Uito ti worohoꞌosetꞌok yꞌy wo neꞌi. Urutoiat yne raꞌyn uruminug saꞌag yt nakuat i hap koꞌi eiꞌe moherep hap. Maꞌato Uhaipe piat tuut rakat wyti aru ehetꞌok Tupana Paꞌãu wakuatno raꞌyn iꞌewyte aria wo raꞌyn. Taꞌi miꞌi miit ri poꞌog poꞌog uikawiat wakuat are e. Uiat uhewaku hap ti yt putꞌok e hin i hemiit ipysei hamo ipy sokpe pag hamo e.
Epereu 10:22 - Sateré-Mawé22 Pyno toꞌiro Tupana kape uiwyriaꞌin. Waku watipun ahehay aheso hap koꞌi wateke Tupana wywuat piat hamo. Waku yt kat i aipyꞌa piat aheso hap. Miꞌi hawyi yt kat i aimowemoti hap wywo wateke. Toꞌiro pyno Tupana ewowi. Waku watipen aiwanetup hap aipyꞌa piat Iesui suu wo. Waku Iesui aipyꞌa sei hap Tupana tunug suu wo wateke. Waku yt kat i aiwanetup hap saꞌag aimoti hap wywo i waku wateke. Waku watuwei kahato mekewat yꞌy wakuat sese wuatꞌi eꞌat piat wat pe. Miꞌi hawyi waku wateke aipyꞌa sei hap wywo aikoho hap mywo aipiit toran koho hap mywo yn waku wateke Tupana ewowi uiwyriaꞌin. အခန်းကိုကြည့်ပါ။ |
Epereu 10:22
66 ပူးပေါင်းရင်းမြစ်များ
Mio tã e hawyi haryporia erut haria iꞌauka teran haria tuwat i raꞌyn Iesui kaipyi teꞌeruwemoti te kahato iꞌatuminug saꞌag koꞌi yt uwe i mikuap koꞌi pote tuwat. Yian me nagnia saꞌawyꞌi tuwat hawyi watꞌypmo kurum iwasuria raꞌyn tuwat. Tuwat yne hawyi topyhuꞌat Iesui yn naꞌyn mekewat iꞌatumierut haryporia yt iweꞌeg i rakat wywo.
Miꞌi haria miꞌi nug ewywuat haria sok aito saꞌawyꞌi maꞌato koitywy Tupana timoweityk aiminug saꞌag koꞌi aheko yt naku i nug hap saꞌawyꞌi wuat. Miꞌi hawyi ainug naꞌyn temiit sese wo. Koitywy yt kat i saꞌag Tupana tipuẽti aikai Aikaꞌiwat Iesui miehakyeraꞌat koꞌi aito pote. Aikaꞌiwat ainug naꞌyn Tupana watnuaria wo hawyi tutum Topaꞌãu ahepe hawyi.
Eiꞌywot areineꞌen e Tupana ahepe. Worohoꞌomuꞌe eipe uimepytꞌin wo aheTupana Koro e. Miꞌi pote uimikyꞌe koꞌi eweipyhuꞌat e Tupana ahepe. Pyno waku watuwehik kahato Tupana ete imepytꞌin aito pote. Waku watimotypot kahato Aiꞌywot Koro yt kat i aiminug saꞌag wywo. Waku watokenꞌẽ ahepiat inug saꞌag hap pupi kat pote Tupana ehamo watoineꞌen pote. Yt naku i watuwat aipiit mikyꞌesat saꞌag upi neꞌi iꞌewyte aiwanetup saꞌag hap upi neꞌi. Yt naku i watuwanetup poꞌog ahetupanaria saꞌawyꞌi wuat kape neꞌi. Waku watoꞌe Tupana pe -Uiminug saꞌag koꞌi aikotã uipiit ipit pit sese hap ewy. Miꞌi hap ewy uiwanetup hap ipit pit kahato. Uipiit pit ok hap pote aremoti kahato uiminug saꞌag pupi waku watoꞌe Tupana pe.
