.
Saꞌawyꞌi Aipotypot Iesui ikuꞌuro hawyi Tupana timoieineꞌen guꞌuro pyi. Saꞌawyꞌi yt watomohey hin i aikuꞌuro hawywiat aheineꞌen i hamuat hap. Maꞌato mesup koitywy watomohey kahato kat pote Aiꞌywot Tupana tihep taꞌyn Aikaꞌiwat ikuꞌuro hap kaipyi. Miꞌi pote koitywy -Waku kahato En Tupana. Poꞌog wakuat torannia kai urutoꞌe kat pote egyiꞌat kahato uruepe. Urukyꞌe kahato En. Poꞌog poꞌog torannia miitꞌin kai urukyꞌe hat En katupono etihep taꞌyn urukaꞌiwat hyp hawyi urutoꞌe.
Uiwyriaꞌin karãpe watomohey Iesui hawyi Tupana ainug tosaꞌyruꞌin tosakiꞌytꞌin wo. Miꞌi hawyi imepytꞌin koꞌi wo watopyhuꞌat. Miꞌi hawyi Aiꞌywot ewy watoineꞌen yt kat i saꞌag yt kat i yt naku i hap watunug neran. Aheko yt watunug neran i poꞌog aiminug saꞌag koꞌi saꞌawyꞌi wuat aheko saꞌag koꞌi katupono Tupana ainug tomepytꞌin no Tosaꞌyru Paꞌãu wo aipytꞌatnug hawyi. Koitywy ahowapy kahato Tupana Paꞌãu wywo. Miꞌi hawyi Tupana eiam mo kahato watoineꞌen. Miꞌi hawyi karãpe ahiag ahãꞌãg neran kat saꞌag kat saꞌag nug hamo miꞌi hawyi Tupana Paꞌãu aiꞌauka kahato ainapin kahato aihep ahiag aimaꞌatꞌi maꞌatꞌi hap po pyi. Miꞌi hawyi yt kat i ahewaure ahiag ahãꞌãg hap kape -Yt reiꞌo yt reiꞌo watoꞌe ahiag me.
Pyno miꞌi hawyi poꞌog toꞌe uhepe -Iuwãu e etiwan no tawa Irautiseia piaria kape e. Uhet Iesui. Taꞌi yt uipo hep hin i pywuat sehay enoi hamuat ete e. Taꞌi saꞌawyꞌi mesuwat mytyyp nug hap eꞌyian mete areineꞌen itote wuatꞌi Tupana Mikyꞌesat Nug Hatno yi atipy aat waty waikiru koꞌi ahaꞌawynug yne Uito e Iesui uhepe.