Pywo ti rat uwe uwe uhehay upi uhupiat toto uhupiat haype iꞌatoiat toꞌyat toꞌywytꞌin tokywytꞌin toinytꞌin tosakiꞌytꞌin toꞌywotꞌin totyꞌin tomepytꞌin toko koꞌi tomikoi uimikyꞌesat nug hamo miꞌi hat ti aru poꞌog ipuẽti meimuẽwat tomiꞌatoiat koꞌi saꞌawyꞌi wuat kai. Taꞌi tomiꞌatoiat wẽtup kaipyi toipuẽti 100 raꞌyn mesuwe iꞌewyte ti aru toipuẽti wuatꞌi eꞌat piat toineꞌen hamuat e.
1 Kuriniu 6:9 - Sateré-Mawé9 Yt uwe i aru woꞌomaꞌatꞌi maꞌatꞌi hat toineꞌen aikope Tupana toineꞌen Morekuat nuat hap tote. Eweꞌeg wo o eiwemaꞌat hap pupi katupono eweikupteꞌen wuatꞌi haryporia wywo wuatꞌi ihainia wywo pote yt karãpe i putꞌok eweiꞌe Tupana etawa pe. Iꞌewyte yt uwe i mo wuat minug tupanaria motypot haria itote. Seꞌaito wywuat ieineꞌen hat seharyꞌi wywuat ieineꞌen hat yt uwe i aru itote. Haryporiaꞌin eꞌaito wo haryporia te iꞌewyte ihainiaꞌin eꞌaito wo ihainiaꞌin ne haria yt uwe i itote. အခန်းကိုကြည့်ပါ။ |
1 Kuriniu 6:9
51 ပူးပေါင်းရင်းမြစ်များ
Miꞌi hawyi Iesui tiꞌatuwesat topotpoꞌororia pe -Eiweꞌeg wo o are katupono wyti aru uhet wywo uhet eroꞌok haria putꞌok iꞌatuꞌe ehepe eimaꞌat hamo are. -Uito miitꞌin porekuatno Tupana mipoꞌoro iꞌatuꞌe wyti aru. -Uito ti ariot raꞌyn eiporekuat koro wuat iꞌatuꞌe aru maꞌato yt eweiwanetup teiꞌo iꞌatueso rakaria kape are katupono eimaꞌat hamo tõꞌẽ are.
Uiwyriaꞌin e koitywy areto raꞌyn eipyꞌasetpyi. Maꞌato ti worohoꞌoꞌatoiat eipe Tupana po pe. Tupana ti eikyꞌe hap hum kahato ehepe. Tutum ahepe tehay wakuat aimoesaika hamo aimohãpyk yt nakuap i kaipywiat hamo. Miꞌi pote watoineꞌen hemiitꞌin no iraniaꞌin imimoewaku koꞌi saipepiaria wo mesup e Pauru tawa Ewesu piaria pe.
Miꞌi hawyi itote Pauru henoi iꞌatuepe aikotã miꞌiria Tupana wywuat iꞌatupyhuꞌat hãpyk hamuat hap iꞌewyte aikotã waku waĩ watoꞌe aiwanetup saꞌag hawe hap katupono meiũran aru Tupana tomoherep uwe uwe temiitꞌin sese hap koꞌi uwe uwe yt temiitꞌin i hap ete Pauru henoi kahato iꞌatuepe. Miꞌi hawyi morekuat Werisi tokenꞌẽ imienoi pupiat haype toꞌe -Apuete Pauru yt uipohepap i te rat eꞌe hap kuap hamo e. Miꞌi pote meiũran aru worokay kay i raꞌyn miꞌi eꞌe hap kuap sese hamo e tokenꞌẽ toꞌapiheg aru Tupana piat hap pupi.
