1 Timoteu 1:9 - Sateré-Mawé

⁹ Wakuap nug haria tikyꞌesat kahato Tupana piat tonapin hap. Maꞌato iraniaꞌin saꞌag kyꞌesat hap nug haria yt ikyꞌesat hin i Tupana ehay wuat kat pote yt nakuaria i pote he kahato iꞌatuepe iꞌatuminug saꞌag koꞌi. Maꞌato ti miꞌiria pe Tupana tum iꞌatuewaĩ e hamuat. Maꞌato waku hap nug haria yt kat i raꞌyn Tupana miium waĩꞌe hap kat pote toikyꞌesat wakuap nug hap yn pote. Yt woꞌoꞌewaĩ kuap i haria napin hamo Tupana tum waĩ toꞌe hap. Morekuaria woꞌonapin hap pun haria napin hamo tutum waĩ toꞌe hap. Mekewat yt kat i Tupana e haria napin hamo tutum waĩ toꞌe hap. Yt naku i nug haria piatnuat tutum waĩ toꞌe hap iꞌewyte yt karãpe i Tupana kapiat wanetup teran haria tutum waĩ toꞌe hap. Toꞌywot toty auka haria woꞌopotꞌauka hat napin hamuat tutum waĩ toꞌe hap.

1 Timoteu 1:9 ပူးပေါင်းရင်းမြစ်များ

Mateu 10:21

Iꞌewyte ti aru mekewat eꞌat pe eheykeꞌetꞌin sese pykai eiꞌauka haria wo tukupteꞌen. Iꞌewyte ywot tiꞌauka ti aru tesaꞌyru iꞌewyte imepytꞌin tiꞌauka ti aru taꞌatuꞌywotꞌin uhehay po pyi.

Humanu 1:30

Toꞌoewa pe iꞌatuwese kahato maꞌato haipekai miitꞌin atumohit kahato hap yn iꞌatuehay. Yt taꞌatukyꞌe hin i Tupana sese iꞌewyte miitꞌin me -Yt kat hamo i eiperia iꞌatuꞌe yn taꞌatupyꞌa pe. Yt iꞌatuwese i iꞌewyte yt taꞌatuwesat i iraniaꞌin katupono -Uito rat poꞌog nakat eikai iꞌatuꞌe teꞌeruwewanetup hawe. Atunug kuap poꞌog eikai iꞌatuꞌe. Yt taꞌatuꞌywotꞌin taꞌatutyꞌin miat waĩꞌe hap upi hin i teꞌeropyhuꞌat.

Humanu 4:13

Saꞌawyꞌi Tupana toꞌe Aparãu me -Meiũran aru atum yne mesuwarotiat epe iꞌewyte esaꞌyruꞌin me iꞌewyte wuatꞌi ywania emiit no iꞌatu kahato waikiru sem iꞌatu hap oktan atum epe Aparãu uimohey hat kahato en mote e. Miꞌi hawyi Aparãu toꞌe -Tupana woromohey En e. Atimohey eꞌe hap ewy iꞌewyte atimohey raꞌyn etunug aru eꞌe hap koꞌi e. Miꞌi pote Tupana toꞌe tope -Aikotã yt karãpiat i iꞌaparap hat ewy ereineꞌen uiwanetup hawe mehin uiꞌe hap etimohey yn mote e Tupana nimo yt kat i te Muisei piat ahewaĩ hap Tupana tum te turan Aparãu me yt kat i te Muisei woꞌonapin hap te turan. Katupono Muisei ti Aparãu emiariru emiariru kahato.

Humanu 5:20

Miꞌi hawyi nimuaria Tupana ehay moherep haria timoherep kahato kat som Tupana tikyꞌesat kat som yt hap. Miꞌi hawyi poꞌog saꞌag nug haria wo te teꞌeropyhuꞌat saꞌawyꞌi te wuat kai katupono iꞌatu kahato Tupana waĩꞌe hap putꞌok e hawyi iꞌaparap kahato hap topyhuꞌat. Katupono yt watunug i pote miꞌi kaipyi hotꞌokꞌe raꞌyn ahete yt nakuap i kahato aito hap. Miꞌi pykai aikyꞌe teran katupono Tupana aikyꞌe hap poꞌog hesaika aiminug saꞌag kai.

