2 Peteru 3:11 - Sateré-Mawé

¹¹ Pyno uiwyriaꞌin watikuap taꞌyn mesuwat yi ihywop irane hap. Miꞌi hawyi yt kat i raꞌyn. Miꞌi tupono waku watomohãpyk yne aiwanetup hap koꞌi. Miꞌi hawyi wakuaria Tupana ewaku hap ewywuat watukupteꞌen. Waku Tupana kape yn aiwanetup hap watukupteꞌen mesuwarotiat turan. Miꞌi hawyi ti aheko pakup wywo yn raꞌyn ahewyry waku kat pote wakuaria yn naꞌyn aito.

2 Peteru 3:11 ပူးပေါင်းရင်းမြစ်များ

Mateu 8:27

Miꞌi hawyi hemiitꞌin teꞌeruwanetup kahato iminug kapiat teꞌerehaꞌat hawyi -Uweĩ meiũ miit iꞌatuꞌe toꞌope. Kat pote som ywytu iꞌewyte yꞌy toimoperupꞌi kuap kahato iꞌatuꞌe toꞌope.

Humanu 13:11

Uimimuꞌeria tawa wato Huma piaria toꞌiro watiꞌatukyꞌe miitꞌin. Yt naku i woꞌomaꞌat haria wo watopyhuꞌat. Ahehakyeraꞌat hat Iesui tuut hamuat. Yt watikuap i kat eꞌat putꞌok e maꞌato miꞌi hap watikuap poꞌog yt pya i gaꞌatpo hap kai. Poꞌog poꞌog yt pya i Aikaꞌiwat uut hap saꞌawyꞌi wuat ahepiat yt imohey i te hap kai. Yt naku i get haria ewywuaria wo watukupteꞌen huut turan. Pyno koran waku wahekatup kahato huut hap.

Humanu 13:12

Yt naku i nug haria tikyꞌesat kahato wãtym muo yt naku i nug hamuat hap. Taꞌatukyꞌesat kahato ti iꞌypyryp wiat saꞌag nug hap maꞌato aito yt miꞌiria ewywuat i aito katupono aitoria watopyhuꞌat ihatꞌok puo ieineꞌen haria ewy are. Waku nug haria tikyꞌesat kahato waku nug hap yne ehamo hamuat Tupana motypot hamuat. Waku nug haria tikyꞌesat kahato ihatꞌok wuo wuatꞌi ehamo waku nug hamuat. Mesup taꞌyn wãtym porap tokosap taꞌyn uiwyriaꞌin are. Mesup taꞌyn ihatꞌok porap putꞌok e. Uimimuꞌeria Aikaꞌiwat uut hap yt pya i aat wẽtem hap ewy ihatꞌok hap.

2 Kuriniu 1:12

Yt karãpe i uruiꞌatumaꞌat eipe tawa Kurintiu piaria. Poꞌog hãpyk torannia kai hap ewy urutukupteꞌen eipyꞌasetpe. Tupana motypot hap yn urutunug itote. Yt uruweꞌeg hap kaipyi i urupotpap ehehamo maꞌato Tupana urumoweꞌeg hap kaipyi uruimotypot Tupana miitꞌin pyꞌasetpe. Yt uruhepap hap kaipyi i maꞌato Tupana tum uruepe tegyiꞌat hap tomisepap nug kuap hamo hawyi hesaika hap wywo uruimoherep wakuat itote saꞌawyꞌi. Miꞌi pote uruminug ete Tupana urupowyro hap kaipyi uruimotypot Tupana itote saꞌawyꞌi. Miꞌi hawyi miitꞌin teꞌeruwehum kahato Tupana kape. Yt uruewawi i maꞌato Tupana kape yn teꞌeruwehum uruminug wakuat upi. Miꞌi hawyi Tupana kape teꞌeruwehum hawyi urumowepiit kahato kat pote uruminug kaipyi Tupana motypot hamo urutukupteꞌen mote.

Wiripu 1:27

Karãpe watimoherep sehay wakuat Aipotypot etiat miitꞌin me miꞌi turan waku aiweꞌeg wo o aikotã aikotã watoineꞌen iꞌatupyꞌasetpiat turan. Waku iweꞌeg kahato rakaria ewy watoineꞌen. Yt naku i watiꞌatumuꞌe miitꞌin yt naku i nug haria aito pote. Aimimuꞌeria yt tikyꞌesat i ahehay Iesui etiat taꞌatupuẽti yt naku i nug haria aito pote. Yt teke i iꞌatuewaure kaꞌa pe wakuat Iesui etiat aheineꞌen hap yt ikahu i pote are. Atikyꞌesat kahato wakuaria wo o eweikupteꞌen sio areineꞌen eipyꞌasetpe sio yt. Waku eweikupteꞌen wakuat nug haria wo o itote yt uiwywuat pykai i. Miꞌi hawyi yt areineꞌen i eipyꞌasetpe pykai sehay wakuat atikuap aru iraniaꞌin wẽ pyi ehetiat eiminug koꞌi piat hap wyti aru hap atikuap. -Taꞌi yt taꞌatuꞌatoiat hin i te Iesui mohey hap iꞌatuꞌe aru uhepe. Toꞌoꞌewyꞌewy wẽtup miit piit ewy iꞌatupotpap e hap aru atikuap wy ehetiat. Taꞌi suraraꞌin ewy tuꞌuka kahato saꞌag ete e hap aru atikuap wy. Iꞌewyte taꞌatukyꞌesat yne miitꞌin Iesui ehay wakuat mohey haria iꞌatuꞌe aru uhepe meiũpe yt heremo i areineꞌen eipyꞌasetpe pykai are.