Miitꞌin mesuwarotiaria minug koꞌi yt Tupana mikyꞌesat ewy hin i. Taꞌi yt hãpyk hin i torannia iꞌatuminug koꞌi e Tupana. Taꞌatukuap hãpyk nug hap taꞌatupyꞌa pe wen maꞌato yt iꞌatupotpap i inug hamo e. Miꞌi haype yt naku i nug hap yn taꞌatunug neran e. Taꞌatukuap yne pywuat koꞌi nug hap taꞌatupyꞌa pe hepiat taꞌatunapin hap wen maꞌato yt taꞌatunug hin i uiꞌe hap e Tupana wuatꞌi ywania pe. Yt taꞌatumohey teran i maꞌato taꞌatukyꞌesat taꞌatuminug saꞌag yn neran haype e. Taꞌatupyhyp aat kaꞌap uhehay pywuat sese moherep haria e. Miꞌi haria yt uwe i uikuap teran haria mesuwarotiaria yt uimohey i pote haria e Tupana wuatꞌi miitꞌin miat.
-Aipap wuatꞌi eꞌat aikuꞌuro hawyi iꞌatuꞌe iraniaꞌin eimuꞌe haria. Yt naku i iꞌatuꞌe ehepe eimuꞌe haria eimaꞌat sehay wo katupono taꞌatukyꞌesat yt naku i nug haria eiperia eiãꞌãg teran haype miꞌiria. Taꞌatukyꞌesat eipe iꞌatuꞌewywuaria hap. Eiweꞌeg wo o miꞌiria pupi. Iꞌatuehay upi eweipyhuꞌat hawyi iꞌatumimaꞌat koꞌi eweikupteꞌen aru.
Koitywy ti wuatꞌi miitꞌin eikuap yt eiweꞌeg i hap ete meiũpiaria. Taꞌi taꞌatuhenoi henoi kahato ti aikotã aheineꞌen haryporia wywuat ihainiaꞌin wywuat hap koꞌi. Yt Iesui mohey haria ewy hin i eweikupteꞌen hap taꞌatukuap taꞌyn. Maꞌato eipe poꞌog saꞌag yt nakaria i mekewat yt Iesui mohey i haria kai. Katupono uruikuap eipyꞌasetpiat wẽtup ok toꞌywot eharyꞌi pakup toty pakup wywo toket hap.
Tukupteꞌen aipyꞌasetpe mesuwat yi tote maꞌato iꞌatu kahato aiwyriaꞌin yt Iesui mohey i haria yt naku i nug haria. Miꞌiria tukupteꞌen yne eꞌat aikope aikope watoineꞌen hap tote ahewyry hap tote. Miꞌiria minug ewywuat yt naku i watunug katupono miꞌiria wuatꞌi haryporiaꞌin ihainiaꞌin wywo ieineꞌen haria. Ahekareꞌen sereꞌok takaria tukupteꞌen miꞌiria. Ahekat kyewi yn aimaꞌat maꞌat neꞌi miꞌiria wuatꞌi eꞌat pe. Miꞌiria wuatꞌi tupanaria mo wuat minug motypot haria. Yt naku i watunug miꞌiria ewywuat maꞌato waku watiꞌatuekyi miꞌiria Iesui mohey hap kape. Yt naku i watunug miꞌiria ahewanikaptia wo maꞌato poꞌog waku watiwesat miꞌiria waku hap ewy. Maꞌato karãpe Iesui mohey hat watoineꞌen hawyi yt naku i watunug ne aikotã miꞌiria minug yt naku i hap koꞌi ewywuat. Maꞌato miꞌiria ewywuat watoineꞌen yt naku i nug haria te waku -Iesui mohey haria miꞌapiheg wo watopyhuꞌat. Yt naku i watunug ne yt naku i nug hap saꞌawyꞌi wuat ewy Iesui mohey haria aito hawyi.
Maꞌato -Ewetoiat ro meimuẽwat koꞌi katupono miꞌi ewywuat watoiat pote watoineꞌen mesuwat yi tote waku pe. Koitywy atipoꞌoro ewowi wẽtup sehay. Toineꞌen eipyꞌasetpe yt nakuap i nug hat -Uito Iesui mohey hat e hat maꞌato wuatꞌi wywo toineꞌen hewaire rakat miꞌi hat ewywuat yt eweiwesat wesat teiꞌo iꞌewyte yt erenuk teiꞌo iwywo. Iꞌewyte toineꞌen Iesui mohey hat maꞌato tupana iãꞌãkap kape toiwẽpap te toimohey te miitꞌin minug tupana koꞌi -Uito Iesui mohey hat wy toꞌe pykai waku miꞌi miit kai waure wo waku watukupteꞌen.
