Epereu 13:21 - Sateré-Mawé21 -Tupana etiꞌatumohãpyk aiwyriaꞌin wakuap nug haria are. Etunug miꞌiria Esaꞌyru mikyꞌesat ewy waku nug haria wo are. Etunug miꞌiria Esaꞌyru mohey hap etiat itag nakaria wo are. Atikyꞌesat etum iꞌatuepe esaika hap wakuap nug hamuat are. Atikyꞌesat iꞌatuminug emowepiit hap yne hawyi eha mowepiit hap topyhuꞌat are. Tupana uito ti emipoꞌoro Esaꞌyru mohey kahato hat. Esaꞌyru wywo ahẽtup mesup ewowi are. Atikyꞌesat Esaꞌyru mowato mesuwat yi totiat wuatꞌi eꞌat piat hap atikyꞌesat Tupana. Tupana waku kahato En aat kaꞌap are. Etiꞌatukawiatno meiũpepyi uiwyriaꞌin Iuteu ywania are. Iesui set upi ahẽtup Toran naꞌyn uiꞌe hap are. အခန်းကိုကြည့်ပါ။ |
Epereu 13:21
53 ပူးပေါင်းရင်းမြစ်များ
Miꞌi pote apo are ehepe uwe som pyno toꞌywot mikyꞌesat nug hat sio watꞌyp sio yian e Iesui Tupana motypot yat piaria akag koꞌi pe. Miꞌi hawyi taꞌatuwesat -Taꞌi yian yn inug toꞌywot mikyꞌesat iꞌatuꞌe. -Pywo pe ti miꞌi tã e Iesui. Pywo pe ti miitꞌin morekuat saꞌup sat haria iꞌewyte haryporia yt iweꞌeg i rakaria teꞌeruwehytꞌok Tupana etama pe eiꞌowokai te e.
Waku yne saꞌawyꞌi wuat ahenoi ehepiat hap ewy miitꞌin muꞌe hamuat e. Miꞌi hawyi eimimuꞌeria uimohey haria atikyꞌesat yne uhehay nug haria wo teꞌeropyhuꞌat e. Miꞌi tupono eweiwat ro iraniaꞌin ywania yne muꞌe hamo areꞌe wen maꞌato miꞌi turan ti aru yt eiweran i eweiwat. Katupono Uito ti aru areto wy eiwywo aikope aikope eweiwat hap upi eipowyro hatno wuatꞌi eꞌat pe ikahuro hap putꞌok e hap kape. Areineꞌen eiwywo wuatꞌi eꞌat pe e Iesui ahepe temiitꞌin me.
-Uiꞌywot atikyꞌesat En Uito hawyi ahemiitꞌin wẽtup miit ewy yn hap are. Atikyꞌesat ahemiitꞌin wakuaria sese ahewaku hap oktan hap atikyꞌesat are. Aiwoꞌoꞌewy kahato watoineꞌen Papai En Uito ahemiitꞌin wywo wẽtup yn aiwanetup hap koꞌi hap atikyꞌesat are. Taꞌatuꞌatumuꞌe miitꞌin turan pywo sese ti Tupana Mipoꞌoro Iesui ahehakyeraꞌat hanuat iꞌatuꞌe wanetup haria hap atikyꞌesat e. Taꞌi Tupana aikyꞌe kahato Tosaꞌyru kyꞌe hap ewy iꞌatuꞌe iraniaꞌin hap ahẽtup. Katupono hãpyk sese tukupteꞌen ahemiitꞌin iraniaꞌin ehamo pote hap ahẽtup epe Uiꞌywot are e.
Katupono aikope aikope toineꞌen kat koꞌi kat koꞌi sio heremo sio yt Tupana tunug yne miꞌi yt kat kawiat i tutunug. Tuwekaipyi tutunug yne yne. Iꞌewyte yne mesuwat yi tote toineꞌen katupono Tupana imoieineꞌen pote. Tesaika hap kaipyi tutunug yne tomotypot hamuat yne yne iminug koꞌi. Miꞌi pote -Urutuwehum kahato ewowi Tupana urutoꞌe. Waku kahato En waku kahato En urutoꞌe epe Tupana.
