2 Peteru 1:8 - Sateré-Mawé

⁸ Miꞌi tã watukupteꞌen mote ti aru ikahu kahato watoineꞌen are. Miꞌi hawyi ti aru hekat kahato rakaria wo watoineꞌen Tupana motypot hanuaria aito hawyi are. Miꞌi hawyi ti ihãite rakatno watukupteꞌen are. Miꞌi hawyi aikotã mekewat mikoi haat kahato rakat ewy watoineꞌen are. Miꞌi hawyi ti aru watukupteꞌen Aikaꞌiwat Iesui kuap haria kahato are. Miꞌi hawyi ti aru Aiporekuat no kahato topyhuꞌat Aikaꞌiwat are.

2 Peteru 1:8 ပူးပေါင်းရင်းမြစ်များ

Mateu 13:22

Maꞌato iraniaꞌin wyti tukupteꞌen teꞌerepomohepapꞌi mesuwat rotiat taꞌatuekat puẽti hamuat ete yn. Miꞌi haria ti aikotã mikoi iãꞌỹi yt haat i rakaria ewy wuaria tukupteꞌen.

Mateu 20:3

Meiũran ihatꞌok poꞌog hawyi toto aikope miitꞌin tikyiꞌat wuatꞌi hap kape. Miꞌi turan itote toiꞌatupuẽti yt kat nug i haria motpap ekatup eharia.

Mateu 20:6

Miꞌi hawyi porap wãtymꞌi turan poꞌog toiꞌatupuẽti toto hap upi yt ipotpap i rakaria. Miꞌi hawyi miꞌiria pe -Kat poteĩ yt eipotpap hin i e. Yt kat i apo eiminug wuat motpap e.

Mateu 25:26

Miꞌi hawyi ipyꞌahak ikaꞌiwat hawyi toꞌe haty wo -Yt naku i kahato en. Eperup kahato rasig motpap nug hamo e. Pyno etikuap taꞌyn uito atiterek yt uimikoi wuat i aikope yt atikoi koꞌi i kaipyi atitetek etikuap taꞌyn.

Iuwãu 15:2

Miꞌi hawyi eipe mikoi yp iaga ewy eweikupteꞌen e. Haga yt haat i rakat tohywytip iꞌywytꞌokpy hawyi haga yt naku i rakat toiterek yt imosat i hat miꞌi hawyi iraniaꞌin haga koꞌi haat kahato i raꞌyn e.

Iuwãu 17:3

Miꞌi hawyi miitꞌin teꞌeropyhuꞌat En Tupana pywuat rakat kuap haria wo hawyi iꞌewyte Uito emipoꞌoro kuap haria wo hawyi wuatꞌi eꞌat piat gupteꞌen haria wo teꞌeropyhuꞌat e.

Iuwãu 5:42

Eipe worohoꞌokuap kahato. Atikuap taꞌyn yt kat i Tupana kyꞌe hap eipyꞌa pe e.

Humanu 12:11

Yt iperup takaria ewy i waku watopyhuꞌat. Waku watuwepotpap aat hakup wywo. Yt ereineꞌen neiꞌo sẽtup e hatno. Aikaꞌiwat eropat hat sese wo waku watoineꞌen. Waku aipyꞌa pyi Aikaꞌiwat mowepiit hap yn aiwanetup hawe ipotpap nug hap ete.

1 Kuriniu 15:58

Urumikyꞌeria uhekatuwyria yt eweitoiat teiꞌo ehepiat Iesui mohey hap. Waku eweikupteꞌen motꞌi o iwywo e yne eꞌat pe. Poꞌog Tupana mikyꞌesat ewy ewetunug no katupono watikuap taꞌyn ahaꞌup iwato tutum aru aipotpap iwato hap oktan. Watikuap taꞌyn aiminug Tupana mikyꞌesat ewywuat hap wuatꞌi eꞌat piat topyhuꞌat.

2 Kuriniu 13:5

Waku eweiꞌe eipyꞌa pe sio -Uito Tupana Saꞌyru mohey hat sese sio yt waku eweiꞌe. Waku watikuap kahato aipyꞌa pe sio Tupana saꞌyruꞌin sese uito sio iꞌewyte sio Tupana sakiꞌytꞌin sese uito sio yt hap. Maꞌato yt eweikuap i te pote eiweꞌeg wo o. Yt naku i watopyhuꞌat piku piku koꞌi ewy neꞌi yt iꞌywot wekuap takaria i ewywuaria wo neꞌi. -Uruikuap kahato Tupana uruꞌywot sese hap. Uruikuap Iesui mohey haria sese uruto hap.

