Epereu 9:11 - Sateré-Mawé11 Miꞌi ti Ahepaꞌi Wato Pakup toineꞌen Ahehay Moherep Tupana kapiat hat. Wakuap yn tuut Aikaꞌiwat Iesui po pyi. Wakuap yn tutum ahepe wuatꞌi eꞌat piat nuat aheineꞌen pakup poꞌog saꞌawyꞌi wuat kawiat hap erut hamo tuut. Iꞌewyte muap pakup Tupana kapiat hap. Koitywy yt pya hin i Tupana aikai. Watoineꞌen heiam wakuat sese pe. Imotypot hap we watoineꞌen iwywo mesup mukiꞌite wuatꞌi eꞌat pe. Aheiam Tupana motypot yat pakup poꞌog wakuat mekewat yahig notiat kawiat aiꞌywania saꞌawyꞌi wuat sokpe kawiat kai poꞌog waku rakat. Koitywy Tupana motypot yat yt mesuwiat Tupana motypot yat ewy hin i katupono koitywy Tupana motypot yat yt miitꞌin po wuat minug i -Atunug Tupana motypot yat pakup e. အခန်းကိုကြည့်ပါ။ |
Epereu 9:11
30 ပူးပေါင်းရင်းမြစ်များ
-Taꞌi ahetawa kurin moityꞌi eweiꞌe tawa Perẽi yi Iuta ywania e. Maꞌato yt eiwemoti teiꞌo ehetawa kurin hap ete katupono ti aru meiũran ehetawa hit Perẽi poꞌog poꞌog miitꞌin mikuap mo topyhuꞌat yi Iuta ywania yne tawa koꞌi kai katupono ehetawa hit Perẽi me tuwemoherep irane Isareu ywania Potypot Koro sese e ti saꞌawyꞌi Tupana ehay moherep hat Mikeia tomiwan me 5.2 pe iꞌatuꞌe morekuat Eroti pe.
Mekewat Sehay e hap het rakat Iesui aiꞌewywuat tuwemoherep miitno aipiit ewywuat tuwemoherep. Miꞌi hawyi watehaꞌat kuap i hẽtyhot atipy kaipywiat Tupana saꞌyru wẽtup yn kape. Miꞌi hawyi toineꞌen aipyꞌasetpe. Putꞌok e mesuwe hegyiꞌat hap moherep hamo. Miꞌi ti Wakuat Sese toineꞌen. Hãpyk hap yn tuete. Pywuat rakat toineꞌen.
Pyno yt naku i watuwanetup ahepiat hoꞌopot hap mesuwarotiat kape koran wuat kape yn. Poꞌog waku watuwanetup aimowepiit hap atipy piat hap kape aikotã aru aimowepiit wuatꞌi eꞌat pe hap kape. Maꞌato koitywy yt heremo i te miꞌi. Katupono ahepiat hoꞌopot porap i hap heremo kahato koran aiwanetup hawe. Pyno poꞌog waku watuwanetup ahepiat hoꞌopot hap eꞌyian mete aikotã aru hap kape. Taꞌi yt pya hin i wyti aimowepiit hamuat wuatꞌi eꞌat piat hap eꞌat watoꞌe. Ahepiat hoꞌopot porapꞌi hawyi tokosap aru pote meremo watoꞌe.
Pyno karãpe topyhuꞌat aito Iesui mohey haria watopyhuꞌat wẽtup ywania ewy iwywo. Saꞌawyꞌi aipiit mikyꞌesat saꞌag ewy yn watunug kuap maꞌato mesup Iesui titek taꞌyn hawyi toipugha aimikyꞌesat saꞌag koꞌi aheko saꞌag koꞌi aipotpap saꞌag hap koꞌi. Toitek pun naꞌyn aiwanetup hawiat aikotã saꞌawyꞌi Iuteu ywania tunug taꞌatumepyt tuwemoherep ihainia hawyi taꞌatuemurui sokpe tek pun iꞌatueko ewy. Miꞌi hap ewy Tupana titek aimikyꞌesat saꞌag hawyi toipun naꞌyn pya aikai e. Miꞌi hap ewy Iesui titek kuap aimikyꞌesat saꞌag koꞌi are.
