Epereu 9:14 - Sateré-Mawé14 Maꞌato Aikaꞌiwat Iesui suu poꞌog hesaika yn suu kai mohag wo. Saꞌawyꞌi Aikaꞌiwat tum yne topiit Tupana pe ahaꞌup mo. Saꞌawyꞌi ikahu rakat aihũ yn waku aimiium mo yt kat i hatek takat yt kat i iꞌahuu hap rakat. Ipe kyt hap ihãite sese rakat yn ni waku e. Miꞌi hap ewy Iesui poꞌog waku mohag wo katupono yt kat i saꞌag tuete Tupana tipuẽti. Ihãite putꞌok e kahato turan tutum topiit. Pyno koitywy watomohey Iesui hawyi Aihũ Aimiium Tupana piat hap ewy topyhuꞌat. Miꞌi watum Tupana pe hawyi yt kat i hin i aheha yi kape hap. Yt kat i aiwemoti hap aiminug saꞌag kapiat hap ete. Aihũ Aimiium Ikahu Rakat Iesui pote. အခန်းကိုကြည့်ပါ။ |
Epereu 9:14
76 ပူးပေါင်းရင်းမြစ်များ
Eiwehaꞌat ro weitaria koꞌi kape e. Yt teꞌeruwemiꞌu koi kuap i wen maꞌato Tupana tiꞌatupoi kahato weitaria koꞌi are e. Iꞌewyte yt taꞌatuereko i iꞌatumiꞌu koꞌi eiperia ewy maꞌato Tupana tiꞌatupoi kahato weitaria koꞌi yne eꞌat pe. Pyno eiperia ti poꞌog poꞌog Tupana miꞌatukyꞌe koꞌi torannia weitaria koꞌi kai are.
Miꞌi tote saꞌawyꞌi Tupana tum naꞌyn yne tesaika hap. -En ni Uimiꞌairo miitꞌin yne Ehakyeraꞌat hanuat e. Miꞌi pote woromoieineꞌen Uipaꞌãu Wakuat no e Tupana saꞌawyꞌi Iesui tawa Nasare piat pe e. Miꞌi hawyi hewyry kahato urumuꞌe hamo urumoehãite hamo uruwoꞌoewaku hamo wakuap yn nug hamo ahiagnia yne atusiu hamo katupono Tupana Paꞌãu Wakuat toineꞌen iwywo uhytꞌiꞌin manaꞌin e Peteru.
-Waĩ urumotypot rẽ Tupana eipe. Kan hamo ten urumotypot Tupana wo eipe iꞌatuꞌe. Katupono yt naku i miitꞌin me Tupana en eweiꞌe e Tupana iꞌatuꞌe. Waĩ ne iꞌatuꞌe. Yt naku i tupanaria eipe eweiꞌe uruepe. Eweiꞌatoiat ro meimuẽwat ehetupana koꞌi hawyi eweiꞌaipok to Tupana sese kape mekewat wuatꞌi eꞌat piat ieineꞌen hat kape uhytꞌiꞌin manaꞌin iꞌatuꞌe. Yt kan hamo i eweimohey ehetupanaria katupono Tupana sese ti ainug hat yꞌy nug hat wuatꞌi yꞌy piaria nug hat e. Pyno Tupana sese kape eweiꞌaipok to hawyi eweipun no ehetupanaria saꞌag koꞌi iꞌatuꞌe Panape Pauru.
Tupana minug yi aat waty waikiru sem teꞌeraꞌakasa yne pykai -Pywo ti rat Tupana toineꞌen yt iꞌatuꞌe i teꞌeraꞌakasa iminug yne pykai. Yt naku i katupono Tupana tuwemoherep kahato raꞌyn tominug koꞌi wo toieineꞌen hap miitꞌin muo. Tupana yt heremo i wen aheha pe maꞌato tuwemoherep taꞌyn ahepe tominug koꞌi wo. Saꞌawyꞌi Tupana tunug mesuwat yi hawyi iꞌewyte mesuwarotiaria gaꞌapy puat yꞌy puat miat koꞌi. Miꞌiria koꞌi ti yt ihay kuap i rakaria tukupteꞌen wen maꞌato ihay rakaria ewy -Ainug hat ri Tupana iꞌatuꞌe haria ewy. Pywo ti Ainug hat ri Tupana iꞌatuꞌe wuatꞌi miitꞌin me. Yt heremo i Tupana wen maꞌato toineꞌen kahato aikai. Taꞌi hesaika sakpoꞌe Ainug hat iꞌatuꞌe hap ewy iminug koꞌi yne ahepe. Wuatꞌi eꞌat piat -Ainug hat toineꞌen iꞌatuꞌe ahepe iminug koꞌi. Yt uruwewi i urutuwenug iꞌatuꞌe hap ewy ahepe Tupana minug koꞌi wuatꞌi ywania pe. Miꞌi hawyi miitꞌin teꞌerahaꞌat Tupana minug koꞌi kape hawyi -Pywo Tupana ti wuatꞌi nug hat yt iꞌatuꞌe hin i heremo kahato pykai. Teꞌerahaꞌat kahato hewakuap moherep hap kape pykai -Aiwewi watuwenug iꞌatuꞌe saꞌag neꞌi toꞌope.
