Miꞌi turan eꞌyian mete Iesui henoi raꞌyn aikotã aru topyhuꞌat tetiat hap koꞌi temiitꞌin me -Pyno waku areto Ierusarẽi kape maꞌato itote ti aru Iuteuria akagnia iꞌewyte paꞌi koro koꞌi akag koꞌi iꞌewyte mekewat Muisei miwan kuap kahato haria ti aru uimosoꞌopot kahato itote hawyi ti aru uiꞌauka raꞌyn. Maꞌato ti aru myẽꞌym eꞌat hap ete arẽtem iraꞌyn guꞌuro pyi.
Epereu 12:2 - Sateré-Mawé2 Aikotã seput haria teꞌerahaꞌat popuo taꞌatueput hap etiat -Putꞌok are iꞌatuꞌe hamuat hap kape yn hap ewy waku watehaꞌat aiwanetup hawe -Putꞌok are aru Iesui yatype aiꞌe hap kape yn katupono Iesui topyhuꞌat seput haria akag ewy katupono toimohey Tupana poꞌog torannia kai. Uiwyriaꞌin waku Iesui piat Tupana mohey hap ewy waku watomohey Tupana are. Iesui ti aimoehãite kuap kahato Tupana mohey hap ete. Haꞌawytepyi watomohey Iesui hawyi aiwanetup hap Iesui yn topyhuꞌat miꞌi hap ewy waku watomohey te Iesui putꞌok watoꞌe iꞌyatypiat hap eꞌat kape. Aikotã seput haria taꞌatusaꞌawynug hawyi te ikahuro hap kape teꞌeruwanetup hap ewy Iesui toineꞌen mesuwiat turan seput hat ewy topyhuꞌat. Putꞌok e Tupana etiat hap kape yn iha ariaꞌyp posak kape yn iha Tupana mikyꞌesat nug hap kape yn iha. Miꞌi hap yn imowepiit hap. Miꞌi hawyi tutuꞌu aiꞌapiheg hap ariaꞌyp posak ete. Yt toikyꞌesat hin i miitꞌin mikyryꞌi hap pykai. Toikuap kahato tomohit hap maꞌato yt tuwemoti hin i ariaꞌyp posak totiat toineꞌen saꞌag hap miitꞌin ehaꞌat hap pupi. Tokuꞌuro hawyi taꞌapyk Tupana po sese kai aikope Tupana piat topainug hap tote. Tokuꞌuro hap no aikawiatno hap kape yn toto toineꞌen mesuwe turan. Tupana mikyꞌesat nug hap yn imowepiit hap mesuwarote topyhuꞌat tohoꞌopot hap eꞌat turan. Iesui seput hat akag ewy toineꞌen meiũpe turan. အခန်းကိုကြည့်ပါ။ |
Epereu 12:2
78 ပူးပေါင်းရင်းမြစ်များ
Miitꞌin Potypot no Tupana tikyꞌesat kahato urukaꞌiwat Iesui e. Mio tã e Tupana saꞌawyꞌi -Miꞌi Miit ti Uipo sese kawiat ieineꞌen hat e. Miꞌi Miit ti wuatꞌi miitꞌin ehakyeraꞌat hanuat e Tupana saꞌawyꞌi miwan me e Peteru. Taꞌi Iesui ti henoi ahepe mekewat muap aiminug yt naku i hap kaipywiat aihep hamuat e. Miꞌi Miit yn ni muap Tupana kapiat hat e. Miꞌi Miit yn ni aiꞌywania Isareu ywania wanetup saꞌag hap mohãpyk kuap hat e. Toikyꞌesat yne aiꞌywania tomiehakyeraꞌat koꞌi wuat hap e.
