2 Peteru 2:10 - Sateré-Mawé

¹⁰ Tupana timoma yne raꞌyn tawa Sutuma tawa Kumura piaria. Katupono Tupana yt tikyꞌesat hin i iꞌatuwat iꞌatuieineꞌen hap. Wuatꞌi yne taꞌatupuꞌi mikyꞌesat ewy yn taꞌatunug wuatꞌi haryporiaꞌin wywo wuatꞌi ihainiaꞌin wywo. Taꞌatupiit mikyꞌesat hap koꞌi yn taꞌatunug toꞌope toꞌope. -Yt kan hamo i Tupana mikyꞌesat hap koꞌi taꞌatuꞌe haype. Taꞌatumikyꞌesat ewy yn taꞌatunug. Yt taꞌatumotypot hin i Tupana waĩꞌe hap iꞌewyte miitꞌin waĩꞌe hap yt taꞌatumotypot i. Yt teꞌeruwemoti hin i taꞌatuminug saꞌag hap koꞌi ete. -Atunug mote atunug e haria yn. Taꞌi miꞌiria ti toꞌokyryꞌi kahato neꞌi wakuaria ete. Iꞌewyte atipy piaria ete toꞌokyryꞌi. Taꞌi atipy piaria ti sakpoꞌe ikahuria iꞌewyte poꞌog hesaika rakaria. Miꞌi pykai wemuꞌe haria yt pywuat i enoi haria -Uruto poꞌog iraniaꞌin kai iꞌatuꞌe yn iꞌewyte mio tã iꞌatuꞌe atipy piaria pe.

2 Peteru 2:10 ပူးပေါင်းရင်းမြစ်များ

Iruka 11:25

Miꞌi hawyi tuut i raꞌyn miit saꞌawyꞌi te wuat toineꞌen hap kape. Miꞌi hawyi waku kahato toipuẽti mekewat miit piit aikotã aiꞌyat wahywytip rakirẽ hap ipainug hap ewy raꞌyn toipuẽti.

Iruka 19:14

Miꞌi hawyi toto raꞌyn tetama pyi. Miꞌi hawyi muap upi te morekuat toineꞌen turan so tetama piaria sehay taꞌatupoꞌoro morekuat eꞌyian me te enoi hamo. Mio tã iꞌatuꞌe -Yt uruikyꞌesat i miꞌi ti uruporekuatno toineꞌen iꞌatuꞌe.

Iesui Potmuꞌeria 23:5

Miꞌi hawyi Pauru tiwesat -Yt atikuap i wyti paꞌi koro meiũ hap uiwyriaꞌin katupono miwan me -Yt ehay koꞌi koꞌi teiꞌo eiporekuat ete e ti ainapin hawe e Pauru.

Humanu 8:1

Watunug Iesui Aiꞌakag wo hawyi wẽtup miit ewy yn watopyhuꞌat iwywo katupono watoineꞌen Iesui pe iꞌewyte toineꞌen ahepe. Miꞌi hawyi Tupana yt toꞌe hin i ahepe -En yt naku i e hap. Worohoꞌoꞌapiheg yt e i ahepe.

1 Kuriniu 6:9

Yt uwe i aru woꞌomaꞌatꞌi maꞌatꞌi hat toineꞌen aikope Tupana toineꞌen Morekuat nuat hap tote. Eweꞌeg wo o eiwemaꞌat hap pupi katupono eweikupteꞌen wuatꞌi haryporia wywo wuatꞌi ihainia wywo pote yt karãpe i putꞌok eweiꞌe Tupana etawa pe. Iꞌewyte yt uwe i mo wuat minug tupanaria motypot haria itote. Seꞌaito wywuat ieineꞌen hat seharyꞌi wywuat ieineꞌen hat yt uwe i aru itote. Haryporiaꞌin eꞌaito wo haryporia te iꞌewyte ihainiaꞌin eꞌaito wo ihainiaꞌin ne haria yt uwe i itote.

2 Kuriniu 10:3

Taꞌi eiꞌewywuat rẽ uito ipuꞌi rakat ikag nakat rẽ. Maꞌato uhesaika hap yt tuut i uipiit kaipyi. Tupana Paꞌãu kaipywiat rat neꞌi wyti uhesaika hap toineꞌen. Miꞌi kaipyi neꞌi wyti uhesaika ahiag uuka hamo.

