1 Peteru 1:18 - Sateré-Mawé

¹⁸ Miꞌi tupono waku watikoho kahato aiminug saꞌag koꞌi Aikaꞌiwat suu wo. Waku watimoweityk yne aiminug saꞌag koꞌi are. Ahekat yt ahehakyeraꞌat kuap i kat pote ahekat yt toineꞌen motꞌi i pote. Meiũran ahekat ipyyp iꞌytyk topyhuꞌat aikotã ahewahi aiminug imehit rakat ewy parata kawiat uru kawiat ewy. Porap neꞌi imehit maꞌato meiũran yt ikahu i hap ewy raꞌyn topyhuꞌat. Miꞌi koꞌi wo yt watikyiꞌat kuap i aheineꞌen wuatꞌi eꞌat piat hamuat hap are. Uiwyriaꞌin saꞌawyꞌi wuaria aiꞌywania aiꞌywotꞌin tikyiꞌat teran wuatꞌi eꞌat piat taꞌatuieineꞌen hamuat hap. Kat pote taꞌatunug neran Tupana mowepiit hamuat taꞌatuesokpe ete taꞌatumiꞌu ete taꞌatueko ete maꞌato yt putꞌok e hin i muap Tupana kapiat ete. Koitywy watikuap yt miꞌi kaipyi i ahehakyeraꞌat hap aheineꞌen wuatꞌi eꞌat piat hamuat hap are.

1 Peteru 1:18 ပူးပေါင်းရင်းမြစ်များ

Maku 8:37

Maꞌato mesuwarotiat kyiꞌat hap kape yn eiwanetup aat kaꞌap hawyi aru aikotã eweikyiꞌat kuap wuatꞌi eꞌat piat ikahu sese rakat ehekareꞌen Tupana wuat hap e. Miꞌi hawyi eheineꞌen wuatꞌi eꞌat piat hap koꞌi eimipun no topyhuꞌat e.

Humanu 1:21

Taꞌi mesuwarotiaria tikuap taꞌyn Tupana toineꞌen iminug koꞌi kaipyi maꞌato taꞌatukuap toineꞌen pykai yt taꞌatumotypot hin i Tupana. Iwese kahato hegyiꞌat kahato iꞌatuepe pykai -Waku kahato En Tupana yt iꞌatuꞌe hin i. Yt teꞌeruwehum hin i Tupana miium ahepiat hap kape. Yt nakuat i wo yn teꞌeruwanetup Tupana kape. Pywuat sehay Tupana etiat yt taꞌatukyꞌesat hin i mesuwarotiaria miitꞌin. Yt karãpe i teꞌeruwanetup teran Tupana kape. Yt kat i iꞌatuwanetup hap Tupana etiat hap pote aikotã hoꞌowasat sese rakaria ewy tukupteꞌen taꞌatuwanetup hawe. Iꞌypyryp kahato iꞌatuwanetup hap miꞌi pote wẽtup sehay kape yn taꞌatuwanetup. Yt kan hamuat i sehay rakat kape yn taꞌatuwanetup. Hesoꞌok takaria ewy tukupteꞌen iꞌatuwanetup hawe. Yt nakuaria i sese taꞌatupyꞌa pe. Yt iꞌatuweꞌeg i sese rakaria ewy iꞌatuwanetup hap.

1 Kuriniu 3:20

Mio tã e haria pe Tupana toꞌe -Uito poꞌog uiweꞌeg iraniaꞌin kai eweiꞌe pykai yt kat hamo i eiweꞌeg hap e Tupana.

1 Kuriniu 6:20

Aipiit yt aiwatnuat i katupono koitywy Tupana watnuat watopyhuꞌat toikyiꞌat raꞌyn haꞌup iwato kahato tutum toikyiꞌat aipiit hamo. Pyno Tupana wat aipiit pote waku watum aipiit Tupana motypot hamo. Tupana motypot yat sese wo watum aipiit waku.

1 Kuriniu 7:23

Katupono Aikyiꞌat Iesui Tupana watno. Iwato kahato saꞌup tutum aikyiꞌat temiitꞌin nuat hamo. Miꞌi pote yt naku i watopyhuꞌat yt naku i nug hap eko saꞌag eropat haria wo neꞌi e.

Karasia 1:4

Iesui tikyꞌesat kahato ti miitꞌin ehakyeraꞌat hap. Toikyꞌesat kahato iꞌatuminug saꞌag kaipywiat teꞌeraꞌaipok hap. Miꞌi hamo tuweium ariaꞌyp posak ete Toꞌywot mikyꞌesat ewy. Miꞌi hamo Tupana tum Tosaꞌyru aiꞌapiheg hap u hamo aiminug saꞌag koꞌi hep hamo.

Ewesu 4:17

Pyno worohoꞌomuꞌe teran Aikaꞌiwat Iesui ehay ete. Eweꞌeg wo o eiminug saꞌag koꞌi eimikyꞌesat saꞌawyꞌi eheko saꞌawyꞌi wuat pupi are. Yt imohey i te turan wuat saꞌag nug hap ete yt aiweꞌeg hin i saꞌawyꞌi wuat aiminug saꞌag koꞌi kai -Eweiꞌatoiat ro miꞌi koꞌi e Tupana pykai. Uiwyriaꞌin yt naku i watuwanetup poꞌog aikotã yt imohey i haria wanetup hap ewy neꞌi katupono miꞌiria yt naku i nug hap yn iꞌatuwanetup hawe. -Uito poꞌog poꞌog torannia kai iꞌatuꞌe taꞌatuwanetup hawe. Yt paa iꞌatuꞌe hin i taꞌatuminug yt naku i hawyi. Miꞌi tã iꞌewyte aito saꞌawyꞌi maꞌato mesup waku watuwenapin miꞌi e hap pun hamuat e.

