1 Tesaronika 1:5 - Sateré-Mawé

⁵ Saꞌawyꞌi ti uruhenoi kahato ehepe sehay wakuat Iesui etiat maꞌato yt uruwat uruẽku kaipyi yn i maꞌato Tupana esaika hap kaipyi iꞌewyte Tupana Paꞌãu kaipyi uruiꞌatumuꞌe eipe. Taꞌi pywuat sese urutoꞌe. Urumimohey mesuwat sehay urutoꞌe uruhenoi ehepe turan. Eweikuap taꞌyn aikotã saꞌawyꞌi urutukupteꞌen eipyꞌasetpiat hap. Taꞌi eikyꞌe uruepiat hap yn ni toineꞌen urukai.

1 Tesaronika 1:5 ပူးပေါင်းရင်းမြစ်များ

Maku 16:20

Miꞌi hawyi hemiitꞌin tuwat raꞌyn Iesui ehay enoi hamo wuatꞌi ywania mesuwat yi totiaria enoi hamuat. Iꞌewyte ti Iꞌatukaꞌiwat Paꞌãu ipotpap kahato iꞌatuwywo tesaika wo wakuap iꞌatumisepap hap nug hamo miitꞌin miat tomohey hamo.

Iruka 1:1

Mehin Teowiru Iesui putꞌok e yi tote hawyi iꞌatu kahato miitꞌin iwan haria aikotã aikotã tuwemoherep mesuwiat putꞌok e raꞌyn aipyꞌaset piat turan wuat koꞌi etiat.

Iesui Potmuꞌeria 11:21

Miꞌi hawyi Aikaꞌiwat Iesui tiꞌatupowyro kahato tuwemoherep hamuat hap ete. Miꞌi tupono ti Kereku ywania pusu kuap haria teꞌeruwemorem kahato raꞌyn Ahehakyeraꞌat hat Iesui kape. Miꞌi hawyi typyꞌi kahato raꞌyn imohey pakup i haria wẽtup ywania Kereku pusu kuap haria tukupteꞌen tawa Antiokia pe.

Iesui Potmuꞌeria 16:14

Wẽtup ok iꞌatupyꞌasetpe toineꞌen mana Iritia. Mana Iritia ti tawa Tiatira pywiat. Sokpe hup ikahu rakat weneru hat. Tupana motypot hat sese miꞌi. Miꞌi ipap kahato Pauru mienoi upi hawyi Tupana tomoherep taꞌyn mekewat sehay mana pe.

Iesui Potmuꞌeria 2:33

Taꞌi Tupana timowato kahato ti Tomipoꞌoro Iesui e. Miꞌi pe tutum Topaꞌãu Wakuat iꞌewyte mesup ti Iesui tum Ipaꞌãu uruepe aikotã eiꞌakasa hap ewy. Eimikuap hap ewy ti mio tutum Topaꞌãu Wakuat uruepe e.

Humanu 1:16

Miꞌi pote rat yne uhesaika hap wywo ahãꞌãg neran ehowawiat areto hamo wen. Katupono sehay wakuat Iesui etiat hesaika kahato rakat aikotã Tupana esaika hap oktan ne. Aikotã pureke koꞌi esaika hap ewy Iesui etiat sehay. -Pywo ti rat uwe uwe timohey raꞌyn Iesui miꞌi hat Tupana miehakyeraꞌat wo topyhuꞌat sio wuatꞌi miitꞌin eropat haria sio wuatꞌi miitꞌin akagnia koꞌi toiꞌatuehakyeraꞌat kuap torannia Tosaꞌyru mohey haria areꞌe raꞌyn wuatꞌi ywania pe. Saꞌawyꞌi waku Iuteu ywania kape watimoherep Iesui etiat miꞌi hawyi waku iraniaꞌin yt Iuteu i ywania kape watimoherep Aipotypot Iesui. Hesaika kahato mesuwat sehay Iesui etiat are. Iesui etiat sehay pupi ti yt aremoti hin i imoherep hamo.

