Epereu 5:9 - Sateré-Mawé9 Aikaꞌiwat yt karãpe hin i iꞌaparap Toꞌywot mikyꞌesat nug hap ete pote -En yn miitꞌin ehakyeraꞌat hatno e Tupana. Iesui watomohey hawyi tutum aheineꞌen wuatꞌi eꞌat piat hamuat ahepe tomikyꞌesat nug haria wo watoineꞌen mote. အခန်းကိုကြည့်ပါ။ |
Epereu 5:9
39 ပူးပေါင်းရင်းမြစ်များ
Miꞌi hawyi Iesui tiꞌatuwesat -Morekuat Eroti ti Awahuru ewywuat uiwanetup hawe katupono woꞌoꞌauka teran hat miꞌi miit areꞌe. Waku eweiwat ro Eroti kape hawyi ehenoi uiꞌe hap tope -Uito ti meiũ ahiagnia atusopo kahato hat raꞌyn iꞌewyte atiꞌatumoehãite kahato iꞌahuu rakaria mukiꞌite ti aru iꞌewyte atunug wakuat uipotmoehãite hap koꞌi uhewyry hap upi e. Miꞌi hawyi mukiꞌite eꞌihatꞌok hawyi ti aru waku yne raꞌyn uiminug koꞌi miꞌi hawyi waku yne hawyi areto e.
Yt uruto yn i ti mio tã urutoꞌe maꞌato Tupana Paꞌãu Wakuat iꞌewyte mio tã e aat kaꞌap uruꞌe hap ewy te e Peteru. Mio wyti Tupana tum neran Topaꞌãu Wakuat tomikyꞌesat nug haria pe paĩ e. Miꞌi Miit etiat ri urumikuap uruimoherep miitꞌin me ehepe uhytꞌiꞌin e. Miꞌi Miit yn ahehakyeraꞌat kuap hat e Peteru woꞌonapin haria akag koꞌi pe.
Saꞌawyꞌi Tupana ehay moherep hat Isaia toꞌe tomiwan me -Tupana e atiꞌatumuꞌe kahato mesuwarotiaria ehay wo maꞌato yt taꞌatumohey i te e. Taꞌatukuap kahato aiwẽ pywiat pykai yt taꞌatupywo i ahehay etiat e Isaia saꞌawyꞌi. Miꞌi e hap kaipyi watikuap taꞌyn iꞌatu kahato Tupana ehay wakuat kuap haria mesuwarotiaria tukupteꞌen maꞌato yt taꞌatumohey teran i haria hap watikuap.
Uipotypot no hap upi Iesui toineꞌen kahato uikai. Ipaꞌãu ipotpap kahato uipo pyi iraniaꞌin ywania ekyi hamo Tupana kapiat hamo. Iesui Paꞌãu ihay kahato uiwẽ pyi tomikuap koꞌi wo. Iꞌewyte Iesui misepap nug hap toimoherep kahato uipiit pyi iraniaꞌin ywania porerokosap Tupana mikyꞌesat nug hamuat hamo.
Maꞌato iraniaꞌin yt tomohey i haria pe aru tutum iꞌatuꞌapiheg wuatꞌi eꞌat piat katupono taꞌatumikyꞌesat yt naku i hap ewy yn taꞌatuꞌatunug aat kaꞌap. Yt taꞌatunug hin i Tupana mikyꞌesat ewywuat koꞌi pote Tupana miꞌapiheg koꞌi teꞌeropyhuꞌat wuatꞌi eꞌat pe e. Tupana mopyꞌahak teran hap yn taꞌatunug mote Tupana miꞌapiheg koꞌi wo teꞌeropyhuꞌat wuatꞌi eꞌat pe e. Yt naku i nug haria toran toiꞌatuꞌapiheg sio Iuteuria sio iraniaꞌin ywania toiꞌatumoehakyꞌeꞌi kahato wuatꞌi eꞌat pe.
