2 Tesaronika 2:16 - Sateré-Mawé

¹⁶ Uruhẽtup kahato Aipotypot Aikaꞌiwat Iesui pe iꞌewyte Aiꞌywot hegyiꞌat rakat kape -Etiꞌatumoesaika ro emohey haria tawa Tesaronika piaria yt kat pupiat i iꞌatuwuwu hamo urutoꞌe. Etiꞌatumoesaika ro miꞌiria wakuap nug hamo iꞌewyte wakuap enoi hamo.

2 Tesaronika 2:16 ပူးပေါင်းရင်းမြစ်များ

Iruka 16:25

Mio tã e pote Aparãu tiwesat -Uhaꞌyru e etiwaure raꞌyn apo eieineꞌen ne turan aikotã waku hap koꞌi yn emikyꞌesat koꞌi eheineꞌen turan maꞌato Irasaru ieineꞌen yi totiat turan hoꞌopot hap yn toineꞌen tuete ihakyꞌeꞌi e.

Iuwãu 13:1

Miꞌi tote pyi ienuk koro eꞌat owakai te Iesui tikuap taꞌyn topyꞌa pe taꞌaipok Toꞌywot kapiat mesuwat yi tote pywiat hamuat. Iesui tiꞌatukyꞌe kahato temiitꞌin mesuwarotiaria. Toiꞌatukay kay saꞌawyꞌi miꞌi hawyi toiꞌatumuꞌe kahato. Iesui toineꞌen mesuwat yi totiat turan toiꞌatukyꞌe kahato temiitꞌin hawyi tokuꞌuro hap kape iꞌewyte toiꞌatukyꞌe.

Iuwãu 15:13

Pyno wẽtup ok aiwy ete poityꞌi niatpo hawyi watuwat raꞌyn ipowyro hamo aiwy kyꞌe kahato pote e. Pyno wẽtup ok tuweꞌauka towy ehakyeraꞌat hamo pote toikyꞌe kahato hap toimoherep e. Katupono yt kat i poꞌog miꞌi hap kai wẽtup ok ikuꞌuro towy ehakyeraꞌat hamo hap oktan ikuꞌuro raꞌyn towy ehakyeraꞌat hamo.

Iuwãu 15:9

Aikotã aikotã Uiꞌywot eikyꞌe hap ewy ti Uito worohoꞌokyꞌe e. Yt eweipun neiꞌo uhepiat eikyꞌe hap e.

Iuwãu 16:22

Miꞌi hap ewy ti mesup areto hamuat raꞌyn eiꞌyatypepyi miꞌi pote yt eiwepiit hin i maꞌato meiũran worohoꞌopuẽti i raꞌyn hawyi ti aru maꞌato meremo raꞌyn eiwepiit hap tuut aikotã aity iwepiit aiꞌywãꞌĩ hap eꞌat pe hap ewy e. Aremoherep i raꞌyn eipyꞌasetpe hawyi eimowepiit sese hap topyhuꞌat eiwepiit sakpo hap ewy aikotã imepyt pakup hap ewy are. Areineꞌen i eiwywo hawyi eiwepiit sese hap toineꞌen eipyꞌa pe iheg me toineꞌen yt uwe i raꞌyn eiwepiit hap porap kuap hat e.

Iuwãu 3:16

Katupono Tupana tiꞌatukyꞌe kahato miitꞌin haype tutum Tosaꞌyru wẽtup ok takat iꞌatuepe e. Miꞌi pote uwe uwe imohey miꞌi haria wyti aru yt ikuꞌuro sese i maꞌato wuatꞌi eꞌat pe raꞌyn iꞌatuehãite hap toineꞌen e Iesui.

Iuwãu 4:14

Maꞌato uwe uwe mekewat uimiium yꞌy wo teꞌereꞌyꞌu miꞌi haria ti aru yt karamuo i raꞌyn teꞌereꞌyꞌutui e katupono uimiium yꞌy toineꞌen emoieineꞌen hamuat wuatꞌi eꞌat piat ihãite rakat raꞌyn. Uimiium yꞌy yresa sese ewy raꞌyn tuwẽtem yꞌy epyꞌa pyi mana e.