Humanu 15:13

-Tupana uito ti emipoꞌoro Pauru atikyꞌesat kahato etiꞌatupowyro iraniaꞌin ywania kape ekuap hamuat hap ete. Koitywy iꞌatuꞌarot potꞌi wywo tukupteꞌen. En yn waku iꞌatumowepiit kuap hanuat. Esaꞌyru kape yn teꞌeruwanetup taꞌatuhekatup haype are. Uiꞌywot mekewat ewat wuatꞌi eꞌat piat woꞌomowepiit hap yn waku etum iꞌatuepe. Esaꞌyru mohey hap kaipyi etum no iꞌatuepe iꞌatuwanetup saꞌag hap monik hap Esaꞌyru mohey hap kaipyi are. Papai etum o Epaꞌãu Wakuat iꞌatuepe poꞌog poꞌog yne eꞌat pe. Etimoesaika miꞌiria Epaꞌãu Wakuat kaipyi are. Epaꞌãu Wakuat kaipyi atikyꞌesat taꞌatuhekatup Esaꞌyru uut hap aat kaꞌap. Uruꞌywot Tupana etimowepiit kahato uheꞌywytꞌin uheinytꞌin tawa wato Huma piaria.

Humanu 2:16

Uito ti Pauru Tupana ehay wakuat sese Iesui etiat moherep hat. Mio tã areꞌe wuatꞌi ywania pe -Uhytꞌiꞌin manaꞌin Tupana tipoꞌoro raꞌyn ahowawi Ahehakyeraꞌat hat are. Toipoꞌoro raꞌyn Tosaꞌyru Iesui Aiporekuat nuat. Eweimohey ro Iesui eipyꞌa pe eiwanetup hawe. Ewetunug no Iesui Eiporekuat no. Tupana tikuap kahato eiwanetup hap eipyꞌa piat. Putꞌok e aru uwe waku uwe yt e hap eꞌat. Miꞌi e hap eꞌat pe Iesui tiꞌatumoherep Toꞌywot Tupana pe uwe temiitꞌin sese uwe yt hap are. Toikuap kahato wuatꞌi miitꞌin wanetup hawiat koꞌi migꞌi wuat. Toikuap sese sio wẽtup ok tomohey hat sese toineꞌen sio yt hap toikuap sakpo are. Miꞌi pote Iesui ehay pyi aru Tupana ahehakyeraꞌat wuatꞌi eꞌat pe sio aiꞌapiheg wuatꞌi eꞌat pe. Uito Pauru miꞌi tã areꞌe wuatꞌi ywania pe.

1 Kuriniu 1:24

Maꞌato aito Tupana miꞌairoria ete ti Iuteu ywania sio Kereku ywania ti mekewat sehay Iesui ikuꞌuro ariaꞌyp posok ete aikuꞌuro hap u hamo hap hesaika kahato topyhuꞌat ahehakyeraꞌat hamo. Taꞌi watomohey mekewat sehay Iesui etiat hawyi ahehakyeraꞌat hap toineꞌen. Pywo ti rat Iesui ti Tupana esaika hap wywo iweꞌeg hap wywo toiꞌatuehakyeraꞌat kuap wuatꞌi miitꞌin watoꞌe.

1 Kuriniu 10:33

Uito Pauru arewyꞌinug neran yne uiminug wakuap mo yn.

1 Kuriniu 3:16

Eweikuap apo Tupana Paꞌãu yat sese eipe hap sio yt. Taꞌi Tupana yat sese koꞌi ti eipe. Tupana Paꞌãu eiam torannia imohey haria Iesui kaipywiat haria.

1 Kuriniu 3:6

Uito areineꞌen hãꞌỹi koi hat Tupana ehay wo ewy worohoꞌomuꞌe mekewat eꞌat pe. Miꞌi turan aimuꞌe hat Apauru putꞌok e itote eimuꞌe hamo hap ewy hawyi toihuꞌi huꞌi uimikoi iãꞌỹi hap ewy hawyi iꞌatutag naꞌyn Tupana esaika hap wywo.

1 Kuriniu 4:20

Tupana toineꞌen Aipotypot no yt aiwẽ kaipywiat i -Uiporekuat no En ereineꞌen Tupana yt e hap kaipyi i maꞌato aipyꞌa pyi watunug imikyꞌesat ewy hap kaipyi Tupana toineꞌen kuap Aipotypot no.

1 Kuriniu 9:14

Miꞌi hap ewy Tupana ainapin mesup -Eweipoi ro eimuꞌe haria e. Eweimoꞌẽ emiꞌu uhehay wakuat moherep haria pe uimikyꞌesat oktan e Tupana.

