1 Peteru 2:24 - Sateré-Mawé24 Pywo ti rat Aikaꞌiwat Iesui tuut irane kat pote yne aiminug aiꞌapiheg saꞌag koꞌi yne miitꞌin mesuwarotiaria minug saꞌag koꞌi topyhuꞌat Aikaꞌiwat piit pe. Mekewat ariaꞌyp tote tohoꞌopot kahato topiit ete. Tupana miꞌapiheg wo topyhuꞌat. Tuwepyi Aikaꞌiwat yne Tupana piat aiꞌapiheg hap aiminug saꞌag koꞌi u hamo tuut. Miꞌi hawyi aiꞌapiheg hap yne topyhuꞌat Iesui piit ete mekewat ariaꞌyp posak tote. Ipiit ete yne topyhuꞌat Tupana kaipywiat aiꞌapiheg hap koꞌi aiꞌahyk ahyk hap tutuꞌu yne. Haty kahato tuete. Miꞌi hawyi aimoehãite hamuat hap topyhuꞌat. Haty hap yne tutuꞌu yne hawyi ikuꞌuro aheiam me. Aikuꞌuro hap tutuꞌu yne. Miꞌi pote aito watoineꞌen ikuꞌuro rakaria ewy iwywo mekewat aiminug saꞌag ete. Yt ahesaika i poꞌog aito watoineꞌen. Aikotã ikuꞌuro rakat yt wahãꞌãg kuap i yt naku i nug hamo hap ewy. Miꞌi hap ewy watopyhuꞌat mesup. Maꞌato wakuat yn sake i watunug kuap mesup kat pote watuwẽtem guꞌuro pyi Aikaꞌiwat wywo hap ewy. Miꞌi hawyi waku nug haria wo watopyhuꞌat iwywo. အခန်းကိုကြည့်ပါ။ |
1 Peteru 2:24
50 ပူးပေါင်းရင်းမြစ်များ
Iesui tawa Nasare kaipywiat kape ti urutaꞌakasa kahato raꞌyn manaꞌin uhytꞌiꞌin e. Pywo ti Miꞌi Miit ehay yne ti uruikuap taꞌyn yi Iuteu piaria etama pe tawa Ierusarẽi me hewyry hap upi e. Miꞌi tote ti taꞌatuꞌauka saꞌag naꞌyn ariaꞌyp posak ete Tupana emiit e. Yt naku i kahato ti taꞌatunug uruwy pe e.
Koitywy Aipotypot Iesui emiit no watoineꞌen mote watopyhuꞌat Iesui ewy. Waku watuwanetup -Iesui kuꞌuro turan uikuꞌuro iwywo waku watoꞌe. Miꞌi pote uiminug saꞌag yne yt uhãꞌãg kuap i katupono uikuꞌuro iwywo wy uipiit mikyꞌesat saꞌag yt kat i koitywy waku watoꞌe. Iesui toineꞌen i guꞌuro pyi hawyi uito areineꞌen i guꞌuro pyi wy waku watoꞌe. Koitywy areineꞌen kahato iwywo waku watoꞌe. Tupana motypot hap wywo yn areineꞌen mesup watoꞌe katupono Iesui wywo wẽtup miit yn arepyhuꞌat waku watoꞌe.
Koitywy karãpe aipiit tikyꞌesat saꞌag nug hap aikotã watikyꞌesat saꞌawyꞌi hap ewy waku watuwewãi. Waku waĩ watoꞌe aipiit mikyꞌesat saꞌag kape. Waku waĩ watoꞌe aiwemikyꞌesat saꞌag ete -Yt erenug neiꞌo saꞌag nug hatno waku watoꞌe aipiit kape. Miꞌi turan waku watoꞌe Tupana pe -Atum epe uhaga koꞌi waku watoꞌe. Atikyꞌesat yne uipiit ewatnuat wo emikyꞌesat koꞌi nug hamo. Atikyꞌesat uipiit koꞌi ewaku hap nug hamo Tupana waku watoꞌe. Atikyꞌesat uheko koꞌi ipakup taꞌyn Tupana aikotã miit ikuꞌuro rakat tuwẽtem i guꞌuro pyi hap ewy uipiit pakup atikyꞌesat epotpap nug hamo Tupana watoꞌe waku.