Aikotã Aipotypot Iesui aikyꞌe kahato saꞌawyꞌi aikyꞌe kahato te. Aikyꞌe kahato hawyi aikyꞌe hap upi ikuꞌuro. Tutum naꞌyn heineꞌen hap aikawiatno hap aikotã saꞌawyꞌi wuaria tum taꞌatuhũria aria pe Tupana mowepiit hamo. Miꞌi hap ewy ikuꞌuro ariaꞌyp posak ete aikyꞌe kahato haype. Aikyꞌe sese hat Iesui pote ikuꞌuro aiꞌapiheg hap u hamo. Miꞌi pote aikotã aikyꞌe hap ewy waku watikyꞌe iraniaꞌin aikuꞌuro hap kape.
Saꞌawyꞌi watomohey Iesui hawyi Tupana miehakyeraꞌat hanuaria watopyhuꞌat. Tohaꞌawynug ahehakyeraꞌat hap hawyi yt aiꞌatoiat hin i e. Yne eꞌat pe haꞌawytepyi mesup te mukiꞌite ahehakyeraꞌat kuap hat Iesui topyhuꞌat. Poꞌog poꞌog yne eꞌat pe aimoesaika kahato tewaku hap nug hamo. Ahehakyeraꞌat kahato haꞌawyte mesup te Haꞌyru taꞌaipok Aipotypot no hap kape mesuwat yi kape taꞌaipok hap kape ahehakyeraꞌat hamuat wuatꞌi eꞌat piat hap kape. Yt uheso hin i are. Topyhuꞌat kahato aipyꞌa pe Iesui wuatꞌi eꞌat pe. Ipotpap kahato aiwanetup hawe aimoewaku kahato hamo. Yne eꞌat pe miꞌi hap koꞌi wyti waku watomohey e.
Karãpe wateput turan seput hat akag toꞌe -En poꞌog ihyha rakat e wuatꞌi ehamo. Miꞌi hap ewy ti meiũran Aiꞌakag Iesui toꞌe irane uhepe -En ni wakuat kahato Tupana wanetup hawe e irane uhepe maꞌato yt uhepe yn i maꞌato iꞌewyte uwe uwe tokyꞌe haria pe torannia -Atiꞌatukyꞌesat Iesui taꞌaipok i e haria pe.
Miꞌi hawyi Tosaꞌyru pe mio tã e iwan me -Eraꞌapyk to Uhaꞌyru mesuwe uipo sese kai uimimotypot no e. Meiũran aru ewanikaptia okpe tote epy topyhuꞌat aikotã morekuaria tunug -Uito poꞌog e hap moherep hamo. Wuatꞌi eꞌat pe ewanikaptia akit hatno areineꞌen e miwan me. Maꞌato iraniaꞌin atipy piaria pe yt karãpe i mio tã e.
Tupana Iãꞌãkap Sese Haꞌyru yn iꞌewy sese rakat. Wẽtup Miit ewy yn iꞌatueko wẽtup yn iꞌatumikyꞌesat koꞌi wẽtup yn iꞌatumotypot hap toꞌokupitu. Tosaꞌyru esaika hap wo toimopyhuꞌat yne atipy koꞌi mesuwarotiaria iꞌewyte atipy piaria Haꞌyru inug koꞌi yne yne. Toꞌywot ehay upi toimoesaika yne yi aat waikiru koꞌi waty Haꞌyru esaika hap mo inug iheg me. Iꞌewyte Tosaꞌyru suu wo aipit pit hap aiminug saꞌag toikoho yne. Iesui tipuruk yne aiminug saꞌag hawyi -Waku eraꞌapyk mesuwe uipo sese kai uiꞌyatype atipy pe e. Waku eraꞌapyk mesuwe uhepiat emotypot hap tote e katupono woronug En Wuatꞌi Wuatꞌi Porekuatno poꞌog poꞌog wuatꞌi kawiat hesaika rakatno e Tupana Tosaꞌyru pe.