En yn ni Tupana miꞌi hawyi yt uwe i Tupana wo toineꞌen urutoꞌe. En yn ni wuatꞌi wuatꞌi kuap hat urutoꞌe. En yn ni yne yne weꞌeg hap eiam sese urutoꞌe. Uruimotypot kahato En katupono etipoꞌoro Esaꞌyru Iesui uruewawi uruꞌakag Sese wo urutoꞌe. Uruimotypot kahato En aat kaꞌap wuatꞌi eꞌat pe urutoꞌe. Waku kahato ti rat En paĩ an urutoꞌe. Miꞌi hap ewy waku watoꞌe Tupana pe. Waku. Waku raꞌyn uiꞌe hap ehewowi Iesui mohey haria yi Humanu watnuat rotiaria.
Tupana hegyiꞌat sese ahepe. Tutum kuap ahepe poꞌog poꞌog watuwanetup hap kai aipoityro kuap kahato aikyꞌe haype. Yt ahewaku hap upi i tutum neꞌen neꞌi maꞌato aikyꞌe hap yn wywo. Miꞌi pote karãpe watunug neran wakuap imikyꞌesat turan aimoesaika kahato inug hamuat poꞌog poꞌog watunug kuap kai. Tupana tikuap kahato ahepiat kat sepap hap kuap hamuat aimoweꞌeg hamo. Tutum kuap poꞌog ahepiat hum hap tepiat hap kai.
Mekewat muap ti aheraꞌaipok Tupana kapiat hap Aipotypot Iesui kawiat katupono tutum naꞌyn Topaꞌãu ahepe. Miꞌi hawyi uruto Iuteuria iꞌewyte eipe yt Iuteuria i Tupana Paꞌãu wẽtup takat eiam aito. Miꞌi pote mesup waku watuwat Tupana kape uruto Iuteuria iꞌewyte eipe wẽtup ywania waku wateke Aiꞌywot Tupana ehamo mesup Iesui aimowoꞌosat Tupana wywuat pote.
Tupana etunug o miꞌiria waku nug hanuaria wo are. Etunug miꞌiria iꞌatuieineꞌen hap tote wakuat eiam mo kahato are. Atikyꞌesat miꞌiria aikotã Esaꞌyru Iesui ewaku hap ewy tukupteꞌen. Ewaku hap ewywuat wo etiꞌatunug miꞌiria. Tupana miꞌi etunug mote emotypot haria wo kahato tukupteꞌen miꞌiria are. Waku kahato En iꞌatuꞌe aru ewowi iraniaꞌin areꞌe Tupana pe. Pyno mio tã ahẽtup mesuwe ehetiatno Tupana pe.
Miꞌi hap eꞌat pe yne yne toꞌe -Pywo ti pywo ti Iesui Tupana Mipoꞌoro Aiporekuat nuat Aikaꞌiwat koro wuat iꞌatuꞌe aru torannia. Tuwemohit kahato saꞌawyꞌi Iesui miꞌi pote ti aru Tupana timowato kahato Aikaꞌiwat. Mekewat eꞌat pe yne yne -Tupana iꞌatuꞌe Emipoꞌoro Aiporekuat nuat Aikaꞌiwat sese hap uruikuap taꞌyn iꞌatuꞌe. Uruimotypot kahato En iꞌatuꞌe. Uruꞌywot sese En iꞌatuꞌe aru. Maꞌato aito aikotã Iesui tuwemohit waku watuwemohit ewy are.
