2 Kuriniu 4:17 - Sateré-Mawé

¹⁷ Pyno iraniaꞌin Tupana ehay yt kyꞌesat i haria urusatyꞌi satyꞌi kahato urumosoꞌopot kahato mesuwe. Maꞌato aheineꞌen turan yn aimosoꞌopot kuap. Miꞌi hawyi poꞌog yt kat i taꞌatunug kuap maꞌato yt watoineꞌen motꞌi i mesuwarote. Miꞌi hawyi watoineꞌen motꞌi wuatꞌi eꞌat pe hap tote. Miꞌi hawyi atipy pe aru watoꞌe -Taꞌi wahoꞌopot kahato yi tote miitꞌin muꞌe hamuat turan. Maꞌato koitywy waku aiwanetup hawe ahepiat hoꞌopot hap watoꞌe. Katupono ahepiat hoꞌopot hap kaipyi iꞌatu kahato Tupana motypot haria nug mesuwiat hamo watoꞌe aru atipy pe.

2 Kuriniu 4:17 ပူးပေါင်းရင်းမြစ်များ

Mateu 5:12

Maꞌato miꞌi pykai waku eiweipiit eiwehum yn naꞌyn katupono Tupana kai iwato kahato imiium ehepiatnuat atipy pe. Katupono saꞌawyꞌi wuaria Tupana ehay moherep haria ti eiꞌewyte hoꞌopot haria tukupteꞌen.

Iruka 6:23

Maꞌato waku miꞌi tã taꞌatunug ehetiat pykai eiwepiit yn naꞌyn katupono toineꞌen iwato kahato saꞌup eiwatnuat atipy pe katupono saꞌawyꞌi wuaria Tupana ehay moherep haria eiꞌewy wuaria ete ehetiat ewy te taꞌatunug.

Iesui Potmuꞌeria 20:23

Maꞌato miꞌi tã e hap atikuap Tupana Paꞌãu Wakuat uimuꞌe -Ereto Ierusarẽi kape hap tote ti epyhik hamuat ehoꞌopat hamuat yn topyhuꞌat itote e uhepe wuatꞌi tawa puo e Pauru.

Humanu 2:7

Taꞌi Tupana tum aru tomohey haria pe tomotypot haria pe tomikyꞌesat nug hanuaria pe wuatꞌi eꞌat piat iꞌatuieineꞌen hap sese tomepytꞌin saꞌup e. Miꞌiria yt iꞌatupohep hin i Tupana motypot hap ete. Taꞌatuminug wakuap koꞌi wo taꞌatumotypot aat kaꞌap. Yt karãpe i iꞌatukuꞌuro miꞌiria ete e. Katupono tomotypot saꞌup Tupana tum miꞌiria pe wuatꞌi eꞌat piat iꞌatuieineꞌen waku hap.

Humanu 8:18

Ahoꞌopot kahato mesuwe uito Pauru. Koitywy ahoꞌopot hap eꞌat kahato. Koran ni miitꞌin mimosoꞌopot koꞌi kahato watoineꞌen maꞌato Iesui motypot hap eꞌat pe Tupana mimotypot no kahato watopyhuꞌat. Mekewat eꞌat pe aito iꞌewyte Tupana mimotypot kahato wo watopyhuꞌat. Aimotypot Iesui wywo hap eꞌat pe aru poꞌog iwato mesup eꞌat piat wahoꞌopot mesuwarotiat. Taꞌi waku watoꞌe ahoꞌopot kahato hawe -Koitywy ahoꞌopot kahato Iesui wanikap po upi maꞌato typy sakpo are poꞌog Tupana mimotypot no areineꞌen wuatꞌi eꞌat piat ahoꞌopot hap saꞌup waku watoꞌe.

Humanu 8:34

Tupana mimoewaku koꞌi kahato aito pote yt uwe i toꞌe kuap ahepe -Tupana miꞌapiheg koꞌi wo aru eweikupteꞌen yt iꞌatuꞌe kuap i. Yt miꞌi tã hin i aru e Tupana ahepiat. Tupana Mipoꞌoro Wuatꞌi Miitꞌin Porekuat nuat ikuꞌuro wuatꞌi miitꞌin apiheg hap koꞌi u hamo. Ikuꞌuro hawyi tuwẽtem guꞌuro pyi miitꞌin moieineꞌen wuatꞌi eꞌat piat hamo. Mio raꞌyn toineꞌen atipy pe apyk pe Tupana po ran kai imohey haria imimohãpyk haria moherep hamuat. Taꞌi watomohey hawyi imimohãpyk haria wo watukupteꞌen Tupana wanetup hawe. -Waku kahato uimohey haria koꞌi e yn ahepe Tupana ahetiatno iraniaꞌin me ahewanikaptia pe.

