2 Kuriniu 12:1 - Sateré-Mawé

¹ Uiwyriaꞌin tawa Kurintiu piaria uiminug wakuat koꞌi yt atimoherep teran i ehepe maꞌato iraniaꞌin miꞌi tã yn taꞌatunug. Miꞌi hawyi yt ahenoi uhepiat waku nug hap pote yt uimotypot hin i. Pyno ahenoi uhepiat waku nug hap pote yt uiweꞌeg hin i. Eimaꞌat haria eimuꞌe haria -Uruto poꞌog wuatꞌi kai iꞌatuꞌe katupono Tupana ehay kahato uruepe urumuꞌetu iꞌatuꞌe. Maꞌato uito poꞌog are. Yt uiweꞌeg hin i mio tã areꞌe maꞌato uheha wo araꞌakasa kahato Aikaꞌiwat.

2 Kuriniu 12:1 ပူးပေါင်းရင်းမြစ်များ

Iuwãu 16:7

Pywo pe ti areꞌe ehepe meiũpe yn areineꞌen pote ti ren yt tuut i eipowyro pakup i hamuat Tupana Paꞌãu maꞌato areto meiũpe pyi pote ti aru atipoꞌoro kuap eipowyro pakup i hanuat e.

Iuwãu 18:14

Miꞌi paꞌi koro Kaꞌiwasi saꞌawyꞌi henoi paꞌi kororia pe Iesui etiat. Mio tã e -Pyno waku wẽtup ok ikuꞌuro miitꞌin ehakyeraꞌat hamuat e.

Iesui Potmuꞌeria 18:9

Miꞌi hawyi wãtym muo imuꞌetu Pauru pe toꞌe Aikaꞌiwat -Yt erekenꞌẽ teiꞌo miitꞌin mupi. Yt epoꞌinik teiꞌo. Etiꞌatumuꞌe o haty wo e.

Iesui Potmuꞌeria 23:11

Miꞌi hawyi mekewat ewãtym Aikaꞌiwat toineꞌen Pauru ywytpe yꞌam me. Miꞌi hawyi toꞌe -Yt erekenꞌẽ teiꞌo Pauru katupono woropoꞌoro hamuat tawa wato Huma piaria kape e. Aikotã Ierusarẽi miaria pe ehenoi uhetiat miꞌi hap ewy atikyꞌesat ehenoi tawa Huma piaria pe uhetiat e. Miꞌi tupono eremowepiit yn no e Pauru pe Aikaꞌiwat.

1 Kuriniu 10:23

Waku watunug yne aimikyꞌesat oktan iꞌatuꞌe toꞌope iraniaꞌin Iesui mohey haria taꞌatueso popuo. Miꞌi pote areꞌe iꞌatuepe -Aimikyꞌesat waku pote pyno waku watunug maꞌato aimikyꞌesat yt naku i pote yt naku i watunug. Aimikyꞌesat miitꞌin powyro hap pote waku watunug areꞌe iꞌatuepe.

1 Kuriniu 14:6

Meiũran aru areto ehewowi uheꞌywytꞌin. Miꞌi hawyi atimoherep ehepe Tupana ehay Tupana yn ikuap koꞌi. Tupana Paꞌãu kaipyi aru worohoꞌomuꞌe worohoꞌonapin. Eipusu puo yn ahenoi ehepe. Yt kat hamo i Tupana pusu puo worohoꞌomuꞌe.

1 Kuriniu 6:12

Tukupteꞌen eipyꞌasetpe -Uito atunug uimikyꞌesat ewy e haria. Uimikyꞌesat oktan yn atunug yne iꞌatuꞌe miꞌiria. Pyno eiweꞌeg wo o mio tã e haria pupi. Iꞌatu kahato -Aimikyꞌesat watunug hawyi waku topyhuꞌat wen maꞌato miꞌi kape yn watuwanetup pote aimikyꞌesat nug eropat haria yn watopyhuꞌat hawyi yt Tupana mikyꞌesat nug kuap haria hin i watopyhuꞌat.

