Ewesu 1:4 - Sateré-Mawé

⁴ Taꞌi saꞌawyꞌi mesuwat yi nug hap eꞌyian mete Tupana aiꞌairo Tosaꞌyru emiit no. Taꞌi aheꞌyian mete aiꞌairo temiitꞌin no are. Miꞌi hawyi toꞌe -Uhaꞌyru mohey haria wo aru miꞌiria hap atiꞌatukuap e. Miꞌi pote ti atunug aru hãpyk miꞌiria uiꞌewywuaria wo raꞌyn e. Yt kat i saꞌag nug haria wo atiꞌatunug miꞌiria e. Pyno yt uwe i te aito turan aiꞌairo Tosaꞌyru emiit no. Aikyꞌe haype yn aiꞌairo mesuwat yi yt kat i te hap eꞌat pe turan aiꞌairo.

Ewesu 1:4 ပူးပေါင်းရင်းမြစ်များ

Mateu 24:22

Pyno mekewat eꞌat pe ti aru iwato kahato hoꞌopot hap topyhuꞌat e. Miꞌi hap ti aru maꞌato Tupana timopytuꞌu e. Maꞌato yt toimopytuꞌu i mekewat pote ti ten topap yne miitꞌin e. Miꞌi tupono tomikyꞌe tomiꞌairoria etiatno yn toimopytuꞌu e.

Mateu 24:24

Taꞌi -Eheso i rat eweiꞌe yn o are katupono Tupana mipoꞌoro eiporekuat nuat raꞌyn uruto e haria iꞌatuꞌe ti aru teꞌeruwemoherep e. -Uruto Tupana mipoꞌoro tehay enoi hanuat iꞌatuꞌe yt pywo pe i e. Miꞌiria ti aru taꞌatumisepap iwato kahato inug wy miitꞌin miat taꞌatuehay mohey hamuat e. Maꞌato miꞌiria miitꞌin maꞌat hamuat neꞌi e. Iꞌewyte ti Tupana miꞌairoria imohey sese haria maꞌat reran haype e.

Mateu 24:31

Miꞌi hawyi ti aru temiitꞌin atipy piaria toiꞌatupoꞌoro hu hu iꞌatuꞌe hamo e. Miꞌi hawyi ti aru taꞌatuꞌatunug hewowi imiꞌairoria e. Taꞌatuꞌatunug ni aru aikope pyi aikope pyi wasere tuut hap kaipyi aat wẽtem hap kaipyi aat minꞌe hap kaipyi yne yne kaipyi taꞌatuꞌatunug imiꞌairoria hewowi yi sasat hap kaipyi aikope aikope miitꞌin tukupteꞌen hap kaipyi.

Mateu 25:34

Miꞌi hawyi ti aru itote uipo sese kawiaria pe Morekuat koro toꞌe ipo ran koꞌi kape -Eweĩꞌẽ ro meikowo Uiꞌywot miꞌatukyꞌe koꞌi e. Atum neran ti Tupana etama ehepe e. Katupono yi nug hawyi te ti mekewat atum teran kahato ehepe are e.

Iuwãu 10:16

Yt torannia i te uihũria uimohey haria wo meiũwat ywania kaipyi paĩ maꞌato iꞌewyte atiꞌatukay kay aru miꞌiria uimohey hanuaria wo wẽtup ywania kaipyi e. Miꞌiria aru toꞌowywo tukupteꞌen katupono uimohey haria wẽtup sok yn iꞌatuꞌywania pykai e. Miꞌi hawyi wẽtup ok yn iꞌatuꞌapykok hat topyhuꞌat mekewat eꞌat pe miꞌi ti Uito e.

Iuwãu 15:16

Taꞌi uiwyriaꞌin eipe ti yt uiꞌairo i maꞌato Eikaꞌiwatno maꞌato Uito worohoꞌoꞌairo eipe uhemiitꞌinno. Miꞌi hawyi worohoꞌopoꞌoro uhehay moherep miitꞌin miat hamo iꞌewyte wakuap sese nug hamo yt ikahuro i rakat motpap nug hamo worohoꞌopoꞌoro uiwyriaꞌin e. Waku eikaipyi tuwemoherep kahato ywa koꞌi ewy wuatꞌi eꞌat piat ieineꞌen hanuaria wo e. Miꞌi tã hap ewy pote kat koꞌi kat koꞌi eweikyꞌesat hawyi ewehẽtup o Uiꞌywot pe hawyi tutum ehepe eimikyꞌesat oktan uhet upiat ewehẽtup pote uhytꞌiꞌin e.

