1 Kuriniu 9:18 - Sateré-Mawé

¹⁸ Yt haꞌup kyewi i worohoꞌomuꞌe paĩ. Uhaꞌup sese ti ehepiat Tupana kuap hap. Yt eikat kyewi i maꞌato worohoꞌomuꞌe. Yt ekat kyewi i atimoherep ehepe Iesui etiat ikahu rakat sehay. Atikyꞌesat haꞌup eikai uipotpap saꞌup Tupana ehay wakuat moherep hap saꞌup pote waku ahẽtup Tupana wanetup hawe maꞌato yt ahẽtup i te miꞌi hap ete.

1 Kuriniu 9:18 ပူးပေါင်းရင်းမြစ်များ

Iuwãu 4:36

Mio ti haat raꞌyn waku raꞌyn eweiterek to are raꞌyn ehepe e. Ewehoꞌohep to miitꞌin wuatꞌi eꞌat piat ieineꞌen hanuaria wo e. Wẽtup ok ikoi hat wẽtup ok iterek hat e. Miꞌiria toꞌoꞌewy iꞌatuwepiit kahato taꞌatuminug hap koꞌi ete. Miꞌi hawyi uwe ipotpap ikoi hap ete uwe ipotpap iterek hap ete. Miꞌiria toꞌoꞌewywuat saꞌup taꞌatupuẽti e.

Iesui Potmuꞌeria 18:3

Miꞌi tote ipotpap sokpe kawiat getap nug hap ete. Miꞌi hawyi Pauru tiꞌatupuẽti itote raꞌyn tomisepap nug hap ete. Miꞌi hawyi topyhuꞌat iꞌatuꞌyat pe raꞌyn iꞌatupowyro hamo. Miꞌi turan iꞌatupotpap kahato itote sokpe kawiat getap nug hap ete.

Humanu 14:15

-Pyno waku watuꞌu yne watoꞌe pote waku aiweꞌeg wo uwe pe mio tã watoꞌe katupono tukupteꞌen iraniaꞌin Iesui mohey haria yt aiwanetup hap ewywuaria i kahato iꞌatueko miꞌu etiat miꞌi pote -Paĩ an waku watuꞌu yne watoꞌe iꞌatuehamo hawyi iꞌatumohey hap mohit haria watopyhuꞌat iꞌatuwanetup hawe. Poꞌog waku watoꞌe -Mehin mana yt naku i watuꞌuka aheko miꞌu ete miꞌi pote atuꞌu teran eimikyꞌesat ewy mesuwe areineꞌen eiwywo turan waku watoꞌe. Miꞌi hawyi waku watuwemoesyꞌat iꞌatueko ewy itote. Tukupteꞌen wy yt imohey i te haria. Miꞌiria pyꞌasetpe watoineꞌen turan waku watiꞌatukyꞌe miꞌiria iꞌatueko miꞌu etiat ewywuat nug hap ete watoineꞌen iꞌatuwywo turan are. Yt naku i wahoꞌomopyꞌahak aimiꞌu u hap wywo iraniaꞌin are. Yt naku i aimiꞌu wo watimopyꞌahak iraniaꞌin seko waĩꞌe hap ete katupono miꞌiria ehakyeraꞌat hamo Iesui ikuꞌuro wy. Maꞌato watenuk kahato iꞌatuehamo -Yt ewetuꞌu teiꞌo miꞌi miꞌu iꞌatuꞌe hap ete pote yt karãpe i taꞌatumohey Iesui hawyi miꞌiria maꞌat haria watopyhuꞌat katupono aimiꞌu wo watiꞌatumopyꞌahak neꞌi pote yt wahoꞌoekyi kuap i miꞌiria Iesui kape.

1 Kuriniu 10:33

Uito Pauru arewyꞌinug neran yne uiminug wakuap mo yn.

1 Kuriniu 3:8

Meiũran aru Tupana tum ahepe aipotpap hap saꞌup. Tutum ahepe haꞌup aikotã aipotpap hap oktan aru. Iꞌewyte iwato aipotpap pote iwato tutum yt pote kurin tutum. Pyno tukupteꞌen aitoria hãꞌỹi koi haria ewy hawyi iraniaꞌin ihuꞌi huꞌi haria ewy maꞌato saꞌup ium hat sese Tupana.