Waku koitywy watikuap taꞌyn uwe po pe watoineꞌen. Aimikyꞌesat saꞌag aikaꞌiwat no watunug mote yt naku i nug hap aikaꞌiwat no topyhuꞌat. Maꞌato yt aipohep kuap i aiminug saꞌag ete pote saꞌag aikaꞌiwat no topyhuꞌat. Aiminug saꞌag yt watoiat kuap i hawyi meiũran aiꞌauka hatno topyhuꞌat. Maꞌato Tupana esaika hap mywo ainapin topiat hap watunug pote meiũran aru -Waku kahato eipe e Tupana ahepe wuatꞌi ehamo.
Maꞌato sakpoꞌe yt pywo i paĩ katupono aito Iesui mohey haria raꞌyn. Miꞌi pote ahãꞌãg hap putꞌok e ahete saꞌawyꞌi te wuat ewy pote waku yt watuwat i ahiag upi yt naku i nug hamo. Waku aikotã ikuꞌuro rakat sehay yt kuap i hap ewy waku yt watikuap i ahãꞌãg hap ete yt ahewaure kaꞌa i ikuꞌuro rakat ewy. Miꞌi pote yt watuwat kuap i aiminug saꞌag ahãꞌãg hap nug hamuat upi.
Saꞌawyꞌi aiminug saꞌag emiit no watopyhuꞌat. Miꞌi hawyi koitywy watopyhuꞌat Tupana emiit no raꞌyn. Koitywy Tupana po pe raꞌyn watopyhuꞌat. Waku kahato poꞌog Tupana po pe watopyhuꞌat katupono aheineꞌen mesuwarotiat hap Tupana motypot hap yn topyhuꞌat. Miꞌi hawyi aru toineꞌen aheineꞌen wuatꞌi eꞌat piat Tupana motypot hap.
Yt uiwekaipyi i saꞌawyꞌi worohoꞌomuꞌe maꞌato Tupana tum tesaika hap uhepe tehay wakuat moherep miitꞌin miat hamo pote sehay wakuat poꞌog torannia kai atimoherep ehepe Aipotypot Iesui ikuꞌuro ariaꞌyp posak ete aiꞌapiheg hap Tupana piat aiminug saꞌag koꞌi etiat. Aimoti hap koꞌi moma hamo ikuꞌuro itote aikawiatno aikotã Tupana toꞌe saꞌawyꞌi hap ewy aikotã miwan me toꞌe hap ewy ikuꞌuro raꞌyn.
Mio tã e saꞌawyꞌi Tupana tomohey haria pe -Eweiꞌatoiat ro tupanaria e. Yt eweikupteꞌen neiꞌo iꞌatuwywo e. Eweikupteꞌen pya iꞌatukai ro e. Yt eweiwat reiꞌo iraniaꞌin wywo iꞌatumotypot hamo e. Yt ewetemig neiꞌo miꞌiria katupono yt naku i kahato miꞌiria e Tupana. Uimikyꞌesat ewetunug mote uimepytꞌin wo eweikupteꞌen e. Iꞌewyte eiwehytꞌok uiꞌyat pe e Tupana ahepe Isaia 52.11 pe.
Taꞌi Tupana tikuap kahato aipyꞌa piat iꞌaparap hap koꞌi. Miꞌi kaipyi ariaꞌyp posak kape Tupana tipoꞌoro Tosaꞌyru aiꞌapiheg hap u hamo. Tosaꞌyru suu wo toihep tokuasa hap pya raꞌyn aikai. -Uwe ariaꞌyp ete tomosatꞌe pe ikuꞌuro miꞌi uikuasa topyhuꞌat e Tupana saꞌawyꞌi miitꞌin me. Pyno koitywy Tupana pyꞌahok hap yt kat i ahete aikawiatnuat ikuꞌuro raꞌyn ariaꞌyp ete pote. Miꞌi hawyi ikai toineꞌen naꞌyn iwese hap.
Aat ipotpap kahato aimikoi ete miꞌi pote aimikoi ihãite kahato. Miꞌi hawyi hewo kahato kat kat ywa. Aheꞌuꞌi raꞌyn aimiꞌu raꞌyn aat motpap hap kaipyi. Miꞌi hap ewywuat kahato karãpe Tupana Paꞌãu putꞌok e ahete turan ahehãite hap toineꞌen aipaꞌãu me. Miꞌi hawyi pywo e haria wo wotopyhuꞌat waku nug haria wo watopyhuꞌat hãpyk nug haria wo watopyhuꞌat aimikoi ihãite kahato hap ewy are.