2 Kuriniu 12:11

Uiwyriaꞌin tawa Kurintiu piaria yt uimotypot hin i Tupana mikyꞌesat ewy kat pote saꞌawyꞌi Tupana uiꞌairo tehay wakuat moherep ehepiat hamo. Iesui potpoꞌororia 12 ok takaria ewywuat sese areineꞌen. Miꞌiria wakuat sese ewywuat areineꞌen Iesui potpoꞌoro wo. Uito wakuat miꞌiria ewywuat are. Yt uiweꞌeg hin i areꞌe mio tã are maꞌato uimohit pote mio tã are.

2 Kuriniu 12:5

Pyno araꞌakasa yt uwe i te akasa hap kape. Miꞌi hawyi uito poꞌog atikuap torannia kai wen maꞌato -Uito poꞌog yt areꞌe i. Poꞌog waku areꞌe -Uhewaku hap yt putꞌok e hin i Uikaꞌiwat ewaku hap ete. Yt karãpe i uhewaku hap putꞌok e Uikaꞌiwat ewaku hap ete paĩ. Maꞌato uhewaku hap uimoti rẽ uiwanetup hawe.

2 Kuriniu 12:7

Uhewaku hap kai araꞌakasa Tupana ieineꞌen hap hawyi Tupana toꞌe uhepe -Pyno eraꞌakasa yne raꞌyn mio mehin e. Areineꞌen kahato erenug poꞌog ewato hap kai tet pupi e uhepe. Arekenꞌẽ ereꞌe aru -Uito poꞌog iraniaꞌin kai kat pote araꞌakasa raꞌyn atipy sese uito ereꞌe aru eꞌe hap pupi e. Miꞌi pote woromowatetup woromohit iraniaꞌin pyꞌasetpe. Atum aru epe epoharaꞌi hap aikotã eꞌahuu hap ewy haty kahato miꞌi e Tupana uhepe. Miꞌi hawyi Tupana e hap ewy putꞌok e uhete ahiag kaipyi uiꞌahuu hap uiwemowato hap monik hamuat.

2 Kuriniu 12:9

Miꞌi hawyi toꞌe Tupana uhepe -Yt karãpe i atihep epiit piat eꞌahuu hap e. Yt karãpe i epiit hesaika i raꞌyn maꞌato miꞌi pykai waku ereineꞌen. Maꞌato miꞌi pykai yt karãpe i woroꞌatoiat en. Yt karãpe i yt worokyꞌe i raꞌyn e. Karãpe iraniaꞌin teꞌeraꞌakasa esaika hap kapiat hawyi teꞌeroꞌe -Yt topiit kaipyi i Pauru hesaika hap iꞌatuꞌe maꞌato Tupana imoesaika. Miꞌi pote epiit yt hesaika i hap kaipyi uimotypot sese hap topyhuꞌat e Tupana uhepe.

2 Kuriniu 8:10

Gaꞌatpuat anu -Waku watiꞌatunug hawyi watipoꞌoro ihakyꞌeꞌi rakaria tawa Ierusarẽi miaria imohey haria kape eweiꞌe wuatꞌi Iesui mohey haria iraniaꞌin eꞌyian mete.

Karasia 1:12

Taꞌi yt miitꞌin miium uhepiat i ti yt miitꞌin mienoi uhepiat i iꞌewyte yt miitꞌin mimoherep uhepiat i maꞌato mekewat Aipotypot Iesui mimoherep uhepiat ahenoi are. Yt atikuap hin turan i Iesui tomoherep tehay wakuap sese uhepe towẽ pyi sese uimuꞌe are.

