1 Peteru 3:8 - Sateré-Mawé

⁸ Pyno mesup ahenoi teran uiwenapin hap yne Iesui mohey haria pe. Mio tã are aikotã wẽtup miit ewy waku eweikupteꞌen eiwanetup hawe. Waku woꞌokyꞌe kahato haria wo eweikupteꞌen are. Waku eipyꞌa pe eiwoꞌokyꞌe eiwoꞌope are. Waku eiwoꞌokyꞌe Iesui mohey haria pote aikotã eheywytꞌin eheykeꞌetꞌin eheinytꞌin kyꞌe hap ewywuat are. Aikotã eikywytꞌin eikypyꞌytꞌin ehekiꞌitꞌin kyꞌe hap ewy wẽtup mepytꞌin sok ewy waku eiwoꞌokyꞌe are. Karãpe hoꞌopot hap putꞌok e wẽtup ok Iesui mohey hat ete hawyi etipowyro o miꞌi. Iꞌewyte karãpe iraniaꞌin hatek pote etipowyro miꞌi eipyꞌa pyi ikyꞌe hap wywo. Waku eweikupteꞌen eiwese kahato iraniaꞌin etiat rakaria wo. Waku eweiꞌe iraniaꞌin Iesui mohey haria pe -Wẽtup yn aimimohey uhyt mana eweiꞌe o are. Ereke uhyt mana mimi eweiꞌe. Eraꞌapyk o eweiꞌe. Miꞌi hawyi hegyiꞌat rakaria wo aru eweikupteꞌen Iesui mohey hap wywo are.

1 Peteru 3:8 ပူးပေါင်းရင်းမြစ်များ

Mateu 18:33

Miꞌi tupono waku etikyꞌe mekewat ewat epiat weteweru hat aikotã uito worokyꞌe kahato hap ewy.

Iruka 10:33

Miꞌi hawyi meiũran putꞌok e wẽtup ywania mekewat yi Samaria kaipywiat e. Yt Iuteuria ywania mikyꞌe hin i Samaria ywania maꞌato miꞌi pykai mekewat yi Samaria kaipywiat tehaꞌat kahato mekewat miꞌahyk ahyk kape hawyi toikyꞌe kahato topyꞌa pe.

Iesui Potmuꞌeria 2:1

Miꞌi hawyi 50 eꞌat Iesui guꞌuro pyi hap ete Iuteuria enuk wato hap eꞌat putꞌok e tawa Ierusarẽi me yahig wato sakpuat tokokaꞌat hap eꞌat kapiat taꞌatuwatetup hamo. Taꞌatueko wuatꞌi anu piat hap ewy. Miꞌi hap tote Iuteu ywania teꞌeruwaꞌatunug kahato kat e hap yi kat e hap tama kaipyi. Iꞌewyte Iesui mohey haria teꞌeruwaꞌatunug wy itote Iuteu ywania miꞌiria pote.

Iesui Potmuꞌeria 27:3

Heꞌihatꞌok pe putꞌok urutoꞌe tawa Sitau me. Miꞌi hawyi surara koro Iuriu iwese kahato tomipyhik Pauru ete -Waku ereto ewyriaꞌin yat kape e. Waku erenuk itote e Pauru pe.

Iesui Potmuꞌeria 28:7

Mekewat eꞌat pe yt pya i yẽpe kai tukupteꞌen go wato koꞌi yi ywypyiꞌa akag Pupiriu e hap het rakat wat. -Waku kahato urukaꞌiwat uruporekuat Pupiriu iꞌatuꞌe itotiaria ywypyiꞌa piaria. Ihatꞌok hawyi urutuwat raꞌyn morekuat Pupiriu yat wato kape. Putꞌok urutoꞌe itote hawyi meremo -Eiwehytꞌok to e uruepe. Miꞌi hawyi Pupiriu wywo urutokosap myẽꞌym eꞌat. Urutukupteꞌen waku kahato itote.

Iesui Potmuꞌeria 4:32

Miꞌi hawyi Iesui mohey haria woꞌokyꞌe kahato haria tukupteꞌen itote aikotã wẽtup miit ewy kahato iꞌatupyꞌa wasu hap. Taꞌi wẽtup miit ewy yn iꞌatuwanetup hap. Miꞌi hawyi iꞌatuegyiꞌat kahato rakaria wo tukupteꞌen itote. Miꞌi hawyi yt uwe i itote -Uiatnuat yn uhekat e hat topyhuꞌat iꞌatupyꞌasetpe katupono taꞌatumoꞌẽ kahato toꞌope kat koꞌi kat koꞌi iꞌatuekat e. -Taꞌi aiwatnuat topyhuꞌat yne uhekat yne uruekat mesup iꞌatuꞌe toꞌope katupono taꞌatukyꞌe kahato saꞌawyꞌi Iesui mohey haria itote.