Iuwãu 17:24

Papai mesuwat yi nug hap eꞌyian mete uikyꞌe kahato En are. Taꞌi saꞌawyꞌi sese mesuwat yi yt etunug i te turan -Wakuat kahato En aiwoꞌokyꞌe hap toꞌoꞌewy kahato ere uhepe Papai are. Atikyꞌesat kahato uhemiitꞌin uimohey haria emiium koꞌi tukupteꞌen aru aiũpe aiũpe uheineꞌen hap upi i are. Atikyꞌesat uikahu hap kape teꞌerahaꞌat aru are. Atikyꞌesat emiium uhewaku hap sese kuap hamo hap Papai are e.

Iesui Potmuꞌeria 13:48

Miꞌi pote iraniaꞌin yt Iuteuria i raꞌyn iꞌatuwepiit kahato Tupana ehay ete. Miꞌi hawyi teꞌeruwehum kahato -Waku sese ehay Tupana iꞌatuꞌe. Miꞌi hawyi tomiꞌairoria pe tomohey haria pe yn naꞌyn Tupana tum toieineꞌen hap yt ikahuro rakat i.

Iesui Potmuꞌeria 15:18

-Katupono Tupana tikuap aikotã mesup topyhuꞌat hamuat hap yian mete e.

Iesui Potmuꞌeria 18:10

Taꞌi Uito areineꞌen ewywo. Yt uwe kuap i esatyꞌi satyꞌi mehin e katupono ti ipoityꞌi meiũwat tawa pe uimohey hanuaria e Iesui Pauru pe imuꞌetu.

Humanu 8:33

Koitywy Tupana toꞌe ahetiat -Yt kat i saꞌag atipuẽti Uhaꞌyru mohey haria kai uiwanetup hawe e katupono uimiꞌairoria kahato miꞌiria e Tupana. Yt kan hamo i iraniaꞌin teꞌeroꞌe uhepe -Yt naku i kahato Esaꞌyru mohey haria katupono miꞌiria ti uimimoewaku koꞌi sese e Tupana ahepiat.

1 Kuriniu 1:8

Koitywy Aikaꞌiwat aimoheg kahato tehay wo. Yt watoiat kuap i ahepiat imohey hap wuatꞌi eꞌat pe pote. Miꞌi tã ti tutunug mesuwat yi kahuro hap kape. Miꞌi hawyi meremo taꞌaipok i Aipotypot Wuatꞌi Mimotypot no. Aikaꞌiwat Iesui putꞌok e hap eꞌat pe turan -Yt kat i saꞌag atipuẽti miꞌiria ete e Iesui ahetiat.

Karasia 5:13

Uiwyriaꞌin Tupana tum ahepe tesaika hap wakuap nug hamo aimikyꞌesat oktan nuat hamuat nug hamo. Maꞌato yt naku i -Uimikyꞌesat ewywuat yn aru atunug watoꞌe neꞌi pote yt naku i paĩ are. Katupono uiꞌairo raꞌyn tomikyꞌesat nug hamuat tupono waku watoꞌe. Yt naku i aimikyꞌesat yn watunug. Katupono towat tomikyꞌesat nug hamo aiꞌairo aiwoꞌopowyro woꞌokyꞌe hamuat etiat hap.

Karasia 5:22

Maꞌato Tupana Paꞌãu mikyꞌesat ewywuat watunug hawyi woꞌokyꞌe haria wo watoineꞌen. Woꞌomowepiit haria wo watoineꞌen. Woꞌokuap haria kahato wo watoineꞌen. Miit perupꞌi wo watoineꞌen. Woꞌowese haria wo watoineꞌen. Aiwoꞌopiat aiꞌe hap nug haria wo watoineꞌen.

Karasia 5:6

Maꞌato Aikaꞌiwat Iesui ahehakyeraꞌat teran haype Tupana yt tuwanetup hin i mekewat seko aiwemusin ãpy sokpe tek hap kape neꞌi. Maꞌato toiehakyeraꞌat kuap miitꞌin yne sio hemusin ãpy sokpe tek hap toĩ sio yt sio Iuteuria sio yt miꞌiria i waku yne. Toimohãpyk kuap wuatꞌi ywania katupono kat seko kat seko kape neꞌi yt ihaꞌat hin i maꞌato tehaꞌat tomohey hap sese kape yn. Tokyꞌe ahepiat hap aikawiat toineꞌen sio yt watikyꞌe i hap kape yn taꞌakasa.

