1 Peteru 5:12 - Sateré-Mawé

¹² Pyno uito Siwanu atunug mesuwat miwan. Peteru wẽ pyi atiwan yne mesuwat sehay. Uhet wyti Siwanu. Uito areineꞌen aikotã eheywyt eikywyt yt eimaꞌat hat hin i ewywuat i areineꞌen. Atipoꞌoro mesuwat Peteru miwan Peteru e hap ehewowi uimiwan miat. Yne miitꞌin tikuap uimiwan aikotã aikotã atunug hap. Taꞌi heremo kahato uimiwan kaipyi uwe uito hap. Yt iwato hin i uimiwan. Pyno pywo kahato aimuꞌe mesuwe Peteru. Uiꞌe hap ewy kahato toꞌe mesuwe. Areꞌe Peteru e hap ewy uito. Taꞌi watopyhuꞌat ahãꞌãg hap turan wahoꞌopot turan miꞌi pote watopyhuꞌat wuatꞌi eꞌat pe Tupana mipoityro koꞌi wo. Tupana aikyꞌe kahato pote waku watopyhuꞌat yꞌam me hap ewy suraraꞌin ewy. Yt karãpe i watoiat aikyꞌe hat hegyiꞌat kahato pote are.

1 Peteru 5:12 ပူးပေါင်းရင်းမြစ်များ

Iuwãu 21:21

-Kat aru aiꞌokpe kawiat emiit tunug mehin e.

Iesui Potmuꞌeria 11:23

Putꞌok toꞌe hawyi iwepiit kahato topyhuꞌat -Taꞌi Tupana tiꞌatukyꞌe kahato mesuwat ywania aikotã toiꞌatukyꞌe uruꞌywania hap ewy kahato e Panape tuwepe -Taꞌi tutum neꞌen neꞌi Topaꞌãu mesuwat wẽtup ywania pe aikotã tutum uruꞌywania piat pe hap ewy te e toꞌywania Iuteu pe. Miꞌi hawyi toꞌe Tupana pe haty wo -Waku kahato ti rat En Tupana e. Pywo ti rat yt uwe i poꞌog hegyiꞌat rakat ekai Tupana e Panape. Miꞌi hawyi Panape topyhuꞌat potꞌi tawa Antiokia pe hawyi toiꞌatunapin kahato Iesui mohey haria ipakup takaria -Mehinꞌin manaꞌin e eweimohey ro eikuꞌuro hap kape Aipotypot Iesui eipyꞌa pe e. Yt eiwemoti teiꞌo Aikaꞌiwat ehay pupi e Kereku pusu kuap haria pe.

Iesui Potmuꞌeria 15:22

Miꞌi hawyi torannia Iesui mohey haria teꞌeroꞌe toꞌope 12 ok takaria wywo taꞌatuꞌakagnia wywo -Pyno waku aimiꞌairoria watiꞌatupoꞌoro uhyt Pauru uhyt Panape upi tawa Antiokia kape miꞌi aiꞌe hap enoi iraniaꞌin miat hamo iꞌatuꞌe. Miꞌi hawyi taꞌatuꞌairo uhyt Iuta Pasapa e hap het rakat hawyi uhyt Sira taꞌatuꞌairo miitꞌin wakuaria taꞌatupyꞌasetpiaria.

Iesui Potmuꞌeria 20:24

Maꞌato yt arekenꞌẽ hin i uikuꞌuro hap pupi katupono atunug yne teran kat kat som motpap Aikaꞌiwat Iesui miium uhepiat uipoꞌoro hap koꞌi. Miꞌi ti tutum sehay wakuap aikyꞌe Tupana piat hap uimienoi wuat. Miꞌi pote ti atunug yne teran e Pauru.

Humanu 5:2

Miꞌi pote -Worohoꞌomoieineꞌen kahato eipe mesuwat yi tote e Tupana mesup ahepe. Miꞌi pote -Uruimotypot kahato En Tupana urutoꞌe iꞌewyte urumimotypot En urutoꞌe. Meiũran aru urutukupteꞌen ewywo emotypot hap eꞌat pe hap uruimohey kahato miꞌi tã hamuat kape. Miꞌi pote waku kahato En urutoꞌe emowepiit hap mywo.

