Pyno kat hamoĩ mesup eweikyꞌesat Muisei eko yrysakag ipotyi aiꞌakag etiat hap ewywuat iraniaꞌin akag ete e. Pyno toimoherep taꞌyn ahepe iraniaꞌin ywania aiꞌewy raꞌyn toiꞌairo e Peteru. Ahaꞌaseꞌiꞌin wyti yt hupit i mekewat seko e. Iꞌewyte aito yt wahupit i raꞌyn. Kat hamoĩ pyno eweikyꞌesat aheko Iesui mohey haria wẽtup ywania ipakuptia ok pe tote e. Yt naku i ti Tupana wahãꞌãg e.
1 Kuriniu 8:1 - Sateré-Mawé1 Mesup worohoꞌonapin neran tupanaria iãꞌãkap motypot hap miꞌu ete mekewat Wewato ahup auka tupanaria iãꞌãkap eꞌat piat koꞌi ete. Pyno mesuwat uimienoi kuap haria raꞌyn eipe maꞌato ti ahenoi pakup i teran ehepe ikuap i hamo. Pyno Uwe uwe toꞌe topyꞌa pe -Uito poꞌog atikuap tuwemowato teran tuwewanetup hawe maꞌato tuwemaꞌat haype katupono yt uwe i mimuꞌe wo topyhuꞌat iꞌewyte yt uwe i wy wo toineꞌen. Maꞌato uwe uwe toꞌe topyꞌa pe -Miitꞌin kyꞌe hat areineꞌen neran miꞌi e hat Tupana mipowyro topyhuꞌat hawyi yt aimaꞌat kuap i rakat toineꞌen. အခန်းကိုကြည့်ပါ။ |
1 Kuriniu 8:1
35 ပူးပေါင်းရင်းမြစ်များ
Mio tã e ti maꞌato toikyꞌesat -Yt ewetuꞌu teiꞌo miitꞌin miium tupanaria iãꞌãkap koꞌi piat e. Miꞌi hap yt toikyꞌesat i iꞌatuꞌe. Iꞌewyte yt toikyꞌesat i wyti wẽtup ok wẽtup ok wywo seꞌaito hap iꞌewyte wary hap. Hutꞌyp nik piat miat puꞌi o yt etuꞌu teiꞌo. Iꞌewyte huu o yt etuꞌu teiꞌo e ti wy iꞌatuꞌe. Pyno urumienoi ewy ewetunug mote ti aru waku raꞌyn uruwyriaꞌin iꞌatuꞌe. Toran naꞌyn pyno uruꞌe hap mehinꞌin iꞌatuꞌe popera pe. Miꞌi hawyi taꞌatuium mekewat miwan taꞌatumipoꞌororia pe.
Taꞌi uruhenoi raꞌyn saꞌawyꞌi iraniaꞌin ywania pe Iesui mohey haria pe. Yt ewetuꞌu teiꞌo yne tupanaria iãꞌãkap piat miium miꞌu puꞌi koꞌi urutoꞌe. Iꞌewyte huu sapo wo yt naku i aimiꞌu wo urutoꞌe. Iꞌewyte miꞌutꞌyp nik piat miꞌauka puꞌi yt naku i watuꞌu urutoꞌe. Iꞌewyte ihainia iwary wary haryporia heꞌaito heꞌaito yt naku i urutoꞌe. Miꞌi hawyi iraniaꞌin Iuteuria eko waku eweiwaure urutoꞌe saꞌawyꞌi urumiwan me iraniaꞌin ywania pe uhyt iꞌatuꞌe Ierusarẽi miaria.
