Miꞌi hawyi Iesui mohey haria waku pe i raꞌyn tukupteꞌen tawa Iuteia Karireia hawyi Samaria pe katupono iꞌatusatyꞌi satyꞌi haria iꞌatuꞌuka teran haria iꞌatupohep porapꞌi pote. Waku iꞌatuꞌe toꞌope. Miꞌi hawyi teꞌeruwemoesaika kahato raꞌyn Iesui mohey hawe. Iꞌatuwepiit raꞌyn. Miꞌi hawyi yt uwe pupi i teꞌerokenꞌẽ.
Ewesu 4:1 - Sateré-Mawé1 -Uimimuꞌeria tawa Ewesu piaria mesup uito Pauru areineꞌen meiũpe woꞌopyhik hawe. Wanikaptia uipyhyp taꞌyn Aikaꞌiwat potpap nug hap pyhyp hamo uipyhik wen maꞌato miꞌi pykai worohoꞌomuꞌe te uimiwan myi uiwyriaꞌin. Saꞌawyꞌi Tupana aiꞌairo temiitꞌin no tomotypot hamo. Miꞌi pote areꞌe ehepe -Toꞌiro watimotypot Aiꞌairo hat haty wo are. Aikotã aimepytꞌin hãpyk takaria ewy aimowepiit taꞌatupotpap wakuat nug hap ete aimikyꞌesat nug hap ete miꞌi hap ewy waku watimowepiit Aiꞌywot atipy piat wakuat nug hap kaipyi. အခန်းကိုကြည့်ပါ။ |
Ewesu 4:1
36 ပူးပေါင်းရင်းမြစ်များ
Uheꞌywytꞌin uheꞌykeꞌetꞌin uheinytꞌin yt ahewaku hin pykai i Tupana aikyꞌe -Yt atiꞌatuꞌapiheg teran i miꞌiria e tuwepe ahetiat pe. Tupana miꞌatukyꞌe eipe pote ahẽtup ehepe uheꞌykeꞌetꞌin uheinytꞌin Iesui mohey haria Tupana eikyꞌe pote ewetum no eipiit tope eweikupteꞌen kahato imotypot haria wo. Aikotã saꞌawyꞌi wuaria tiꞌauka taꞌatuhũria Tupana motypot hamo hap ewy waku ewetum eipiit Tupana kape Tupana potpap nug hamo. Waku eheineꞌen hap imikyꞌesat ewy imotypot hap yn topyhuꞌat. Waku eipiit pyi tuwẽtem sehay Tupana motypot hap yn Tupana ewaku hap oktan aikotã waku watunug hap ewy. Aikaꞌiwat wakuat kahato pote waku watopyhuꞌat heropat sese haria wo.
Uito ti eimuꞌe hat sese saꞌawyꞌi wuat. Haꞌawyte Tupana uipoꞌoro ehewowi. Miꞌi turan worohoꞌonapin perupꞌi puo aikotã Aikaꞌiwat Iesui ainapin hap ewy aikyꞌe hap wywo. Saꞌawyꞌi ihakyꞌeꞌi hakyꞌeꞌi rakatno uito areineꞌen eipyꞌasetpe turan poꞌog yi kape. Maꞌato koitywy areineꞌen pya eikai. Miꞌi pote worohoꞌonapin uimiwan me haty wo uiwemotypot wywo.
Koitywy toineꞌen Wuatꞌi Porekuat Koro wo. Miꞌi hawyi ainug topotpoꞌoro wo morekuat hit koꞌi wo wẽtup tawa kape wẽtup tawa kape tehay moherep hamo -Eweiꞌaipok to Tupana kape e hamo. Aikaꞌiwat Iesui toineꞌen atipy pe. Maꞌato uruto haipepiaria ihay moherep haria urutoꞌe. Tupana urupoꞌoro ehewowi eikyꞌe kahato haype. Worohoꞌokyꞌesat eipe uruwyriaꞌin wo i raꞌyn urutoꞌe. Eiwewyꞌinug no Tupana wywo urutoꞌe.
Urutoria Iesui ehay moherep haria sese. Miꞌi pote koitywy uruhẽtup kahato ehupi. Eipe iꞌewyte uruꞌewy te wẽtup piit ewy yn Tupana wywo. Watuwepotpap kahato wuatꞌi ywania piat ikuap Haꞌyru etiat hamo. Pyno Tupana eropat haria aito pote uruhẽtup ehupi urupyꞌa pyi kahato. Yt eweikupteꞌen neiꞌo Tupana piat eikyꞌe hap ete iraꞌak takaria wo neꞌi. Tupana tum naꞌyn ehepe kat koꞌi kat koꞌi topotpap nug hamuat yt kat saꞌup i. Yt naku i Tupana miium ahepiat koꞌi watiporerokosap neꞌi. Yt naku i watipun imiium koꞌi.