1 Kuriniu 7:31

Yt naku i mesuwarotiat kape yn watuwanetup aat kaꞌap katupono tuweityk meremo aimowepiit hap aheꞌaito hap aiwary hap aimikyiꞌat koꞌi ahekareꞌen koꞌi topap topap yne maꞌato aiminug Tupana kapiat toineꞌen motꞌi rakat yn waku aiwanetup hap aimowepiit hap. Yt tuweityk kuap takat i.

1 Kuriniu 8:9

Eweꞌeg wo o karãpe etuꞌu tupanaria miit minug koꞌi motypot hap miꞌu turan. Toineꞌen ekai Iesui mohey hat pakup -Yt etuꞌu teiꞌo tupanaria motypot hamuat miium u hap ete iꞌatuꞌe pote pyno yt etuꞌu teiꞌo. Etuꞌu pote -Yt etuꞌu teiꞌo e haria teꞌeruwemoti etuꞌu hap turan Iesui mohey haria yt itag i te rakaria Iesui mohey hap ete pote. Miꞌi hawyi iꞌaparap hat ereineꞌen iꞌatuwanetup hawe.

1 Kuriniu 9:12

Iraniaꞌin eimuꞌe haria eweipoi kahato. Maꞌato -Yt karãpe i urupoi ro urutoꞌe ehepe. Eweikuap kat pote pyno ahenoi ehepe. Yt uruikyꞌesat i eiꞌe hap eiwanetup hawe -Aimiꞌu kyewi neꞌi aimuꞌe ahekat kyewi neꞌi aimuꞌe sehay wakuat ete Pauru Panape eweiꞌe hap. Miꞌi pote urupotpap aat kaꞌap urupo wo urusaꞌup puẽti hamo. Uruhoꞌopot kahato yat sokpe kawiat nug hap ete urumiꞌu kyiꞌat hamo yt uruikyꞌesat i eiꞌokpe tote urutenuk haype pote.

1 Kuriniu 9:15

Maꞌato saꞌawyꞌi eimuꞌe turan yt atikat i uipoi hamuat. Yt kat i saꞌup atikat. Eimuꞌe hap saꞌup yt atikyꞌesat i te. Koitywy atunug mesuwat uimiwan yt kat i ahẽtup eikaipyi mesuwat uimiwan me. Yt atikyꞌesat i saꞌup eikaipyi eimuꞌe hap saꞌup. Poꞌog waku uikuꞌuro areineꞌen yt eimipoi i wywo te areineꞌen. Yt atikyꞌesat i ekat. Yt kat i uheso hap uhehay ete. Eweimoꞌẽ uhepe pote koitywy yt atikat i te paĩ.

1 Kuriniu 9:17

Iꞌewyte yt arepoꞌoro i Iesui ehay moherep hamo yt uimikyꞌesat ewy hin i. Maꞌato uipoꞌoro hat mikyꞌesat ewy worohoꞌomuꞌe. Maꞌato arepoꞌoro neꞌi pote miꞌi hawyi atikyꞌesat saꞌup eikaipyi. Maꞌato yt atikyꞌesat i saꞌup eikai katupono yt uipoꞌoro i eipe. Maꞌato Tupana uipoꞌoro yt uimikyꞌesat ewy hin i maꞌato -Etunug o e Tupana uhepe pote worohoꞌomuꞌe. Miꞌi atunug mote uimohey Tupana inug hap ete.

2 Kuriniu 4:5

Yt watuwemotypot i ahehay wo miitꞌin miat wahenoi turan. -Eheropat haria uruto watoꞌe katupono Iesui emiit uruto pote watoꞌe. Miꞌi hawyi Iesui yn Aiꞌakag watoꞌe. Miꞌi yn Tupana tipoꞌoro Aiporekuat no. Miꞌi yn aimimotypot sese watoꞌe. -Eheropat haria yn waku watoꞌe wahenoi Iesui etiat turan.

1 Tesaronika 2:6

Iꞌewyte yt kat i urumotypot hap uruikyꞌesat eimuꞌe turan. Yt uwe kaipyi hin i uruikyꞌesat urumotypot hap. Yt eikaipyi i wyti maꞌato urupoꞌoro hat mowepiit hap yn uruwanetup hawe eimuꞌe turan.