1 Kuriniu 15:1

Uiwyriaꞌin tawa Kurintiu piaria pyno mesup uito Pauru ahenoi teran poꞌog mekewat saꞌawyꞌi wuat uimienoi hãpyk takat sehay etiat. Saꞌawyꞌi uiꞌe hap eweimohey haty wo hap ahenoi iraꞌyn teran ehepe. Uiꞌe hap saꞌawyꞌi wuat ewy yt atikyꞌesat i eweiwaure katupono miꞌi watomohey motꞌi hawyi Iesui mohey haria sese watopyhuꞌat.

2 Kuriniu 1:19

Saꞌawyꞌi mehin Sira mehin Timoteu iꞌewyte uito urutuwat ehewowi eimuꞌe hamo. Miꞌi hawyi itote uruiꞌatumuꞌe kahato aikotã Tupana tipoꞌoro Tosaꞌyru hap etiatno. Tupana motypot haria wo yn uruiꞌatumuꞌe eipe. Yt kat i urueso hap wywo uruiꞌatumuꞌe eipe. Miꞌi hap eꞌat pe urutunug aru urutoꞌe pote urutunug uruꞌe hap ewy. Yt typy sehay wywo hin i uruiꞌatumuꞌe saꞌawyꞌi eipe Iesui etiat uruhenoi raꞌyn.

2 Kuriniu 1:24

Kat pote Eikaꞌiwat sese yt uruto i. Miꞌi hawyi areꞌe uiwanetup hawe -Pyno yt kat hamo i areto are. Kat pote poꞌog waku eweikupteꞌen Eikaꞌiwat sese po pe hawyi yt areto i eiꞌapiheg hamo are.

Ewesu 3:3

Katupono mesuwe koitywy Tupana timoherep kahato uhepe saꞌawyꞌi wuat yt uwe mikuap i sehay toimoherep uhepe aikotã wẽtup ywania ipakup imohey haria tutunug hap. Taꞌi ipakup takaria tutunug mesup wuatꞌi ywania kawiat. Aikotã toꞌywania pakup tutunug mesup hap toimoherep mesuwe uipyhyp hawe uhepe. Waku kahato Tupana yt uwe i ipyhyp kuap are.

Ewesu 6:21

Pyno Aikaꞌiwat emiit sese Tikiku e hap het rakat atipoꞌoro ehewowi. Uhehay wywo atipoꞌoro aikotã aikotã areineꞌen mesuwe hap enoi hamo. Tikiku waku kahato atipuẽti. Miꞌi ti Tupana ehay yt iꞌatoiat hin i aheywyt sese aikywyt miit sese miꞌi.

Korosi 1:7

Gaꞌatpo mehin Epawai toineꞌen eipyꞌasetpe turan tohenoi kahato raꞌyn Tupana egyiꞌat hap etiat. Taꞌi miꞌi ti Aipotypot eropat hat sese uruto ewywuat kahato aipotpap upiat kahato uhyt Epawai. Iꞌewyte eiwoꞌomuꞌe kahato hat miꞌi. Yt ipohep hin i wakuat sehay enoi hap ete ehepe. Miꞌi kaipyi eweipuẽti raꞌyn Tupana egyiꞌat hap.

Korosi 4:7

Mesup atipoꞌoro ehewowi aikywyt aheywyt Tikiku. Waku kahato Tikiku uimikyꞌe kahato. Yt iperup hin i Tupana potpap nug hamo. Tikiku yt toiwaure hin i Tupana eropat hap. Aiꞌewy kahato ipotpap takat Tikiku Aikaꞌiwat potpap ete.

