2 Kuriniu 6:4 - Sateré-Mawé

⁴ Uruwyriaꞌin waku kat koꞌi kat koꞌi watunug aiweꞌeg wo kahato Tupana mowepiit hap wywo -Meiẽ Tupana eropat hat sese iꞌatuꞌe hamo. Karãpe putꞌok e ahete ahatek hap ahoꞌopot hap koꞌi turan yt naku i iũteꞌen iũteꞌen aipyꞌahak miitꞌin ete iꞌewyte Tupana ete. Waku watimoherep Aipotypot eropat haria sese hap miꞌi hap eꞌat pe.

2 Kuriniu 6:4 ပူးပေါင်းရင်းမြစ်များ

Iruka 21:19

Uimohey ro haty wo mekewat eꞌat pe pote are yt naku i kahato ehete pykai are e. Yt eweipun neiꞌo uimohey hap miitꞌin eiꞌatuꞌuka hap eꞌat pe are e.

Iuwãu 16:33

Miꞌi hawyi Iesui toꞌe -Eimosoꞌopot kahato hanuaria yt uimohey i haria tukupteꞌen aru maꞌato yt eweikenꞌẽ teiꞌo iꞌatupupi katupono iꞌatupyhyp hat Uito areineꞌen iꞌatumoperup i hat Uito miꞌi pote eiwesaika ro uhete e. Wuatꞌi kat koꞌi kat koꞌi ahenoi raꞌyn ehepe eimoesaika hamuat eimowepiit hamuat. Eimowepiit hat sese Uito e. Yt eiwanetup koꞌi koꞌi teiꞌo katupono atiꞌatuꞌakit akit aru yne yne ahewanikaptia e. Hoꞌopot hap putꞌok e ehetiat turan yt paa eweiꞌe sese teiꞌo eipyꞌa pe eiwanetup hawe katupono yt karãpe i worohoꞌoꞌatoiat sese e Iesui topotmuꞌeria pe.

Iesui Potmuꞌeria 2:22

Miꞌi hawyi Peteru toꞌe haty wo itotiaria pe -Uikuap to eipe uhytꞌiꞌin manaꞌin eweikuap to uhehay uiꞌywania e. Mesup taꞌyn Tupana tunug naꞌyn toꞌe hap ewy e. Pywo ti rat toipoꞌoro raꞌyn Temiit Iesui tawa Nasare piat Aiporekuat nuat e. Iesui ti Tupana Mipoꞌoro ahehakyeraꞌat hamuat e. Pywo ti rat Tupana timoherep taꞌyn ahepe tomiꞌairo sese mesup e. Tominug wakuap yt uwe minug ewywuat i Iesui timoherep kahato ahepe. Iesui wakuat sese e Tupana wuatꞌi pe e. Miꞌi Miit timoherep Tupana esaika hap ahepe e. Yne tutunug ahehamo wuatꞌi ehamo e. Miꞌi kape eweiꞌakasa raꞌyn katupono ehehamo hewyry mesuwe e.

Iesui Potmuꞌeria 20:34

Pyno pywo eweikuap taꞌyn aikotã uipo wo uipotpap hap e. Miꞌi saꞌup mo kue atikyiꞌat yne uhekareꞌen koꞌi uimiꞌu koꞌi iꞌewyte uhekatuwyria watno atum yne uipotpap kaipyi.

Iesui Potmuꞌeria 9:16

Maꞌato ti aru uimoherep turan aikope aikope toto hap tote tohoꞌopot kahato aru uhetiat uhehay enoi hap upi e. Yt tuwemoti hin i ti aru uhet moherep miitꞌin miat turan e. Miꞌi pote ti aru tohoꞌopot kahato uimoherep wuatꞌi ywania puo turan e. Hoꞌopot kahato hap wyti aru atomoherep Sauru pe e Iesui Anania pe.

