2 Kuriniu 12:9 - Sateré-Mawé

⁹ Miꞌi hawyi toꞌe Tupana uhepe -Yt karãpe i atihep epiit piat eꞌahuu hap e. Yt karãpe i epiit hesaika i raꞌyn maꞌato miꞌi pykai waku ereineꞌen. Maꞌato miꞌi pykai yt karãpe i woroꞌatoiat en. Yt karãpe i yt worokyꞌe i raꞌyn e. Karãpe iraniaꞌin teꞌeraꞌakasa esaika hap kapiat hawyi teꞌeroꞌe -Yt topiit kaipyi i Pauru hesaika hap iꞌatuꞌe maꞌato Tupana imoesaika. Miꞌi pote epiit yt hesaika i hap kaipyi uimotypot sese hap topyhuꞌat e Tupana uhepe.

2 Kuriniu 12:9 ပူးပေါင်းရင်းမြစ်များ

Mateu 28:18

Miꞌi hawyi Iesui tuut iꞌatuewowi hawyi iꞌatupyꞌasetpe toineꞌen heremo kahato. Miꞌi hawyi toꞌe itotiaria pe -Koitywy Tupana tum yne raꞌyn tesaika hap uhepe e. Miꞌi hawyi Wuatꞌi Miitꞌin Porekuat koro wo areineꞌen atipy pe iꞌewyte mesuwat yi tote e.

Mateu 28:20

Waku yne saꞌawyꞌi wuat ahenoi ehepiat hap ewy miitꞌin muꞌe hamuat e. Miꞌi hawyi eimimuꞌeria uimohey haria atikyꞌesat yne uhehay nug haria wo teꞌeropyhuꞌat e. Miꞌi tupono eweiwat ro iraniaꞌin ywania yne muꞌe hamo areꞌe wen maꞌato miꞌi turan ti aru yt eiweran i eweiwat. Katupono Uito ti aru areto wy eiwywo aikope aikope eweiwat hap upi eipowyro hatno wuatꞌi eꞌat pe ikahuro hap putꞌok e hap kape. Areineꞌen eiwywo wuatꞌi eꞌat pe e Iesui ahepe temiitꞌin me.

Iruka 21:15

Katupono mekewat eꞌat pe aru uito ti aru areineꞌen eiwywo kahato hawyi atopag eiwẽ pe uhehay iꞌatuwesat hamuat are e. Miꞌi hawyi ehewanikaptia paa iꞌatuꞌe uhehay wakuat eiwẽ pywiat pupi are e.

1 Kuriniu 10:13

Yne aito ahiag miiãꞌãg koꞌi aiwoꞌoꞌewy ewy. Maꞌato saꞌawyꞌi Tupana toꞌe ahepe -Atipyhyp aru ehãꞌãg hap pupi e. Miꞌi pote yt karãpe sese i putꞌok e hãꞌãg hap ehete poꞌog hesaika eikai katupono areineꞌen eiwywo eimoesaika hamo ehãꞌãg hap pupi e. Miꞌi hawyi ehesaika kahato eweikupteꞌen ehãꞌãg hap sopo hamo e hawyi atum ehepe muap hatyꞌu wuat ipopywiat ewẽtem hamuat e Tupana.

1 Kuriniu 15:10

Hegyiꞌat kahato Tupana uhepe atikuap koitywy. Atikuap iwese hap hawyi yt atipun hin i uikyꞌe hap. Arepotpap poꞌog ipotpoꞌororia iraniaꞌin kai aikotã uikyꞌe hap oktan arepotpap uikyꞌe hap moherep hamo.

1 Kuriniu 2:3

Saꞌawyꞌi te areineꞌen eipyꞌasetpe turan uipiit yt hesaika hin i hawyi uityry popuo worohoꞌomuꞌe paa uiꞌe popuo worohoꞌomuꞌe turan.

1 Kuriniu 2:5

Miꞌi hawyi Iesui mohey haria eweikupteꞌen Tupana esaika hap kaipyi. Yt eweipuẽti hin i eimohey Tupana piat hap miitꞌin iꞌatuehay weꞌeg hap kaipyi.