Miꞌi ti Uhaꞌyru sese e Tupana uhepe. Uiꞌewy hesaika rakat e. Uipaꞌãu wakuat oktan ne hesaika rakat e. Koitywy atimoherep taꞌyn uiꞌe hap e Tupana. Koitywy atimoherep taꞌyn nimuat uiꞌe hap e Tupana. Koitywy Miꞌi moherep hap niatpo kahato raꞌyn aikotã atiõtem guꞌuro pyi Uhaꞌyru e Tupana uhepe haꞌawyte uikay kay tehay sytpok hamuat hap tote are.
Uruꞌywania Tupana piat taꞌatupoityro hap pun haria taꞌatuꞌaparap kahato Tupana imiium taꞌatuehakyeraꞌat hamuat ete. Yt taꞌatukyꞌesat i hawyi ihakyꞌeꞌi rakaria ewy tukupteꞌen mesuwe. Katupono pya kahato Tupana kai tukupteꞌen. Uruꞌywania mipun iraniaꞌin ywania ewy topyhuꞌat. Miꞌi hawyi koitywy iraniaꞌin ywania Tupana mipoityro wo tukupteꞌen aikotã Tupana Paꞌãu kuap haria wo. Taꞌatumohey Tupana hawyi Tupana mihuꞌi huꞌi koꞌi wo tukupteꞌen. Maꞌato meiũran aru Iuteuria ywania urutoria yne Iesui mohey haria wo urutukupteꞌen aru imiꞌairoria oktan aikotã iraniaꞌin ywania mesuwat yi tote wẽtup sok yn watukupteꞌen hap ewy. Miꞌi hap eꞌat pe Tupana mipoityro koꞌi yne miitꞌin. Miꞌi pote mesuwat yi yne Tupana mipoityro wo topyhuꞌat. Waku kahato miꞌi hap eꞌat topyhuꞌat waku sakpo e.
Eipe ti Humanuꞌin koꞌi eipe wẽtup pusu kuap haria. Eipe eweikupteꞌen aikotã Uriweiria yp haiwot rakat ewywuat aikotã haga Uriweiria ran ewy. Aikotã imihep haga hawyi totopag wẽtup yp tote tomihep saipepiatno hap ewywuat. Toihep eipe haga ran hawyi toipehik Uriweiria yp sese wakuat ete raꞌyn hap ewy mekewat Uriweiria he rakat hewo kahato aimiꞌu wuat rakat ewy Iuteuria tukupteꞌen. Niatpo kahato watopag wẽtup yp kaipyi haga hap wẽtup yp kape. Watunug kuap i maꞌato niatpo kahato. Yt niatpo hin i iwat haga te watopag hap tote wẽtup yp kaipywiat yn naꞌyn haga iꞌewyte hapo pote yt niatpo i miꞌi ewywuat eihep eipe hawyi totopag Iuteuria towat toꞌyp ete sese raꞌyn hap ewy yt niatpo hin i totopag.
Koitywy karãpe aipiit tikyꞌesat saꞌag nug hap aikotã watikyꞌesat saꞌawyꞌi hap ewy waku watuwewãi. Waku waĩ watoꞌe aipiit mikyꞌesat saꞌag kape. Waku waĩ watoꞌe aiwemikyꞌesat saꞌag ete -Yt erenug neiꞌo saꞌag nug hatno waku watoꞌe aipiit kape. Miꞌi turan waku watoꞌe Tupana pe -Atum epe uhaga koꞌi waku watoꞌe. Atikyꞌesat yne uipiit ewatnuat wo emikyꞌesat koꞌi nug hamo. Atikyꞌesat uipiit koꞌi ewaku hap nug hamo Tupana waku watoꞌe. Atikyꞌesat uheko koꞌi ipakup taꞌyn Tupana aikotã miit ikuꞌuro rakat tuwẽtem i guꞌuro pyi hap ewy uipiit pakup atikyꞌesat epotpap nug hamo Tupana watoꞌe waku.
