1 Peteru 1:22 - Sateré-Mawé

²² Uiwyriaꞌin karãpe Aipotypot suu topyhuꞌat aheha ete aipy ete aiwanetup hawe aipiit ete miꞌi hawyi ikytsig kahato rakat ewy topyhuꞌat aikai. Yt saꞌawyꞌi wuat aiminug saꞌag koꞌi ewywuat hin i. Miꞌi hawyi waku watunug yne Tupana mimoherep tomikyꞌesat koꞌi pywuat koꞌi waku watunug. Yt watunug kuap i wen maꞌato Tupana Paꞌãu aimoesaika kahato mekewat pywuat sehay nug hamo are. Waku Tupana Paꞌãu ainug miitꞌin kyꞌe sese haria wo yt kat i aheso hap aipyꞌa piat miitꞌin kyꞌe hap wywo maꞌato aipyꞌa pyi miitꞌin kyꞌe sese hap yne ahesaika hap wywo. Waku watiꞌatukyꞌe miitꞌin Tupana Paꞌãu aimoesaika hap kaipyi are.

1 Peteru 1:22 ပူးပေါင်းရင်းမြစ်များ

Iuwãu 15:17

Miꞌi pote atikyꞌesat kahato eiwoꞌokyꞌe kahato hap e. Eiwoꞌokyꞌe ro eiwoꞌope e.

Iuwãu 15:3

Miꞌi hap ewy kahato einapin uhepiat hap timohãpyk kuap kahato eiwanetup hap imokytsig hamuat e. Miꞌi hawyi ehehãite eweikupteꞌen eipyꞌa pe eiwanetup hawe einapin uhepiat hap hawyi e.

Iuwãu 17:17

Papai waku iꞌatukawiatno hat ereineꞌen ehay pywuat kawiat upi. Miꞌi hawyi waku etiꞌatupoꞌoro mesuwat mytyyp totiat miitꞌin kape ehay moherep hamo aikotã uipoꞌoro raꞌyn mesuwat mytyyp kape emoherep hamo hap ewy are e.

Iuwãu 17:19

Pywo Papai epo pe areineꞌen emikyꞌesat ewy nug hamo. Miꞌi hawyi atikyꞌesat wy uhemiitꞌin epo pe teꞌeropyhuꞌat eimikawiatno sese wuaria wo e.

Iesui Potmuꞌeria 15:9

Taꞌi toimohãpyk yne wyti iꞌatuwanetup saꞌag hap koꞌi Tosaꞌyru mohey raꞌyn hawyi e.

Iesui Potmuꞌeria 6:7

Miꞌi hawyi hãpyk kahato meimuẽwat 7 ok takaria timoꞌẽ miꞌu hiwu sese koꞌi pe. Miꞌi pote Iesui potmuꞌeria sese 12 ok takaria tiꞌatumuꞌe aat kaꞌap miitꞌin yne Iesui mikyꞌesat nug hap ete. Miꞌi hawyi yne tawa Ierusarẽi miaria pe taꞌatumoꞌẽ kahato Tupana ehay. Miꞌi pote typyꞌi kahato raꞌyn imohey pakup i haria itote tukupteꞌen. Iꞌewyte iꞌatu kahato Iesui mikyꞌesat yn nug haria tukupteꞌen itote. Miꞌi turan paꞌiria sem iꞌewyte teꞌeropyhuꞌat Iesui mohey haria wo raꞌyn itote.

Humanu 1:5

Tosaꞌyru mohey hawyi Tupana iwese kahato uhete. Mio tã e uhepe -Woronug en mehin uhemiit sese wo e. Atikyꞌesat miitꞌin tukupteꞌen torannia Uhaꞌyru mohey haria wo e. Atikyꞌesat kahato Uhaꞌyru taꞌatunug Taꞌatuporekuat no hap. Miꞌi haype woropoꞌoro en iꞌatumuꞌe hamuat e Tupana uhepe.