Titu 2:14

Ahehakyeraꞌat hat Iesui ikuꞌuro raꞌyn ariaꞌyp posak ete aikawiatno. Yne yt nakuap i nug saꞌag po pyi aihep hamo ikuꞌuro. Tupana watnuaria wo ainug neran pote wakuaria wo aito hap toikyꞌesat. Miꞌi pote aihep taꞌyn saꞌag nug hap po pyi aimowaku hamo raꞌyn. Koitywy Ahehakyeraꞌat hat iwepiit kahato raꞌyn.

Epereu 9:12

Ahepaꞌi Koro Iesui teke raꞌyn Tupana yat wato pe. Mekewat imotypot eiam atipy piat pe teke raꞌyn okenꞌypy pyhyp hap sakpo. Towat tosuu wywo teke. Tutum naꞌyn tosuu Tupana pe. Yt tutum i Wewato ahup suu. Yt tutum i aihũria Kaneiru suu maꞌato towat tosuu tutum hekat rakat Tupana pe. Ahehakyeraꞌat hap sese saꞌup tutum hawyi -Waku raꞌyn e Tupana tope. Putꞌok e raꞌyn esuu saꞌup mo wuatꞌi miitꞌin kyiꞌat hap sakpo e Tupana Tosaꞌyru pe.

1 Peteru 1:7

Uiwyriaꞌin waku ahoꞌopot hap katupono miꞌi kaipyi Tupana tikuap tomohey sese sio yt haria aito are. Mesuwarotiat miitꞌin tikat kahato mekewat nu mehit rakat hekat kahato rakat kawiat uru e hap het rakat. Maꞌato iꞌytyk kahato iꞌatumipuẽti yi puat pote. Miꞌi hawyi taꞌatupag aria pe hawyi ihywop taꞌyn hawyi iꞌytyk hap toto yne. Miꞌi hawyi imehit hawyi ikahu kahato mekewat nu uru kawiat. Miꞌi hap ewy kahato aito uruwyriaꞌin are. Uito ti Peteru uhepiat hoꞌopot hap uhatek hap miitꞌin mikyryꞌi hap aria ewy iꞌytyk uhepiat hap ewy hep hamuat. Miꞌi hawyi poꞌog hesaika rakat areineꞌen Tupana motypot hamuat. Wahoꞌopot turan mekewat Tupana motypot hap Tupana kapiat aiwehum hap poꞌog poꞌog aimoesaika saꞌawyꞌi wuat kai are. Meiũran aru Aikaꞌiwat Aipotypot Iesui tuut mesuwat yi kape tuut Morekuat nuat hamo. Miꞌi hap eꞌat pe ti aru aitoria watukupteꞌen imehit rakaria ewy aikotã mekewat uru mehit hap ewy are. Kat pote wahoꞌopot hap kaipyi waku pe raꞌyn watoineꞌen. Miꞌi hawyi aikotã hekat rakaria ewywuaria wo watoineꞌen mekewat nu imehit rakat ewy watoineꞌen mekewat eꞌat pe aru Iesui uut hap eꞌat pe ti aru. Miꞌi hap eꞌat pe urumowepiit kahato mesuwarotiat uruepiat hoꞌopot hap katupono yt uruiꞌatoiat hin i Iesui mohey uruepiat hap urusatek pykai uruꞌahyk ahyk pykai iꞌewyte urupyhik pykai uruꞌatuꞌuka pykai are.

1 Peteru 4:3

Saꞌawyꞌi yt aiweꞌeg hin i yt watikuap i te Iesui turan. Saꞌawyꞌi aimikyꞌesat yn watunug iꞌewyte iraniaꞌin mesuwarotiaria mikyꞌesat ewy yn watunug. Mekewat eꞌat pe yt watikuap i Iesui te turan yt watunug hin i Tupana mikyꞌesat ewy. Katupono watunug aat kaꞌap iraniaꞌin mikyꞌesat ewy yn watunug. Taꞌi yt Tupana kuap i haria mikyꞌesat ewy yn watunug. Miꞌi turan watunug ahewaire waire hap yn aiwanetup hawe. Aipiit mikyꞌesat saꞌag koꞌi yn watunug neran mekewat eꞌat pe. Iꞌewyte mahy u hap aat kaꞌap hap watikyꞌesat watunug mekewat eꞌat pe. Watuꞌuka teran yne miitꞌin wywo ahehay wo aipiit wywo yt aiwese hin i. -Uito poꞌog e hap yn aiwanetup hawe. Taꞌi saꞌawyꞌi ienuk hap nug hap kape yn watuwat. Yt miitꞌin ewywuat i watenuk. Aiꞌok hap sakpo watenuk mekewat eꞌat pe. Miꞌi hawyi ahetupanaria sem karania ahetupanaria saꞌawyꞌi aheineꞌen hap yt watikuap i Iesui turan.

1 Iuwãu 3:5

Katupono Aikaꞌiwat yt karãpe i iꞌaparap Tupana pe. Maꞌato Aikaꞌiwat tuut hamuat yne yt nakuat i hep hamo. Miꞌi hap eweikuap taꞌyn.