Uiwyriaꞌin tawa Humanu ywania saꞌawyꞌi te raꞌyn tig ewetunug eimikyꞌesat saꞌag koꞌi yn yt eweimonik kuap i. Miꞌi turan putꞌok e itote Tupana ehay hawyi eweiꞌoksatꞌi kahato Tupana ehay -Pywuat kahato miꞌi ehay eweiꞌe. Koitywy watipuẽti raꞌyn Tupana piat ainapin hap eweiꞌe. Miꞌi hawyi ewetunug kahato Tupana ehay eipyꞌa pe. Miꞌi pote arehum kahato Tupana kape.
-Uito poꞌog iraniaꞌin kai e hat yt tuwanetup kuap kuap i Tupana kape. Miꞌi hawyi Tupana topyhuꞌat yt Tupana wo hin i. Aiwanetup saꞌag hap topyhuꞌat Tupana ete. Maꞌato Tupana aimoesaika miꞌi wanetup saꞌag hap pun hamo. Miꞌi hawyi Aikaꞌiwat Iesui yn toineꞌen aiwanetup hawe Aiporekuat no. Miꞌi hawyi Aikaꞌiwat ehay yn aiwanetup hawe. Iꞌewyte aiwanetup hap aheha wywo Aikaꞌiwat timohãpyk kuap yne.
Uhekatuwyriaꞌin uimikyꞌeria kahato eipe. Saꞌawyꞌi areineꞌen eipyꞌasetpe eimuꞌe hamo. Mekewat eꞌat pe worohoꞌonapin kahato kat som kat som Tupana tikyꞌesat ewetunug hap. Miꞌi hap eꞌat pe waku pe eweikupteꞌen. Einapin hap ewetunug yne maꞌato mesup yt areineꞌen i eipyꞌasetpe katupono morekuat woꞌopyhik hawe areineꞌen miꞌi pote yt uwe i uito eipyꞌasetpe. Miꞌi pykai ti atikyꞌesat kahato eweikupteꞌen uhehay upi. Yt uwe i uito itote pykai ewetunug o einapin hap koꞌi are maꞌato poꞌog poꞌog saꞌawyꞌi wuat kai uiꞌe hap ewy atikyꞌesat kahato ewetunug wakuat nug hap koꞌi. Waku eweikenꞌẽ yt naku i nug hap pupi Aikotã aityry hap ewy eikenꞌẽ hap. Waku watunug Tupana mikyꞌesat koꞌi yn Tupana mihakyeraꞌat aito pote. Waku watoineꞌen Tupana mihakyeraꞌat koꞌi wo watopyhuꞌat. Miꞌi hawyi karãpe miitꞌin teꞌeraꞌakasa aiminug wakuat kape hawyi -Pywo iꞌatuꞌe miꞌiria ti Tupana mihakyeraꞌat koꞌi wo iꞌatuꞌe.
Maꞌato yt uiwẽpohep hin i Iesui mohey hap ete waĩꞌiꞌatuꞌe pykai. Uiꞌauka pote uiꞌauka maꞌato yt uipohep hin i te. Katupono Tupana tiꞌatuehakyeraꞌat teran kahato tomiꞌairoria ahoꞌopot kahato Iesui mohey iꞌatuepiat hamuat pykai. Miꞌi hap kaipyi Tupana tiꞌatuehakyeraꞌat miꞌiria. Miꞌi hawyi Iesui kahu hap ewywuaria raꞌyn tukupteꞌen iwywo wuatꞌi eꞌat pe raꞌyn.
Pyno ahenoi ehepe mio tã e Tupana atipy piaria pe. Taꞌi mio tã e teropat haria pe -Eipe uheropat haria e. Maꞌãu kawiat eipe e. Eipe ti uimiehakyeraꞌat haria yi totiaria powyro hanuaria e. Miꞌi nug hamo worohoꞌopoꞌoro e. Uhaꞌyruꞌin uhakiꞌytꞌin uimohey haria powyro hanuaria wo worohoꞌonug eipe e. Iꞌewyte yt uimohey i te haria powyro imohey hap etiat haria wo worohoꞌonug eipe e Tupana saꞌawyꞌi te miwan me atipy piaria pe. Pyno koitywy watikuap taꞌyn poꞌog Haꞌyru atipy piaria teropat haria kawiat hap.