Humanu 8:37

Pyno morekuat Tawi ewy kahato watopyhuꞌat mesuwarote hoꞌopot haria maꞌato miꞌi pykai yt watoiat hin i Aikyꞌe hat Iesui are katupono Aikaꞌiwat ti aimoesaika kahato aiꞌakit hap pupi. Miꞌi hawyi Aikyꞌe hat Koro toineꞌen aiwywo aat kaꞌap wuatꞌi aiꞌakit hap akit hamuat. Miꞌi pote ti watoineꞌen ahesurara akag ewy. Aikotã surara poꞌog hesaika rakat torannia kawiat ewywuat watoineꞌen mesuwarote yne yt naku i akit hamuat.

1 Kuriniu 2:9

Aikotã Tupana toꞌe Saꞌawyꞌi hap ewy -Mekewat uikyꞌe haria pe atum neran uiminug wakuat poꞌog ikahu torannia miitꞌin akasa hap koꞌi kai ikahu rakat e. Atum neran uhemiitꞌin me wakuat sese e. Yt teke i te iꞌatuwanetup hawe ikahu hap e. Miꞌi hap ti atum neran uikyꞌe haria pe e Tupana saꞌawyꞌi Isaia miwan 64.4 pe.

2 Kuriniu 3:18

Aito Iesui mohey haria Muisei ewywuat kahato Tupana motypot hap hẽtyhot hap maꞌato yt ikuꞌuro i ahowa ete Muisei wat ewy. Katupono ahowa Tupana Ewa yꞌy Ewa ete hap ewy Tupana Paꞌãu aimoẽtyhot kahato wuatꞌi eꞌat pe. Yt hasep hin i Muisei Ewa ewy. Miꞌi hawyi Tupana kahu hap ahepe topyhuꞌat. Ipaꞌãu heremo ahete Tupana Mipoꞌoro Aikaꞌiwat nuat Paꞌãu heremo ahete. Pyno yne eꞌat poꞌog wakuat watopyhuꞌat hap ewy Tupana Paꞌãu hẽtyhot hap ete. Miꞌi hawyi yne eꞌat watimoherep poꞌog poꞌog Tupana Paꞌãu. Katupono Tupana ewywuat poꞌog poꞌog watopyhuꞌat yt kat i sokpe ahowa suwy hap ewy maꞌato Tupana iꞌãuka yt kat i ahowa ete. Ikahu kahato Tupana Paꞌãu ahete are uimimuꞌeria uito Pauru.

Wiripu 1:19

Pyno waku ewehẽtup o aheTupana kape -Etihep o Pauru woꞌopyhik hap wyi eweiꞌe o are. Mio tã eweiꞌe pote atikuap arẽtem aru mesuwepyi morekuaria woꞌopyhik hap kaipyi are. Taꞌi atikuap aru Aipotypot Iesui tipoꞌoro Topaꞌãu uihep mesuwepyi hamo uiꞌapypok hamo are.

2 Tesaronika 1:4

Iraniaꞌin itotiaria toꞌokyryꞌi kahato ehete. Iesui mohey ehepiat pote ehatyꞌi hatyꞌi kahato. Taꞌatukyꞌesat kahato waureꞌeiꞌe Tupana etiat hap. Yt ikahu hin i iꞌatuꞌe ehepe maꞌato yt eweiwaure teran hin i Iesui mohey ehepiat hap. Miꞌi pote iraniaꞌin me uruhenoi -Meiẽ miꞌiria tawa Tesaronika piaria waku kahato rakaria urutoꞌe. Yt taꞌatuꞌatoiat hin i Iesui mohey taꞌatuepiat hap taꞌatusatyꞌi satyꞌi pykai urutoꞌe. Mio tã urutoꞌe yn iraniaꞌin tawa piaria imohey haria puo.

2 Tesaronika 1:6

Tupana tomoherep hãpyk kahato wakuap sio yt hap. Miꞌi tupono ti yt toiwaure hin i ehetiat mikyryꞌi haria. Toiꞌatuporeraꞌaipok iꞌatupotsatyꞌi satyꞌi hap eimosoꞌopot hap kaipyi.