Mekewat eꞌat pe ahiag koꞌi eso eso hap upi pywo iꞌatuꞌe ahiag eso hap ete. Miꞌi tã e haria heso heso rakaria aimaꞌatꞌi maꞌatꞌi hanuaria. Yt taꞌatuhenoi teran hin i sehay pywuat taꞌatukuap sehay pywuat pykai. Saꞌawyꞌi iꞌatuwanetup hawe sehay toineꞌen -Ehenoi ro pywo rat e hap toineꞌen maꞌato koitywy yt kat i raꞌyn iꞌatukai iꞌatuwewaĩ hap katupono ti taꞌatuhep taꞌyn mekewat iꞌe hap taꞌatuwenapin hap teꞌeruwanetup hawiat. Koitywy yt kat i iꞌatuwemoti hap taꞌatuꞌeso atuꞌeso hamo.
Taꞌi Tupana yn ti Ahehakyeraꞌat kuap hat. Aito ti yt watiꞌatuehakyeraꞌat kuap hin i aiwewi. Iꞌewyte aiminug wakuap koꞌi ti yt putꞌok e i ahehakyeraꞌat hamuat kyiꞌat hamo. Tepiat ahehakyꞌeꞌi hap kaipyi yn ti Tupana ahehakyeraꞌat kuap. Iꞌewyte aiminug saꞌag ipit pit kahato hap koꞌi Tupana yn ikoho kuap. Iꞌewyte ti tutum ahepe Topaꞌãu Wakuat Sese raꞌyn. Miꞌi hawyi ti tosaꞌyruꞌin no tosakiꞌytꞌin no ainug Topaꞌãu wo. Miꞌi hawyi ti koitywy ipakup i rakaria wo raꞌyn watoineꞌen. Tupana tunug ni tuweran miꞌi tã hap ahetiat tuwepyi.
Waku kahato saꞌawyꞌi wuat Muisei miwan aiꞌywaniaria Epereu pusu kuap haria moweꞌeg hamo katupono tohenoi tomiwan me -Tuut aru Ahehakyeraꞌat hat e. Yne Muisei miwan ete aimuꞌe -Waku aru waku aru tuut wyti aru Tupana Mipoꞌoro uito ewywuat maꞌato poꞌog waku rakat e kahato maꞌato hãꞌãkap ewy ihay ahehakyeraꞌat hamuat ete. Aikotã aipaꞌãu aiꞌewy toineꞌen yi tote miꞌi hap ewy toimoherep Iesui aiꞌakag Muisei. Yianmiat miwan me tohenoi yne Iesui etiat aikotã wẽtup ok paꞌãu aat kape tuut heremo yt heremo kahato i wen maꞌato toꞌewy ipaꞌãu wywo hap ewy toimoherep Iesui yian mete ahaꞌaseꞌi Muisei miwan yt heremo kahato i rakat pe. Hãꞌãkap wuat Muisei henoi yne Iesui ieineꞌen hap ete ikuꞌuro hap ete iꞌewyte toineꞌen i guꞌuro pywiat hamuat hap ete. Saꞌawyꞌi ahaꞌaseꞌi Muisei tiꞌatuꞌuka kahato aihũria aikawiatno Iesui auka hap moherep hamo. Miꞌi ti imoherep kahato poꞌog wakuat uut hamuat ete. Katupono yne 12 ewaty pe taꞌatuꞌatuꞌuka taꞌatuehũria Tupana piat taꞌatumoewaku hap puẽti hamo wen maꞌato yt taꞌatupuẽti hin i. Maꞌato miꞌi hap nug hap kaipyi teꞌeruwanetup Tupana hũ sese kape taꞌatuehakyeraꞌat sese hamuat kape yian mete ipaꞌãu ewy tukupteꞌen taꞌatuhũria.