Humanu 12:10

Waku woꞌokyꞌe haria wo watoineꞌen aikotã wẽtup ywania toꞌokyꞌe kahato hap ewy. Aikotã aheinytꞌin aheywytꞌin aheykeꞌetꞌin aiꞌywotꞌin aityꞌin toꞌokyꞌe kahato hap ewy aiwese hap wywo. Waku watoꞌokyꞌe katupono Tupana Mipoꞌoro mohey haria aito. Iesui eropat haria aito miꞌi pote waku watikat kahato aikotã waku watoꞌomotypot hamuat. Waku watoꞌe aiwanetup hawe -En ni waku. Miꞌi ti waku watoꞌe.

Humanu 15:5

Uiwyriaꞌin miꞌi tã kahato ahẽtup Tupana pe ehewowi -Uruꞌywot atipy piat En yn ni wuatꞌi uruwat uruꞌarot hap kaipywiat urumowepiit hat. En yn ni urumoesaika kuap hat yt karãpiat i ehay atoiat uruepiat hap ete. Urunug Esaꞌyru mohey haria wo pote wẽtup miit ewy yn uruwanetup hawe urupyꞌa pe hap ahẽtup epe. Tupana urunug no Esaꞌyru uruporekuat saipepiaria kahato wo hap ahẽtup ewowi are. Aikotã Esaꞌyru toineꞌen kahato mesuwe yi tote emotypot kahato hatno miꞌi hap ewy urunug no Esaꞌyru ewywuat mesuwe hap ahẽtup ewowi Tupana.

1 Kuriniu 1:10

Uheꞌywytꞌin uheinytꞌin pywo pe areꞌe ehepe Aipotypot Aikaꞌiwat Iesui ehay moherep hat ti uito are. Miꞌi tupono ahẽtup eiwoꞌoehay upi eweikupteꞌen. Miꞌi pote -Pywo pywo eweiꞌe eiwoꞌope hawyi eiwoꞌowehik kahato. Miꞌi hawyi wẽtup wanetup hap wywo yn eweikupteꞌen. Waku aiwoꞌoꞌewy yn watoineꞌen wẽtup mikyꞌesat upi yn hawyi sehay yt kat i aiwoꞌosytpok hap toineꞌen aikai.

1 Kuriniu 12:26

Karãpe wẽtup ahaga ete haty raꞌyn hawyi torannia aipiit ete raꞌyn haty. Iꞌewyte karãpe ahaga wẽtup ok timotypot -Ikahu kahato eha e hap ewywuat hawyi aipiit yne raꞌyn iwepiit.

Ewesu 4:2

Yt naku i watoꞌe aiwanetup hawe -Uito poꞌog iraniaꞌin imohey haria kai yt naku i watoꞌe. Pyno toꞌiro watoineꞌen hãpyk kahato rakaria wo. Waku watuwepotpap Aikaꞌiwat kape aiperupꞌi wywo yt kat i aipyꞌahak hap mywo waku are. Waku watimoherep iraniaꞌin miitꞌin kyꞌe hap yne aiminug koꞌi ete are. Waku watiꞌatukyꞌe iraniaꞌin yt iꞌatuwese i pykai.

Ewesu 4:31

Watimoꞌarot kahato Tupana Paꞌãu karãpe aipyꞌahak iraniaꞌin ete pote. Miꞌi pote waku watoiat mekewat yt naku i haiug nakaria are. Yt naku i watuwehum haryporia kape ihainia kape ipiit kyꞌesat hap wywo ahewaire teran hap wywo. Miꞌi watunug mote Tupana Paꞌãu aipiit pe iꞌarot kahato hap ewy are. Yt naku i watopotwesat ahehay pirik hap wywo ahehay saꞌag wywo. Yt naku i marakꞌa wo watoineꞌen. Miꞌi tã watoineꞌen mote miꞌi tã watunug mote Tupana Paꞌãu moꞌarot hat watoineꞌen.

Ewesu 4:32

Maꞌato waku watoineꞌen iwese kahato rakaria wo. Waku aiwoꞌowese hap ahehay perupꞌi popuo. Waku meremo watiwaure aimaꞌat hat aikotã Aikaꞌiwat waure wo tomaꞌat hap aiminug saꞌag kai toineꞌen hap ewy. Waku watukupteꞌen waure wo yne yne aimaꞌat hap koꞌi kai are. Uito ti Pauru. Worohoꞌonapin kahato waku iwese kahato rakaria wo Iesui ewywuat eweikupteꞌen are.

