Pywo ti rat Aikaꞌiwat Iesui tuut irane kat pote yne aiminug aiꞌapiheg saꞌag koꞌi yne miitꞌin mesuwarotiaria minug saꞌag koꞌi topyhuꞌat Aikaꞌiwat piit pe. Mekewat ariaꞌyp tote tohoꞌopot kahato topiit ete. Tupana miꞌapiheg wo topyhuꞌat. Tuwepyi Aikaꞌiwat yne Tupana piat aiꞌapiheg hap aiminug saꞌag koꞌi u hamo tuut. Miꞌi hawyi aiꞌapiheg hap yne topyhuꞌat Iesui piit ete mekewat ariaꞌyp posak tote. Ipiit ete yne topyhuꞌat Tupana kaipywiat aiꞌapiheg hap koꞌi aiꞌahyk ahyk hap tutuꞌu yne. Haty kahato tuete. Miꞌi hawyi aimoehãite hamuat hap topyhuꞌat. Haty hap yne tutuꞌu yne hawyi ikuꞌuro aheiam me. Aikuꞌuro hap tutuꞌu yne. Miꞌi pote aito watoineꞌen ikuꞌuro rakaria ewy iwywo mekewat aiminug saꞌag ete. Yt ahesaika i poꞌog aito watoineꞌen. Aikotã ikuꞌuro rakat yt wahãꞌãg kuap i yt naku i nug hamo hap ewy. Miꞌi hap ewy watopyhuꞌat mesup. Maꞌato wakuat yn sake i watunug kuap mesup kat pote watuwẽtem guꞌuro pyi Aikaꞌiwat wywo hap ewy. Miꞌi hawyi waku nug haria wo watopyhuꞌat iwywo.
Ewesu 1:7 - Sateré-Mawé7 Taꞌi Emipoꞌoro uruporekuat no ikuꞌuro hawyi uruminug saꞌag po pyi urutuwẽtem naꞌyn iꞌewyte uruminug saꞌag haꞌawytewuat etiꞌatuwaure waure raꞌyn En. Waku kahato En. En ni poꞌog poꞌog torannia kai hegyiꞌat rakat urutoꞌe ewowi Tupana urutoꞌe. Esaꞌyru suu ti urukyiꞌat ewatnuat hap urutoꞌe. အခန်းကိုကြည့်ပါ။ |
Ewesu 1:7
67 ပူးပေါင်းရင်းမြစ်များ
Pywo kahato uiwyriaꞌin Tupana ti poꞌog poꞌog waku ahewaku hap kai. Taꞌi ahewaku hap yt Tupana ewaku hap ewy hin i. Miꞌi pote ahewaku hap yt putꞌok e hin i Tupana ewaku hap ete e. Miꞌi pote yne aitoria yt naku i nug haria watoineꞌen Tupana wanetup hawe e. Miꞌi pote mesup Tupana toꞌe ahepe -Uhaꞌyru mohey haria pe yn atum iꞌatuehakyeraꞌat hap wuatꞌi eꞌat piat e Tupana mesup wuatꞌi pe. Uhaꞌyru suu mikyiꞌat upi atum neꞌen neꞌi wuatꞌi eꞌat piat ieineꞌen hap e mesup ahepe. Uhegyiꞌat hap upi Uhaꞌyru suu mikyiꞌat upi atum neꞌen neꞌi eimowaku hap e mesup yne miitꞌin me e.