2 Kuriniu 8:2

Maꞌato miꞌi pykai iꞌatuwepiit hap yn topyhuꞌat. Miꞌi pykai taꞌatumoꞌẽ taꞌatuepiat ekat hit yne iraniaꞌin me. Poꞌog iꞌatuegyiꞌat hekat rakaria kai taꞌatumoꞌẽ yne pote. Katupono taꞌatumoꞌẽ yne miitꞌin powyro hamo.

2 Kuriniu 8:7

Uruiꞌatumohey kahato eipe uruwanetup hawe. Eweikuap kahato aikotã waku hãpyk nug hap ete. Howapy kahato imohey hap wywo eipe. Tupana Paꞌãu ihay hesaika kahato eikaipyi. Tupana kuap haria sese eipe. Yt eipohep hin i Tupana mikyꞌesat nug hap ete. Iꞌewyte wekyꞌe hap ete eweikuap kahato. Taꞌi yne miꞌi hap koꞌi ete poꞌog wakuaria wo eweikupteꞌen. Pyno koitywy wahãꞌãg sio eipe poꞌog hegyiꞌat rakaria sio yt hap kuap hamo.

2 Kuriniu 9:14

-Tupana tawa Kurintiu piaria emohey haria ekaipyi tukupteꞌen hegyiꞌat sese rakaria. Miꞌi pote etiꞌatupoityro o miꞌiria katupono koitywy uruikyꞌe kahato miꞌiria. Etimoherep iꞌatuepe aikotã uruiꞌatukyꞌe miꞌiria hap koꞌi iꞌatuꞌe aru Tupana pe. Eimipowyro koꞌi tawa Kurintiu piaria iꞌatuꞌe.

Wiripu 1:9

Miꞌi tã areꞌe Tupana pe -Uruꞌywot etum no esaika hap emohey haria pe tawa Wiripu piaria pe iꞌatuwoꞌokyꞌe hamuat hap poꞌog poꞌog yne eꞌat pe areꞌe Tupana pe ehupi. Atikyꞌesat yne miꞌiria ehay yne pywuat kuap haria wo hap poꞌog poꞌog saꞌawyꞌi wuat kai. Taꞌi atikyꞌesat kahato miꞌiria ikuap kat som waku kat som yt naku i hap kuap hamo ewanetup hap oktan.

Wiripu 2:5

Poꞌog waku aiwanetup hap Aikaꞌiwat Iesui wanetup hap ewy katupono tuwemohit kahato ihakyꞌeꞌi kahato miit emiit no topyhuꞌat.

Wiripu 3:8

Iꞌatu kahato uiwanetup hawe saꞌawyꞌi. Miꞌi atunug mote waku raꞌyn areineꞌen Tupana wanetup hawe uiꞌe hap. Atunug uheko hawyi waku pe areineꞌen Tupana wanetup hawe uiꞌe hap saꞌawyꞌi. Miꞌi hap ewywuat saꞌawyꞌi wuat uiwanetup hap atipun yne raꞌyn aikotã watipun iun aiꞌyat pyi hap ewy katupono koitywy atipuẽti poꞌog wakuat wuatꞌi kawiat rakat. Koitywy Iesui kuap hatno areineꞌen. Atipuẽti Iesui poꞌog waku. Miꞌi Uikaꞌiwat no raꞌyn. Miꞌi yn naꞌyn atikyꞌesat uiwanetup hawe. Miꞌi yn uimoewaku hat. Huu yn naꞌyn uimohãpyk kuap Tupana wanetup hawe. Miꞌi pote koitywy atipun yne saꞌawyꞌi wuat uiwanetup hap koꞌi saꞌawyꞌi wuat uiꞌe hap koꞌi saꞌawyꞌi wuat uiwemoewaku hap hawyi Aikaꞌiwat yn uimoewaku hat are. Tupana yn naꞌyn uhehakyeraꞌat kuap hat koitywy are yn naꞌyn. Koitywy saꞌawyꞌi wuat uiꞌe hap koꞌi atipun yne katupono atimohey Ahehakyeraꞌat hat Aipotypot yn. Iesui yn atikyꞌesat uiwanetup hawe are.

Korosi 1:10

-Tupana uruikyꞌesat kahato tawa Korosi piaria Epaꞌãu eiam kahato wo eweꞌeg hamo iꞌewyte emikyꞌesat nug kuap hap urutoꞌe mesuwe uruhẽtup. Uruikyꞌesat miꞌiria aikotã iꞌyp iꞌywa kahato rakat ewy hewo hewo kahato hap ewy wyti uruikyꞌesat kahato miꞌiria Tupana urutoꞌe. Pyno uruikyꞌesat miꞌiria wakuap yn nug haria En ewy hap uruikyꞌesat. Iꞌewyte uruikyꞌesat ekuap hap ihatꞌok ewy ewy putꞌok e Esaꞌyru mohey haria ete urutoꞌe uruhẽtup Tupana pe.