Waku kahato saꞌawyꞌi wuat Muisei miwan aiꞌywaniaria Epereu pusu kuap haria moweꞌeg hamo katupono tohenoi tomiwan me -Tuut aru Ahehakyeraꞌat hat e. Yne Muisei miwan ete aimuꞌe -Waku aru waku aru tuut wyti aru Tupana Mipoꞌoro uito ewywuat maꞌato poꞌog waku rakat e kahato maꞌato hãꞌãkap ewy ihay ahehakyeraꞌat hamuat ete. Aikotã aipaꞌãu aiꞌewy toineꞌen yi tote miꞌi hap ewy toimoherep Iesui aiꞌakag Muisei. Yianmiat miwan me tohenoi yne Iesui etiat aikotã wẽtup ok paꞌãu aat kape tuut heremo yt heremo kahato i wen maꞌato toꞌewy ipaꞌãu wywo hap ewy toimoherep Iesui yian mete ahaꞌaseꞌi Muisei miwan yt heremo kahato i rakat pe. Hãꞌãkap wuat Muisei henoi yne Iesui ieineꞌen hap ete ikuꞌuro hap ete iꞌewyte toineꞌen i guꞌuro pywiat hamuat hap ete. Saꞌawyꞌi ahaꞌaseꞌi Muisei tiꞌatuꞌuka kahato aihũria aikawiatno Iesui auka hap moherep hamo. Miꞌi ti imoherep kahato poꞌog wakuat uut hamuat ete. Katupono yne 12 ewaty pe taꞌatuꞌatuꞌuka taꞌatuehũria Tupana piat taꞌatumoewaku hap puẽti hamo wen maꞌato yt taꞌatupuẽti hin i. Maꞌato miꞌi hap nug hap kaipyi teꞌeruwanetup Tupana hũ sese kape taꞌatuehakyeraꞌat sese hamuat kape yian mete ipaꞌãu ewy tukupteꞌen taꞌatuhũria.
Pyno Tupana toꞌe -Atihuruk i raꞌyn wẽtup mo yn e. Miꞌi atunug hawyi waku raꞌyn toran naꞌyn uimihuruk e. Yt typua i atihuruk aru e katupono yt kan hamo i typua e. Miꞌi huruk hap putꞌok e yne raꞌyn e. Mekewat eꞌat yne yt iheg nakat i taꞌat yne e. Maꞌato mekewat yt hurukꞌe i rakat iheg sese rakat aru topyhuꞌat wuatꞌi eꞌat pe e. Mesuwarotiat morekuaria minug koꞌi yne taꞌat e maꞌato Uimiꞌairo Eiporekuatnuat minug koꞌi aru topyhuꞌat rẽ atihuruk yne yne hawyi e Tupana.
Miꞌi hawyi tuweꞌywãꞌĩ miit no tuwemoherep. Miit kahato no raꞌyn topyhuꞌat. Miꞌi tupono waku kahato Miit Miꞌi hat. Tuwemoehakyꞌeꞌi tuwewi aikawiatno hatno Ahepaꞌi Koro topyhuꞌat pote tohaꞌup nug naꞌyn aiminug saꞌag Tupana pe. Tutuꞌu yne aiꞌapiheg hap koꞌi hawyi aiwywo topyhuꞌat. Iꞌywot Tupana waure wo topyhuꞌat aiminug saꞌag koꞌi kai koitywy. Yt karãpe i aimaꞌat hatno topyhuꞌat iꞌewyte yt karãpe i Toꞌywot maꞌat hatno topyhuꞌat. Miꞌi pote Ahepaꞌi sese Miꞌi.
Pyno Iesui poꞌog atipy piaria kai iꞌewyte mesuwiaria kai. Waku watuwanetup kahato aimimohey kape. Tupana mimowaku koꞌi aito uiwyriaꞌin. Aito wẽtup ok ywytꞌin koꞌi wo yn Tupana ainug Aheykeꞌet Iesui pote. Aito wẽtup sok yn wuatꞌi atipy kapiat wat hanuaria aito. Koitywy Tupana aikay kay atipy kape. Miꞌi pote waku watuwanetup kahato Ahepaꞌi Koro Iesui kape hawyi -Iesui Ahepaꞌi Koro watoꞌe iraniaꞌin me miꞌi pote wẽtup yn miit ewywuat watopyhuꞌat wẽtup ehay ewy yn watoꞌe.