2 Timoteu 2:10

Maꞌato yt uiwẽpohep hin i Iesui mohey hap ete waĩꞌiꞌatuꞌe pykai. Uiꞌauka pote uiꞌauka maꞌato yt uipohep hin i te. Katupono Tupana tiꞌatuehakyeraꞌat teran kahato tomiꞌairoria ahoꞌopot kahato Iesui mohey iꞌatuepiat hamuat pykai. Miꞌi hap kaipyi Tupana tiꞌatuehakyeraꞌat miꞌiria. Miꞌi hawyi Iesui kahu hap ewywuaria raꞌyn tukupteꞌen iwywo wuatꞌi eꞌat pe raꞌyn.

Tiaku 1:12

Maꞌato uwe uwe tepiat hoꞌopot turan te hakyꞌeꞌi turan yt iwaure i imohey hap miꞌi hat ti Tupana mimowaku wo toineꞌen iꞌewyte Tupana mimowepiit kahato wo topyhuꞌat wuatꞌi eꞌat pe katupono hoꞌopot hap sakpo gosap hat toineꞌen imohey hat. Miꞌi hat pe Tupana toꞌe aru -Uikyꞌe hat sese en e. Miꞌi pote woromoieineꞌen kahato wuatꞌi eꞌat pe e yt tewaure i haria pe.

1 Peteru 4:7

Pywo ti rat yne mesuwarotiat mesuwat yi iꞌewyte ahekareꞌen aiꞌyat koꞌi aiko hawyi waikiru waty aat gaꞌapy yne mesuwarotiat ikahuro hamuat koꞌi eꞌat yt pya hin i. Pywo ti rat tuut irane uiwyriaꞌin yne mesuwat ikahuro hap eꞌat. Yt pya hin i are. Miꞌi pote waku weꞌeg haria wo watukupteꞌen mesuwarote. Waku wahẽtup aat kaꞌap Tupana kape mesuwarotiaria ehakyeraꞌat hamo. Waku wahekatup Iesui uut hap.

1 Peteru 5:10

Maꞌato Tupana ti eipowyro kahato hat toineꞌen uiwyriaꞌin ipakup takaria. Tutum neran ehepe yne tesaika hap yt kat saꞌup i. Toikyꞌesat kahato eiperia tomimotypot koꞌi wuatꞌi eꞌat piat hatno. Kat pote Aipotypot Iesui mohey haria eipe pote. Pyno hoꞌopot hap yt motꞌi hamuat i toineꞌen. Mukiꞌite eꞌihatꞌok eꞌihatꞌok hap ewy tokosap taꞌyn. Pyno waku etuꞌu hoꞌopot hap mesup miꞌi hawyi meiũran Tupana mimotag koꞌi wo eweikupteꞌen waku rakaria hãpyk kahato rakaria wo. Yt uwe mimaꞌat koꞌi wo i eweikupteꞌen. Meiũran Tupana ehay wywo ehesaika eweikupteꞌen. Miꞌi hawyi meiũran eiwanetup hap yt kowoꞌi kowoꞌi hin i toineꞌen. Hesaika rakaria wo Tupana mohey haria ewy eweikupteꞌen ewehoꞌopot hap tokosap hawyi ehãꞌãg hap tokosap hawyi are yne pe nagnia pe makuptiaria pe kurum iwasuria pe hirokaria pe yne pe are.

1 Iuwãu 3:2

Uimikyꞌeria koitywy ti aito Tupana mepytꞌin naꞌyn. Taꞌi yt watikuap hin i ti aikotã miat aheineꞌen hamuat hap. Iesui uut hawyi ti aru watikuap aikotã me watoineꞌen hamuat katupono topiit ewy ti ainug hamuat. Miꞌi hawyi ti aru mekewat eꞌat pe wataꞌakasa raꞌyn Iesui sese. Miꞌi hawyi ti aru watopyhuꞌat aikotã iꞌewy raꞌyn are.

Iuta 1:24

Uiwyriaꞌin karãpe putꞌok e ahete ahoꞌopot hap ahatek hap turan ni Tupana ti aimoesaika kuap yne ahãꞌãg hap akit hamo are. Miꞌi pote waku watoꞌe Tupana pe -Urupowyro En Tupana katupono yt urutunug neran i ahiag miat iraniaꞌin miat uruiãꞌãg hap upi waku watoꞌe. Yt naku i uruiꞌatoiat En Tupana uruꞌywot maꞌato urupowyro En urumaꞌat hap akit hamo watoꞌe neꞌi. Taꞌi etikuap yne uruiãꞌãg hap putꞌok e turan. Miꞌi pote urumoesaika mekewat saꞌag nug hap akit hamuat waku watoꞌe Tupana pe are.