2 Peteru 1:3 - Sateré-Mawé

³ Tutum ahepe yne yne towatnuat yt kat saꞌup i. Tesaika hap toieineꞌen hap tewaku hap tutum ahepe are. Watikuap Haꞌyru Iesui hawyi tutum yne yne tomotypot hamuat hap tutum. Taꞌi iꞌewyte watomohey Iesui hawyi Tupana aiꞌairo topotpoꞌororia koꞌi wo are.

2 Peteru 1:3 ပူးပေါင်းရင်းမြစ်များ

Mateu 28:18

Miꞌi hawyi Iesui tuut iꞌatuewowi hawyi iꞌatupyꞌasetpe toineꞌen heremo kahato. Miꞌi hawyi toꞌe itotiaria pe -Koitywy Tupana tum yne raꞌyn tesaika hap uhepe e. Miꞌi hawyi Wuatꞌi Miitꞌin Porekuat koro wo areineꞌen atipy pe iꞌewyte mesuwat yi tote e.

Humanu 8:32

Tutum naꞌyn ahepe Tosaꞌyru sese Tomikyꞌe poꞌog ahehakyeraꞌat hamo ikuꞌuro aikyꞌe hap upi. Tupana hegyiꞌat kahato. Tosaꞌyru po pyi mesup tutum neran ahepe yt kat saꞌup i yne yne yt kat i te aipo piat rakat ahehakyeraꞌat tuwy.

Humanu 9:24

Tupana miꞌairo kahato aito. Tupana aikay kay tuwewawi aito Iuteuria ywania iꞌewyte iraniaꞌin aito wẽtup ywania.

1 Kuriniu 1:9

Miꞌi pote waku watomohey iꞌe hap torannia aipyꞌa pe. Saꞌawyꞌi toꞌe -Atikyꞌesat eipe Uhaꞌyru ekatuwyria sese wo eweikupteꞌen e. Ewetunug Miꞌi Miit Uhaꞌyru Eipotypot no pote waku pe iwywo eweikupteꞌen wuatꞌi eꞌat pe e ahepe. Miꞌi hawyi waku watomohey kahato iꞌe hap ewy mesup te.

2 Kuriniu 12:9

Miꞌi hawyi toꞌe Tupana uhepe -Yt karãpe i atihep epiit piat eꞌahuu hap e. Yt karãpe i epiit hesaika i raꞌyn maꞌato miꞌi pykai waku ereineꞌen. Maꞌato miꞌi pykai yt karãpe i woroꞌatoiat en. Yt karãpe i yt worokyꞌe i raꞌyn e. Karãpe iraniaꞌin teꞌeraꞌakasa esaika hap kapiat hawyi teꞌeroꞌe -Yt topiit kaipyi i Pauru hesaika hap iꞌatuꞌe maꞌato Tupana imoesaika. Miꞌi pote epiit yt hesaika i hap kaipyi uimotypot sese hap topyhuꞌat e Tupana uhepe.

Ewesu 4:1

-Uimimuꞌeria tawa Ewesu piaria mesup uito Pauru areineꞌen meiũpe woꞌopyhik hawe. Wanikaptia uipyhyp taꞌyn Aikaꞌiwat potpap nug hap pyhyp hamo uipyhik wen maꞌato miꞌi pykai worohoꞌomuꞌe te uimiwan myi uiwyriaꞌin. Saꞌawyꞌi Tupana aiꞌairo temiitꞌin no tomotypot hamo. Miꞌi pote areꞌe ehepe -Toꞌiro watimotypot Aiꞌairo hat haty wo are. Aikotã aimepytꞌin hãpyk takaria ewy aimowepiit taꞌatupotpap wakuat nug hap ete aimikyꞌesat nug hap ete miꞌi hap ewy waku watimowepiit Aiꞌywot atipy piat wakuat nug hap kaipyi.

Ewesu 4:4

Katupono aito Aikaꞌiwat piit aga koꞌi ewywuat are. Iꞌewyte aipaꞌãu Tupana miium Aikaꞌiwat Iesui watnuat e. Miꞌi pote aito imohey haria wẽtup paꞌãu wẽtup piit ewywuat watopyhuꞌat mesuwe aito imohey haria. Aito ti wẽtup piit imohey haria aito pote aiwoꞌoꞌewy ewy katupono Iesui wywo watukupteꞌen. -Mukiꞌite ti aru watoineꞌen wuatꞌi eꞌat pe e haria sok aito watoꞌe.

