Epereu 1:2 - Sateré-Mawé

² Maꞌato mesup te Tupana aimuꞌe Tosaꞌyru wẽ pyi. Koitywy tuwemoherep ahepe Tosaꞌyru ieineꞌen hap upi Tosaꞌyru minug upi Tosaꞌyru ehay hap upi tuwemoherep mesup. Yt nimo te wuat aimuꞌe hap ewy hin i raꞌyn tutunug mesup katupono Tosaꞌyru po wo Tupana tunug wuatꞌi mesuwarotiaria. Atipy totiat aat waty waikiru koꞌi Tosaꞌyru po wuat iminug koꞌi. Miꞌi tupono ti tutum yne meimewat koꞌi torannia Tosaꞌyru pe. Mesuwat torannia yne meimewat -Ewatno e. Pyno ereineꞌen no Mesuwat Yne Kaꞌiwat no e.

Epereu 1:2 ပူးပေါင်းရင်းမြစ်များ

Mateu 13:39

Maꞌato mekewat hewanikap mikoi iꞌanam wyti topyhuꞌat ahiag mikoi maꞌato mekewat iterek hap eꞌat putꞌok e turan wyti iterek hanuaria atipy piaria Tupana emiitꞌin.

Mateu 17:5

Mio tã e Peteru ihay turan ywyhig putꞌok e imohit kahato rakat putꞌok e hawyi yt heremo i tukupteꞌen itote. Miꞌi kaipyi tuut sehay mio tã e hap -Meiẽ ti Uhaꞌyru uimikyꞌe kahato uimowepiit sese hat. Pyno waku eweiwanetup kahato o kat e som iꞌe hap kape

Mateu 21:38

Miꞌi hawyi so putꞌok e raꞌyn watꞌypmuat hawyi yi wato imipuru apykok haria teꞌerahaꞌat hewowi hawyi teꞌeroꞌe toꞌope -Meiẽ raꞌyn ti tuut yi kaꞌiwat saipepiat iꞌatuꞌe. Pyno waku watiꞌauka meiẽwat haꞌyru hawyi iꞌywot mikoi ypia aiwatno topyhuꞌat iꞌatuꞌe toꞌope.

Mateu 26:63

Maꞌato yt kat e hin i. Miꞌi hawyi paꞌi koro toꞌe i -Ehenoi ro Tupana Saꞌyru En hap Miitꞌin Porekuat nuat hap sio apo yt e.

Mateu 28:18

Miꞌi hawyi Iesui tuut iꞌatuewowi hawyi iꞌatupyꞌasetpe toineꞌen heremo kahato. Miꞌi hawyi toꞌe itotiaria pe -Koitywy Tupana tum yne raꞌyn tesaika hap uhepe e. Miꞌi hawyi Wuatꞌi Miitꞌin Porekuat koro wo areineꞌen atipy pe iꞌewyte mesuwat yi tote e.

Mateu 3:17

Miꞌi turan toikuap sehay atipy kaipyi -Meiẽ ti Uhaꞌyru sese uimikyꞌe kahato e. Uimowepiit kahato hat e.

Maku 1:1

Mesup mienoi wakuat ti Aipotypot Iesui etiat Tupana saꞌyru etiat aikotã saꞌawyꞌi te Tupana tipoꞌoro tosaꞌyru meiko wo mesuwat mytyyp kape miitꞌin ehakyeraꞌat hamo.

Maku 12:6

Miꞌi hawyi haꞌyru yn naꞌyn topyhuꞌat imikyꞌe kahato. Miꞌi ti maꞌato toipoꞌoro -Taꞌi uhaꞌyru sese tupono ti aru taꞌatumotypot kahato raꞌyn Miꞌi Miit paĩ e so tuwanetup hawe e.

Maku 12:7

Maꞌato ti yt hin i. Miꞌi hawyi teꞌeroꞌe toꞌope -Toꞌiro watiꞌauka iꞌypia kaꞌiwat saꞌyru iꞌatuꞌe. Katupono ti aru meiũran miꞌi raꞌyn ikaꞌiwat pakup mo iꞌatuꞌe. Watiꞌauka hawyi mono aipo pe yne raꞌyn topyhuꞌat mesuwat mikoi ypia iꞌatuꞌe neꞌi toꞌope e.