Ewesu 4:19

Karãpe taꞌatunug saꞌag wemoti hap ewy miꞌi hawyi yt teꞌeruwemoti hin i. -Yt naku i miꞌi tã eweikupteꞌen e Tupana pykai yt paa iꞌatuꞌe hin i. Teꞌeruwepyi taꞌatupiit mikyꞌesat saꞌag hap oktan yn taꞌatunug neran yt naku i. Taꞌatuewaire hap kape yn teꞌeruwewanetup taꞌatupyꞌa pe. Yt teꞌeruwewaĩ teran hin i yne saꞌag nug hap ete. Taꞌatueko saꞌag nug hap kape yn teꞌeruwepotpap miitꞌin ehamo taꞌatunug. Aikotã aikotã miitꞌin moti hap ewy yn taꞌatunug wuatꞌi ehamo maꞌato yt teꞌeruwemoti hin i pykai.

Ewesu 5:5

Pyno uiwyriaꞌin waku aiweꞌeg wo katupono pywo ti yt uwe hin i ti aru yt nakuat i wanetup saꞌag haria tukupteꞌen aru atipy pe aikope Aipotypot Iesui toineꞌen Morekuat no hap tote are. Yt uwe i itote atipy pe uiatno yn mo e haria yt hegyiꞌat i rakaria. Eweꞌeg wo o miꞌi pupi katupono yt ahegyiꞌat i hap yt naku i sese Tupana wanetup hawe aikotã iraniaꞌin tupanaria motypot haria yt naku i nug hap ewywuat minug motypot hap ewy yt ahegyiꞌat i hap are. Yt uwe i aru atipy pe wuatꞌi haryporia wywuat ieineꞌen haria wuatꞌi ihainia wywuat ieineꞌen haria yt uwe i itote katupono aito Aipotypot Iesui emiit.

Korosi 3:5

Waku watiꞌakit yne aiwanetup saꞌag hap aiwanetup hawiat. Waku watiwaure yne saꞌawyꞌi wuat aiwary wary hap aheꞌaito aito hap. Miꞌi hap waku watoiat yne e. Waku watipun yne yt ahegyiꞌat i hap katupono yt ahegyiꞌat i hap saꞌag kahato topyhuꞌat Tupana wanetup hawe. Aikotã ariaꞌyp nu kawiat Tupana iãꞌãkap motypot hap yt naku i hap ewy te yt ahegyiꞌat i hap topyhuꞌat yt naku i Tupana wanetup hawe. Waku watimak aipiit mikyꞌesat saꞌag koꞌi aiwemoti hap koꞌi. Waku wahasep wẽtup ok aheharyꞌi wuat kyꞌesat i hap wẽtup ok aheꞌaito wuat kyꞌesat i hap. Waku waĩ watoꞌe aiwanetup hawe aipotmoti te moti te hap koꞌi are. Waku watiꞌauka aiꞌe hap aiwanetup hawe -Uiwatno yn atikyꞌesat ekat koꞌi e hap. Waku yt kat i ihainia wary wo hap aiwanetup hawe.

1 Tesaronika 4:7

Tupana yt tikyꞌesat hin i ti yt iweꞌeg i rakaria wo aheineꞌen hap maꞌato toꞌewywuat ahewaku hap yn toikyꞌesat.

2 Timoteu 3:2

Katupono mekewat eꞌat pe yt hegyiꞌat i rakaria tukupteꞌen kahato -Ewat uiatno yne iꞌatuꞌe. Uito poꞌog ekai e haria. Uito poꞌog atikuap ekai iꞌatuꞌe. Toꞌokyryꞌi kahato Tupana ete. Iꞌatuehay taꞌatuꞌywot taꞌatuty piat yt taꞌatumohey hin i. Etum neꞌen neꞌi ikahu rakat iꞌatuepiat hawyi -Waku yt iꞌatuꞌe hin i egyiꞌat hawe. -Yt kat i Tupana iꞌatuꞌe i.