Are paĩ Tupana tikyꞌesat kahato watunug tomikyꞌesat ewywuat hap. Miꞌi pote ainapin aat kaꞌap aiwanetup hawe kat som kat som waku watunug hap. Karãpe aiwẽ pyi yt watunug neran i imikyꞌesat koꞌi miꞌi hawyi perupꞌi popuo aimuꞌe aiwanetup hawe -Etunug o etunug o e. Miꞌi hawyi meiũran -Waku Uhyt waku Mimi watoꞌe Tupana pe katupono toikyꞌesat kahato tehay upiat watuwat hap.
Mehin Epawutitu tum yne eimiium eimipoꞌoro koꞌi uhepe. Ikahu kahato uipuẽti eimiium aikotã saꞌawyꞌi nagnia tiwuk mohag hy ikamhig se rakat Tupana motypot hamo. Miꞌi hap ewy atipuẽti eimiium ikamhig se kahato eimiium Tupana mowepiit kahato hap. -Waku kahato e Tupana eimiium me. Koitywy areineꞌen hekat rakat ewy raꞌyn ewetum iwato uhepiat pote. Ewetum iwato pote uipo sakpo ewetum uhepe.
Toikyꞌesat yne aiminug koꞌi Tosaꞌyru Aipotypot Iesui motypot hap. Toikyꞌesat yne ahehay Tosaꞌyru Iesui set motypot hap. Toikyꞌesat kahato ahehay towawiat hap aiwepiit hap wywo. Toikyꞌesat ahehay towawi Tosaꞌyru set upi hap. Toikyꞌesat watoꞌe -Uruporekuat nuat urumowepiit kahato. En waku kahato Esaꞌyru waku kahato emiium e hap ewywuat aiꞌe hap Tupana tikyꞌesat.
Aiwy Epawai toineꞌen mesuwe. Miꞌi iꞌewyte waku e hap toipoꞌoro ehewowi. Aipotypot Iesui eropat kahato hat Epawai eipyꞌasetpywiat miꞌi. Miꞌi pote tohẽtup aat kaꞌap topyꞌa pyi Tupana kape yne hesaika hap wywo -Etipowyro aiwyriaꞌin tawa Korosi piaria emikyꞌesat oktan nug hanuaria teꞌeropyhuꞌat. Etiꞌatumotag miꞌiria Esaꞌyru oktan e. Etiꞌatumoesaika yt karãpe i eꞌatoiat hamuat e. Atikyꞌesat itotiaria pywo iꞌatuꞌe yne hap ehay etiat hap e Epawai aat kaꞌap meiũpepyi Tupana kape epowyro hamuat.
-Tupana etiꞌatupowyro o uruwyriaꞌin itotiaria. Etiꞌatumoperupꞌi wakuap nug hamo are. Uruikyꞌesat tawa Tesaronika piaria emohey haria wuatꞌi kupteꞌen hap. Etiꞌatumopakupꞌi iꞌatuwanetup pakup i hamo are. Miꞌi hawyi yt kat i iꞌatuwanetup saꞌag hap kapiat hap uruikyꞌesat uruꞌywot urutoꞌe. Uruikyꞌesat miꞌiria ewatno yn hap urutoꞌe. Miꞌi tã etunug mote ti aru karãpe Esaꞌyru emipoꞌoro uut turan yt kat i iꞌatuminug saꞌag huut turan etipuẽti aru urutoꞌe yn Tupana pe.
Uruꞌywot Tupana uruimotypot aat kaꞌap En iꞌatuꞌe. Urupotypot koro wuatꞌi eꞌat piat En iꞌatuꞌe Tupana piat uhehakyeraꞌat hap upi. Yt karãpiat i weityk hat En iꞌatuꞌe. Miitꞌin yt teꞌeraꞌakasa kuap i ewowi rakat En. Wẽtup Tupana yn ereineꞌen. Miꞌi rẽ yt kat i hin i Tupana toineꞌen iꞌatuꞌe hap upi. Miꞌi urumimotypot kahato En. Wuatꞌi kawiat poꞌog ikahu rakat En. Iꞌewyte wuatꞌi eꞌat piat ieineꞌen hat En paĩ iꞌatuꞌe taꞌatukuap Tupana piat uhehakyeraꞌat hap hawyi.
