2 Kuriniu 6:10 - Sateré-Mawé10 Aimosoꞌopot hap aimoꞌarot kahato. Maꞌato miꞌi pykai watuwehum kahato Tupana kape. Maꞌato iꞌatuwanetup hawe yt kat hamo rakaria wo i watoineꞌen. Maꞌato wahenoi Tupana ehay wakuat iꞌatuepe hawyi taꞌatumohey hawyi taꞌi Tupana mipoityro koꞌi wo tukupteꞌen naꞌyn. Miꞌi hawyi aikotã hekat rakaria ewy tukupteꞌen. Yt kat i ahekat pykai. အခန်းကိုကြည့်ပါ။ |
2 Kuriniu 6:10
43 ပူးပေါင်းရင်းမြစ်များ
Miꞌi hap ewy ti mesup areto hamuat raꞌyn eiꞌyatypepyi miꞌi pote yt eiwepiit hin i maꞌato meiũran worohoꞌopuẽti i raꞌyn hawyi ti aru maꞌato meremo raꞌyn eiwepiit hap tuut aikotã aity iwepiit aiꞌywãꞌĩ hap eꞌat pe hap ewy e. Aremoherep i raꞌyn eipyꞌasetpe hawyi eimowepiit sese hap topyhuꞌat eiwepiit sakpo hap ewy aikotã imepyt pakup hap ewy are. Areineꞌen i eiwywo hawyi eiwepiit sese hap toineꞌen eipyꞌa pe iheg me toineꞌen yt uwe i raꞌyn eiwepiit hap porap kuap hat e.
Maꞌato Peteru toꞌe hẽtup hat pe -Pywo ti rat yt kat i sese uruekat uhyt e. Iꞌewyte yt kat i uruetineiru uru kawiat parata kawiat mehin e. Yt hekat rakaria hin i ti uruto wen maꞌato kat som toineꞌen uruwatnuat rakat atum yne epe mehin e. Miꞌi hawyi toꞌe ipytyt i rakat pe -Tupana Mipoꞌoro Aiporekuat nuat Iesui tawa Nasare piat wemotag hat set no woromoehãite teran mesup mehin e. Miꞌi tupono epoĩꞌam no ewyry ro uhyt e ipy kĩꞌã sese rakat pe.
Uruꞌywania Tupana piat taꞌatupoityro hap pun haria taꞌatuꞌaparap kahato Tupana imiium taꞌatuehakyeraꞌat hamuat ete. Yt taꞌatukyꞌesat i hawyi ihakyꞌeꞌi rakaria ewy tukupteꞌen mesuwe. Katupono pya kahato Tupana kai tukupteꞌen. Uruꞌywania mipun iraniaꞌin ywania ewy topyhuꞌat. Miꞌi hawyi koitywy iraniaꞌin ywania Tupana mipoityro wo tukupteꞌen aikotã Tupana Paꞌãu kuap haria wo. Taꞌatumohey Tupana hawyi Tupana mihuꞌi huꞌi koꞌi wo tukupteꞌen. Maꞌato meiũran aru Iuteuria ywania urutoria yne Iesui mohey haria wo urutukupteꞌen aru imiꞌairoria oktan aikotã iraniaꞌin ywania mesuwat yi tote wẽtup sok yn watukupteꞌen hap ewy. Miꞌi hap eꞌat pe Tupana mipoityro koꞌi yne miitꞌin. Miꞌi pote mesuwat yi yne Tupana mipoityro wo topyhuꞌat. Waku kahato miꞌi hap eꞌat topyhuꞌat waku sakpo e.
-Tupana uito ti emipoꞌoro Pauru atikyꞌesat kahato etiꞌatupowyro iraniaꞌin ywania kape ekuap hamuat hap ete. Koitywy iꞌatuꞌarot potꞌi wywo tukupteꞌen. En yn waku iꞌatumowepiit kuap hanuat. Esaꞌyru kape yn teꞌeruwanetup taꞌatuhekatup haype are. Uiꞌywot mekewat ewat wuatꞌi eꞌat piat woꞌomowepiit hap yn waku etum iꞌatuepe. Esaꞌyru mohey hap kaipyi etum no iꞌatuepe iꞌatuwanetup saꞌag hap monik hap Esaꞌyru mohey hap kaipyi are. Papai etum o Epaꞌãu Wakuat iꞌatuepe poꞌog poꞌog yne eꞌat pe. Etimoesaika miꞌiria Epaꞌãu Wakuat kaipyi are. Epaꞌãu Wakuat kaipyi atikyꞌesat taꞌatuhekatup Esaꞌyru uut hap aat kaꞌap. Uruꞌywot Tupana etimowepiit kahato uheꞌywytꞌin uheinytꞌin tawa wato Huma piaria.