Miꞌi hawyi araꞌakasa typyꞌi kahato miitꞌin Ihũ Hit motypot haria itote. Miꞌi hawyi teꞌeruwepy kahato iraniaꞌin nywo. Maꞌato iꞌatuwepy hap ipakup takat -Waku kahato En Tupana Hũ iꞌatuꞌe. -Waku kahato En iꞌatuꞌe. Ewaku hap putꞌok e mekewat miwan okpoꞌi porap hamo. Waku etiꞌokpoꞌi porap hawyi etimoherep uruepe Mimi Uhyt iꞌatuꞌe. Ewaku hap yn putꞌok e Tupana mimosatꞌe hap hep hamo iꞌatuꞌe. Ewaku hap yn iwato hap oktan iꞌokman miat miwan moherep hamo eꞌauka urukawiatno pote iꞌatuꞌe Saꞌawyꞌi esuu topyhuꞌat Tupana piat urukyiꞌat towatnuat hawe iꞌatuꞌe. Katupono wuatꞌi mesuwarotiat ywania kaipyi uruhoꞌoekyi Tupana emiit no wuatꞌi miitꞌin wẽtup pusu wẽtup pusu kuap haria iꞌewyte wuatꞌi miitꞌin yt toꞌoꞌewywuat rakaria kaipyi iꞌewyte wuatꞌi miitꞌin wẽtup seko wẽtup seko mohey haria yt toꞌoꞌewy ewywuat i rakaria kaipyi iꞌewyte wuatꞌi yt toꞌoꞌewywuat i iꞌatupiit ete iꞌatueko rakaria kaipyi uruhoꞌokyiꞌat esuu wo iꞌatuꞌe. Iꞌewyte wuatꞌi setama kaipyi uruhoꞌokyiꞌat wuatꞌi ipe hun ipe kytsig ipe hup rakaria kaipyi uruhoꞌoekyi Tupana emiit no Esuu wo iꞌatuꞌe teꞌeruwepy puo wuatꞌi ywania Tupana Mipoꞌoro Aihũ Kuteiru ewywuat aikawiat ikuꞌuro rakat kape.
Tupana tum aru yne yt kat i aikawiat rakat ahepe. Taꞌi Uhetupana tum aru wuatꞌi yt kat i eiwat rakat tekat iwato kahato hap kaipyi. Aikotã tekat iwato kahato atipy pe hap ewy te tutum ehepe. Taꞌi hegyiꞌat kahato aru ahepe katupono Haꞌyru Aipotypot Iesui ikuꞌuro aikawiatno haype. Miꞌi pote toĩ yne aipo pe imiium koꞌi.
Miꞌi hawyi Tupana toꞌe Tosaꞌyru pe -Eraꞌapyk to mesuwe uikai atipy pe wuatꞌi Porekuat no e Tosaꞌyru pe. Miꞌi tote hap ewy aito iꞌewyte watoineꞌen iwywo morekuaria wo are. Miꞌi hap ewy watoineꞌen iwywo katupono aito wẽtup ok miit ewy iwywo. Pyno mesup toimoherep taꞌyn towese hap ahepe wuatꞌi eꞌat pe. Miꞌi pote -Egyiꞌat kahato watoꞌe Tupana pe. Yt uwe i poꞌog ekai iwese rakat watoꞌe.
Aito ti Aipotypot Iesui mohey haria pote Tupana ainug Tosaꞌyru wywo wẽtup miit ewy. Saꞌawyꞌi yt aiweꞌeg hin i pykai mesup aiweꞌeg kahato katupono Iesui amyãtym toineꞌen aipiit pakup we hawyi Iesui weꞌeg hawuo wahewyry mesup. Saꞌawyꞌi yt ahehay kuap i Tupana wywo maꞌato mesup Iesui wẽ aipiit pe pote ahehay kuap kahato Tupana wywo. Koitywy watoineꞌen Iesui piit ewy mesuwarote. Miꞌi pote watopyhuꞌat Tupana saꞌyruꞌin koꞌi Tupana sakiꞌytꞌin koꞌi mesuwe. Miꞌi pote watopyhuꞌat Tupana ywania ewywuat mesuwe.