Humanu 14:18

Pywo ti rat areꞌe ehepe -Karãpe watiꞌatukyꞌe iraniaꞌin aipyꞌa pyi Tupana Paꞌãu mimowepiit koꞌi aito pote miꞌi hawyi Tupana mowepiit haria wo iꞌewyte miitꞌin mowepiit haria wo watukupteꞌen mesuwarote.

Humanu 16:10

Iꞌewyte atipoꞌoro kuekatu kahato aiwy Apere kape. Miꞌi ti tokuꞌuro hap kapiat Aikaꞌiwat mohey hap -Yt atoiat i e hat. Saꞌawyꞌi taꞌatuhãꞌãg ihep imohey hap kaipywiat hap maꞌato yt taꞌatuhep kuap i. Kuekatu mehin Aritũpuru yat piaria kape atiꞌatuewaku.

Humanu 3:5

Pywo ti rat uruꞌywania Iuteuria yt timohey kahato i Tupana e hap -Atunug aru e hap pykai Tupana tunug yne toꞌe hap ewy. Uruiꞌatoiat Tupana pykai yt uruꞌatoiat hin i. Miꞌi hap kaipyi watikuap Tupana yn ni waku sese rakat yt uruꞌewy hin i hap. Miꞌi pote uruminug saꞌag hap topyhuꞌat Tupana motypot ran hap ewywuat kat pote urukyꞌe sese te yt nakuat i uruto pykai. -Eikyꞌe sese pote kat pote eiꞌapiheg apiheg kahato iꞌatuꞌe saꞌag iraniaꞌin uruepe.

Humanu 5:8

Maꞌato yt naku i nug haria ehakyeraꞌat hamo neꞌi Iesui ikuꞌuro. Tewanikaptia etiatno ikuꞌuro hawyi watikuap taꞌyn Tupana aikyꞌe kahato hap. Tupana tomoherep taꞌyn aikyꞌe hap Tosaꞌyru kuꞌuro hap kaipyi.

1 Kuriniu 3:5

Maꞌato areꞌe ehepe -Uito ti Pauru Tupana yn eropat hat sese iꞌewyte eimuꞌe hanuat are. Apauru iꞌewyte Tupana yn eropat hat. Kat hamo pyno -Aimuꞌe hat Pauru mohey haria uruto eweiꞌe. Saꞌawyꞌi worohoꞌomuꞌe eipe miꞌi hawyi Iesui mohey haria wo eweikupteꞌen uiꞌewy eweimohey pote are. Aikaꞌiwat emiitꞌin sese uruto urutunug urupoꞌoro hap oktan yn.

1 Kuriniu 4:1

Uiwyriaꞌin uruto ti Tupana potpoꞌororia pote waku ti eiwanetup urumienoi kape -Miꞌiria wyti Aipotypot eropat haria sese waku eweiꞌe. Miꞌiria wyti yt aimikuap i Tupana etiat moherep haria waku eweiꞌe uruepiat pe.

1 Kuriniu 9:11

Karãpe watikoi mani hawyi waku watunug uꞌi ahemani iꞌok hawyi. Miꞌi hap ewy kahato waku aimikoi Tupana ehay kaipyi watenuk eimuꞌe hap Tupana ehay etiat saꞌup kaipyi waku urutenuk hap ewy e. Niatpo kahato mani koi hap maꞌato itag hawyi uꞌi kahato watipuẽti aipotpap saꞌawyꞌi wuat kai. Miꞌi hap ewywuat kahato eimuꞌe hap Tupana ehay koi hap.