Pywo pe ti worohoꞌokyꞌe kahato eiperia uiꞌywania Iuteuria. Pywo ti rat worohoꞌoekyi teran eiperia yne Tupana Mipoꞌoro Aipotypot Iesui kape uhepiat eimuꞌe hamo maꞌato yt uimohey i eipe. Haty kahato uipyꞌa piat wywo ahẽtup ehepe -Eweimohey ro Iesui eipyꞌa pe Iesui ti Tupana Mipoꞌoro Aiporekuat nuat hap eweimohey ro are. Haty kahato uipyꞌa pe uiꞌywania katupono yt eweimohey i te Iesui. Pywo pe ti yt uheso hin i Tupana Paꞌãu uipyꞌa piat tikuap kahato yt uheso i hap worohoꞌoekyi teran eipe torannia Iesui kape uhepiat eikyꞌe hap wywo are. Atikuap yt uheso i hap. Karãpe arewanetup uity uiꞌywot ywania Iuteuria kape hawyi arewak kahato uipyꞌa puo katupono haty kahato uhete hap toineꞌen uipyꞌa puo. Haty hap ewywuat toineꞌen aat kaꞌap uiwanetup hawe katupono uiꞌywania uhaꞌaseꞌiꞌin koꞌi uhaꞌyruꞌin koꞌi uhakiꞌytꞌin koꞌi uityꞌin koꞌi uiꞌywotꞌin koꞌi yt Iesui mohey haria hin i wo tukupteꞌen mote. Iuteuria atuehakyeraꞌat teran hap ahatyꞌu kahato uipyꞌa pe are. Yt uheso hin i. Tupana tikuap kahato yt uheso hin i hap.
Mekewat uimiwan saꞌawyꞌi wuat pe worohoꞌonapin haty wo -Eiminug saꞌag eweitoiat ro. Arewak kahato popuo atiwan miꞌi miwan ehewowi. Yt atikyꞌesat i uimiwan me eimopyꞌahak hap katupono worohoꞌokyꞌe kahato eipe poꞌog torannia kai. Miꞌi pote haty kahato uipyꞌa pe iꞌewyte uiwanetup hawe worohoꞌonapin eiminug saꞌag etiat turan.
Saꞌawyꞌi eipyꞌasetpe urutukupteꞌen turan miitꞌin mimosoꞌopot koꞌi wo uruto uruiꞌatumuꞌe eipe Iesui etiat pote. Miꞌi hawyi uruepiat hoꞌopot hap kaipyi eweikupteꞌen pywo e haria wo typyꞌi raꞌyn. Miꞌi hap kaipyi koitywy miitꞌin poꞌog poꞌog Tupana kapiat wehum haria wo tukupteꞌen. -Egyiꞌat kahato Tupana eweiꞌe. Yt uwe i eꞌewy hegyiꞌat hap eweiꞌe. Uruimotypot wuat waku rakat. Uruhewaku En eweiꞌe itote poꞌog poꞌog saꞌawyꞌi kai. Koitywy Tupana topyhuꞌat eimimotypot no raꞌyn uruepiat hoꞌopot kahato eimuꞌe hamuat rakirẽ.
Tupana Paꞌãu eiam kahato aito. Miꞌi pote ahesaika kahato Tupana ehay moherep hamo. Pyno yt ahesaika hin i pykai ahehay Iesui etiat hesaika kahato katupono aito heiam yi kawiat ewywuat watopyhuꞌat pykai Tupana Paꞌãu aipytꞌat nug kahato. Miꞌi hawyi woity rakat mehit rakat koꞌi kawiat ewywuat watopyhuꞌat. Miꞌi hawyi meremo miitꞌin tikuap ahesaika hap toineꞌen Tupana Paꞌãu kaipyi hap yt aipiit yi kawiat kaipyi i.
Eipotypot Iesui aikyꞌe kahato. Miꞌi hap eweikuap taꞌyn maꞌato ahenoi teran i raꞌyn. Hegyiꞌat kahato Miꞌi aikotã hekat sese rakat timoꞌẽ yne tekareꞌen ihakyꞌeꞌi rakaria pe hap ewy Aikaꞌiwat hegyiꞌat kahato. Saꞌawyꞌi sese yne kareꞌen topyhuꞌat ipo pe atipy pe. Miꞌi hawyi ahowawi tuut atipy kaipyi. Miꞌi Miit ihakyꞌeꞌi rakat topyhuꞌat. Toimoꞌẽ yne tewaku hap ahowawi aikyꞌe haype. Miꞌi hap koꞌi watikuap taꞌyn. Maꞌato waku watopyhuꞌat aikotã hegyiꞌat hap ewy uhekatuwyria are.
