2 Tesaronika 3:6 - Sateré-Mawé

⁶ Uruwyriaꞌin tukupteꞌen aipyꞌasetpe iperup kahato rakaria -Uito ti Iesui mohey hat e haria pykai. Miꞌiria ti yt ipotpap teran i rakaria wo gupteꞌen haria. Miꞌiria ti tukupteꞌen eipyꞌasetpe -Yt atunug neran Pauru mienoi e haria. Miꞌi haria o yt ewetunug neiꞌo eiwy wo.

2 Tesaronika 3:6 ပူးပေါင်းရင်းမြစ်များ

Mateu 18:17

Maꞌato mekewat miit iꞌaparap hat yt tuwanetup teran i ehehay kape miꞌi pote waku ehenoi torannia Iesui mohey haria pe. Maꞌato miꞌi pykai yt tuwanetup teran i Iesui mohey haria ehay kape miꞌi hat wyti toineꞌen aikotã wẽtup ok yt hetupana rakat i ewy. Iꞌewyte aikotã wẽtup ok saꞌup sat iraniaꞌin ywania kaipywiat hat ewy.

Humanu 16:17

Tukupteꞌen Iesui mohey ran haria maꞌato mesuwat yi tote yt naku i rakaria katupono woꞌoehay uuka teran sehay wuat haria tukupteꞌen. Taꞌi miꞌiria taꞌatupatꞌok patꞌok teran kahato aito hap taꞌatukyꞌesat kahato. Miꞌiria aimoꞌakagꞌaia taꞌatuehay wuat hap taꞌatuehay wo. Yt Iesui kyꞌe hap kaipyi i maꞌato wẽtup mohey hap kape wẽtup sehay kape aimoꞌakagꞌaia teran. Typy mohey hap nug hamo yt Aimimohey Iesui ewy i taꞌatumoherep yt aimimohey sehay yt ewy i yt aimuꞌe hap saꞌawyꞌi wuat Iesui potmuꞌeria piat yt aimuꞌe hap ewy i aimuꞌe. Yt naku i. Uiwyriaꞌin karãpe miꞌiria ewywuaria putꞌok iꞌatuꞌe eipyꞌasetpe ehepiat Iesui mohey hap nug kowoꞌi kowoꞌi hanuaria eiweꞌeg wo o miꞌiria pupi. Miꞌiria putꞌok iꞌatuꞌe turan waku eweikuap meremo iꞌatuepiat eimaꞌat reran hap hawyi yt eweiwat i iꞌatuehay upi. -Urumuꞌe ro uhyt mana yt eweiꞌe teiꞌo iꞌatuepe. Iꞌatuehay pupi eweikenꞌẽ o. Uiwyriaꞌin Iesui mohey haria eipe pyno worohoꞌonapin haty puo yt eweipomeꞌeg teiꞌo ehewaure kaꞌa woꞌopatꞌok patꞌok Iesui mohey haria etiat iꞌatumoꞌakagꞌaia hap kaipywiaria kape.

1 Kuriniu 11:2

Pywo pe ti arehum kahato ehete uipotmuꞌeria katupono yt uiwaure hin i eipe uimienoi upi kahato eweikupteꞌen. Haꞌawyte worohoꞌomuꞌe kahato Iesui moherep hap ete. Miꞌi hawyi areto raꞌyn maꞌato yt eweiwaure hin i uimiatoiat iꞌewyte yt eweiwaure hin i eimuꞌe hap.

1 Kuriniu 5:4

Miꞌi pote waku eiweꞌatunug yne eipe hawyi waku eweikay kay mekewat miit yt iweꞌeg i rakat ehewowi. Miꞌi tote ti toineꞌen aru Aipotypot Iesui eipyꞌasetpe iꞌewyte uipaꞌãu toineꞌen eiwywo. Miꞌi hawyi waku mekewat toꞌywot eharyꞌi wywuat get hat eweinapin kahato -Pyno koitywy ahiag watnuat ereineꞌen waku watoꞌe tope. Miꞌi hawyi mono etoiat ro eminug saꞌag maꞌato yt etoiat i ewaire waire hap pote ikuꞌuro rakat no ereineꞌen waku watoꞌe tope.

1 Kuriniu 5:9

Saꞌawyꞌi atipoꞌoro uimiwan me einapin hamuat -Yt naku i watunug aiwy ok sese wo Iesui mohey hat yt iweꞌeg i sese rakat wuatꞌi ihainia wywuat ieineꞌen hat wuatꞌi haryporia wywo.

2 Kuriniu 2:10

Koitywy waku waure wo eweikupteꞌen iminug saꞌag kai. Waure wo eweikupteꞌen pote iꞌewyte uito waure wo areineꞌen. Miꞌi hawyi waku waure wo watoꞌe Aikaꞌiwat Iesui e. Miꞌi hawyi iꞌewyte Aikaꞌiwat toineꞌen waure wo raꞌyn. Miꞌi hawyi aiwoꞌokyꞌe hap sese toineꞌen i raꞌyn.

Ewesu 4:17

Pyno worohoꞌomuꞌe teran Aikaꞌiwat Iesui ehay ete. Eweꞌeg wo o eiminug saꞌag koꞌi eimikyꞌesat saꞌawyꞌi eheko saꞌawyꞌi wuat pupi are. Yt imohey i te turan wuat saꞌag nug hap ete yt aiweꞌeg hin i saꞌawyꞌi wuat aiminug saꞌag koꞌi kai -Eweiꞌatoiat ro miꞌi koꞌi e Tupana pykai. Uiwyriaꞌin yt naku i watuwanetup poꞌog aikotã yt imohey i haria wanetup hap ewy neꞌi katupono miꞌiria yt naku i nug hap yn iꞌatuwanetup hawe. -Uito poꞌog poꞌog torannia kai iꞌatuꞌe taꞌatuwanetup hawe. Yt paa iꞌatuꞌe hin i taꞌatuminug yt naku i hawyi. Miꞌi tã iꞌewyte aito saꞌawyꞌi maꞌato mesup waku watuwenapin miꞌi e hap pun hamuat e.