Wiripu 2:3

Uiwyriaꞌin yt naku i yt ehegyiꞌat i rakaria ewy eweikupteꞌen. Yt ewetunug teiꞌo -Uito poꞌog eiꞌe hamuat hap neꞌi are. Yt ewetunug neiꞌo -Uito poꞌog e hatno. Poꞌog waku watoineꞌen kurin hatno kahato iraniaꞌin motypot hamo. Yt eweiꞌe teiꞌo eipyꞌa pe -Uito poꞌog mekewat miit kai yt eweiꞌe teiꞌo eiwoꞌope e.

Wiripu 3:16

Karãpe watiꞌaparap miꞌi hap aru Tupana timoherep ahepe aiminug saꞌag hap koꞌi. Waku wateput aimikuap ewy Iesui mikyꞌesat hap oktan. Miꞌi turan Tupana aipowyro tesaika hamo seput poꞌog saꞌawyꞌi wuat kawiat haria wo.

Korosi 3:12

Waku watuwepainug hap ewy waku ahesokpe pakup watopag maꞌato wẽtup ahesokpe pakup woꞌokyꞌe hap kawiat. Wẽtup aipainug hap woꞌowese hap. Wẽtup aipainug hap -En poꞌog waku uikai e hap aiwanetup hawe. Wẽtup aipainug hap paa e hap. Wẽtup hap aipainug hap aiperupꞌi hap. Wẽtup Iesui mohey motꞌi hap. Miꞌi koꞌi wo waku watuwepainug are.

Epereu 13:1

Pyno toꞌiro watoꞌokyꞌe motꞌi uiwyriaꞌin Iesui mohey haria aito pote. Waku watoꞌokyꞌe aikotã wẽtup ok yat piaria ewy.

Tiaku 2:13

Tupana piat miitꞌin apiheg hap eꞌat putꞌok e raꞌyn turan miꞌi hap eꞌat pe wyti yt kat i raꞌyn Tupana kai iꞌatuehakyꞌeꞌi hap meimuẽ waria miitꞌin yt ehakyꞌeꞌi kuap i haria ete. Maꞌato iraniaꞌin woꞌohakyꞌeꞌi kuap haria kape yt kat i hin i aru iꞌatuꞌapiheg hap topyhuꞌat katupono Tupana tuwehum woꞌohakyꞌeꞌi kuap haria ete.

Tiaku 3:17

Maꞌato Aiꞌywot atipy piat iweꞌeg sakpo toineꞌen. Miꞌi ti aimuꞌe kahato aipyꞌa pe toweꞌeg hap yt ahiag wat ewywuat hin i. Mio tã e ahepe -Pywuat kahato eweikupteꞌen no Uiꞌewy e ahepe. Woꞌowese haria wo ro eweikupteꞌen e. Woꞌokyꞌe haria wo woꞌopowyro haria wo woꞌowesat kahu hanuaria uiꞌewy o eweikupteꞌen o e ahepe. Waku woꞌokyꞌe hap moherep hanuaria wo eweikupteꞌen e ahepe. Waku wakuat nug haria wo eipe e. Waku yt wẽtup ok i miit mohit hanuaria wo eweikupteꞌen no e ahepe. Waku yt typy ehay rakaria wo eweikupteꞌen e. Waku toꞌoꞌewyꞌewy wuatꞌi miitꞌin kyꞌe haria wo eweikupteꞌen e ahepe aimuꞌe kahato hat atipy piat Aiꞌywot.

Tiaku 5:11

Miꞌiria saꞌawyꞌi tokokaꞌat raꞌyn hoꞌopot hap sakpo. Miꞌi tupono koitywy Tupana miꞌatuewaku koꞌi wo tukupteꞌen eimiꞌatumotypot no raꞌyn tukupteꞌen. Watikuap taꞌyn ti aikotã nimo ahaꞌaseꞌi Io hoꞌopot potꞌi kahato hap maꞌato yt toiwaure hin i Tupana mohey tepiat hap. Imohey motꞌi hap poꞌog iwato hoꞌopot hap kai. Miꞌi pote hoꞌopot kahato hap sakpo tokosap aseꞌi Io. Miꞌi pote Tupana mipoitynug wo raꞌyn topyhuꞌat. Uiwyriaꞌin Tupana tikuap kahato ahepiat hoꞌopot hap. Taꞌi Aikaꞌiwat aikyꞌe kahato tohatyꞌu kahato ahepiat hoꞌopot hap.