2 Kuriniu 11:30

Taꞌi -Uruto poꞌog Pauru kai iꞌatuꞌe eimuꞌe haria. Miꞌiria yt atiꞌatuwesat teran i wen maꞌato atiꞌatuwesat. Wuatꞌi ete poꞌog areineꞌen iꞌatukai maꞌato uhehay yt iweꞌeg i rakat ewy. Yt karãpe i ahenoi teran uhewaku hap miꞌiria ewy. Poꞌog waku ahenoi miitꞌin me aikotã uhewaku hap yt putꞌok e hin i Aikaꞌiwat Iesui ewaku hap ete. Miꞌi hap poꞌog waku ahenoi miitꞌin me. Waku yt hesoꞌok takat ewy i uhehay uito are.

2 Kuriniu 12:1

Uiwyriaꞌin tawa Kurintiu piaria uiminug wakuat koꞌi yt atimoherep teran i ehepe maꞌato iraniaꞌin miꞌi tã yn taꞌatunug. Miꞌi hawyi yt ahenoi uhepiat waku nug hap pote yt uimotypot hin i. Pyno ahenoi uhepiat waku nug hap pote yt uiweꞌeg hin i. Eimaꞌat haria eimuꞌe haria -Uruto poꞌog wuatꞌi kai iꞌatuꞌe katupono Tupana ehay kahato uruepe urumuꞌetu iꞌatuꞌe. Maꞌato uito poꞌog are. Yt uiweꞌeg hin i mio tã areꞌe maꞌato uheha wo araꞌakasa kahato Aikaꞌiwat.

2 Kuriniu 12:10

-Pyno atikyꞌesat eꞌe hap Tupana are. Atikyꞌe emikyꞌesat ewy. Waku kahato uipiit perup hap sio emotypot hap topyhuꞌat miꞌi kaipyi. Taꞌi waku Tupana uhesaika hap yt tuut i uipiit kaipyi. Miꞌi pote yt aremohey kuap i uipiit esaika hap ete. Miꞌi hawyi aru poꞌog hesaika saꞌawyꞌi wuat kai rakatno areineꞌen katupono Esaꞌyru emipoꞌoro uruporekuat nuat yn uimoesaika tesaika sese hap wywo. Poꞌog poꞌog uhesaika saꞌawyꞌi wuat kai are Tupana pe. Miꞌi hawyi koitywy uipiit yt uhesaika i hap uimowepiit kahato kat pote miꞌi pykai poꞌog uhesaika saꞌawyꞌi wuat kai. Yt uipiit kaipyi i uhesaika hap maꞌato Aikaꞌiwat esaika hap kaipyi uhesaika. Karãpe putꞌok e miitꞌin miat uimohit hap iꞌewyte uhatek hap putꞌok e turan poꞌog uimowepiit hap atipuẽti. Karãpe yt imohey i haria uhatyꞌi hatyꞌi iꞌewyte karãpe yt kat i ikahu uhete Iesui mohey hatno areineꞌen mote iꞌewyte miꞌi hap eꞌat pe uiwesaika kahato te yt uhesaika hin i pykai katupono uimoesaika kahato miꞌi hap eꞌat pe Aikaꞌiwat Iesui tesaika hap wywo. Miꞌi pote uiwepiit kahato.

2 Kuriniu 12:15

Worohoꞌokyꞌe kahato eipe aikotã uhaꞌyruꞌin uhakiꞌytꞌin sese ewy worohoꞌokyꞌe. Aikotã eiꞌywot ewy areineꞌen paĩ are. Taꞌi uimiꞌat uiko kaipyi uimiereko kaipyi worohoꞌopoi hap ewy atunug itote. Taꞌi areineꞌen eipyꞌasetpe eimuꞌe Iesui etiat haype yt kat saꞌup i ete worohoꞌomuꞌe katupono eiꞌywot ewy areineꞌen. Uipoi ro yt areꞌe hin i katupono aikotã aiꞌywotꞌin yt karãpe i -Eweium no saꞌup uhepe hawyi worohoꞌopoi yt iꞌatuꞌe i. Uito ti ety ewy pote atiꞌatumoma yne uhekat ehepe eipowyro hamo worohoꞌokyꞌe kahato haype. Maꞌato miꞌi pykai yt uikyꞌe hin i eipe. Poꞌog poꞌog neꞌi yi kape uikyꞌe hap worokyꞌe poꞌog poꞌog pykai are. Maꞌato miꞌi pykai poꞌog poꞌog atum aru ehepe uimepytꞌin eipe pote.