Korosi 4:9

Ehetawa piat Unesimu aru atipoꞌoro wy ehewowi. Aikywyt aheywyt kahato Unesimu. Iesui mohey kahato hat Unesimu. Putꞌok iꞌatuꞌe Unesimu Tikiku wywo hawyi taꞌatuhenoi kahato ehewowi kat som urutunug mesuwe hap koꞌi.

1 Tesaronika 1:1

Uito ti Pauru kuekatu sese atipoꞌoro ehewowi Iesui mohey haria kape tawa Tesaronika piaria kape are. Uiwyriaꞌin Iesui mohey haria mesuwat uimiwan atipoꞌoro ehewowi katupono atikyꞌesat kahato ti Tupana hegyiꞌat kahato ehepiat hap. Iꞌewyte atikyꞌesat kahato Tupana kaipywiat eiwoꞌowese hap. Pyno uito hawyi mehin Sira hawyi Timoteu wywo kuekatu urutoꞌe ehewowi uruwyriaꞌin tawa Tesaronika piaria kape. Mesuwat uruipoꞌoro ehewowi urumiwan Aiꞌywot Tupana Aikaꞌiwat Iesui hũria kape tomohey haria waꞌatunug haria kape.

2 Tesaronika 1:1

Uiwyriaꞌin Tawa Tesaronika piaria koitywy Uito Pauru atipoꞌoro uimiwan ehewowi iꞌewyte aiwy Sira aiwy Timoteuꞌin wywo kuekatu uruꞌe hap uruipoꞌoro ehewowi Aiꞌywot Tupana mepytꞌin Aikaꞌiwat Iesui emiitꞌin torannia kape.

Epereu 13:22

Pyno uiwyriaꞌin uheinytꞌin Iesui mohey haria atikyꞌesat eiwanetup kahato mesuwat uimiwan einapin hap kape. Ewetum no ehewaure kaꞌa poꞌog poꞌog uimienoi kape. Uikyꞌe ehepiat pote eiwemuꞌe ro mesuwat uimiwan kurin kat ete. Yt iꞌywop hin i mesuwat uimiwan. Eweiꞌatumuꞌe yne iraniaꞌin uimiwan mo are. Uimiwan mesuwarote yt iꞌywop hin i are katupono atimohit kahato uhehay mesuwe.

1 Peteru 1:13

Uiwyriaꞌin meiũran ti aru Tupana tipoꞌoro Aiporekuat nuat. Tuwemoherep mesuwat yi tote i raꞌyn wuatꞌi ehamo. Miꞌi pote waku aiwanetup hap Ahehakyeraꞌat hat kape yn watuwanetup. Yt naku i aiwanetup hap kowoꞌi kowoꞌi neꞌi. Waku wahekatup kahato Aipotypot huut hap kape iwemoherep hap kape katupono mekewat eꞌat pe tuut irane Ahehakyeraꞌat hat. Miꞌi hawyi iwese kahato ahete hegyiꞌat kahato ahepe tomohey haria aito pote. Miꞌi pote waku aikotã watopag aiweꞌok kytyt hap aipiit ete ahesokpe moheg hamo miꞌi hap ewy waku watimoheg kahato aiwanetup hap Iesui kape yn hap ewy are ehepe uiwyriaꞌin. Uito ti Peteru are.

1 Peteru 4:10

Pyno Tupana tum ahepe tesaika hap wakuat moherep hamuat miitꞌin powyro hamuat. Yt toꞌoꞌewy hin i tutum ahepe tesaika hap. Pyno kat som watipuẽti Tupana esaika hap kaipyi waku watimoꞌẽ iraniaꞌin me. Kat som watikuap waku rakat pyno waku wahenoi iraniaꞌin me Tupana mienoi hepiat koꞌi. Waku watipowyro iraniaꞌin aipo wywo Tupana miium aimisepap koꞌi wywo aikotã Tupana piat aimuꞌe hap ewy. Watikuap pote waku watiꞌatupowyro iraniaꞌin aimisepap koꞌi wywo aikotã Tupana aimuꞌe hap oktan. Aimisepap koꞌi yne Tupana miium koꞌi tukupteꞌen yne aimikuap koꞌi Tupana aimuꞌe hap koꞌi. Yt kat saꞌup i tutum ahepe pote waku watum miitꞌin me yt kat saꞌup i. Waku watopyhuꞌat Tupana eropat haria wo wakuaria ewy. Waku Tupana miium watimoꞌẽ iraniaꞌin me ahegyiꞌat kahato hap wywo aikotã Tupana hegyiꞌat hap ewy.