Humanu 2:8

Maꞌato iraniaꞌin yt tomohey i haria pe aru tutum iꞌatuꞌapiheg wuatꞌi eꞌat piat katupono taꞌatumikyꞌesat yt naku i hap ewy yn taꞌatuꞌatunug aat kaꞌap. Yt taꞌatunug hin i Tupana mikyꞌesat ewywuat koꞌi pote Tupana miꞌapiheg koꞌi teꞌeropyhuꞌat wuatꞌi eꞌat pe e. Tupana mopyꞌahak teran hap yn taꞌatunug mote Tupana miꞌapiheg koꞌi wo teꞌeropyhuꞌat wuatꞌi eꞌat pe e. Yt naku i nug haria toran toiꞌatuꞌapiheg sio Iuteuria sio iraniaꞌin ywania toiꞌatumoehakyꞌeꞌi kahato wuatꞌi eꞌat pe.

Humanu 8:13

Pyno aipiit mikyꞌesat saꞌag kyꞌesat hap kape yn watuwepotpap pote aiꞌapiheg hap yn topyhuꞌat ahete aikuꞌuro hap. Waku watoꞌe Tupana Paꞌãu me -Etiꞌakit ro uimikyꞌesat saꞌag kyꞌesat hap watoꞌe Tupana Paꞌãu me. Miꞌi hawyi Tupana Paꞌãu aimoieineꞌen kahato.

2 Kuriniu 6:6

Iꞌewyte karãpe yt kat i aiwanetup hawe yt naku i nug hap ete miꞌi hawyi meiũran miitꞌin tikuap Tupana eropat haria sese aito hap. Iꞌewyte karãpe watikuap Tupana aiwy sese ewywuat miꞌi hawyi -Tupana emiit kahato miꞌi iꞌatuꞌe. Iꞌewyte karãpe miitꞌin tunug saꞌag ahete maꞌato yt watiꞌatupoepyk i miꞌi hawyi -Pywo imohey hat sese iꞌatuꞌe ahepe. Iꞌewyte iwese rakaria wo watoineꞌen hawyi -Meiẽ iꞌatuꞌe toꞌe hap ewy imohey sese hat iꞌatuꞌe. Iꞌewyte karãpe watunug Tupana Paꞌãu mikyꞌesat ewy hawyi iꞌewyte karãpe watiꞌatukyꞌe miitꞌin sese aipyꞌa pyi hawyi taꞌatukuap pywuat Aipotypot Iesui eropat haria sese aito hap.

Karasia 3:1

Tawa Karasia piaria Iesui mohey haria worohoꞌonapin neran eipe. Kat pote eweiꞌe mesup eiwoꞌope -Toꞌiro watuwehakyeraꞌat aiminug wakuat nug hap upi eweiꞌe. Yt iweꞌeg hin i rakaria ewy apo eipe are. Uweĩ eimuꞌe miꞌi tã itote are. Uweĩ eimaꞌat miꞌi e hap upi. Haꞌawyte worohoꞌomuꞌe kahato kat hamo Iesui ikuꞌuro hap ete itote aat kaꞌap. Miꞌi uimimoherep uhehay saꞌawyꞌi heremo kahato ehewaure kaꞌa pe. Miꞌi hawyi Iesui mohey haria wo eweikupteꞌen itote. Waku kahato mekewat eꞌat pe are. Miꞌi hawyi Tupana tum naꞌyn ehepe Topaꞌãu wakuat eweimohey Haꞌyru hawyi.

Karasia 5:5

Maꞌato uruto yt eiperia ewy hin i katupono uruto ti Iesui mohey hap kaipyi ti ahehakyeraꞌat kuap e haria uruto. Miꞌi hap kaipyi yn uruimohey.

Karasia 5:7

Saꞌawyꞌi imohey kahato haria eipe. Uwe uwe itote eimaꞌat saꞌag wẽtup muap upi. Katupono koitywy eipe yt pywuat sehay upi hin i raꞌyn eweikupteꞌen saꞌawyꞌi waku pe eweikupteꞌen pykai.

Ewesu 4:3

Waku watoineꞌen yt kat i aiwuꞌuka hap mywo katupono Tupana Paꞌãu tikyꞌesat aiwoꞌowese kahato hap are. Miꞌi pote waku watuwat Ipaꞌãu upi. Waku wẽtup mepytꞌin koꞌi wẽtup piit ewy watopyhuꞌat Iesui wywo.