2 Kuriniu 11:23

-Uruto Aikaꞌiwat Iesui eropat haria sese iꞌatuꞌe. Maꞌato uito poꞌog iꞌatukai are. Mio tã pote yt iweꞌeg i rakat miꞌiria wemowato haria ewywuat areineꞌen. Yt uiweꞌeg hin i maꞌato pywo pe areꞌe poꞌog Aikaꞌiwat emiit areineꞌen iꞌatukai. Uito poꞌog iꞌatukai uipotpap. Yt uwe i uhete putꞌok e Aikaꞌiwat potpap nug hap ete. Yt uiweꞌeg hin i mio tã are maꞌato pywo pe areꞌe. Morekuaria uipyhyp poꞌog miꞌiria kai uhehay Iesui etiat pyhyp teran haype. Yt atikuap karania wo uiꞌahyk ahyk itote yt taꞌatukyꞌesat uhehay Iesui etiat pote. Uiꞌatoiat uikuꞌuro turan karania wo.

2 Kuriniu 11:27

Uhero kahato uhewyry kahato pote uhatyꞌi kahato. Karania ewãtym neꞌi yt areket kuap i kat pote arekenꞌẽ kahato sio uiket kai uiꞌauka. Iꞌewyte uhesyꞌat kahato areineꞌen yt kat i miꞌu pote. Areꞌyꞌutui kahato maꞌato yt kat i yꞌy areto yahig wato ekuekai turan. Karania eꞌat yt kat i atuꞌu. Uhenaꞌak kahato wywo uhewyry yt kat i uheꞌog yt kat i uhesokpe koꞌi uimosakup hamo.

2 Kuriniu 11:9

Yt karãpe i areineꞌen neran ahẽtup hẽtup kat koꞌi kat koꞌi eikaipyi teran. Saꞌawyꞌi areineꞌen eipyꞌasetpe turan uiwekaipyi arenuk. Miꞌi hawyi uhesyꞌat eipyꞌasetpiat areineꞌen turan tõꞌẽ kahato imohey haria yi Masetunia piaria uhowowi kat koꞌi kat koꞌi taꞌatumiium koꞌi erut hamo. Miꞌi kaipyi areineꞌen eipyꞌasetpe yt kat i ahẽtup ehepe. Iꞌewyte yt ahẽtup i aru ehepe.

2 Kuriniu 12:10

-Pyno atikyꞌesat eꞌe hap Tupana are. Atikyꞌe emikyꞌesat ewy. Waku kahato uipiit perup hap sio emotypot hap topyhuꞌat miꞌi kaipyi. Taꞌi waku Tupana uhesaika hap yt tuut i uipiit kaipyi. Miꞌi pote yt aremohey kuap i uipiit esaika hap ete. Miꞌi hawyi aru poꞌog hesaika saꞌawyꞌi wuat kai rakatno areineꞌen katupono Esaꞌyru emipoꞌoro uruporekuat nuat yn uimoesaika tesaika sese hap wywo. Poꞌog poꞌog uhesaika saꞌawyꞌi wuat kai are Tupana pe. Miꞌi hawyi koitywy uipiit yt uhesaika i hap uimowepiit kahato kat pote miꞌi pykai poꞌog uhesaika saꞌawyꞌi wuat kai. Yt uipiit kaipyi i uhesaika hap maꞌato Aikaꞌiwat esaika hap kaipyi uhesaika. Karãpe putꞌok e miitꞌin miat uimohit hap iꞌewyte uhatek hap putꞌok e turan poꞌog uimowepiit hap atipuẽti. Karãpe yt imohey i haria uhatyꞌi hatyꞌi iꞌewyte karãpe yt kat i ikahu uhete Iesui mohey hatno areineꞌen mote iꞌewyte miꞌi hap eꞌat pe uiwesaika kahato te yt uhesaika hin i pykai katupono uimoesaika kahato miꞌi hap eꞌat pe Aikaꞌiwat Iesui tesaika hap wywo. Miꞌi pote uiwepiit kahato.

