Iruka 6:20 - Sateré-Mawé

²⁰ Miꞌi hawyi Iesui tehaꞌat topotmuꞌeria kape hawyi toꞌe -Tupana mipoityro kahato koꞌi eiperia. Yt hekat rakaria i eweikupteꞌen pykai maꞌato Tupana ieineꞌen hap eheineꞌen hamuat.

Iruka 6:20 ပူးပေါင်းရင်းမြစ်များ

Mateu 11:5

Miꞌi hawyi ewehenoi ro Iuwãu pe aikotã yt ihapytig i rakaria teꞌereꞌakasa raꞌyn hap koꞌi. Iꞌewyte yt hewyry kuap i rakaria ikohyewyry kuap taꞌyn hap. Iꞌewyte hepihi pihi rakaria iꞌatuehãite iraꞌyn hap. Iꞌewyte yt hewaure kaꞌa rakaria ikuap taꞌyn sehay hap koꞌi. Iꞌewyte ikuꞌuro rakaria teꞌerehymut iraꞌyn hap. Iꞌewyte meimewat ihakyꞌeꞌi rakaria Tupana ehay kuap haria wo teꞌeropyhuꞌat.

Mateu 25:34

Miꞌi hawyi ti aru itote uipo sese kawiaria pe Morekuat koro toꞌe ipo ran koꞌi kape -Eweĩꞌẽ ro meikowo Uiꞌywot miꞌatukyꞌe koꞌi e. Atum neran ti Tupana etama ehepe e. Katupono yi nug hawyi te ti mekewat atum teran kahato ehepe are e.

Mateu 5:1

Miꞌi hawyi miitꞌin sem teꞌeruwaꞌatunug Iesui kape. Miꞌi hawyi tehaꞌat iꞌatuewowi hawyi ipotꞌam naꞌyn yityꞌok kape hawyi taꞌapyk itote yityꞌok apypeke. Miꞌi tote ipotmuꞌeria teꞌeruwaꞌatunug iꞌapy pueri wo.

Iruka 12:32

Miꞌi hawyi Iesui toꞌe tomohey haria pe -Uihũria koꞌi ewywuat no eipe are e. Yt typyꞌi kahato i eipe maꞌato yt eweikenꞌẽ teiꞌo katupono Tupana einug neran morekuaria wo karãpe Tupana topyhuꞌat Wuatꞌi Miitꞌin Morekuat nuat hap eꞌat pe e.

Iruka 13:28

Pywo pe ti miꞌiria woꞌokakꞌi haria wo teꞌeropyhuꞌat. Iãi kyret kyret iꞌatuꞌe hoꞌopot hap po puo karãpe okenꞌypy sakpo kaipyi teꞌerehaꞌat Aparãu Isaki Iako kape iꞌewyte yne Tupana ehay moherep haria kape tukupteꞌen aikope Tupana toineꞌen morekuatno hap tote.

Iruka 14:15

Miꞌi hawyi wẽtup ok miit itote Iesui ehay toikuap hawyi toꞌe -Ikahu kahato tig ehay e. Pywo uwe toineꞌen Tupana porekuatno ieineꞌen hap tote ienuk wato hap eꞌat pe turan Tupana mipoityro sese rakaria wo teꞌeropyhuꞌat e.

Iruka 16:25

Mio tã e pote Aparãu tiwesat -Uhaꞌyru e etiwaure raꞌyn apo eieineꞌen ne turan aikotã waku hap koꞌi yn emikyꞌesat koꞌi eheineꞌen turan maꞌato Irasaru ieineꞌen yi totiat turan hoꞌopot hap yn toineꞌen tuete ihakyꞌeꞌi e.

Iruka 4:18

Miꞌi ti toimowẽpap mio tã e hap -Uipotypot wyti hum topaꞌãu uhepe miꞌi ti uiꞌairo tehay wakuat enoi ihakyꞌeꞌi rakaria piat hamo. Iꞌewyte uipoꞌoro tehay enoi mipyhik koꞌi piat hamo. Iꞌewyte yt ihapytig i rakaria piat henoi hamo. Iꞌewyte mekewat miitꞌin mimohit koꞌi ehehakyeraꞌat hamo e.

Iesui Potmuꞌeria 14:22

Miꞌi hawyi Pauruꞌin tiꞌatunapin kahato itotiaria ipakup tiaria iꞌatumoesaika hamo iꞌatuepiat imohey kahato hamo. Mio tã iꞌatuꞌe -Eiweꞌeg wo o katupono meiũran ti ewehoꞌopot kahato mesuwe Tupana etama kapiat muap upi iꞌatuꞌe imohey pakup i haria pe.

2 Kuriniu 6:10

Aimosoꞌopot hap aimoꞌarot kahato. Maꞌato miꞌi pykai watuwehum kahato Tupana kape. Maꞌato iꞌatuwanetup hawe yt kat hamo rakaria wo i watoineꞌen. Maꞌato wahenoi Tupana ehay wakuat iꞌatuepe hawyi taꞌatumohey hawyi taꞌi Tupana mipoityro koꞌi wo tukupteꞌen naꞌyn. Miꞌi hawyi aikotã hekat rakaria ewy tukupteꞌen. Yt kat i ahekat pykai.

2 Kuriniu 8:2

Maꞌato miꞌi pykai iꞌatuwepiit hap yn topyhuꞌat. Miꞌi pykai taꞌatumoꞌẽ taꞌatuepiat ekat hit yne iraniaꞌin me. Poꞌog iꞌatuegyiꞌat hekat rakaria kai taꞌatumoꞌẽ yne pote. Katupono taꞌatumoꞌẽ yne miitꞌin powyro hamo.