Iesui Potmuꞌeria 15:11

Taꞌi Iesui yn nyti ahehakyeraꞌat e. Iꞌewyte iraniaꞌin ywania Ehakyeraꞌat hat Iesui yn. Pyno aiwoꞌoꞌewy kahato e. Taꞌi Iesui mohey hap yn ahehakyeraꞌat kuap hap. Yt aiminug koꞌi kaipyi i wyti ahehakyeraꞌat hap toineꞌen e Peteru.

Iesui Potmuꞌeria 18:27

Miꞌi hawyi Apauru toto teran yi Akaia kape pote Iesui mohey haria tawa Ewesu piaria tunug popera Apauru miereto wo yi Akaia piaria Iesui mohey haria kape. Miꞌi tã wyti iꞌatuꞌe miwan me -Mehinꞌin ereke ro uhyt eweiꞌe o Apauru pe iꞌatuꞌe. Kat pote Apauru ti aiꞌewywuat Iesui mohey hat. Miꞌi tupono waku eiꞌyatype toineꞌen urutoꞌe iꞌatuꞌe mekewat miwan me. Miꞌi hawyi Apauru toto Akaia kape tawa Kurintiu kape. Putꞌok e itote hawyi toiꞌatupowyro kahato Tupana wehum hap kaipywiat Iesui mohey haria.

Humanu 1:7

Miꞌi hap atiwan mesuwat uimiwan ehewowi Humanu ywania. Mio tã areꞌe Tupana pe -Uruꞌywot kahato En. Esaꞌyru ti Emipoꞌoro sese urukaꞌiwat nuat. Miꞌi pote ahẽtup eset upi Esaꞌyru set upi etum no tapyiꞌaria Humanu ywania pe egyiꞌat kahato hap are. Ereineꞌen no hegyiꞌat iꞌatuepiat rakatno etum no ewese hap yt kat saꞌup i tapyiꞌa Humanuꞌin me are. Etunug no miꞌiria woꞌowese haria wo aikotã Esaꞌyru ewese hap ewy are Tupana pe.

Humanu 4:16

Maꞌato Tupana toꞌe Aparãu me -Uiwy e uimohey pote waku pe kahato ereineꞌen uiwanetup hawe e. Miꞌi hap ewy te koitywy toꞌe ahepe -Eweimohey Uhaꞌyru hawyi atum eheineꞌen wuatꞌi eꞌat piat hamuat e. Yt kat saꞌup i ete atum neꞌen neꞌi Uhaꞌyru mohey haria pe e. Uhaꞌyru tum naꞌyn tosuu haꞌup mo e Tupana ahepe mesup. Watat Haꞌyru aipyꞌa pe hawyi watopyhuꞌat ahaꞌaseꞌi pot piat imohey hap ewywuaria. Miꞌi pote yt toꞌe hin i ahepe Tupana -Ewetunug yne waĩꞌuiꞌe hap hawyi waku pe eweikupteꞌen uiwanetup hawe yt toꞌe i ahepe maꞌato aikotã toꞌe Aparãu me miꞌi hap ewy te toꞌe ahepe mesup -Uimohey haria pote worohoꞌoehakyeraꞌat e ahepe mesup.

Humanu 4:4

Mesuwarotiaria miitꞌin ipotpap takaria aheropat haria pe watum haꞌup wẽtup eꞌat ipotpap hap watum. Wẽtup eꞌat ipotpap saꞌup watum hawyi totat hawyi -Waku e uipotpap saꞌup taꞌyn toineꞌen e. Totat hawyi yt karãpe i toꞌe -Yt kat i uipotpap pykai tutum neꞌen neꞌi uhepe tomiium yt kat saꞌup i yt e i kat pote ipotpap aat hap upi totat saꞌup pote.

Humanu 5:8

Maꞌato yt naku i nug haria ehakyeraꞌat hamo neꞌi Iesui ikuꞌuro. Tewanikaptia etiatno ikuꞌuro hawyi watikuap taꞌyn Tupana aikyꞌe kahato hap. Tupana tomoherep taꞌyn aikyꞌe hap Tosaꞌyru kuꞌuro hap kaipyi.

