2 Kuriniu 11:13 - Sateré-Mawé

¹³ -Pyno Tupana mipoꞌororia sese uruto iꞌatuꞌe ehepe maꞌato yt pywo pe i iꞌatuꞌe ehepe miꞌi tã maꞌato eimaꞌat reran haype. Taꞌi teꞌeruwepoꞌoro eiꞌakag wo teꞌeroꞌe hamo -Taꞌi 12 ok takaria ewywuat koꞌi uruto iꞌatuꞌe. Aikaꞌiwat Iesui potmuꞌeria koꞌi uruto iꞌatuꞌe eimaꞌat reran haype. Iesui urupoꞌoro ehewowi iꞌatuꞌe ehepe yt pywo pe i iꞌatueso neꞌi.

2 Kuriniu 11:13 ပူးပေါင်းရင်းမြစ်များ

Mateu 25:24

Miꞌi hawyi mekewat 100 iꞌa rakaria wywuat myhuꞌat hat putꞌok e raꞌyn hawyi toꞌe -Uikaꞌiwat taꞌi epo potyi hap ewy toineꞌen emotpap hap ete. Worokuap kahato en yt ewat i emikoi terek hat ewy ereineꞌen. Ehoꞌohep meketã yt emikoi koꞌi kaipyi e.

Iesui Potmuꞌeria 15:1

Miꞌi hawyi ti Iuteuria tõꞌẽ tõꞌẽ raꞌyn tawa Antiokia totiaria Iesui mohey haria muꞌe hamo raꞌyn -Ewetunug no Muisei woꞌonapin hap yne pote ti aru Tupana ehehakyeraꞌat kuap maꞌato yt eiwemurui ãpy sokpe tek hap pote ti aru yt ehehakyeraꞌat i iꞌatuꞌe.

Iesui Potmuꞌeria 15:24

Haꞌawyte wyti tuwat ehewowi yt uruwat urumipoꞌororia i urutoꞌe. Miꞌiria ti eimoꞌakagꞌaia hanuaria urutoꞌe. Miꞌiria wyti uruikuap taꞌyn mesup. Urupyꞌasetpyi ti wyti tuwat maꞌato ti yt uruwat urumipoꞌororia i paĩ iꞌatuꞌe popera pe.

Iesui Potmuꞌeria 20:30

Taꞌi eipyꞌasetpyi wyti aru teꞌeruwemoherep heso rakaria woꞌomaꞌat hanuaria teꞌeruwewawiat ehekyi hamo e. Miꞌi hawyi ti aru tuwat iraniaꞌin eipyꞌasetpyi iꞌatumimaꞌat koꞌi e.

Humanu 16:18

Katupono woꞌopatꞌok patꞌok haria yt Aikaꞌiwat Iesui eropat haria i hin i. Taꞌi yt Aikaꞌiwat Iesui upiat hin i aimoꞌakagꞌaia hamo. Taꞌi miꞌiria tõꞌẽ tõꞌẽ ahowawi katupono taꞌatukyꞌesat kahato aito taꞌatuemiitꞌin no haype saꞌag nug hamuat aiꞌu hamo tõꞌẽ. Miꞌi pote eiweꞌeg wo o pyno iꞌatuehay sese kahato miꞌiria wẽtup sehay ete aimaꞌat taꞌatuehay iwese rakat nuat hamo -Yt uwe i poꞌog ikahuria eipe kawiat haria iꞌatuꞌe ahepe maꞌato yt pywo pe i aimaꞌat reran haype. Iꞌatuehay upi mekewat hirokaria wanetup hap ewywuaria meremo tuwat kahato iꞌatuehay upi. Miꞌi pote uipyꞌa pyi areꞌe -Eiweꞌeg wo o eimaꞌat tet pupi eipatꞌok hamuaria neꞌi pote ahekat kyewi aimaꞌat haria miꞌiria.