Katupono Ahepaꞌi Tupana wywuat ihay aikawiatno hat yt mesuwarotiaria yt ewy hin i. Karãpe ahete ahatek hap putꞌok e hap haty hap topyhuꞌat hawyi toikuap kahato katupono Miꞌi Paꞌi hatyꞌu kahato satek hap saꞌawyꞌi tuwete. Iꞌewyte yt ahesaika i hap toikuap kahato katupono saꞌawyꞌi mesuwe aiꞌewy tohãꞌãg tosero hap mesuwat yi tote. Saꞌawyꞌi hãꞌãg ahiag kaipywiat hap toikuap kahato yt naku i nug hamuat hap katupono ahiag hãꞌãg kahato Iesui yne yt naku i nug hamuat katupono Iesui aipiit puꞌi ewywuat kawiat sese Ahepaꞌi Koro hawyi yne toiãꞌãg ahiag miat hap toikuap maꞌato yt taꞌat i tomaꞌat hap upi. Taꞌi Aikaꞌiwat no kahato ti Ahepaꞌi toineꞌen. Karãpe yt naku i hap ahete pote aikawiatno hamo topyhuꞌat aipowyro kahato ahiag sopo hamo.
Pyno ahenoi teran saꞌawyꞌi wuat paꞌi wato Mekeseteki etiat. Miꞌi ti morekuat no topyhuꞌat mekewat Ierusarẽi notiat maꞌato mekewat eꞌat pe tawa Sareĩ iꞌatuꞌe taꞌatupusu puo maꞌato aipusu puo tawa woꞌowese e hap watoꞌe. Saꞌawyꞌi ti Tupana tiꞌairo temiit Mekeseteki paꞌi koro wuat miitꞌin ehay enoi tepiat hamuat. Tupana poꞌog ywaiti wuatꞌi kawiat miꞌairo Mekeseteki. Saꞌawyꞌi Aparãu taꞌaipok woꞌoꞌauka hap wato kaipyi wanikaptiaria atuuka hap kaipyi. Iꞌatuekat yne topo piat wywo tuut. Miꞌi hap tote muap upi paꞌi wato Mekeseteki tipuẽti. Miꞌi hawyi toipoityro ahaꞌaseꞌi Aparãu.
Koitywy watikuap kahato Tupana saꞌyruꞌin sakiꞌytꞌin aito hap. Taꞌi watikuap Tupana Saꞌyru hawyi Tupana moherep hat sese topyhuꞌat poꞌog poꞌog mekewat pywuat etiat kuap hamo. Miꞌi tupono mekewat Tupana Mipoꞌoro Aiporekuat nuat hat watikuap hawyi topoꞌoro hat Tupana watikuap iꞌewyte. Saꞌawyꞌi watikuap teran uwe Tupana hap maꞌato yt heremo hin i Tupana ahepe. Maꞌato mesup heremo raꞌyn aheTupana katupono Haꞌyru imoherep ahepe. Tupana Haꞌyru ti Toꞌywot ewywuat wẽtup miit ewy. Karãpe wataꞌakasa Haꞌyru kape pote Iꞌywot kape ti raꞌyn wataꞌakasa wy are. Miꞌi pote mesup -Worokuap kahato En watoꞌe yn Tupana pe. Koitywy uiwyriaꞌin watoineꞌen Tupana pe aikotã Tupana eiam ewy miꞌi pe watopyhuꞌat. Saꞌawyꞌi watomohey Iesui ti Tupana Saꞌyru e hap hawyi Iesui po pe watopyhuꞌat. Ipyꞌa pe kahato watoineꞌen. Aikaꞌiwat yat piaria ewywuaria watopyhuꞌat. Iesui ti Tupana sese miꞌi pote Tupana pe watoineꞌen Iesui pe watoineꞌen pote. Iesui ti wuatꞌi eꞌat piat ieineꞌen hat iꞌewyte aito wuatꞌi eꞌat piat watoineꞌen Iesui wywo wẽtup miit piit ewywuat pote are.
ကြော်ငြာတွေ