2 Kuriniu 12:12

Saꞌawyꞌi areineꞌen eipyꞌasetpiat turan Tupana timoherep kahato uipiit pyi tesaika hap. Toikyꞌesat kahato eipe eweikuap uito imipoꞌoro sese hap tehay sese moherep hamuat. Miꞌi pote tutunug kahato uipiit pyi yt miitꞌin mikuap koꞌi e. Ehehamo toimoherep kahato kat koꞌi kat koꞌi sepap Tupana yn inug kuap hap koꞌi miitꞌin mowanetup kahato hamo waku nug hap koꞌi ete. Miꞌi koꞌi kapiat eweiꞌakasa hawyi eweiꞌe -Pauru ti Tupana mipoꞌoro ahowawiat aimuꞌe tehay wakuat etiat hamo eweiꞌe eiwoꞌope. Karãpe eweiꞌakasa yt uhesaika hap kape i hawyi eweiꞌe uhepiat pe -Pywo ti rat Pauru Tupana mipoꞌoro sese katupono toimoherep Pauru piit pyi yt hesaika i pykai eweiꞌe.

2 Kuriniu 2:17

Tukupteꞌen Tupana ehay moherep haria maꞌato yt pywo pe i rakaria. Yt Tupana kyꞌe hap wywuat sese haria i aimuꞌe maꞌato ahekat kyewi neꞌi -Mio tã e Tupana iꞌatuꞌe maꞌato yt miꞌi tã e hin i pykai taꞌatuꞌywyk neꞌi. Maꞌato ahehay mio tã watoꞌe -Tupana tipoꞌoro raꞌyn Tosaꞌyru ahehakyeraꞌat hamo watoꞌe. Miꞌi pote waku watunug Iesui Aiporekuat no watoꞌe aipyꞌa pyi watoꞌe. Urukaꞌiwat mowepiit hamo yn uruiꞌatumuꞌe miitꞌin koꞌi.

2 Kuriniu 3:6

Tupana Paꞌãu wakuat yn aimoweꞌeg kuap tehay wakuat moherep hamuat. Saꞌawyꞌi wuat sehay waĩꞌe hap koꞌi Tupana henoi Iuteuria kape. Waku kahato miꞌiria maꞌato yt aimohãpyk kuap i Tupana wanetup hawe. Katupono yt watunug kuap i yne miꞌi koꞌi. Maꞌato sehay pakup Iesui etiat wo Tupana Paꞌãu aimoieineꞌen kuap. Iraniaꞌin iwẽpap kuap kahato Tupana ehay. Maꞌato yt taꞌatuhẽtup i Tupana Paꞌãu me -Uimuꞌe ro kat som ereꞌe mesuwe hap kuap hamo yt iꞌatuꞌe i. Teꞌeruwanetup mesuwat miwan Tupana etiat -Atimowẽpap kuap hawyi ahehakyeraꞌat raꞌyn iꞌatuꞌe yn. Tupana miwan etiat ahehakyeraꞌat kuap iꞌatuꞌe toꞌope. Miꞌi hawyi taꞌatumowẽpap kahato ahut ewy yt taꞌatukuap i taꞌatupyꞌa pe pykai. Miꞌi hawyi ikuꞌuro rakat ewy tukupteꞌen Tupana ehay ete. Kat pote sehay yn taꞌatukuap pote. Maꞌato Tupana Paꞌãu wakuat yt aimuꞌe i miꞌi hap ewy neꞌi. Katupono Tupana Paꞌãu aimuꞌe aipyꞌa pe aiwanetup hawe aimuꞌe kahato tehay ete. Miꞌi hawyi aimoieineꞌen weꞌeg tehay wo miwan kaipyi.

2 Kuriniu 4:17

Pyno iraniaꞌin Tupana ehay yt kyꞌesat i haria urusatyꞌi satyꞌi kahato urumosoꞌopot kahato mesuwe. Maꞌato aheineꞌen turan yn aimosoꞌopot kuap. Miꞌi hawyi poꞌog yt kat i taꞌatunug kuap maꞌato yt watoineꞌen motꞌi i mesuwarote. Miꞌi hawyi watoineꞌen motꞌi wuatꞌi eꞌat pe hap tote. Miꞌi hawyi atipy pe aru watoꞌe -Taꞌi wahoꞌopot kahato yi tote miitꞌin muꞌe hamuat turan. Maꞌato koitywy waku aiwanetup hawe ahepiat hoꞌopot hap watoꞌe. Katupono ahepiat hoꞌopot hap kaipyi iꞌatu kahato Tupana motypot haria nug mesuwiat hamo watoꞌe aru atipy pe.

