1 Peteru 3:21 - Sateré-Mawé

²¹ Miꞌi hap ewy kahato ahetꞌok hap topyhuꞌat. Yꞌy piat wateke aikotã Iesui ikuꞌuro hap ewy. Watuwẽtem yꞌy pyi hawyi aikotã Iesui tuwẽtem guꞌuro pyi hap ewy watoineꞌen. Maꞌato mekewat yꞌy yt aikoho kuap i aipit pit ok hap aiminug saꞌag koꞌi maꞌato ahetꞌok hap watunug hawyi yt kat i haty hap aiwanetup hawe kat pote Tupana mikyꞌesat ewy watunug aikotã Nuꞌe ewy yꞌy sakpo watuwat aheꞌyara puo hap ewy.

1 Peteru 3:21 ပူးပေါင်းရင်းမြစ်များ

Mateu 28:19

Miꞌi pote koitywy worohoꞌopoꞌoro eipe wuatꞌi ywania muꞌe hamo e. Miꞌi pote koitywy atimoꞌẽ raꞌyn ehepe uhesaika hap uhemiitꞌin pakup nug uhepiat hamo e. Eweiꞌatumuꞌe ro miꞌiria uiꞌe yne hap nug hamo iꞌewyte eweiꞌatusetꞌok uimohey pakup i haria Uiꞌywot set upi uhet upi Tupana Paꞌãu set upi e.

Maku 16:16

Uwe uwe uimohey haria wesetꞌok haria ti aru uimiehakyeraꞌat nuaria teꞌeropyhuꞌat e Iesui. Maꞌato yt uimohey i haria ti aru woꞌoꞌapiheg haria tukupteꞌen wuatꞌi eꞌat pe e.

Iuwãu 13:9

-Pyno Uikaꞌiwat yt uipy yn i ro etikoho maꞌato uipo uhowa etikoho ro wy e.

Iesui Potmuꞌeria 16:33

Miꞌi hawyi woꞌopyhik hat tiꞌatusei raꞌyn iꞌatuꞌahyk ahyk hawywiat iꞌatusuu iꞌatupiit etiat. Miꞌi hawyi huhywitip hap koꞌi toikoho yne e. Miꞌi tã tutunug hawyi Pauruꞌin hetꞌok taꞌyn yne iꞌyat piaria wywo yꞌy wo.

Iesui Potmuꞌeria 2:38

Miꞌi hawyi Peteru tiꞌatuwesat -Eweipun no eiminug yt naku i hap koꞌi hawyi eiwemorem no Tupana kape hawyi eiwesetꞌok to urukaꞌiwat set upi e. Miꞌi hawyi meremo Tupana tiporop yne eiminug saꞌag koꞌi e.

Iesui Potmuꞌeria 22:16

Koitywy kat poteĩ ereineꞌen motꞌi mesuwe e. Epoĩꞌam no hawyi eresetꞌok to e. Ehẽtup to Ekaꞌiwat pe -Uiminug saꞌag koꞌi etikoho yne ro mehin ere ro e Anania uhepe.

Iesui Potmuꞌeria 8:36

Miꞌi hawyi putꞌok iꞌatuꞌe yꞌy ete. Miꞌi hawyi Morekuat powyro hat toꞌe -Meiko yꞌy uhyt waku apo uhetꞌok en meikowat yꞌy pe e Wiripi pe.

Iesui Potmuꞌeria 8:37

Mio tã e pote -Taꞌi mehin e pywo etomohey Iesui toineꞌen Ehakyeraꞌat hat epyꞌa pe pote ti waku worosetꞌok e. Miꞌi hawyi toiwesat -Uhyt e pywo ti rat atomohey sakpoꞌe Iesui ti Aiporekuat nuat Tupana Mipoꞌoro e. Miꞌi Miit ti Tupana Saꞌyru sese atomohey kahato mehin e Wiripi pe. -Pyno waku e Wiripi.