Tupana etunug o miꞌiria waku nug hanuaria wo are. Etunug miꞌiria iꞌatuieineꞌen hap tote wakuat eiam mo kahato are. Atikyꞌesat miꞌiria aikotã Esaꞌyru Iesui ewaku hap ewy tukupteꞌen. Ewaku hap ewywuat wo etiꞌatunug miꞌiria. Tupana miꞌi etunug mote emotypot haria wo kahato tukupteꞌen miꞌiria are. Waku kahato En iꞌatuꞌe aru ewowi iraniaꞌin areꞌe Tupana pe. Pyno mio tã ahẽtup mesuwe ehetiatno Tupana pe.
Saꞌawyꞌi watopyhuꞌat weteweru wato kahato haria ewy. Aikotã aiweteweru hap wato turan aimoꞌarot kahato hap ewy. Miwan me iwato kahato topyhuꞌat hap ewy aiweteweru hap. Yt ikahu hin i ewy aiꞌakit hap topyhuꞌat. Miꞌi hap ewy aiweteweru hap saꞌawyꞌi aikotã yt karãpe i wahaꞌup nug kuap hap ewy. Miꞌi hawyi maꞌato -Atum yne miitꞌin weteweru hap saꞌup mo e Iesui Tupana pe. Miꞌi hawyi taꞌatumoheg Iesui ariaꞌyp posak ete. Toieineꞌen hap tutum aiweteweru hap saꞌup mo. Koitywy Tupana toꞌe ahepe -Yt kat i iraꞌyn ti mekewat miwan miat eweterut hap tuweityk taꞌyn e. Uhaꞌyru tum yne raꞌyn eiweteweru hap saꞌup Uhaꞌyru suu taꞌat yne hawyi ikuꞌuro ariaꞌyp posak ete e Tupana ahepe mesup taꞌyn.
Kat pote pyno mesup te eweiwanetup te miꞌiria ewywuaria are. Mesuwarotiaria -Urutuwehakyeraꞌat kuap rat aru e haria. Yt naku i mekewat miꞌu watuꞌu e haria. Yt naku i watemig mekewat iꞌatuꞌe. Yt naku i watopag aiwẽ pe mekewat ipuꞌi e haria. Miꞌi tã watunug mote yt wataꞌam i iꞌatuꞌe saꞌag ahiag ehay upi.
Watimohey Iesui hawyi wẽtup piit ewy watoineꞌen. Ikuꞌuro hawyi aikotã watoineꞌen ipiit pe hap ewy ikuꞌuro hawyi aikuꞌuro hap topyhuꞌat hap ewy. Tuwẽtem miꞌi pote watuwẽtem aito guꞌuro pyi hap ewy. Koitywy Aikaꞌiwat Iesui toineꞌen atipy pe Toꞌywot wywo i raꞌyn. Miꞌi hawyi aito ipiit pe watoineꞌen. Miꞌi pote waku yt kat i mesuwarotiat saꞌag koꞌi kape watuwanetup.
Miꞌi pote koitywy waku pe raꞌyn watoineꞌen Tupana ehamo. Imiewaku sese wo raꞌyn watopyhuꞌat aito katupono mekewat Tosaꞌyru piit ium hap kaipyi aimohãpyk hap toineꞌen. Tupana towaku hap ewy ainug. Aikaꞌiwat Aipotypot suu aat yi totiat hap kaipyi aimohãpyk hap toineꞌen mesup. Tupana tewaku hap ewy tutum ahepe. Haꞌyru haꞌup nug tosuu wo wẽtup mo yn. Yt kat i miꞌi rẽ katupono -Waku raꞌyn eipe e Tupana toran naꞌyn e.
Saꞌawyꞌi yt hãpyk i ahewyry maꞌato mesup ti hãpyk taꞌyn. Aheko saꞌag yt naku i nug hap aipy pik hap ewy waku watunug aipuꞌap ikahu rakat ewy aipy powyro hamo. Muap ewy waku watuwanetup Tupana kape aipy pikꞌe hap mog hamo. Miꞌi hawyi waku ahewyry iwywo o. Waku aipuꞌap yt iꞌanam hin i rakat ewy miꞌi hawyi yt wataꞌat kuap i. Aipy haty rakat yt hewyry kuap i muap iꞌanam nakat upi. Ahewyry itote hawyi wataꞌat merep iꞌanam kahato pote. Ahewyry raꞌyn poꞌog hawyi merep aipy iꞌahuu kahato. Yt karãpe i aipy waku. Muap iherep upi yn waku ahewyry hãpyk takat muap upi pote. Miꞌi hawyi aipy ihãite kuap. Miꞌi hap ewy aito waku wahewyry Tupana puꞌap upi maꞌato yt pote yt karãpe i ahehãite maꞌato ipy pik rakaria ewy yn wahewyry. Waku watoiat muap saꞌag saꞌawyꞌi wuat aiminug yt naku i hap iꞌaparap aparap hap aiwanetup saꞌag koꞌi hap.