Iuwãu 1:10

Mekewat miit nimo pyi toineꞌen. Kat kat koꞌi mesuwat rotiat inug hat toineꞌen. Maꞌato mesuwat rotiaria yt ikuap i uwe.

Iuwãu 1:14

Mekewat Sehay e hap het rakat Iesui aiꞌewywuat tuwemoherep miitno aipiit ewywuat tuwemoherep. Miꞌi hawyi watehaꞌat kuap i hẽtyhot atipy kaipywiat Tupana saꞌyru wẽtup yn kape. Miꞌi hawyi toineꞌen aipyꞌasetpe. Putꞌok e mesuwe hegyiꞌat hap moherep hamo. Miꞌi ti Wakuat Sese toineꞌen. Hãpyk hap yn tuete. Pywuat rakat toineꞌen.

Iuwãu 1:3

Saꞌawyꞌi yne inug hap eꞌat turan Tupana mesuwat mytyyp nug hat toineꞌen. Taꞌi miꞌi turan toineꞌen Sehay e hap het rakat wẽtup Aikaꞌiwat set. Tupana yt kat i tutunug mesuwat rotiat Aikaꞌiwat yt uwe i itote pote. Mekewat Aikaꞌiwat Sehay wẽtup set toineꞌen itote yne nug hap eꞌat turan. Miꞌi wywo yne nug hat Tupana toineꞌen. Pywo Aikaꞌiwat yt uwe i mekewat eꞌat pe pote yt kat i toineꞌen kat kat koꞌi iminug hap.

Iuwãu 13:3

Meiẽpe Iesui tikuap taꞌyn Tupana esaika hap torannia yne raꞌyn topyhuꞌat ipiit pe hap. Miꞌi pote topyꞌa pe toikuap tuwewi Tupana kaipywiat tuut hap iꞌewyte Tupana kapiat toto hamuat toikuap topyꞌa pe itote.

Iuwãu 13:32

Taꞌi Tupana motypot hamuat hap topyhuꞌat Miitꞌin Ykeꞌet iminug kaipyi. Atimotypot Uiꞌywot hawyi uimotypot kahato. Miꞌi tutum uhepe aru tomotypot hap oktan. Tuwemotypot hap oktan Uiꞌywot tum aru uhepe. Atimowato Uiꞌywot wuatꞌi ehamo mesuwepyi e. Taꞌi wẽtup miit ewywuat yn woꞌomotypot hap topyhuꞌat e.

Iuwãu 15:15

Motpoꞌororia yt ikuap hin i kat koꞌi kat koꞌi taꞌatukaꞌiwat minug wuat e maꞌato eipe uiwyriaꞌin me uheropat haria eipe yt are i. Maꞌato uiwyriaꞌin sese eipe are katupono ahenoi ehepe torannia Uiꞌywot e uhepiat hap koꞌi. Pyno mio eipe yt uheropat haria i maꞌato uiwyriaꞌin sese eipe katupono eweikuap taꞌyn yne yne Uiꞌywot e hap uimimoherep ehepiat e.

Iuwãu 16:15

Wuatꞌi Uiꞌywot wat ipo piat uiatnuat koꞌi tukupteꞌen e. Miꞌi tã tupono ti aru uiꞌe hap ewy Tupana Paꞌãu henoi ehepe e Iesui topotmuꞌeria pe.

Iuwãu 17:2

Papai uinug naꞌyn yne miitꞌin mimotypotno katupono etikyꞌesat kahato miitꞌin emiium koꞌi emiꞌairoria ehakyeraꞌat hamuat hap e.

Iuwãu 3:16

Katupono Tupana tiꞌatukyꞌe kahato miitꞌin haype tutum Tosaꞌyru wẽtup ok takat iꞌatuepe e. Miꞌi pote uwe uwe imohey miꞌi haria wyti aru yt ikuꞌuro sese i maꞌato wuatꞌi eꞌat pe raꞌyn iꞌatuehãite hap toineꞌen e Iesui.

Iuwãu 3:25

Itote tuꞌuka tuꞌuka toꞌope sehay wo Iuwãu potmuꞌeria wẽtup ok Iuteu wywo aikotã aikotã som poꞌog hãpyk watiꞌatusetꞌok miitꞌin taꞌatuꞌe hap ete tuꞌuka sehay wo.

Iuwãu 5:26

Iꞌywot toineꞌen tuwekaipyi yt uwe i inug. Miꞌi hap ewy tutum Tosaꞌyru pe tuwekaipywiat toineꞌen hap e.