Saꞌawyꞌi aiminug saꞌag emiit no watopyhuꞌat. Miꞌi hawyi koitywy watopyhuꞌat Tupana emiit no raꞌyn. Koitywy Tupana po pe raꞌyn watopyhuꞌat. Waku kahato poꞌog Tupana po pe watopyhuꞌat katupono aheineꞌen mesuwarotiat hap Tupana motypot hap yn topyhuꞌat. Miꞌi hawyi aru toineꞌen aheineꞌen wuatꞌi eꞌat piat Tupana motypot hap.
Aikaꞌiwat Iesui yt karãpe i inug saꞌag watoꞌe. -Taꞌi Uhaꞌyru waku sakpo e Tupana. Maꞌato miꞌi pykai Tupana tiꞌapiheg aiminug saꞌag upi. Aiminug saꞌag yne iꞌokpe tote toineꞌen kahato iꞌauka hap. Miꞌi hawyi Iesui topyhuꞌat yt naku i nug hat ewy aiminug saꞌag topiit tote hawyi. Yt towat tominug saꞌag hap upi Tupana tiꞌapiheg Iesui maꞌato aiwat aiminug saꞌag upi tohoꞌopot kahato. Miꞌi watomohey hawyi Tupana ainug wakuat sese rakaria Tosaꞌyru suu aikoho hawyi. Tosaꞌyru ewaku hap totopag ahepe. Waku pe watoineꞌen Tupana wanetup hawe watoꞌe wuatꞌi ywania pe aikope aikope aipoꞌoro hap upi Tosaꞌyru haipepiatno.
Saꞌawyꞌi mio tã e Tupana tomohey haria pe -Areineꞌen eiwywo uheiam eipe. Eiwywo uhewyry e. Ehetupana wo areineꞌen e. Uhemiit no eweikupteꞌen e saꞌawyꞌi miwan me. Miꞌi pote Tupana yat ewy watoineꞌen. Tupana toineꞌen aipiit pe pote wuatꞌi eꞌat piat ieineꞌen hat eiam aito. Yt mo wuat minug Tupana iãꞌãkap eiam hin i aito. Yt karãpe i Tupana iwese tupanaria wywo. Miꞌi pote yt naku i Tupana aipiit piat watioto tupanaria motypot yat kape iꞌatumotypot hamo e Tupana saꞌawyꞌi miwan me Irewitiku 26.12 pe.
Peteru etikuap apo kat pote yt watuwehakyeraꞌat kuap i mekewat Tupana woꞌonapin hap nug yne hap kaipyi. Taꞌi Tupana tikyꞌesat kahato tepiat ainapin hap nug hap yne yne hap toikyꞌesat kahato maꞌato wahãꞌãg pykai watiꞌaparap kahato tuereto yne yne imikyꞌesat nug hap ete yt watiꞌaparap teran hin i pykai. -Waku atunug yne imikyꞌesat watoꞌe wen maꞌato watiꞌaparap aparap imikyꞌesat ewywuat nug hap ete. Miꞌi pote yt watuwehakyeraꞌat kuap i aiwekaipyi yne Tupana mikyꞌesat nug hap upi wahãꞌãg kahato pykai are. Taꞌi watiꞌaparap aparap hawyi hoꞌowasat rakaria wo watukupteꞌen aiwanetup hawe aipyꞌa pe are. Watiꞌaparap kahato tuereto imikyꞌesat nug hap ete areꞌe saꞌawyꞌi itote Iesui potmuꞌe Peteru pe wuatꞌi Iuteu ywania ehamo iꞌatupyꞌasetpe mekewat ienuk hap eꞌat pe turan. Miꞌi pote yt ahehakyeraꞌat kuap i mekewat waĩꞌe hap yt uwe i nug yne kuap pote are. Miꞌi pote uheha yt mekewat waĩꞌe hap kape hin i uhehakyeraꞌat hap kyewi maꞌato Tupana Saꞌyru kape yn uheha are Peteruꞌin me.