Miꞌi tupono koitywy yt watokenꞌẽ i Tupana kapiat ahehatꞌat hamo ahehay hamo. Taꞌi uiwyriaꞌin koitywy yt watokenꞌẽ hin i raꞌyn Tupana eiam kapiat ahehatꞌat hamo. Iesui suu aipo pe raꞌyn pote aipit pitꞌok yne hamo aipyꞌa koho yne hamo pote -Waku raꞌyn meiẽwat teke ahowawi Papai e Iesui ahepiat pe Toꞌywot pe. Miꞌi pote waku wateke Tupana eiam sese pe yt kat i aimokenꞌẽ hap wywo.
Saꞌawyꞌi Tupana toꞌe Muisei pe -Atipoꞌoro aru uhesurara atipy kaipyi Esituꞌin apiheg hamo e. Miꞌi eꞌat pe atiꞌatumoma Esituꞌin eꞌykeꞌetꞌin torannia e. Miꞌi pote waku eihũria suu wo etiꞌatusapei sapei eiꞌyat okenꞌypy ete e. Miꞌi ewetunug mote aru yt atimoma i eheykeꞌetꞌin e. Miꞌi hawyi Muisei tunug Tupana e hap ewy toimohey kahato pote. Toimohey kahato Tupana e hap hawyi toꞌe toꞌywania pe -Tuut aru ykeꞌet yne moma hanuat e. Miꞌi pote waku watopyhuꞌat aihũ suu aiꞌyat ete Tupana mohey haria aito hap kuap hamo e. Miꞌi watunug mote tokosap aheykeꞌetꞌin sakpo hawyi yt toiꞌatumoma aheykeꞌetꞌin surara akag atipy kaipywiat e Muisei tomohey hap wywo. Miꞌi hawyi taꞌatunug suu yne yat okenꞌypy ete hawyi yt wẽtup ok i ikuꞌuro Tupana mohey piaria eꞌykeꞌetꞌin maꞌato yi Esitu eꞌykeꞌetꞌin topap yne itote.
Pyno koitywy yt saꞌawyꞌi i yityꞌok Sinai yt kape hin i aikope ainapin Muisei piat hap ewy watuwat. Watuwat mesup aito maꞌato poꞌog saꞌawyꞌi wuat kawiat kape aikope Iesui ainapin hap kape watuwat raꞌyn mesup mekewat yityꞌok atipy piat kape katupono Ahepaꞌi Koro Iesui tunug Tupana wywuat aiwoꞌowese hamuat hap atipy pe. Mesup ahehay toimoherep Tupana pe. Iesui ti aimowehik Tupana wywuat hat. Saꞌawyꞌi Atãu saꞌyru Apeu suu aat hat ihay Tupana kape yi pyi hap ewy e miwan me. Miꞌi hap ewy mesup Iesui suu ihay ahetiatno maꞌato poꞌog miꞌi sehay ikahu Apeu suu aat hat kai -Etiꞌauka ro uiꞌauka hat e Apeu suu maꞌato Iesui suu toꞌe Tupana pe -Waure wo o ereineꞌen uiꞌauka haria kai Papai e. Yt taꞌatukuap i rat kat som taꞌatunug e Iesui suu aat hat ihay yi pyi te. Iesui suu wo waku watuwepen yne aiminug saꞌag moweityk hamo. Waku Tupana ahapei hapei Tosaꞌyru suu wo. Miꞌi yn waku ahehakyeraꞌat kuap hamo.