Titu 1:7

Tupana potpap nug haria pote waku yn nug hat waku etiꞌairo. Maꞌato -Uito poꞌog waku iraniaꞌin kai e hat yt etiꞌairo teiꞌo. Iꞌewyte marakꞌa yt etiꞌairo teiꞌo. Mahy u hat pote yt naku Iesui mohey haria apykok hat wo topyhuꞌat areꞌe. Yt etiꞌairo teiꞌo miꞌi hat ewywuat. Wuꞌuka teran hat iꞌewyte yt naku i -Uiwatno yn naꞌyn e hat. Miꞌiria ewywuaria yt putꞌok e Iesui mohey haria apykok hanuaria wo. Miꞌi pote waku yn nug hat etiꞌairo.

Epereu 13:4

Uiwyriaꞌin Iesui mohey haria -Waku heꞌaito kahato rakatno ereineꞌen e. Waku iharyꞌi kahato rakatno ereineꞌen e. Waku eharyꞌi wywo yn ewaire e. Waku eꞌaito wywo yn ewaire e. Miꞌi etunug pote arehum ewowi e Tupana maꞌato iraniaꞌin wywuat eiwoꞌopytyk pote -Yt naku i en areꞌe e. Woroꞌapiheg aru e Tupana yt iweꞌeg i haria pe. Iꞌewyte wewiat weweneru wuatꞌi piat haria atiꞌatuꞌapiheg yne yne e ahepe. Iꞌewyte wewiat weweneru haria kyiꞌat haria atiꞌatuꞌapiheg e. Hewaire rakaria uimiꞌapiheg wuaria e Tupana. Eꞌaito wywo eharyꞌi wywo kahato hap uimowepiit hap e Tupana.

2 Peteru 3:3

Tuut wyti aru eimuꞌe hanuaria. Miꞌiria ti aru taꞌatumikyꞌesat ete yn eimuꞌe. Taꞌatupiit piat mikyꞌesat saꞌag koꞌi hap taꞌatunug kahato ekyewi iꞌewyte ehekareꞌen kyewi. Miꞌi hawyi eimimohey Iesui tuut aru e hap ete taꞌatukyryꞌi kahato.

Iuta 1:10

Yt naku i watopyhuꞌat aikotã tawa Sutuma hawyi tawa Kumura eko ewy. Itotiaria yt teꞌerokenꞌẽ hin i atipy kaipywiaria pupi. Iꞌewyte miꞌiria taꞌatumikyryꞌi kahato yne akag koꞌi etiat haria. Yt taꞌatukuap i Tupana esaika hap pykai iꞌatuehay saꞌag neꞌi. Yne akag koꞌi ete iꞌatuehay saꞌag. Taꞌi miꞌiria ti aikotã gaꞌapy piaria haiwot rakaria ewy tukupteꞌen katupono torannia miitꞌin akag koꞌi ete iꞌatuhuhaꞌi neꞌi iraniaꞌin mimotypot koꞌi ete. Yt taꞌatukuap i waku rakaria haype hawyi yne wakuap koꞌi ete iꞌatusaiwot. Miꞌiria ti Tupana miꞌatusatyꞌi satyꞌi koꞌi katupono tuweupiaria raꞌyn taꞌatuminug saꞌag ete yn teꞌeremoehapap. Miꞌiria iraniaꞌin moweukaꞌi taꞌatueso wywuat haria. Miꞌiria wakuap sese koꞌi yt kuap i haria aikotã awyato miit auka hat ewywuaria iꞌatueko. Miꞌi pote miitꞌin miꞌauka wo teꞌeropyhuꞌat awyato auka hap ewywuat are. Iꞌatuhaiwot popuo syꞌat iꞌatuꞌe yt nakuap i utui hap ete hawyi teꞌeruwewi teꞌeruweꞌauka.