Towese hap kaipyi ahehakyeraꞌat Tupana. Aikotã ikuꞌuro rakat yt ihay i hap ewy yt ahehay hin i Tupana kape mekewat eꞌat pe. Taꞌi yt ahehay kuap i. Karãpe Tupana ihay ahowawi turan mekewat eꞌat pe yt watiwesat kuap i kat pote ikuꞌuro rakaria ewy watoineꞌen Tupana ewowi pote. Maꞌato miꞌi pykai aiwyꞌinug tuwewawi Aipotypot Iesui ehay upi.
Aikotã Aipotypot Iesui aikyꞌe kahato saꞌawyꞌi aikyꞌe kahato te. Aikyꞌe kahato hawyi aikyꞌe hap upi ikuꞌuro. Tutum naꞌyn heineꞌen hap aikawiatno hap aikotã saꞌawyꞌi wuaria tum taꞌatuhũria aria pe Tupana mowepiit hamo. Miꞌi hap ewy ikuꞌuro ariaꞌyp posak ete aikyꞌe kahato haype. Aikyꞌe sese hat Iesui pote ikuꞌuro aiꞌapiheg hap u hamo. Miꞌi pote aikotã aikyꞌe hap ewy waku watikyꞌe iraniaꞌin aikuꞌuro hap kape.
Miꞌi hawyi ti karãpe uruhenoi teran naꞌyn iraniaꞌin me Iesui eimohey hap etiat hap miꞌi pote ti -Taꞌi uruikuap taꞌyn iꞌatuꞌe. Miꞌi hawyi ti karãpe uruewyry turan uruewyry hap upi teꞌeroꞌe uruepe iraniaꞌin -Eweikuap apo Tesaronika piaria Iesui mohey hap iꞌatuꞌe uruepe. Koitywy ti iꞌatuwese kahato eimimohey ete. Mo wuat minug tupanaria atoiat haria raꞌyn miꞌiria iꞌatuꞌe uruepe miitꞌin. Miꞌi hawyi ti Wuatꞌi Eꞌat Piat Ieineꞌen hat Tupana sese eropat haria raꞌyn miꞌiria iꞌatuꞌe raꞌyn uruepe uruewyry tipytpe.
Uruꞌywot Tupana uruimotypot aat kaꞌap En iꞌatuꞌe. Urupotypot koro wuatꞌi eꞌat piat En iꞌatuꞌe Tupana piat uhehakyeraꞌat hap upi. Yt karãpiat i weityk hat En iꞌatuꞌe. Miitꞌin yt teꞌeraꞌakasa kuap i ewowi rakat En. Wẽtup Tupana yn ereineꞌen. Miꞌi rẽ yt kat i hin i Tupana toineꞌen iꞌatuꞌe hap upi. Miꞌi urumimotypot kahato En. Wuatꞌi kawiat poꞌog ikahu rakat En. Iꞌewyte wuatꞌi eꞌat piat ieineꞌen hat En paĩ iꞌatuꞌe taꞌatukuap Tupana piat uhehakyeraꞌat hap hawyi.
Maꞌato yt areto i pote yt uhewyry kuap i ewowi pote meikowat uimiwan atipoꞌoro ewowi aikotã waku etunug itote hap kuap hamo. Miꞌi uimiwan kaipyi waku etiꞌatunapin itotiaria aikotã waku aiwoꞌowese haria wo watukupteꞌen aito Iesui mohey haria. Taꞌi aito ti Tupana saꞌyruꞌin wo Tupana sakiꞌytꞌin wo aito watukupteꞌen wẽtup piit yn aito Tupana yat apyꞌyha iũtikag ewywuat aito katupono Tupana ehay mohey haria aito.
Ahehakyeraꞌat hat Iesui ikuꞌuro raꞌyn ariaꞌyp posak ete aikawiatno. Yne yt nakuap i nug saꞌag po pyi aihep hamo ikuꞌuro. Tupana watnuaria wo ainug neran pote wakuaria wo aito hap toikyꞌesat. Miꞌi pote aihep taꞌyn saꞌag nug hap po pyi aimowaku hamo raꞌyn. Koitywy Ahehakyeraꞌat hat iwepiit kahato raꞌyn.