Karasia 2:2

Areto turan Tupana toꞌe uhepe -Pauru atikyꞌesat ereto tawa Ierusarẽi kape mesup e uhepe pote areto i e hap ewy. Putꞌok are raꞌyn itote hawyi areto raꞌyn Iesui potmuꞌeria yianmiaria kape hawyi miꞌiria pe ahenoi henoi kat e hap kat e hap ahenoi yne sehay wakuat Iesui etiat Tupana ehay kat e kat e hap koꞌi ahenoi mesuwat yi tote iraniaꞌin me yt uruꞌywania i pe uiꞌe hap atimoherep yne yne uhehay wakuat areꞌe itote. Iesui mohey haria akagnia puo yn maꞌato migꞌi wo pyi ahenoi katupono taꞌatukuap teran sio pywo uhehay sio wẽtup sehay ahenoi iraniaꞌin me sio Iesui etiat. Iꞌatuehay ewywuat ahenoi hap sio yt taꞌatukuap teran itote tawa Ierusarẽi piaria. Katupono uikuap hamo yn ahenoi wakuat sio yt hap moherep hamo. Aikotã ahenoi sehay wakuat yt Iuteuria i piat hap ewywuat e hap ahenoi itote iꞌatuepe. Taꞌatukyꞌesat kahato uimienoi pywo kahato iꞌatumienoi Iesui etiat hap taꞌatukyꞌesat. Ahenoi yne hawyi -Waku kahato ehenoi miitꞌin me Pauru iꞌatuꞌe aikotã miit ihyha rakat teput kuap kahato rakat ewywuat en iꞌatuꞌe uhepe. Uiwyriaꞌin are miꞌi hap ewy atikyꞌesat Aipotypot Iesui toꞌe uhepe aru -Waku rakat ewy ereput Pauru e hap atikyꞌesat kahato. Yt naku i toꞌe uhepe -Yt kan hamo i emienoi miitꞌin me Pauru toꞌe hap yt atikyꞌesat hin i are.

Ewesu 3:3

Katupono mesuwe koitywy Tupana timoherep kahato uhepe saꞌawyꞌi wuat yt uwe mikuap i sehay toimoherep uhepe aikotã wẽtup ywania ipakup imohey haria tutunug hap. Taꞌi ipakup takaria tutunug mesup wuatꞌi ywania kawiat. Aikotã toꞌywania pakup tutunug mesup hap toimoherep mesuwe uipyhyp hawe uhepe. Waku kahato Tupana yt uwe i ipyhyp kuap are.

1 Tesaronika 4:15

Pyno mio tã e Tupana henoi map haria etiat tomohey haria etiat -Taꞌi ariot i ti aru yt ihãite rakaria kape yn i maꞌato map haria uimohey haria kape wy ariot. Miꞌi hawyi toꞌopype ateropoꞌok e Tupana.

1 Iuwãu 5:20

Koitywy watikuap kahato Tupana saꞌyruꞌin sakiꞌytꞌin aito hap. Taꞌi watikuap Tupana Saꞌyru hawyi Tupana moherep hat sese topyhuꞌat poꞌog poꞌog mekewat pywuat etiat kuap hamo. Miꞌi tupono mekewat Tupana Mipoꞌoro Aiporekuat nuat hat watikuap hawyi topoꞌoro hat Tupana watikuap iꞌewyte. Saꞌawyꞌi watikuap teran uwe Tupana hap maꞌato yt heremo hin i Tupana ahepe. Maꞌato mesup heremo raꞌyn aheTupana katupono Haꞌyru imoherep ahepe. Tupana Haꞌyru ti Toꞌywot ewywuat wẽtup miit ewy. Karãpe wataꞌakasa Haꞌyru kape pote Iꞌywot kape ti raꞌyn wataꞌakasa wy are. Miꞌi pote mesup -Worokuap kahato En watoꞌe yn Tupana pe. Koitywy uiwyriaꞌin watoineꞌen Tupana pe aikotã Tupana eiam ewy miꞌi pe watopyhuꞌat. Saꞌawyꞌi watomohey Iesui ti Tupana Saꞌyru e hap hawyi Iesui po pe watopyhuꞌat. Ipyꞌa pe kahato watoineꞌen. Aikaꞌiwat yat piaria ewywuaria watopyhuꞌat. Iesui ti Tupana sese miꞌi pote Tupana pe watoineꞌen Iesui pe watoineꞌen pote. Iesui ti wuatꞌi eꞌat piat ieineꞌen hat iꞌewyte aito wuatꞌi eꞌat piat watoineꞌen Iesui wywo wẽtup miit piit ewywuat pote are.