2 Peteru 1:16 - Sateré-Mawé

¹⁶ Pywo ti rat urutaꞌakasa hap sese Iesui ieineꞌen hap. Miꞌi kape urueha wo urutaꞌakasa are. Uruto uruikuap kahato Miꞌi Miit katupono uruewyry kahato iwywo are. Iesui hesaika kahato hap uruikuap taꞌyn are. Yt urumuꞌetu wuat hap kaipyi hin i uruiꞌatumuꞌe eipe Iesui ete are. Pywo ti rat urutaꞌakasa raꞌyn Tupana Mipoꞌoro Wuatꞌi Potypot Koro wuat. Waku kahato Miꞌi Miit poꞌog poꞌog torannia miitꞌin kai are. Uruikuap kahato Miꞌi uruewyry aat kaꞌap hawyi. Uruikuap kahato Tupana Mimotypot sese Iesui hap. Urumimoherep Iesui etiat ehepe yt urumuꞌetu wuat hap kaipyi i maꞌato urueha wuat uruꞌakasa hap kaipyi uruiꞌatumuꞌe eipe Miꞌi Miit sese ete are.

2 Peteru 1:16 ပူးပေါင်းရင်းမြစ်များ

Mateu 16:27

Katupono ti aru Ihainia Saꞌyru taꞌaipok meremo toꞌywot esaika wywo iꞌewyte temiitꞌin atipy piaria nywo. Miꞌi hap eꞌat pe ti aru torannia imoherep taꞌatuminug koꞌi mekewat eꞌat pe.

Mateu 16:28

Pywo pe ti areꞌe ehepe mesuwat uiꞌe hap wyti pywuat sese rakat tukupteꞌen wyti aru iraniaꞌin mesuwat rote yt ikuꞌuro i te rakaria Iesui yt kuꞌuro i te turanuat haria ti aru teꞌeraꞌakasa te Ihainia Saꞌyru tuut morekuatno hap kape.

Mateu 17:1

Miꞌi hawyi 6 eꞌat tokosap hawyi Iesui toto raꞌyn yityꞌok ywaiti kahato rakat kape. Miꞌi turan tuwewywo totioto Peteru hawyi toꞌywytꞌin Tiaku hawyi Iuwãu.

Mateu 24:27

Katupono Uito Eheykeꞌet sese ti aru ariot turan wuatꞌi miitꞌin teꞌeraꞌakasa e. Miꞌi ti aru aikotã merepꞌe hap ewy aremoherep wuatꞌi puo e. Miꞌi ti aru heremo yne aat wẽtem hap tote pyi yne aat minꞌe hap kape e. Taꞌi miꞌi hap ewy ti aru araꞌaipok e.

Mateu 24:3

Miꞌi hawyi tuwat Uriweiria ypia eꞌyityꞌok kape. Miꞌi tote taꞌapyk hawyi ipotmuꞌeria tokokaꞌat hewowi 12 ok takaria. Miꞌi hawyi apo iꞌatuꞌe Iesui pe -Karãpe aru taꞌatupugha meiẽwat Tupana motypot yat iꞌatuꞌe. Karamuo aru putꞌok e eꞌaipok mesuwat yi kapiat hap eꞌat iꞌatuꞌe. Karãpe aru yi kahuro hap putꞌok e iꞌatuꞌe. Kat koꞌi kat koꞌi aru tuwemoherep mesuwe putꞌok e hap eꞌyian mete iꞌatuꞌe.

Mateu 28:18

Miꞌi hawyi Iesui tuut iꞌatuewowi hawyi iꞌatupyꞌasetpe toineꞌen heremo kahato. Miꞌi hawyi toꞌe itotiaria pe -Koitywy Tupana tum yne raꞌyn tesaika hap uhepe e. Miꞌi hawyi Wuatꞌi Miitꞌin Porekuat koro wo areineꞌen atipy pe iꞌewyte mesuwat yi tote e.

Maku 13:26

Miꞌi hawyi ti aru Miitꞌin ykeꞌet Sese putꞌok e raꞌyn yi kape tesaika hap wo. Miꞌi hawyi wuatꞌi miitꞌin teꞌeraꞌakasa iꞌuut ywyhig puo hap turan.

Maku 14:62

Miꞌi hawyi ti Iesui tiwesat -Taꞌi Uito Miꞌi Miit eꞌe hap ewy e. Meiũran ti aru eweiꞌakasa Uito Miitꞌin Ykeꞌet Tupana hesaika poꞌog nakat po sese kai apyk pe e. Taꞌi eweiꞌakasa ti aru uhuut turan atipy kaipyi ywyhig kytsig me e.

Iruka 1:2

Taꞌatuwan mekewat taꞌatumienoi ahepiat kat koꞌi kat koꞌi teꞌeraꞌakasa saꞌawyꞌi te wuat hap koꞌi. Miꞌi kaipyi ti taꞌatuhenoi henoi Tupana ehay koꞌi.