Wiripu 3:8

Iꞌatu kahato uiwanetup hawe saꞌawyꞌi. Miꞌi atunug mote waku raꞌyn areineꞌen Tupana wanetup hawe uiꞌe hap. Atunug uheko hawyi waku pe areineꞌen Tupana wanetup hawe uiꞌe hap saꞌawyꞌi. Miꞌi hap ewywuat saꞌawyꞌi wuat uiwanetup hap atipun yne raꞌyn aikotã watipun iun aiꞌyat pyi hap ewy katupono koitywy atipuẽti poꞌog wakuat wuatꞌi kawiat rakat. Koitywy Iesui kuap hatno areineꞌen. Atipuẽti Iesui poꞌog waku. Miꞌi Uikaꞌiwat no raꞌyn. Miꞌi yn naꞌyn atikyꞌesat uiwanetup hawe. Miꞌi yn uimoewaku hat. Huu yn naꞌyn uimohãpyk kuap Tupana wanetup hawe. Miꞌi pote koitywy atipun yne saꞌawyꞌi wuat uiwanetup hap koꞌi saꞌawyꞌi wuat uiꞌe hap koꞌi saꞌawyꞌi wuat uiwemoewaku hap hawyi Aikaꞌiwat yn uimoewaku hat are. Tupana yn naꞌyn uhehakyeraꞌat kuap hat koitywy are yn naꞌyn. Koitywy saꞌawyꞌi wuat uiꞌe hap koꞌi atipun yne katupono atimohey Ahehakyeraꞌat hat Aipotypot yn. Iesui yn atikyꞌesat uiwanetup hawe are.

Wiripu 4:8

Kurin poꞌog ahenoi hawyi waku. Uheꞌywytꞌin uheinytꞌin watipyhyp aiwanetup hap yt naku i hap. Miꞌi hawyi wẽtup kape yn aiwanetup hap. Wakuat kape yn watuwanetup aikotã miitꞌin miat wakuat rakat ewy aiwanetup hap aikotã pywuat wanetup hat ewy aikotã miitꞌin mimotypot kahato hap wanetup hap ewy aikotã hãpyk kahato rakat ewy waku watuwanetup. Waku ihainia haryporia weꞌeg nakaria ewy watuwanetup. Waku iwese kahato rakat ewy aiwanetup hap. Miꞌi hawyi -Meimuẽwaria wyti waku kahato rakaria iꞌatuꞌe hap ewy waku aiwanetup hap. Kat e hap kat e hap poꞌog poꞌog waku miꞌi ewywuat waku watuwanetup. Kat e hap kat e hap ete Tupana -Waku e pyno miꞌi hap ete waku watuwanetup aat kaꞌap.

Korosi 1:16

Tosaꞌyru ehay wo tutunug yne yne. Yt kat kawiat i tutunug. Atipy piaria yne toimoherep iꞌewyte yne yi totiaria Haꞌyru inug. Yne heremo rakaria inug iꞌewyte yt heremo i rakaria atipy piaria akag koꞌi inug. Tuꞌisaria yne imiꞌairoria tukupteꞌen. Morekuaria iꞌewyte imiꞌairoria. Waikiru aat waty yi iminug koꞌi yne Tosaꞌyru ehay wo yne tutunug. Mesup tutum naꞌyn yne yne Tosaꞌyru pe.

1 Tesaronika 2:12

Uruiꞌatumaharaꞌi maharaꞌi kahato eipe urumepytꞌin mote. Ehewyry hãpyk kahato o Tupana mikyꞌesat ewy urutoꞌe. Eikay kay raꞌyn temiitꞌin no tetawa kape aikope toineꞌen Morekuat no hap kape aikope tewaku hap moherep hap kape eikay kay. Miꞌi tote yt tuwemoti hin i Tupana eiminug koꞌi pupi. Miꞌi hap uruikyꞌesat kahato. Yt kat i hin i Tupana wemoti eiminug koꞌi pupiat hap uruikyꞌesat.