Tupana Iãꞌãkap Sese Haꞌyru yn iꞌewy sese rakat. Wẽtup Miit ewy yn iꞌatueko wẽtup yn iꞌatumikyꞌesat koꞌi wẽtup yn iꞌatumotypot hap toꞌokupitu. Tosaꞌyru esaika hap wo toimopyhuꞌat yne atipy koꞌi mesuwarotiaria iꞌewyte atipy piaria Haꞌyru inug koꞌi yne yne. Toꞌywot ehay upi toimoesaika yne yi aat waikiru koꞌi waty Haꞌyru esaika hap mo inug iheg me. Iꞌewyte Tosaꞌyru suu wo aipit pit hap aiminug saꞌag toikoho yne. Iesui tipuruk yne aiminug saꞌag hawyi -Waku eraꞌapyk mesuwe uipo sese kai uiꞌyatype atipy pe e. Waku eraꞌapyk mesuwe uhepiat emotypot hap tote e katupono woronug En Wuatꞌi Wuatꞌi Porekuatno poꞌog poꞌog wuatꞌi kawiat hesaika rakatno e Tupana Tosaꞌyru pe.
Miꞌi pote koitywy waku pe raꞌyn watoineꞌen Tupana ehamo. Imiewaku sese wo raꞌyn watopyhuꞌat aito katupono mekewat Tosaꞌyru piit ium hap kaipyi aimohãpyk hap toineꞌen. Tupana towaku hap ewy ainug. Aikaꞌiwat Aipotypot suu aat yi totiat hap kaipyi aimohãpyk hap toineꞌen mesup. Tupana tewaku hap ewy tutum ahepe. Haꞌyru haꞌup nug tosuu wo wẽtup mo yn. Yt kat i miꞌi rẽ katupono -Waku raꞌyn eipe e Tupana toran naꞌyn e.
Maꞌato Ahepaꞌi Akag Iesui wẽtup mo yn haꞌup nug yne raꞌyn wuatꞌi eꞌat piat ahepiat iꞌaparap hap hawyi -Miꞌi Miit Eihũ wo waku e Tupana. Ikuꞌuro miitꞌin apiheg hap u yne hamo ariaꞌyp posak ete e. Wẽtup mo topiit tutum Tupana pe ariaꞌyp posak ete hawyi taꞌaipok guꞌuro pyi hawyi -Woromotypot teran mesuwe Uhaꞌyru e. Eraꞌapyk to mesuwe uipo sese kai e Tupana. Uhũ sese En e Tosaꞌyru pe. Miꞌi Miit yn wyti waku mohag wo e Tupana ahepe mesup.
Aihũria Wewato ahup auka hap kaipyi yt putꞌok e i aipyꞌa piat aiwanetup hawiat saꞌag nakat monik hamo. Saꞌawyꞌi wahãꞌãg kahato putꞌok e hap ete maꞌato yt putꞌok e i Tupana piat aimohãpyk hamo. Saꞌawyꞌi tõꞌẽ tõꞌẽ miitꞌin Tupana motypot hamo -Heno aihũria iꞌatuꞌe paꞌi pe. Etiꞌauka ro aiminug saꞌag hep hamo iꞌatuꞌe. Katupono haty kahato aipyꞌa pe aiwanetup hawe aiminug saꞌag iꞌatuꞌe. Aiwemoti miꞌi hap koꞌi yt watiwaure kuap i miꞌi hap koꞌi iꞌatuꞌe paꞌi pe. Taꞌatuꞌauka wuatꞌi 12 ewaty pe. Taꞌatunug yne hãpyk taꞌatuhũ auka hap ete maꞌato yt naku i hap te topyhuꞌat rẽ iꞌatupyꞌa pe katupono aihũria suu yt putꞌok e i aipyꞌa piat aiwanetup hap koho hamo. Taꞌatunug kahato pykai haty te ahete. Miꞌi pote watunug anu i anu i ewy yt putꞌok e kuap i mohag wo sese pote. Putꞌok e pote yt taꞌatunug i raꞌyn. Maꞌato taꞌatunug anu i anu i pote tohenoi raꞌyn yt putꞌok e i hap.
Pyno toꞌiro Tupana kape uiwyriaꞌin. Waku watipun ahehay aheso hap koꞌi wateke Tupana wywuat piat hamo. Waku yt kat i aipyꞌa piat aheso hap. Miꞌi hawyi yt kat i aimowemoti hap wywo wateke. Toꞌiro pyno Tupana ewowi. Waku watipen aiwanetup hap aipyꞌa piat Iesui suu wo. Waku Iesui aipyꞌa sei hap Tupana tunug suu wo wateke. Waku yt kat i aiwanetup hap saꞌag aimoti hap wywo i waku wateke. Waku watuwei kahato mekewat yꞌy wakuat sese wuatꞌi eꞌat piat wat pe. Miꞌi hawyi waku wateke aipyꞌa sei hap wywo aikoho hap mywo aipiit toran koho hap mywo yn waku wateke Tupana ewowi uiwyriaꞌin.