Iruka 9:43

Miꞌi pote torannia teꞌeruwanetup kahato raꞌyn -Iwato kahato Iesui mimoherep Tupana esaika hap kape. Miꞌi hawyi torannia itotiaria teꞌeruwanetup kahato kat kaipyi Iesui tunug meketã iꞌatuꞌe. Mio tã iꞌatuꞌe pote Iesui toꞌe temiitꞌin me

Iuwãu 1:14

Mekewat Sehay e hap het rakat Iesui aiꞌewywuat tuwemoherep miitno aipiit ewywuat tuwemoherep. Miꞌi hawyi watehaꞌat kuap i hẽtyhot atipy kaipywiat Tupana saꞌyru wẽtup yn kape. Miꞌi hawyi toineꞌen aipyꞌasetpe. Putꞌok e mesuwe hegyiꞌat hap moherep hamo. Miꞌi ti Wakuat Sese toineꞌen. Hãpyk hap yn tuete. Pywuat rakat toineꞌen.

Iuwãu 17:2

Papai uinug naꞌyn yne miitꞌin mimotypotno katupono etikyꞌesat kahato miitꞌin emiium koꞌi emiꞌairoria ehakyeraꞌat hamuat hap e.

Humanu 1:4

Miꞌi ti Uhaꞌyru sese e Tupana uhepe. Uiꞌewy hesaika rakat e. Uipaꞌãu wakuat oktan ne hesaika rakat e. Koitywy atimoherep taꞌyn uiꞌe hap e Tupana. Koitywy atimoherep taꞌyn nimuat uiꞌe hap e Tupana. Koitywy Miꞌi moherep hap niatpo kahato raꞌyn aikotã atiõtem guꞌuro pyi Uhaꞌyru e Tupana uhepe haꞌawyte uikay kay tehay sytpok hamuat hap tote are.

1 Kuriniu 1:17

Pywo ti Aikaꞌiwat Iesui yt uipoꞌoro i miitꞌin setꞌok setꞌok hamo maꞌato tehay wakuat moherep hamo yn uipoꞌoro tehay wakuat enoi wuatꞌi puoria piat hamo yn e. Miꞌi hawyi atiꞌatumuꞌe haty wo aikotã Aikaꞌiwat ikuꞌuro aikawiatno hap ariaꞌyp posak ete hap yn uhehay. Yt aremotypot teran i maꞌato ahenoi aikotã Aiporekuat nuat Tupana Mipoꞌoro ikuꞌuro ariaꞌyp posak etiat hap yn ahenoi teran. Pyno ti yt miitꞌin mikyꞌesat ewy hin i ti atimoherep katupono aremotypot uhehay se wywo hap hawyi yt hesaika hin i uhehay Tupana wanetup hawe.

1 Kuriniu 1:23

Maꞌato miꞌiria pe -Iesui yn ahehakyeraꞌat kuap urutoꞌe. Iesui yn ikuꞌuro ariaꞌyp posak ete ahetiatno e hap uruhenoi Iuteu ywania pe Kereku ywania pe yt ihay se hin i pykai taꞌatupuẽti Iuteuria ywania. Miꞌi hawyi ti Kereku ywania miꞌiria mekewat sehay ti yt weꞌeg hin i hat ehay iꞌatuꞌe ahepe.

1 Kuriniu 1:7

Miꞌi pote wahekatup Aipotypot turan Iꞌywot aipoityro kahato aipowyro kahato. Miꞌi hawyi tuwemoherep aru Aikaꞌiwat watoꞌe yn wuatꞌi ehamo. Aimoehãite Iesui mohey hap ete.

1 Kuriniu 2:1

Uiwyriaꞌin tawa Kurintiu piaria taꞌi mekewat eꞌat pe saꞌawyꞌi te areto ehewowi eimuꞌe hamo turan areineꞌen eipyꞌasetpe. Worohoꞌomuꞌe kahato Tupana mimoherep oktan. Tupana mikyꞌesat ewy yn worohoꞌomuꞌe yt uhehay niatpo hin i atunug eimuꞌe hap ete.

1 Kuriniu 2:4

Yt ihay se hin i hap ewy worohoꞌomuꞌe. Miitꞌin ehay se hap yt ewy i worohoꞌomuꞌe maꞌato Tupana Paꞌãu esaika hap kaipyi worohoꞌomuꞌe. Miꞌi hap ewy pykai ti Tupana Paꞌãu esaika hap topyhuꞌat uhehay moesaika hamo. Miꞌi pote miꞌi hawyi -Pywo pywo eweiꞌe eipyꞌa pe uhehay tyry wywo pykai.