Miꞌi pote waku watuwat Tupana kape yt aikenꞌẽ wywo hin i yt kat i aiwemoti hap wywo katupono toineꞌen aiwywo Ahepaꞌi Koro. Miꞌi pote ti hegyiꞌat kahato Tupana ahepe Ahepaꞌi Koro kyꞌe haype Ahepaꞌi Koro emiit no watoineꞌen mote. Wahenoi yne aiminug saꞌag tope pote meremo topyhuꞌat waure wo. Watikyꞌesat aipowyro hap hoꞌopot hap eꞌat piat pote waku merep wahenoi tope. Wahẽtup hawyi meremo tutum neꞌen neꞌi aipowyro hap. Iꞌewyte satek hap saty monik hamo wahẽtup pote meremo tutum ahepe tehakyꞌeꞌi hap. Taꞌi hegyiꞌat kahato ahepe katupono Haꞌyru Ahepaꞌi wo toineꞌen pote. Toineꞌen atipy pe ahehay moherep Toꞌywot piat hatno Ahepaꞌi. Miꞌi hawyi Iꞌywot aimoesaika kahato kat e hap kat e hap niatpo kahato rakat ahete hap turan aimoesaika kuap kahato e.
Saꞌawyꞌi wuat ahepaꞌi aimotag teran tehay wo saꞌawyꞌi wuat ainapin hap koꞌi ete. Toimopakup teran yne maꞌato mekewat saꞌawyꞌi wuat waku wen maꞌato yt hesaika i aimowaku hamo. Yt aimoperupꞌi kuap i mekewat Muisei piat ainapin hap. Yt aimohãpyk kuap i yt watunug i pote. Watiꞌaparap yne miꞌi hap koꞌi ete pote. Paꞌi Muisei waĩꞌe hap upi yt kat i muap Tupana kapiat hap katupono yt watunug kuap i yne Muisei piat ainapin hap koꞌi pote. Maꞌato watomohey Paꞌi Koro wo Iesui hawyi meremo watikuap Tupana.
Yt putꞌok e hin i Muisei e hap watunug yne pykai. Watunug yne aipe aipiit aimiꞌu aheko Muisei ainapin hap ewy wen maꞌato miꞌi kaipyi yt kat i muap watipuẽti Tupana kape. Haty te aipyꞌa pe. Aiminug saꞌag moweityk hap yt kat i watipuẽti pote haty te aiwanetup hawe. Miꞌi turan putꞌok e muap aimohãpyk sese Tupana wywuat hamuat. Haꞌyru suu mohag kahato aimowepiit hamo aiminug saꞌag moweityk hamo. Miꞌi hawyi muap toineꞌen Tupana kape Tosaꞌyru minug kaipyi. Mesup -Waku kahato eipe e raꞌyn Tupana ahepe watomohey hawyi. Mekewat haty monik hap topyhuꞌat raꞌyn ahete watomohey Iesui pote.
Saꞌawyꞌi aimuꞌe kahu yne hawyi ahepaꞌi Muisei tat raꞌyn tekuiꞌa hawyi toiꞌauka mekewat Wewato ahup mepyt hit koꞌi aihũria hit koꞌi hawyi huu toipag kuiꞌa pe. Miꞌi hawyi totat aihũ Kaneiru sap amukiusu ap ewywuat ihup takat hawyi toipoꞌi mekewat ariaꞌyp ãpo ete hawyi toipuka suu yꞌy puat pe. Miꞌi suu wo sapei sapeiꞌe miitꞌin ete. Iꞌewyte suu wo sapei sapeiꞌe mekewat Tupana miwan ete. Miꞌi hawyi yne tomimuꞌeria toiꞌatusapei sapei raꞌyn.
Imohey kahato hap wywo yn waku wahẽtup aimoweꞌeg hamuat wahẽtup Tupana pe. Yt naku i wahẽtup Tupana pe imohey ran hap wywo. Maꞌato karãpe wahẽtup imohey ran hap wywo neꞌi pote ahehay yt aiwesat i wyti aru imohey ran nywo neꞌi wahẽtup wote. Yt naku i imohey hap kowoꞌi kowoꞌi aiwanetup hap mywo wahẽtup. Maꞌato miꞌi hap wywo wahẽtup pote watopyhuꞌat aikotã yꞌy hyemyi piat ewy neꞌi aiwanetup hap. Aikowo aikowo wasere wato upi hap ewywuat watoineꞌen aiwanetup hawe imohey hap upi. Yt naku i are.