Koitywy ehepe iraniaꞌin ywania pe atimoherep teran Tupana ehay ehepe yt uwe mikuap i te hap. Miꞌi eweikuap hawyi yt eweiꞌe kuap i -Uruto poꞌog weꞌeg haria ywania Iuteuria kawiat e hap. Koitywy Iuteuria yt timohey kahato i Tupana Mipoꞌoro Aiporekuat nuat Iesui iꞌatupyꞌa heg kahato rakaria pote maꞌato meiũran aru paa iꞌatuꞌe hawyi taꞌatukyꞌesat kahato imohey hap. Koitywy yt taꞌatukyꞌesat i pote -Pyno atiꞌatuehakyeraꞌat iraniaꞌin ywania taꞌatumohey kahato Uimipoꞌoro Iesui Iꞌatuporekuat nuat pote e Tupana. Meiũran aru yt uwe i eipe Tupana Mipoꞌoro Aiporekuat nuat mohey haria hawyi yt uwe i poꞌog ikyꞌesat hawyi mekewat eꞌat pe ti uimiꞌairoria Iuteuria iꞌatupap i raꞌyn imohey hap ete miꞌi hap eꞌat pe yt niatpo hin i tuwehytꞌok Uhaꞌyru mohey hawe e. Katupono miꞌiria tukupteꞌen Uriweiria yp haga sese koꞌi ewy e Tupana ahepe.
Miꞌi pote yt naku i watoꞌe aiwoꞌope -Uiwanetup hawe mekewat miit yt kat hamuat i yt naku i watoꞌe mesuwe kat pote Tupana yn waku aipatꞌok uwe waku uwe yt hap e hamuat are. Mekewat eꞌat pe wyti aru toihoꞌomoherep uwe tomohey sese haria. Yt naku i watoꞌe wẽtup ok Iesui mohey hat pe -Yt worokyꞌesat i kahato en mana mehin watoꞌe. Yt naku i watimohit aiwanetup hawe iraniaꞌin Iesui mohey haria katupono Tupana yn aikuap sio waku sio yt hap. Miꞌi yn toꞌe kuap. Meiũran wyti aru yne aito watoineꞌen iꞌam me Tupana ehay ahepiat kuap hamuat sio waku rakat no watoineꞌen aipyꞌa pe aiwanetup hawe sio yt naku i hap kuap hamo.
Uito ti eiwy Pauru are. Uito eiperia wywo wẽtup piit ewy yn Iesui piit wo watoineꞌen mesuwat yi tote. Uiwyriaꞌin pywo pe ti uiwanetup hawe miꞌu mesuwarote Tupana minug wakuat yne toineꞌen miꞌu wo are uipyꞌa pe uiwepe. Saꞌawyꞌi yt atimohey i maꞌato koitywy atimohey kahato. Iesui e hap kaipyi atikuap hawyi. Maꞌato uiwyriaꞌin -Yt naku i mekewat miꞌu watuꞌu eweiꞌe eipyꞌa pe pote yt ewetuꞌu teiꞌo are kat pote ewetuꞌu hawyi eiwemoti hap topyhuꞌat. Katupono -Atunug yt naku i miꞌu atuꞌu pote eweiꞌe aru eipyꞌa pe. Miꞌi pote yt ewetuꞌu teiꞌo eiwemoti popuo.
Waku watikuap kahato aipyꞌa pe kat som waku watunug kat som yt naku i watunug Tupana e hap miꞌi hawyi waku watunug aimimohey ewy. Waku watikuap kat som watomohey miꞌu ete sapo hy u ete eꞌat hap ete miꞌi hawyi waku yt wahenoi i iraniaꞌin me miꞌi hap koꞌi kaipywiat imohey hap ete. Waku wahenoi Tupana kape yn kat som watomohey miꞌi ete hap maꞌato aiwanetup hap toꞌe -Yt naku i miꞌi tã etunug e pote yt etunug neiꞌo mekewat epyꞌa piat. Maꞌato watunug mekewat waĩꞌe aipyꞌa piat hap pote aiwemoti kahato hap topyhuꞌat. Aipyꞌa piat haty hap toineꞌen -Yt naku i nug hat uito watoꞌe aiwepe.
