Iruka 18:32 - Sateré-Mawé

³² Itote Miitꞌin Saꞌyru ewanikaptia ywania esuraraꞌin po pe raꞌyn ipag iꞌauka hamo itote irane e Iesui. Yt naku i taꞌatunug hete e. Miꞌiria teꞌeruweukaꞌi kahato taꞌatumikyryꞌi hawyi kuitu kuitu iꞌatuꞌe Miitꞌin saꞌyru epiit ete imohit haype irane itote e.

Iruka 18:32 ပူးပေါင်းရင်းမြစ်များ

Iruka 23:11

Iꞌewyte morekuat Eroti tesuraraꞌin wywo tikuasa kahato Iesui. Miꞌi hawyi morekuat esokpe ikahu kahato hap ewywuat taꞌatupag Iesui piit pe imohit hamo hawyi taꞌatupoꞌoro i raꞌyn morekuat Piratu kape.

Iesui Potmuꞌeria 3:13

Ahaꞌaseꞌiꞌin Aparãu Isaki Iako eTupana mimoehãite ti meiũwat miit e. Eweikuap apo kat pote Tupana timoehãite ipy kĩꞌã rakat ehehamo e. Pyno ahenoi ehepe. Toikyꞌesat kahato temiit sese Iesui motypot hap haype wyti e. Taꞌi aheTupana tikyꞌesat kahato raꞌyn wyti eimikuasa te Iesui motypot hap e. Morekuat Piratu ti yt iꞌauka teran i wen maꞌato eipe ti eweikyꞌesat iꞌauka hap -Yt naku i Iesui eweiꞌe morekuat pe itote saꞌawyꞌi e. -Etiꞌauka ro pyno Iesui eweiꞌe kahato morekuat Piratu pe e.

Maku 14:65

Miꞌi hawyi iraniaꞌin kuitu iꞌatuꞌe Iesui ete hawyi iraniaꞌin ihahik iꞌahyk ahyk hamo hawyi teꞌeroꞌe -Etikuap yne pote uwe mio eꞌahyk ahyk apo iꞌatuꞌe Iesui pe. Iꞌewyte suraraꞌin howa petek tuereto Iesui piit ete.

Mateu 26:67

Miꞌi hawyi kuitu iꞌatuꞌe Iesui owa ete. Taꞌatuꞌahyk taꞌatupo wo. Iraniaꞌin howapetek taꞌatupopep mo.

Mateu 16:21

Miꞌi turan eꞌyian mete Iesui henoi raꞌyn aikotã aru topyhuꞌat tetiat hap koꞌi temiitꞌin me -Pyno waku areto Ierusarẽi kape maꞌato itote ti aru Iuteuria akagnia iꞌewyte paꞌi koro koꞌi akag koꞌi iꞌewyte mekewat Muisei miwan kuap kahato haria ti aru uimosoꞌopot kahato itote hawyi ti aru uiꞌauka raꞌyn. Maꞌato ti aru myẽꞌym eꞌat hap ete arẽtem iraꞌyn guꞌuro pyi.

Iesui Potmuꞌeria 2:23

Tupana Mipoꞌoro eweiꞌauka raꞌyn ariaꞌyp posak saꞌag ete yt kat i saꞌag tutunug pykai e. Yt naku i kahato ewetunug tope maꞌato Tupana tum naꞌyn Tosaꞌyru ehepe iꞌauka hamo katupono iꞌauka hap toikuap yian mete e. Taꞌi ariaꞌyp posak ete neꞌi eweiꞌauka Haꞌyru. Yt nakuaria i ehay upi eweiꞌauka Imipoꞌoro Aiporekuat nuat maꞌato ikuꞌuro hawyi Tupana tihep i raꞌyn guꞌuro pyi. Totiõtem i raꞌyn Iesui e Peteru Iuteuria pe.

Iuwãu 18:35

Miꞌi hawyi Piratu tiwesat -Uito ti yt ewat eꞌywania Iuteu ewywuat hin i e. Eꞌywania paꞌi koro koꞌi ti erut uhewowi ekuap hamo sio waku En sio yt naku i e hap kuap hamo e. Pyno kat som yt nakuap i etunug Uhyt e Piratu.