Ewesu 5:2

Aikotã Aipotypot Iesui aikyꞌe kahato saꞌawyꞌi aikyꞌe kahato te. Aikyꞌe kahato hawyi aikyꞌe hap upi ikuꞌuro. Tutum naꞌyn heineꞌen hap aikawiatno hap aikotã saꞌawyꞌi wuaria tum taꞌatuhũria aria pe Tupana mowepiit hamo. Miꞌi hap ewy ikuꞌuro ariaꞌyp posak ete aikyꞌe kahato haype. Aikyꞌe sese hat Iesui pote ikuꞌuro aiꞌapiheg hap u hamo. Miꞌi pote aikotã aikyꞌe hap ewy waku watikyꞌe iraniaꞌin aikuꞌuro hap kape.

Ewesu 5:25

Mehinꞌin etikyꞌe kahato eharyꞌi aikotã saꞌawyꞌi Aiꞌakag Iesui tiꞌatukyꞌe kahato aito temiitꞌin tomohey haria hap ewy. Etikyꞌe kahato eharyꞌi aikotã Iesui tum ahepe toieineꞌen hap ahehakyeraꞌat hamuat miꞌi tã aikyꞌe. Miꞌi tã waku etikyꞌe eharyꞌi ekuꞌuro hap kape Iesui ewy.

Korosi 1:23

Pyno aiwy raꞌyn Tupana. Yt nakuap i watoiat raꞌyn hawyi waku aikyꞌe hat sese watomohey wuatꞌi eꞌat pe. Saꞌawyꞌi watikuap mekewat Iesui etiat sehay wakuat ehay hawyi watomohey raꞌyn Iesui. Miꞌi hawyi watoineꞌen aru wuatꞌi eꞌat pe e hap ewy watomohey. Miitꞌin teꞌeruwekyryꞌi ahetiat pykai imohey hap yt watoiat hin i. Iheg me kahato watoineꞌen imohey hap ete. Saꞌawyꞌi watomohey kahato. Pyno koitywy yt naku i raꞌyn imohey hap watoiat sehay waku kahato Iesui etiat. Miꞌi atikuap saꞌawyꞌi hawyi uheropat kahato aat kaꞌap wuatꞌi miitꞌin kape miꞌi moherep hamo aikope aikope miitꞌin tukupteꞌen hap upi yne ywania pe ahytpok miꞌi ehay wakuat mesuwat yi wato hap oktan. Miꞌi hamo yn uinug uito Pauru.

Korosi 1:5

Uhekatuwyria gaꞌatpo mekewat sehay pywuat wakuat Iesui etiat putꞌok e ehetawa pe hawyi eiwewaure kaꞌa kahato. Eweikuap taꞌyn hawyi -Taꞌi miꞌi watomohey pote ti watoineꞌen aru wuatꞌi eꞌat pe atipy pe eweiꞌe raꞌyn Tupana e hap ewy eweiꞌe. -Tupana atunug aru eꞌe hap ewy eweiꞌe. Mio tã eweiꞌe raꞌyn hawyi Iesui mohey haria sese eweipyhuꞌat. Waku kahato katupono iꞌewyte woꞌokyꞌe kahato haria kahato eweipyhuꞌat eipe.

1 Tesaronika 1:3

Yt ehẽku kaipyi yn i ti tuwẽtem ehepiat Iesui mohey hap maꞌato yne kaipyi tuwemoherep. Miꞌi tupono urutuwehum kahato Aiꞌywot atipy piat kape. Yt waureꞌurutoꞌe hin i ti urukyꞌe ehepiat hap iꞌewyte miitꞌin kyꞌe ehepiat hap ete Aipotypot Iesui mohey hap kaipyi. Iꞌewyte eipotpap hap koꞌi yt uruiwaure hin i.

1 Tesaronika 3:11

-Uruꞌywot uruhẽtup urukaꞌiwat Iesui set upi etum o uruepe muap mekewat Tesaronika kapiat uruwat hamo urutoꞌe Tupana pe.

2 Tesaronika 2:13

Uruwyriaꞌin Tupana miꞌatukyꞌeria kahato eipe. Taꞌi urutuwehum kahato Tupana ete wuatꞌi eꞌat pe uruwatetup ehowawiat hawyi katupono Tupana miꞌairoria raꞌyn eipe. Tutum naꞌyn ni ehehakyeraꞌat hap ehepe pywuat sese tomohey hap upi. Miꞌi hawyi mio Tupana Paꞌãu esaika hap wywo yn naꞌyn eweikupteꞌen. Miꞌi hap ete urutuwehum kahato Tupana kape uruwyriaꞌin urutoꞌe.