2 Kuriniu 11:15

Ahiag mepytꞌin koꞌi aikotã taꞌatuꞌywot ewy tukupteꞌen. Aimaꞌat kuap toꞌywot ewy. Iꞌatuwẽ pyi -Uruto waku nug haria kahato iꞌatuꞌe. Maꞌato iꞌatuminug yt iꞌatuehay ewy hin i tuwẽtem. Miꞌi pote meremo yt watikuap i sio aimaꞌat sio yt hap maꞌato meiũran watikuap. Iꞌatuꞌapiheg hap eꞌat pe Tupana timoherep wuatꞌi ehamo iꞌatuminug saꞌag koꞌi. Miꞌi hap eꞌat pe iꞌatuꞌapiheg hap putꞌok e iꞌatuminug saꞌag hap oktan.

2 Kuriniu 2:17

Tukupteꞌen Tupana ehay moherep haria maꞌato yt pywo pe i rakaria. Yt Tupana kyꞌe hap wywuat sese haria i aimuꞌe maꞌato ahekat kyewi neꞌi -Mio tã e Tupana iꞌatuꞌe maꞌato yt miꞌi tã e hin i pykai taꞌatuꞌywyk neꞌi. Maꞌato ahehay mio tã watoꞌe -Tupana tipoꞌoro raꞌyn Tosaꞌyru ahehakyeraꞌat hamo watoꞌe. Miꞌi pote waku watunug Iesui Aiporekuat no watoꞌe aipyꞌa pyi watoꞌe. Urukaꞌiwat mowepiit hamo yn uruiꞌatumuꞌe miitꞌin koꞌi.

2 Kuriniu 4:2

Iraniaꞌin taꞌatuhenoi saꞌag Tupana ehay miitꞌin maꞌat hamo maꞌato aito watimoherep Tupana ehay aikotã toꞌe hap ewy. Yt wahenoi i aikotã iraniaꞌin miitꞌin maꞌat haria ewywuaria henoi hap ewy. Tupana toꞌe hap ewy watoꞌe. Miꞌi hawyi miitꞌin tikuap Tupana ehay pywo piat moherep haria aito hap iꞌewyte Tupana aikuap. Miꞌi hawyi yt aiwemaꞌat hap wywo i wahenoi pywo piat yn wahenoi pote.

Karasia 1:7

-Taꞌi poꞌog ipakup sehay aimimohey kahu eweiꞌe. Hẽ eweiꞌe neꞌi ti mesup eiwoꞌope maꞌato yt hin i. Iesui mimoherep yn ni sehay pakup sese toineꞌen are. Wẽtup yn ni toineꞌen sehay pakup sehay pywuat are mekewat saꞌawyꞌi wuat pywiat sese uimienoi ehowawiat hap yn sehay pakup Tupana wẽ pywiat. Miꞌi yn sehay pywuat sese ahehakyeraꞌat kuap hap sehay are. Ipakup sehay iꞌatuꞌe iraniaꞌin ehepe maꞌato heso rakaria sok miꞌiria are. Taꞌi Iesui ehay peroꞌok teran wẽtup sehay nem nakat kape teran neꞌi miꞌiria are. Yt Aipotypot Iesui ete hin i iꞌatumienoi maꞌato iꞌatueko koꞌi nug hap ete yn iꞌatuehay.

Karasia 2:4

Maꞌato miꞌi hawyi ahenoi kahu turan putꞌok iꞌatuꞌe itote wẽtup miitꞌin koꞌi Iesui mohey ran haria heso heso rakaria henoi haria. Miꞌi hawyi urupyꞌasetpe tukupteꞌen miꞌiria yt naku i e hap kat hanuaria neꞌi. Yt uruikuap i iꞌõꞌẽ hap miitꞌin sem itote pote. Miꞌi hawyi teꞌerahaꞌat kahato Titu kape urupyꞌasetpiat kape yt Iuteu ywania i hap kape. Miꞌi hawyi -Waĩꞌiꞌatuꞌe taꞌatuwanetup hawe yt iꞌatueko ewywuat i urutunug itote pote. Miꞌi hawyi taꞌatuehay wo taꞌatukyꞌesat kahato urutunug taꞌatueko nug hap ewywuat katupono taꞌatukyꞌesat taꞌatuehay upiat urutukupteꞌen hap wẽtup sehay saꞌag upi -Uruto poꞌog waku Tupana wanetup hawe iraniaꞌin ywania Iesui mohey haria kai katupono Iuteu eko ewywuat urueko e hap upi hap kyewi.

