1 Peteru 1:21 - Sateré-Mawé

²¹ Miꞌi pote mesup yt niatpo hin i watomohey Tupana aipyꞌa pe kat pote uruehamo Aikaꞌiwat toihep guꞌuro pyi. Miꞌi hawyi Tupana toꞌe itote wuatꞌi ehamo -Miitꞌin Ehakyeraꞌat hanuat Miꞌi Miit e. Miꞌi pote koitywy Iesui yn watomohey ahehakyeraꞌat hamo. Waku watoꞌe tope -Uruimohey En yn Iesui uruehakyeraꞌat hanuat waku watoꞌe Iesui pe are.

1 Peteru 1:21 ပူးပေါင်းရင်းမြစ်များ

Mateu 28:18

Miꞌi hawyi Iesui tuut iꞌatuewowi hawyi iꞌatupyꞌasetpe toineꞌen heremo kahato. Miꞌi hawyi toꞌe itotiaria pe -Koitywy Tupana tum yne raꞌyn tesaika hap uhepe e. Miꞌi hawyi Wuatꞌi Miitꞌin Porekuat koro wo areineꞌen atipy pe iꞌewyte mesuwat yi tote e.

Iuwãu 12:44

Miꞌi hawyi Iesui toꞌe tehay pirik wo iꞌatuepe -Uwe uwe uimohey hanuaria miꞌiria aru iꞌewyte uipoꞌoro hat mohey hanuaria wy teꞌeropyhuꞌat e.

Iuwãu 14:1

Uiwyriaꞌin e Iesui areto irane eipyꞌasetpyi maꞌato yt eiꞌarot reiꞌo eipyꞌa pe eiwanetup hawe e. Eweimohey poꞌog yn o Tupana iꞌewyte uimohey yn o e.

Iuwãu 14:6

Miꞌi hawyi Iesui tiwesat -Uito yn wyti muap uheineꞌen hap kapiat e. Uito yn wyti hãpyk sese rakat miitꞌin mowaku hamuat. Uito yn wyti muap miitꞌin moieineꞌen hat e. Uwe uwe uimohey miꞌi hat yn wyti putꞌok e aru Uiꞌywot kuap hamo e Iesui Tume pe.

Iuwãu 17:1

Miꞌi tã toꞌe Iesui hawyi ihaꞌat ywaipe miꞌi hawyi toꞌe -Papai e putꞌok e raꞌyn uheꞌat e. Pyno waku woromotypot Papai e. Emimotypot wo areineꞌen hawyi miꞌi upi emotypot hamuat hap atikyꞌesat e.

Iuwãu 17:24

Papai mesuwat yi nug hap eꞌyian mete uikyꞌe kahato En are. Taꞌi saꞌawyꞌi sese mesuwat yi yt etunug i te turan -Wakuat kahato En aiwoꞌokyꞌe hap toꞌoꞌewy kahato ere uhepe Papai are. Atikyꞌesat kahato uhemiitꞌin uimohey haria emiium koꞌi tukupteꞌen aru aiũpe aiũpe uheineꞌen hap upi i are. Atikyꞌesat uikahu hap kape teꞌerahaꞌat aru are. Atikyꞌesat emiium uhewaku hap sese kuap hamo hap Papai are e.

Iuwãu 17:5

Miꞌi hawyi eꞌyatype emimotypotno areineꞌen neran aikotã saꞌawyꞌi yian me tewat mesuwat mytyyp nug hap owakai te hap ewy areineꞌen neran e.

Iuwãu 3:34

Tupana Mipoꞌoro atipy kaipywiat wyti henoi hãpyk yne kahato topoꞌoro hat ehay upi katupono tutum yne Topaꞌãu tehay enoi hanuat pe e.

Iesui Potmuꞌeria 2:24

Taꞌi uiꞌe hap ewy Tupana tihep taꞌyn guꞌuro po pyi urukaꞌiwat. Toineꞌen i raꞌyn uiwyriaꞌin e. Yt ipohepap i guꞌuro ete e. Yt guꞌuro tipyhyp kuap i urupotypot e. Iesui poꞌog hesaika guꞌuro kai pote meremo guꞌuro ipohep Iesui ete pyi e.