Titu 1:2

Katupono saꞌawyꞌi te aat yt kat i te turan toꞌe Tupana ahepe -Atum aru ehepe eheineꞌen wuatꞌi eꞌat piat hamuat e ti Tupana. Yt heso i ahete Tosaꞌyru mohey haria pe. Miꞌi hap yn wahekatup aito mesup.

Titu 2:13

Miꞌi hawyi Iesui putꞌok e hap eꞌat yn naꞌyn wahekatup Tupana motypot eꞌat sese raꞌyn. Taꞌi Uhetupana iꞌewyte Iesui Ahehakyeraꞌat hat poꞌog wuatꞌi kai putꞌok e irane. Putꞌok e hawyi ikahu hap sese watikuap taꞌyn. Mekewat eꞌat pe ti wahekatup kahato turan tuut.

Epereu 7:19

Saꞌawyꞌi wuat ahepaꞌi aimotag teran tehay wo saꞌawyꞌi wuat ainapin hap koꞌi ete. Toimopakup teran yne maꞌato mekewat saꞌawyꞌi wuat waku wen maꞌato yt hesaika i aimowaku hamo. Yt aimoperupꞌi kuap i mekewat Muisei piat ainapin hap. Yt aimohãpyk kuap i yt watunug i pote. Watiꞌaparap yne miꞌi hap koꞌi ete pote. Paꞌi Muisei waĩꞌe hap upi yt kat i muap Tupana kapiat hap katupono yt watunug kuap i yne Muisei piat ainapin hap koꞌi pote. Maꞌato watomohey Paꞌi Koro wo Iesui hawyi meremo watikuap Tupana.

1 Iuwãu 3:16

Kat pote Aikaꞌiwat Iesui ikuꞌuro aikawiatno hamo raꞌyn. Ikuꞌuro hawyi yt kat i aikuꞌuro hap sese topyhuꞌat aikai. Pyno ikuꞌuro ahetiatno hap watikuap hawyi watikuap aikyꞌe hap sese. Koitywy waku watiꞌatupowyro wuatꞌi aiwyriaꞌin Iesui mohey haria aikuꞌuro hap kape.

Iesui Aru E Hap 1:5

Tupana Esaꞌyru sese Iesui kaipyi ahẽtup etipoityro emohey haria. Etum no iꞌatuepe i woꞌowese hap are epe. Wuatꞌi Porekuat no En poꞌog poꞌog iraniaꞌin kai are. En ni wuatꞌi eꞌyian mete wuat guꞌuro pywiat ieineꞌen i hat. En ni pywo yn e hat. Iesui En ni urukyꞌe hat sese katupono Esuu wo urupiit pit hap etikoho yne torannia uruminug saꞌag are. Ekuꞌuro hap urukawiatno hap.

Iesui Aru E Hap 22:5

Yt kat i ariãty itote kat pote yt kat i iꞌypyryp hap itote pote. Wãtym yt kat i katupono Aipotypot Tupana toineꞌen aheꞌariãty wo. Topyhuꞌat Aikaꞌiwat hẽtyhot puo aikohyewyry e. Miꞌi pote yt kat hamo i aat itote. Miꞌi hawyi Iesui eropat haria teꞌeropyhuꞌat iraniaꞌin yi totiaria morekuaria wo wuatꞌi eꞌat pe e.

Iesui Aru E Hap 3:9

Maꞌato tukupteꞌen ehetawa pe ahiag motypot sese haria -Uruto poꞌog eikai iꞌatuꞌe ehepe katupono uruto ti Aparãu emiariru sese koꞌi maꞌato eiperia yt iꞌatuꞌe. Iꞌatuꞌeso mio tã iꞌatuꞌe pote. Yt Iuteu ywania hin i miꞌiria e. Pyno atiꞌatumohit kahato miꞌiria hawyi eimotypot hamo teꞌeruwepỹꞌãtutuk ehewowi -Aparãu emiariru sese eipe iꞌatuꞌe aru ehepe katupono Iesui mikyꞌe sese koꞌi eipe iꞌatuꞌe aru ehepe. Atiꞌatumohit kahato miꞌiria ehamo hawyi teꞌeruwepỹꞌãtutuk ehewowi e.