Karasia 4:17

Koitywy eimuꞌe haria wẽtup seko kaipyi eikyꞌe wen maꞌato eimaꞌat reran haype. Worohoꞌokyꞌe iꞌatuꞌe maꞌato eheropoꞌok uipo pywiat reran haype neꞌi. Eikyꞌesat taꞌatukyꞌe ehepiat poꞌog uikyꞌe hap kawiat haria wo eweikupteꞌen.

Karasia 6:12

Eimuꞌe haria ipakup takaria teꞌeruwemowato kahato itote -Uruto poꞌog woꞌomuꞌe haria torannia kai iꞌatuꞌe haria. Wemusin ãpy sokpe tek hap ti waku e haria aipiit etiat yn woꞌomuꞌe haria miꞌiria. Iro pote miitꞌin toꞌokyryꞌi kahato aimimohey ariaꞌyp posak etiat ahehakyeraꞌat hamo e hap ete. Miꞌi haype yt teꞌerepotmuꞌe i miꞌi ete. Yt taꞌatukyꞌesat i miitꞌin woꞌokyryꞌi taꞌatuetiat hap haype.

Ewesu 4:14

Yt toikyꞌesat i wẽtup ok wẽtup ok mienoi saꞌag upi watopyhuꞌat hap kat pote toikyꞌesat Tosaꞌyru mienoi upi yn watopyhuꞌat hap. Imohey haty wuat hap toikyꞌesat. Iꞌatu kahato aimuꞌe iweꞌeg kahato rakaria aimuꞌe kuap kahato haria maꞌato yt pywo pe i yt Iesui mienoi upi i haria aimuꞌe maꞌato ahekat kyewi yn aimuꞌe haria e. Miꞌiria ehay upi watopyhuꞌat hawyi iꞌatuewamiri pe watopyhuꞌat hap ewy aikotã wasere owa kape wato teran ihyemyiꞌa wato sakpo teran maꞌato yt wato kuap i ipoityꞌi pote hap ewy katupono miꞌiria teꞌeruwanetup aat kaꞌap aimaꞌatꞌi maꞌatꞌi hap ete iꞌatuehay wẽtup upi. Yt eweimohey teiꞌo miꞌiria yne miitꞌin miat aimuꞌe hap are. Yt naku i watopyhuꞌat hirokaria ewy aimikuap ete are. Hirokaria imohey yne yne miitꞌin ehay sio pywo sio yt hap taꞌatumohey. Waku watomohey aimuꞌe hat Iesui e hap ewy aimuꞌe pote. Waku watimoheg aimimohey Iesui aipyꞌa pe aiwanetup hawe e. Tupana wywo wẽtup piit ewy watukupteꞌen. Miꞌi hawyi aiꞌywania uruꞌywania wẽtup ywania ewy yn naꞌyn ainug e. Koitywy Tupana ywania raꞌyn aito. Saꞌawyꞌi Iuteu ywania eiꞌywania tukupteꞌen toꞌope toꞌope toꞌoewanikap mo teꞌeropyhuꞌat. Mekewat eꞌat pe toineꞌen eipyhyp hap ewywuat Iuteu etawa kapiat eweiwat hamo. Maꞌato mekewat eipyhyp hap Tupana kapiat hap Iesui tiꞌaporok yne raꞌyn topy wo.

Wiripu 3:18

Iꞌatu kahato aria kapiat haria katupono Iesui ewanikaptia kahato miꞌiria katupono teꞌeruwekyryꞌi kahato Aipotypot kuꞌuro ariaꞌyp posak etiat taꞌatuekawiatno pote. Aikotã saꞌawyꞌi areꞌe hap ewy areꞌe i -Miꞌiria aria kape tuwat are uiwak popuo.

Wiripu 3:2

Eiweꞌeg wo kahato o saꞌag nug haria pupi katupono ehãꞌãg aru saꞌag nug hamo are. Eiweꞌeg wo o wẽtup muap moherep haria pupi. Eiweꞌeg wo o yt eiwemusin ãpy sokpe tek hep i pote yt kat i ehehakyeraꞌat hap e haria pupi. Miꞌiria pupi eweikenꞌẽ kahato aikotã awahuru sem pupi watokenꞌẽ hap ewy katupono eimaꞌat reran saꞌag nug hap etiat haype. Yt naku i kahato miꞌiria.