Saꞌawyꞌi ahaꞌaseꞌi Isaki saꞌyru Iako tiꞌatupoityro te temiariruꞌin tokuꞌuro turan -Atimohey kahato Tupana e hap uhepiat -Atunug aru esaꞌyruꞌin saipepiaria waikiru sem koꞌi iꞌatu miꞌi pote eterut ro uhowowi uhemiariruꞌin e Iako tosaꞌyru Iuse pe katupono atiꞌatupoityro teran miꞌiria e. Miꞌi hawyi -Tupana e waku etunug no uhemiariru koꞌi typyꞌi kahato rakaria wo eꞌe hap ewy e Iako tuwemopoꞌog myi ariaꞌyp topoꞌyha etiat pyi tokuꞌuro sese hamo. Miꞌi tehay wywo toimoherep tepiat Tupana mohey kahato hap.
Uiwyriaꞌin uheinytꞌin wẽtup yn Iꞌywot rakaria aito pote worohoꞌonapin -Waku aiweꞌeg wo aheTupana mohey hap pun hap pupi katupono yt naku i kahato aipyꞌahak Tupana ete hap areꞌe. Yt naku i watoiat Tupana yt kat i imohey hap aikawiat haype. Yt naku i watopyhuꞌat wuatꞌi eꞌat piat ieineꞌen hat ewanikap mo aheTupana atoiat haria wo.
Saꞌawyꞌi kurin kurin watikuap Aipotypot Iesui etiat. Kurin kurin watikuap ihay etiat. Iꞌewyte saꞌawyꞌi aipotmuꞌeria Iuteuria aimuꞌe kurin kurin Tupana Mipoꞌoro Aiporekuat nuat ete. Miꞌi koꞌi toineꞌen ne aiwanetup hawe. Waku miꞌi koꞌi wen maꞌato poꞌog waku watikuap yne yne Iesui e hap yne yne iminug koꞌi e. Waku watuwemotag ikuap hap ete. Yt naku i watopyhuꞌat mekewat aimikuap hit hap ewy yn. Saꞌawyꞌi -Ewetoiat ro eiminug saꞌag koꞌi hawyi ewetomohey ro Tupana iꞌatuꞌe ahepe hawyi iꞌatuehay upi watuwat.
Tupana miꞌairo Iesui Ahepaꞌi Koro wuat maꞌato yt aheko upi hin i toiꞌairo. Aikotã iraniaꞌin aimiꞌairo ahepaꞌi yt ewywuat hin i. Yt ahaꞌaseꞌi Irewi saꞌyruꞌin hin i Miꞌi maꞌato miꞌi pykai Tupana tiꞌairo katupono wuatꞌi eꞌat piat ieineꞌen hat Iesui pote mekewat Mekeseteki ewywuat toiꞌairo Ahepaꞌi Koro wuat sese Miꞌi.
Ahepaꞌiria mesuwarotiat iꞌaparap aparap kahato Tupana piat taꞌatupotpap nug hap ete. Aiꞌywania paꞌi koꞌi tiꞌauka taꞌatuhũria taꞌatuꞌatuwuk wuk mohag wo taꞌatuminug saꞌag moweityk hamo -Uruiꞌaparap taꞌyn ewowi Tupana iꞌatuꞌe hamuat. Ereineꞌen waure wo uruminug saꞌag kai iꞌatuꞌe. Iꞌewyte saꞌawyꞌi taꞌatuꞌauka aihũria aiminug saꞌag pohag wo. Aihũria suu wywo taꞌatumoweityk teran ahepiat iꞌaparap hap. Taꞌatuhãꞌãg kahato miꞌi hap ete. Maꞌato mio Iesui ikuꞌuro aihũria ewy aikawiatno aipohag wo aiminug saꞌag moweityk hamo Ahepaꞌi Wato pote. Yt kat i tominug saꞌag pykai ikuꞌuro aiminug saꞌag upi tohoꞌopot aiꞌapiheg hap tutuꞌu hamo. Wẽtup mo yn ikuꞌuro hawyi tuweium Tupana pe aiꞌapiheg hap saꞌup mo yt kat i tominug saꞌag pykai. Ikuꞌuro aikuꞌuro hap u hamo. Wẽtup mo yn ikuꞌuro miꞌi hap yn imoma raꞌyn aiminug saꞌag. Maꞌato iraniaꞌin paꞌi akag koꞌi aihũria atuuka kahato iꞌewyte taꞌatuhũria aat kaꞌap. Maꞌato Iesui ti wẽtup mo yn ikuꞌuro hawyi waku raꞌyn koitywy e Tupana. -Waku raꞌyn e.