-Pyno iꞌatu kahato uimohey haria aru ehaipepiaria e Tupana tomohey yianmiaria pe. Pyno mesup watopyhuꞌat miꞌiria mimuꞌeria katupono miꞌiria ewywuat watomohey. Pyno watomohey yne hawyi wẽtup piit ewy watopyhuꞌat hawyi -Waku raꞌyn e aru Tupana. Toran naꞌyn. Atunug yne raꞌyn uiꞌe hap ewywuat pote mesup waku raꞌyn miitꞌin sem naꞌyn waikiru koꞌi ewywuat yi kyt koꞌi ewywuat uimohey haria sok iꞌatu kahato hap ewywuat tukupteꞌen uimiehakyeraꞌat koꞌi wuatꞌi ywania hap ewywuat mesup uimohey haria tukupteꞌen mesup e aru. Miꞌi pote atunug naꞌyn yne uiꞌe hap ewywuat e aru Tupana hawyi waku maꞌato yt uwe i aito Iesui mohey haria pote yt tutunug yne i te toꞌe hap ewywuat e.
Iꞌewyte nimo te Tupana toꞌe ahaꞌaseꞌi pot Aparãu me -Atikyꞌesat ereto wẽtup yi kape uimimoherep eꞌyi kape yt emikuap i yi kape e uimiium epiat wuat eꞌyi kape e iꞌewyte yne yne emepytꞌin emiariruꞌin watnuat e yi kape e. Miꞌi hawyi Aparãu timohey Tupana e hap hawyi toto iꞌe hap ewy yt taꞌakasa i aikope toto hap kapiat pykai.
Aikotã seput haria teꞌerahaꞌat popuo taꞌatueput hap etiat -Putꞌok are iꞌatuꞌe hamuat hap kape yn hap ewy waku watehaꞌat aiwanetup hawe -Putꞌok are aru Iesui yatype aiꞌe hap kape yn katupono Iesui topyhuꞌat seput haria akag ewy katupono toimohey Tupana poꞌog torannia kai. Uiwyriaꞌin waku Iesui piat Tupana mohey hap ewy waku watomohey Tupana are. Iesui ti aimoehãite kuap kahato Tupana mohey hap ete. Haꞌawytepyi watomohey Iesui hawyi aiwanetup hap Iesui yn topyhuꞌat miꞌi hap ewy waku watomohey te Iesui putꞌok watoꞌe iꞌyatypiat hap eꞌat kape. Aikotã seput haria taꞌatusaꞌawynug hawyi te ikahuro hap kape teꞌeruwanetup hap ewy Iesui toineꞌen mesuwiat turan seput hat ewy topyhuꞌat. Putꞌok e Tupana etiat hap kape yn iha ariaꞌyp posak kape yn iha Tupana mikyꞌesat nug hap kape yn iha. Miꞌi hap yn imowepiit hap. Miꞌi hawyi tutuꞌu aiꞌapiheg hap ariaꞌyp posak ete. Yt toikyꞌesat hin i miitꞌin mikyryꞌi hap pykai. Toikuap kahato tomohit hap maꞌato yt tuwemoti hin i ariaꞌyp posak totiat toineꞌen saꞌag hap miitꞌin ehaꞌat hap pupi. Tokuꞌuro hawyi taꞌapyk Tupana po sese kai aikope Tupana piat topainug hap tote. Tokuꞌuro hap no aikawiatno hap kape yn toto toineꞌen mesuwe turan. Tupana mikyꞌesat nug hap yn imowepiit hap mesuwarote topyhuꞌat tohoꞌopot hap eꞌat turan. Iesui seput hat akag ewy toineꞌen meiũpe turan.