Uito meimuẽwat seko koꞌi uhehakyeraꞌat hap atiwaure yne rakirẽ ahẽtup kahato Iesui kape yn uhehakyeraꞌat hap. Miꞌi hawyi atipuẽti Tupana Iesui mohey hap upi waku kahato. Pyno mesup atikyꞌesat kahato eipe uito ewywuat. Yt eweimohey teiꞌo eheko nug hap muap Tupana kuap hamuat katupono Iesui yn muap Tupana kape are. Atikyꞌesat kahato eipe uiꞌewywuat imohey haria hap atikyꞌesat eweikupteꞌen hamuat paĩ. Iuteuria ywania mepyt sese uito meiũ paĩ. Uiꞌywot ti Iuteu sese paĩ. Uiꞌywania eko koꞌi ewy atunug kahato saꞌawyꞌi uhehakyeraꞌat hap kyewi Tupana kuap hamo wen maꞌato yt atipuẽti i miꞌi muap atunug yne urueko ewywuat pykai paĩ. Miꞌi hawyi Iesui Uhehakyeraꞌat hatno topyhuꞌat hawyi waku kahato Tupana topyhuꞌat yt pya hin i uikai topyhuꞌat. Pyno atikyꞌesat eipe uhepiat Iesui mohey hap ewywuaria ro eweikupteꞌen. Saꞌawyꞌi areineꞌen eipyꞌasetpe turan eheko ewywuat atunug. Yt urueko koꞌi i atunug uito Iuteu uito pykai. Eipe ewy atunug itote. Pyno mesup ewetunug uito ewy eweikupteꞌen yi Karasia ywania. Waku eheko wakuat ewywuat ewetunug aikotã saꞌawyꞌi atunug eipyꞌasetpe are. Maꞌato mio uheko Iuteu eko upi eweikat Tupana piat ehehakyeraꞌat hap aikotã uimotag hap eꞌat pe ewywuat ewetunug neran. Yt eiweꞌeg hin i mio tã ewetunug pote. Saꞌawyꞌi uimohey haria eweikupteꞌen. Kat pote mesup uhehay mohit hanuaria eweikupteꞌen.
Mesup ti uito Pauru woꞌopyhik hawe areineꞌen katupono morekuaria yt tikyꞌesat i poꞌog miitꞌin muꞌe uhepiat hap Iesui etiat hamo. Miꞌi pote uipyhyp mesuwe woꞌopyhik hawe. Yt taꞌatukyꞌesat i iraniaꞌin ywania ikuap Iesui hap. Miꞌi pote uipyhik mesuwe wen maꞌato yt uipyhik kuap i meiũwat woꞌopyhik hawe katupono mesuwe ahẽtup Tupana kape eipowyro hap aat kaꞌap. Iꞌewyte arepotpap kahato miwan nug hap ete mesuwe uimipoꞌoro einapin hamuat hap ete.
Pyno worohoꞌomuꞌe teran Aikaꞌiwat Iesui ehay ete. Eweꞌeg wo o eiminug saꞌag koꞌi eimikyꞌesat saꞌawyꞌi eheko saꞌawyꞌi wuat pupi are. Yt imohey i te turan wuat saꞌag nug hap ete yt aiweꞌeg hin i saꞌawyꞌi wuat aiminug saꞌag koꞌi kai -Eweiꞌatoiat ro miꞌi koꞌi e Tupana pykai. Uiwyriaꞌin yt naku i watuwanetup poꞌog aikotã yt imohey i haria wanetup hap ewy neꞌi katupono miꞌiria yt naku i nug hap yn iꞌatuwanetup hawe. -Uito poꞌog poꞌog torannia kai iꞌatuꞌe taꞌatuwanetup hawe. Yt paa iꞌatuꞌe hin i taꞌatuminug yt naku i hawyi. Miꞌi tã iꞌewyte aito saꞌawyꞌi maꞌato mesup waku watuwenapin miꞌi e hap pun hamuat e.