2 Kuriniu 12:5

Pyno araꞌakasa yt uwe i te akasa hap kape. Miꞌi hawyi uito poꞌog atikuap torannia kai wen maꞌato -Uito poꞌog yt areꞌe i. Poꞌog waku areꞌe -Uhewaku hap yt putꞌok e hin i Uikaꞌiwat ewaku hap ete. Yt karãpe i uhewaku hap putꞌok e Uikaꞌiwat ewaku hap ete paĩ. Maꞌato uhewaku hap uimoti rẽ uiwanetup hawe.

Ewesu 3:16

Wuatꞌi wuatꞌi mimotypot En are. Yt uwe i poꞌog ekai are. Miꞌi pote ahẽtup ekawiatno etum no emohey haria pe tawa Ewesu piaria pe Epaꞌãu wakuat iꞌatumoesaika hamuat hap ahẽtup epe. Atikyꞌesat kahato iꞌatuwanetup hap hesaika rakat ewy emohey hap ete.

Wiripu 4:13

Maꞌato yt uiwekaipyi i tuut uhesaika hap maꞌato Aipotypot Iesui kaipyi atipuẽti. Miꞌi ti kat e hap kat e hap etiat -Uimoesaika hap wuatꞌi etiat kuap hap ete uimowatetup are Tupana pe. Iꞌewyte waku kahato eipe miꞌi e hap ti ereꞌe Tupana pe.

Korosi 1:11

Tupana Paꞌãu hesaika kahato yne esaika hap apy tote. Miꞌi pote aito ahesaika kahato Tupana Paꞌãu poꞌog poꞌog aipytꞌatnug hawyi. Miꞌi hawyi watopyhuꞌat hesaika hap wywo. Miꞌi hawyi aimoesaika wuatꞌi saꞌag miat aiꞌakit hap pun hamo. Miꞌi hawyi wyti iꞌewyte wahupit kuap yne iꞌatumikyryꞌi hap koꞌi. Miꞌi hawyi perupꞌi puo watomohey wuatꞌi eꞌat pe motꞌi kahato Tupana Paꞌãu toineꞌen aikai pote.

1 Timoteu 1:14

Sakpoꞌe hegyiꞌat kahato rat uhepe paĩ Uikaꞌiwat uheineꞌen ne wanikap nuat turan. Miꞌi hawyi tutum tomohey hamuat hap uhepe. Koitywy iwywo wẽtup piit hap ewy yn naꞌyn urutukupteꞌen.

Epereu 11:34

Iꞌewyte taꞌatuwuk teran aria pe imohey haria maꞌato yt satꞌe i aria iꞌatuete katupono Tupana tiꞌatuehakyeraꞌat aria pe tukupteꞌen motꞌi pykai tomohey hap upi. Iꞌewyte Iraniaꞌin tuꞌuka suraraꞌin ete turan wanikaptia ekyseꞌyp yt tiꞌauka kuap i Tupana mohey haria pote. Tupana tiꞌatuekawiatno kahato tomohey haria yt iꞌatuesaika hin i turan taꞌatumohey hawyi Tupana tiꞌatumoesaika kahato. Karãpe tuꞌuka surara wanikaptia wywo turan toiꞌatumoesaika kahato tomohey haria suraraꞌin koꞌi. Miꞌi hawyi teꞌeropyhuꞌat surara saꞌag wuꞌuka sepap haria ewy. Miꞌi hawyi wanikaptia ikohyeput neꞌi topap tet pupi.

Epereu 4:16

Miꞌi pote waku watuwat Tupana kape yt aikenꞌẽ wywo hin i yt kat i aiwemoti hap wywo katupono toineꞌen aiwywo Ahepaꞌi Koro. Miꞌi pote ti hegyiꞌat kahato Tupana ahepe Ahepaꞌi Koro kyꞌe haype Ahepaꞌi Koro emiit no watoineꞌen mote. Wahenoi yne aiminug saꞌag tope pote meremo topyhuꞌat waure wo. Watikyꞌesat aipowyro hap hoꞌopot hap eꞌat piat pote waku merep wahenoi tope. Wahẽtup hawyi meremo tutum neꞌen neꞌi aipowyro hap. Iꞌewyte satek hap saty monik hamo wahẽtup pote meremo tutum ahepe tehakyꞌeꞌi hap. Taꞌi hegyiꞌat kahato ahepe katupono Haꞌyru Ahepaꞌi wo toineꞌen pote. Toineꞌen atipy pe ahehay moherep Toꞌywot piat hatno Ahepaꞌi. Miꞌi hawyi Iꞌywot aimoesaika kahato kat e hap kat e hap niatpo kahato rakat ahete hap turan aimoesaika kuap kahato e.