Iuta 1:16

Iꞌatuweukaꞌi tetiat hap sio tomohit hap koꞌi toiꞌapykok yne hamo. AheTupana tuut tesuraraꞌin sem wywo e Enoki nimo. Miꞌiria ti taꞌatumikyꞌesat saꞌag ewywuat raꞌyn nug aat kaꞌap maꞌato yt heremo i haria are. Taꞌatuwẽ pyi ti -Uito poꞌog wuatꞌi kai iꞌatuꞌe ahepe are. Miꞌiria tikyꞌesat kahato taꞌatumotypot kahato hap -En poꞌog urukai iꞌatuꞌe iraniaꞌin hap. Miꞌiria ti ikat kahato taꞌatumotypot kahato -En ni yt naku i rakat iꞌatuꞌe wakuaria pe. Karãpe aiwat aimikyꞌesat ete aipowyro hawyi aheromopusu kahato hap -Yt naku i ti meke tã miꞌi miit ewy watunug iꞌatuꞌe iraniaꞌin me ahetiat pe. Yt watiꞌatumowepiit kuap i raꞌyn miꞌiria are. Taꞌatumikyꞌesat saꞌag yn taꞌatunug neran mote wakuat yt taꞌatunug kuap i taꞌatuhãꞌãg pykai are. -Uito ti waku kahato poꞌog torannia kai wakuap atunug iꞌatuꞌe. Waku kahato en iꞌatuꞌe ahepe ahekat kyewi. Iꞌatuehay se rakat taꞌatuehay wo aimowepiit maꞌato yt pywo pe hin i aimaꞌat teran haype neꞌi are. Miꞌi tã hap ete teꞌeremopokuap kahato. Miꞌiria ti teꞌeropotmuꞌe wẽtup sehay yt Iesui etiat enoi haria hin i. Eiweꞌeg wo o Tupana ehay pun haria miꞌiria are.

Iuta 1:18

Mekewat saꞌawyꞌi wuaria Aipotypot Iesui potpoꞌororia sese ainapin kahato miꞌiria aimaꞌat teran haria ete aimaꞌat pupi are. Taꞌi mio tã iꞌatuꞌe ahepe 12 ok takaria -Meiũran wuatꞌi kahuro hap eꞌyian mete wyti aru tõꞌẽ kahato wẽtup ehay enoi haria. Miꞌiria ti aru aiꞌatumaꞌat reran haria iꞌatuꞌe raꞌyn ahepe. Mekewat yi kahuro hap yt pya i raꞌyn turan putꞌok iꞌatuꞌe ahowawi. Miꞌiria ti ikohyeput kahato taꞌatupiit mikyꞌesat guꞌuro ypy yn nug hap upi iꞌatuꞌe. Tõꞌẽ ehewowi wẽtup sehay moherep hanuaria iꞌatuꞌe. Eimimohey hãpyk takat Iesui etiat mohit hanuaria tõꞌẽ hawyi eipyꞌasetpe tukupteꞌen iꞌatuꞌe 12 ok takaria. Miꞌiria ti taꞌatupiit mikyꞌesat yt naku i guꞌuro ypy nug hap etiat wemoehapap haria yt Tupana mikyꞌesat wuatꞌi eꞌat piat ieineꞌen hap yt kyꞌesat i haria iꞌatuꞌe ahepe saꞌawyꞌi 12 ok takaria.

Iuta 1:4

Koitywy tuwehytꞌok tuereto aipyꞌasetpe Tupana mohey hap pun haria. Yt Tupana motypot rakaria i miꞌiria are. Miꞌiria aipyꞌasetpe tukupteꞌen maꞌato yt naku i nug hamuat aimaꞌat hamo tõꞌẽ ahowawi. Miꞌiria ti Tupana Saꞌyru yt kuap i haria. Miꞌiria ti aikotã Tupana ehay enoi haria teꞌeroꞌe saꞌawyꞌi te hap ewy. Mio tã iꞌatuꞌe -Tuut wyti aru eimaꞌat hanuaria sese e miwan me. Miꞌiria wyti aru uimiꞌatuꞌapiheg wuatnuaria teꞌeropyhuꞌat wuatꞌi eꞌat piat nuaria e Tupana miwan me miꞌiria etiat hap nug haria. Miꞌiria ti yt kat i uimotypot hap iꞌatuwanetup hawe haria e. Miꞌi haria wyti aru tuwehytꞌok wehytꞌok eipyꞌasetpe uimotypot yat pe yt naku i nug hamo e. Miꞌiria Tupana e hap ewy -Taꞌi waku ti watunug saꞌag aimikyꞌesat ewywuat iꞌatuꞌe. Waku ahewaire waire kahato iꞌatuꞌe aru are. Taꞌi Tupana yt aiꞌapiheg hin i katupono ti aikyꞌe kahato Tupana iwese kahato rakat pote iꞌatuꞌe aru aimuꞌe saꞌag neꞌi. Yt naku i watunug Tupana Mipoꞌoro Aipotypot no iꞌatuꞌe aru miꞌiria e saꞌawyꞌi te Tupana miwan me eimaꞌat reran haria etiat.