Uhewaku hap yt putꞌok e hin i Aipotypot eropat hamo are. Taꞌi uito ti poꞌog kurin katno areineꞌen poꞌog yi kape torannia Iesui mohey haria kai areineꞌen uito maꞌato miꞌi pykai Tupana uiꞌairo iraniaꞌin ywania muꞌe hamo tehay ikahu rakat ete uhewaku hap yt putꞌok e hin i heropat hamo pykai are. Yt naku i uito pykai towese kahato hap mywo uiꞌairo katupono yt poꞌog hin i uito. Koitywy atimoꞌẽ kahato iraniaꞌin ywania pe. Tupana ekareꞌen moꞌẽ hat ewywuat areineꞌen uito aikotã wuatꞌi eꞌat piat hekat rakat tomoꞌẽ hap ewy areineꞌen. Aikaꞌiwat Iesui ekat iwato kahato aikotã poꞌog poꞌog wuatꞌi kai toineꞌen poꞌog poꞌog Miꞌi ekat moꞌẽ hat ewy areineꞌen uito Pauru.
Koitywy suraraꞌin uipyhyp taꞌyn mesuwe. Yt taꞌatukyꞌesat i poꞌog worohoꞌomuꞌe hap maꞌato uiꞌauka pote uiꞌauka are maꞌato miꞌi pykai yt karãpe i worohoꞌoꞌatoiat eimuꞌe hap ete katupono atikyꞌesat yne eipe Iesui mohey haria wo hap. Uhuu okpun eikawiatno pote uikuꞌuro Tupana mowepiit hap topyhuꞌat are.
Koitywy hoꞌopot hat ewy areineꞌen mesuwe. Uipiit satyꞌi kahato areineꞌen katupono woꞌopyhik hawe areineꞌen hatek takat ewy. Miꞌi pykai uiwepiit yn katupono eikawiatno ahoꞌopot. Saꞌawyꞌi Aipotypot Iesui hoꞌopot kahato aikawiatno tomohey haria etiatno. Koitywy watoineꞌen wẽtup mepyt sok ewy Iesui upi katupono tohoꞌopot aikawiatno. Miꞌi hap ewy kahato ahoꞌopot Iesui mohey haria kawiatno.
Sehay wakuat Aipotypot etiat Iesui etiat Tupana tikyꞌesat kahato aiwanetup hawe aipyꞌa pe. Toikyꞌesat yne Iesui mienoi aikai howapy sakpo hap ti raꞌyn toikyꞌesat. Toikyꞌesat yne Tosaꞌyru ehay aipyꞌa pyi tuwẽtem nakat aikotã hekat rakat hegyiꞌat rakat tum hap ewy. Toikyꞌesat ahegyiꞌat kahato hap tehay wywuat torannia pe. Toikyꞌesat watiꞌatumuꞌe kahato iraniaꞌin tehay wepy puat hap. Toikyꞌesat watiꞌatumuꞌe kahato tehay wo iraniaꞌin hap yne aiweꞌeg hap wywo waku aiwoꞌomuꞌe hamo. Toikyꞌesat morekuat Tawi wepy hawuo watuwepy hap. Toikyꞌesat tehay kaipywiat hap watuwehum kahato tewowiat wepy hamuat wuatꞌi ehamo hap. Toikyꞌesat watuwepy mekewat sehay ikahu rakatno tuetiat hamo. Toikyꞌesat watuwepy mekewat saꞌawyꞌi wuat wepy hap pyi. Toikyꞌesat towawiat wepy hap aipyꞌa pywiat hap Topaꞌãu wywo. Toikyꞌesat watuwehum tewowiat wepy hap mywo -Waku kahato En aiꞌe hap toikyꞌesat. -Emiium waku kahato Tupana aiꞌe hap toikyꞌesat.
Saꞌawyꞌi uruminug wakuap kape ti ewehehaꞌat kahato hawyi -Taꞌi uruto ti iꞌewyte urutukupteꞌen teran Pauruꞌin ewy eweiꞌe. Taꞌi Iꞌatukaꞌiwat Iesui mohey haria wo urutukupteꞌen teran eweiꞌe. Iꞌatumienoi ahepiat wyti pywuat kahato rakat eweiꞌe. Mio tã eweiꞌe hawyi ti Tupana Paꞌãu putꞌok e raꞌyn ehetiat hawyi eiwepiit kahato hap taꞌyn topyhuꞌat ehete. Miꞌi hawyi ti maꞌato mekewat hoꞌopot hap eꞌat putꞌok e raꞌyn ehete turan yt hep e kuap i raꞌyn ehepiat imohey hap iꞌewyte eiwepiit hap.
