2 Kuriniu 4:6 - Sateré-Mawé

⁶ Saꞌawyꞌi sese iꞌypyryp sese turan Tupana toꞌe -Ereineꞌen no hẽtyhot hap e. Miꞌi hawyi toineꞌen naꞌyn hẽtyhot hap. Koitywy miꞌi hap ewy tutunug aiwanetup hawe. Aipotypot Iesui Tupana eꞌariãty ewywuat toineꞌen. Karãpe watomohey Iesui hawyi Tupana heremo topyhuꞌat aiwanetup hawe -Worokuap kahato En mesup Tupana watoꞌe. Esaꞌyru En wẽtup miit ewy yn watoꞌe. Koitywy watikuap ewaku hap watoꞌe.

2 Kuriniu 4:6 ပူးပေါင်းရင်းမြစ်များ

Iruka 10:22

Miꞌi hawyi Iesui toꞌe miitꞌin me -Tupana tum naꞌyn uhepe towatnuat koꞌi apykok hamo tesaika hap e. Taꞌi uiꞌywot yn nyti Uito Tosaꞌyru kuap hat sese e. Iꞌewyte Uito yn nyti uiꞌywot kuap hat e. Maꞌato uwe uwe pe atimoherep teran uiꞌywot kuap hamuat miꞌiria ti aru uiꞌywot kuap haria teꞌeropyhuꞌat e.

Iuwãu 1:14

Mekewat Sehay e hap het rakat Iesui aiꞌewywuat tuwemoherep miitno aipiit ewywuat tuwemoherep. Miꞌi hawyi watehaꞌat kuap i hẽtyhot atipy kaipywiat Tupana saꞌyru wẽtup yn kape. Miꞌi hawyi toineꞌen aipyꞌasetpe. Putꞌok e mesuwe hegyiꞌat hap moherep hamo. Miꞌi ti Wakuat Sese toineꞌen. Hãpyk hap yn tuete. Pywuat rakat toineꞌen.

Iuwãu 11:40

Maꞌato Iesui toꞌe -Mana Mata etiwaure raꞌyn apo muap upiat uiꞌe hap epiat e. Uimohey pote ti aru eraꞌakasa Tupana ẽtyhot hap iminug wakuap sese mesup areꞌe hap.

Iuwãu 12:41

Isaia nimo te taꞌakasa yian mete Iesui ewaku hap hẽtyhot hap kape hawyi tohenoi raꞌyn tomikuap hap oktan.

Iesui Potmuꞌeria 26:18

Woropoꞌoro en wuatꞌi miitꞌin kape e. Miꞌiria tukupteꞌen aikotã yt ihapytig i rakaria ewy katupono yt karãpe i teꞌeraꞌakasa te Tupana taꞌatupyꞌa pe yt taꞌatumohey i pote. Miꞌi pote woropoꞌoro en iꞌatumoehapytig hamo mekewat iꞌypyrywiat hap kaipyi uheꞌariãty hot kapiat iꞌatumoꞌakasa hamo e. Mesuwarotiaria yt uimohey i te haria yne ahiag po pywiaria tukupteꞌen e. Miꞌi pote woropoꞌoro en ahiag pohari hamo e. Miꞌi hawyi ti aru uipo piaria wo raꞌyn miꞌiria tukupteꞌen uhyt e uhepe itote e. Miꞌi hawyi ti aru wakuaria uimepytꞌin no raꞌyn teꞌeropyhuꞌat e. Uimohey haria ti aru uhaꞌyruꞌin uhakiꞌytꞌin sem koꞌi myꞌasetpe ahytmoi wuatꞌi eꞌat pe etiꞌatumuꞌe uhetiatno hawyi e uhepe. Miꞌi tã ti aru atunug uhyt e uhepe mekewat muap upi tawa Tamaku kapiat uhewyry turan e Pauru.

1 Kuriniu 12:8

Pyno Tupana Paꞌãu timoherep wẽtup ok Iesui mohey hat piit pyi iweꞌeg hamuat miitꞌin muꞌe hat. Wẽtup ok imohey hat pe Tupana Paꞌãu timoherep ikuap wuatꞌi miitꞌin muꞌe kuap hamo.

2 Kuriniu 2:10

Koitywy waku waure wo eweikupteꞌen iminug saꞌag kai. Waure wo eweikupteꞌen pote iꞌewyte uito waure wo areineꞌen. Miꞌi hawyi waku waure wo watoꞌe Aikaꞌiwat Iesui e. Miꞌi hawyi iꞌewyte Aikaꞌiwat toineꞌen waure wo raꞌyn. Miꞌi hawyi aiwoꞌokyꞌe hap sese toineꞌen i raꞌyn.