Korosi 2:7

Waku watopyhuꞌat Aikaꞌiwat ewy are. Saꞌawyꞌi uruiꞌatumuꞌe kahato eipe Iesui ete. Miꞌi hawyi eweimohey Iesui hawyi waku. Koitywy maꞌato waku eweimohey poꞌog poꞌog yne eꞌat. Aimikoi hapo kahato rakat ti ihãite raꞌyn tuwesapo nug kahato hawyi. Miꞌi hap ewy karãpe watunug Aimimohey mikyꞌesat ewy aat kaꞌap. Watimohey kahato raꞌyn Iesui hawyi ahehãite hap kahato raꞌyn watikuap. Miꞌi aikotã tuwemotag kahato ariaꞌyp wato ewy hapo yi piit pe hap ewy watoineꞌen. Miꞌi hap ewy waku ahehay watipehik Iesui ehay ete. Miꞌi hawyi -Waku kahato En Iesui aiꞌe hap yn watoꞌe aipyꞌa pe. Arehum ewowi watoꞌe yn ahehãite imohey hap kaipyi.

Korosi 3:16

Sehay wakuat Aipotypot etiat Iesui etiat Tupana tikyꞌesat kahato aiwanetup hawe aipyꞌa pe. Toikyꞌesat yne Iesui mienoi aikai howapy sakpo hap ti raꞌyn toikyꞌesat. Toikyꞌesat yne Tosaꞌyru ehay aipyꞌa pyi tuwẽtem nakat aikotã hekat rakat hegyiꞌat rakat tum hap ewy. Toikyꞌesat ahegyiꞌat kahato hap tehay wywuat torannia pe. Toikyꞌesat watiꞌatumuꞌe kahato iraniaꞌin tehay wepy puat hap. Toikyꞌesat watiꞌatumuꞌe kahato tehay wo iraniaꞌin hap yne aiweꞌeg hap wywo waku aiwoꞌomuꞌe hamo. Toikyꞌesat morekuat Tawi wepy hawuo watuwepy hap. Toikyꞌesat tehay kaipywiat hap watuwehum kahato tewowiat wepy hamuat wuatꞌi ehamo hap. Toikyꞌesat watuwepy mekewat sehay ikahu rakatno tuetiat hamo. Toikyꞌesat watuwepy mekewat saꞌawyꞌi wuat wepy hap pyi. Toikyꞌesat towawiat wepy hap aipyꞌa pywiat hap Topaꞌãu wywo. Toikyꞌesat watuwehum tewowiat wepy hap mywo -Waku kahato En aiꞌe hap toikyꞌesat. -Emiium waku kahato Tupana aiꞌe hap toikyꞌesat.

1 Tesaronika 3:12

Uruiꞌatukyꞌe kahato eipe. Miꞌi hap ewy atikyꞌesat eiwoꞌope eiwoꞌokyꞌe hap miꞌi pote ahẽtup Tupana pe -Etiꞌatumoesaika o poꞌog poꞌog Iesui mohey haria ekyꞌe poꞌog hamo iꞌewyte iraniaꞌin atukyꞌe hamo are. Miꞌi hap ti ahẽtup Tupana pe ehupi.

1 Tesaronika 4:1

Uruwyriaꞌin koitywy uruhẽtup kahato ehupi poꞌog poꞌog Tupana mowepiit haria wo eweikupteꞌen hap Iesui mikyꞌesat ewy kahato. Uruikuap taꞌyn ti koitywy Tupana mowepiit haria wo raꞌyn eweikupteꞌen. Miꞌi tã raꞌyn pykai ti uruhẽtup poꞌog poꞌog ne.

2 Tesaronika 1:3

Uruwyriaꞌin karãpe urutuwekuekatu ehewowi turan -Waku kahato En Tupana uruꞌe hap yn topyhuꞌat. Tupana urutuwehum kahato eete katupono itag naꞌyn poꞌog poꞌog iꞌatukai emohey hap urutoꞌe. Koitywy woꞌokyꞌe kahato haria wo raꞌyn tukupteꞌen waku kahato urutoꞌe. Miꞌi tupono ehewaku hap upi urutuwehum aat kaꞌap Tupana ete.

1 Timoteu 5:13

Miꞌi hawyi iraniaꞌin tuwemohapap kahato aiperup hap ete satꞌi satꞌi getap koꞌi upi neꞌi. Miꞌi hap kaipyi tuwemohapap woꞌokuasa kuasa i hap ete. Aiwuꞌuka hap neꞌi enoi enoi hap ete. Woꞌomaꞌatꞌi maꞌatꞌi hap ete yn ihay. Wemoti hap sehay saꞌag yt watikuap teran i rakat taꞌatuhuꞌat.