Yt aiwoꞌoꞌewy hin i miꞌu eko ete katupono wẽtup ok Iesui mohey hat iꞌu yne miꞌu koꞌi hat maꞌato wẽtup ok yt ihãite i te Iesui mohey hap ete rakat -Waĩ waĩꞌe neꞌi miꞌu koꞌi ete. Miꞌi hawyi miꞌu u yne hat yt naku i toꞌe yt iꞌu yne i hat pe -Yt naku i kahato en mehin mana e yt etuꞌu yne i miꞌu uruꞌewy yt naku i mio tã watoꞌe imohey pakup hat pe. Katupono -Uhaꞌyru mohey hat en mote waku ereineꞌen uipyꞌa pe e Tupana ahepe.
Uiwanetup hawe waku kahato ti eiperia tawa Huma piaria. Uiwyriaꞌin uheinytꞌin kahato eiperia Iesui mohey haria eweikupteꞌen mote Aiꞌywot Tupana Wakuat eiam kahato eiperia. Taꞌi Tupana kuap hamo eipytꞌat ehehowapy kahato miꞌi pote worohoꞌomohey kahato eipe. Waku eweikupteꞌen eiwoꞌomuꞌe muꞌe hanuaria wo eimikuap Tupana etiat wo. Taꞌi waku kahato worohoꞌopuẽti eiperia wuatꞌi miitꞌin muꞌe hamuat.
Maꞌato erenuk turan wẽtup ok toꞌe epe -Etikuap apo Tupana iãꞌãkap motypot hamuat miꞌu puꞌi watuꞌu hap uhyt e pote -Yt atikuap hin i miꞌi hap waku eweiꞌe iꞌatuepe. Miꞌi hawyi -Pyno yt atuꞌu i poꞌog katupono yt naku i watuꞌu miꞌi tã e hat ehamo maꞌato etuꞌu pote haty kahato topyhuꞌat ewanetup hawe iꞌewyte mekewat miit itotiaria pe iꞌaparap hat wo en eropyhuꞌat ihamo etuꞌu pote.
Aikotã watoineꞌen pya hesoꞌok takaria pupi hap ewy waku watoineꞌen miꞌiria pupi. Eweiꞌaipok to eiwemoweꞌeg hamo. Ewetoiat ro saꞌag nug hap koꞌi katupono iꞌatu kahato aria kapiat wat hanuaria tawa Kurintiu piaria katupono yt karãpe i eweiꞌatumuꞌe miꞌiria Aipotypot Iesui ete. Waku eiwemoti aria kapiat ehehay pyi tuwat hap pupi.
Miꞌi pykai Aipotypot Iesui moherep hap ete yt urupohep hin i miitꞌin teꞌeruwekyryꞌi teran uruete pykai. Maꞌato ehete yt uwe i teꞌeruwekyryꞌi uruetiat ewy. Miꞌi pote -Uruto poꞌog Aipotypot emiit eweiꞌe. Uruweꞌeg poꞌog iraniaꞌin kai eweiꞌe. Uruto imohey pakup kahato haria eweiꞌe. Taꞌi uruwanetup hawe eipe ipakup kahato koꞌi. Maꞌato uruto miitꞌin mimohit koꞌi wo urutopyhuꞌat.
Miꞌi hap ewy ti uruto uiwyriaꞌin. Uito Pauru eimuꞌe hat iꞌewyte Apauru toineꞌen itote eimuꞌe hat. Waku eiwanetup kahato uruehay kape katupono wẽtup ehay yn urutoꞌe Iesui etiat yn uruimuꞌe eipe. Pyno atikyꞌesat kahato uruꞌewy eweikupteꞌen wẽtup sehay yn moherep haria Iesui moherep haria uruto ewy uruhẽku ewywuat urupusu ewywuat waku eweikupteꞌen hap atikyꞌesat urupotmuꞌeria. Urumimuꞌe wẽtup ok yn uruto typy ok pykai. Yt naku i eweiꞌe Uito Pauru mimuꞌe hawyi wẽtup ok -Uito yt Pauru upi i maꞌato uito Apauru upi uito paĩ an yt naku i eweiꞌe katupono Apauru uito wẽtup miit ewy hawyi wẽtup sehay yn eimuꞌe Iesui Aimimotypot moherep hap yn uruehay. Yt naku i watimohit wẽtup ok aimuꞌe hat hawyi yt naku i watunug wẽtup ok aimuꞌe hat Tupana wo e.