Ewesu 2:10

Saꞌawyꞌi Tupana topo wo ainug. Koitywy Haꞌyru mohey haria watopyhuꞌat wẽtup ywania ewy yn naꞌyn watopyhuꞌat. Ainug hap eꞌyian mete Tupana toꞌe -Meiũran aru atipowyro kahato uimikyꞌesat nug neran haria e. Wakuaria sok ewy aru atunug miꞌiria e saꞌawyꞌi tuwepe.

Ewesu 3:17

-Etunug no Emipoꞌoro Iesui kawiat eꞌyat sese itote. Ereineꞌen itote emohey haria pyꞌasetpe. Atikyꞌesat iꞌatusapo yi pe iheg me ariaꞌyp wato gaꞌapy piat hap ewy. Atikyꞌesat miꞌiria iheg me woꞌokyꞌe hawe iꞌewyte ekyꞌe hawe hap atikyꞌesat are.

Ewesu 4:2

Yt naku i watoꞌe aiwanetup hawe -Uito poꞌog iraniaꞌin imohey haria kai yt naku i watoꞌe. Pyno toꞌiro watoineꞌen hãpyk kahato rakaria wo. Waku watuwepotpap Aikaꞌiwat kape aiperupꞌi wywo yt kat i aipyꞌahak hap mywo waku are. Waku watimoherep iraniaꞌin miitꞌin kyꞌe hap yne aiminug koꞌi ete are. Waku watiꞌatukyꞌe iraniaꞌin yt iꞌatuwese i pykai.

Ewesu 5:2

Aikotã Aipotypot Iesui aikyꞌe kahato saꞌawyꞌi aikyꞌe kahato te. Aikyꞌe kahato hawyi aikyꞌe hap upi ikuꞌuro. Tutum naꞌyn heineꞌen hap aikawiatno hap aikotã saꞌawyꞌi wuaria tum taꞌatuhũria aria pe Tupana mowepiit hamo. Miꞌi hap ewy ikuꞌuro ariaꞌyp posak ete aikyꞌe kahato haype. Aikyꞌe sese hat Iesui pote ikuꞌuro aiꞌapiheg hap u hamo. Miꞌi pote aikotã aikyꞌe hap ewy waku watikyꞌe iraniaꞌin aikuꞌuro hap kape.

Ewesu 5:27

Miꞌi pote aito imohey haria yne watopyhuꞌat iharyꞌi ewywuat maꞌato aikyiꞌat eꞌyian mete ainug ikahu kahato rakat ewy iweꞌeg kahato rakat ewy. Yt karãpe i iꞌaparap hat ewy ainug tehay wo. Ihay yꞌy ewywuat aikoho hap maꞌato ihay ainug ihãite kahato rakat ewywuat ipe ikahu rakat ewy ipiit kahu rakat ewywuat teharyꞌi ewy ainug. Aipiit yt ipit pit hin i hap ewy ainug imohey haria yt kat i saꞌag ahete aiwei tehay wo hawyi.

Wiripu 2:15

Maꞌato yne miꞌi tã imikyꞌesat ewy watunug mote Tupana mepytꞌin wakuaria wo watopyhuꞌat yt kat i saꞌag nug haria wo are. Aikotã aimepyt kurin kat yt tutunug kuap i saꞌag hap ewy watopyhuꞌat waku kape yn aiwanetup hap. Koitywy watoineꞌen yt naku i nug haria pyꞌasetpe iꞌewyte teꞌeruwanetup aat kaꞌap saꞌag nug hap ete yn. Miꞌiria tukupteꞌen aikotã iꞌypyryp we wãtym sese turan wuat ewy yt naku i nug haria yn miꞌiria pote. Maꞌato waku aito Iesui mohey haria waikiru koꞌi ewywuat watopyhuꞌat aikotã waikiru wãtym sese turan hẽtyhot rakaria ewy aikotã waikiru koꞌi aimuꞌe wãtym muo aikope muap toineꞌen aikope waku ahewyry. Miꞌi hap ewy waku watimoherep hoꞌowasat rakaria pe muap Tupana kapiat.