Korosi 2:4

Pyno eiweꞌeg wo o eimaꞌat sehay wuat teran haria pupi. Waĩꞌeweiꞌe o iꞌatuehay wuꞌuka hap neꞌi ete are iꞌatuehay yt pywo rakat i. Yt eweiwat reiꞌo iꞌatuehay upi katupono yt pywo i sehay hap nug kuap kahato haria miꞌiria. Iꞌatuweꞌeg kahato heso nug hamo. Iꞌatuehay se kahato tuereto maꞌato eimaꞌat hamo neꞌi. Yt ereto teiꞌo iꞌatuehay upi are.

Korosi 2:8

Aimuꞌe haria iraniaꞌin tuwekaipyi aimuꞌe. Yt Tupana mipoꞌororia i iꞌatu kahato tukupteꞌen. Iraniaꞌin aimuꞌe haria nagnia ehay kaipyi miit wanetup hap kaipyi mekewat maꞌãu saꞌag wanetup hap aimuꞌe saꞌag. Yt imohey i haria porekuat ehay moherep haria iraniaꞌin. Yt Aipotypot upiat aimuꞌe haria hin i woꞌomaꞌat haria wo miꞌiria. Miitꞌin wanetup hap ewy yn aimuꞌe. Eiweꞌeg wo o iꞌatuwoꞌomuꞌe hap pupi katupono aimaꞌat reran haype are.

1 Iuwãu 2:18

Uhakiꞌytꞌin uhaꞌyruꞌin putꞌok e irane ikahuro hap eꞌat katupono ti putꞌok e irane Aipotypot Iesui ewanikaptia are. Miꞌi ti Aipotypot Iesui pohari teran haype. Koitywy typyꞌi kahato miꞌi ewywuaria tukupteꞌen. Miꞌi hap kaipyi ti watikuap taꞌyn yt pya i raꞌyn ikahuro hap eꞌat hap.

1 Iuwãu 4:1

Uiwyriaꞌin yt eweimohey teiꞌo yne woꞌomuꞌe haria -Uito Tupana Paꞌãu eiam iꞌatuꞌe pykai. Waku eweikat i kat i miꞌiria sio Tupana Paꞌãu eiam sio yt hap kuap hamo. Katupono iꞌatu kahato woꞌomuꞌe haria mesuwat yi totiaria yt pywo piat haria i katupono wẽtup paꞌãu iꞌatupiit pe.

Iuta 1:4

Koitywy tuwehytꞌok tuereto aipyꞌasetpe Tupana mohey hap pun haria. Yt Tupana motypot rakaria i miꞌiria are. Miꞌiria aipyꞌasetpe tukupteꞌen maꞌato yt naku i nug hamuat aimaꞌat hamo tõꞌẽ ahowawi. Miꞌiria ti Tupana Saꞌyru yt kuap i haria. Miꞌiria ti aikotã Tupana ehay enoi haria teꞌeroꞌe saꞌawyꞌi te hap ewy. Mio tã iꞌatuꞌe -Tuut wyti aru eimaꞌat hanuaria sese e miwan me. Miꞌiria wyti aru uimiꞌatuꞌapiheg wuatnuaria teꞌeropyhuꞌat wuatꞌi eꞌat piat nuaria e Tupana miwan me miꞌiria etiat hap nug haria. Miꞌiria ti yt kat i uimotypot hap iꞌatuwanetup hawe haria e. Miꞌi haria wyti aru tuwehytꞌok wehytꞌok eipyꞌasetpe uimotypot yat pe yt naku i nug hamo e. Miꞌiria Tupana e hap ewy -Taꞌi waku ti watunug saꞌag aimikyꞌesat ewywuat iꞌatuꞌe. Waku ahewaire waire kahato iꞌatuꞌe aru are. Taꞌi Tupana yt aiꞌapiheg hin i katupono ti aikyꞌe kahato Tupana iwese kahato rakat pote iꞌatuꞌe aru aimuꞌe saꞌag neꞌi. Yt naku i watunug Tupana Mipoꞌoro Aipotypot no iꞌatuꞌe aru miꞌiria e saꞌawyꞌi te Tupana miwan me eimaꞌat reran haria etiat.