Iuwãu 5:27

Tupana toꞌe Tosaꞌyru pe -En wyti Miitꞌin Ykeꞌet miit sese erepyhuꞌat. Miꞌi tupono waku ereꞌe uwe waku uwe yt uwe topyhuꞌat miꞌapiheg wo uwe yt ere miitꞌin me hamo e Tupana Tosaꞌyru pe.

Iuwãu 9:29

Uruto ti uruikuap kahato aseꞌi Muisei mienoi Tupana ehay iꞌatuꞌe maꞌato mekewat miit uwe mipoꞌoro aikope pyi tuut hap ti yt uruikuap hin i iꞌatuꞌe.

Iesui Potmuꞌeria 10:36

Mesup taꞌyn Tupana tipoꞌoro raꞌyn uruꞌywania pe temiit Iesui wuatꞌi ywania ehakyeraꞌat hanuat e Peteru. Koitywy ti Tupana Mipoꞌoro topyhuꞌat aipuꞌap Tupana kapiat hat e. Mesup mio tã e Tupana wuatꞌi pe -Koitywy waku raꞌyn eweiõꞌẽ uhowowi katupono Uhaꞌyru Iesui tunug naꞌyn aiwoꞌopiat woꞌowese hap e. Taꞌi mesup ti aiwoꞌoewaku hap tutunug naꞌyn e. Saꞌawyꞌi te ti uruepe Isareu ywania pe yn mio tã e maꞌato mesup wuatꞌi ywania pe mio tã e -Uhemiit Iesui ti atunug naꞌyn Wuatꞌi Porekuaria Porekuat no e Tupana wuatꞌi pusu kuap haria pe e Peteru.

Iesui Potmuꞌeria 2:17

Mio tã e Tupana tehay moherep hat Iueu pe -Yt pya i raꞌyn yi kahuro hamuat hap eꞌat kape ti aru Uito ahytmoi kahato wuatꞌi ywania pe Uipaꞌãu e wuatꞌi miitꞌin miat pe. Ehaꞌyruꞌin ehakiꞌytꞌin timoherep kahato aru uhehay wuatꞌi ywania pe e. Mekewat eꞌat pe atum kahato aru Uipaꞌãu kurumꞌin me hawyi wyti aru teꞌeraꞌakasa taꞌatumuꞌetu wuat ewy Uipaꞌãu mienoi ewywuat e. Iꞌewyte ehaꞌaseꞌiꞌin me atum kahato aru Uipaꞌãu hawyi ti aru uiꞌe hap taꞌatumuꞌetu wuat ewy taꞌatumoherep wuatꞌi ywania pe e.

Humanu 1:4

Miꞌi ti Uhaꞌyru sese e Tupana uhepe. Uiꞌewy hesaika rakat e. Uipaꞌãu wakuat oktan ne hesaika rakat e. Koitywy atimoherep taꞌyn uiꞌe hap e Tupana. Koitywy atimoherep taꞌyn nimuat uiꞌe hap e Tupana. Koitywy Miꞌi moherep hap niatpo kahato raꞌyn aikotã atiõtem guꞌuro pyi Uhaꞌyru e Tupana uhepe haꞌawyte uikay kay tehay sytpok hamuat hap tote are.

Humanu 8:17

Pyno mesup Tupana mepytꞌin koꞌi aito pote Tupana mimopyhuꞌat wuatꞌi eꞌat pe katupono Aiꞌywot Tupana pote Iesui Aheykeꞌet pote aito iꞌywytꞌin inytꞌin wẽtup sok yn aitoria pote. Tupana ekat yne aiwatnuat koꞌi imepytꞌin aito pote. Aheykeꞌet motypot hap eꞌat pe aito iꞌewyte aimotypot hap toineꞌen imohey haria aito pote. Aheykeꞌet Aikywyt hoꞌopot kahato ahehakyeraꞌat hamo miꞌi pote waku kahato wahoꞌopot Aheykeꞌet Aikywyt ehay moherep hamo katupono wẽtup sok yn Tupana mipoityro koꞌi aito. Aheykeꞌet Aikywyt motypot hap eꞌat pe aimotypot iwywo hap topyhuꞌat.