Eipotypot Iesui aikyꞌe kahato. Miꞌi hap eweikuap taꞌyn maꞌato ahenoi teran i raꞌyn. Hegyiꞌat kahato Miꞌi aikotã hekat sese rakat timoꞌẽ yne tekareꞌen ihakyꞌeꞌi rakaria pe hap ewy Aikaꞌiwat hegyiꞌat kahato. Saꞌawyꞌi sese yne kareꞌen topyhuꞌat ipo pe atipy pe. Miꞌi hawyi ahowawi tuut atipy kaipyi. Miꞌi Miit ihakyꞌeꞌi rakat topyhuꞌat. Toimoꞌẽ yne tewaku hap ahowawi aikyꞌe haype. Miꞌi hap koꞌi watikuap taꞌyn. Maꞌato waku watopyhuꞌat aikotã hegyiꞌat hap ewy uhekatuwyria are.
-Tupana iwese kahato ahete pote waku watunug yt nakuap i motꞌi uimikyꞌesat oktan katupono iwese te ahete yt naku i watunug motꞌi pykai aiꞌe hap watoꞌe pote yt aiweꞌeg hin i aito. -Yt karãpe i aru aiꞌapiheg aiminug yt naku i hap upi yt naku i watoꞌe aiwoꞌope are. Pywo ti rat Tupana iwese kahato te ahete aikyꞌe kahato haype. Yt meremo i aiꞌapiheg teran aiminug yt nakuap i ete. Eweikuap kat pote yt aiꞌapiheg meremo i katupono iwese kahato te toikyꞌesat kahato watuwemorem aiminug saꞌag kaipyi aiꞌapiheg hap yian mete haype. Miꞌi haype ti iwese motꞌi te ahete. Toikyꞌesat watiꞌatuꞌatoiat yne aiminug saꞌag koꞌi. Mesup te yt aiꞌapiheg i te maꞌato -Atikyꞌesat eweiꞌatoiat yne eiminug saꞌag koꞌi e ahepe. Eweiꞌaipok to uhowowi uimepytꞌin e yn Tupana ahepe.
Aikaꞌiwat Iesui ti ihay kuap kahato aikawiatno hamo katupono miꞌi ti yt karãpe i iꞌaparap Tupana piat hat. Aiꞌapiheg hap tutuꞌu yne. Iꞌewyte aiꞌapiheg hap saꞌup tutum yne. Maꞌato yt aiwat ahaꞌup mo yn i tuweium maꞌato yne yi totiaria yne ywania saꞌup mo tuweium Toꞌywot pe aiꞌapiheg hap saꞌup mo are.
Ahehakyeraꞌat hat Iesui ikuꞌuro raꞌyn ariaꞌyp posak ete aikawiatno. Yne yt nakuap i nug saꞌag po pyi aihep hamo ikuꞌuro. Tupana watnuaria wo ainug neran pote wakuaria wo aito hap toikyꞌesat. Miꞌi pote aihep taꞌyn saꞌag nug hap po pyi aimowaku hamo raꞌyn. Koitywy Ahehakyeraꞌat hat iwepiit kahato raꞌyn.
Saꞌawyꞌi Aipotypot Aiporekuat Iesui miitꞌin mikyryꞌi hamo topyhuꞌat mesuwarote aikotã aikotã taꞌatunug saꞌag tuwete waku rakat pykai taꞌatuꞌauka. Maꞌato yt kat i saꞌag tutunug pykai tohoꞌopot kahato. Maꞌato aiminug saꞌag upi tohoꞌopot. Iesui hãpyk kahato rakat maꞌato ikuꞌuro yt hãpyk i rakaria mohãpyk hamo. Ikuꞌuro muap nug hamo Toꞌywot Tupana kapiat muap nug hamuat. Koitywy toineꞌen muap Tupana kapiat Iesui hoꞌopot hap kaipyi. Yt hãpyk i sese rakat toimohãpyk kuap taꞌyn. Pyno ipiit ikuꞌuro ariaꞌyp posak ete maꞌato miꞌi hawyi Tupana Paꞌãu timoieineꞌen Aikaꞌiwat.