2 Kuriniu 3:18

Aito Iesui mohey haria Muisei ewywuat kahato Tupana motypot hap hẽtyhot hap maꞌato yt ikuꞌuro i ahowa ete Muisei wat ewy. Katupono ahowa Tupana Ewa yꞌy Ewa ete hap ewy Tupana Paꞌãu aimoẽtyhot kahato wuatꞌi eꞌat pe. Yt hasep hin i Muisei Ewa ewy. Miꞌi hawyi Tupana kahu hap ahepe topyhuꞌat. Ipaꞌãu heremo ahete Tupana Mipoꞌoro Aikaꞌiwat nuat Paꞌãu heremo ahete. Pyno yne eꞌat poꞌog wakuat watopyhuꞌat hap ewy Tupana Paꞌãu hẽtyhot hap ete. Miꞌi hawyi yne eꞌat watimoherep poꞌog poꞌog Tupana Paꞌãu. Katupono Tupana ewywuat poꞌog poꞌog watopyhuꞌat yt kat i sokpe ahowa suwy hap ewy maꞌato Tupana iꞌãuka yt kat i ahowa ete. Ikahu kahato Tupana Paꞌãu ahete are uimimuꞌeria uito Pauru.

2 Kuriniu 4:4

Pyno yt imohey i haria mesuwarotiaria hoꞌowasat rakaria wo teꞌeropyhuꞌat. Ahiag topyhuꞌat iꞌatuetupana wo. Miꞌi hawyi karãpe wahenoi sehay wakuat aikotã Tupana tipoꞌoro Tosaꞌyru Aiporekuat no hap etiat iꞌewyte karãpe watimoherep yne Iesui etiat Tupana moherep hat sese etiat Tupana ewywuat rakat miꞌi hap etiat wahenoi turan -Yt eweimohey teiꞌo miꞌi. Yt eweimohey teiꞌo miꞌi e ahiag iꞌatuwanetup hawe yt toikyꞌesat i miꞌiria teꞌeropyhuꞌat Iesui haria pote. Ahiag iꞌatuewa hik hap ewy iꞌatuete yt toikyꞌesat i Iesui kapiat iꞌatuꞌakasa hap pote.

Ewesu 1:17

-Uruꞌywot koro En ni urupotypot Iesui eTupana are. Etum no Epaꞌãu poꞌog tawa Ewesu piaria pe ekuap poꞌog poꞌog mono areꞌe Tupana pe. Uwe En sese hap kuap hamuat atikyꞌesat. Epaꞌãu kaipyi iweꞌeg kahato rakaria wo tukupteꞌen hap atikyꞌesat are. Etiꞌatumoẽtyhot ro iꞌatuwanetup hap are. Etihep yt iꞌatuehapytig i hap miꞌi hawyi heremo iꞌatuwanetup hawe etum Esaꞌyru mohey hap Tupana are.

Ewesu 1:18

Tupana areꞌe etum no Esaꞌyru mohey haria tapyiꞌa Ewesu piaria pe ewanetup hap kuap hamo hap are. Etum no iꞌatuepe ewanetup kuap hap kat hamo etiꞌatuꞌairo miꞌiria emiitꞌin no are. Etimoherep to iꞌatuepe emikyꞌesat koꞌi nug neran hap koꞌi are. Etimoherep iꞌatuepe aikotã aru tukupteꞌen atipy pe esaꞌyruꞌin wo esakiꞌytꞌin wo hap are. Etimoherep iꞌatuepe kat som atipy pe are. Etimoherep iꞌatuepe aikotã aru atipy pe emotypot haria tukupteꞌen hap are. Etimoherep iꞌatuepe aikotã aru ewaku hap ewywuaria tukupteꞌen hap are. Tupana ewaku hap ekahu hap ewato hap etimoherep emiitꞌin me tawa Ewesu piaria pe are aat kaꞌap ehetiatno uiwyriaꞌin.

Ewesu 5:8

Pyno miꞌi koꞌi saꞌag nug haria ewy yne saꞌawyꞌi aito nimo. Yt watikuap hin i Tupana mekewat eꞌat pe. Nimo hoꞌowasat iꞌypyryp we rakaria ewywuaria watoineꞌen maꞌato mio Aikaꞌiwat eropat haria watopyhuꞌat. Miꞌi pote koitywy watoineꞌen muap upi hẽtyhot puo ikohyewyry rakat ewy yt wataꞌat kuap i raꞌyn. Waku watunug wakuat yn wuatꞌi ehamo Tupana ehamo. Waku watunug waku hap yn aikotã Tupana kuap haria ewy.