Humanu 6:14

Saꞌawyꞌi watikuap Tupana piat ainapin hap Muisei mienoi kaipyi. Miꞌi hawyi -Pyno atunug aru watoꞌe maꞌato yt watunug kuap i kat pote yt Iesui miehakyeraꞌat koꞌi i te aito pote. Mekewat eꞌat pe yt watikuap hin i Tupana aikyꞌe hap. Koitywy Tupana Paꞌãu esaika hap mywo watunug kuap taꞌyn ainapin Tupana piat hap. Pyno koitywy yt naku i wataꞌaipok aipiit mikyꞌesat saꞌag eropat hamuat ipakup i rakaria wo i raꞌyn watukupteꞌen hawyi.

Karasia 3:19

Kat hamo som pyno tutum ahepe ainapin hap koꞌi. Pyno worohoꞌowesat. Taꞌi aiminug saꞌag moherep hamuat tutum ahepe. Miꞌi hap ewy mesup tutum ahepe Aparãu Emiariru Iesui putꞌok e yian mete wuat hap -Atunug aru toꞌe hap. Yt tutunug i te turan Tupana ainapin atipy kaipywiat tomipoꞌoro wẽ pyi. Miꞌi e hap Muisei tiwan ainapin hamuat.

Karasia 5:18

Pyno Tupana Paꞌãu mikyꞌesat ewy raꞌyn watunug hawyi atunug neran Muisei mienoi uhehakyeraꞌat hamo yt watoꞌe kuap i.

Karasia 5:21

Yt watopotꞌoksat i. Imopẽꞌã rakaria wo watoineꞌen pote woꞌoeroꞌok woꞌoeroꞌok haria ewywuat gupteꞌen haria ewy watoineꞌen. Miꞌi pote eiweꞌeg wo o katupono miꞌi tã neꞌi nug haria yt tuwehytꞌok kuap i Tupana Morekuatno topyhuꞌat hap eꞌat pe yt tuwehytꞌok kuap i hetama pe.

Karasia 5:23

Yt wemowato haria wo i watoineꞌen. Wewaĩ kuap kahato haria wo watopyhuꞌat. Karãpe miꞌi tã e hap ewy watunug hawyi yt kat i ahewaĩ Muisei mienoi kaipywiat hap tuwẽtem aipiit pyi e. Miꞌi pote iperupꞌi rakatno watoineꞌen e. Watuwenapin kahu kahato pote miꞌi hap yn tuwẽtem Tupana Paꞌãu kaipyi aipiit pyi. Miꞌi tã e hap yne. Miꞌi waĩꞌe hap mopoꞌinik hap yt kat i toineꞌen e.

2 Tesaronika 2:8

Miꞌi hawyi tuwemoherep mekewat saꞌag nug hat koro maꞌato Aipotypot Iesui ti aru iꞌauka wẽtup tehay wo yn topyhu wo yn teẽtyhot kahato wywo tuut hap eꞌat pe.

1 Timoteu 4:7

Ipoityꞌi kahato ti sehay yt Tupana mienoi kaipywiat i yt Tupana e hap ewywuat hin i. Miꞌi tupono waku waure wo miꞌi hap koꞌi kai. Yt kan hamo i watopotmuꞌe miꞌi hap koꞌi ete. Taꞌi poꞌog waku watoꞌomoesaika kahato Tupana e hamo Ipaꞌãu wo miitꞌin e hap koꞌi kai.