Miꞌi pote mekewat eꞌat pe aipyhyp woꞌopyhyp hawe wanikaptia po pe watoineꞌen. Miꞌi tote aiꞌahyk ahyk saꞌag neꞌi Iesui mohey haria aito pote. Maꞌato waĩꞌiꞌatuꞌe pykai yt watoiat hin i Iesui. Iesui mohey haria iraniaꞌin yt aiꞌatoiat hin i hoꞌopot hap eꞌat pe maꞌato -Waku urumosatyꞌi satyꞌi wy watoꞌe morekuaria pe katupono waku uruhoꞌopot wy uruwyriaꞌin nywo uruto Iesui mohey haria wy pote waku watoꞌe suraraꞌin me. Miꞌi hawyi wẽtup miit ewy wahoꞌopot hap topyhuꞌat katupono aiwoꞌokyꞌe kahato hap itote pote. -Pyno waku watuwat aito wy iꞌatuwywo wahoꞌopot hamo waku watoꞌe aiwanikaptia pe. Miꞌi hawyi suraraꞌin tiꞌatupohari yne yne ahekat koꞌi ete Iesui mohey haria aito pote wen maꞌato miꞌi turan yt kat watoꞌe hin i maꞌato Tupana kape watuwehum kahato imimowepiit koꞌi wuatꞌi eꞌat piaria aito pote. -Pywo ti rat ahekareꞌen sese atipy pe yn toineꞌen mio watoꞌe aiwoꞌope mekewat eꞌat saꞌag me ahekat yne taꞌatupohari turan hap eꞌat pe. Itote ti wakuat poꞌog ahekareꞌen watoꞌe aiwoꞌope aipohari yne ete pykai.
Pyno ewetum no ehewaure kaꞌa uhepe uimikyꞌe koꞌi. Yt eweikuap i te apo aikotã Tupana tiꞌairo kahato yt hekat i rakaria Iesui mohey kahato hanuaria wo hap. Poꞌog toiꞌairo ihakyꞌeꞌi rakaria temiit no tetama piatnuaria wo iraniaꞌin kai katupono saꞌawyꞌi toꞌe -Uhemiit sese wyti aru tukupteꞌen miit emiit haria wo karãpe arepyhuꞌat Wuatꞌi Miitꞌin Morekuat Koro mesuwarote e Tupana miwan me saꞌawyꞌi. Mio tã toꞌe hap ewy raꞌyn ti mesup te toiꞌairo temiitꞌin no miit yt uwe mikuap ewywuat koꞌi i yt uwe mikyꞌe ewywuat koꞌi i e. Miꞌiria pe ti -Worohoꞌoꞌairo eipe miitꞌin porekuaria wo uimohey sese haria eiperia pote e. Worohoꞌonug eipe morekuat no yne mesuwat yi tote e hatek takaria pe tokyꞌe sese haria pe. Worohoꞌomoesaika uimohey kahato hap wywo wuatꞌi nug hamo e Tupana tomohey haria pe.
Karãpe putꞌok e ahãꞌãg hap ahatek hap miitꞌin mikyryꞌi hap aiꞌahuu hap yne mekewat koꞌi putꞌok e pote waku meremo watuwemowepiit hawyi waku watoꞌe Tupana pe ahoꞌopot hap putꞌok e hawyi -Tupana koitywy atikuap taꞌyn Esaꞌyru Emipoꞌoro uruporekuat nuat hoꞌopot hap. Yt atikuap yne i maꞌato ahoꞌopot hap kaipyi atikuap Emipoꞌoro hoꞌopot hap. Waku kahato atuꞌu Iesui ewy mekewat hoꞌopot koꞌi waku watoꞌe Tupana pe. Meiũran aru atikuap Esaꞌyru uruporekuat nuat putꞌok e mesuwe wuatꞌi mimotypotno tuwemoherep mesuwe. Miꞌi hap eꞌat pe uimowepiit hap sese wuatꞌi eꞌat piat hap toineꞌen waku watoꞌe Tupana pe.
Uimohey haria tawa Simina piaria worohoꞌokuap kahato eipe. Waku sakpoꞌe eipe e. Uheropat haria seseria kahato eipe e. Atikuap ewehoꞌopot uhetiatno hap e. Atikuap aikotã hoꞌopot kahato popuo eipotpap uimikyꞌesat nug hap ete. Satek takaria eweikupteꞌen maꞌato uiwanetup hawe hekat kahato rakaria wuatꞌi eꞌat piaria eweikupteꞌen e. Iꞌewyte atikuap aikotã itotiaria tukupteꞌen hap eiꞌatusatyꞌi satyꞌi kahato haria e. Atikuap aikotã uruto yn ni Tupana kuap haria katupono Iuteu ywania sese uruto iraniaꞌin ehepe maꞌato eipe yt eweiꞌe. Miꞌiria taꞌatuehay saꞌag wo ehepe. Yt Tupana emiitꞌin hin i miꞌiria maꞌato ahiag motypot yat piaria miꞌiria e. Yt Iuteu ywania hin i maꞌato ahiag ywania saꞌag tukupteꞌen miꞌiria Iuteu ywania ran neꞌi koꞌi e.
ကြော်ငြာတွေ