Wiripu 2:6

Tupana wo toineꞌen Iesui pykai tuwemohit. Saꞌawyꞌi wuat eꞌyian mete toineꞌen Tupana wo. Miꞌi pykai tuwemohit. Tuut ahowawi hawyi yt toꞌe i -Arenug Uito mesuwe Tupana wo yt e i Tupana raꞌyn pykai.

Korosi 1:15

Tupana sese ti yt heremo i ahowawi. Miꞌi hawyi toipoꞌoro ahowawi Tosaꞌyru wẽtup ok tuwemoherep hamo Aiporekuat nuat. Imipoꞌoro Haꞌyru ti iꞌewywuat sese topyhuꞌat. Iꞌywot yt heremo pykai i maꞌato Haꞌyru wataꞌakasa hawyi watikuap taꞌyn Haꞌyru hawyi watikuap taꞌyn Toꞌywot ewy raꞌyn hap. Miꞌi hawyi yt heremo i rakat heremo raꞌyn. Haꞌyru ti poꞌog naꞌyn torannia iraniaꞌin kai ipotputꞌok e. Torannia Tupana minug kai ipotputꞌok e. Poꞌog naꞌyn yne ieineꞌen haria hewyry rakaria yi totiat atipy piat kai poꞌog Haꞌyru.

1 Tesaronika 2:12

Uruiꞌatumaharaꞌi maharaꞌi kahato eipe urumepytꞌin mote. Ehewyry hãpyk kahato o Tupana mikyꞌesat ewy urutoꞌe. Eikay kay raꞌyn temiitꞌin no tetawa kape aikope toineꞌen Morekuat no hap kape aikope tewaku hap moherep hap kape eikay kay. Miꞌi tote yt tuwemoti hin i Tupana eiminug koꞌi pupi. Miꞌi hap uruikyꞌesat kahato. Yt kat i hin i Tupana wemoti eiminug koꞌi pupiat hap uruikyꞌesat.

Epereu 1:3

Tupana Iãꞌãkap Sese Haꞌyru yn iꞌewy sese rakat. Wẽtup Miit ewy yn iꞌatueko wẽtup yn iꞌatumikyꞌesat koꞌi wẽtup yn iꞌatumotypot hap toꞌokupitu. Tosaꞌyru esaika hap wo toimopyhuꞌat yne atipy koꞌi mesuwarotiaria iꞌewyte atipy piaria Haꞌyru inug koꞌi yne yne. Toꞌywot ehay upi toimoesaika yne yi aat waikiru koꞌi waty Haꞌyru esaika hap mo inug iheg me. Iꞌewyte Tosaꞌyru suu wo aipit pit hap aiminug saꞌag toikoho yne. Iesui tipuruk yne aiminug saꞌag hawyi -Waku eraꞌapyk mesuwe uipo sese kai uiꞌyatype atipy pe e. Waku eraꞌapyk mesuwe uhepiat emotypot hap tote e katupono woronug En Wuatꞌi Wuatꞌi Porekuatno poꞌog poꞌog wuatꞌi kawiat hesaika rakatno e Tupana Tosaꞌyru pe.

Epereu 6:4

Iesui toineꞌen aipyꞌasetpe turan aiꞌywania tuwat kahato Aikaꞌiwat ehay upi -Pywo iꞌatuꞌe saꞌawyꞌi Iesui e hap ete hawyi paa iꞌatuꞌe taꞌatuminug saꞌag ete hawyi iꞌatuwepiit kahato mekewat kuap pakup hap ete. Tupana Miium Iesui taꞌatuiãꞌãg sio waku sio yt hap ete sio Tupana ehay ihay sio yt hap kuap hamo taꞌatuiãꞌãg. Miꞌi turan Tupana Paꞌãu wakuat iꞌatumuꞌe kahato aiꞌywania Iuteuria. Miꞌi hawyi teꞌeropyhuꞌat Tupana Wakuat Paꞌãu eiam wo.