Wiripu 1:9

Miꞌi tã areꞌe Tupana pe -Uruꞌywot etum no esaika hap emohey haria pe tawa Wiripu piaria pe iꞌatuwoꞌokyꞌe hamuat hap poꞌog poꞌog yne eꞌat pe areꞌe Tupana pe ehupi. Atikyꞌesat yne miꞌiria ehay yne pywuat kuap haria wo hap poꞌog poꞌog saꞌawyꞌi wuat kai. Taꞌi atikyꞌesat kahato miꞌiria ikuap kat som waku kat som yt naku i hap kuap hamo ewanetup hap oktan.

1 Tesaronika 3:12

Uruiꞌatukyꞌe kahato eipe. Miꞌi hap ewy atikyꞌesat eiwoꞌope eiwoꞌokyꞌe hap miꞌi pote ahẽtup Tupana pe -Etiꞌatumoesaika o poꞌog poꞌog Iesui mohey haria ekyꞌe poꞌog hamo iꞌewyte iraniaꞌin atukyꞌe hamo are. Miꞌi hap ti ahẽtup Tupana pe ehupi.

2 Tesaronika 1:3

Uruwyriaꞌin karãpe urutuwekuekatu ehewowi turan -Waku kahato En Tupana uruꞌe hap yn topyhuꞌat. Tupana urutuwehum kahato eete katupono itag naꞌyn poꞌog poꞌog iꞌatukai emohey hap urutoꞌe. Koitywy woꞌokyꞌe kahato haria wo raꞌyn tukupteꞌen waku kahato urutoꞌe. Miꞌi tupono ehewaku hap upi urutuwehum aat kaꞌap Tupana ete.

2 Tesaronika 2:13

Uruwyriaꞌin Tupana miꞌatukyꞌeria kahato eipe. Taꞌi urutuwehum kahato Tupana ete wuatꞌi eꞌat pe uruwatetup ehowawiat hawyi katupono Tupana miꞌairoria raꞌyn eipe. Tutum naꞌyn ni ehehakyeraꞌat hap ehepe pywuat sese tomohey hap upi. Miꞌi hawyi mio Tupana Paꞌãu esaika hap wywo yn naꞌyn eweikupteꞌen. Miꞌi hap ete urutuwehum kahato Tupana kape uruwyriaꞌin urutoꞌe.

1 Timoteu 1:3

Pyno mesup ahẽtup i raꞌyn eupi Timoteu tawa Ewesu piat ereineꞌen hamuat. Aikotã saꞌawyꞌi ahẽtup ewowi karãpe areto yi Masetunia kapiat turan -Ereineꞌen no tawa Ewesu tote mekewat itotiaria sehay yt pywo rakat i enoi haria ewaĩ hamo.

1 Timoteu 1:5

Yt naku i ti watuꞌuka sehay potꞌi ete ereꞌe o itotiaria pe katupono Tupana tikyꞌesat aiwoꞌowese ahehay wuat hap ereꞌe o iꞌatuepe. Wẽtup wanetup hap wywo yn waku watoꞌokyꞌe ereꞌe o. Yt iꞌatuekat kyewi i ti watopotkyꞌe ereꞌe o. Waku watoꞌokyꞌe wẽtup sok yn aito Iesui mohey haria aito pote.

1 Timoteu 4:12

En ni kurum iwasu te. -Uruewatꞌyp neꞌi wyti en iꞌatuꞌe epe itote maꞌato o ereineꞌen iꞌatupyꞌasetpe waku kahato rakatno iꞌatuehamo ihay hãpyk kahato rakatno hãpyk kahato woꞌokyꞌe hatno ereineꞌen. Iesui mohey sese hatno ereineꞌen. Yt wẽtup i o saꞌag etunug iꞌatuwoꞌokyryꞌi hamo. Miꞌi tã ereineꞌen mote yt uwe i itotiaria emohit kuap nagnia emimuꞌeria iꞌatuewatꞌyp neꞌi en mytkai.