1 Kuriniu 5:4

Miꞌi pote waku eiweꞌatunug yne eipe hawyi waku eweikay kay mekewat miit yt iweꞌeg i rakat ehewowi. Miꞌi tote ti toineꞌen aru Aipotypot Iesui eipyꞌasetpe iꞌewyte uipaꞌãu toineꞌen eiwywo. Miꞌi hawyi waku mekewat toꞌywot eharyꞌi wywuat get hat eweinapin kahato -Pyno koitywy ahiag watnuat ereineꞌen waku watoꞌe tope. Miꞌi hawyi mono etoiat ro eminug saꞌag maꞌato yt etoiat i ewaire waire hap pote ikuꞌuro rakat no ereineꞌen waku watoꞌe tope.

2 Kuriniu 2:17

Tukupteꞌen Tupana ehay moherep haria maꞌato yt pywo pe i rakaria. Yt Tupana kyꞌe hap wywuat sese haria i aimuꞌe maꞌato ahekat kyewi neꞌi -Mio tã e Tupana iꞌatuꞌe maꞌato yt miꞌi tã e hin i pykai taꞌatuꞌywyk neꞌi. Maꞌato ahehay mio tã watoꞌe -Tupana tipoꞌoro raꞌyn Tosaꞌyru ahehakyeraꞌat hamo watoꞌe. Miꞌi pote waku watunug Iesui Aiporekuat no watoꞌe aipyꞌa pyi watoꞌe. Urukaꞌiwat mowepiit hamo yn uruiꞌatumuꞌe miitꞌin koꞌi.

2 Kuriniu 4:2

Iraniaꞌin taꞌatuhenoi saꞌag Tupana ehay miitꞌin maꞌat hamo maꞌato aito watimoherep Tupana ehay aikotã toꞌe hap ewy. Yt wahenoi i aikotã iraniaꞌin miitꞌin maꞌat haria ewywuaria henoi hap ewy. Tupana toꞌe hap ewy watoꞌe. Miꞌi hawyi miitꞌin tikuap Tupana ehay pywo piat moherep haria aito hap iꞌewyte Tupana aikuap. Miꞌi hawyi yt aiwemaꞌat hap wywo i wahenoi pywo piat yn wahenoi pote.

Ewesu 4:14

Yt toikyꞌesat i wẽtup ok wẽtup ok mienoi saꞌag upi watopyhuꞌat hap kat pote toikyꞌesat Tosaꞌyru mienoi upi yn watopyhuꞌat hap. Imohey haty wuat hap toikyꞌesat. Iꞌatu kahato aimuꞌe iweꞌeg kahato rakaria aimuꞌe kuap kahato haria maꞌato yt pywo pe i yt Iesui mienoi upi i haria aimuꞌe maꞌato ahekat kyewi yn aimuꞌe haria e. Miꞌiria ehay upi watopyhuꞌat hawyi iꞌatuewamiri pe watopyhuꞌat hap ewy aikotã wasere owa kape wato teran ihyemyiꞌa wato sakpo teran maꞌato yt wato kuap i ipoityꞌi pote hap ewy katupono miꞌiria teꞌeruwanetup aat kaꞌap aimaꞌatꞌi maꞌatꞌi hap ete iꞌatuehay wẽtup upi. Yt eweimohey teiꞌo miꞌiria yne miitꞌin miat aimuꞌe hap are. Yt naku i watopyhuꞌat hirokaria ewy aimikuap ete are. Hirokaria imohey yne yne miitꞌin ehay sio pywo sio yt hap taꞌatumohey. Waku watomohey aimuꞌe hat Iesui e hap ewy aimuꞌe pote. Waku watimoheg aimimohey Iesui aipyꞌa pe aiwanetup hawe e. Tupana wywo wẽtup piit ewy watukupteꞌen. Miꞌi hawyi aiꞌywania uruꞌywania wẽtup ywania ewy yn naꞌyn ainug e. Koitywy Tupana ywania raꞌyn aito. Saꞌawyꞌi Iuteu ywania eiꞌywania tukupteꞌen toꞌope toꞌope toꞌoewanikap mo teꞌeropyhuꞌat. Mekewat eꞌat pe toineꞌen eipyhyp hap ewywuat Iuteu etawa kapiat eweiwat hamo. Maꞌato mekewat eipyhyp hap Tupana kapiat hap Iesui tiꞌaporok yne raꞌyn topy wo.

Wiripu 3:21

Tuut hawyi aipiit mesuwarotiat tutunug towat topiit ewy. Miꞌi hawyi yne aipiit Iesui ewy topyhuꞌat wuatꞌi eꞌat pe. Aipiit iwat piit ewy ikahu kahato. Miꞌi tã aru ainug tesaika hap wywo. Hesaika kahato Iesui miꞌi nug hamo katupono mekewat eꞌat pe topyhuꞌat yne yne Porekuat no poꞌog hesaika torannia kai. Miꞌi tesaika hap wywo aimopakup aipiit. Pakup tutunug towat ewy are.