Korosi 1:22

Maꞌato koran wyti Tupana ainug naꞌyn towyriaꞌin no kahato. Aipotypot piit ikuꞌuro ariaꞌyp posak ete hawyi Tupana tunug Tosaꞌyru muap tuwewawiat aiꞌaipok hamuat. Ipiit aiwatnuat ewy ikuꞌuro hawyi Tupana tekyi kahato tuwewawi Tosaꞌyru mohey haria. Koitywy ihamo raꞌyn watoineꞌen. Koitywy toꞌe ahepe -Yt kat i te saꞌag atipuẽti eikai e. Waku puo raꞌyn eweikupteꞌen uiwanetup hawe aikotã yt karãpe i eweiꞌaparap uhepe hap ewy eipe e ahepe. Koran uiwyriaꞌin no raꞌyn eipe e Tupana ahepe.

Korosi 2:2

-Atikyꞌesat miꞌiria ieineꞌen kahato Esaꞌyru mohey hap upi hap ahẽtup. Etimonik to iꞌatuꞌarotꞌi hap areꞌe Tupana pe. Miꞌi hawyi etunug miꞌiria iwepiit rakaria wo are. Etiꞌatuꞌapoꞌahik miꞌiria woꞌokyꞌe haria wo aikotã urueꞌyni uruiꞌokpoꞌi hap ewy are. Atikyꞌesat miꞌiria hesaika rakaria wo surara ewywuaria ehay moherep haria wo are. Atikyꞌesat pywuat sehay kuap kahato haria wo are. Atikyꞌesat ikuap hotꞌok kahato sehay pywuat hawyi -Pywo ti rat e haria wo tukupteꞌen are. Atikyꞌesat kahato taꞌatukuap kahato mekewat eꞌe hap saꞌawyꞌi wuat yt heremo i rakat Iesui eꞌyian mete wuat are. Mekewat -Atipoꞌoro aru Uhaꞌyru Eiporekuat no eꞌe hap are.

Korosi 3:12

Waku watuwepainug hap ewy waku ahesokpe pakup watopag maꞌato wẽtup ahesokpe pakup woꞌokyꞌe hap kawiat. Wẽtup aipainug hap woꞌowese hap. Wẽtup aipainug hap -En poꞌog waku uikai e hap aiwanetup hawe. Wẽtup aipainug hap paa e hap. Wẽtup hap aipainug hap aiperupꞌi hap. Wẽtup Iesui mohey motꞌi hap. Miꞌi koꞌi wo waku watuwepainug are.

1 Tesaronika 3:12

Uruiꞌatukyꞌe kahato eipe. Miꞌi hap ewy atikyꞌesat eiwoꞌope eiwoꞌokyꞌe hap miꞌi pote ahẽtup Tupana pe -Etiꞌatumoesaika o poꞌog poꞌog Iesui mohey haria ekyꞌe poꞌog hamo iꞌewyte iraniaꞌin atukyꞌe hamo are. Miꞌi hap ti ahẽtup Tupana pe ehupi.

1 Tesaronika 4:7

Tupana yt tikyꞌesat hin i ti yt iweꞌeg i rakaria wo aheineꞌen hap maꞌato toꞌewywuat ahewaku hap yn toikyꞌesat.

2 Timoteu 1:9

Tupana ahehakyeraꞌat hawyi ainug temiitꞌin wo. Yt aiwanetup kahu hap upi i yt ahewaku hap upi i maꞌato tomikyꞌesat no tegyiꞌat hap oktan ahehakyeraꞌat wuatꞌi eꞌat piat aikotã Tupana toꞌe nimo saꞌawyꞌi tutunug yne wuatꞌi hap yian mete -Atiꞌatuehakyeraꞌat ti aru Uhaꞌyru mohey haria e Iesui etiat hap ewy.

2 Timoteu 2:10

Maꞌato yt uiwẽpohep hin i Iesui mohey hap ete waĩꞌiꞌatuꞌe pykai. Uiꞌauka pote uiꞌauka maꞌato yt uipohep hin i te. Katupono Tupana tiꞌatuehakyeraꞌat teran kahato tomiꞌairoria ahoꞌopot kahato Iesui mohey iꞌatuepiat hamuat pykai. Miꞌi hap kaipyi Tupana tiꞌatuehakyeraꞌat miꞌiria. Miꞌi hawyi Iesui kahu hap ewywuaria raꞌyn tukupteꞌen iwywo wuatꞌi eꞌat pe raꞌyn.