Pyno yt eiwekyryꞌi teiꞌo mekewat miit minug saꞌag ete. Yt naku i kahato watuwehum miꞌi tã nug hat ete katupono mekewat miit topyhuꞌat mani puk ewywuat eipyꞌaset pe maꞌato eipe eweipyhuꞌat ipyre ewy. Miꞌi pote aikotã watopag ipyre mani puk pe hawyi toimorem yne mani puk hap ewy miꞌi hap ewy waku eweihep o mekewat miit saꞌag eipyꞌasetpyi hawyi ti aru eweipyhuꞌat miit wakuaria ewywuat. Yt naku i hap yt mig hin i haria eipe. Pyno saꞌawyꞌi wuaria Iuteuria tuwenoꞌẽ taꞌatuewanikaptia yi Esituꞌin po kaipywiat turan iꞌatumiꞌu man iteneg nakat yn iꞌatumiꞌu yt kat i nem nakat ewy.
Miꞌi tupono ahenoi pakup i raꞌyn aikotã tupana iãꞌãkap motypot haria miꞌu etiat. Pyno koitywy watikuap taꞌyn mesuwarotiat mo wuat minug koꞌi tupana koꞌi yt Tupana sese hin i hap tukupteꞌen maꞌato ariaꞌyp nu yi kawiat yn tukupteꞌen. Miꞌi tupono ti koitywy watikuap taꞌyn tupanaria miitꞌin mo wuat minug koꞌi yt kat hamo i tupana wo tukupteꞌen katupono yt kat i ieineꞌen hap ipuo hap watikuap. Maꞌato wẽtup ok yn Tupana Sese toineꞌen. Miꞌi ti atipy piat wuatꞌi eꞌat piat ieineꞌen hat. Pyno iraniaꞌin tupana mesuwarotiat yi kawiat nu kawiat hap koꞌi yt Tupana hin i.
Yt aheso hin i wuatꞌi miitꞌin tikuap aiꞌe hap pywo rakat. Tukupteꞌen aipyꞌasetpe Iesui mohey pakup haria. Miꞌiria saꞌawyꞌi taꞌatumohey kahato tupanaria miit minug koꞌi. Miꞌi pote mesup te taꞌatuwanetup hawe -Mekewat iãꞌãkap uimimohey saꞌawyꞌi wuat wẽtup Tupana wo toineꞌen yt Tupana wo toineꞌen hin i pykai. Katupono Tupana Sese yn toineꞌen Tupana wo. Miꞌi hawyi miꞌu puꞌi taꞌatukyiꞌat pote -Pyno etum apo mesuwat puꞌi ehetupanaria pe sio yt iꞌatuꞌe puꞌi weneru haria pe. Taꞌi Tupana iãꞌãkap motypot hap yne mesuwat puꞌi iꞌatuꞌe hawyi mekewat Iesui mohey haria -Pyno yt atikyꞌesat i emiweneru hap koꞌi iꞌatuꞌe. -Taꞌi urumiium naꞌyn tupanaria iãꞌãkap pe iꞌatuꞌe pote teꞌeruwemoti kahato iꞌu hap ete Iesui mohey haria pakup pote -Yt atuꞌu i iꞌatuꞌe.