Wiripu 3:20

Maꞌato aito atipy kapiaria ahetama sese atipy pe. Miꞌi kaipyi aru tuut Ahehakyeraꞌat hat. -Hẽ eriot ro meremo meikowo watoꞌe motꞌi Aikaꞌiwat Aipotypot Iesui pe.

1 Tesaronika 1:5

Saꞌawyꞌi ti uruhenoi kahato ehepe sehay wakuat Iesui etiat maꞌato yt uruwat uruẽku kaipyi yn i maꞌato Tupana esaika hap kaipyi iꞌewyte Tupana Paꞌãu kaipyi uruiꞌatumuꞌe eipe. Taꞌi pywuat sese urutoꞌe. Urumimohey mesuwat sehay urutoꞌe uruhenoi ehepe turan. Eweikuap taꞌyn aikotã saꞌawyꞌi urutukupteꞌen eipyꞌasetpiat hap. Taꞌi eikyꞌe uruepiat hap yn ni toineꞌen urukai.

1 Timoteu 3:16

Tupana mienoi Iesui etiat watikuap kahato maꞌato yt karãpe i watikuap yne yne. Tupana yn ikuap sese hat. Miꞌi hawyi ikuap hat sese tuwemoherep taꞌyn ahowawi. Mio tã toꞌe ahepe Iesui etiat -Meiũ ti pywuat sese e. Miꞌi Miit kape atipy piaria teꞌeraꞌakasa yne. Miꞌi ti imoherep taꞌyn kat ywania puo kat ywania puo miꞌi hap tuwemoherep taꞌyn tehay wo. Miꞌi hawyi ti iꞌatu kahato raꞌyn imohey haria mesuwat yi tote. Miꞌi hawyi Tupana tioto i raꞌyn atipy kape i are.

1 Timoteu 4:12

En ni kurum iwasu te. -Uruewatꞌyp neꞌi wyti en iꞌatuꞌe epe itote maꞌato o ereineꞌen iꞌatupyꞌasetpe waku kahato rakatno iꞌatuehamo ihay hãpyk kahato rakatno hãpyk kahato woꞌokyꞌe hatno ereineꞌen. Iesui mohey sese hatno ereineꞌen. Yt wẽtup i o saꞌag etunug iꞌatuwoꞌokyryꞌi hamo. Miꞌi tã ereineꞌen mote yt uwe i itotiaria emohit kuap nagnia emimuꞌeria iꞌatuewatꞌyp neꞌi en mytkai.

1 Timoteu 6:11

Maꞌato aito ti Tupana emiitꞌin sese aito miꞌi tupono waku yt watikyꞌesat i mekewat uhekat poꞌog hap -Atiꞌatukyꞌesat e hap. Poꞌog waku watikyꞌesat hãpyk kahato Tupana wywuat waku rakat. Tupana kyꞌe hap poꞌog waku imohey hap poꞌog waku aiwoꞌokyꞌe hap poꞌog waku. -Atimohey potꞌi Iesui aru ahoꞌopot kahato pykai aiꞌe hap yn waku aiwanetup hawe aiweperupꞌi hamuat hap kat hap yn aiwanetup hawe aito Tupana emiitꞌin hap ewy.

1 Timoteu 6:3

Tukupteꞌen ti itote iraniaꞌin woꞌomuꞌe haria wẽtup sehay wuat haria yt Aikaꞌiwat Aipotypot Iesui etiat hin haria i yt uimienoi Iesui etiat yt ewywuat haria i. Taꞌi yt pywo pe hin i iꞌatumienoi.

1 Timoteu 6:6

Uwe uwe iwepiit Tupana mikyꞌesat nug hap ete sio yt kat i tekat pykai miꞌi hat toineꞌen hekat kahato rakatno Tupana wanetup hawe.

Epereu 13:5

Iꞌewyte yt naku i ti watehaꞌat iraniaꞌin ekareꞌen kape ikyꞌesat hap wywo aiwat no teran aiꞌe hap mywo. Waku watuwehum Tupana kape imiium ahekareꞌen sio iwato sio yt. -Waku kahato eimiium oktan Tupana watoꞌe waku. Katupono saꞌawyꞌi Tupana toꞌe -Yt karãpe i ti aru worohoꞌoꞌatoiat e. Yt karãpe i eikupteꞌen piku piku koꞌi sese wo e Tupana ahepe saꞌawyꞌi. Waku watikat Tupana miium koꞌi aimowepiit hap wywo maꞌato yt naku i watikyꞌesat iraniaꞌin ekareꞌen e Muisei tomiwan Teturonamia 3.5 pe.