2 Timoteu 2:19

Maꞌato aito yt watoiat hin i te pywuat sehay mohey hap katupono Tupana saꞌyruꞌin sakiꞌytꞌin aito. Watunug iꞌyat iheg nakatno pote yt taꞌat i. Miꞌi hap ewy watomohey kahato. Pywo kahato pote yt watoiat i. Aikotã Tupana toꞌe saꞌawyꞌi hap ewy -Worohoꞌokuap ti eipe uimepytꞌin e. Iꞌewyte uwe uwe toꞌe -Uito Tupana watno e miꞌi hat pe -Pyno eminug saꞌag etoiat yne e Tupana.

Tiaku 2:5

Pyno ewetum no ehewaure kaꞌa uhepe uimikyꞌe koꞌi. Yt eweikuap i te apo aikotã Tupana tiꞌairo kahato yt hekat i rakaria Iesui mohey kahato hanuaria wo hap. Poꞌog toiꞌairo ihakyꞌeꞌi rakaria temiit no tetama piatnuaria wo iraniaꞌin kai katupono saꞌawyꞌi toꞌe -Uhemiit sese wyti aru tukupteꞌen miit emiit haria wo karãpe arepyhuꞌat Wuatꞌi Miitꞌin Morekuat Koro mesuwarote e Tupana miwan me saꞌawyꞌi. Mio tã toꞌe hap ewy raꞌyn ti mesup te toiꞌairo temiitꞌin no miit yt uwe mikuap ewywuat koꞌi i yt uwe mikyꞌe ewywuat koꞌi i e. Miꞌiria pe ti -Worohoꞌoꞌairo eipe miitꞌin porekuaria wo uimohey sese haria eiperia pote e. Worohoꞌonug eipe morekuat no yne mesuwat yi tote e hatek takaria pe tokyꞌe sese haria pe. Worohoꞌomoesaika uimohey kahato hap wywo wuatꞌi nug hamo e Tupana tomohey haria pe.

1 Peteru 1:2

Saꞌawyꞌi sese ti Aiꞌywot atipy piat Tupana aiꞌairo Tosaꞌyru sese eropat hanuaria wo. Mesuwat yi eꞌyian mete Tupana aikuap kahato yt uwe i te aitoria mesuwarotiaria pykai aikuap yne. Pywo ti rat saꞌawyꞌi Tupana toꞌe tuwepe -Meiũran ti aru atipoꞌoro Uhaꞌyru sese wuatꞌi miitꞌin uiminug koꞌi Potypot nuat e tuwepe. Uwe uwe aru topyhuꞌat Uhaꞌyru mohey haria wo miꞌiria ti aru uimimoewaku koꞌi wo tukupteꞌen. Katupono Uhaꞌyru suu wo atiꞌatumoewaku miꞌiria hawyi Uipaꞌãu Wakuat atum iꞌatupiit piat ieineꞌen hanuat e Tupana tuwepe nimo te yt kat i te tutunug ne turan. -Miꞌi hawyi Uipaꞌãu yne iꞌatupiit puo atopag iꞌatumoewaku hamo e ahepe. Miꞌi hawyi atikyꞌesat kahato imohey haria imikyꞌesat yne nug haria wo hap etiat atikyꞌesat. Miꞌi hap atikyꞌesat e Tupana Aiꞌywot koro saꞌawyꞌi sese atipy piat pe.

1 Peteru 1:20

Saꞌawyꞌi sese Tupana toꞌe tuwepe. Mesuwat yi yt kat i te turan Tupana toꞌe -Atipoꞌoro aru Uhaꞌyru wuatꞌi ywania minug saꞌag saꞌup mo e nimo sese turan. Koitywy tuwemoherep taꞌyn ikuꞌuro raꞌyn Tupana Saꞌyru. Aihũ Kuteiru ewy ikuꞌuro. Gaꞌatpo eꞌat ikuꞌuro raꞌyn Aikaꞌiwat. Howapy hap eꞌat pe hap ewy ikuꞌuro are.