Saꞌawyꞌi watomohey hawyi aimohãpyk kahato Iesui suu wo iꞌewyte mesup te aimohãpyk yne eꞌat Tupana Saꞌyru suu wo yne eꞌat poꞌog saꞌawyꞌi wuat kai. Waku wahẽtup yne eꞌat huu wywo aikoho hap aimowaku hamuat. Miꞌi watunug mote meiũran itag nakaria wo watoineꞌen imohey hap ete. Tupana miewaku koꞌi wo watopyhuꞌat mesuwarote. Tupana Saꞌyru ewywuat watopyhuꞌat hawyi yt kat i saꞌag aikai. Miꞌi hawyi tosuu wo aimotag kuap kahato.
Miꞌi hawyi aimohit wuatꞌi ehamo teꞌerahaꞌat kahato ahowawi. Iraniaꞌin yt aiwesat i. Iraniaꞌin yt teꞌeruwehum i poꞌog ahowawi Iesui waku watoꞌe pote. Aimoꞌarot kahato taꞌatuminug saꞌag kaipyi aimaꞌat hamo. Karãpe iraniaꞌin Iesui mohey haria hoꞌopot miitꞌin mikyryꞌi hap ete mekewat eꞌat pe watuwat iꞌatuwywo hoꞌopot iꞌatuwywuat hamo. Miꞌi hawyi wahoꞌopot aiwoꞌoꞌewy ewy itote ahatek hap eꞌat pe. Yt naku i taꞌatunug ahete hap eꞌat pe.
Iraniaꞌin Tupana mohey haria miitꞌin mikyryꞌi kahato haria wo teꞌeropyhuꞌat Tupana mohey hap yt pun haria i pote. Wuatꞌi ehamo taꞌatuꞌahyk ahyk -Eweipun no Tupana mohey hap iꞌatuꞌe maꞌato -Yt karãpe i uruipun imohey hap iꞌatuꞌe. Taꞌatuhãꞌãg kahato raꞌyn mekewat imohey hap moma hamuat maꞌato -Yt iꞌatuꞌe. Iraniaꞌin Tupana mohey haria miitꞌin mipak pak wo teꞌeropyhuꞌat. Iraniaꞌin imohey haria miitꞌin miꞌahyk ahyk wo miitꞌin mituk tuk wo miitꞌin miꞌauka wo teꞌeropyhuꞌat. Iraniaꞌin ituktuk iꞌatupiit ete iraniaꞌin ikohyewyry haity iheg nakat ete iraniaꞌin taꞌatupyhik iheg me iꞌypyryp we kahato maꞌato yt taꞌatuꞌatoiat hin i imohey hap.
Waku watuwanetup kahato Iesui ieineꞌen hap kape. Waku watunug iꞌewy yne. Saꞌawyꞌi yt naku i nug haria mikyryꞌi hap tohoꞌopot kahato maꞌato yt ipohep hin i imohey hap ete Iesui. Waku iminug ewy wahãꞌãg. Karapeĩ yt naku i nug haria ahatyꞌi hatyꞌi kahato imohey pote miꞌi pote yt naku i watoiat neꞌi imohey hap aikotã watoiat aheput hap aipiit sero hawyi hap ewy. Yt naku i watihep imohey hap aipyꞌa piat.
Saꞌawyꞌi wuat ahepaꞌi aimotag teran tehay wo saꞌawyꞌi wuat ainapin hap koꞌi ete. Toimopakup teran yne maꞌato mekewat saꞌawyꞌi wuat waku wen maꞌato yt hesaika i aimowaku hamo. Yt aimoperupꞌi kuap i mekewat Muisei piat ainapin hap. Yt aimohãpyk kuap i yt watunug i pote. Watiꞌaparap yne miꞌi hap koꞌi ete pote. Paꞌi Muisei waĩꞌe hap upi yt kat i muap Tupana kapiat hap katupono yt watunug kuap i yne Muisei piat ainapin hap koꞌi pote. Maꞌato watomohey Paꞌi Koro wo Iesui hawyi meremo watikuap Tupana.