1 Tesaronika 4:7

Tupana yt tikyꞌesat hin i ti yt iweꞌeg i rakaria wo aheineꞌen hap maꞌato toꞌewywuat ahewaku hap yn toikyꞌesat.

2 Tesaronika 2:14

Saꞌawyꞌi worohoꞌomuꞌe mekewat sehay wakuatno miꞌi hawyi eweikupteꞌen imohey haria wo. Miꞌi hap eꞌat pe toꞌe Tupana ehepe -Pyno worohoꞌonug eipe ikahu rakaria wo aikotã Uhaꞌyru ewywuat no.

1 Timoteu 4:8

Waku aiwesaika saika hap aipiit moheg hamo are maꞌato poꞌog waku wuatꞌi kai watuwesaika saika Tupana Paꞌãu e hap nug hamo. Katupono imikyꞌesat ewy watunug mote ipakup takatno watoineꞌen mesuwe. Iꞌewyte aikuꞌuro hap eꞌat pe wuatꞌi eꞌat pe aikai Tupana.

2 Timoteu 1:9

Tupana ahehakyeraꞌat hawyi ainug temiitꞌin wo. Yt aiwanetup kahu hap upi i yt ahewaku hap upi i maꞌato tomikyꞌesat no tegyiꞌat hap oktan ahehakyeraꞌat wuatꞌi eꞌat piat aikotã Tupana toꞌe nimo saꞌawyꞌi tutunug yne wuatꞌi hap yian mete -Atiꞌatuehakyeraꞌat ti aru Uhaꞌyru mohey haria e Iesui etiat hap ewy.

Epereu 1:3

Tupana Iãꞌãkap Sese Haꞌyru yn iꞌewy sese rakat. Wẽtup Miit ewy yn iꞌatueko wẽtup yn iꞌatumikyꞌesat koꞌi wẽtup yn iꞌatumotypot hap toꞌokupitu. Tosaꞌyru esaika hap wo toimopyhuꞌat yne atipy koꞌi mesuwarotiaria iꞌewyte atipy piaria Haꞌyru inug koꞌi yne yne. Toꞌywot ehay upi toimoesaika yne yi aat waikiru koꞌi waty Haꞌyru esaika hap mo inug iheg me. Iꞌewyte Tosaꞌyru suu wo aipit pit hap aiminug saꞌag toikoho yne. Iesui tipuruk yne aiminug saꞌag hawyi -Waku eraꞌapyk mesuwe uipo sese kai uiꞌyatype atipy pe e. Waku eraꞌapyk mesuwe uhepiat emotypot hap tote e katupono woronug En Wuatꞌi Wuatꞌi Porekuatno poꞌog poꞌog wuatꞌi kawiat hesaika rakatno e Tupana Tosaꞌyru pe.

1 Peteru 1:15

Aiꞌywot atipy piat waku sese rakat. Yt kat i hin i iꞌaparap hap Tupana kaipyi. Miꞌi tupono waku aito Aiꞌywot Tupana ewaku hap ewy waku watunug mesuwarote aheineꞌen turan are.

1 Peteru 1:5

Tupana pywo ti rat En yn uruehakyeraꞌat kuap hat ereineꞌen. Koitywy uruto emepytꞌin pote uruꞌapykok hat kahato En Tupana. Esaika kahato En. Uruimohey kahato En. Meiũran aru yne miitꞌin tikuap uruimohey kahato En hap uruehakyeraꞌat Hat En hap. Miꞌi pote urutukupteꞌen aikotã hekat kahato rakat ewy katupono epowatꞌyp yne tukupteꞌen urupo pe Tupana. Hekat rakat En ewy urutukupteꞌen. Yt uruiꞌatoiat hin i aru katupono urumoesaika raꞌyn Epaꞌãu wo. Miꞌi pote yt wẽtup ok i uruto hoꞌowasat rakaria wo urutoꞌe ewowi Tupana.

1 Peteru 2:21

Aikaꞌiwat Aipotypot Iesui saꞌawyꞌi hoꞌopot kahato miitꞌin iꞌatumikyryꞌi kahato tuwete. Yt kat i tutunug saꞌag pykai taꞌatuꞌahyk taꞌatuꞌauka maꞌato yt kat i toꞌe saꞌag iꞌatuepe. Yt toiꞌatupoepyk hin i miꞌi tã taꞌatunug pykai kat pote toimoherep teran ahepe aikotã waku watunug aiꞌapiheg haria pe hap. Toikyꞌesat kahato watunug tominug hap oktan toikyꞌesat. Miꞌi hap kape aikay kay aikotã topiat hoꞌopot hap ewy hamuat hap kape.