Katupono aito Aikaꞌiwat piit aga koꞌi ewywuat are. Iꞌewyte aipaꞌãu Tupana miium Aikaꞌiwat Iesui watnuat e. Miꞌi pote aito imohey haria wẽtup paꞌãu wẽtup piit ewywuat watopyhuꞌat mesuwe aito imohey haria. Aito ti wẽtup piit imohey haria aito pote aiwoꞌoꞌewy ewy katupono Iesui wywo watukupteꞌen. -Mukiꞌite ti aru watoineꞌen wuatꞌi eꞌat pe e haria sok aito watoꞌe.
Aikotã Aipotypot Iesui aikyꞌe kahato saꞌawyꞌi aikyꞌe kahato te. Aikyꞌe kahato hawyi aikyꞌe hap upi ikuꞌuro. Tutum naꞌyn heineꞌen hap aikawiatno hap aikotã saꞌawyꞌi wuaria tum taꞌatuhũria aria pe Tupana mowepiit hamo. Miꞌi hap ewy ikuꞌuro ariaꞌyp posak ete aikyꞌe kahato haype. Aikyꞌe sese hat Iesui pote ikuꞌuro aiꞌapiheg hap u hamo. Miꞌi pote aikotã aikyꞌe hap ewy waku watikyꞌe iraniaꞌin aikuꞌuro hap kape.
Karãpe watimoherep sehay wakuat Aipotypot etiat miitꞌin me miꞌi turan waku aiweꞌeg wo o aikotã aikotã watoineꞌen iꞌatupyꞌasetpiat turan. Waku iweꞌeg kahato rakaria ewy watoineꞌen. Yt naku i watiꞌatumuꞌe miitꞌin yt naku i nug haria aito pote. Aimimuꞌeria yt tikyꞌesat i ahehay Iesui etiat taꞌatupuẽti yt naku i nug haria aito pote. Yt teke i iꞌatuewaure kaꞌa pe wakuat Iesui etiat aheineꞌen hap yt ikahu i pote are. Atikyꞌesat kahato wakuaria wo o eweikupteꞌen sio areineꞌen eipyꞌasetpe sio yt. Waku eweikupteꞌen wakuat nug haria wo o itote yt uiwywuat pykai i. Miꞌi hawyi yt areineꞌen i eipyꞌasetpe pykai sehay wakuat atikuap aru iraniaꞌin wẽ pyi ehetiat eiminug koꞌi piat hap wyti aru hap atikuap. -Taꞌi yt taꞌatuꞌatoiat hin i te Iesui mohey hap iꞌatuꞌe aru uhepe. Toꞌoꞌewyꞌewy wẽtup miit piit ewy iꞌatupotpap e hap aru atikuap wy ehetiat. Taꞌi suraraꞌin ewy tuꞌuka kahato saꞌag ete e hap aru atikuap wy. Iꞌewyte taꞌatukyꞌesat yne miitꞌin Iesui ehay wakuat mohey haria iꞌatuꞌe aru uhepe meiũpe yt heremo i areineꞌen eipyꞌasetpe pykai are.
Yt poriꞌok poriꞌok yt areput hin i. Hãpyk kahato areput atikyꞌesat kahato -Waku kahato ereput uhyt e hap yn atikyꞌesat Aipotypot e hap. Atikyꞌesat Tupana tum uhepe mekewat seput haria eꞌamatap ewy mekewat uipainug hap ewy. Atikyꞌesat kahato Tupana toꞌe uhepe areput kahu hawyi -Toꞌiro atipy kape kat pote Uimipoꞌoro Uhaꞌyru mohey kahato hat en. Itote atum epe uimiium wuatꞌi eꞌat piat e hap atikyꞌesat. Miꞌi pote seput sese hat ewy areineꞌen Iesui wanetup hap ewywuat kape areput.
-Tupana uruikyꞌesat kahato tawa Korosi piaria Epaꞌãu eiam kahato wo eweꞌeg hamo iꞌewyte emikyꞌesat nug kuap hap urutoꞌe mesuwe uruhẽtup. Uruikyꞌesat miꞌiria aikotã iꞌyp iꞌywa kahato rakat ewy hewo hewo kahato hap ewy wyti uruikyꞌesat kahato miꞌiria Tupana urutoꞌe. Pyno uruikyꞌesat miꞌiria wakuap yn nug haria En ewy hap uruikyꞌesat. Iꞌewyte uruikyꞌesat ekuap hap ihatꞌok ewy ewy putꞌok e Esaꞌyru mohey haria ete urutoꞌe uruhẽtup Tupana pe.