2 Kuriniu 3:6

Tupana Paꞌãu wakuat yn aimoweꞌeg kuap tehay wakuat moherep hamuat. Saꞌawyꞌi wuat sehay waĩꞌe hap koꞌi Tupana henoi Iuteuria kape. Waku kahato miꞌiria maꞌato yt aimohãpyk kuap i Tupana wanetup hawe. Katupono yt watunug kuap i yne miꞌi koꞌi. Maꞌato sehay pakup Iesui etiat wo Tupana Paꞌãu aimoieineꞌen kuap. Iraniaꞌin iwẽpap kuap kahato Tupana ehay. Maꞌato yt taꞌatuhẽtup i Tupana Paꞌãu me -Uimuꞌe ro kat som ereꞌe mesuwe hap kuap hamo yt iꞌatuꞌe i. Teꞌeruwanetup mesuwat miwan Tupana etiat -Atimowẽpap kuap hawyi ahehakyeraꞌat raꞌyn iꞌatuꞌe yn. Tupana miwan etiat ahehakyeraꞌat kuap iꞌatuꞌe toꞌope. Miꞌi hawyi taꞌatumowẽpap kahato ahut ewy yt taꞌatukuap i taꞌatupyꞌa pe pykai. Miꞌi hawyi ikuꞌuro rakat ewy tukupteꞌen Tupana ehay ete. Kat pote sehay yn taꞌatukuap pote. Maꞌato Tupana Paꞌãu wakuat yt aimuꞌe i miꞌi hap ewy neꞌi. Katupono Tupana Paꞌãu aimuꞌe aipyꞌa pe aiwanetup hawe aimuꞌe kahato tehay ete. Miꞌi hawyi aimoieineꞌen weꞌeg tehay wo miwan kaipyi.

Karasia 2:2

Areto turan Tupana toꞌe uhepe -Pauru atikyꞌesat ereto tawa Ierusarẽi kape mesup e uhepe pote areto i e hap ewy. Putꞌok are raꞌyn itote hawyi areto raꞌyn Iesui potmuꞌeria yianmiaria kape hawyi miꞌiria pe ahenoi henoi kat e hap kat e hap ahenoi yne sehay wakuat Iesui etiat Tupana ehay kat e kat e hap koꞌi ahenoi mesuwat yi tote iraniaꞌin me yt uruꞌywania i pe uiꞌe hap atimoherep yne yne uhehay wakuat areꞌe itote. Iesui mohey haria akagnia puo yn maꞌato migꞌi wo pyi ahenoi katupono taꞌatukuap teran sio pywo uhehay sio wẽtup sehay ahenoi iraniaꞌin me sio Iesui etiat. Iꞌatuehay ewywuat ahenoi hap sio yt taꞌatukuap teran itote tawa Ierusarẽi piaria. Katupono uikuap hamo yn ahenoi wakuat sio yt hap moherep hamo. Aikotã ahenoi sehay wakuat yt Iuteuria i piat hap ewywuat e hap ahenoi itote iꞌatuepe. Taꞌatukyꞌesat kahato uimienoi pywo kahato iꞌatumienoi Iesui etiat hap taꞌatukyꞌesat. Ahenoi yne hawyi -Waku kahato ehenoi miitꞌin me Pauru iꞌatuꞌe aikotã miit ihyha rakat teput kuap kahato rakat ewywuat en iꞌatuꞌe uhepe. Uiwyriaꞌin are miꞌi hap ewy atikyꞌesat Aipotypot Iesui toꞌe uhepe aru -Waku rakat ewy ereput Pauru e hap atikyꞌesat kahato. Yt naku i toꞌe uhepe -Yt kan hamo i emienoi miitꞌin me Pauru toꞌe hap yt atikyꞌesat hin i are.

Karasia 5:5

Maꞌato uruto yt eiperia ewy hin i katupono uruto ti Iesui mohey hap kaipyi ti ahehakyeraꞌat kuap e haria uruto. Miꞌi hap kaipyi yn uruimohey.

Ewesu 2:10

Saꞌawyꞌi Tupana topo wo ainug. Koitywy Haꞌyru mohey haria watopyhuꞌat wẽtup ywania ewy yn naꞌyn watopyhuꞌat. Ainug hap eꞌyian mete Tupana toꞌe -Meiũran aru atipowyro kahato uimikyꞌesat nug neran haria e. Wakuaria sok ewy aru atunug miꞌiria e saꞌawyꞌi tuwepe.

