Epereu 12:1 - Sateré-Mawé1 Aikotã watehaꞌat seput haria kape hap ewy aheꞌyian miaria Tupana mohey haria teꞌerahaꞌat ahowawi atipy kaipyi aikotã som watopyhuꞌat Tupana mohey hap ete hap kape teꞌerahaꞌat. Iꞌatu kahato miꞌiria ahowawiat sehaꞌat haria. Atipy kape tuwat raꞌyn aheꞌyian miaria saꞌawyꞌi wuaria Tupana mohey sese haria sehaꞌat ahowawiat haria. Taꞌi ipotyi rakat yrysakag aiꞌakag etiat wywo pote yt aihyha hin i aikohyeput turan. Aiminug saꞌag yrysakag howapy kahato aiꞌok pe tote hap ewy aiwanetup saꞌag hap ipotyi hap ewy. Aiꞌakit hamuat wateput turanuat hap ewy maꞌato yt kat i ipotyi hap pote wateput kuap aihyha kahato aiminug saꞌag watipun hawyi. Miꞌi pote waku watiꞌokhytpun aiminug yt naku i nug hap koꞌi. Miꞌi rẽ waku watomohey Tupana haty wo yne aipyꞌa pe. Miꞌi watunug mote seput haria ikohyeput haty wo rakaria ewy watopyhuꞌat. Maꞌato ahepiat aiꞌaparap kahato imohey hap etiat pote aikotã ipotyi hap aiꞌaparap hap ewy. Aikotã seput hat teput hap ete yt waure i hatek pykai ipy sero pykai hap ewy waku watomohey -Putꞌok are aru paĩ an waku watoꞌe hap yn aiwanetup hap. Waku watomohey potꞌi yt kat i iwaure wo wuat neꞌi hap wywo aiwanetup hawiat hap wywo. အခန်းကိုကြည့်ပါ။ |
Epereu 12:1
52 ပူးပေါင်းရင်းမြစ်များ
Tupana tunug aru toꞌe hap ewy paĩ an watoꞌe. Mio tã watoꞌe pote aimowepiit hap topyhuꞌat aikotã Tupana wepiit hap ewy. Watimohey pote putꞌok e ahete hoꞌopot hap niatpo kahato hap. Miꞌi hawyi waku watoineꞌen motꞌi aiperup i hap wywo. Waku wahekatup tokosap aru hap -Yt watoiat hin i imohey hap aiꞌe hap wywo. Miꞌi pykai waku ahehay Tupana wywo aat kaꞌap aikope aikope ahewyry hap upi.
Taꞌi Tupana tum aru tomohey haria pe tomotypot haria pe tomikyꞌesat nug hanuaria pe wuatꞌi eꞌat piat iꞌatuieineꞌen hap sese tomepytꞌin saꞌup e. Miꞌiria yt iꞌatupohep hin i Tupana motypot hap ete. Taꞌatuminug wakuap koꞌi wo taꞌatumotypot aat kaꞌap. Yt karãpe i iꞌatukuꞌuro miꞌiria ete e. Katupono tomotypot saꞌup Tupana tum miꞌiria pe wuatꞌi eꞌat piat iꞌatuieineꞌen waku hap.
Eiꞌywot areineꞌen e Tupana ahepe. Worohoꞌomuꞌe eipe uimepytꞌin wo aheTupana Koro e. Miꞌi pote uimikyꞌe koꞌi eweipyhuꞌat e Tupana ahepe. Pyno waku watuwehik kahato Tupana ete imepytꞌin aito pote. Waku watimotypot kahato Aiꞌywot Koro yt kat i aiminug saꞌag wywo. Waku watokenꞌẽ ahepiat inug saꞌag hap pupi kat pote Tupana ehamo watoineꞌen pote. Yt naku i watuwat aipiit mikyꞌesat saꞌag upi neꞌi iꞌewyte aiwanetup saꞌag hap upi neꞌi. Yt naku i watuwanetup poꞌog ahetupanaria saꞌawyꞌi wuat kape neꞌi. Waku watoꞌe Tupana pe -Uiminug saꞌag koꞌi aikotã uipiit ipit pit sese hap ewy. Miꞌi hap ewy uiwanetup hap ipit pit kahato. Uipiit pit ok hap pote aremoti kahato uiminug saꞌag pupi waku watoꞌe Tupana pe.