1 Timoteu 5:2

Miꞌi hawyi karãpe eꞌyian haryporia kawiat tiꞌaparap Tupana pe pote waku etiꞌatunapin perupꞌi puo. -Mamai ereꞌe popuo imotypot haype. Maꞌato iraniaꞌin makuptiaria tiꞌaparap Tupana pe pote waku etiꞌatunapin perupꞌi puo Uheinyt ereꞌe popuo yt iꞌatukyꞌesat popuo i.

2 Timoteu 1:14

Tupana Paꞌãu esaika hap topyhuꞌat kahato ahepe. Kat e hap kat e hap wakuap koꞌi tutum epe emohey haype. Miꞌi koꞌi o etat kahato etomoheg kahato ewanetup hawe uhaꞌyru.

Epereu 11:8

Iꞌewyte nimo te Tupana toꞌe ahaꞌaseꞌi pot Aparãu me -Atikyꞌesat ereto wẽtup yi kape uimimoherep eꞌyi kape yt emikuap i yi kape e uimiium epiat wuat eꞌyi kape e iꞌewyte yne yne emepytꞌin emiariruꞌin watnuat e yi kape e. Miꞌi hawyi Aparãu timohey Tupana e hap hawyi toto iꞌe hap ewy yt taꞌakasa i aikope toto hap kapiat pykai.

Epereu 13:1

Pyno toꞌiro watoꞌokyꞌe motꞌi uiwyriaꞌin Iesui mohey haria aito pote. Waku watoꞌokyꞌe aikotã wẽtup ok yat piaria ewy.

Epereu 5:9

Aikaꞌiwat yt karãpe hin i iꞌaparap Toꞌywot mikyꞌesat nug hap ete pote -En yn miitꞌin ehakyeraꞌat hatno e Tupana. Iesui watomohey hawyi tutum aheineꞌen wuatꞌi eꞌat piat hamuat ahepe tomikyꞌesat nug haria wo watoineꞌen mote.

Epereu 6:10

Taꞌi Tupana hãpyk kahato. Yt karãpe i toiwaure tokyꞌe hap eipotpap tomotypot ehepiat hap etiat e. Yt toiwaure kuap i eiminug wakuat tomotypot etiat hap Tupana pote. Yt karãpe i toiwaure temiitꞌin powyro hap tomotypot tokyꞌe ehepiat hap kaipywiat koꞌi.

Epereu 9:14

Maꞌato Aikaꞌiwat Iesui suu poꞌog hesaika yn suu kai mohag wo. Saꞌawyꞌi Aikaꞌiwat tum yne topiit Tupana pe ahaꞌup mo. Saꞌawyꞌi ikahu rakat aihũ yn waku aimiium mo yt kat i hatek takat yt kat i iꞌahuu hap rakat. Ipe kyt hap ihãite sese rakat yn ni waku e. Miꞌi hap ewy Iesui poꞌog waku mohag wo katupono yt kat i saꞌag tuete Tupana tipuẽti. Ihãite putꞌok e kahato turan tutum topiit. Pyno koitywy watomohey Iesui hawyi Aihũ Aimiium Tupana piat hap ewy topyhuꞌat. Miꞌi watum Tupana pe hawyi yt kat i hin i aheha yi kape hap. Yt kat i aiwemoti hap aiminug saꞌag kapiat hap ete. Aihũ Aimiium Ikahu Rakat Iesui pote.

Tiaku 1:21

Waku ti watoiat yne yne aiminug yt naku i hap koꞌi iꞌewyte yne aheko saꞌag nug hap koꞌi. Miꞌi hawyi ti waku watuwewaure kaꞌa kahato Tupana ehay kape paa aiꞌe hap wywo yn katupono Tupana yn ahehakyeraꞌat kuap tehay wo. Miꞌi pote -Uimuꞌe kahato ro ehay nug hamo waku watoꞌe Tupana pe. Tupana etikoi kahato o ehay uiwanetup hawe waku watoꞌe. Yt naku i aheko saꞌawyꞌi wuat ewywuat ahewaire waire nug hap.