1 Peteru 1:22

Uiwyriaꞌin karãpe Aipotypot suu topyhuꞌat aheha ete aipy ete aiwanetup hawe aipiit ete miꞌi hawyi ikytsig kahato rakat ewy topyhuꞌat aikai. Yt saꞌawyꞌi wuat aiminug saꞌag koꞌi ewywuat hin i. Miꞌi hawyi waku watunug yne Tupana mimoherep tomikyꞌesat koꞌi pywuat koꞌi waku watunug. Yt watunug kuap i wen maꞌato Tupana Paꞌãu aimoesaika kahato mekewat pywuat sehay nug hamo are. Waku Tupana Paꞌãu ainug miitꞌin kyꞌe sese haria wo yt kat i aheso hap aipyꞌa piat miitꞌin kyꞌe hap wywo maꞌato aipyꞌa pyi miitꞌin kyꞌe sese hap yne ahesaika hap wywo. Waku watiꞌatukyꞌe miitꞌin Tupana Paꞌãu aimoesaika hap kaipyi are.

1 Peteru 2:17

Waku watiꞌatumotypot yne mesuwarotiat miitꞌin. Yt naku i watimohit mesuwarotiaria miitꞌin. Waku iꞌewyte watiꞌatukyꞌe kahato yne Iesui mohey haria aikotã wẽtup yat piaria ewy waku watukupteꞌen. Waku watoꞌokyꞌe aikotã watikyꞌe aheywytꞌin aheinytꞌin aheykeꞌetꞌin aikywytꞌin aikypyꞌytꞌin ahekiꞌitꞌin watikyꞌe hap ewy. Waku watimotypot kahato aheTupana yne aikyꞌe hap wywo. Waku tyryꞌwatoꞌe aipyꞌa pe Tupana pupi. Iꞌewyte waku watiꞌatumotypot kahato mesuwarotiat aiporekuaria are.

1 Peteru 5:5

Pyno uito Peteru atiꞌatunapin neran mesuwe kurumꞌin. Makuptiaria worohoꞌonapin neran eipe. Uiwyriaꞌin eweimotypot ro nagnia are. Ewetunug no eiꞌapykok haria mikyꞌesat koꞌi. Karãpe eiꞌapykok haria eipoꞌoro hawyi meremo ewetunug iꞌatumikyꞌesat koꞌi. Eweikupteꞌen no miitꞌin mimuꞌe koꞌi wo -Uimuꞌe ro eweiꞌe ro nagnia pe. Eweimotypot ro iraniaꞌin eiwoꞌomotypot eiwoꞌope are ehepe. Eweiꞌatoiat ro mekewat -Uito poꞌog iraniaꞌin kai e hap. Miꞌi hawyi aikotã watopag sokpe pakup hap ewy eweipag wẽtup wanetup hap ikahu rakat eipyꞌa pe mekewat -Atikuap teran uhyt mana e hap mekewat -Uimuꞌe ro e hap mekewat paa eiꞌe hap wywo eiwepainug o aikotã sokpe pakup hap ewy. Katupono -Uito poꞌog iraniaꞌin kai e hat Tupana mimohit no aru topyhuꞌat. Tupana yt tikyꞌesat i -Uito poꞌog iraniaꞌin kai e haria wo watukupteꞌen. Maꞌato paa e haria kape yn tehaꞌat. Miꞌiria pe tutum kahato hegyiꞌat hap kaipyi tekat yne tomimotypot koꞌi pe are.

2 Peteru 1:7

Miꞌi toineꞌen hawyi toikyꞌesat aiwoꞌokyꞌe sese hap aikotã watikyꞌe aheywyt aheinyt hap ewy aikywyt aikypyꞌyt hap ewy are. Miꞌi watunug kuap hawyi toikyꞌesat aiwoꞌokyꞌe potꞌi sese hap. Itag saꞌawyꞌi te wuat imohey hap kaipyi hap toikyꞌesat are.

1 Iuwãu 3:14

Saꞌawyꞌi watukupteꞌen ikuꞌuro rakaria ewy Tupana wanetup hawe katupono yt watikuap i ihay pote. Katupono yt kat i aikai Tupana aimoieineꞌen pakup i hap. Maꞌato mio watoineꞌen Tupana wywo katupono koitywy aiwoꞌokyꞌe hap toineꞌen. Maꞌato yt kat i aiwoꞌokyꞌe hap aikai pote ikuꞌuro rakaria ewy watoineꞌen Tupana wanetup hawe.