2 Kuriniu 8:9

Eipotypot Iesui aikyꞌe kahato. Miꞌi hap eweikuap taꞌyn maꞌato ahenoi teran i raꞌyn. Hegyiꞌat kahato Miꞌi aikotã hekat sese rakat timoꞌẽ yne tekareꞌen ihakyꞌeꞌi rakaria pe hap ewy Aikaꞌiwat hegyiꞌat kahato. Saꞌawyꞌi sese yne kareꞌen topyhuꞌat ipo pe atipy pe. Miꞌi hawyi ahowawi tuut atipy kaipyi. Miꞌi Miit ihakyꞌeꞌi rakat topyhuꞌat. Toimoꞌẽ yne tewaku hap ahowawi aikyꞌe haype. Miꞌi hap koꞌi watikuap taꞌyn. Maꞌato waku watopyhuꞌat aikotã hegyiꞌat hap ewy uhekatuwyria are.

1 Tesaronika 1:6

Saꞌawyꞌi uruminug wakuap kape ti ewehehaꞌat kahato hawyi -Taꞌi uruto ti iꞌewyte urutukupteꞌen teran Pauruꞌin ewy eweiꞌe. Taꞌi Iꞌatukaꞌiwat Iesui mohey haria wo urutukupteꞌen teran eweiꞌe. Iꞌatumienoi ahepiat wyti pywuat kahato rakat eweiꞌe. Mio tã eweiꞌe hawyi ti Tupana Paꞌãu putꞌok e raꞌyn ehetiat hawyi eiwepiit kahato hap taꞌyn topyhuꞌat ehete. Miꞌi hawyi ti maꞌato mekewat hoꞌopot hap eꞌat putꞌok e raꞌyn ehete turan yt hep e kuap i raꞌyn ehepiat imohey hap iꞌewyte eiwepiit hap.

2 Tesaronika 1:5

Eweikuap kat pote ewehoꞌopot hap. Taꞌi Tupana mepytꞌin eipe pote -Waku kahato eipe e Tupana. Taꞌi ehewaku hap putꞌok e uiꞌyatypiat wuatꞌi eꞌat piat eikupteꞌen hamo. Katupono iꞌatumikyryꞌi pykai yt uiꞌatoiat hin i eipe e aru Tupana ehepe.

Tiaku 1:12

Maꞌato uwe uwe tepiat hoꞌopot turan te hakyꞌeꞌi turan yt iwaure i imohey hap miꞌi hat ti Tupana mimowaku wo toineꞌen iꞌewyte Tupana mimowepiit kahato wo topyhuꞌat wuatꞌi eꞌat pe katupono hoꞌopot hap sakpo gosap hat toineꞌen imohey hat. Miꞌi hat pe Tupana toꞌe aru -Uikyꞌe hat sese en e. Miꞌi pote woromoieineꞌen kahato wuatꞌi eꞌat pe e yt tewaure i haria pe.

Tiaku 2:5

Pyno ewetum no ehewaure kaꞌa uhepe uimikyꞌe koꞌi. Yt eweikuap i te apo aikotã Tupana tiꞌairo kahato yt hekat i rakaria Iesui mohey kahato hanuaria wo hap. Poꞌog toiꞌairo ihakyꞌeꞌi rakaria temiit no tetama piatnuaria wo iraniaꞌin kai katupono saꞌawyꞌi toꞌe -Uhemiit sese wyti aru tukupteꞌen miit emiit haria wo karãpe arepyhuꞌat Wuatꞌi Miitꞌin Morekuat Koro mesuwarote e Tupana miwan me saꞌawyꞌi. Mio tã toꞌe hap ewy raꞌyn ti mesup te toiꞌairo temiitꞌin no miit yt uwe mikuap ewywuat koꞌi i yt uwe mikyꞌe ewywuat koꞌi i e. Miꞌiria pe ti -Worohoꞌoꞌairo eipe miitꞌin porekuaria wo uimohey sese haria eiperia pote e. Worohoꞌonug eipe morekuat no yne mesuwat yi tote e hatek takaria pe tokyꞌe sese haria pe. Worohoꞌomoesaika uimohey kahato hap wywo wuatꞌi nug hamo e Tupana tomohey haria pe.

Iesui Aru E Hap 2:9

Uimohey haria tawa Simina piaria worohoꞌokuap kahato eipe. Waku sakpoꞌe eipe e. Uheropat haria seseria kahato eipe e. Atikuap ewehoꞌopot uhetiatno hap e. Atikuap aikotã hoꞌopot kahato popuo eipotpap uimikyꞌesat nug hap ete. Satek takaria eweikupteꞌen maꞌato uiwanetup hawe hekat kahato rakaria wuatꞌi eꞌat piaria eweikupteꞌen e. Iꞌewyte atikuap aikotã itotiaria tukupteꞌen hap eiꞌatusatyꞌi satyꞌi kahato haria e. Atikuap aikotã uruto yn ni Tupana kuap haria katupono Iuteu ywania sese uruto iraniaꞌin ehepe maꞌato eipe yt eweiꞌe. Miꞌiria taꞌatuehay saꞌag wo ehepe. Yt Tupana emiitꞌin hin i miꞌiria maꞌato ahiag motypot yat piaria miꞌiria e. Yt Iuteu ywania hin i maꞌato ahiag ywania saꞌag tukupteꞌen miꞌiria Iuteu ywania ran neꞌi koꞌi e.