Epereu 11:27 - Sateré-Mawé

²⁷ Taꞌi mamai atimohey kahato areto meiũpepyi hawyi araꞌakasa aru Tupana sese mekewat yt heremo rakat i e. Atikuap eꞌywot uhaꞌaseꞌi Warãu Esitu piat morekuat aru ipyꞌahak kahato uhete yt uiꞌoksatꞌi i hin i maꞌato yt arekenꞌẽ i Warãu pupi e. Uiꞌauka pote uiꞌauka maꞌato areto raꞌyn Tupana mohey haria upi katupono araꞌakasa teran Tupana sese yt heremo rakat i e Muisei toty Esitu piat pe. Miꞌi hawyi totiat yne yi Esitu ekat iwato kahato hawyi tomimohey upi toto.

Epereu 11:27 ပူးပေါင်းရင်းမြစ်များ

Mateu 10:22

Yt naku kahato eipe iꞌatuꞌe aru wuatꞌi miitꞌin uimimohey haria eipe pote. Maꞌato uwe uwe uimohey te taꞌatuwanikaptia pyꞌasetpe pykai miꞌiria ti aru uimihakyeraꞌat wuaria sese wo teꞌeropyhuꞌat.

Mateu 24:13

Maꞌato uwe uwe yt ipun i uikyꞌe hap aat kaꞌap mekewat eꞌat kape miꞌi haria ti aru teꞌeropyhuꞌat Tupana miehakyeraꞌat koꞌi wuat e.

Maku 13:13

Katupono ti uimohey haria ti eipe miꞌi pote ti aru wuatꞌi iꞌatupyꞌahak ehete e. Maꞌato uwe uwe taꞌatusatyꞌi satyꞌi pykai yt uiwaure i wuatꞌi eꞌat pe miꞌi hat ti aru Tupana miehakyeraꞌat topyhuꞌat wuatꞌi eꞌat pe e Iesui.

Maku 4:17

Maꞌato yt taꞌatusopo i pote yt toineꞌen motꞌi e. Meiũran iraniaꞌin miat taꞌatusatyꞌi satyꞌi Tupana ehay mohey iꞌatuꞌe piat pote sio yt naku i hap koꞌi putꞌok iꞌatuete pote meremo taꞌatuꞌatoiat Tupana ehay e. Saꞌawyꞌi iꞌatuwepiit kahato maꞌato iraniaꞌin toꞌokyryꞌi e i hawyi meremo taꞌatuwaure raꞌyn e.

Iesui Potmuꞌeria 2:25

Haꞌawyte kahato morekuat Tawi toꞌe -Uiporekuat heremo kahato uipyꞌa pe e. Taꞌi Miꞌi toineꞌen uipo sese kai wuatꞌi eꞌat pe miꞌi pote ti yt karamuo i arekenꞌẽ e.

1 Kuriniu 13:7

Watikyꞌe sese miitꞌin pote watiꞌapykok kahato aimikyꞌe koꞌi yt naku i hap pupi. Aimikyꞌe sese watomohey potꞌi. Watikyꞌe miitꞌin mote -Woromohey en mehin mana watoꞌe. Atikuap waku pe etunug aru hap watoꞌe. Hepama kahato aipyꞌahak hap iꞌatuete watiꞌatukyꞌe sese pote.

2 Kuriniu 4:18

Pyno yt naku i watuwanetup ahepiat hoꞌopot hap mesuwarotiat kape koran wuat kape yn. Poꞌog waku watuwanetup aimowepiit hap atipy piat hap kape aikotã aru aimowepiit wuatꞌi eꞌat pe hap kape. Maꞌato koitywy yt heremo i te miꞌi. Katupono ahepiat hoꞌopot porap i hap heremo kahato koran aiwanetup hawe. Pyno poꞌog waku watuwanetup ahepiat hoꞌopot hap eꞌyian mete aikotã aru hap kape. Taꞌi yt pya hin i wyti aimowepiit hamuat wuatꞌi eꞌat piat hap eꞌat watoꞌe. Ahepiat hoꞌopot porapꞌi hawyi tokosap aru pote meremo watoꞌe.

Korosi 1:15

Tupana sese ti yt heremo i ahowawi. Miꞌi hawyi toipoꞌoro ahowawi Tosaꞌyru wẽtup ok tuwemoherep hamo Aiporekuat nuat. Imipoꞌoro Haꞌyru ti iꞌewywuat sese topyhuꞌat. Iꞌywot yt heremo pykai i maꞌato Haꞌyru wataꞌakasa hawyi watikuap taꞌyn Haꞌyru hawyi watikuap taꞌyn Toꞌywot ewy raꞌyn hap. Miꞌi hawyi yt heremo i rakat heremo raꞌyn. Haꞌyru ti poꞌog naꞌyn torannia iraniaꞌin kai ipotputꞌok e. Torannia Tupana minug kai ipotputꞌok e. Poꞌog naꞌyn yne ieineꞌen haria hewyry rakaria yi totiat atipy piat kai poꞌog Haꞌyru.

1 Timoteu 1:17

Uruꞌywot Tupana uruimotypot aat kaꞌap En iꞌatuꞌe. Urupotypot koro wuatꞌi eꞌat piat En iꞌatuꞌe Tupana piat uhehakyeraꞌat hap upi. Yt karãpiat i weityk hat En iꞌatuꞌe. Miitꞌin yt teꞌeraꞌakasa kuap i ewowi rakat En. Wẽtup Tupana yn ereineꞌen. Miꞌi rẽ yt kat i hin i Tupana toineꞌen iꞌatuꞌe hap upi. Miꞌi urumimotypot kahato En. Wuatꞌi kawiat poꞌog ikahu rakat En. Iꞌewyte wuatꞌi eꞌat piat ieineꞌen hat En paĩ iꞌatuꞌe taꞌatukuap Tupana piat uhehakyeraꞌat hap hawyi.