1 Timoteu 6:20

Timoteu waku etopag yne mesuwat uiꞌe hap ewanetup hawe. Mesuwat uimiwan waku iheg me epyꞌa pe. Tukupteꞌen ti sehay wuat -Toꞌiro watuꞌuka e haria maꞌato yt etiꞌatuwesat reiꞌo miꞌiria. Tupana etiat iꞌatuehay saꞌag hap kape o yt ewaure kaꞌa teiꞌo. -Uruto poꞌog uruikuap uruwanetup hawe iꞌatuꞌe ahepe yt taꞌatuweꞌeg i haype. Pyno yt erewanetup motꞌi teiꞌo iꞌatuehay kape.

2 Timoteu 2:16

Waku watoiat kahato yt aiweꞌeg i hap aiwoꞌoꞌehay wuat wuꞌuka hap aiwoꞌomuꞌe turanuat hap katupono miꞌi hap yt kan hamo i maꞌato watunug miꞌi neꞌi pote Tupana tuwemoti aipupi iꞌewyte watiꞌatuputsit neꞌi iraniaꞌin Tupana kuap teran hap kaipyi.

2 Timoteu 3:2

Katupono mekewat eꞌat pe yt hegyiꞌat i rakaria tukupteꞌen kahato -Ewat uiatno yne iꞌatuꞌe. Uito poꞌog ekai e haria. Uito poꞌog atikuap ekai iꞌatuꞌe. Toꞌokyryꞌi kahato Tupana ete. Iꞌatuehay taꞌatuꞌywot taꞌatuty piat yt taꞌatumohey hin i. Etum neꞌen neꞌi ikahu rakat iꞌatuepiat hawyi -Waku yt iꞌatuꞌe hin i egyiꞌat hawe. -Yt kat i Tupana iꞌatuꞌe i.

Titu 1:10

Miꞌi hat etiꞌairo pote meremo taꞌatumoperupꞌi tehay pywuat no yt iꞌewy i rat e haria. Taꞌi tukupteꞌen aipyꞌasetpiaria aimimuꞌeria wẽtup ehay upiat myhuꞌat haria. Miꞌiria tuꞌuka teran kahato sehay pywuat ete aimaꞌat teran haype. -Uruto Iesui mohey haria iꞌatuꞌe wen maꞌato wẽtup sehay ete aimuꞌe. Sehay potꞌi Iuteu ywania eko enoi haria miꞌiria.

Titu 1:16

Miꞌiria -Uruikuap Tupana iꞌatuꞌe wen maꞌato iꞌatuminug koꞌi yt Tupana mohey haria minug ewy hin i katupono hemarakꞌa poityꞌi iraniaꞌin ete. Yt uwe ehay upi i miꞌiria teꞌeropyhuꞌat teran. Iꞌewyte yt kat i iꞌatuminug wakuap heremo. Yt taꞌatuhepapꞌi wakuap nug hap paĩ -Uruikuap kahato Tupana iꞌatuꞌe pykai. Miꞌi tã hap ewy miꞌiria.

Titu 1:6

Waku etiꞌairo yt iꞌaparap i hat wẽtup ok yn iharyꞌi rakat are. Iꞌewyte imepytꞌin Iesui mohey haria ewywuat etiꞌairo. Yt etiꞌairo teiꞌo imepytꞌin ipyꞌahak poityꞌi rakat neꞌi areꞌe. Yt toꞌywot ehay upiat i haria. Miꞌi yt naku i aiꞌapykok hatno.

Titu 3:3

Kat pote ti aito nimo te yt hãpyk i sese rakaria watoineꞌen. Woꞌoehay upi haria wo i ti aito katupono mekewat eꞌat pe aito aiminug saꞌag atoiat reran aiꞌe pykai yt watoiat kuap i. Miꞌi hawyi ti mekewat aiminug saꞌag kape neꞌi watoineꞌen. Miꞌi hap kaipyi ti aiwoꞌoweukaꞌi aiwoꞌopiat hap yn naꞌyn tuwekuap ahete. Miꞌi haype ti -Atikyꞌesat ewat uiwatno aiꞌe hap aiwanetup hawe. Iꞌewyte -Atikyꞌesat ti uito poꞌog ekai iraniaꞌin kai aiꞌe hap yn. Miꞌi hap kaipyi ti ipyꞌahak takaria wo aito yne miitꞌin ete. Iꞌewyte iraniaꞌin torannia ipyꞌahak takaria wo ahete tukupteꞌen.