Tupana tiꞌatumoherep yne yne mesuwat yi tote atipy tote aat yi waikiru koꞌi toiꞌatuꞌatunug wuatꞌi toran naꞌyn toiꞌatumoherep yi yꞌy gaꞌapy miat aimikoi koꞌi toiꞌatunug wuatꞌi meimuẽwaria e. Toiꞌatuꞌatunug yne yne hawyi toiꞌatuꞌapykok kahato yne tominug koꞌi e. Taꞌi toiꞌatumoewyry yne tominug koꞌi e. Waku pe tutunug aat kaꞌap yne tominug koꞌi e. Miꞌi pykai toipoꞌoro Tosaꞌyru Iesui hoꞌopot kahato mesuwat yi hawywiat ahehakyeraꞌat hamo. Miꞌi hawyi tohoꞌopot kahato poꞌog aikai mesuwat yi tote hawyi yt totiat hin i maꞌato Toꞌywot mikyꞌesat koꞌi tutunug yne. Tohoꞌopot kahato toineꞌen hawe tokuꞌuro hawe hawyi waku watoꞌe aiꞌiãꞌãg hap upi Aikaꞌiwat ewywuat -Mesup wahoꞌopot maꞌato Iesui poꞌog hoꞌopot aikai waku watoꞌe. Ahehakyeraꞌat hat hoꞌopot kahato aikawiatno hamo aikyꞌe pote waku watoꞌe. Aikyꞌe kahato hawyi ahereto atipy kape Ahehakyeraꞌat hat waku watoꞌe aiwoꞌope are.
Miꞌi tupono waku aiweꞌeg wo kahato toꞌe hap ete katupono koitywy Tosaꞌyru wẽ pyi aimuꞌe raꞌyn Tupana. Haꞌyru piat aimuꞌe hap ti poꞌog atipy piaria wẽ pywiat kai. Miꞌi tupono yt naku i kahato watoꞌokyryꞌi ahehakyeraꞌat hat ete. Maꞌato yt watat i Haꞌyru e hap hawyi watipun neꞌi ahehakyeraꞌat hap hawyi aikotã aru. -Yt atikyꞌesat i emiium Iesui aiꞌe hawyi aikotã aru. Taꞌi yt kat i hin i aru watipuẽti muap Tupana kapiat mio tã aiꞌe hawyi. Maꞌato aiꞌapiheg hap yn naꞌyn topyhuꞌat yt watat i imiium hawyi. Saꞌawyꞌi ahehakyeraꞌat hap ete aimuꞌe kahato Aikaꞌiwat Iesui. Iꞌewyte tosaipepiaria topotmuꞌeria kaipyi aimuꞌe kahato wy. Taꞌatumoheg kahato iꞌe hap torannia ahowawi.
Ahepaꞌi Koro Iesui teke raꞌyn Tupana yat wato pe. Mekewat imotypot eiam atipy piat pe teke raꞌyn okenꞌypy pyhyp hap sakpo. Towat tosuu wywo teke. Tutum naꞌyn tosuu Tupana pe. Yt tutum i Wewato ahup suu. Yt tutum i aihũria Kaneiru suu maꞌato towat tosuu tutum hekat rakat Tupana pe. Ahehakyeraꞌat hap sese saꞌup tutum hawyi -Waku raꞌyn e Tupana tope. Putꞌok e raꞌyn esuu saꞌup mo wuatꞌi miitꞌin kyiꞌat hap sakpo e Tupana Tosaꞌyru pe.
Koran Tupana Wywuat Woꞌowese Nug Hat raꞌyn toineꞌen Iesui. Koitywy Muap toineꞌen Tupana kapiat. Katupono mesup ahepe Tosaꞌyru mohey haria pe -Eweĩꞌẽ ro uhowowi e. Koitywy wuatꞌi eꞌat piat ieineꞌen hap atum neran ehepe yt ikahuro rakat i e Tupana. Katupono Uhaꞌyru suu topyhuꞌat ehaꞌup mo e. Uhaꞌyru ikuꞌuro eiꞌapiheg hap saꞌup mo e. Miꞌi pote mesup waku pe raꞌyn eweikupteꞌen e. Waku ahehay aiwoꞌope aiwoꞌope aiwoꞌowese hap e Tupana ahepe watimohey Haꞌyru hawyi. Ipakup we raꞌyn watukupteꞌen mesup Tupana wywo -Koitywy Uhaꞌyru mikyiꞌat koꞌi eipe pote eweĩꞌẽ ro uhowowi uhaꞌyruꞌin uhakiꞌytꞌin e Tupana ahepe.