Areto turan Tupana toꞌe uhepe -Pauru atikyꞌesat ereto tawa Ierusarẽi kape mesup e uhepe pote areto i e hap ewy. Putꞌok are raꞌyn itote hawyi areto raꞌyn Iesui potmuꞌeria yianmiaria kape hawyi miꞌiria pe ahenoi henoi kat e hap kat e hap ahenoi yne sehay wakuat Iesui etiat Tupana ehay kat e kat e hap koꞌi ahenoi mesuwat yi tote iraniaꞌin me yt uruꞌywania i pe uiꞌe hap atimoherep yne yne uhehay wakuat areꞌe itote. Iesui mohey haria akagnia puo yn maꞌato migꞌi wo pyi ahenoi katupono taꞌatukuap teran sio pywo uhehay sio wẽtup sehay ahenoi iraniaꞌin me sio Iesui etiat. Iꞌatuehay ewywuat ahenoi hap sio yt taꞌatukuap teran itote tawa Ierusarẽi piaria. Katupono uikuap hamo yn ahenoi wakuat sio yt hap moherep hamo. Aikotã ahenoi sehay wakuat yt Iuteuria i piat hap ewywuat e hap ahenoi itote iꞌatuepe. Taꞌatukyꞌesat kahato uimienoi pywo kahato iꞌatumienoi Iesui etiat hap taꞌatukyꞌesat. Ahenoi yne hawyi -Waku kahato ehenoi miitꞌin me Pauru iꞌatuꞌe aikotã miit ihyha rakat teput kuap kahato rakat ewywuat en iꞌatuꞌe uhepe. Uiwyriaꞌin are miꞌi hap ewy atikyꞌesat Aipotypot Iesui toꞌe uhepe aru -Waku rakat ewy ereput Pauru e hap atikyꞌesat kahato. Yt naku i toꞌe uhepe -Yt kan hamo i emienoi miitꞌin me Pauru toꞌe hap yt atikyꞌesat hin i are.
Aito ti Aimimohey Iesui piit ewywuat watopyhuꞌat yne aito haga ewy. Pyno yt naku i aheso aiwoꞌope aikotã saꞌawyꞌi watunug hap ewy. Waku watipugha aiwoꞌope aheso heso hap aikotã watipun ahesokpe hiotꞌe rakat ewy. Koitywy waku pywuat sehay yn aiwoꞌope ahehay are. Miꞌi watunug mote aipainug hap aipyꞌa piat aiwanetup hawiat ikahu kahato Tupana ehamo.
Pyno ahoꞌopot kahato mesuwe woꞌopyhik hawe aikotã surara tuꞌuka hap turan ewy. Pyno eweikupteꞌen o uiꞌewy ahiag wuꞌuka hap surara ewywuat eiwuꞌuka kahato itote ahiag akit hamuat tawa Wiripu tote aikotã eweiꞌakasa uito hap ewy. Aikotã saꞌawyꞌi wuat hap ewy miꞌi hap ewy waku eweikupteꞌen uhaipepiaria eweikupteꞌen surara ewywuat. Yt atoiat hin i te mesuwe ahiag wywuat wuꞌuka hap. Areineꞌen woꞌopyhyp hawe pykai atuuka atuuka te. Taꞌi miꞌi hap eweikuap taꞌyn kat pote yne ikuap are.