1 Peteru 2:9

Maꞌato aito ti aikotã wẽtup ywania Tupana miꞌairo wẽtup ywania ewywuat koꞌi aito. Kat pote Tupana saꞌyruꞌin sakiꞌytꞌin aito. Miꞌi pote Tupana aiꞌairo tepaꞌi koꞌi wo maꞌato yt mesuwarotiat paꞌi koꞌi ewywuat i. Katupono aito morekuaria ewy watopyhuꞌat Tupana wanetup hawe. Aitoria aikotã wẽtup tama piaria ewywuat Tupana eꞌyi kaꞌiwaria aito. Aiwanetup hap koꞌi yt mesuwarotiaria minug koꞌi mesuwarotiaria wanetup hap koꞌi ewy hin i. Miꞌi pote -Eiperia yt miit ewy i iꞌatuꞌe ahepe. Miꞌi pote Tupana motypot hap yn watikyꞌesat mesuwarote. -Waku kahato uruetupana watoꞌe iraniaꞌin me. Saꞌawyꞌi urutukupteꞌen aikotã iꞌypyryp we hap ewy. Maꞌato mesup urutukupteꞌen hẽtyhot puo hap ewy. Saꞌawyꞌi Tupana yt heremo hin i uruepe. Koitywy heremo hap ewy urupyꞌa pe uruimohey pote.

2 Peteru 3:14

Miꞌi pote ti hãpyk yn watikyꞌesat watoineꞌen Tupana wywuat hap. Iraniaꞌin wywuat aiwoꞌowese hap yn waku watikat. Tupana wywuat aiwoꞌowese hap yn watikyꞌesat. Pyno uiwyriaꞌin waku watoineꞌen iwywo mekewat eꞌat pe. Waku yt kat i iꞌaparap hap aiwanetup hawe. Waku yt kat i yt nakuap i aikai Tupana wanetup hawe. Waku yt kat i hin i raꞌyn aiminug saꞌag aikawiat koꞌi.

1 Iuwãu 4:16

Miꞌi pote watikuap taꞌyn Tupana aikyꞌe hap watomohey kahato raꞌyn hawyi. Tupana ti woꞌopotkyꞌe hat sese. Miꞌi pote uwe uwe woꞌopotkyꞌe hat sese toineꞌen Tupana wywo miꞌi pote Tupana toineꞌen iwywo ipyꞌa pe.

Iesui Aru E Hap 13:8

Mekewat eꞌat turan taꞌatunug Tupana wo mekewat awyato ewywuat saꞌag nakat. Teꞌeruwepỹꞌãtutuk hawyi -En ni Tupana iꞌatuꞌe iraniaꞌin. Maꞌato mekewat ikuꞌuro aihũ Kuteiru ewywuat rakat mohey haria yt inug i mekewat awyato tig akag ewywiat taꞌatuetupana wo. Yt taꞌatumotypot i. Katupono Tupana Sese yn saꞌawyꞌi toineꞌen yi nug hap eꞌyian mete iꞌatuꞌe Iesui mohey haria. Miꞌiria Tupana tunug iꞌatuset pehik hawe tomiwan ete. Miꞌiria Uihũ Kuteiru hit mohey haria toiwan tomiwan me mesuwat yi nug hap eꞌyian mete miꞌiria aru -Uruimohey Tupana Hũ ikuꞌuro aikawiatno haype pote yt uruimohey i moiꞌok mipoꞌoro aiporekuat nuat iꞌatuꞌe haria toiwan tomiwan me mesuwat yi yt kat i hep hap eꞌat pe turan Tupana.

Iesui Aru E Hap 17:8

Mekewat awyato tig saꞌag saꞌawyꞌi toineꞌen yi tote maꞌato miꞌi hawyi ikuꞌuro hawyi meiũran tuwẽtem guꞌuro pyi mekewat yi kaꞌa saꞌag iwato rakat kaipyi yt ikaꞌa sasat rakat i kaipyi e. Miꞌi hawyi yi totiaria yt Iesui mohey i haria teꞌeruwanetup kahato toineꞌen i hawyi e. Mekewat eꞌat pe -Are paĩ are an ikuꞌuro saꞌawyꞌi mesuwat awyato wato tig ewywuat maꞌato mesup tuwemoherep i raꞌyn iꞌatuꞌe aru mekewat meimuẽwaria yt Tupana miwan miaria iꞌatuset pehik i haria -Miꞌiria ti waku tukupteꞌen wuatꞌi eꞌat pe uiwywo atipy pe yt toꞌe i Tupana miwan me haria. Saꞌawyꞌi Tupana tiwan naꞌyn tomohey haria saꞌawyꞌi sese aat yi waikiru yt kat i te turan toiwan tomimoieineꞌen wuaria set koꞌi maꞌato mekewat awyato ahiag mohey haria set koꞌi yt wẽtup i Tupana miwan ete e uhepe mekewat atipy kaipywiat Tupana ehay moherep hat uhepe uito Iuwãu me.