Iuwãu 18:30

Miꞌi hawyi taꞌatuwesat -Meiũwat Miit wyti yt nakuat i sese ti rat iꞌatuꞌe. Miꞌi pote uruterut Miꞌi Miit ewowi mehin iꞌatuꞌe. Waku Miꞌi Miit pote ten yt karãpe i uruterut ewowi iꞌapiheg hamo mehin iꞌatuꞌe. Maꞌato pywo ti Miꞌi Miit yt naku i sese rakat iꞌatuꞌe. Miꞌi pote ti uruterut ewowi iꞌatuꞌe morekuat pe.

Iuwãu 18:22

Mio tã e Iesui pote wẽtup ok surara tiꞌahyk taꞌyn Iesui howa ete topopep mo -Waĩ ehay saꞌag neiꞌo paꞌi koro ete e haty wo Iesui pe

Iruka 23:35

Miꞌi hawyi iraniaꞌin teꞌerahaꞌat aat Iesui ewowi. Miꞌi hawyi toꞌywania Iuteuria ywania iꞌatuehay saꞌag kahato Iesui ete -Taꞌi iraniaꞌin toiꞌatuehakyeraꞌat kuap wen maꞌato yt hesaika hin i tuwehakyeraꞌat hamo iꞌatuꞌe. Miꞌi hawyi iꞌatuꞌe Iesui pe -Pywo pe ti En Tupana Mipoꞌoro uruporekuat nuat pote waku ewewi erehakyeraꞌat hawyi erehep to eꞌariaꞌyp posak pyi iꞌatuꞌe.

Iruka 23:1

Miꞌi hawyi torannia raꞌyn teꞌeropoĩꞌam Iesui eroto hamo morekuat koro Piratu kape.

Mateu 27:2

Miꞌi hawyi taꞌatupoꞌi poꞌi raꞌyn Iesui haity wo. Miꞌi hawyi taꞌatuereto raꞌyn wanikaptia porekuat Piratu e hap kape.

Iuwãu 18:28

Miꞌi hawyi hunete taꞌatueroto Iesui ipoꞌi poꞌi pe morekuat wato eiam kape paꞌi wato Kaꞌiwasi yat pyi. Miꞌi hawyi maꞌato Iuteu ywania akag koꞌi yt tuwehytꞌok teran i Iesui upi morekuat eiam me katupono -Yt naku i wateke meiũwat getap we iꞌatuꞌe katupono yt aiwat aiꞌywania yat i iꞌatuꞌe. Wateke pote ten yt watenuk kuap i raꞌyn iraniaꞌin aiꞌywania wywo Tupana motypot ienuk wato hap turan iꞌatuꞌe toꞌope.

Maku 15:1

Miꞌi hawyi hunete aat wẽtem hawyi meremo teꞌeruwaꞌatunug paꞌi wato koꞌi nagnia miwan enoi haria yne yne iraniaꞌin woꞌonapin saꞌag haria wywo i raꞌyn teꞌeruwaꞌatunug. Miꞌi hawyi toꞌope toꞌoehay aikotã aikotã waku Iesui ete taꞌatunug hap koꞌi ete. Miꞌi hawyi taꞌatupoꞌi poꞌi hawyi taꞌatuereto hawyi taꞌatuium morekuat Piratu kape.

Mateu 20:19

Miꞌi hawyi ti aru uhum wẽtup ywania wanikaptia po pe iꞌatumikyryꞌi uhetiat hamo uiꞌahyk ahyk hamo e. Miꞌi hawyi ti aru uiꞌauka raꞌyn itotiaria ariaꞌyp posak ete e. Miꞌi hawyi uikuꞌuro sese aru itote e. Myẽꞌym eꞌat aru uisyp hawe uipiit topyhuꞌat. Maꞌato miꞌi hawyi ti aru areineꞌen ne i raꞌyn guꞌuro pyi e.

Mateu 22:6

Maꞌato iraniaꞌin tawa piaria toꞌokyryꞌi imipoꞌororia ete. Wẽtup ok wẽtup ok taꞌatuꞌauka raꞌyn imipoꞌoro.

Iruka 18:33

Ipak pak kahato itote hawyi aru iꞌauka saꞌag neꞌi aru maꞌato miꞌi pykai myẽꞌym eꞌat hawyi tuwẽtem aru ikuꞌuro sese hap pyi e. Iꞌasyp pykai tuwẽtem i raꞌyn aru iꞌasyp hap kaipyi e.

Iuwãu 18:32

Aikotã yian mete Iesui tuwenoi tokuꞌuro hamuat ariaꞌyp posak ete hap ewy raꞌyn ti taꞌatunug naꞌyn tuete itote.