Tiaku 4:8

Pyno karãpe watikyꞌesat watukupteꞌen Tupana wywo miꞌi pote waku watuwat Tupana kape aimikyꞌesat ẽtup hamo. Aiwanetup hap kaipyi aipyꞌa pyi ahehay hawyi tuut ahowawi aimikyꞌesat ewy. Miꞌi hawyi aikotã watuwei aipit pit potiat hap ewy raꞌyn yꞌy pe waku miꞌi hap ewy waku watoꞌe Tupana pe -Uiꞌywot uikoho Esaꞌyru suu wo uimiꞌaparap saꞌag koꞌi waku watoꞌe. Uipo ti iminug yt naku i hap koꞌi pote uipo ipit pit hap ewy. Miꞌi pote etikoho uipo yt naku i nug hap hep hamo waku watoꞌe. Uiꞌywot atipy piat pe uiwanetup hap uipyꞌa piat typy sehay potiat uipiit yt naku i topyhuꞌat. Miꞌi pote etikoho kahato uhepiat iꞌaparap hap koꞌi yne waku watoꞌe Tupana pe.

1 Peteru 1:2

Saꞌawyꞌi sese ti Aiꞌywot atipy piat Tupana aiꞌairo Tosaꞌyru sese eropat hanuaria wo. Mesuwat yi eꞌyian mete Tupana aikuap kahato yt uwe i te aitoria mesuwarotiaria pykai aikuap yne. Pywo ti rat saꞌawyꞌi Tupana toꞌe tuwepe -Meiũran ti aru atipoꞌoro Uhaꞌyru sese wuatꞌi miitꞌin uiminug koꞌi Potypot nuat e tuwepe. Uwe uwe aru topyhuꞌat Uhaꞌyru mohey haria wo miꞌiria ti aru uimimoewaku koꞌi wo tukupteꞌen. Katupono Uhaꞌyru suu wo atiꞌatumoewaku miꞌiria hawyi Uipaꞌãu Wakuat atum iꞌatupiit piat ieineꞌen hanuat e Tupana tuwepe nimo te yt kat i te tutunug ne turan. -Miꞌi hawyi Uipaꞌãu yne iꞌatupiit puo atopag iꞌatumoewaku hamo e ahepe. Miꞌi hawyi atikyꞌesat kahato imohey haria imikyꞌesat yne nug haria wo hap etiat atikyꞌesat. Miꞌi hap atikyꞌesat e Tupana Aiꞌywot koro saꞌawyꞌi sese atipy piat pe.

1 Peteru 2:17

Waku watiꞌatumotypot yne mesuwarotiat miitꞌin. Yt naku i watimohit mesuwarotiaria miitꞌin. Waku iꞌewyte watiꞌatukyꞌe kahato yne Iesui mohey haria aikotã wẽtup yat piaria ewy waku watukupteꞌen. Waku watoꞌokyꞌe aikotã watikyꞌe aheywytꞌin aheinytꞌin aheykeꞌetꞌin aikywytꞌin aikypyꞌytꞌin ahekiꞌitꞌin watikyꞌe hap ewy. Waku watimotypot kahato aheTupana yne aikyꞌe hap wywo. Waku tyryꞌwatoꞌe aipyꞌa pe Tupana pupi. Iꞌewyte waku watiꞌatumotypot kahato mesuwarotiat aiporekuaria are.

1 Peteru 3:1

Pyno waku watunug morekuaria mikyꞌesat ewywuat. Iꞌewyte waku etunug eꞌaito mikyꞌesat ewywuat uheinytꞌin are. Eꞌaito toineꞌen pote etunug o imikyꞌesat ewywuat. Maꞌato eꞌaito yt Iesui mohey hat i pote iꞌewyte waku etunug imikyꞌesat ewy. Miꞌi tã etunug mote meremo etekyi Iesui mohey hap kape. Kat pote teꞌerahaꞌat kahato ewese hap kape maꞌato yt ehenoi hin i Tupana ehay tope pykai. Eheineꞌen hap ikahu rakat kaipyi topyhuꞌat Iesui mohey hatno saꞌawyꞌi yt tutunug neran hin i Tupana ehay pykai are. Miꞌi pote waku etunug eꞌaito eꞌakag wo uheinytꞌin are.