Pyno karãpe watikyꞌesat watukupteꞌen Tupana wywo miꞌi pote waku watuwat Tupana kape aimikyꞌesat ẽtup hamo. Aiwanetup hap kaipyi aipyꞌa pyi ahehay hawyi tuut ahowawi aimikyꞌesat ewy. Miꞌi hawyi aikotã watuwei aipit pit potiat hap ewy raꞌyn yꞌy pe waku miꞌi hap ewy waku watoꞌe Tupana pe -Uiꞌywot uikoho Esaꞌyru suu wo uimiꞌaparap saꞌag koꞌi waku watoꞌe. Uipo ti iminug yt naku i hap koꞌi pote uipo ipit pit hap ewy. Miꞌi pote etikoho uipo yt naku i nug hap hep hamo waku watoꞌe. Uiꞌywot atipy piat pe uiwanetup hap uipyꞌa piat typy sehay potiat uipiit yt naku i topyhuꞌat. Miꞌi pote etikoho kahato uhepiat iꞌaparap hap koꞌi yne waku watoꞌe Tupana pe.
Saꞌawyꞌi sese ti Aiꞌywot atipy piat Tupana aiꞌairo Tosaꞌyru sese eropat hanuaria wo. Mesuwat yi eꞌyian mete Tupana aikuap kahato yt uwe i te aitoria mesuwarotiaria pykai aikuap yne. Pywo ti rat saꞌawyꞌi Tupana toꞌe tuwepe -Meiũran ti aru atipoꞌoro Uhaꞌyru sese wuatꞌi miitꞌin uiminug koꞌi Potypot nuat e tuwepe. Uwe uwe aru topyhuꞌat Uhaꞌyru mohey haria wo miꞌiria ti aru uimimoewaku koꞌi wo tukupteꞌen. Katupono Uhaꞌyru suu wo atiꞌatumoewaku miꞌiria hawyi Uipaꞌãu Wakuat atum iꞌatupiit piat ieineꞌen hanuat e Tupana tuwepe nimo te yt kat i te tutunug ne turan. -Miꞌi hawyi Uipaꞌãu yne iꞌatupiit puo atopag iꞌatumoewaku hamo e ahepe. Miꞌi hawyi atikyꞌesat kahato imohey haria imikyꞌesat yne nug haria wo hap etiat atikyꞌesat. Miꞌi hap atikyꞌesat e Tupana Aiꞌywot koro saꞌawyꞌi sese atipy piat pe.
Miꞌi hap ewy kahato ahetꞌok hap topyhuꞌat. Yꞌy piat wateke aikotã Iesui ikuꞌuro hap ewy. Watuwẽtem yꞌy pyi hawyi aikotã Iesui tuwẽtem guꞌuro pyi hap ewy watoineꞌen. Maꞌato mekewat yꞌy yt aikoho kuap i aipit pit ok hap aiminug saꞌag koꞌi maꞌato ahetꞌok hap watunug hawyi yt kat i haty hap aiwanetup hawe kat pote Tupana mikyꞌesat ewy watunug aikotã Nuꞌe ewy yꞌy sakpo watuwat aheꞌyara puo hap ewy.
Tupana Esaꞌyru sese Iesui kaipyi ahẽtup etipoityro emohey haria. Etum no iꞌatuepe i woꞌowese hap are epe. Wuatꞌi Porekuat no En poꞌog poꞌog iraniaꞌin kai are. En ni wuatꞌi eꞌyian mete wuat guꞌuro pywiat ieineꞌen i hat. En ni pywo yn e hat. Iesui En ni urukyꞌe hat sese katupono Esuu wo urupiit pit hap etikoho yne torannia uruminug saꞌag are. Ekuꞌuro hap urukawiatno hap.
ကြော်ငြာတွေ