1 Kuriniu 2:7

Maꞌato uito atiꞌatumuꞌe Iesui mohey haria Tupana weꞌeg hamo yn. Yt miitꞌin mikuap kaipyi hin i atiꞌatumuꞌe maꞌato mekewat weꞌeg hap Tupana kaipywiat yn wo atiꞌatumuꞌe torannia miꞌiria. Maꞌato iraniaꞌin yt kuap i hap ewy mesuwat sehay uimimoherep kat pote uhehay sehay yianmiat ewywuat aikotã saꞌawyꞌi Tupana aiꞌairo mesuwat yi nug hap eꞌyian mete hap ewy.

1 Kuriniu 8:6

Maꞌato Tupana sese toineꞌen wẽtup yn Miꞌi watoꞌe. Tupana ti Ainug hat Aiꞌywot watoꞌe. Miꞌi ti wuatꞌi nug hat watoꞌe. Miꞌi yn Aimoieineꞌen hat wẽtup yn Aipotypot watoꞌe. Aikaꞌiwat ti Iesui e hap het rakat watoꞌe. Tupana tunug yne topo wo aimoieineꞌen hap watoꞌe.

Karasia 4:4

Putꞌok e raꞌyn heꞌat tomikyꞌesat ewy raꞌyn topyhuꞌat hawyi Tupana tipoꞌoro Tosaꞌyru haryporia kaipywiat torannia tehay woꞌonapin hap nug hamuat raꞌyn. Putꞌok toꞌe hawyi yt wẽtup i Toꞌywot woꞌonapin hap toiꞌaparap. Tutunug yne imikyꞌesat oktan.

Ewesu 1:10

Mio tã e saꞌawyꞌi Tupana -Putꞌok e uheꞌat aru hawyi atunug sese ti Uhaꞌyru wuatꞌi Porekuat no e tuwepe iꞌewyte yne atipy piaria Porekuat no iꞌewyte yne yi totiaria Porekuat no e tuwepe. Uhaꞌyru suu wo atiꞌatumowehik sok torannia yi totiaria atipy piaria uhowowi e. Miꞌi hawyi wẽtup piit ewy yn naꞌyn watopyhuꞌat wuatꞌi uiminug koꞌi uikai tukupteꞌen e tuwepe Tupana wuatꞌi tominug koꞌi pe tukupteꞌen yian mete turan.

Ewesu 3:9

Saꞌawyꞌi te wuat migꞌi wuat Tupana mimoherep aikotã toikyꞌesat yne ywania towatnuat hap toimoherep mesup uiwẽ pyi. Tupana ti wuatꞌi wuatꞌi nug hat maꞌato kat hamo ainug saꞌawyꞌi yt tohenoi i. Miꞌi kape miitꞌin saꞌawyꞌi wuat teꞌeruwanetup kahato maꞌato yt taꞌatukuap kuap i. Maꞌato koitywy toimoherep taꞌyn miꞌi e hap ahepe.

Epereu 1:5

Miꞌi rakirẽ yt karãpe i atipy piaria pe -Uhaꞌyru sese En wuatꞌi eꞌat pe Eꞌywot sese wo areineꞌen Uito e Tupana Tosaꞌyru pe yn. Maꞌato yt karãpe i atipy piaria pe -Uhaꞌyru sese ti En e Tupana morekuat Tawi wepy miwan 2.7 pe.

Epereu 1:8

Maꞌato Tosaꞌyru pe mio tã wẽtup e -Wuatꞌi Porekuat Eporekuat no ti erepyhuꞌat e. Wuatꞌi akag Porekuat no En e. Yt karamuo i ikahuro Miitꞌin Porekuat Koro wo En e. Toineꞌen epo pe puretig ewywuat hap esaika moherep hamuat e. Taꞌi En ni wuatꞌi miitꞌin powyro teran hanuat katupono wakuat yn nug hat En e Tupana Tosaꞌyru pe.

Epereu 11:3

Saꞌawyꞌi Tupana tuwanetup -Atunug aru waikiru waty aat e topyꞌa pe. Miꞌi hawyi tutunug toꞌe hap ewy tomohey ewy. Toiꞌatumoewyry aat waikiru waty yi tomohey hamo hawyi ikahu kahato tukupteꞌen toꞌe hap ewy. Mekewat eꞌat pe yt kat i aito yt wataꞌakasa hin i inug hap pykai watomohey Tupana tunug yne yne hap. Watomohey hawyi watikuap Wuatꞌi Saꞌawyꞌi wuat Nug Hat Tupana. Watikuap Tupana ehay kawiat yne yne topyhuꞌat mesuwe atipy pe.