-Wakuap yn nug hat meiẽ hiwu iꞌatuꞌe iraniaꞌin hap upi watikuap wakuat hiwu. -Saꞌawyꞌi tomepytꞌin erohik kahato hat iꞌatuꞌe. Meiẽ -Ereke ro uiꞌyat pe e hat wuatꞌi piat hat meiẽ iꞌatuꞌe hap upi watikuap wakuat hiwu. -Tupana emiit hoꞌopot haria powyro kahato hat meiũ iꞌatuꞌe ihakyꞌeꞌi rakaria eropat hat meiũ wuatꞌi eꞌat piat waku yn hap nug hat meiũ iꞌatuꞌe hap upi watikuap uwe wakuat hiwu. Miꞌi wahetpehik kuap Tupana mohey haria miium kaipywiat ieineꞌen hamo.
Aito ti yne ikuꞌuro rakat nuaria aito maꞌato Iesui ti wuatꞌi eꞌat piat ieineꞌen sese hanuat raꞌyn teiam hẽtyhot kahato rakat pe. Yt uwe i tehaꞌat kuap howawi. Yt uwe i tokosap kuap heiam hẽtyhot rakat kape. Yt uwe i tehaꞌat kuap mesuwarotiat teha wo. Aheha yt putꞌok e i aiꞌakasa hamo. Pyno toꞌiro Iesui watimotypot katupono wuatꞌi kawiat hesaika rakat Miꞌi. Wuatꞌi eꞌat piat ieineꞌen hat miꞌi. Miꞌi tupono waku watimotypot Miꞌi.
Waku typy sakpo watomohey motꞌi Iesui aiwepiit hap eꞌat iꞌewyte aiꞌarot hap eꞌat. Yt naku i aipohep imohey hap ete. Yt naku i watunug tunug waure neꞌi. Waku potꞌi watomohey hawyi -Atum aru uiꞌe hap ewy e Tupana ahepe. Mio tã e hap yn waku wahekatup. Yt naku i wahekatup hawyi yt hum i te turan watoiat neꞌi raꞌyn -Atum aru e hap e. Maꞌato wahekatup poꞌog poꞌog hawyi putꞌok e Aikaꞌiwat atipy kaipyi haꞌup mywo hawyi yt watuwemoti hin i. Pywo pywo yn watoꞌe aimimotypot hap eꞌat pe. Waku kahato watoineꞌen itote.
Koitywy watuwaꞌatunug Aheykeꞌet Iesui Muisei saipepiat kape Aikywyt Iesui kape hap. Atipy pe toineꞌen miwan me ahet koꞌi yne yne aikotã wẽtup ok i raꞌyn herohik hap ewy aheywytꞌin aheykeꞌetꞌin aheinytꞌin aikypyꞌytꞌin koitywy wateꞌeruwaꞌatunug ienuk hamo hap ewy Aheykeꞌet Sese Aikywyt Sese Iesui wywo. Aikope atipy pe torannia iwan me Tupana miehakyeraꞌat wuaria koꞌi set toineꞌen hap kape. Wuatꞌi miitꞌin kuap hap sio waku sio yt hat Tupana kape watuwaꞌatunug aito. Aikope toꞌewywuat Tupana mimohãpyk koꞌi tukupteꞌen hap kape watuwaꞌatunug aito Aikope Tupana mimohãpyk yianmiaria imohãpyk sese towaku hap oktan hap kape watuwaꞌatunug aito. Aikope aipiit waku pe topyhuꞌat Tupana ewaku hap ewy hap kape watuwaꞌatunug atipy piat tawa kape watuwaꞌatunug aru. Tupana kape watuwat aito Iesui emiit aito Tupana Saꞌyru Paꞌãu Sese aipiit pe toineꞌen mote.
