Epereu 10:32 - Sateré-Mawé

³² Watomohey saꞌawyꞌi Iesui hawyi ahehakyeraꞌat hap topyhuꞌat kahato ahete. Miꞌi hap eꞌat pe ahewyry waku pe kahato heremo yne Tupana aiwanetup hawe. Aiwepiit hap yn ahete. Miꞌi hawyi miitꞌin teꞌeruwekyryꞌi kahato ahete e. Miꞌi hawyi ahatyꞌi hatyꞌi kahato miꞌiria. Miꞌi hap wahoꞌopot kahato.

Epereu 10:32 ပူးပေါင်းရင်းမြစ်များ

Iesui Potmuꞌeria 26:18

Woropoꞌoro en wuatꞌi miitꞌin kape e. Miꞌiria tukupteꞌen aikotã yt ihapytig i rakaria ewy katupono yt karãpe i teꞌeraꞌakasa te Tupana taꞌatupyꞌa pe yt taꞌatumohey i pote. Miꞌi pote woropoꞌoro en iꞌatumoehapytig hamo mekewat iꞌypyrywiat hap kaipyi uheꞌariãty hot kapiat iꞌatumoꞌakasa hamo e. Mesuwarotiaria yt uimohey i te haria yne ahiag po pywiaria tukupteꞌen e. Miꞌi pote woropoꞌoro en ahiag pohari hamo e. Miꞌi hawyi ti aru uipo piaria wo raꞌyn miꞌiria tukupteꞌen uhyt e uhepe itote e. Miꞌi hawyi ti aru wakuaria uimepytꞌin no raꞌyn teꞌeropyhuꞌat e. Uimohey haria ti aru uhaꞌyruꞌin uhakiꞌytꞌin sem koꞌi myꞌasetpe ahytmoi wuatꞌi eꞌat pe etiꞌatumuꞌe uhetiatno hawyi e uhepe. Miꞌi tã ti aru atunug uhyt e uhepe mekewat muap upi tawa Tamaku kapiat uhewyry turan e Pauru.

Humanu 12:12

Tupana tunug aru toꞌe hap ewy paĩ an watoꞌe. Mio tã watoꞌe pote aimowepiit hap topyhuꞌat aikotã Tupana wepiit hap ewy. Watimohey pote putꞌok e ahete hoꞌopot hap niatpo kahato hap. Miꞌi hawyi waku watoineꞌen motꞌi aiperup i hap wywo. Waku wahekatup tokosap aru hap -Yt watoiat hin i imohey hap aiꞌe hap wywo. Miꞌi pykai waku ahehay Tupana wywo aat kaꞌap aikope aikope ahewyry hap upi.

2 Kuriniu 4:6

Saꞌawyꞌi sese iꞌypyryp sese turan Tupana toꞌe -Ereineꞌen no hẽtyhot hap e. Miꞌi hawyi toineꞌen naꞌyn hẽtyhot hap. Koitywy miꞌi hap ewy tutunug aiwanetup hawe. Aipotypot Iesui Tupana eꞌariãty ewywuat toineꞌen. Karãpe watomohey Iesui hawyi Tupana heremo topyhuꞌat aiwanetup hawe -Worokuap kahato En mesup Tupana watoꞌe. Esaꞌyru En wẽtup miit ewy yn watoꞌe. Koitywy watikuap ewaku hap watoꞌe.

Wiripu 3:16

Karãpe watiꞌaparap miꞌi hap aru Tupana timoherep ahepe aiminug saꞌag hap koꞌi. Waku wateput aimikuap ewy Iesui mikyꞌesat hap oktan. Miꞌi turan Tupana aipowyro tesaika hamo seput poꞌog saꞌawyꞌi wuat kawiat haria wo.

Korosi 2:1

Manaꞌin uhytꞌiꞌin tawa Korosi piaria haꞌawytepyi mesup te ahoꞌopot kahato uipyꞌa pe ehetiatno. Uhehay kahato Tupana pe ehetiatno katupono worohoꞌonug neran eipe Aikaꞌiwat emiit no imohey sese haria wo. Maꞌato yt ehepe yn i ahenoi teran maꞌato iꞌewyte iꞌatu kahato yt uiꞌakasa i te haria iꞌewyte tawa Irautiseia piaria kape hap ahẽtup aat kaꞌap Tupana pe.

Epereu 12:4

Iesui tikuap kahato yt naku i nug hap. Yne tosuu toipun yt naku i hap moma hamo. Waku miꞌi ewy watopyhuꞌat aiꞌauka pote waku ahuu okpun pykai yt watoiat i imohey hap. Waku wahãꞌãg Iesui ewy hoꞌopot hap ete yt naku i hap koꞌi akit hamuat.