Saꞌawyꞌi aito wuꞌuka yne ywania wywuat haria aito wuatꞌi ewanikaptia wo watukupteꞌen. Pya kahato watukupteꞌen Tupana kai aito torannia. Aipiit ete ipoityꞌi ahaga koꞌi maꞌato wẽtup piit yn watoineꞌen aito wẽtup piit yn aito. Yt tuweran hin i maꞌato ahaga koꞌi. Toꞌosat kahato ahaga koꞌi. Miꞌi hawyi aipiit iheg aipiit wẽtup yn. Aipuꞌi aikag koꞌi ahaga toꞌosat toꞌoete kahato. Karãpe watunug Aiꞌakag Iesui mikyꞌesat ewy hawyi watopyhuꞌat aikotã haga koꞌi ewy ipiit ewy. Miꞌi hawyi wahewyry aikotã ihãite rakat ewy. Karãpe aito Iesui mohey haria watoꞌokyꞌe yne yne aiwoꞌope miꞌi hawyi watoꞌopowyro miꞌi hawyi watopyhuꞌat aito Iesui piit ihãite rakat ewy.
Yt eweiwat reiꞌo iꞌatuehay upi karapeĩ teꞌeroꞌe ehepe -Yt eweikupteꞌen i Tupana miehakyeraꞌat koꞌi katupono yt uruꞌewy i ehewaku hap. Poꞌog uruto eikai katupono atipy piaria ihay uruwywo urumuꞌetu iꞌatuꞌe. Urutaꞌakasa Tupana urumuꞌetu iꞌatuꞌe. Atipy piaria kuap haria uruto uruehay iꞌatuwywo iꞌatuꞌe. Miꞌi pote poꞌog uruto eikai iꞌatuꞌe. Tupana miehakyeraꞌat koꞌi sese uruto. Eipe yt hin i katupono uruto paa e haria sese iꞌatuꞌe. Maꞌato yt pywo pe i mio tã iꞌatuꞌe. Teꞌeruwemotypot hap yn iꞌatuwanetup hawe. Iꞌatuwanetup hap miit wanetup hap ewywuat yn. Maꞌato yt kat i Iesui motypot hap iꞌatupyꞌa piat pykai.
Maꞌato tukupteꞌen eipyꞌasetpiaria uimohey ran haria uhehay ewanikaptia tawa Pekamu piaria. -Uruto Tupana ehay moherep haria iꞌatuꞌe wen maꞌato wẽtup sehay moherep haria aikotã nimo sehay yt hãpyk i rakat enoi hat Parãu mienoi ewy taꞌatumoherep. Nimo Tupana ehay moherep hat Parãu e hap het rakat tiꞌatumuꞌe kahato Isareu ywania ewanikaptia eporekuat Parake e het rakat Tupana emiit Isareu ywania moꞌakagꞌaia Tupana set etiat hap tehay wo. Mio tã e Parãu -Waku ewetunug ienuk hap iwato hawyi eweiꞌauka eihũria Tupanaria iãꞌãkap koꞌi motypot hamo e. Miꞌi hawyi waku yne haryporiaꞌin wywo toꞌope eweikupteꞌen e. Miꞌi etunug mote ewanikaptia Isareu ywania Tupana miꞌapiheg wo tukupteꞌen eipyꞌasetpe e Parãu morekuat Parake pe tominapin e uhepe uimiwan nug hamuat.
Maꞌato iꞌewyte atikuap aikotã ehewaku hap toineꞌen kahato pykai toineꞌen yt naku i hap itote yt eweitoiat hin i te e. Miꞌi hap nug hap ete ehewanikap wo kahato areineꞌen e. Toineꞌen wẽtup ok haryporia eipyꞌasetpe -Uito Tupana ehay moherep hat e hat Iesapeu e hap het rakat e. -Pyno sig waku ahewaire hewaire e Tupanaria motypot hamo iꞌewyte waku Tupanaria iãꞌãkap motypot ienuk hamo e Tupana uhepe e hat Mana Iesapeu. Miꞌi ete toiꞌatumuꞌe uhemiit pykai yt kat eweiꞌe i tope. Yt eweipoꞌoro hin i eipyꞌasetpyi. Yt naku i kahato ewetunug tawa Tiatira uimohey haria e.
ကြော်ငြာတွေ