1 Timoteu 6:16

Aito ti yne ikuꞌuro rakat nuaria aito maꞌato Iesui ti wuatꞌi eꞌat piat ieineꞌen sese hanuat raꞌyn teiam hẽtyhot kahato rakat pe. Yt uwe i tehaꞌat kuap howawi. Yt uwe i tokosap kuap heiam hẽtyhot rakat kape. Yt uwe i tehaꞌat kuap mesuwarotiat teha wo. Aheha yt putꞌok e i aiꞌakasa hamo. Pyno toꞌiro Iesui watimotypot katupono wuatꞌi kawiat hesaika rakat Miꞌi. Wuatꞌi eꞌat piat ieineꞌen hat miꞌi. Miꞌi tupono waku watimotypot Miꞌi.

Epereu 10:32

Watomohey saꞌawyꞌi Iesui hawyi ahehakyeraꞌat hap topyhuꞌat kahato ahete. Miꞌi hap eꞌat pe ahewyry waku pe kahato heremo yne Tupana aiwanetup hawe. Aiwepiit hap yn ahete. Miꞌi hawyi miitꞌin teꞌeruwekyryꞌi kahato ahete e. Miꞌi hawyi ahatyꞌi hatyꞌi kahato miꞌiria. Miꞌi hap wahoꞌopot kahato.

Epereu 11:1

Karãpe watomohey sese Tupana hawyi tuut kahato aimiẽtup Tupana kaipyi. -Atikuap kahato uipyꞌa pe tuut wyti aru uimiẽtup Tupana po pyi watoꞌe imohey hap wywo aiwanetup hawe yt toineꞌen i te aipo pe pykai yt heremo i te maꞌato watomohey kahato toineꞌen naꞌyn hap hawyi heremo rakatno topyhuꞌat aipyꞌa pe hap ewy. Watomohey te yt heremo i te pykai aimimohey. -Toineꞌen naꞌyn mesup watoꞌe yt heremo i te pykai hawyi tuwemoherep ahepiat imohey hap oktan Tupana po pyi hawyi heremo aimimohey oktan.

Epereu 11:13

Taꞌi saꞌawyꞌi wuaria Aseꞌi Apeu Nuꞌe Aparãu Inoki hary Sara ti Tupana mohey potꞌi kahato haria. Taꞌatumohey kahato taꞌatukuꞌuro hap kape. Yt heremo i te -Atunug aru e Tupana piat hap turan pykai taꞌatumohey te. Taꞌatukuꞌuro hap turan teꞌeraꞌakasa hap ewy taꞌatuwanetup hawe Tupana tunug aru e hap. Yt tutunug i te toꞌe hap ewywuat pykai taꞌatumohey kahato taꞌatupyꞌa pe. Taꞌi uruto yt mesuwarotiaria imohey haria ewy hin i iꞌatuꞌe. Wẽtup ywania ewywuaria aito iꞌatuꞌe. Ihamanaꞌi rakaria ewywuaria uruto mesuwe iꞌatuꞌe. Wẽtup yi kat haria ewywuaria uruto iꞌatuꞌe.

Epereu 6:15

Maꞌato Tupana yt meremo hin i hum toꞌe hap ewy. Miꞌi pykai toimohey potꞌi Aparãu. Yt ipun hin i -Atunug aru e Tupana piat hap. Miꞌi hawyi tuwemoherep taꞌyn haꞌyru Isaki Tupana e hap ewy.

Tiaku 5:11

Miꞌiria saꞌawyꞌi tokokaꞌat raꞌyn hoꞌopot hap sakpo. Miꞌi tupono koitywy Tupana miꞌatuewaku koꞌi wo tukupteꞌen eimiꞌatumotypot no raꞌyn tukupteꞌen. Watikuap taꞌyn ti aikotã nimo ahaꞌaseꞌi Io hoꞌopot potꞌi kahato hap maꞌato yt toiwaure hin i Tupana mohey tepiat hap. Imohey motꞌi hap poꞌog iwato hoꞌopot hap kai. Miꞌi pote hoꞌopot kahato hap sakpo tokosap aseꞌi Io. Miꞌi pote Tupana mipoitynug wo raꞌyn topyhuꞌat. Uiwyriaꞌin Tupana tikuap kahato ahepiat hoꞌopot hap. Taꞌi Aikaꞌiwat aikyꞌe kahato tohatyꞌu kahato ahepiat hoꞌopot hap.

1 Peteru 1:8

Taꞌi atikuap kahato Iesui uito katupono araꞌakasa uito maꞌato eiperia yt eweiꞌakasa i eheha wo Aikaꞌiwat Iesui. Maꞌato yt eweiꞌakasa pykai i eweimohey kahato raꞌyn. Miꞌi hawyi eimowepiit hap kahato toineꞌen imohey hap kaipyi. Mekewat wepiit hap Iesui tum tomohey hap kaipyi. Waku kahato mekewat. Yt watimoherep kuap i miitꞌin me Iesui piat aimowepiit sese hap. Ahowapy kahato Iesui motypot hap wywo miꞌi pote aimowepiit kahato poꞌog torannia kai. Yt heremo i maꞌato aipyꞌa pe toineꞌen aimikyꞌe sese aimimohey Iesui are.