Waku hegyiꞌat rakaria wo watoineꞌen. Ihakyꞌeꞌi rakaria pe waku watimoꞌẽ ahekat. Waku watipowyro hatek takaria ahekat kaipyi ahesokpe kaipyi aheꞌuꞌi kaipyi e. Yt naku i waure wo watoineꞌen ihakyꞌeꞌi rakaria kai. Watimoꞌẽ pote Tupana mowepiit haria wo watopyhuꞌat. Haty pykai waku watum. Ahegyiꞌat hap kape Tupana taꞌakasa hawyi tuwehum kahato ahowawi.
Iꞌewyte aitoria Iesui mohey haria watopyhuꞌat nu koꞌi ewy Tupana yat nug hamuat hap ewy. Pyno iꞌatu kahato nu Tupana yat nug hap wẽtup nu uito wẽtup nu en wẽtup nu eipe hap ewy. Tupana yat nu koꞌi aito hap ewy watopyhuꞌat. Iꞌewyte ti aito Tupana epaꞌi koꞌi ewywuat watoineꞌen katupono ahehay kuap Tupana wywo aikotã saꞌawyꞌi wuaria taꞌatuꞌatuꞌuka taꞌatuhũria hawyi taꞌatuwuk Tupana mowepiit hamo. Miꞌi hap ewy watunug mesup. Watimohey Iesui Aipotypot hawyi Tupana mowepiit haria wo watopyhuꞌat Tupana hũ Aikaꞌiwat pote. Miꞌi aihũ watum Tupana pe imowese hamuat imowepiit hamo aikotã paꞌi koꞌi ewy aito.
Maꞌato yt naku i watoineꞌen mesuwarote aikuꞌuro hap kape yt naku i nug hanuaria wo aikotã saꞌawyꞌi yt watomohey i te Iesui turan wuat ewy are. Yt naku i aipiit mikyꞌesat saꞌag watunug. Maꞌato watunug mote yt kat hamo i watoineꞌen. Waku watoineꞌen mesuwarote Tupana mikyꞌesat nug hamo Tupana mowepiit hamo are.
Pyno eiwemotag o Tupana ehay wo hegyiꞌat hap kaipyi are iꞌewyte Tupana eikyꞌe hap kaipyi. Ahehakyeraꞌat hat Aipotypot Iesui mohey hamo eiwemotag o. Imohey kahato haria wo eweikupteꞌen hawyi ihãite kahato rakaria eipe. Imohey hap upi ihay wakuat upi yn atikyꞌesat eweikupteꞌen uito areꞌe ehepe uimiwan me ahenoi.
-Tupana En yn ni uruetupana urutoꞌe. Miꞌi hawyi En ni poꞌog weꞌeg torannia kawiat hat urutoꞌe. Iꞌewyte En yn uruehakyeraꞌat kuap hat urutoꞌe. Urupowyro En uruiꞌaparap hap moma hamo Tupana. Urunug no En hãpyk sese rakaria wo ewaku hap ewy urutoꞌe. Uruikyꞌesat kahato ehamo urutukupteꞌen mesup mukiꞌite wuatꞌi eꞌat pe urutoꞌe. Urumowepiit ro En ewy. Uruimotypot reran En urumohãpyk kuap hat sese En mote. En ni poꞌog wuatꞌi apy tote urutoꞌe. En ni Wuatꞌi porekuaria Porekuat. En ni Wuatꞌi Miitꞌin Akag Koro. En ni wuatꞌi atipy piaria iꞌewyte yi totiaria Akag Koro urutoꞌe. En ni rat wuatꞌi apy i ipotmokoꞌi rakat. Gaꞌatpo hawyi mesup mukiꞌite hawyi torannia eꞌat piat urutoꞌe ewowi iꞌewyte Esaꞌyru Emipoꞌoro uruporekuat nuat Iesui set puo waku.