Iesui Potmuꞌeria 3:13

Ahaꞌaseꞌiꞌin Aparãu Isaki Iako eTupana mimoehãite ti meiũwat miit e. Eweikuap apo kat pote Tupana timoehãite ipy kĩꞌã rakat ehehamo e. Pyno ahenoi ehepe. Toikyꞌesat kahato temiit sese Iesui motypot hap haype wyti e. Taꞌi aheTupana tikyꞌesat kahato raꞌyn wyti eimikuasa te Iesui motypot hap e. Morekuat Piratu ti yt iꞌauka teran i wen maꞌato eipe ti eweikyꞌesat iꞌauka hap -Yt naku i Iesui eweiꞌe morekuat pe itote saꞌawyꞌi e. -Etiꞌauka ro pyno Iesui eweiꞌe kahato morekuat Piratu pe e.

Iesui Potmuꞌeria 3:15

Taꞌi miitꞌin moieineꞌen wuatꞌi eꞌat piat hat auka haria sese eipe paĩ maꞌato miꞌi pykai eimiꞌauka Tupana tomoieineꞌen i raꞌyn e. Toihep i raꞌyn wyti Tomiꞌairo guꞌuro pyi paĩ. Miꞌi hap ti uruikuap kahato raꞌyn katupono heineꞌen pakup i hap kape urutaꞌakasa motꞌi kahato uruto e Peteru.

Iesui Potmuꞌeria 4:10

Taꞌi Iesui tawa Nasare piat mimoehãite wyti ipy pakup takat e. Taꞌi Iesui ehay upi wyti uruimoehãite mekewat ipy kĩꞌã rakat gaꞌatpo e. Saꞌawyꞌi Tupana tipoꞌoro Temiit ahowawi Aipotypot nuat wen maꞌato Imipoꞌoro Wakuat eweiꞌauka raꞌyn ariaꞌyp posak saꞌag ete. Yt naku i kahato ewetunug maꞌato ikuꞌuro hawyi Tupana tomoieineꞌen pakup i guꞌuro pyi e. Pywo ti rat toineꞌen i Iesui katupono mesup taꞌyn toimoehãite meiũwat miit e. Ewehaꞌat ro pyno imimoehãite kape katupono hewyry raꞌyn ehehamo e.

Humanu 10:9

Katupono uwe uwe tuwemoherep towẽ pyi iraniaꞌin me -Iesui ti Uikaꞌiwat sese e iꞌewyte topyꞌa pe hawyi mio tã e -Iesui woromohey kahato ereineꞌen guꞌuro pyi hap miꞌi e hat Tupana miehakyeraꞌat no topyhuꞌat e.

Humanu 4:24

Pyno waku nug hat ereineꞌen uipyꞌa pe e Tupana tope uimohey pote e miwan me. -Uimikyꞌe en e Aparãu me aimuꞌe hamo tomohey haria aito pote Tupana mikyꞌe koꞌi aito e hamo. Taꞌi Tupana mimohãpyk koꞌi aito e hamo miꞌi e hamuat toineꞌen iwan me. Koitywy watomohey kahato Iesui Tupana timohymut i guꞌuro pyi hap watomohey kahato. Watimohey kahato Tupana tum naꞌyn Tosaꞌyru Aipotypot Koro wuatnuat e hap watomohey. Taꞌi toꞌe hap ewywuat watomohey.

2 Kuriniu 6:15

Aikaꞌiwat wywo ahiag wywo yt karãpe i toꞌowenka taꞌatupotpap wẽtup ehay yn hamo. Miꞌi hap ewy yt karãpe i aito Aikaꞌiwat mohey haria watoꞌosat sese Aikaꞌiwat etiat mikyryꞌi haria wywo. Yt karãpe i wẽtup miit ewy watopyhuꞌat iꞌatuwywo.