Epereu 5:12

Motꞌi eweikupteꞌen Iesui mohey haria pykai -Urumuꞌe i ro eweiꞌe yn yt uruikuap i te ti urumuꞌe hap Tupana eha etiat eweiꞌe aat kaꞌap haria eipe. Are paĩ koitywy ti waku raꞌyn miitꞌin muꞌe haria wo eweikupteꞌen maꞌato ti yt itag i te Tupana ehay kuap hap etiaria eiperia are. Miꞌi hawyi ikuap perup i haria eweikupteꞌen. Miꞌi pote miitꞌin mimuꞌe wo te neꞌi eweikupteꞌen. Miꞌi pote -Uruiwaure raꞌyn saꞌawyꞌi te wuat urumuꞌe hap e haria wo eipe. Miꞌi pote urumuꞌe i ro mehin mana mekewat saꞌawyꞌi wuat sehay Tupana etiat ehenoi i ro uruepe eweiꞌe. Aikotã hirokat ihire te rakat ewy eweikupteꞌen Tupana ehay kuap hap ete. Aikotã aimepyt hit yt tenuk kuap i iheg kahato rakat ete hap ewywuat kahato eweikupteꞌen Tupana ehay u hap ete. Aikotã aimepytꞌin mi hy yn ikyꞌesat hap ewy eweikupteꞌen. Tupana ehay miꞌu puꞌi ewywuat u hap ete yt eweikuap kuap i.

Epereu 6:10

Taꞌi Tupana hãpyk kahato. Yt karãpe i toiwaure tokyꞌe hap eipotpap tomotypot ehepiat hap etiat e. Yt toiwaure kuap i eiminug wakuat tomotypot etiat hap Tupana pote. Yt karãpe i toiwaure temiitꞌin powyro hap tomotypot tokyꞌe ehepiat hap kaipywiat koꞌi.

Epereu 6:4

Iesui toineꞌen aipyꞌasetpe turan aiꞌywania tuwat kahato Aikaꞌiwat ehay upi -Pywo iꞌatuꞌe saꞌawyꞌi Iesui e hap ete hawyi paa iꞌatuꞌe taꞌatuminug saꞌag ete hawyi iꞌatuwepiit kahato mekewat kuap pakup hap ete. Tupana Miium Iesui taꞌatuiãꞌãg sio waku sio yt hap ete sio Tupana ehay ihay sio yt hap kuap hamo taꞌatuiãꞌãg. Miꞌi turan Tupana Paꞌãu wakuat iꞌatumuꞌe kahato aiꞌywania Iuteuria. Miꞌi hawyi teꞌeropyhuꞌat Tupana Wakuat Paꞌãu eiam wo.

2 Iuwãu 1:8

Waku aiweꞌeg wo o miꞌiria pupi katupono taꞌatukyꞌesat kahato watuwat iꞌatuehay upi. Watuwat miꞌiria ehay upi pote watoiat raꞌyn aimimohey Iesui etiat. Iꞌatuehay upi watuwat hawyi yt naku i pe watopyhuꞌat. Yt kat i aipotpap hap saꞌup topyhuꞌat Tupana kaipyi. Miꞌiria ehay -Iesui ti yt miit puꞌi kawiat i yn iꞌatuꞌe ahepe. Tupana yt tuwepuꞌi nug i iꞌatuꞌe ahepe saꞌag. Miꞌi hawyi watuwat iꞌatuehay upi hawyi yt kat i saꞌup toineꞌen aru Tupana kaipyi mekewat eꞌat pe mekewat aipotpap saꞌup.

Iesui Aru E Hap 2:5

Pyno eiwanetup o aikotã saꞌawyꞌi wuat uikyꞌe haty wo ehepiat hap kape uimikyꞌeria e. Mesup uikyꞌe hap waure haria wo eweikupteꞌen e. Eweiꞌaipok to uhowowi i uikyꞌe pote areꞌe ehepe maꞌato yt pote ariot eheꞌariãty sasep hamo e. Miꞌi hawyi iꞌypyryp hap yn toineꞌen itote e. Koitywy 7 ariãty toineꞌen maꞌato ahasep hawyi ti aru eiwat pote iꞌypyryp yt naku i topyhuꞌat e. Eweiꞌaipok to uhowowi areꞌe ehepe tawa Ewesu piaria e.

Iesui Aru E Hap 3:3

Uimohey haria saꞌawyꞌi uhehay sat kahato haria eipe e. Saꞌawyꞌi ehewaure kaꞌa yn uhehay kape maꞌato mio yt e. Tawa Saratu piaria eweiꞌaipok to uimohey hap kape aikotã eweimoheg eheha peꞌok hap ewy eweimoheg uimohey hap ehepiat katupono ariot ehewowi aikotã seroꞌok e hat ewy. Waku surara ewy eweikupteꞌen maꞌato yt pote yt eweikuap hin i uhuut hap e. Pyno eiwehymut ro katupono eiket kai putꞌok are sereꞌokꞌe hat ewy e.