Miꞌi hawyi yt karamuo i ikuꞌuro i raꞌyn Uhaꞌyru katupono wẽtup mo yn miitꞌin ikuꞌuro e. Miꞌi pote Miꞌi Miit Uhaꞌyru wẽtup mo yn ikuꞌuro hawyi mesup huut hap yn naꞌyn toineꞌen aru emiekatup e. Saꞌawyꞌi tokuꞌuro hamo tuut miitꞌin kape e. Maꞌato meiũran aru yt tokuꞌuro hamo i tuut tohekatup haria kape. Katupono Uhaꞌyru yt typuat ikuꞌuro rakat i e. Uhaꞌyru tuut wyti aru tomiehakyeraꞌat koꞌi moherep hamo e Tupana ahepe Tosaꞌyru Iesui ete.
Uiwyriaꞌin aipotypot koro Iesui ti wuatꞌi mimotypot nuat topyhuꞌat. Miꞌi tupono ti waku watiꞌatumotypot iraniaꞌin. Yt naku i uimiꞌairoria yn i miitꞌin watiꞌatukyꞌe. Maꞌato Aikaꞌiwat tiꞌatukyꞌe yne miitꞌin torannia hap ewy waku watiꞌatukyꞌe yne. Yt naku i watiꞌairo aiwyriaꞌin iꞌatuekat hap upi iꞌatuwepainug hap upi neꞌi are. Yt naku i watiꞌatukyꞌe aiꞌywania koꞌi yn.
Kat eꞌat pe aru Aipotypot Iesui tuut e hap kape teꞌeruwanetup kahato taꞌatukat kahato. Taꞌi saꞌawyꞌi wuaria Tupana ehay moherep haria iꞌatuehay kahato Aikaꞌiwat Paꞌãu mimoherep koꞌi ete. Taꞌi taꞌatumoherep yian mete aikotã aru Aipotypot ikuꞌuro hoꞌopot hap rakirẽ hamuat koꞌi taꞌatuwan kahato miwan me. Iꞌewyte taꞌatuwan kahato Tupana Paꞌãu kaipyi aikotã me Aipotypot wuatꞌi miitꞌin potypot no topyhuꞌat hamuat koꞌi taꞌatuwan are.
Saꞌawyꞌi Aipotypot Aiporekuat Iesui miitꞌin mikyryꞌi hamo topyhuꞌat mesuwarote aikotã aikotã taꞌatunug saꞌag tuwete waku rakat pykai taꞌatuꞌauka. Maꞌato yt kat i saꞌag tutunug pykai tohoꞌopot kahato. Maꞌato aiminug saꞌag upi tohoꞌopot. Iesui hãpyk kahato rakat maꞌato ikuꞌuro yt hãpyk i rakaria mohãpyk hamo. Ikuꞌuro muap nug hamo Toꞌywot Tupana kapiat muap nug hamuat. Koitywy toineꞌen muap Tupana kapiat Iesui hoꞌopot hap kaipyi. Yt hãpyk i sese rakat toimohãpyk kuap taꞌyn. Pyno ipiit ikuꞌuro ariaꞌyp posak ete maꞌato miꞌi hawyi Tupana Paꞌãu timoieineꞌen Aikaꞌiwat.
Mesup taꞌyn Aheykeꞌet Iesui teke raꞌyn atipy pe. Koitywy taꞌapyk Tupana po sese kai taꞌapyk. Miꞌi tote Tupana mimotypot no topyhuꞌat -Koitywy Uhaꞌyru woronug En wuatꞌi miitꞌin Akag wuatꞌi porekuaria Akag wuatꞌi atipy piaria akag wo woronug En e Tupana Tosaꞌyru pe. Yne esaika hap atum epe e Tupana Tosaꞌyru pe Iesui pe.