Humanu 5:14

Wẽtup waĩꞌe hap yn Tupana tum Atãu me -Yt etuꞌu teiꞌo meiẽwat yp ywa e maꞌato miꞌi pykai tutuꞌu. Miꞌi hawyi meiũran ikuꞌuro Tupana e hap ewy maꞌato Atãu mepytꞌin koꞌi kai yt kat i Tupana waĩꞌe hap Atãu eꞌat kaipyi Muisei eꞌat kape. Yt kat i Tupana waĩꞌe hap maꞌato miꞌi pykai Atãuꞌin saꞌag nug haria kahato tukupteꞌen. Miꞌi tã hap taꞌyn watikuap katupono saꞌawyꞌi wuaria Atãuꞌin ikuꞌuro yne raꞌyn saꞌag nug haria pote Tupana e hap ewy. Miꞌi hawyi Tupana toꞌe -Pyno atipoꞌoro Wẽtup Ok Atãu ewywuat maꞌato Miꞌi Miit yt iꞌaparap hat i e.

1 Kuriniu 12:13

Ipatꞌok aito Iuteu ywania ipatꞌok wẽtup ywania aito ipatꞌok aito miit emiit ipatꞌok miit akag koꞌi maꞌato aito Iesui mohey haria pote Tupana Paꞌãu eiam aito. Miꞌi pote Tupana Paꞌãu ahetꞌok taꞌyn -Iesui piit eipe e raꞌyn ahepe.

1 Kuriniu 4:6

Miꞌi hap ewy ti uruto uiwyriaꞌin. Uito Pauru eimuꞌe hat iꞌewyte Apauru toineꞌen itote eimuꞌe hat. Waku eiwanetup kahato uruehay kape katupono wẽtup ehay yn urutoꞌe Iesui etiat yn uruimuꞌe eipe. Pyno atikyꞌesat kahato uruꞌewy eweikupteꞌen wẽtup sehay yn moherep haria Iesui moherep haria uruto ewy uruhẽku ewywuat urupusu ewywuat waku eweikupteꞌen hap atikyꞌesat urupotmuꞌeria. Urumimuꞌe wẽtup ok yn uruto typy ok pykai. Yt naku i eweiꞌe Uito Pauru mimuꞌe hawyi wẽtup ok -Uito yt Pauru upi i maꞌato uito Apauru upi uito paĩ an yt naku i eweiꞌe katupono Apauru uito wẽtup miit ewy hawyi wẽtup sehay yn eimuꞌe Iesui Aimimotypot moherep hap yn uruehay. Yt naku i watimohit wẽtup ok aimuꞌe hat hawyi yt naku i watunug wẽtup ok aimuꞌe hat Tupana wo e.

2 Kuriniu 1:12

Yt karãpe i uruiꞌatumaꞌat eipe tawa Kurintiu piaria. Poꞌog hãpyk torannia kai hap ewy urutukupteꞌen eipyꞌasetpe. Tupana motypot hap yn urutunug itote. Yt uruweꞌeg hap kaipyi i urupotpap ehehamo maꞌato Tupana urumoweꞌeg hap kaipyi uruimotypot Tupana miitꞌin pyꞌasetpe. Yt uruhepap hap kaipyi i maꞌato Tupana tum uruepe tegyiꞌat hap tomisepap nug kuap hamo hawyi hesaika hap wywo uruimoherep wakuat itote saꞌawyꞌi. Miꞌi pote uruminug ete Tupana urupowyro hap kaipyi uruimotypot Tupana itote saꞌawyꞌi. Miꞌi hawyi miitꞌin teꞌeruwehum kahato Tupana kape. Yt uruewawi i maꞌato Tupana kape yn teꞌeruwehum uruminug wakuat upi. Miꞌi hawyi Tupana kape teꞌeruwehum hawyi urumowepiit kahato kat pote uruminug kaipyi Tupana motypot hamo urutukupteꞌen mote.

2 Kuriniu 7:1

Eiꞌywot areineꞌen e Tupana ahepe. Worohoꞌomuꞌe eipe uimepytꞌin wo aheTupana Koro e. Miꞌi pote uimikyꞌe koꞌi eweipyhuꞌat e Tupana ahepe. Pyno waku watuwehik kahato Tupana ete imepytꞌin aito pote. Waku watimotypot kahato Aiꞌywot Koro yt kat i aiminug saꞌag wywo. Waku watokenꞌẽ ahepiat inug saꞌag hap pupi kat pote Tupana ehamo watoineꞌen pote. Yt naku i watuwat aipiit mikyꞌesat saꞌag upi neꞌi iꞌewyte aiwanetup saꞌag hap upi neꞌi. Yt naku i watuwanetup poꞌog ahetupanaria saꞌawyꞌi wuat kape neꞌi. Waku watoꞌe Tupana pe -Uiminug saꞌag koꞌi aikotã uipiit ipit pit sese hap ewy. Miꞌi hap ewy uiwanetup hap ipit pit kahato. Uipiit pit ok hap pote aremoti kahato uiminug saꞌag pupi waku watoꞌe Tupana pe.