1 Peteru 1:12

Aikotã iꞌatumuꞌetu wuat ewy Tupana Paꞌãu timoherep iꞌatuepe aikotã aru Aipotypot tokuꞌuro hap eꞌyian mete toineꞌen hap koꞌi aikotã tuwẽtem guꞌuro pyi hap taꞌatukuap kahato Tupana Paꞌãu kaipyi. Miꞌi hawyi putꞌok e mekewat eꞌat pe hawyi uruepe topotmuꞌeria sese pe tuwemoherep taꞌyn Aipotypot. Miꞌi hawyi uruimoherep taꞌyn ehepe iꞌatuꞌe hap ewywuat saꞌawyꞌi wuat Tupana ehay moherep haria e hap ewywuat. Urutaꞌakasa yne iꞌatuꞌe hap ewywuat Aikaꞌiwat moherep hap. Urutaꞌakasa yne miꞌi hawyi mesup uruimoherep yne Iesui etiat ehepe uruꞌakasa hap koꞌi. Uruimoherep kahato uruehay wywo Iesui etiat Tupana Paꞌãu urupiit piat uruwanetup hap koꞌi. Uruimoherep mesuwat sehay wakuat Iesui etiat kat pote urutaꞌakasa raꞌyn Tupana Mipoꞌoro atipy kaipywiat. Koitywy uruikuap Tupana miehakyeraꞌat koꞌi wuat aito hap. Mekewat atipy piaria teꞌeruwanetup kahato kat pote saꞌawyꞌi yt uruimohey hin i maꞌato mesup uruimohey raꞌyn. Saꞌawyꞌi yt Tupana kape hin i uruwanetup hap. Koitywy Tupana kape yn naꞌyn uruwanetup hap. Miꞌi hap ete atipy piaria teꞌeruwanetup kahato. Taꞌatukuap teran haype maꞌato yt taꞌatukuap i kat pote mesup Tupana miehakyeraꞌat koꞌi wuat raꞌyn mesup uruto are.

1 Peteru 2:9

Maꞌato aito ti aikotã wẽtup ywania Tupana miꞌairo wẽtup ywania ewywuat koꞌi aito. Kat pote Tupana saꞌyruꞌin sakiꞌytꞌin aito. Miꞌi pote Tupana aiꞌairo tepaꞌi koꞌi wo maꞌato yt mesuwarotiat paꞌi koꞌi ewywuat i. Katupono aito morekuaria ewy watopyhuꞌat Tupana wanetup hawe. Aitoria aikotã wẽtup tama piaria ewywuat Tupana eꞌyi kaꞌiwaria aito. Aiwanetup hap koꞌi yt mesuwarotiaria minug koꞌi mesuwarotiaria wanetup hap koꞌi ewy hin i. Miꞌi pote -Eiperia yt miit ewy i iꞌatuꞌe ahepe. Miꞌi pote Tupana motypot hap yn watikyꞌesat mesuwarote. -Waku kahato uruetupana watoꞌe iraniaꞌin me. Saꞌawyꞌi urutukupteꞌen aikotã iꞌypyryp we hap ewy. Maꞌato mesup urutukupteꞌen hẽtyhot puo hap ewy. Saꞌawyꞌi Tupana yt heremo hin i uruepe. Koitywy heremo hap ewy urupyꞌa pe uruimohey pote.

2 Peteru 1:19

Saꞌawyꞌi wuaria Tupana ehay moherep haria tiꞌatumuꞌe kahato Tupana Mipoꞌoro Aiporekuat nuat ete. Mesup wẽtup ihay poꞌog hesaika miꞌiria kai katupono koitywy Iꞌywot ihay atipy kaipyi uruehamo -Miꞌi ti Uhaꞌyru sese uimowepiit hat sese Miꞌi Miit e atipy kaipyi ahowawi. Taꞌi Tupana kaipywiat ti sehay poꞌog hesaika torannia iraniaꞌin mienoi koꞌi kai are. Miꞌi pote waku watomohey kahato miꞌi e hap katupono miꞌi Tupana wẽ kaipywiat sehay sese are. Pywuat sese ti topyhuꞌat miꞌi e hap poꞌog torannia kai are. Miꞌi tupono eiwanetup kahato o mio tã e Tosaꞌyru piat hap kape are uiwyriaꞌin e. Katupono ti mekewat sehay ti Tupana ehay moherep haria timoherep kahato Tupana Mipoꞌoro Aiporekuat nuat hap etiat. Aikotã ariãty iꞌypyryp wiat hẽtyhot hap ewywuat. Pyno miꞌi sehay eweikuap eipyꞌa pe Tupana Saꞌyru hap miꞌi hawyi aikotã aat tuwemoherep hune pyi hẽtyhot tuerut hap ewy eipyꞌa pyi wyti aru hẽtyhot hap tuwemoherep are. Aikotã waikiru wato tuwẽtem hunete miꞌi hap ewy eipyꞌa pyi tuwẽtem hẽtyhot tuerut eweimohey raꞌyn Iesui Tupana Saꞌyru hap hawyi.