Ahepaꞌi Koro Iesui teke raꞌyn Tupana yat wato pe. Mekewat imotypot eiam atipy piat pe teke raꞌyn okenꞌypy pyhyp hap sakpo. Towat tosuu wywo teke. Tutum naꞌyn tosuu Tupana pe. Yt tutum i Wewato ahup suu. Yt tutum i aihũria Kaneiru suu maꞌato towat tosuu tutum hekat rakat Tupana pe. Ahehakyeraꞌat hap sese saꞌup tutum hawyi -Waku raꞌyn e Tupana tope. Putꞌok e raꞌyn esuu saꞌup mo wuatꞌi miitꞌin kyiꞌat hap sakpo e Tupana Tosaꞌyru pe.
Maꞌato mekewat aiꞌywania paꞌi akag sese yn teke kuap aikope Tupana eiam toineꞌen hap tote. Mekewat sokpe iꞌanam nakat kawiat okenꞌypy pyhyp hap sakpo. -Paꞌi koro yn waku tuut mesuwe uhowowi e Tupana. Maꞌato yt yne eꞌat i waku e teke. Wẽtup anu wẽtup anu hap ewy yn Tupana Paꞌãu eiam sese kape toto saꞌawyꞌi paꞌi akag. Maꞌato yt teke kuap i yt aihũ suu yt kat i topo piat wywo. Topo piat aihũ suu wywo pote yn waku teke aimiꞌauka aihũ suu wywo miꞌi aiminug saꞌag weityk hamo. Miꞌi pote totioto mohag wo aihũria suu -Heno urumiꞌaparap saꞌup e. Heno emiitꞌin piaria aparap saꞌup e Tupana pe.
Iesui auka hap moherep hamo taꞌatuꞌauka taꞌatuhũria saꞌawyꞌi. Taꞌi watikuap kahato iꞌatuhũria iꞌatumiium kaipywiat ahehakyeraꞌat Tupana piat hap ete Tupana hũ miium Tosaꞌyru ete aimowaku hap ete. Hãꞌãkap wo saꞌawyꞌi wuaria tunug aimuꞌe hamo. Saꞌawyꞌi wuaria iꞌatuwuk kahato taꞌatuhũria maꞌato yt putꞌok e hin i iꞌatuminug saꞌag hep hamo. Watunug kahato saꞌawyꞌi maꞌato haty kahato te aiwanetup hawe topyhuꞌat. Yt kat i -Mesup waku pe raꞌyn ereineꞌen Tupana e hap ahepiat hap aipyꞌa piat hap. Yt kat i -Mesup ti waure wo raꞌyn Tupana toineꞌen uiminug saꞌag ete e hap aiwanetup hawe. Saꞌawyꞌi Mesup te iꞌatuminug saꞌag iꞌatuwanetup hawe topyhuꞌat kahato te haty te iꞌatuwanetup hawe.
Koitywy watikuap taꞌyn mekewat saꞌup iwatoꞌin nakat kaipyi ahehakyeraꞌat hap. Taꞌi Iesui Aipotypot suu kaipyi yn ahehakyeraꞌat hap. Koitywy watikuap taꞌyn Aikaꞌiwat ikuꞌuro aikotã saꞌawyꞌi wuaria tiꞌauka taꞌatuhũria Kuteiru hap ewy. Iꞌatuhũria ikahuria kahato rakat yt kat i ipiit ete saꞌag hap ewy ikytsig kahato rakat taꞌatuꞌauka Tupana mowepiit hamo hap ewy Aikaꞌiwat Aipotypot ikuꞌuro. Miꞌi hawyi huu taꞌat yne itote Tupana kapiat ahehakyeraꞌat hap saꞌup mo are.