Karasia 3:27

Aito miitꞌin aiwoꞌoꞌewy wẽtup miit yn watoineꞌen. Wẽtup miit set wywo watopyhuꞌat Iesui mohey hat set wywo watoineꞌen mio. Aiwesetꞌok hawyi aikotã Iesui ewy raꞌyn watoineꞌen.

Ewesu 5:26

Miꞌi hawyi tomohey haria yne tutum Toꞌywot po pe -Ewatno mesup e tope. Atiꞌatumuꞌe raꞌyn miꞌiria ehay nug hamo e. Miꞌi pote wei haria ewy tukupteꞌen yt iꞌatupiit pit hin i e.

Korosi 2:12

Iuteu ywania emurui ãpy tek -Uito Iuteu ywania e hamo maꞌato aito Iesui mohey haria ahetꞌok yꞌy wuat hamo watimoherep Iesui mohey hap. Min watoꞌe yꞌy pe turan Iesui syp hap watimoherep ahetꞌok hawe. Aiminug saꞌag koꞌi kaipywiat aihep Tupana piat hap watuwẽtem yꞌy pywiat hawyi. Watimoherep Tupana tihep taꞌyn Iesui guꞌuro pyi hap tesaika hap no watimoherep ahetꞌok hawe. Aiminug saꞌag nug hap pywiat aihep Tupana piat hap watimoherep ahetꞌok hawe.

1 Timoteu 1:5

Yt naku i ti watuꞌuka sehay potꞌi ete ereꞌe o itotiaria pe katupono Tupana tikyꞌesat aiwoꞌowese ahehay wuat hap ereꞌe o iꞌatuepe. Wẽtup wanetup hap wywo yn waku watoꞌokyꞌe ereꞌe o. Yt iꞌatuekat kyewi i ti watopotkyꞌe ereꞌe o. Waku watoꞌokyꞌe wẽtup sok yn aito Iesui mohey haria aito pote.

1 Timoteu 6:12

Karãpe wateput yn hawyi meiũran watuwepokuap kahato miꞌi hap ete. Miꞌi hawyi putꞌok watoꞌe iraniaꞌin eꞌyian mete. Miꞌi hap ewy waku watoineꞌen Tupana mohey hap ete. Meiũran putꞌok watoꞌe Tupana ete wuatꞌi eꞌat piat aheineꞌen iwywuat hap tote. Miꞌi hamuat kape haꞌawytepyi te aikay kay karãpe -Woromohey En Iesui ere tope haty wo wuatꞌi Iesui mohey haria ehamo turan.

Epereu 10:22

Pyno toꞌiro Tupana kape uiwyriaꞌin. Waku watipun ahehay aheso hap koꞌi wateke Tupana wywuat piat hamo. Waku yt kat i aipyꞌa piat aheso hap. Miꞌi hawyi yt kat i aimowemoti hap wywo wateke. Toꞌiro pyno Tupana ewowi. Waku watipen aiwanetup hap aipyꞌa piat Iesui suu wo. Waku Iesui aipyꞌa sei hap Tupana tunug suu wo wateke. Waku yt kat i aiwanetup hap saꞌag aimoti hap wywo i waku wateke. Waku watuwei kahato mekewat yꞌy wakuat sese wuatꞌi eꞌat piat wat pe. Miꞌi hawyi waku wateke aipyꞌa sei hap wywo aikoho hap mywo aipiit toran koho hap mywo yn waku wateke Tupana ewowi uiwyriaꞌin.