2 Kuriniu 4:2

Iraniaꞌin taꞌatuhenoi saꞌag Tupana ehay miitꞌin maꞌat hamo maꞌato aito watimoherep Tupana ehay aikotã toꞌe hap ewy. Yt wahenoi i aikotã iraniaꞌin miitꞌin maꞌat haria ewywuaria henoi hap ewy. Tupana toꞌe hap ewy watoꞌe. Miꞌi hawyi miitꞌin tikuap Tupana ehay pywo piat moherep haria aito hap iꞌewyte Tupana aikuap. Miꞌi hawyi yt aiwemaꞌat hap wywo i wahenoi pywo piat yn wahenoi pote.

2 Kuriniu 4:8

Iesui ehay moherep haria aito pote miitꞌin mikyryꞌi hamo watoineꞌen aikope aikope ahewyry hap upi. Maꞌato miꞌi pykai yt aiꞌakit kuap i kat pote uruhoꞌopot aimoma teran maꞌato yt aimoma kuap i.

2 Kuriniu 7:11

Pywo ti rat karãpe watiꞌaparap sese yt Tupana mikyꞌesat ewy i hawyi wahatyꞌi aiwanetup hawe watuwemoti kahato itote. Miꞌi hap Tupana tikyꞌesat kahato. Miꞌi hap ewy topyhuꞌat ehete eiwemoti hap mekewat eipyꞌasetpiat hewaire waire rakat. Miꞌi hap atimoherep ehepe hawyi paa eweiꞌe kahato Tupana mikyꞌesat ewy. Miꞌi hawyi eweikupteꞌen ipyꞌahak takaria wo iminug saꞌag ete. -Yt urumikyꞌesat ewy i eweiꞌe tope. Urutokenꞌẽ kahato eminug saꞌag pupi. Yt naku i ti rat eweiꞌe haty wo tope. Etoiat ro eminug saꞌag hawyi ereineꞌen no Tupana emiit sese wo. Mio tã eweiꞌe hawyi yne ikuap yt Tupana mikyꞌesat ewy i tutunug saꞌag hap. Koitywy miitꞌin tikuap yt miꞌi tã nug haria i eipe hap. -Yt etunug poꞌog i raꞌyn o typua i eweiꞌe hawyi.

Korosi 1:11

Tupana Paꞌãu hesaika kahato yne esaika hap apy tote. Miꞌi pote aito ahesaika kahato Tupana Paꞌãu poꞌog poꞌog aipytꞌatnug hawyi. Miꞌi hawyi watopyhuꞌat hesaika hap wywo. Miꞌi hawyi aimoesaika wuatꞌi saꞌag miat aiꞌakit hap pun hamo. Miꞌi hawyi wyti iꞌewyte wahupit kuap yne iꞌatumikyryꞌi hap koꞌi. Miꞌi hawyi perupꞌi puo watomohey wuatꞌi eꞌat pe motꞌi kahato Tupana Paꞌãu toineꞌen aikai pote.

Korosi 1:24

Koitywy hoꞌopot hat ewy areineꞌen mesuwe. Uipiit satyꞌi kahato areineꞌen katupono woꞌopyhik hawe areineꞌen hatek takat ewy. Miꞌi pykai uiwepiit yn katupono eikawiatno ahoꞌopot. Saꞌawyꞌi Aipotypot Iesui hoꞌopot kahato aikawiatno tomohey haria etiatno. Koitywy watoineꞌen wẽtup mepyt sok ewy Iesui upi katupono tohoꞌopot aikawiatno. Miꞌi hap ewy kahato ahoꞌopot Iesui mohey haria kawiatno.