Miꞌi hawyi arahaꞌat i hawyi araꞌakasa hyemyiꞌa iwatoꞌin nakat ewy. Itote Aipotypot wat amyap toineꞌen hyemyiꞌa pyꞌasetpe. Mekewat hyemyiꞌa wato Ewa ete heremo yne aipaꞌãu. Mekewat hyemyiꞌa yꞌy yt ipit pit hin i heremo kahato ipuo aikotã mekewat Nu hekat rakat Tiamante ewy. Miꞌi hawyi araꞌakasa 4 ok atipy piaria itote. Miꞌiria pe ete iha koꞌi yne iꞌatupiit ete. Miꞌi hap kape araꞌakasa.
Miꞌi hawyi uito Iuwãu wẽtup i wepy hap atikuap Tupana Hũ Kuteiru motypot kahato hap wepy hap. Wuatꞌi atipy piaria iꞌewyte wuatꞌi yi totiaria wepy hap atikuap wuatꞌi yi ywytꞌok piaria iꞌewyte yꞌy wato piaria wepy hap atikuap. Mio tã iꞌatuꞌe -Uruimotypot kahato En iꞌatuꞌe. Eraꞌapyk to wuatꞌi Morekuat eiam note uruporekuat koro wo Mehin Mimi iꞌatuꞌe. Ereineꞌen no Wuatꞌi Akag Wato wo iꞌatuꞌe. Ereineꞌen no Wuatꞌi Kawiat Poꞌog Nakatno iꞌatuꞌe. Yt uwe i poꞌog hesaika ekai Mimi Mehin iꞌatuꞌe. Taꞌi ewaku hap uruikuap kahato iꞌatuꞌe. Waku kahato En watoꞌe wuatꞌi eꞌat pe katupono wuatꞌi eꞌat pe gaꞌatpo mukiꞌite mesup wuatꞌi eꞌat pe ewaku hap putꞌok e urumimotypot no eminug koꞌi.
Miꞌi hawyi araꞌakasa typyꞌi kahato miitꞌin Ihũ Hit motypot haria itote. Miꞌi hawyi teꞌeruwepy kahato iraniaꞌin nywo. Maꞌato iꞌatuwepy hap ipakup takat -Waku kahato En Tupana Hũ iꞌatuꞌe. -Waku kahato En iꞌatuꞌe. Ewaku hap putꞌok e mekewat miwan okpoꞌi porap hamo. Waku etiꞌokpoꞌi porap hawyi etimoherep uruepe Mimi Uhyt iꞌatuꞌe. Ewaku hap yn putꞌok e Tupana mimosatꞌe hap hep hamo iꞌatuꞌe. Ewaku hap yn iwato hap oktan iꞌokman miat miwan moherep hamo eꞌauka urukawiatno pote iꞌatuꞌe Saꞌawyꞌi esuu topyhuꞌat Tupana piat urukyiꞌat towatnuat hawe iꞌatuꞌe. Katupono wuatꞌi mesuwarotiat ywania kaipyi uruhoꞌoekyi Tupana emiit no wuatꞌi miitꞌin wẽtup pusu wẽtup pusu kuap haria iꞌewyte wuatꞌi miitꞌin yt toꞌoꞌewywuat rakaria kaipyi iꞌewyte wuatꞌi miitꞌin wẽtup seko wẽtup seko mohey haria yt toꞌoꞌewy ewywuat i rakaria kaipyi iꞌewyte wuatꞌi yt toꞌoꞌewywuat i iꞌatupiit ete iꞌatueko rakaria kaipyi uruhoꞌokyiꞌat esuu wo iꞌatuꞌe. Iꞌewyte wuatꞌi setama kaipyi uruhoꞌokyiꞌat wuatꞌi ipe hun ipe kytsig ipe hup rakaria kaipyi uruhoꞌoekyi Tupana emiit no Esuu wo iꞌatuꞌe teꞌeruwepy puo wuatꞌi ywania Tupana Mipoꞌoro Aihũ Kuteiru ewywuat aikawiat ikuꞌuro rakat kape.
ကြော်ငြာတွေ