Uito ti atimohey kahato. Miꞌi pote eipe atikyꞌesat uiꞌe eweimohey kahato hap. Tupana ti yt puo hin i eikai uiꞌe tomohey hap ium ehepiat hamo. Tupana tum neran aikyꞌe hap miꞌi pote toꞌiro watikyꞌe Aikyꞌe hat. Waku watuweium Tupana pe aikyꞌe hamo. Waku Tupana yt wahowaĩ i aikyꞌe teran tipyt. Taꞌi waku ti Aikaꞌiwat wahekatup wuatꞌi eꞌat pe. Miꞌi hap yn ti waku uiwyriaꞌin. Tupana mipoꞌoro ahetiatno ihakyꞌeꞌi kahato tutum toineꞌen wuatꞌi eꞌat piat hamo. Miꞌi pote waku watikyꞌe Aikyꞌe hat are.
-Uito ti yne saꞌawynug hat maꞌato uhepiat inug hap yian mete areineꞌen wuatꞌi eꞌat pe e. Uiminug koꞌi yne ikahuro hap sakpo areineꞌen ne wuatꞌi eꞌat pe e uhepe. Miꞌi hawyi toꞌe i uhepe -Iuwãu e atomoherep aru epe emiꞌakasa koꞌi emuꞌetu wuat ewywuat koꞌi e. Etiwan o uimimoherep emuꞌetu hap koꞌi e. Miꞌi hawyi emiwan o etipoꞌoro uimohey haria pe 7 Tupana motypot yat kape yi Asia tote. Tawa Ewesu piaria weꞌatunug haria kape. Iꞌewyte Tupana motypot yat tawa Simina piaria waꞌatunug haria kape etipoꞌoro uiꞌe hap emiwan. Iꞌewyte Tupana motypot yat tawa Pekamu piaria weꞌatunug haria kape etipoꞌoro emiwan. Iꞌewyte Tupana motypot yat tawa Satu piaria kape etipoꞌoro. Iꞌewyte Tupana motypot yat tawa Tiatira kape etipoꞌoro wy. Iꞌewyte Tupana motypot yat tawa Wiratewia piaria kape etipoꞌoro hawyi Tupana motypot yat Irautiseia piaria kape etipoꞌoro emiwan ipe pewiu tote e Iesui uhepe.
Araꞌakasa howawi hawyi araꞌat yi tote uhowa yi kape hap ewy ipoityꞌi uhetiat hawyi ipy yatype genꞌẽ pono ikuꞌuro rakat ewy areineꞌen. Miꞌi pote tuweponug uipiit ete topo sese kai haype toꞌe -Uimikyꞌe Iuwãu e yt erekenꞌẽ teiꞌo uipupi e uhepe. Pywo ti rat uito wuatꞌi eꞌyian mete wuat eꞌat piat ieineꞌen hat Uito e iꞌewyte yt kat i raꞌyn topyhuꞌat rẽ mesuwarotiat pykai aru areineꞌen ne Uito e uhepe.
-Taꞌi uito ti rat Iesui e ahepe tuut hawyi. Ahaꞌawynug yne uito hawyi areineꞌen ni hat uito. Uhepiat inug yne hap eꞌyian me areineꞌen ni e. Uimisaꞌawynug saꞌawynug atimoputꞌok yne. Maꞌato wuatꞌi mesuwarotiat eꞌyian me areineꞌen ne wuatꞌi eꞌat pe e. Uito ti rat Eikaꞌiwat Wuatꞌi Esaika Hap Eiam uito e Iesui ahepe.
Miꞌi hawyi toꞌe i raꞌyn uhepe mekewat 7 waikiru ipo piat rakat -Iuwãu e wẽtup uhehay etiwan hawyi etipoꞌoro wẽtup Tupana motypot yat piaria kape e. Etipoꞌoro uhehay iꞌatuꞌapykok hat kape. Uimohey haria tawa Simina piaria kape e. Mio tã etiwan -Tawa Simina piaria uimohey haria Uito ti areineꞌen wuatꞌi eꞌyian miat ieineꞌen hat e. Iꞌewyte areineꞌen aru yi waikiru koꞌi kahuro pykai hap eꞌat e. Mesuwe saꞌawyꞌi uikuꞌuro maꞌato mesup areineꞌen i raꞌyn e.
ကြော်ငြာတွေ