Uhewaku hap yt putꞌok e hin i Aipotypot eropat hamo are. Taꞌi uito ti poꞌog kurin katno areineꞌen poꞌog yi kape torannia Iesui mohey haria kai areineꞌen uito maꞌato miꞌi pykai Tupana uiꞌairo iraniaꞌin ywania muꞌe hamo tehay ikahu rakat ete uhewaku hap yt putꞌok e hin i heropat hamo pykai are. Yt naku i uito pykai towese kahato hap mywo uiꞌairo katupono yt poꞌog hin i uito. Koitywy atimoꞌẽ kahato iraniaꞌin ywania pe. Tupana ekareꞌen moꞌẽ hat ewywuat areineꞌen uito aikotã wuatꞌi eꞌat piat hekat rakat tomoꞌẽ hap ewy areineꞌen. Aikaꞌiwat Iesui ekat iwato kahato aikotã poꞌog poꞌog wuatꞌi kai toineꞌen poꞌog poꞌog Miꞌi ekat moꞌẽ hat ewy areineꞌen uito Pauru.
Karãpe Tupana Paꞌãu putꞌok e sese ehepe hawyi aru eipyꞌa topyhuꞌat kahato Tupana eiam mo e. Miꞌi tupono karãpe eweiꞌe Tupana pe eipyꞌa pyi -Waku waure wo ereineꞌen miꞌi miit minug saꞌag epiat hap koꞌi kai eweiꞌe meremo hawyi tuweityk taꞌyn. Tupana topyhuꞌat eiꞌe hap ewy e. Mio tã eweiꞌe hawyi Uiꞌywot atipy piat iꞌaparap hap koꞌi kai are. Maꞌato yt eweiꞌe i pote ti aru miit minug saꞌag hap koꞌi yt tuweityk i Tupana wanetup hawe are e.
Aikotã ikuꞌuro rakat yt ikuap hin i ahehay. Yt toikuap i watoineꞌen itotiat hap ewy watopyhuꞌat saꞌawyꞌi Tupana kapiat ikuꞌuro rakat ewy yt watikuap i ihay yt wataꞌakasa kuap i howawi katupono aiminug saꞌag aipyhyp kahato howawi ikuap hamuat. Iꞌewyte aimikyꞌesat saꞌag kape yn aiwanetup hap. Kat pote saꞌawyꞌi yt kat i Tupana ehay aikai maꞌato koran yt miꞌi tã hin i katupono Tupana tomoweityk yne yne raꞌyn aiminug saꞌag koꞌi. Aimoieineꞌen i guꞌuro pyi hap ewy tutum ahepe. Karãpe watomohey Iesui mekewat eꞌat pe watuwẽtem guꞌuro pyi hap ewy Iesui tuwẽtem hap ewy. Koitywy watoineꞌen Tupana ewowi yt saꞌag ewowi i raꞌyn. Yt ikuꞌuro rakaria ewy i raꞌyn mesup watoineꞌen maꞌato Tupana ewowi aheha ahewaure mesup.
-Atikyꞌesat miꞌiria ieineꞌen kahato Esaꞌyru mohey hap upi hap ahẽtup. Etimonik to iꞌatuꞌarotꞌi hap areꞌe Tupana pe. Miꞌi hawyi etunug miꞌiria iwepiit rakaria wo are. Etiꞌatuꞌapoꞌahik miꞌiria woꞌokyꞌe haria wo aikotã urueꞌyni uruiꞌokpoꞌi hap ewy are. Atikyꞌesat miꞌiria hesaika rakaria wo surara ewywuaria ehay moherep haria wo are. Atikyꞌesat pywuat sehay kuap kahato haria wo are. Atikyꞌesat ikuap hotꞌok kahato sehay pywuat hawyi -Pywo ti rat e haria wo tukupteꞌen are. Atikyꞌesat kahato taꞌatukuap kahato mekewat eꞌe hap saꞌawyꞌi wuat yt heremo i rakat Iesui eꞌyian mete wuat are. Mekewat -Atipoꞌoro aru Uhaꞌyru Eiporekuat no eꞌe hap are.