1 Peteru 2:9

Maꞌato aito ti aikotã wẽtup ywania Tupana miꞌairo wẽtup ywania ewywuat koꞌi aito. Kat pote Tupana saꞌyruꞌin sakiꞌytꞌin aito. Miꞌi pote Tupana aiꞌairo tepaꞌi koꞌi wo maꞌato yt mesuwarotiat paꞌi koꞌi ewywuat i. Katupono aito morekuaria ewy watopyhuꞌat Tupana wanetup hawe. Aitoria aikotã wẽtup tama piaria ewywuat Tupana eꞌyi kaꞌiwaria aito. Aiwanetup hap koꞌi yt mesuwarotiaria minug koꞌi mesuwarotiaria wanetup hap koꞌi ewy hin i. Miꞌi pote -Eiperia yt miit ewy i iꞌatuꞌe ahepe. Miꞌi pote Tupana motypot hap yn watikyꞌesat mesuwarote. -Waku kahato uruetupana watoꞌe iraniaꞌin me. Saꞌawyꞌi urutukupteꞌen aikotã iꞌypyryp we hap ewy. Maꞌato mesup urutukupteꞌen hẽtyhot puo hap ewy. Saꞌawyꞌi Tupana yt heremo hin i uruepe. Koitywy heremo hap ewy urupyꞌa pe uruimohey pote.

1 Peteru 3:9

Karãpe Iesui mohey haria iraniaꞌin yt iꞌatuwese i ehete hawyi waku eweikupteꞌen iwese rakaria wo. Yt eweipoepyk teiꞌo iraniaꞌin tunug saꞌag ehetiat pote. Taꞌatunug saꞌag hawyi -Waku eweiꞌe emohit miꞌiria pote. Etiꞌatumotypot miꞌiria uhytꞌiꞌin manaꞌin. Miꞌi tã ewetunug mote Tupana mipoityro koꞌi wo eweikupteꞌen. Yne Tupana ekat topyhuꞌat eiwatnuat atipy pe. Miꞌi tã ewetunug mote -Worohoꞌopoityro eipe e Tupana ahepe.

1 Peteru 5:10

Maꞌato Tupana ti eipowyro kahato hat toineꞌen uiwyriaꞌin ipakup takaria. Tutum neran ehepe yne tesaika hap yt kat saꞌup i. Toikyꞌesat kahato eiperia tomimotypot koꞌi wuatꞌi eꞌat piat hatno. Kat pote Aipotypot Iesui mohey haria eipe pote. Pyno hoꞌopot hap yt motꞌi hamuat i toineꞌen. Mukiꞌite eꞌihatꞌok eꞌihatꞌok hap ewy tokosap taꞌyn. Pyno waku etuꞌu hoꞌopot hap mesup miꞌi hawyi meiũran Tupana mimotag koꞌi wo eweikupteꞌen waku rakaria hãpyk kahato rakaria wo. Yt uwe mimaꞌat koꞌi wo i eweikupteꞌen. Meiũran Tupana ehay wywo ehesaika eweikupteꞌen. Miꞌi hawyi meiũran eiwanetup hap yt kowoꞌi kowoꞌi hin i toineꞌen. Hesaika rakaria wo Tupana mohey haria ewy eweikupteꞌen ewehoꞌopot hap tokosap hawyi ehãꞌãg hap tokosap hawyi are yne pe nagnia pe makuptiaria pe kurum iwasuria pe hirokaria pe yne pe are.

2 Peteru 1:10

Pyno uheꞌywytꞌin uheinytꞌin eiwemuꞌe ro haty wo mekewat Tupana miꞌairo sio uito sio yt hap kuap ehepiat hamo are. Miꞌi hawyi ti aru eweimowato ro mekewat seko pakup i eiwanetup hawe hawyi ti aru eweikuap taꞌyn -Pywo ti rat uito Tupana emiit no areineꞌen e hap eweikuap. Uito ti Tupana miꞌairo areineꞌen hap eweikuap. Miꞌi hawyi ti aru eweimowato mekewat seko pakup i eiwanetup hawe uiꞌe hap ewy. Miꞌi hawyi ti aru eweikuap kahato raꞌyn -Pywo ti Iesui watnuat uito hap eweikuap are. Miꞌi pote ti aru yt karãpe i raꞌyn eweiꞌatoiat mekewat ahehakyeraꞌat hap mohey hap kaipyi.