1 Tesaronika 3:7

Miꞌi hawyi urusatyꞌi hap tuweityk taꞌyn uruete. Waku sakpoꞌe taꞌatumohey kahato te urutoꞌe. Miꞌi hawyi yt uruhoꞌopot kahato i raꞌyn katupono Timoteu mienoi ehetiat urumowepiit kahato.

1 Tesaronika 5:14

Maꞌato toineꞌen eipyꞌasetpe motpap pupiat woꞌoksep hat neꞌi pote waku waĩꞌeweiꞌe miꞌi hat pe merup upiat neꞌi myhuꞌat hat pe. Iꞌewyte waku ti watimoꞌokpipokꞌi ihay kenꞌẽ tehay hamuat rakat. Iꞌewyte waku watiꞌykesat imohey hap etiat yt hesaika i rakat. Iꞌewyte waku aiperupꞌi yn wuatꞌi miitꞌin ete.

1 Timoteu 2:15

Miꞌi pote toineꞌen mesup ehete mekewat Tupana eiꞌapiheg hap mekewat haty kahato hap eimepyt tuwemoherep hap turan. Koitywy Iesui tiꞌatuehakyeraꞌat teran yne eipe haryporiaꞌin. Toikyꞌesat eipe tomiehakyeraꞌat wuaria hawyi woꞌokyꞌe haria hawyi weꞌeg kahato haria eipe hap toikyꞌesat are.

1 Timoteu 4:6

Pyno mesuwat enapin hamo etiꞌatumuꞌe ro Iesui mohey haria Timoteu. Etiꞌatumuꞌe hãpyk kahato pote ti aru erepyhuꞌat Aipotypot Iesui eropat kahato hatno. Iꞌewyte etikuap kahato raꞌyn uhepiat imohey hap iꞌewyte sehay pywuat sese etiat etikuap taꞌyn. Miꞌi tupono atikyꞌesat poꞌog poꞌog eremuꞌe hap miꞌi etiatno.

1 Timoteu 6:11

Maꞌato aito ti Tupana emiitꞌin sese aito miꞌi tupono waku yt watikyꞌesat i mekewat uhekat poꞌog hap -Atiꞌatukyꞌesat e hap. Poꞌog waku watikyꞌesat hãpyk kahato Tupana wywuat waku rakat. Tupana kyꞌe hap poꞌog waku imohey hap poꞌog waku aiwoꞌokyꞌe hap poꞌog waku. -Atimohey potꞌi Iesui aru ahoꞌopot kahato pykai aiꞌe hap yn waku aiwanetup hawe aiweperupꞌi hamuat hap kat hap yn aiwanetup hawe aito Tupana emiitꞌin hap ewy.

2 Timoteu 1:8

Yt eremoti teiꞌo Aikaꞌiwat ehay moherep hamo. Iꞌewyte uito areineꞌen woꞌopyhik hawe Iesui mohey hap upi pykai yt eremoti teiꞌo -Uito Pauru mepyt e hamo. Maꞌato waku ere -Uito iꞌewyte ahoꞌopot hawe areineꞌen wy mesuwat sehay wakuat moherep hap upi waku ere o Tupana pe. Uimoesaika hap oktan aru atunug ere o Tupana pe Timoteu.

2 Timoteu 2:24

Katupono yt uwe i Aikaꞌiwat eropat hat wakuat wuꞌuka hatno toineꞌen. Maꞌato hemiit sese ti iwese yne miitꞌin ete. Woꞌomuꞌe kuap kahato hat yt ipyꞌahak hin i maꞌato hepama ikuap haria ete Tupana eropat hat.