Miꞌi hawyi waku eweiꞌe Iesui pe -Uruikyꞌesat kahato En urukaꞌiwat no hap eweiꞌe. Miꞌi ti waku watoꞌe. Iꞌewyte mesup yne eꞌat pe waku watoꞌe Aikaꞌiwat Iesui pe -Worokuap kahato teran uipyꞌa pe waku watoꞌe. Uruikyꞌesat aiwanetup hap wẽtup ok wanetup hap ewy yn waku watoꞌe. Miꞌi ti iꞌewyte waku watoꞌe aat kaꞌap watomohey hawyi.
Aiwy Epawai toineꞌen mesuwe. Miꞌi iꞌewyte waku e hap toipoꞌoro ehewowi. Aipotypot Iesui eropat kahato hat Epawai eipyꞌasetpywiat miꞌi. Miꞌi pote tohẽtup aat kaꞌap topyꞌa pyi Tupana kape yne hesaika hap wywo -Etipowyro aiwyriaꞌin tawa Korosi piaria emikyꞌesat oktan nug hanuaria teꞌeropyhuꞌat. Etiꞌatumotag miꞌiria Esaꞌyru oktan e. Etiꞌatumoesaika yt karãpe i eꞌatoiat hamuat e. Atikyꞌesat itotiaria pywo iꞌatuꞌe yne hap ehay etiat hap e Epawai aat kaꞌap meiũpepyi Tupana kape epowyro hamuat.
Uruiꞌatumaharaꞌi maharaꞌi kahato eipe urumepytꞌin mote. Ehewyry hãpyk kahato o Tupana mikyꞌesat ewy urutoꞌe. Eikay kay raꞌyn temiitꞌin no tetawa kape aikope toineꞌen Morekuat no hap kape aikope tewaku hap moherep hap kape eikay kay. Miꞌi tote yt tuwemoti hin i Tupana eiminug koꞌi pupi. Miꞌi hap uruikyꞌesat kahato. Yt kat i hin i Tupana wemoti eiminug koꞌi pupiat hap uruikyꞌesat.
Miꞌi tupono uruhẽtup kahato wuatꞌi eꞌat pe ehupi -Tupana uruikyꞌesat hãpyk kahato gupteꞌen haria wo emohey haria tawa Tesaronika piaria urutoꞌe. Yt wẽtup ok i toineꞌen itote ewemoti ehay pupiat hat urutoꞌe. Etum iꞌatuepe esaika hap emikyꞌesat wakuap yn nug hamuat hap urutoꞌe. Uruꞌywot miꞌiria Esaꞌyru mohey haria sese miꞌi tupono poꞌog uruikyꞌesat iꞌatuehãite imohey hap etiat hap urutoꞌe.
Tupana ahehakyeraꞌat hawyi ainug temiitꞌin wo. Yt aiwanetup kahu hap upi i yt ahewaku hap upi i maꞌato tomikyꞌesat no tegyiꞌat hap oktan ahehakyeraꞌat wuatꞌi eꞌat piat aikotã Tupana toꞌe nimo saꞌawyꞌi tutunug yne wuatꞌi hap yian mete -Atiꞌatuehakyeraꞌat ti aru Uhaꞌyru mohey haria e Iesui etiat hap ewy.
-Iꞌewyte yt eweteroꞌok teiꞌo eikaꞌiwat ekareꞌen koꞌi ereꞌe o. Iꞌewyte eipotpap kahato o wakuap koꞌi eiminug koꞌi ete. Eikaꞌiwaria emiitꞌin no kahato o eweikupteꞌen ereꞌe o. Miꞌi tã ewetunug mote ti aru eikaꞌiwat Tupana ehay motypot hap kahato ewetunug eikaꞌiwaria wanetup hawe Ahehakyeraꞌat hat Tupana ehay motypot hamo eweikupteꞌen ereꞌe o Iesui mohey haria miitꞌin eropat haria pe Titu.
-Tupana etiꞌatumohãpyk aiwyriaꞌin wakuap nug haria are. Etunug miꞌiria Esaꞌyru mikyꞌesat ewy waku nug haria wo are. Etunug miꞌiria Esaꞌyru mohey hap etiat itag nakaria wo are. Atikyꞌesat etum iꞌatuepe esaika hap wakuap nug hamuat are. Atikyꞌesat iꞌatuminug emowepiit hap yne hawyi eha mowepiit hap topyhuꞌat are. Tupana uito ti emipoꞌoro Esaꞌyru mohey kahato hat. Esaꞌyru wywo ahẽtup mesup ewowi are. Atikyꞌesat Esaꞌyru mowato mesuwat yi totiat wuatꞌi eꞌat piat hap atikyꞌesat Tupana. Tupana waku kahato En aat kaꞌap are. Etiꞌatukawiatno meiũpepyi uiwyriaꞌin Iuteu ywania are. Iesui set upi ahẽtup Toran naꞌyn uiꞌe hap are.