1 Peteru 3:20

Iꞌatu kahato miit itote yt naku i nug haria. Miꞌi haria kape toto. Aikope tukupteꞌen Nuꞌe mimuꞌeria. Saꞌawyꞌi Nuꞌe tiꞌatumuꞌe miꞌiria. Tutunug mekewat yara wato koro turan toiꞌatumuꞌe maꞌato yt taꞌatumohey i. Tupana tiꞌatukyꞌesat kahato miꞌiria tuwewawiat hap. Toiꞌatuekyi kahato Nuꞌe ehay wo maꞌato yt taꞌatumohey i. Miꞌiria kape Iesui toto tokuꞌuro hawyi aikope tukupteꞌen ikuꞌuro rakaria hap kape. Miꞌi hawyi toimoherep iꞌatuepe mekewat sehay wakuat. Katupono saꞌawyꞌi mesuwat yi tote Nuꞌeꞌin yn Tupana miehakyeraꞌat koꞌi topyhuꞌat. Mekewat yara wato pe tukupteꞌen 8 ok yn Nuꞌeꞌin koꞌi. Miꞌi hawyi iꞌaman iwato tiꞌatuꞌuka yne mesuwarotiaria maꞌato mekewat Nuꞌe minug yara wato tiꞌatuehakyeraꞌat 8 ok takaria katupono mekewat yara wato pe tukupteꞌen Nuꞌeꞌin mekewat yꞌy wato yowa tote.

1 Peteru 3:8

Pyno mesup ahenoi teran uiwenapin hap yne Iesui mohey haria pe. Mio tã are aikotã wẽtup miit ewy waku eweikupteꞌen eiwanetup hawe. Waku woꞌokyꞌe kahato haria wo eweikupteꞌen are. Waku eipyꞌa pe eiwoꞌokyꞌe eiwoꞌope are. Waku eiwoꞌokyꞌe Iesui mohey haria pote aikotã eheywytꞌin eheykeꞌetꞌin eheinytꞌin kyꞌe hap ewywuat are. Aikotã eikywytꞌin eikypyꞌytꞌin ehekiꞌitꞌin kyꞌe hap ewy wẽtup mepytꞌin sok ewy waku eiwoꞌokyꞌe are. Karãpe hoꞌopot hap putꞌok e wẽtup ok Iesui mohey hat ete hawyi etipowyro o miꞌi. Iꞌewyte karãpe iraniaꞌin hatek pote etipowyro miꞌi eipyꞌa pyi ikyꞌe hap wywo. Waku eweikupteꞌen eiwese kahato iraniaꞌin etiat rakaria wo. Waku eweiꞌe iraniaꞌin Iesui mohey haria pe -Wẽtup yn aimimohey uhyt mana eweiꞌe o are. Ereke uhyt mana mimi eweiꞌe. Eraꞌapyk o eweiꞌe. Miꞌi hawyi hegyiꞌat rakaria wo aru eweikupteꞌen Iesui mohey hap wywo are.

1 Peteru 4:17

Pyno wahoꞌopot hap kaipyi miitꞌin iraniaꞌin minug saꞌag kaipyi aiꞌapiheg hap mesuwarotiaria piat hap kaipyi Tupana tikuap sio aito Iesui mohey haria sese sio yt hap sio aito imepytꞌin sese aito sio yt hap. Pyno saꞌawyꞌi ahãꞌãg Tupana miꞌi hawyi waku pe aito aipuẽti aheineꞌen wuatꞌi eꞌat piat hamo. Maꞌato aikotã aru iraniaꞌin meimuẽ wuaria yt sehay wakuat Iesui etiat yt kyꞌesat i haria ete aikotã aru miꞌiria ete. Kat som aru Tupana tunug miꞌiria ete yt tomikyꞌesat nug neran i haria ete. Taꞌi miꞌiria ete poꞌog poꞌog saꞌag topyhuꞌat iꞌatuepiat hoꞌopot hamo. Mesuwat rotiat hoꞌopot hit iꞌatuepiat hap kaipyi hoꞌopot hap te topyhuꞌat wuatꞌi eꞌat pe iꞌatuete.