Iesui Aru E Hap 19:20

Miꞌi hawyi tuꞌuka kahato itote. Maꞌato Iesui tiꞌatuꞌakit kahato neꞌi -Uito Tupana e hat heso rakat yt naku i nug hat. Iꞌewyte taꞌatuꞌakit mekewat heso rakat -Uito Tupana ehay moherep kahato hat e woꞌomaꞌatꞌi maꞌatꞌi hat neꞌi mekewat yt naku i nug hat set howatuꞌa etiat rakaria woꞌomaꞌatꞌi maꞌatꞌi hat. Toiꞌakit neꞌi mekewat -Eweimotypot ro Tupana iãꞌãkap e hat. Miꞌi haria Waku Rakat esuraraꞌin koꞌi tiꞌatuꞌakit yne. Miꞌi hawyi Wuatꞌi Porekuat Porekuat topytyk taꞌyn mekewat awyato tig saꞌag iꞌewyte mekewat -Uito Tupana ehay moherep hat woꞌomaꞌatꞌi hat hawyi toiꞌatupugha miꞌiria mekewat ihyemyiꞌa wato aria sapuẽ sapyhot pe ytyghe wuk hap puo rakat pe. Toipytyk taꞌyn wen maꞌato yt toiꞌatuꞌauka hin i maꞌato taꞌatupuhu hap wywo toiꞌatupugha aria pe wuatꞌi eꞌat piat pe. Miꞌi hap ewy araꞌakasa.

Iesui Aru E Hap 2:2

Uimohey haria tawa Ewesu piaria worohoꞌokuap kahato eipe. Uipotpap nug kahato haria eipe are e. Yt eipohep hin i uheropat hap ete e. Yt eweikyꞌe hin i yt naku i nug hap neꞌi. Atikuap eheko waku hap. Karãpe wẽtup ok putꞌok e eimuꞌe hamo turan hepama ihay eweimohey sio uhehay wo sio yt hap kuap hamo e. Maꞌato yt uhehay i neꞌi pote meremo -Eso i rat eweiꞌe tope. Ewehãꞌãg kahato mekewat sio Tupana mipoꞌoro wẽtup miit sio tuwehay pyi neꞌi hap kuap hamo e.

Iesui Aru E Hap 2:20

Maꞌato iꞌewyte atikuap aikotã ehewaku hap toineꞌen kahato pykai toineꞌen yt naku i hap itote yt eweitoiat hin i te e. Miꞌi hap nug hap ete ehewanikap wo kahato areineꞌen e. Toineꞌen wẽtup ok haryporia eipyꞌasetpe -Uito Tupana ehay moherep hat e hat Iesapeu e hap het rakat e. -Pyno sig waku ahewaire hewaire e Tupanaria motypot hamo iꞌewyte waku Tupanaria iãꞌãkap motypot ienuk hamo e Tupana uhepe e hat Mana Iesapeu. Miꞌi ete toiꞌatumuꞌe uhemiit pykai yt kat eweiꞌe i tope. Yt eweipoꞌoro hin i eipyꞌasetpyi. Yt naku i kahato ewetunug tawa Tiatira uimohey haria e.

Iesui Aru E Hap 2:9

Uimohey haria tawa Simina piaria worohoꞌokuap kahato eipe. Waku sakpoꞌe eipe e. Uheropat haria seseria kahato eipe e. Atikuap ewehoꞌopot uhetiatno hap e. Atikuap aikotã hoꞌopot kahato popuo eipotpap uimikyꞌesat nug hap ete. Satek takaria eweikupteꞌen maꞌato uiwanetup hawe hekat kahato rakaria wuatꞌi eꞌat piaria eweikupteꞌen e. Iꞌewyte atikuap aikotã itotiaria tukupteꞌen hap eiꞌatusatyꞌi satyꞌi kahato haria e. Atikuap aikotã uruto yn ni Tupana kuap haria katupono Iuteu ywania sese uruto iraniaꞌin ehepe maꞌato eipe yt eweiꞌe. Miꞌiria taꞌatuehay saꞌag wo ehepe. Yt Tupana emiitꞌin hin i miꞌiria maꞌato ahiag motypot yat piaria miꞌiria e. Yt Iuteu ywania hin i maꞌato ahiag ywania saꞌag tukupteꞌen miꞌiria Iuteu ywania ran neꞌi koꞌi e.