Ewesu 1:15

Gaꞌatpo atikuap ehetiat sehay -Koitywy tawa Ewesu piaria Aipotypot Iesui mohey kahato haria tukupteꞌen. Poꞌog imohey haria mio saꞌawyꞌi wuat kai iꞌatuꞌe uruepe. Iꞌewyte Tupana emiitꞌin kyꞌe kahato haria tukupteꞌen miꞌiria iꞌatuꞌe ehepiat pe.

Korosi 1:27

Koitywy Tupana toꞌe -Saꞌawyꞌi yt uwe i kape atimoherep uhehay pakup e. Kurin ikuap haria saꞌawyꞌi maꞌato koitywy Uhaꞌyru mohey haria kape atimoherep taꞌyn uhehay ikahu kahato rakat sehay hekat rakat wuatꞌi ywania mesuwat yi totiat kapiat sehay wakuat e. Saꞌawyꞌi migꞌi wo toineꞌen maꞌato mesup atimoherep taꞌyn ehepe e Tupana ahepe. Etunug no Uhaꞌyru Eporekuat no eipyꞌa pe pote eweikupteꞌen aru uhehamo mesuwe atipy pe uimimotypot koꞌi wo e Tupana ahepe.

1 Timoteu 1:1

Timoteu koitywy atipoꞌoro uimiwan ewowi. Uito ti Pauru mekewat Aipotypot Iesui ehay moherep hat. Uito ti Ahehakyeraꞌat hat Tupana potpoꞌoro paĩ. Aimiekatup Iesui potpoꞌoro uito paĩ.

1 Timoteu 3:16

Tupana mienoi Iesui etiat watikuap kahato maꞌato yt karãpe i watikuap yne yne. Tupana yn ikuap sese hat. Miꞌi hawyi ikuap hat sese tuwemoherep taꞌyn ahowawi. Mio tã toꞌe ahepe Iesui etiat -Meiũ ti pywuat sese e. Miꞌi Miit kape atipy piaria teꞌeraꞌakasa yne. Miꞌi ti imoherep taꞌyn kat ywania puo kat ywania puo miꞌi hap tuwemoherep taꞌyn tehay wo. Miꞌi hawyi ti iꞌatu kahato raꞌyn imohey haria mesuwat yi tote. Miꞌi hawyi Tupana tioto i raꞌyn atipy kape i are.

Epereu 2:9

Pyno koran aheha Iesui kape iꞌewyte koitywy howawi aiwanetup hap. Miꞌi raꞌyn topyhuꞌat hap kape aheha. Mekewat poꞌog iwato atipy piaria kawiat hat kape aiwanetup hap. Maꞌato mesuwarotiat toineꞌen turan tuwemohit kahato. Atipy piaria eꞌyi kai te topyhuꞌat. Yt atipy piat ewy hin i toineꞌen Aheykeꞌet mesuwarote tuwepuꞌi nug hap eꞌat pe. Maꞌato hoꞌopot kahato aikawiatno hamo yi tote toineꞌen turan. Ikuꞌuro miitꞌin ehakyeraꞌat hamo. Koitywy Tupana tunug naꞌyn Wuatꞌi Porekuat no. Miꞌi Miit tuwepainug naꞌyn. Miꞌi hawyi Tupana tunug Tosaꞌyru Wuatꞌi Epaꞌi Koro wo raꞌyn e. Mio koitywy Ahepaꞌi Koro wo Iesui raꞌyn katupono Miꞌi Miit ipitpitꞌok yne aiminug saꞌag koꞌi. -Koitywy waku raꞌyn uiwanetup hawe eipe e Tupana ahepe. Koitywy wẽtup miit ewywuat watopyhuꞌat Tupana Aiꞌywot ahepe. Wẽtup mepytꞌin sok yn aito Aheykeꞌet mohey haria e. Taꞌi yt watuwemoti hin i mesup te aiminug saꞌag saꞌawyꞌi wuat ete katupono watomohey Tupana Saꞌyru hawyi wẽtup miit ewy watopyhuꞌat iꞌywot wywo. Eipe uheꞌywytꞌin uheinytꞌin e Iesui ahepe.