Koitywy Tupana toꞌe -Saꞌawyꞌi yt uwe i kape atimoherep uhehay pakup e. Kurin ikuap haria saꞌawyꞌi maꞌato koitywy Uhaꞌyru mohey haria kape atimoherep taꞌyn uhehay ikahu kahato rakat sehay hekat rakat wuatꞌi ywania mesuwat yi totiat kapiat sehay wakuat e. Saꞌawyꞌi migꞌi wo toineꞌen maꞌato mesup atimoherep taꞌyn ehepe e Tupana ahepe. Etunug no Uhaꞌyru Eporekuat no eipyꞌa pe pote eweikupteꞌen aru uhehamo mesuwe atipy pe uimimotypot koꞌi wo e Tupana ahepe.
Maꞌato wẽtup yi og wakuat topyhuꞌat kamuti nug hat po pe hawyi hepama tutunug kamuti topotpap mo waku rakat wuatꞌi eiam mo raꞌyn. Miꞌi hap ewy Tupana ainug tomotypot hamo. Ainug hawyi miitꞌin teꞌerahaꞌat hawyi teꞌeruwehum Tupana ete. -Tupana waku rakat iꞌatuꞌe iwese kahato miꞌiria nug hap ete ihakyꞌeꞌi kahato Tupana miꞌiria ete iꞌatuꞌe. Tupana eiam kahato miꞌiria tukupteꞌen tuwepokuap kahato miꞌiria nug hap ete iꞌatuꞌe.
Aikotã Tupana henoi yian mete hap ewy ti topyhuꞌat mesup. Miꞌi pote waku mio tã eweiꞌe ro Tupana pe -Koitywy paa urutoꞌe ewowi Tupana katupono yt naku i kahato urutunug Esaꞌyru ete eweiꞌe pote meremo waure wo topyhuꞌat eiminug saꞌag ete e. Miꞌi hawyi waku pe i raꞌyn iwywo eweikupteꞌen mehinꞌin manaꞌin e. Miꞌi hawyi ti aru Tupana mimowepiit koꞌi wo i raꞌyn wuatꞌi eꞌat pe eweikupteꞌen katupono tutum ehepe Topaꞌãu Wakuat eimoesaika hamuat hap hawyi e. Taꞌi eiwemorem Tupana kape i raꞌyn pote waku pe iwywo eweikupteꞌen e Peteru.
Taꞌi yian me Tupana henoi kahato uhetiat tehay wan haria po wo aikotã aru taꞌatuhenoi kahato tesaika hap wywo torannia ywania pe aikotã waku miitꞌin teꞌeruwemorem Tupana kape iꞌatuminug saꞌag hap koꞌi kaipyi uhet upi hap tohenoi miwan me e Iesui. Waku tawa Ierusarẽi me tohaꞌawynug naꞌyn mesuwat sehay wakuat hawyi waku yne ywania kape taꞌatuhenoi Uhaꞌyru ete e Tupana miwan me e.
Iꞌatuweꞌeg kahato mekewat 144 miu miit Iesui eropat haria. Yt karãpe i haryporiaꞌin miat taꞌatuwaire hap upi tuwat. Miꞌiria 144 miu ihainia yt karãpe i iharyꞌi rakaria taꞌatunug kahato Tupana Hũ hit Kuteiru emiit sese imiꞌairoria sese koꞌi miꞌiria. Toiꞌatuehakyeraꞌat miꞌiria iraniaꞌin Iuteuria eꞌyian mete. Miꞌi hawyi 144 miu miitꞌin rakaria ehay kaipyi miitꞌin sem toiꞌatuehakyeraꞌat. Tupana kapiat weium hap koꞌi imowepiit hamuat iꞌewyte Tupana Hũ hit Kuteiru kapiat weium hap imowepiit hamuat teꞌeropyhuꞌat miꞌiria 144 miu Iuteuria Iesui mohey haria.