Pywo ti rat Aikaꞌiwat Iesui tuut irane kat pote yne aiminug aiꞌapiheg saꞌag koꞌi yne miitꞌin mesuwarotiaria minug saꞌag koꞌi topyhuꞌat Aikaꞌiwat piit pe. Mekewat ariaꞌyp tote tohoꞌopot kahato topiit ete. Tupana miꞌapiheg wo topyhuꞌat. Tuwepyi Aikaꞌiwat yne Tupana piat aiꞌapiheg hap aiminug saꞌag koꞌi u hamo tuut. Miꞌi hawyi aiꞌapiheg hap yne topyhuꞌat Iesui piit ete mekewat ariaꞌyp posak tote. Ipiit ete yne topyhuꞌat Tupana kaipywiat aiꞌapiheg hap koꞌi aiꞌahyk ahyk hap tutuꞌu yne. Haty kahato tuete. Miꞌi hawyi aimoehãite hamuat hap topyhuꞌat. Haty hap yne tutuꞌu yne hawyi ikuꞌuro aheiam me. Aikuꞌuro hap tutuꞌu yne. Miꞌi pote aito watoineꞌen ikuꞌuro rakaria ewy iwywo mekewat aiminug saꞌag ete. Yt ahesaika i poꞌog aito watoineꞌen. Aikotã ikuꞌuro rakat yt wahãꞌãg kuap i yt naku i nug hamo hap ewy. Miꞌi hap ewy watopyhuꞌat mesup. Maꞌato wakuat yn sake i watunug kuap mesup kat pote watuwẽtem guꞌuro pyi Aikaꞌiwat wywo hap ewy. Miꞌi hawyi waku nug haria wo watopyhuꞌat iwywo.
Saꞌawyꞌi Aipotypot Aiporekuat Iesui miitꞌin mikyryꞌi hamo topyhuꞌat mesuwarote aikotã aikotã taꞌatunug saꞌag tuwete waku rakat pykai taꞌatuꞌauka. Maꞌato yt kat i saꞌag tutunug pykai tohoꞌopot kahato. Maꞌato aiminug saꞌag upi tohoꞌopot. Iesui hãpyk kahato rakat maꞌato ikuꞌuro yt hãpyk i rakaria mohãpyk hamo. Ikuꞌuro muap nug hamo Toꞌywot Tupana kapiat muap nug hamuat. Koitywy toineꞌen muap Tupana kapiat Iesui hoꞌopot hap kaipyi. Yt hãpyk i sese rakat toimohãpyk kuap taꞌyn. Pyno ipiit ikuꞌuro ariaꞌyp posak ete maꞌato miꞌi hawyi Tupana Paꞌãu timoieineꞌen Aikaꞌiwat.
Maꞌato yt naku i watoineꞌen mesuwarote aikuꞌuro hap kape yt naku i nug hanuaria wo aikotã saꞌawyꞌi yt watomohey i te Iesui turan wuat ewy are. Yt naku i aipiit mikyꞌesat saꞌag watunug. Maꞌato watunug mote yt kat hamo i watoineꞌen. Waku watoineꞌen mesuwarote Tupana mikyꞌesat nug hamo Tupana mowepiit hamo are.
Maꞌato watopyhuꞌat hẽtyhot pe Aikaꞌiwat ewy pote pywo pe watoineꞌen. Miꞌi pote ti iwywuat aiwoꞌowese hap topyhuꞌat kahato are. Miꞌi hap kaipyi ti Tosaꞌyru Iesui suu wo Tupana tikoho yne aiminug saꞌag koꞌi. Mekewat kat koꞌi kat koꞌi aiminug saꞌag koꞌi toiꞌatukoho aat kaꞌap ahewyry Iesui wywo imikyꞌesat ewywuat pote. Miꞌi hawyi tomikyꞌesat nug haria watopyhuꞌat.
Tupana Esaꞌyru sese Iesui kaipyi ahẽtup etipoityro emohey haria. Etum no iꞌatuepe i woꞌowese hap are epe. Wuatꞌi Porekuat no En poꞌog poꞌog iraniaꞌin kai are. En ni wuatꞌi eꞌyian mete wuat guꞌuro pywiat ieineꞌen i hat. En ni pywo yn e hat. Iesui En ni urukyꞌe hat sese katupono Esuu wo urupiit pit hap etikoho yne torannia uruminug saꞌag are. Ekuꞌuro hap urukawiatno hap.
ကြော်ငြာတွေ