Katupono watimoherep kahato miitꞌin me muap Tupana kapiat aikotã waikiru hẽtyhot wãtym muo hap ewy watopyhuꞌat. Meiũran Aipotypot Iesui putꞌok e mesuwat yi tote yne aiminug moherep hamo sio waku sio yt e hamo. Miꞌi hap eꞌat pe uimowepiit haria wo eipe katupono miꞌi hap eꞌat pe wuatꞌi ehamo -Miꞌiria ti uhemiit sese. Miꞌiria ti uhehay moherep haria sese e aru Iesui ehepiat. Mio tã toꞌe hawyi uimowepiit kahato hap topyhuꞌat katupono eipe uimimuꞌeria sese pote. Taꞌi arehum kahato itote katupono yt eweipun hin i einapin uhepiat hap. Miꞌi hawyi Tupana tuwehum kahato topotpap nug haria ete.
Katupono ti topotpap hawe ti surara tikyꞌesat topoꞌoro hat mowepiit hap yn toikyꞌesat. Miꞌi pote toto topoꞌoro hat mikyꞌesat nug hamuat. Saꞌawyꞌi wuat tekat koꞌi kape yt tuwewanetup i raꞌyn maꞌato tuwanetup surara akag miat topoꞌoro hap kape yn. Miꞌi hap ewy ro ereineꞌen Aipotypot piat epoꞌoro hap ewy.
Pyno uiwyriaꞌin waku watoineꞌen Tupana mepytꞌin no ipakup i rakaria ewy kurin nakaria ewy. Aikotã mihy sym haria ewy watukupteꞌen katupono Tupana mimoherep pakup i koꞌi raꞌyn aito. Miꞌi tupono waku watoiat yne aiminug koꞌi saꞌawyꞌi wuat yt naku i hap koꞌi. Mekewat miitꞌin maꞌat hap koꞌi mekewat miitꞌin mohit hap koꞌi mekewat typy sehay nug hap koꞌi mekewat iraniaꞌin ekat kyꞌesat hap koꞌi mekewat sehay saꞌag nug hap koꞌi mekewat miitꞌin ekat kyꞌesat hap koꞌi uhehayꞌywyi hap koꞌi waku watoiat yne aikotã watoiat ahesokpe yt ikahu i rakat hap ewy waku watoiat.
Maꞌato yt naku i watoineꞌen mesuwarote aikuꞌuro hap kape yt naku i nug hanuaria wo aikotã saꞌawyꞌi yt watomohey i te Iesui turan wuat ewy are. Yt naku i aipiit mikyꞌesat saꞌag watunug. Maꞌato watunug mote yt kat hamo i watoineꞌen. Waku watoineꞌen mesuwarote Tupana mikyꞌesat nug hamo Tupana mowepiit hamo are.
Pyno uito Peteru iporo rakat areineꞌen. Eiꞌapykok hat areineꞌen. Pyno uhehay teran Iesui mohey haria apykok haria pe. Worohoꞌonapin neran eipe. Uito ti Iesui potmuꞌe sese uito. Araꞌakasa yne Aikaꞌiwat ikuꞌuro hap kape. Araꞌakasa aikotã hoꞌopot hap kape. Iꞌewyte araꞌakasa Iesui wẽtem guꞌuro pywiat hap kape. Araꞌakasa Iesui Tupana motypot hawe hẽtyhot hap pyꞌasetpe araꞌakasa. Miꞌi hap ewy tuut irane. Miꞌi hap kape iꞌewyte araꞌakasa uimuꞌetu wuat ewy are.