Pyno Iesui poꞌog atipy piaria kai iꞌewyte mesuwiaria kai. Waku watuwanetup kahato aimimohey kape. Tupana mimowaku koꞌi aito uiwyriaꞌin. Aito wẽtup ok ywytꞌin koꞌi wo yn Tupana ainug Aheykeꞌet Iesui pote. Aito wẽtup sok yn wuatꞌi atipy kapiat wat hanuaria aito. Koitywy Tupana aikay kay atipy kape. Miꞌi pote waku watuwanetup kahato Ahepaꞌi Koro Iesui kape hawyi -Iesui Ahepaꞌi Koro watoꞌe iraniaꞌin me miꞌi pote wẽtup yn miit ewywuat watopyhuꞌat wẽtup ehay ewy yn watoꞌe.
Uito ti Peteru. Uimikyꞌeria sese eipe. Miꞌi pote atikyꞌesat kahato ewetunug uimikyꞌesat ewy. Atikyꞌesat kahato eweiꞌatoiat yne ehewaire hap kyꞌesat hap koꞌi eipiit mikyꞌesat saꞌag koꞌi. Karãpe wẽtup ok ehãꞌãg hawyi -Yt atikyꞌesat i eweiꞌe. Taꞌi aimikyꞌesat saꞌag koꞌi aipyꞌa piat toineꞌen aat kaꞌap hawyi meiũran yt kat i Tupana kyꞌe hap toineꞌen aikai kat pote mekewat aimikyꞌesat saꞌag koꞌi tuꞌuka kahato Tupana mikyꞌesat hap wywo aipyꞌa pe. Mesuwat rotiaria ewy yt naku i watopyhuꞌat kat pote atipy piaria aito pote. Ahewyry mesuwarote wen maꞌato ahetama sese yt mesuwarote i. Miꞌi pote yt naku i iraniaꞌin mikyꞌesat ewywuat watunug saꞌag iꞌatuwywo.
Karãpe Iesui mohey haria iraniaꞌin yt iꞌatuwese i ehete hawyi waku eweikupteꞌen iwese rakaria wo. Yt eweipoepyk teiꞌo iraniaꞌin tunug saꞌag ehetiat pote. Taꞌatunug saꞌag hawyi -Waku eweiꞌe emohit miꞌiria pote. Etiꞌatumotypot miꞌiria uhytꞌiꞌin manaꞌin. Miꞌi tã ewetunug mote Tupana mipoityro koꞌi wo eweikupteꞌen. Yne Tupana ekat topyhuꞌat eiwatnuat atipy pe. Miꞌi tã ewetunug mote -Worohoꞌopoityro eipe e Tupana ahepe.
Maꞌato Tupana ti eipowyro kahato hat toineꞌen uiwyriaꞌin ipakup takaria. Tutum neran ehepe yne tesaika hap yt kat saꞌup i. Toikyꞌesat kahato eiperia tomimotypot koꞌi wuatꞌi eꞌat piat hatno. Kat pote Aipotypot Iesui mohey haria eipe pote. Pyno hoꞌopot hap yt motꞌi hamuat i toineꞌen. Mukiꞌite eꞌihatꞌok eꞌihatꞌok hap ewy tokosap taꞌyn. Pyno waku etuꞌu hoꞌopot hap mesup miꞌi hawyi meiũran Tupana mimotag koꞌi wo eweikupteꞌen waku rakaria hãpyk kahato rakaria wo. Yt uwe mimaꞌat koꞌi wo i eweikupteꞌen. Meiũran Tupana ehay wywo ehesaika eweikupteꞌen. Miꞌi hawyi meiũran eiwanetup hap yt kowoꞌi kowoꞌi hin i toineꞌen. Hesaika rakaria wo Tupana mohey haria ewy eweikupteꞌen ewehoꞌopot hap tokosap hawyi ehãꞌãg hap tokosap hawyi are yne pe nagnia pe makuptiaria pe kurum iwasuria pe hirokaria pe yne pe are.
ကြော်ငြာတွေ