Titu 3:14

Pyno Titu koitywy waku watoꞌe aipotmuꞌeria pe Iesui mohey haria pe -Eweiꞌatumuꞌe ro hoꞌopot haria powyro hamuat ete. Iꞌewyte aikotã waku hatek sese rakaria powyro hamo eweikupteꞌen hap ete waku watoꞌe aipotmuꞌeria pe katupono yt naku i kahato ti watoineꞌen neꞌen neꞌi ahowawi yn wanetup hatno neꞌi. Waku watiꞌatunapin Iesui mohey haria.

Wiremu 1:6

-Tupana atikyꞌesat kahato Wiremuꞌin wẽtup ehay yn Iesui mohey haria teꞌeropyhuꞌat are Tupana kape. Atikyꞌesat kahato Wiremuꞌin wẽtup piit ewy yn tukupteꞌen hamuat. Tupana urupowyro kahato En poꞌog poꞌog eminug ikahu kahato rakat kuap hamo Esaꞌyru urupotypot Iesui emiwan neꞌen neꞌi iꞌewywuat haria pe urunug Tupana are.

Epereu 6:12

Pyno yt naku i watoineꞌen iperup woꞌomuꞌe hap etiat rakatno neꞌi are. Yt naku i iperup neꞌi imohey hap ete. Yt naku i watopyhuꞌat yt ikuap teran i haria wo e. Yt naku i aiwanetup hap watimokenꞌẽ neꞌi Tupana Paꞌãu miat aimuꞌe turan. Waku watukupteꞌen aikotã saꞌawyꞌi wuat Tupana ehay moherep haria ewywuat imohey iwatoꞌin rakaria ewywuat meimuẽwat saꞌawyꞌi wuaria Tupana ehay moherep haria ewy. Katupono miꞌiria tukupteꞌen wuatꞌi eꞌat pe Tupana mohey motꞌi haria. Yt teꞌeruwemoti hin i -Atimohey taꞌatuꞌe hap ete. Yt taꞌatupun hin i taꞌatumimohey Tupana piat -Atunug aru e hap mohey hap. Waku miꞌiria ewywuaria watukupteꞌen. Yt naku i pya kahato neꞌi aiwanetup hap Tupana kapiat hap.

2 Peteru 1:2

Atikyꞌesat kahato eipe Iesui kuap kahato haria wo eweikupteꞌen. Taꞌi eweikuap Aipotypot Iesui hawyi Tupana tum neꞌen neꞌen neꞌi tegyiꞌat hap ehepe. Iꞌewyte tutum woꞌowese hap tutum yt kat saꞌup i. Aipoityro kahato Tupana tuwehay pyi. Iwese pote tutum yne ahepe. Tutum iwato kahato typy sakpo itote. Toimoꞌẽ kahato tegyiꞌat hap are. Tutum ahepe wuatꞌi tokuap hap Tosaꞌyru kuap hap kaipyi tutum yne yne ahepe are.

2 Peteru 1:3

Tutum ahepe yne yne towatnuat yt kat saꞌup i. Tesaika hap toieineꞌen hap tewaku hap tutum ahepe are. Watikuap Haꞌyru Iesui hawyi tutum yne yne tomotypot hamuat hap tutum. Taꞌi iꞌewyte watomohey Iesui hawyi Tupana aiꞌairo topotpoꞌororia koꞌi wo are.

2 Peteru 2:20

Maꞌato tukupteꞌen yt naku i nug hap atoiat haria Iesui kuap haria maꞌato meiũran teꞌeraꞌaipok i mekewat saꞌawyꞌi wuat seko saꞌag kape raꞌyn mesuwat yi totiaria wemohun hap kape i raꞌyn. Miꞌi hawyi ti aikotã kiã eꞌyni piatnuaria ewy tukupteꞌen. Miꞌi hawyi ti yt teꞌeruwenoꞌẽ kuap i iraꞌyn mekewat taꞌatuminug saꞌag hap saꞌawyꞌi wuat kaipyi. Miꞌi hawyi taꞌatuminug saꞌag hap koꞌi po pe i raꞌyn tukupteꞌen. Miꞌi hawyi poꞌog poꞌog saꞌag saꞌawyꞌi wuat kai teꞌeropyhuꞌat.

2 Peteru 3:18

Pyno eiwemotag o Tupana ehay wo hegyiꞌat hap kaipyi are iꞌewyte Tupana eikyꞌe hap kaipyi. Ahehakyeraꞌat hat Aipotypot Iesui mohey hamo eiwemotag o. Imohey kahato haria wo eweikupteꞌen hawyi ihãite kahato rakaria eipe. Imohey hap upi ihay wakuat upi yn atikyꞌesat eweikupteꞌen uito areꞌe ehepe uimiwan me ahenoi.