Tiaku 1:24

Miꞌi hap ewy ti Tupana ehay watikuap saꞌag hawyi wato hawyi watiwaure raꞌyn watikuap saꞌawyꞌi rakirẽ wuat pykai.

Tiaku 3:13

Miꞌi hap ewy kahato yt naku i ahehay saꞌag yt Tupana Paꞌãu mikyꞌesat ewy i ahẽku wo. Waku watunug wakuat yt kat i aiwemotypot hap wywo. Miꞌi hap ewy waku aheineꞌen hap he rakat ewy aiminug woꞌowese hap wywo yt kat i -Uito poꞌog aiꞌe hap aiwanetup hawe. Waku yne ahehay wakuap wo watimoherep aiweꞌeg hap imotypot hamuat.

1 Peteru 1:15

Aiꞌywot atipy piat waku sese rakat. Yt kat i hin i iꞌaparap hap Tupana kaipyi. Miꞌi tupono waku aito Aiꞌywot Tupana ewaku hap ewy waku watunug mesuwarote aheineꞌen turan are.

1 Peteru 2:12

Iraniaꞌin teꞌerahaꞌat kahato ahowawi sio pywo pe watomohey sio yt hap kape. Miꞌi pote aheineꞌen hap mesuwarote aikotã Iesui ewy hãpyk kahato rakat ewy waku watopyhuꞌat are. Uiwyriaꞌin waku watunug hãpyk kahato iꞌatuehamo. Miꞌi pote meiũran hoꞌopot hap eꞌat putꞌok e iꞌatuete hawyi meremo taꞌatumohey aikotã aito hap ewy. Miꞌi hawyi Tupana motypot hap ete aikotã aiꞌewy tukupteꞌen hãpyk kahato watunug wakuat pote. Mesup iꞌatumikyryꞌi hamo watoineꞌen watomohey Iesui pote -Yt naku i nug haria iꞌatuꞌe maꞌato yt pywo pe i. Katupono aikotã wẽtup ywania miꞌiria tukupteꞌen yt Tupana ywania hin i yt aiꞌe hap ewywuat i miꞌiria.

2 Peteru 1:3

Tutum ahepe yne yne towatnuat yt kat saꞌup i. Tesaika hap toieineꞌen hap tewaku hap tutum ahepe are. Watikuap Haꞌyru Iesui hawyi tutum yne yne tomotypot hamuat hap tutum. Taꞌi iꞌewyte watomohey Iesui hawyi Tupana aiꞌairo topotpoꞌororia koꞌi wo are.

2 Peteru 1:6

Waku hawyi iꞌewyte toikyꞌesat aiwewaĩ kuap hap toikyꞌesat. Miꞌi hap watikuap hawyi toikyꞌesat aiwoꞌokyꞌe hap. Iꞌewyte toikyꞌesat yt aipohep i tomohey hap etiat hap toikyꞌesat. Miꞌi watunug kuap hawyi toikyꞌesat aito toiãꞌãkap koꞌi ewy hap toikyꞌesat are.

2 Peteru 3:10

Maꞌato pywo putꞌok e irane mekewat eꞌat pe. Taꞌi pywo ti aru putꞌok e Aikaꞌiwat piat miitꞌin apiheg hap. Maꞌato ti karamuo kat eꞌat pe yt uwe i ikuap maꞌato ti putꞌok e hamuat. Aikotã seroꞌok e hat ewywuat tuut irane. Kat eꞌat pe yt uwe i ikuap are. Mekewat eꞌat pe ti aru ikahuro raꞌyn waikiru koꞌi. Mekewat eꞌat pe tehay pirik wo toimoweityk taꞌyn waikiru koꞌi. Iꞌewyte mesuwat yi tuweityk taꞌyn. Miꞌi hap eꞌat pe ti aru yi ihywop taꞌyn hakup wote yt aikopiat wẽtup hakup iꞌewyꞌewy i hakup sese ti raꞌyn. Miꞌi hawyi ti aru wukꞌe yne raꞌyn mesuwarotiat miitꞌin minug saꞌag koꞌi. Iꞌewyte yi ikahuro raꞌyn.

2 Peteru 3:12

Miꞌi hawyi ti waku -Eriot ro Mehin Eriot ro Mimi watoꞌe yn naꞌyn. Miꞌi pote ti watehaꞌat kahato raꞌyn Tupana putꞌok e hap eꞌat kape. Yt pya i raꞌyn watoꞌe yn naꞌyn. Taꞌi wukꞌe ti aru waikiru koꞌi. Miꞌi hawyi ti aru tuweityk yne raꞌyn watoꞌe. Watikuap taꞌyn mio tã e hap. Taꞌi meiũran ti aru yne raꞌyn iheg nakat iꞌewyte yt iheg i rakat i ti aru wukꞌe raꞌyn hakup pote ihywop yne. Maꞌato ti aito watikuap taꞌyn.