2 Peteru 1:2

Atikyꞌesat kahato eipe Iesui kuap kahato haria wo eweikupteꞌen. Taꞌi eweikuap Aipotypot Iesui hawyi Tupana tum neꞌen neꞌen neꞌi tegyiꞌat hap ehepe. Iꞌewyte tutum woꞌowese hap tutum yt kat saꞌup i. Aipoityro kahato Tupana tuwehay pyi. Iwese pote tutum yne ahepe. Tutum iwato kahato typy sakpo itote. Toimoꞌẽ kahato tegyiꞌat hap are. Tutum ahepe wuatꞌi tokuap hap Tosaꞌyru kuap hap kaipyi tutum yne yne ahepe are.

2 Peteru 1:5

Pyno toineꞌen naꞌyn aikai Iesui mohey hap. Miꞌi tupono ti Tupana tikyꞌesat poꞌog Tosaꞌyru ewywuat watopyhuꞌat hap uiwyriaꞌin are. Iꞌewyte aikaipyi toikyꞌesat aiwanetup hap aheko Tosaꞌyru ewywuat ikahu rakat yn toikyꞌesat. Miꞌi hawyi toikyꞌesat ahepiat tokuap hap aikotã aiwoꞌoꞌewy ewy hap toikyꞌesat are.

2 Peteru 1:6

Waku hawyi iꞌewyte toikyꞌesat aiwewaĩ kuap hap toikyꞌesat. Miꞌi hap watikuap hawyi toikyꞌesat aiwoꞌokyꞌe hap. Iꞌewyte toikyꞌesat yt aipohep i tomohey hap etiat hap toikyꞌesat. Miꞌi watunug kuap hawyi toikyꞌesat aito toiãꞌãkap koꞌi ewy hap toikyꞌesat are.

2 Peteru 1:8

Miꞌi tã watukupteꞌen mote ti aru ikahu kahato watoineꞌen are. Miꞌi hawyi ti aru hekat kahato rakaria wo watoineꞌen Tupana motypot hanuaria aito hawyi are. Miꞌi hawyi ti ihãite rakatno watukupteꞌen are. Miꞌi hawyi aikotã mekewat mikoi haat kahato rakat ewy watoineꞌen are. Miꞌi hawyi ti aru watukupteꞌen Aikaꞌiwat Iesui kuap haria kahato are. Miꞌi hawyi ti aru Aiporekuat no kahato topyhuꞌat Aikaꞌiwat are.

2 Peteru 2:20

Maꞌato tukupteꞌen yt naku i nug hap atoiat haria Iesui kuap haria maꞌato meiũran teꞌeraꞌaipok i mekewat saꞌawyꞌi wuat seko saꞌag kape raꞌyn mesuwat yi totiaria wemohun hap kape i raꞌyn. Miꞌi hawyi ti aikotã kiã eꞌyni piatnuaria ewy tukupteꞌen. Miꞌi hawyi ti yt teꞌeruwenoꞌẽ kuap i iraꞌyn mekewat taꞌatuminug saꞌag hap saꞌawyꞌi wuat kaipyi. Miꞌi hawyi taꞌatuminug saꞌag hap koꞌi po pe i raꞌyn tukupteꞌen. Miꞌi hawyi poꞌog poꞌog saꞌag saꞌawyꞌi wuat kai teꞌeropyhuꞌat.

2 Peteru 3:18

Pyno eiwemotag o Tupana ehay wo hegyiꞌat hap kaipyi are iꞌewyte Tupana eikyꞌe hap kaipyi. Ahehakyeraꞌat hat Aipotypot Iesui mohey hamo eiwemotag o. Imohey kahato haria wo eweikupteꞌen hawyi ihãite kahato rakaria eipe. Imohey hap upi ihay wakuat upi yn atikyꞌesat eweikupteꞌen uito areꞌe ehepe uimiwan me ahenoi.