1 Tesaronika 2:19

Katupono karapeĩ putꞌok e Aikaꞌiwat Iesui Wuatꞌi Miitꞌin Porekuat nuat turan eipe yn eweipyhuꞌat uimowepiit kahato hanuaria wo aikotã morekuaria teꞌeruwehum kahato hamuat taꞌatuꞌakag painug hap ete. Miꞌi hap ewy hamuat uruto urutuwehum kahato hamuat ehete. Miꞌi hap yn uiwanetup hawe.

2 Tesaronika 2:9

Miꞌi miit saꞌag tuwemoesaika ahiag esaika hamo iwemoherep hap putꞌok e turan. Miꞌi hawyi ti aru miitꞌin maꞌat hap iwato kahato tutunug tesaika hap moherep hamo. Topo wo yt uwe miitꞌin minug ewy i tutunug miitꞌin miat tomotypot hamo teso hap koꞌi. Miꞌi hawyi miitꞌin teꞌeruwanetup kahato iminug koꞌi kape -Aikotã som tutunug iꞌatuꞌe aru.

1 Timoteu 1:4

Atikuap koitywy tukupteꞌen itote Iesui mohey haria sehay potꞌi enoi haria kat ywania kat ywania kat set kat set koꞌi enoi haria. Miꞌiria pe waku waĩꞌere -Wẽtup sehay upi neꞌi pote ti aru yt karãpe i Tupana mikyꞌesat nug hamo eweikupteꞌen katupono Iesui mohey kahato hap yn Tupana mikyꞌesat ewy.

1 Timoteu 4:7

Ipoityꞌi kahato ti sehay yt Tupana mienoi kaipywiat i yt Tupana e hap ewywuat hin i. Miꞌi tupono waku waure wo miꞌi hap koꞌi kai. Yt kan hamo i watopotmuꞌe miꞌi hap koꞌi ete. Taꞌi poꞌog waku watoꞌomoesaika kahato Tupana e hamo Ipaꞌãu wo miitꞌin e hap koꞌi kai.

Titu 1:14

-Yt eweimuꞌe teiꞌo poꞌog mekewat eimuꞌe saꞌawyꞌi wuat heso rakat ete ereꞌe ro iperup takaria pe. Iꞌewyte eweitoiat ro Iuteuria eko koꞌi aimuꞌe hap koꞌi yt Tupana ehay kaipywiat i koꞌi ereꞌe o epotmuꞌeria pe are.

2 Peteru 2:3

Pyno ehekat kyewi yn eimuꞌe haria. Taꞌi ehekat taꞌatukyꞌesat eiꞌatumuꞌe hap eimaꞌat hamuat hap kaipyi. Miꞌiria ti eikyꞌesat taꞌatuemiit no iꞌewyte taꞌatukyꞌesat torannia taꞌatupo puo hap ehekareꞌen eimepytꞌin. Miꞌi tã hap yn taꞌatukyꞌesat. Pyno Tupana toineꞌen ne miꞌiria apiheg hamo. Taꞌi Tupana toineꞌen eimaꞌat hanuaria moma hanuat. Taꞌi Tupana ti yt pya hin i iꞌatukai iꞌatuꞌuka hamo.

1 Iuwãu 4:14

Tupana tipoꞌoro raꞌyn ahepe Tosaꞌyru ahehakyeraꞌat hamo. Miꞌi kape urutaꞌakasa raꞌyn. Miꞌi hawyi uruimoherep taꞌyn wuatꞌi miitꞌin me uruehay wo.

Iuta 1:14

Nimo te ti mio tã e mekewat Tupana ehay moherep hat pot Enoki Atãu emiariru emiariru toꞌe -Tuut ti aru Tupana Aikaꞌiwat ahowawi typyꞌi kahato tesuraraꞌin atipy piaria wakuaria sese wywo e yt naku i nug haria moma hamo e.

Iesui Aru E Hap 1:7

Uiwyriaꞌin Iesui mohey haria meiẽ ewehehaꞌat ro Aikaꞌiwat Iesui tuut raꞌyn teiam ywyhig me. Taꞌi yne yne teꞌeraꞌakasa. Iꞌewyte ipiit suk haria iꞌauka haria teꞌeraꞌakasa kahato howawi. Ewehehaꞌat ro teꞌeruwak kahato wuatꞌi ywania yt imohey i haria teꞌerokenꞌẽ haype kak iꞌatuꞌe. Maꞌato aito imohey haria wahekatup kahato. Waku eriot Mehin waku eriot Mimi watoꞌe. Iꞌewyte aitoria 7 tawa piat Tupana motypot yat piaria pe yi Asia totiaria pe Iesui tuwemoherep wy.