2 Peteru 1:12

Miꞌi pykai yt uipohep hin i eimoweꞌeg hamo. Yt eweiwaure teiꞌo Tupana piat einapin hap koꞌi are yn katupono eweikuap taꞌyn saꞌawyꞌi te. Miꞌi tupono poꞌog waku watikuap pakup i hap poꞌog waku. Waku watikuap kahato aipyꞌa pe.

2 Peteru 2:15

Taꞌi miꞌiria ti muap hãpyk takat atoiat haria wo teꞌeropyhuꞌat. Aikotã gaꞌapy piat hoꞌowasat rakaria ewy tukupteꞌen. Mekewat Tupana ehay moherep saꞌag hat Parãu e hap Posu saꞌyru upiaria miꞌiria. Kat pote Parãu ti haꞌup etiat Tupana ywania maꞌat hat -Pyno haꞌup ewetum uhepe pote kat e kat e hap saꞌag atunug e hat miꞌi. Maꞌato inug saꞌag hat ete Tupana ihay pirik kahato neꞌi. Waĩꞌe kahato neꞌi Tupana mekewat ete.

3 Iuwãu 1:12

Atikyꞌesat en wakuat nug hatno ereineꞌen katupono wakuat nug hatno yn Tupana watnuat. Uwe uwe inug saꞌag miꞌi hat yt Tupana kuap i hat sese. Yt karãpe i Tupana toineꞌen ipyꞌa pe. Maꞌato toineꞌen wẽtup ok eipyꞌasetpe Temetiu e hap het rakat yne Iesui mohey haria mimotypot. Miꞌi wyti pywuat sehay iãꞌãkap yne pywuat sehay enoi haria mimotypot miꞌi. Iꞌewyte uimimotypot miꞌi. Uruimotypot kahato miꞌi are.

Iuta 1:3

Uimikyꞌe kahato koꞌi eipe. Saꞌawyꞌi arehaypoꞌoro teran ehewowi aikotã Iesui ahehakyeraꞌat hap kuap hamo. Uimiwan ehowawiat nuat atunug neran maꞌato Tupana Paꞌãu -Yt etiwan neiꞌo miowat Iuta e uhepe. Apuete Iuta maꞌato waku etiwan wẽtup aikotã aikotã hap etiat e uhepe. Waku wẽtup sehay yn naꞌyn etipoꞌoro uimohey haria pe. Miꞌi hawyi worohoꞌomuꞌe teran Tupana Paꞌãu mienoi uhepiat ewywuat yn naꞌyn. Pyno koitywy eipe Iesui miꞌapykok yne. Koitywy uimiwan me worohoꞌonapin Tupana Paꞌãu e hap einapin hamuat wo. -Uimepytꞌin atikyꞌesat kahato eweimoheg eipyꞌa pe Uhaꞌyru mohey hap e Ipaꞌãu ahepuo are. Yt eipohep neꞌi teiꞌo imohey hap ete maꞌato eweimohey poꞌog poꞌog yne eꞌat pe Uhaꞌyru Iesui e ahepe. Aikotã saꞌawyꞌi eweimohey haty wo hap ewy poꞌog poꞌog eweimohey te wuatꞌi eꞌat kape e Tupana ahepe. Aikotã suraraꞌin tunug yne taꞌatuꞌakag koro ehay miꞌi haria ewywuat ro eweikupteꞌen Uhaꞌyru mikyꞌesat koꞌi nug hamo e Tupana Paꞌãu ahepe mesup are. Uito Iuta eiwy sese eimuꞌe raꞌyn are waku.