1 Peteru 4:8

Pyno mesuwat ikahuro hap eꞌat yt pya hin i pote Tupana tikyꞌesat kahato aito tomohey haria wo wẽtup miit ewy aiwoꞌokyꞌe hap toikyꞌesat. Miꞌi tã Tupana tikyꞌesat kahato. Uiwyriaꞌin toikyꞌesat watiꞌatukyꞌe iraniaꞌin Iesui mohey haria yne ahesaika hap wywo. Toikyꞌesat watimoherep aiwoꞌope aiwoꞌokyꞌe hap aimiium kaipyi aimimoꞌẽ hap kaipyi aiminug kaipyi toikyꞌesat aiwoꞌokyꞌe hap. Pywo ti rat toineꞌen aiwoꞌokyꞌe hap sese aiwoꞌopiat hap hawyi yt kat i aiwoꞌomaꞌatꞌi hap toineꞌen. Yt heremo i aiwoꞌoꞌaparap hap koꞌi aiwoꞌokyꞌe kahato hap toineꞌen mote. Aiwuꞌuka hap yt tuwemoherep i. Aiwoꞌokyꞌe hap toineꞌen pote yt watikat aiwyriaꞌin kai iꞌatuminug saꞌag koꞌi aiwoꞌoꞌaparap hap koꞌi.

2 Peteru 1:7

Miꞌi toineꞌen hawyi toikyꞌesat aiwoꞌokyꞌe sese hap aikotã watikyꞌe aheywyt aheinyt hap ewy aikywyt aikypyꞌyt hap ewy are. Miꞌi watunug kuap hawyi toikyꞌesat aiwoꞌokyꞌe potꞌi sese hap. Itag saꞌawyꞌi te wuat imohey hap kaipyi hap toikyꞌesat are.

1 Iuwãu 3:11

Pyno ahenoi i raꞌyn saꞌawyꞌi wuat sehay sese yianmiat Tupana ainapin hap -Eiwoꞌokyꞌe ro e Tupana saꞌawyꞌi.

1 Iuwãu 3:23

Pyno ahenoi ehepe Tupana mikyꞌesat sese. Mio tã e -Eweimohey ro Uhaꞌyru e. Ewetunug Miꞌi Eiporekuat no e. Miꞌi hawyi eiwoꞌokyꞌe ro aikotã Eikaꞌiwat Iesui e hap ewy e Tupana ahepe.

1 Iuwãu 4:12

Uiwyriaꞌin yt karãpe i wataꞌakasa Tupana maꞌato miꞌi pykai watikuap kahato toineꞌen aiwywo. Miꞌi hawyi watiꞌatukyꞌe miitꞌin pote Tupana toineꞌen poꞌog aikai. Aimoesaika kahato miitꞌin kyꞌe hap hãpyk nug hamo tepiat aikyꞌe hap ewywuat nug hamo.

1 Iuwãu 4:20

Karãpe wẽtup ok toꞌe ahepe -Uito atikyꞌe Tupana e maꞌato miꞌi yt topotkyꞌe hin i pykai miꞌi watikuap taꞌyn heso rakat. Karapeĩ yt watiꞌatukyꞌe i aiwyriaꞌin miꞌi pote yt watikyꞌe hin i Tupana. Katupono yt heremo hin i Tupana maꞌato iraniaꞌin heremo kahato miꞌi pote poꞌog yt niatpo i watikyꞌe hamo miꞌiria heremo pote.

1 Iuwãu 4:7

Uiwyriaꞌin toꞌiro watoꞌokyꞌe katupono aiwoꞌokyꞌe hap nug hat Tupana. Woꞌokyꞌe haria wo watoineꞌen pote Tupana mepytꞌin no watukupteꞌen. Tupana kuap sese haria wo watopyhuꞌat.

Iesui Aru E Hap 2:4

Waku kahato eipe e wen maꞌato wẽtup yt naku i eikawiat yt uimowepiit hin i hap toineꞌen. Saꞌawyꞌi uikyꞌe kahato haty wo maꞌato mesup yt saꞌawyꞌi wuat yt ewy i raꞌyn uikyꞌe eipe. Uiꞌatoiat uikyꞌe saꞌawyꞌi wuat hap ete e. Haty kahato uipyꞌa pe miꞌi hap uhete e.