Epereu 2:3

Miꞌi tupono waku aiweꞌeg wo kahato toꞌe hap ete katupono koitywy Tosaꞌyru wẽ pyi aimuꞌe raꞌyn Tupana. Haꞌyru piat aimuꞌe hap ti poꞌog atipy piaria wẽ pywiat kai. Miꞌi tupono yt naku i kahato watoꞌokyryꞌi ahehakyeraꞌat hat ete. Maꞌato yt watat i Haꞌyru e hap hawyi watipun neꞌi ahehakyeraꞌat hap hawyi aikotã aru. -Yt atikyꞌesat i emiium Iesui aiꞌe hawyi aikotã aru. Taꞌi yt kat i hin i aru watipuẽti muap Tupana kapiat mio tã aiꞌe hawyi. Maꞌato aiꞌapiheg hap yn naꞌyn topyhuꞌat yt watat i imiium hawyi. Saꞌawyꞌi ahehakyeraꞌat hap ete aimuꞌe kahato Aikaꞌiwat Iesui. Iꞌewyte tosaipepiaria topotmuꞌeria kaipyi aimuꞌe kahato wy. Taꞌatumoheg kahato iꞌe hap torannia ahowawi.

Epereu 3:6

Maꞌato Aipotypot Iesui poꞌog Muisei kai kat pote Tupana Saꞌyru sese pote. Miꞌi pote poꞌog waku topyhuꞌat iꞌyat piaria apykok hamo Haꞌyru pote. Muisei Tupana eropat hat maꞌato Iesui Haꞌyru sese. Pyno aito imohey haria Tupana yat piaria ewywuaria watoineꞌen. Taꞌi miꞌi tã aito watomohey potꞌi pote -Uito imohey hat watoꞌe yt aiwemoti hin i pote. Pywo ti rat Iesui yn aimiekatup aiꞌe pote. Iesui yn ahehakyeraꞌat kuap hat watoꞌe pote. Yt kat i aiwemogyt hap aikuꞌuro hap mesup watoꞌe. Mio tã aiꞌe pote Tupana yat piaria wuat aito.

Epereu 4:14

Maꞌato toineꞌen wẽtup aikawiatno hat ihay Tupana wywo rakat Miꞌi Miit ri Ahepaꞌi sese Iesui. Haꞌawytepyi tutunug yne Toꞌywot mikyꞌesat oktan hawyi ti taꞌam atipy kape. Teke raꞌyn Toꞌywot wywuat pe Ahepaꞌi Koro sese. Miꞌi tupono waku watomohey Miꞌi Miit aikuꞌuro hap kape. Miꞌi tupono waku watoꞌe yne eꞌat pe howawi -Woromohey En Iesui watoꞌe waku.

Epereu 5:8

Tupana Saꞌyru sese Iesui maꞌato tohoꞌopot popuo tuwemuꞌe Tupana mikyꞌesat nug hap ete paa e hat ewy. Miꞌi kaipyi aimohãpyk hamuat tutuꞌu yne tepiat hoꞌopot hap hawyi toikuap Tupana mikyꞌesat nug hap. Yt ikuꞌuro teran i pykai ikuꞌuro aikawiatno Tupana mikyꞌesat toikyꞌesat pote.

Epereu 7:28

Iraniaꞌin paꞌi koꞌi aimiꞌairo koꞌi Irewi eko ewywuaria miꞌiria miit aipuꞌi ewywuat taꞌatuꞌaparap aparap kahato aiꞌaparap hap ewy yne yt naku i nug hawiat. Ikuꞌuro rakaria aiꞌewy ahepaꞌi akag koꞌi mesuwarotiaria. Miꞌiria yt naku i nug haria aiꞌewy mesuwiaria paꞌi koꞌi. Maꞌato Ahepaꞌi Akag Sese Iesui pakup we Tupana toꞌe haty wo -Woronug En Wuatꞌi Miitꞌin Epaꞌi Koro wo aru saꞌawyꞌi wuat mekewat paꞌi Mekeseteki ewywuat woroꞌairo En e haty wo saꞌawyꞌi Iesui pe. Iꞌatu kahato paꞌi mesuwe tukupteꞌen e maꞌato miꞌi turan woroꞌairo En wuatꞌi miitꞌin Epaꞌi Wato wo e Tupana miwan me. Miꞌi hawyi ti aru ereineꞌen naꞌyn wuatꞌi eꞌat piat miitꞌin Epaꞌi wo e Tosaꞌyru pe. Waku En Paꞌi wo Uhaꞌyru e katupono En yn uiꞌewy Uhaꞌyru e Tupana Tosaꞌyru pe.