Epereu 6:1

Saꞌawyꞌi kurin kurin watikuap Aipotypot Iesui etiat. Kurin kurin watikuap ihay etiat. Iꞌewyte saꞌawyꞌi aipotmuꞌeria Iuteuria aimuꞌe kurin kurin Tupana Mipoꞌoro Aiporekuat nuat ete. Miꞌi koꞌi toineꞌen ne aiwanetup hawe. Waku miꞌi koꞌi wen maꞌato poꞌog waku watikuap yne yne Iesui e hap yne yne iminug koꞌi e. Waku watuwemotag ikuap hap ete. Yt naku i watopyhuꞌat mekewat aimikuap hit hap ewy yn. Saꞌawyꞌi -Ewetoiat ro eiminug saꞌag koꞌi hawyi ewetomohey ro Tupana iꞌatuꞌe ahepe hawyi iꞌatuehay upi watuwat.

Epereu 7:25

Ahepaꞌi Wato Pakup Iesui ahehakyeraꞌat kuap yne mesuwarotiaria torannia ywania e. Pywo ti rat torannia Tupana kapiaria toiꞌatuehakyeraꞌat kuap taꞌatukyꞌesat imohey hawyi katupono Miꞌi Miit ti muap Tupana kapiat. Koitywy uwe uwe miꞌi muap upi toto Tupana kape Miꞌi Miit tuwat hupi haria putꞌok iꞌatuꞌe Tupana kuap hap kape e. Kat emiit kat emiit putꞌok e kuap Tupana kape Miꞌi Paꞌi sehay upi. Ahehay enoi oktan tohenoi Tupana pe. Yt toimaꞌat hin i Toꞌywot ahehay wo iꞌewyte tohẽtup kahato aikawiatno Tupana pe Ahepaꞌi Wato Iesui.

1 Peteru 1:11

Kat eꞌat pe aru Aipotypot Iesui tuut e hap kape teꞌeruwanetup kahato taꞌatukat kahato. Taꞌi saꞌawyꞌi wuaria Tupana ehay moherep haria iꞌatuehay kahato Aikaꞌiwat Paꞌãu mimoherep koꞌi ete. Taꞌi taꞌatumoherep yian mete aikotã aru Aipotypot ikuꞌuro hoꞌopot hap rakirẽ hamuat koꞌi taꞌatuwan kahato miwan me. Iꞌewyte taꞌatuwan kahato Tupana Paꞌãu kaipyi aikotã me Aipotypot wuatꞌi miitꞌin potypot no topyhuꞌat hamuat koꞌi taꞌatuwan are.

1 Peteru 1:3

Saꞌawyꞌi Aipotypot Iesui ikuꞌuro hawyi Tupana timoieineꞌen guꞌuro pyi. Saꞌawyꞌi yt watomohey hin i aikuꞌuro hawywiat aheineꞌen i hamuat hap. Maꞌato mesup koitywy watomohey kahato kat pote Aiꞌywot Tupana tihep taꞌyn Aikaꞌiwat ikuꞌuro hap kaipyi. Miꞌi pote koitywy -Waku kahato En Tupana. Poꞌog wakuat torannia kai urutoꞌe kat pote egyiꞌat kahato uruepe. Urukyꞌe kahato En. Poꞌog poꞌog torannia miitꞌin kai urukyꞌe hat En katupono etihep taꞌyn urukaꞌiwat hyp hawyi urutoꞌe.

1 Peteru 3:22

Mesup taꞌyn Aheykeꞌet Iesui teke raꞌyn atipy pe. Koitywy taꞌapyk Tupana po sese kai taꞌapyk. Miꞌi tote Tupana mimotypot no topyhuꞌat -Koitywy Uhaꞌyru woronug En wuatꞌi miitꞌin Akag wuatꞌi porekuaria Akag wuatꞌi atipy piaria akag wo woronug En e Tupana Tosaꞌyru pe. Yne esaika hap atum epe e Tupana Tosaꞌyru pe Iesui pe.