Miꞌi hawyi yt karamuo i ikuꞌuro i raꞌyn Uhaꞌyru katupono wẽtup mo yn miitꞌin ikuꞌuro e. Miꞌi pote Miꞌi Miit Uhaꞌyru wẽtup mo yn ikuꞌuro hawyi mesup huut hap yn naꞌyn toineꞌen aru emiekatup e. Saꞌawyꞌi tokuꞌuro hamo tuut miitꞌin kape e. Maꞌato meiũran aru yt tokuꞌuro hamo i tuut tohekatup haria kape. Katupono Uhaꞌyru yt typuat ikuꞌuro rakat i e. Uhaꞌyru tuut wyti aru tomiehakyeraꞌat koꞌi moherep hamo e Tupana ahepe Tosaꞌyru Iesui ete.
Uiwyriaꞌin karãpe Aipotypot suu topyhuꞌat aheha ete aipy ete aiwanetup hawe aipiit ete miꞌi hawyi ikytsig kahato rakat ewy topyhuꞌat aikai. Yt saꞌawyꞌi wuat aiminug saꞌag koꞌi ewywuat hin i. Miꞌi hawyi waku watunug yne Tupana mimoherep tomikyꞌesat koꞌi pywuat koꞌi waku watunug. Yt watunug kuap i wen maꞌato Tupana Paꞌãu aimoesaika kahato mekewat pywuat sehay nug hamo are. Waku Tupana Paꞌãu ainug miitꞌin kyꞌe sese haria wo yt kat i aheso hap aipyꞌa piat miitꞌin kyꞌe hap wywo maꞌato aipyꞌa pyi miitꞌin kyꞌe sese hap yne ahesaika hap wywo. Waku watiꞌatukyꞌe miitꞌin Tupana Paꞌãu aimoesaika hap kaipyi are.
Koitywy watikuap kahato Tupana saꞌyruꞌin sakiꞌytꞌin aito hap. Taꞌi watikuap Tupana Saꞌyru hawyi Tupana moherep hat sese topyhuꞌat poꞌog poꞌog mekewat pywuat etiat kuap hamo. Miꞌi tupono mekewat Tupana Mipoꞌoro Aiporekuat nuat hat watikuap hawyi topoꞌoro hat Tupana watikuap iꞌewyte. Saꞌawyꞌi watikuap teran uwe Tupana hap maꞌato yt heremo hin i Tupana ahepe. Maꞌato mesup heremo raꞌyn aheTupana katupono Haꞌyru imoherep ahepe. Tupana Haꞌyru ti Toꞌywot ewywuat wẽtup miit ewy. Karãpe wataꞌakasa Haꞌyru kape pote Iꞌywot kape ti raꞌyn wataꞌakasa wy are. Miꞌi pote mesup -Worokuap kahato En watoꞌe yn Tupana pe. Koitywy uiwyriaꞌin watoineꞌen Tupana pe aikotã Tupana eiam ewy miꞌi pe watopyhuꞌat. Saꞌawyꞌi watomohey Iesui ti Tupana Saꞌyru e hap hawyi Iesui po pe watopyhuꞌat. Ipyꞌa pe kahato watoineꞌen. Aikaꞌiwat yat piaria ewywuaria watopyhuꞌat. Iesui ti Tupana sese miꞌi pote Tupana pe watoineꞌen Iesui pe watoineꞌen pote. Iesui ti wuatꞌi eꞌat piat ieineꞌen hat iꞌewyte aito wuatꞌi eꞌat piat watoineꞌen Iesui wywo wẽtup miit piit ewywuat pote are.
Uito ti atimohey kahato. Miꞌi pote eipe atikyꞌesat uiꞌe eweimohey kahato hap. Tupana ti yt puo hin i eikai uiꞌe tomohey hap ium ehepiat hamo. Tupana tum neran aikyꞌe hap miꞌi pote toꞌiro watikyꞌe Aikyꞌe hat. Waku watuweium Tupana pe aikyꞌe hamo. Waku Tupana yt wahowaĩ i aikyꞌe teran tipyt. Taꞌi waku ti Aikaꞌiwat wahekatup wuatꞌi eꞌat pe. Miꞌi hap yn ti waku uiwyriaꞌin. Tupana mipoꞌoro ahetiatno ihakyꞌeꞌi kahato tutum toineꞌen wuatꞌi eꞌat piat hamo. Miꞌi pote waku watikyꞌe Aikyꞌe hat are.
ကြော်ငြာတွေ