Epereu 7:3

Maꞌato Mekeseteki uwe iꞌywot kuap hat yt toꞌe i miwan miat pote. Uwe ity kuap hat yt toꞌe i iwan miat pote. Iꞌewyte uwe imepytꞌin kat ywania hap yt uwe i ikuap yt toꞌe i iwan me pote. Sio iꞌywaĩꞌĩ hap toĩ sio yt hap yt watikuap i yt toꞌe i pote. Sio ikuꞌuro sio yt hap yt toꞌe i pote yt watikuap i. Yt uwe i ikuap miꞌi pote wuatꞌi eꞌat piat miit ewy topyhuꞌat morekuat Mekeseteki. Miꞌi pote wuatꞌi eꞌat piat miitꞌin epaꞌi koro ewywuat topyhuꞌat. Miꞌi pote Tupana Saꞌyru ewywuat kahato topyhuꞌat. Miꞌi Ahepaꞌi wuatꞌi eꞌat piat iãꞌãkap kahato.

Epereu 9:26

Maꞌato Uhaꞌyru Ehepaꞌi Wato toineꞌen wuatꞌi eꞌat pe uiwywo wẽtup muat tosuu aat hawyi. Koitywy yt kat i raꞌyn typuat i epiat hoꞌopot hamuat areꞌe Uhaꞌyru pe e.

1 Peteru 1:20

Saꞌawyꞌi sese Tupana toꞌe tuwepe. Mesuwat yi yt kat i te turan Tupana toꞌe -Atipoꞌoro aru Uhaꞌyru wuatꞌi ywania minug saꞌag saꞌup mo e nimo sese turan. Koitywy tuwemoherep taꞌyn ikuꞌuro raꞌyn Tupana Saꞌyru. Aihũ Kuteiru ewy ikuꞌuro. Gaꞌatpo eꞌat ikuꞌuro raꞌyn Aikaꞌiwat. Howapy hap eꞌat pe hap ewy ikuꞌuro are.

2 Peteru 3:3

Tuut wyti aru eimuꞌe hanuaria. Miꞌiria ti aru taꞌatumikyꞌesat ete yn eimuꞌe. Taꞌatupiit piat mikyꞌesat saꞌag koꞌi hap taꞌatunug kahato ekyewi iꞌewyte ehekareꞌen kyewi. Miꞌi hawyi eimimohey Iesui tuut aru e hap ete taꞌatukyryꞌi kahato.

Iuta 1:18

Mekewat saꞌawyꞌi wuaria Aipotypot Iesui potpoꞌororia sese ainapin kahato miꞌiria aimaꞌat teran haria ete aimaꞌat pupi are. Taꞌi mio tã iꞌatuꞌe ahepe 12 ok takaria -Meiũran wuatꞌi kahuro hap eꞌyian mete wyti aru tõꞌẽ kahato wẽtup ehay enoi haria. Miꞌiria ti aru aiꞌatumaꞌat reran haria iꞌatuꞌe raꞌyn ahepe. Mekewat yi kahuro hap yt pya i raꞌyn turan putꞌok iꞌatuꞌe ahowawi. Miꞌiria ti ikohyeput kahato taꞌatupiit mikyꞌesat guꞌuro ypy yn nug hap upi iꞌatuꞌe. Tõꞌẽ ehewowi wẽtup sehay moherep hanuaria iꞌatuꞌe. Eimimohey hãpyk takat Iesui etiat mohit hanuaria tõꞌẽ hawyi eipyꞌasetpe tukupteꞌen iꞌatuꞌe 12 ok takaria. Miꞌiria ti taꞌatupiit mikyꞌesat yt naku i guꞌuro ypy nug hap etiat wemoehapap haria yt Tupana mikyꞌesat wuatꞌi eꞌat piat ieineꞌen hap yt kyꞌesat i haria iꞌatuꞌe ahepe saꞌawyꞌi 12 ok takaria.