Miꞌi miit ti waku kahato Ahepaꞌi Wato wo katupono aikawiatno hat aiwy kahato topyhuꞌat. Aimikyꞌesat toikuap kahato. Poꞌog poꞌog waku iraniaꞌin paꞌi koꞌi kai. Yt uwe i poꞌog Miꞌi Miit kai. Tupana ewywuat wanetup hat Miꞌi Miit. Tupana ewywuat wakuat nug hat Miꞌi Miit Iesui. Miꞌi pote Ahepaꞌi wo waku kahato. Yt aimaꞌat kuap i. Yt aiꞌaparap kuap i. Iꞌewyte yt uwe i iꞌaparap kuap teko saꞌag wo. Waku kahato Ahepaꞌi Wato wo. Yt karãpe i toiꞌaparap iraniaꞌin miitꞌin ewy aiꞌewy. Pywo ti rat poꞌog poꞌog waku wuatꞌi paꞌi koꞌi kai Ahepaꞌi wo Iesui iraniaꞌin iꞌaparap aparap haria neꞌi pote. Tupana Mimotypot sese Ahepaꞌi pakup. Yt uwe i atipy pe poꞌog miꞌi rẽ Tupana Mimotypot kai -En poꞌog poꞌog atipy piaria kai e Tosaꞌyru pe yn. En poꞌog poꞌog rakat torannia kawiat e Iesui pe.
Miꞌi hawyi yt karamuo i ikuꞌuro i raꞌyn Uhaꞌyru katupono wẽtup mo yn miitꞌin ikuꞌuro e. Miꞌi pote Miꞌi Miit Uhaꞌyru wẽtup mo yn ikuꞌuro hawyi mesup huut hap yn naꞌyn toineꞌen aru emiekatup e. Saꞌawyꞌi tokuꞌuro hamo tuut miitꞌin kape e. Maꞌato meiũran aru yt tokuꞌuro hamo i tuut tohekatup haria kape. Katupono Uhaꞌyru yt typuat ikuꞌuro rakat i e. Uhaꞌyru tuut wyti aru tomiehakyeraꞌat koꞌi moherep hamo e Tupana ahepe Tosaꞌyru Iesui ete.
Miꞌi pote waku wahenoi aiwoꞌope aiminug saꞌag koꞌi iꞌewyte waku wahẽtup kahato Tupana kape aiwyriaꞌin kawiatno hamuat. Wahẽtup aipyꞌa pyi pote aiwoꞌopoityro kahato hap ewy topyhuꞌat ahete aiwoꞌokyꞌe hap ewy aiwoꞌope. Miꞌi hawyi toineꞌen kahato aimoehãite kahato hap Tupana kaipywiat hap. Aipyꞌa hãpyk kahato Tupana wywo hawyi meremo tutum aimiẽtup niatpo kahato rakat pykai. Meremo tutum waku miẽtup koꞌi.
Yꞌy wyti ihyeput muap pyꞌasetpuo areꞌe. Yꞌy ẽpe ete wyti ariaꞌyp koꞌi kokai kokai ikahuria kahato rakaria tukupteꞌen areꞌe. Iꞌywa koꞌi hewo kahato maꞌato yt toꞌoꞌewy hin i hewo tuereto kat kat ywa koꞌi. Wẽtup ewaty wẽtup ywa hewo hawyi wẽtup waty hawyi wẽtup ywa hewo tuereto. 12 wo hewo wẽtup 12 waty pe. Watuꞌu mekewat kat kat ywa koꞌi hawyi aimoieineꞌen wuatꞌi eꞌat aipiit ipakup wuatꞌi eꞌat pe hap topyhuꞌat. Iꞌyhop koꞌi mohag ewy wuatꞌi ywania moehãite hamo.
ကြော်ငြာတွေ