Pyno toꞌiro watuwehum Tupana kape -Egyiꞌat hap yt uwe ewywuat hin i waku watoꞌe. Poꞌog poꞌog torannia kai ewese hap waku watoꞌe. Urukyꞌe hap moherep hamuat etum Esaꞌyru uruepe. Wẽtup yn Esaꞌyru pykai etum neꞌen neꞌi uruepe yt kat saꞌup mo i etum uruepe urutoꞌe waku watoꞌe. Miꞌi ti Esaꞌyru Emikyꞌe kahato etum naꞌyn uruepe uruehakyeraꞌat hamuat. Waku kahato En Tupana urutoꞌe ewowi.
Eikyꞌe haype yt kat i eiminug wakuap pykai worohoꞌokyꞌe hawyi eheineꞌen hap wuatꞌi eꞌat piat hap atum neꞌen neꞌi ehepe Uhaꞌyru Iesui suu mikyiꞌat upi e. Eipotypot Iesui tikyiꞌat raꞌyn eheineꞌen hap yt ikahuro rakat i pote waku eweitat uimiium e Tupana wuatꞌi miitꞌin me. Yt kat saꞌup i rakat atum miitꞌin me Uhaꞌyru Paꞌãu e Tupana mesup.
Etum neꞌen neꞌi yne yne iwato kahato sakpo emiium etum yne yne. Waku kahato En urutoꞌe. Ewese kahato uruto yt uruwese i pykai urutoꞌe. Eweꞌeg hap oktan egyiꞌat hap oktan urukyꞌe hap urutoꞌe. Urutuwehum kahato ewowi Tupana katupono koitywy etunug naꞌyn ereꞌe saꞌawyꞌi wuat hap emikyꞌesat oktan urutoꞌe ewowi.
Tupana tum naꞌyn Topaꞌãu ahepe. Miꞌi tutum mote mesup watikuap iꞌewyte tutum aru ahepe kat e hap kat e hap -Atum aru uimepytꞌin me e hap koꞌi ewy. Tutum naꞌyn yne saꞌup yne aiminug saꞌag hep hamuat Tosaꞌyru suu. Miꞌi pote watikuap taꞌyn mesup yt kat i saꞌag toipuẽti aikai. Watoineꞌen iwywo turan tuwehum ahowawi yt kat i aikai yt naku i pote yt kat i aipit pit hap. -Waku kahato En Tupana watoꞌe aru wuatꞌi eꞌat pe. Waku En waku En katupono uruhep ahiag po pywiat hat En urutoꞌe aru wuatꞌi eꞌat pe aru.
Tupana areꞌe etum no Esaꞌyru mohey haria tapyiꞌa Ewesu piaria pe ewanetup hap kuap hamo hap are. Etum no iꞌatuepe ewanetup kuap hap kat hamo etiꞌatuꞌairo miꞌiria emiitꞌin no are. Etimoherep to iꞌatuepe emikyꞌesat koꞌi nug neran hap koꞌi are. Etimoherep iꞌatuepe aikotã aru tukupteꞌen atipy pe esaꞌyruꞌin wo esakiꞌytꞌin wo hap are. Etimoherep iꞌatuepe kat som atipy pe are. Etimoherep iꞌatuepe aikotã aru atipy pe emotypot haria tukupteꞌen hap are. Etimoherep iꞌatuepe aikotã aru ewaku hap ewywuaria tukupteꞌen hap are. Tupana ewaku hap ekahu hap ewato hap etimoherep emiitꞌin me tawa Ewesu piaria pe are aat kaꞌap ehetiatno uiwyriaꞌin.