Epereu 11:19

Pyno atiꞌauka rakirẽ Tupana timoieineꞌen i guꞌuro pyi toꞌe hap mywo toto. Maꞌato iꞌauka irane turan Tupana toꞌe -Aparãu yt etiꞌauka teiꞌo Isaki. Waku raꞌyn koitywy worokuap sese hap atikuap taꞌyn mesup uimohey kahato epiat hap e. Miꞌi hawyi tutum Aparãu me Isaki i raꞌyn Tupana tum. Miꞌi hawyi Isaki topyhuꞌat Iesui iãꞌãkap ewy katupono Isaki aikotã tuwẽtem i guꞌuro pywiat hap ewy topyhuꞌat. Koitywy atikuap uimohey hap e Aparãu me Tupana.

Epereu 13:18

Pyno ewehẽtup i hẽtup i urupowyro hamuat uruwyriaꞌin Tupana kape. Urutunug neran wakuap yn wuatꞌi eꞌat pe. Yt kat i uruminug saꞌag upi urutuwemoti Tupana ehamuat hap uruikyꞌesat. Iꞌewyte yt kat i uruminug saꞌag upi urutuwemoti miitꞌin ehamuat hap uruikyꞌesat. Urutoineꞌen neran hãpyk kahato miitꞌin pyꞌasetpe yt uwe pupiat i uruwemoti hap mywo. Miꞌi pote ewehẽtup uruupi Tupana pe uruieineꞌen hap ikahu rakat nug hamo.

Epereu 9:14

Maꞌato Aikaꞌiwat Iesui suu poꞌog hesaika yn suu kai mohag wo. Saꞌawyꞌi Aikaꞌiwat tum yne topiit Tupana pe ahaꞌup mo. Saꞌawyꞌi ikahu rakat aihũ yn waku aimiium mo yt kat i hatek takat yt kat i iꞌahuu hap rakat. Ipe kyt hap ihãite sese rakat yn ni waku e. Miꞌi hap ewy Iesui poꞌog waku mohag wo katupono yt kat i saꞌag tuete Tupana tipuẽti. Ihãite putꞌok e kahato turan tutum topiit. Pyno koitywy watomohey Iesui hawyi Aihũ Aimiium Tupana piat hap ewy topyhuꞌat. Miꞌi watum Tupana pe hawyi yt kat i hin i aheha yi kape hap. Yt kat i aiwemoti hap aiminug saꞌag kapiat hap ete. Aihũ Aimiium Ikahu Rakat Iesui pote.

Epereu 9:24

Miꞌi suu aat hawyi toineꞌen muap uimotypot yat atipy piat teke hamo. Miꞌi hawyi uiwywo topyhuꞌat eipaꞌi wato wo. Mesuwarotiat miitꞌin minug taꞌatupo wuat uimotypot yat pe i teke kuap maꞌato mesuwe atipy pe teke tosuu topo etiat wywo e Tupana ahepe.

1 Peteru 1:3

Saꞌawyꞌi Aipotypot Iesui ikuꞌuro hawyi Tupana timoieineꞌen guꞌuro pyi. Saꞌawyꞌi yt watomohey hin i aikuꞌuro hawywiat aheineꞌen i hamuat hap. Maꞌato mesup koitywy watomohey kahato kat pote Aiꞌywot Tupana tihep taꞌyn Aikaꞌiwat ikuꞌuro hap kaipyi. Miꞌi pote koitywy -Waku kahato En Tupana. Poꞌog wakuat torannia kai urutoꞌe kat pote egyiꞌat kahato uruepe. Urukyꞌe kahato En. Poꞌog poꞌog torannia miitꞌin kai urukyꞌe hat En katupono etihep taꞌyn urukaꞌiwat hyp hawyi urutoꞌe.

1 Peteru 3:16

Uiwyriaꞌin waku watoiat yne aiminug koꞌi aiwanetup saꞌag hap koꞌi. Miꞌi hawyi waku ahewyry yt kat i haty aipyꞌa piat wywo aiwanetup hawiat aiminug saꞌag wywo. Miꞌi hawyi karãpe iraniaꞌin iꞌatuꞌe saꞌag kahato ahete iꞌatueso hap kaipyi yt kat i aiwemoti hap topyhuꞌat kat pote watikuap yt kat i saꞌag watunug pote. Watikuap Aikaꞌiwat Iesui mikyꞌesat ewy watunug mesuwarote pote.