Ewesu 3:20

Taꞌi uiwyriaꞌin aheTupana hepap kahato aimiẽtup ium hamo poꞌog poꞌog iwato tutum kuap aimiẽtup koꞌi kai are. Yt karãpe i teke aiwanetup hawe kat kupitu kat kupitu hegyiꞌat hap are. Tutum poꞌog poꞌog kuap ahepiat hẽtup kuap hamo kai katupono Ipaꞌãu hesaika aikai ahepiat hẽtup hamo Tupana pe are.

Wiripu 2:13

Are paĩ Tupana tikyꞌesat kahato watunug tomikyꞌesat ewywuat hap. Miꞌi pote ainapin aat kaꞌap aiwanetup hawe kat som kat som waku watunug hap. Karãpe aiwẽ pyi yt watunug neran i imikyꞌesat koꞌi miꞌi hawyi perupꞌi popuo aimuꞌe aiwanetup hawe -Etunug o etunug o e. Miꞌi hawyi meiũran -Waku Uhyt waku Mimi watoꞌe Tupana pe katupono toikyꞌesat kahato tehay upiat watuwat hap.

Wiripu 4:9

Iꞌewyte atikyꞌesat kahato ehewyry uhepiat einapin hap nug haria wo. Atikyꞌesat uimipoꞌoro einapin hamuat eweikyꞌe kahato hap. Saꞌawyꞌi ti areineꞌen eitokpe turan wakuat yn atunug ehepuo. Waku ewetunug aikotã uheko eweiꞌakasa hap ewy wakuap nug hap ete. Miꞌi tã ewetunug mote woꞌokyꞌe hap eiwoꞌopiat hap eweipuẽti Tupana mikyꞌesat ewy. Miꞌi hawyi ti aru eiperupꞌi hap topyhuꞌat aikai are.

Korosi 2:2

-Atikyꞌesat miꞌiria ieineꞌen kahato Esaꞌyru mohey hap upi hap ahẽtup. Etimonik to iꞌatuꞌarotꞌi hap areꞌe Tupana pe. Miꞌi hawyi etunug miꞌiria iwepiit rakaria wo are. Etiꞌatuꞌapoꞌahik miꞌiria woꞌokyꞌe haria wo aikotã urueꞌyni uruiꞌokpoꞌi hap ewy are. Atikyꞌesat miꞌiria hesaika rakaria wo surara ewywuaria ehay moherep haria wo are. Atikyꞌesat pywuat sehay kuap kahato haria wo are. Atikyꞌesat ikuap hotꞌok kahato sehay pywuat hawyi -Pywo ti rat e haria wo tukupteꞌen are. Atikyꞌesat kahato taꞌatukuap kahato mekewat eꞌe hap saꞌawyꞌi wuat yt heremo i rakat Iesui eꞌyian mete wuat are. Mekewat -Atipoꞌoro aru Uhaꞌyru Eiporekuat no eꞌe hap are.

1 Tesaronika 2:13

Waku kahato eipe uiwanetup hawe katupono saꞌawyꞌi Iesui kapiat uruehay hap kape ehewaure kaꞌa kahato. -Yt miitꞌin ehay wo hin i urunapin eweiꞌe eipyꞌa pe tawa Tesaronika piaria. Waku kahato eiperia. -Tupana ehay sese wo urumuꞌe katupono Iesui Aimoieineꞌen hat ete urumuꞌe eweiꞌe uruepiat. Miꞌi hawyi Iesui mohey haria wo raꞌyn eweipyhuꞌat kahato itote waku hap ewy are. Miꞌi hap upi urutuwehum kahato Tupana kape aat kaꞌap ehupi are. Yt karamuat i ikahuro rakat uruwehum hap katupono Tupana ehay mio tuwenug kahato raꞌyn eheineꞌen hawuo Iesui mohey hawyi.

2 Tesaronika 2:14

Saꞌawyꞌi worohoꞌomuꞌe mekewat sehay wakuatno miꞌi hawyi eweikupteꞌen imohey haria wo. Miꞌi hap eꞌat pe toꞌe Tupana ehepe -Pyno worohoꞌonug eipe ikahu rakaria wo aikotã Uhaꞌyru ewywuat no.