Epereu 11:31

Maꞌato wẽtup haryporia weweneru hat yt ikuꞌuro itote mana Hape e hap katupono yian mete miꞌi imohey Tupana e hap -Atimoma hamuat meiũwat tawa Ieriko e hap katupono yian mete typy ok tuwat suraraꞌin Iuteuria wat iꞌatuetawa epiok hamo. Miꞌiria pe -Eiwehytꞌok to mimiꞌin e iꞌatuepe mekewat haryporia. Miꞌi hawyi toiꞌatuerowyi toꞌyat pe iꞌatuꞌuka teran haria pupi. Toimohey pote toimoherep muap tetawa pyi. Mekewat haryporia yn imohey. Miꞌi pote iraniaꞌin topap maꞌato Mana Hape yt ikuꞌuro hin i toimohey iꞌatuꞌe hap pote. Yt naku i nug hat Hape pykai toimohey hawyi Tupana miehakyeraꞌat topyhuꞌat.

Epereu 12:16

Nimo te Iako eꞌykeꞌet Esaꞌu hewaire kahato iraniaꞌin haryporiaꞌin wywo iꞌewyte tuwekyryꞌi Tupana ehay ete. Uiwyriaꞌin Iesui mohey haria yt naku i Esaꞌu ewywuat watopyhuꞌat. Saꞌawyꞌi aseꞌi Isaki toꞌe toꞌyat piaria pe -Uikuꞌuro hawyi atikyꞌesat uhaꞌyru Esaꞌu uhaipe piatno uipowatꞌyp e. Esaꞌu ti topyhuꞌat aru Tupana Mipoꞌoro Yianmiat Ahehakyeraꞌat hanuat ahaꞌaseꞌi pono e. Wẽtup eꞌat pe Esaꞌu hesyꞌat kahato hawyi toꞌe toꞌywyt Iako pe -Uipoi ro en paĩ ipuꞌi apokik wo katupono uhesyꞌat kahato uhyt e. Miꞌi hawyi Iako tiwesat -Areineꞌen teran aiꞌywot saipepiatno uito e. Atikyꞌesat Tupana mipoityro wo aiꞌywot e hap ewy e. Miꞌi e hap etum uhepe pote woromoꞌok kahato meikowat ipuꞌi moĩ wo e. Miꞌi hawyi -Taꞌi ewatno raꞌyn katupono yt kan hamo i Tupana aipoityro hap e Esaꞌu e Iako pe.

1 Peteru 2:7

Ikahu kahato mekewat Nu watoꞌe imohey haria aito pote. Maꞌato iraniaꞌin yt imikyꞌesat nug neran i haria -Yt kan hamo i mekewat Nu iꞌatuꞌe. Yt naku i watunug aiꞌyat itote iꞌatuꞌe. Miꞌi hawyi taꞌatuꞌatoiat mekewat Nu maꞌato Tupana yt totiat hin i. Miꞌi pote pyno -Mekewat Nu iraniaꞌin miꞌatoiat wakuat kahato rakat Uimepyt ewywuat e. Iraniaꞌin miꞌatoiat wo topyhuꞌat maꞌato Miꞌi tote atunug uimotypot yat koro e kat pote atipuẽti mekewat Nu poꞌog hãpyk takat torannia kai e Tupana.