2 Timoteu 4:5

Maꞌato en Timoteu eweꞌeg wo o mio tã iꞌatuꞌe hap kai. Yt eremoehamanaꞌi teiꞌo maꞌato Tupana ehay pywuat sese po pe ereineꞌen o. Epiat hoꞌopot pykai yt ewẽpohep teiꞌo. Maꞌato en worokyꞌesat wuatꞌi puat Tupana ehay wakuat sytpok hamo. Etimoehãite yne o epotpap Tupana miium epiat uhaꞌyru.

Epereu 12:1

Aikotã watehaꞌat seput haria kape hap ewy aheꞌyian miaria Tupana mohey haria teꞌerahaꞌat ahowawi atipy kaipyi aikotã som watopyhuꞌat Tupana mohey hap ete hap kape teꞌerahaꞌat. Iꞌatu kahato miꞌiria ahowawiat sehaꞌat haria. Atipy kape tuwat raꞌyn aheꞌyian miaria saꞌawyꞌi wuaria Tupana mohey sese haria sehaꞌat ahowawiat haria. Taꞌi ipotyi rakat yrysakag aiꞌakag etiat wywo pote yt aihyha hin i aikohyeput turan. Aiminug saꞌag yrysakag howapy kahato aiꞌok pe tote hap ewy aiwanetup saꞌag hap ipotyi hap ewy. Aiꞌakit hamuat wateput turanuat hap ewy maꞌato yt kat i ipotyi hap pote wateput kuap aihyha kahato aiminug saꞌag watipun hawyi. Miꞌi pote waku watiꞌokhytpun aiminug yt naku i nug hap koꞌi. Miꞌi rẽ waku watomohey Tupana haty wo yne aipyꞌa pe. Miꞌi watunug mote seput haria ikohyeput haty wo rakaria ewy watopyhuꞌat. Maꞌato ahepiat aiꞌaparap kahato imohey hap etiat pote aikotã ipotyi hap aiꞌaparap hap ewy. Aikotã seput hat teput hap ete yt waure i hatek pykai ipy sero pykai hap ewy waku watomohey -Putꞌok are aru paĩ an waku watoꞌe hap yn aiwanetup hap. Waku watomohey potꞌi yt kat i iwaure wo wuat neꞌi hap wywo aiwanetup hawiat hap wywo.

Iesui Aru E Hap 1:9

Pyno uito Iesui potpoꞌoro 12 ok takat Iuwãu areineꞌen eheykeꞌet ewy katupono wahoꞌopot aiwoꞌoꞌewy ewy Iesui mohey haria aito pote are. Wẽtup sok yn aito. Iesui yn Aiporekuat aiꞌe pote aiꞌatusatyꞌi satyꞌi kahato iraniaꞌin. Miꞌi pote wẽtup miit yn ewy wahekatup Aikaꞌiwat putꞌok e wuatꞌi Porekuat nuat hap eꞌat. Iesui yn Aipotypot areꞌe hap etiat no uipyhyp mesuwe yi a yꞌy wato pyꞌasetpiat uiꞌapiheg hamo. Woꞌopyhyp hat ewy uinug katupono ahenoi uhehay wo Iesui ti Aiporekuat nuat areꞌe pote. Miꞌi pote uhehay monik hap kyewi uiꞌatoiat mesuwat yi a Patumu e hap tote.

Iesui Aru E Hap 3:10

Waku kahato uhehay mohey motꞌi haria eipe e. Taꞌi yt eipo hep hin i uhehay moherep hap ete uhehay nug hap ete e. Meiũran aru torannia iãꞌãg koro hap eꞌat putꞌok e mesuwarotiaria wuatꞌi miitꞌin iãꞌãg hamo sio uhemiit sese sio yt hap kuap hap eꞌat sese maꞌato miꞌi hap eꞌat eꞌyian me worohoꞌohep mesuwat yi pyi eiperia katupono worohoꞌokuap taꞌyn uhehay nug motꞌi haria eipe hap atikuap taꞌyn e. Miꞌi pote mekewat eꞌat wuatꞌi iãꞌãg hap yt putꞌok e i eiwat ehãꞌãg hamuat e.