2 Timoteu 2:10

Maꞌato yt uiwẽpohep hin i Iesui mohey hap ete waĩꞌiꞌatuꞌe pykai. Uiꞌauka pote uiꞌauka maꞌato yt uipohep hin i te. Katupono Tupana tiꞌatuehakyeraꞌat teran kahato tomiꞌairoria ahoꞌopot kahato Iesui mohey iꞌatuepiat hamuat pykai. Miꞌi hap kaipyi Tupana tiꞌatuehakyeraꞌat miꞌiria. Miꞌi hawyi Iesui kahu hap ewywuaria raꞌyn tukupteꞌen iwywo wuatꞌi eꞌat pe raꞌyn.

2 Timoteu 2:8

Timoteu ewatetup o Aikaꞌiwat Iesui kape. Taꞌi miꞌi ti morekuat Tawi emiariru Emiariru sese. Miꞌi Miit Tupana mimoieineꞌen pakup i raꞌyn hat ahenoi wuatꞌi puo.

Epereu 10:22

Pyno toꞌiro Tupana kape uiwyriaꞌin. Waku watipun ahehay aheso hap koꞌi wateke Tupana wywuat piat hamo. Waku yt kat i aipyꞌa piat aheso hap. Miꞌi hawyi yt kat i aimowemoti hap wywo wateke. Toꞌiro pyno Tupana ewowi. Waku watipen aiwanetup hap aipyꞌa piat Iesui suu wo. Waku Iesui aipyꞌa sei hap Tupana tunug suu wo wateke. Waku yt kat i aiwanetup hap saꞌag aimoti hap wywo i waku wateke. Waku watuwei kahato mekewat yꞌy wakuat sese wuatꞌi eꞌat piat wat pe. Miꞌi hawyi waku wateke aipyꞌa sei hap wywo aikoho hap mywo aipiit toran koho hap mywo yn waku wateke Tupana ewowi uiwyriaꞌin.

Epereu 6:11

Pyno poꞌog waku miꞌi hap ewywuat no watukupteꞌen. Waku Tupana motypot hap kahato wywo watoineꞌen. Imohey potꞌi kahato aikuꞌuro hap eꞌat kape yn waku imohey hap watoꞌe.

1 Peteru 1:12

Aikotã iꞌatumuꞌetu wuat ewy Tupana Paꞌãu timoherep iꞌatuepe aikotã aru Aipotypot tokuꞌuro hap eꞌyian mete toineꞌen hap koꞌi aikotã tuwẽtem guꞌuro pyi hap taꞌatukuap kahato Tupana Paꞌãu kaipyi. Miꞌi hawyi putꞌok e mekewat eꞌat pe hawyi uruepe topotmuꞌeria sese pe tuwemoherep taꞌyn Aipotypot. Miꞌi hawyi uruimoherep taꞌyn ehepe iꞌatuꞌe hap ewywuat saꞌawyꞌi wuat Tupana ehay moherep haria e hap ewywuat. Urutaꞌakasa yne iꞌatuꞌe hap ewywuat Aikaꞌiwat moherep hap. Urutaꞌakasa yne miꞌi hawyi mesup uruimoherep yne Iesui etiat ehepe uruꞌakasa hap koꞌi. Uruimoherep kahato uruehay wywo Iesui etiat Tupana Paꞌãu urupiit piat uruwanetup hap koꞌi. Uruimoherep mesuwat sehay wakuat Iesui etiat kat pote urutaꞌakasa raꞌyn Tupana Mipoꞌoro atipy kaipywiat. Koitywy uruikuap Tupana miehakyeraꞌat koꞌi wuat aito hap. Mekewat atipy piaria teꞌeruwanetup kahato kat pote saꞌawyꞌi yt uruimohey hin i maꞌato mesup uruimohey raꞌyn. Saꞌawyꞌi yt Tupana kape hin i uruwanetup hap. Koitywy Tupana kape yn naꞌyn uruwanetup hap. Miꞌi hap ete atipy piaria teꞌeruwanetup kahato. Taꞌatukuap teran haype maꞌato yt taꞌatukuap i kat pote mesup Tupana miehakyeraꞌat koꞌi wuat raꞌyn mesup uruto are.