1 Peteru 3:20

Iꞌatu kahato miit itote yt naku i nug haria. Miꞌi haria kape toto. Aikope tukupteꞌen Nuꞌe mimuꞌeria. Saꞌawyꞌi Nuꞌe tiꞌatumuꞌe miꞌiria. Tutunug mekewat yara wato koro turan toiꞌatumuꞌe maꞌato yt taꞌatumohey i. Tupana tiꞌatukyꞌesat kahato miꞌiria tuwewawiat hap. Toiꞌatuekyi kahato Nuꞌe ehay wo maꞌato yt taꞌatumohey i. Miꞌiria kape Iesui toto tokuꞌuro hawyi aikope tukupteꞌen ikuꞌuro rakaria hap kape. Miꞌi hawyi toimoherep iꞌatuepe mekewat sehay wakuat. Katupono saꞌawyꞌi mesuwat yi tote Nuꞌeꞌin yn Tupana miehakyeraꞌat koꞌi topyhuꞌat. Mekewat yara wato pe tukupteꞌen 8 ok yn Nuꞌeꞌin koꞌi. Miꞌi hawyi iꞌaman iwato tiꞌatuꞌuka yne mesuwarotiaria maꞌato mekewat Nuꞌe minug yara wato tiꞌatuehakyeraꞌat 8 ok takaria katupono mekewat yara wato pe tukupteꞌen Nuꞌeꞌin mekewat yꞌy wato yowa tote.

1 Peteru 4:18

Pyno niatpo kahato ahehakyeraꞌat hap Tupana mimoewaku koꞌi aito pykai. Maꞌato aikotã aru iraniaꞌin yt Tupana kyꞌesat i haria iraniaꞌin mesuwarotiaria yt naku i nug haria ete aikotã aru miꞌiria ete mekewat eꞌat pe. Taꞌi aitoria watopyhuꞌat Tupana miehakyeraꞌat koꞌi wo maꞌato miꞌiria yt karãpe i iꞌatuehakyeraꞌat hap topyhuꞌat.

Iuta 1:15

Wuatꞌi miitꞌin yt imohey haria i apiheg hamo tuut aheTupana e Enoki. Miꞌi hawyi ti aru toimoherep yne uwe waku uwe yt nakuat i hap e. Mekewat eꞌat pe ti aru toimoherep miitꞌin minug saꞌag nakat koꞌi yt nakuat i nug haria pe Tupana yt mikyꞌesat i nug haria pe e. Toiꞌatumoherep wuatꞌi ehamo e. Iꞌewyte torannia yt naku i iꞌatuehay saꞌag tetiat e. Iꞌatupyꞌahak tetiat hap enoi wuatꞌi miitꞌin ehamuat hamo tuut aheTupana e. Toimoherep yn woꞌoeremopusu hap koi hawyi yn soso hap iꞌewyte -Tupana ti yt naku i kahato iꞌatuꞌe hap moherep hamo tuut e.

Iesui Aru E Hap 21:8

Maꞌato iraniaꞌin teꞌerokenꞌẽ uimohey hap moherep hamo e. Miꞌi pote miꞌiria aru tukupteꞌen wuatꞌi eꞌat pe mekewat aria emyiꞌa wato pe ytyghe wuk hap ewywuat pe e. Iꞌewyte woꞌopotꞌauka haria paini koꞌi iꞌewyte hewaire hewaire rakaria iꞌewyte wuat minug Tupana motypot haria iꞌewyte woꞌomaꞌatꞌi maꞌatꞌi haria iꞌewyte yt uimohey i haria iꞌewyte yt naku i nug haria miꞌiria typuat i map hanuaria hoꞌopot wuatꞌi eꞌat pe aria ẽty emyiꞌa ewywuat pe e uhepe Aipotypot Iesui atipy kaipywiat morekuat eiam note pyi.

Iesui Aru E Hap 22:15

Maꞌato iraniaꞌin me -Ereke ro yt e hin i e. Yt karãpe i -Ereke ro uhetawa pe e paini koꞌi pakup we e. Yt karãpe i -Ereko ro e woꞌoꞌauka haria pe e. Yt karãpe i -Ereke ro e hewaire waire rakaria pe e. Iꞌewyte uwe uwe imotypot mo wuat Tupana miꞌi haria pe -Ereke ro yt e hin i Iꞌewyte uwe uwe miitꞌin potmaꞌatꞌi maꞌatꞌi hat toineꞌen miꞌi hat pe -Ereke ro uhetawa pakup we yt e i e atipy piat.