Pyno uito Siwanu atunug mesuwat miwan. Peteru wẽ pyi atiwan yne mesuwat sehay. Uhet wyti Siwanu. Uito areineꞌen aikotã eheywyt eikywyt yt eimaꞌat hat hin i ewywuat i areineꞌen. Atipoꞌoro mesuwat Peteru miwan Peteru e hap ehewowi uimiwan miat. Yne miitꞌin tikuap uimiwan aikotã aikotã atunug hap. Taꞌi heremo kahato uimiwan kaipyi uwe uito hap. Yt iwato hin i uimiwan. Pyno pywo kahato aimuꞌe mesuwe Peteru. Uiꞌe hap ewy kahato toꞌe mesuwe. Areꞌe Peteru e hap ewy uito. Taꞌi watopyhuꞌat ahãꞌãg hap turan wahoꞌopot turan miꞌi pote watopyhuꞌat wuatꞌi eꞌat pe Tupana mipoityro koꞌi wo. Tupana aikyꞌe kahato pote waku watopyhuꞌat yꞌam me hap ewy suraraꞌin ewy. Yt karãpe i watoiat aikyꞌe hat hegyiꞌat kahato pote are.
Pyno uito Iesui potpoꞌoro 12 ok takat Iuwãu areineꞌen eheykeꞌet ewy katupono wahoꞌopot aiwoꞌoꞌewy ewy Iesui mohey haria aito pote are. Wẽtup sok yn aito. Iesui yn Aiporekuat aiꞌe pote aiꞌatusatyꞌi satyꞌi kahato iraniaꞌin. Miꞌi pote wẽtup miit yn ewy wahekatup Aikaꞌiwat putꞌok e wuatꞌi Porekuat nuat hap eꞌat. Iesui yn Aipotypot areꞌe hap etiat no uipyhyp mesuwe yi a yꞌy wato pyꞌasetpiat uiꞌapiheg hamo. Woꞌopyhyp hat ewy uinug katupono ahenoi uhehay wo Iesui ti Aiporekuat nuat areꞌe pote. Miꞌi pote uhehay monik hap kyewi uiꞌatoiat mesuwat yi a Patumu e hap tote.
Mio tã areꞌe ehepe -Eiweꞌeg wo o Tupana emiitꞌin eipe pote. Eweimohey ro yne eipyꞌa pe eikuꞌuro hap kape katupono ti aru ahatyꞌi hatyꞌi kahato woꞌopyhik hawe imohey haria aito pote. Waku wahoꞌopot aikuꞌuro hap kape. Aiꞌauka kyseꞌyp wo pykai yt naku i watoiat Iesui hap aiꞌauka iraniaꞌin imohey pote areꞌe. Ehewaure kaꞌa pote eweikuap to uiꞌe hap. Uito Iuwãu uipyhyp hawe yꞌy wato pyꞌasetpe yi a tote uiꞌatoiat mesuwe Iesui mohey hap upi.
Miꞌi hawyi Iesui toꞌe uhepe ahepe -Uito Iesui morekuat Tawi saipepiat sese aikotã ahewatꞌyp ikuꞌuro miꞌi hawyi toineꞌen iꞌypykyt hap ewy areineꞌen morekuat Tawi saipepiat meiũran iꞌyp wato kahato aru e. Uito areineꞌen aikotã mekewat waikiru tuut ihatꞌok kai i aat uut hap enoi hamuat hap ewy atimoherep Tupana uut hap e. Miꞌi hap ewy atipoꞌoro raꞌyn wẽtup ok uipotpoꞌoro atipy kaipyi yne mesuwat miwan moherep ehowawiat uimohey haria kape Iuwãu miwan myi e Iesui.
Waku kahato uhehay mohey motꞌi haria eipe e. Taꞌi yt eipo hep hin i uhehay moherep hap ete uhehay nug hap ete e. Meiũran aru torannia iãꞌãg koro hap eꞌat putꞌok e mesuwarotiaria wuatꞌi miitꞌin iãꞌãg hamo sio uhemiit sese sio yt hap kuap hap eꞌat sese maꞌato miꞌi hap eꞌat eꞌyian me worohoꞌohep mesuwat yi pyi eiperia katupono worohoꞌokuap taꞌyn uhehay nug motꞌi haria eipe hap atikuap taꞌyn e. Miꞌi pote mekewat eꞌat wuatꞌi iãꞌãg hap yt putꞌok e i eiwat ehãꞌãg hamuat e.
ကြော်ငြာတွေ