1 Peteru 1:3

Saꞌawyꞌi Aipotypot Iesui ikuꞌuro hawyi Tupana timoieineꞌen guꞌuro pyi. Saꞌawyꞌi yt watomohey hin i aikuꞌuro hawywiat aheineꞌen i hamuat hap. Maꞌato mesup koitywy watomohey kahato kat pote Aiꞌywot Tupana tihep taꞌyn Aikaꞌiwat ikuꞌuro hap kaipyi. Miꞌi pote koitywy -Waku kahato En Tupana. Poꞌog wakuat torannia kai urutoꞌe kat pote egyiꞌat kahato uruepe. Urukyꞌe kahato En. Poꞌog poꞌog torannia miitꞌin kai urukyꞌe hat En katupono etihep taꞌyn urukaꞌiwat hyp hawyi urutoꞌe.

1 Peteru 5:3

Yt naku i watiꞌatupoꞌoro poꞌoro ahehay pirik hap wywo aihũria kat pote aihũria Tupana saꞌyruꞌin sakiꞌytꞌin. Miꞌi pote poꞌog waku watimoherep Tupana hũria pe muap ikahu rakat. Waku watopyhuꞌat Iesui iãꞌãkap koꞌi wo ewywuat no. Miꞌi hawyi waku watoꞌe aimimuꞌeria pe -Ereineꞌen no eweikupteꞌen no aikotã areineꞌen waku hap ewy waku watoꞌe. Waku watuwepotpap poꞌog aihũria kai. Miꞌi hap kaipyi taꞌatukuap aikotã waku taꞌatunug hap koꞌi wakuap koꞌi are.

2 Peteru 1:10

Pyno uheꞌywytꞌin uheinytꞌin eiwemuꞌe ro haty wo mekewat Tupana miꞌairo sio uito sio yt hap kuap ehepiat hamo are. Miꞌi hawyi ti aru eweimowato ro mekewat seko pakup i eiwanetup hawe hawyi ti aru eweikuap taꞌyn -Pywo ti rat uito Tupana emiit no areineꞌen e hap eweikuap. Uito ti Tupana miꞌairo areineꞌen hap eweikuap. Miꞌi hawyi ti aru eweimowato mekewat seko pakup i eiwanetup hawe uiꞌe hap ewy. Miꞌi hawyi ti aru eweikuap kahato raꞌyn -Pywo ti Iesui watnuat uito hap eweikuap are. Miꞌi pote ti aru yt karãpe i raꞌyn eweiꞌatoiat mekewat ahehakyeraꞌat hap mohey hap kaipyi.

2 Peteru 1:19

Saꞌawyꞌi wuaria Tupana ehay moherep haria tiꞌatumuꞌe kahato Tupana Mipoꞌoro Aiporekuat nuat ete. Mesup wẽtup ihay poꞌog hesaika miꞌiria kai katupono koitywy Iꞌywot ihay atipy kaipyi uruehamo -Miꞌi ti Uhaꞌyru sese uimowepiit hat sese Miꞌi Miit e atipy kaipyi ahowawi. Taꞌi Tupana kaipywiat ti sehay poꞌog hesaika torannia iraniaꞌin mienoi koꞌi kai are. Miꞌi pote waku watomohey kahato miꞌi e hap katupono miꞌi Tupana wẽ kaipywiat sehay sese are. Pywuat sese ti topyhuꞌat miꞌi e hap poꞌog torannia kai are. Miꞌi tupono eiwanetup kahato o mio tã e Tosaꞌyru piat hap kape are uiwyriaꞌin e. Katupono ti mekewat sehay ti Tupana ehay moherep haria timoherep kahato Tupana Mipoꞌoro Aiporekuat nuat hap etiat. Aikotã ariãty iꞌypyryp wiat hẽtyhot hap ewywuat. Pyno miꞌi sehay eweikuap eipyꞌa pe Tupana Saꞌyru hap miꞌi hawyi aikotã aat tuwemoherep hune pyi hẽtyhot tuerut hap ewy eipyꞌa pyi wyti aru hẽtyhot hap tuwemoherep are. Aikotã waikiru wato tuwẽtem hunete miꞌi hap ewy eipyꞌa pyi tuwẽtem hẽtyhot tuerut eweimohey raꞌyn Iesui Tupana Saꞌyru hap hawyi.