Korosi 3:17

Toikyꞌesat yne aiminug koꞌi Tosaꞌyru Aipotypot Iesui motypot hap. Toikyꞌesat yne ahehay Tosaꞌyru Iesui set motypot hap. Toikyꞌesat kahato ahehay towawiat hap aiwepiit hap wywo. Toikyꞌesat ahehay towawi Tosaꞌyru set upi hap. Toikyꞌesat watoꞌe -Uruporekuat nuat urumowepiit kahato. En waku kahato Esaꞌyru waku kahato emiium e hap ewywuat aiꞌe hap Tupana tikyꞌesat.

1 Tesaronika 4:1

Uruwyriaꞌin koitywy uruhẽtup kahato ehupi poꞌog poꞌog Tupana mowepiit haria wo eweikupteꞌen hap Iesui mikyꞌesat ewy kahato. Uruikuap taꞌyn ti koitywy Tupana mowepiit haria wo raꞌyn eweikupteꞌen. Miꞌi tã raꞌyn pykai ti uruhẽtup poꞌog poꞌog ne.

1 Tesaronika 4:11

Uiwyriaꞌin worohoꞌonapin pywuat sehay wo. Woꞌoeremopusu haria wo yt naku i aito watukupteꞌen. Waku teꞌen aipotpap kaipyi aimiꞌu ahekareꞌen aikotã urutoꞌe saꞌawyꞌi hap ewy waku watoiat yne aiperup hap koꞌi urutoꞌe.

1 Tesaronika 5:14

Maꞌato toineꞌen eipyꞌasetpe motpap pupiat woꞌoksep hat neꞌi pote waku waĩꞌeweiꞌe miꞌi hat pe merup upiat neꞌi myhuꞌat hat pe. Iꞌewyte waku ti watimoꞌokpipokꞌi ihay kenꞌẽ tehay hamuat rakat. Iꞌewyte waku watiꞌykesat imohey hap etiat yt hesaika i rakat. Iꞌewyte waku aiperupꞌi yn wuatꞌi miitꞌin ete.

2 Tesaronika 2:15

Miꞌi tupono uruwyriaꞌin waku kahato ti motꞌi mekewat sehay pywuat eweimohey mekewat uruwẽ pywiat sehay urumiwan urumienoi koꞌi.

2 Tesaronika 3:7

Eweikuap taꞌyn ipotpap takaria wo urukupteꞌen hap miꞌi tupono waku ewehãꞌãg uruꞌewywuat hap urutoꞌe. Pyno uruiãꞌãkap wo eweikupteꞌen itote urusaipepiatno urueiam mo uruꞌewywuat hewyry rakaria wo eweikupteꞌen.

1 Timoteu 5:21

Timoteu etunug no haty wo yne yne enapin hap uhepiat hap ewy. Etiꞌatunapin uiꞌewy yne itotiaria toꞌewyꞌewy. Eꞌyian pupi o yt erekenꞌẽ teiꞌo eꞌywania pupi iꞌatunapin hamo. Ewy ok sese pupi iꞌewyte yt erekenꞌẽ teiꞌo inapin hamo maꞌato waku torannia etiꞌatunapin perupꞌi puo. Woronapin Tupana ehamo Iesui ehamo iꞌewyte atipy piaria wakuaria ehamo woronapin uhaꞌyru.

1 Timoteu 6:5

Iꞌatuwanetup hap yt toto kuap i. Sehay wakuat yt kat i iꞌatuwanetup hawe. Miꞌi pote tuꞌuka yn hap toineꞌen iꞌatuehay kaipyi iꞌatuwanetup hawyi. -Iesui atimohey hawyi hekat rakatno areineꞌen iꞌatuꞌe teꞌeruwepe yt miꞌi tã hin i pykai i.

2 Timoteu 3:5

Teꞌeruwaꞌatunug Tupana motypot hamo maꞌato yt pywo pe i. Yt taꞌatukyꞌesat hin i Tupana esaika hap taꞌatumopakup i hamuat. Miꞌi ewywuaria ti aru pywo tukupteꞌen kahato. Miꞌi tupono o eroꞌoksep yn naꞌyn miꞌi haria pupi. Eiweꞌeg wo o miꞌi haria ewamiri pupi.

2 Timoteu 4:1

Pyno Timoteu woronapin kahato haty wo Tupana ehamo Aipotypot Iesui ehamo -Etimohey kahato o Tupana ehay ereꞌe o epotmuꞌeria pe. Yt ewẽpohep hin i neiꞌo miꞌi hap ete. Yt epohepap pykai i yt epohep teiꞌo iꞌatumuꞌe hap ete. Katupono tuut irane Aikaꞌiwat uwe waku uwe yt naku i rakaria hap enoi hamo ihãite rakaria kape iꞌewyte map haria kape.

2 Iuwãu 1:10

Miꞌi hawyi putꞌok e wẽtup ok aimuꞌe hat hawyi -Taꞌi wẽtup kawiat ti Iesui yt aipiit ewywuat i Iesui iꞌatuꞌe saꞌag. Miꞌiria putꞌok e aiꞌyat okenꞌypyke hawyi -Waĩ yt ereke teiꞌo waku watoꞌe tope.