Uiwyriaꞌin arekenꞌẽ te wyti uiwanetup hawe aikotã aru eweikupteꞌen areto turan hap pupi. Yt worohoꞌopuẽti teran i ehewaire waire turan neꞌi. Miꞌi tã ewetunug putꞌok are turan neꞌi pote aremoti sese Tupana ehamo. -Tupana yt areto teran i. Yt atiꞌatupuẽti teran i tawa Kurintiu piaria Esaꞌyru mohey haria iꞌatuewaire waire turan neꞌi katupono uimoti te hap sese topyhuꞌat. Miꞌi hawyi arewak uiwy sese ikuꞌuro hap ewy. Tupana atikyꞌesat taꞌatuꞌatoiat yne toꞌopiit kyꞌesat hap koꞌi yt naku i hap koꞌi. Tupana yt atikyꞌesat i areto emohey haria Kurintiu piaria kape uimohit hap yn itote turan uimoti te hap yn pote are Tupana pe.
Waku watiꞌakit yne aiwanetup saꞌag hap aiwanetup hawiat. Waku watiwaure yne saꞌawyꞌi wuat aiwary wary hap aheꞌaito aito hap. Miꞌi hap waku watoiat yne e. Waku watipun yne yt ahegyiꞌat i hap katupono yt ahegyiꞌat i hap saꞌag kahato topyhuꞌat Tupana wanetup hawe. Aikotã ariaꞌyp nu kawiat Tupana iãꞌãkap motypot hap yt naku i hap ewy te yt ahegyiꞌat i hap topyhuꞌat yt naku i Tupana wanetup hawe. Waku watimak aipiit mikyꞌesat saꞌag koꞌi aiwemoti hap koꞌi. Waku wahasep wẽtup ok aheharyꞌi wuat kyꞌesat i hap wẽtup ok aheꞌaito wuat kyꞌesat i hap. Waku waĩ watoꞌe aiwanetup hawe aipotmoti te moti te hap koꞌi are. Waku watiꞌauka aiꞌe hap aiwanetup hawe -Uiwatno yn atikyꞌesat ekat koꞌi e hap. Waku yt kat i ihainia wary wo hap aiwanetup hawe.
Uiwyriaꞌin waku watikat aat kaꞌap aiwoꞌowese torannia wywuat hamuat. Iesui suu aimohãpyk kuap aikoho kahato hawyi ainug Tupana ewaku hap ewywuat hamo. Maꞌato yt kat i aimowaku hap Tupana wuat hap ahete pote yt karãpe i aru watopyhuꞌat Tupana akasa hamo. Pywo ti rat yt Tupana yt ewy i watoineꞌen pote yt Karamuo i Tupana kape wataꞌakasa aru e.
Nimo te Iako eꞌykeꞌet Esaꞌu hewaire kahato iraniaꞌin haryporiaꞌin wywo iꞌewyte tuwekyryꞌi Tupana ehay ete. Uiwyriaꞌin Iesui mohey haria yt naku i Esaꞌu ewywuat watopyhuꞌat. Saꞌawyꞌi aseꞌi Isaki toꞌe toꞌyat piaria pe -Uikuꞌuro hawyi atikyꞌesat uhaꞌyru Esaꞌu uhaipe piatno uipowatꞌyp e. Esaꞌu ti topyhuꞌat aru Tupana Mipoꞌoro Yianmiat Ahehakyeraꞌat hanuat ahaꞌaseꞌi pono e. Wẽtup eꞌat pe Esaꞌu hesyꞌat kahato hawyi toꞌe toꞌywyt Iako pe -Uipoi ro en paĩ ipuꞌi apokik wo katupono uhesyꞌat kahato uhyt e. Miꞌi hawyi Iako tiwesat -Areineꞌen teran aiꞌywot saipepiatno uito e. Atikyꞌesat Tupana mipoityro wo aiꞌywot e hap ewy e. Miꞌi e hap etum uhepe pote woromoꞌok kahato meikowat ipuꞌi moĩ wo e. Miꞌi hawyi -Taꞌi ewatno raꞌyn katupono yt kan hamo i Tupana aipoityro hap e Esaꞌu e Iako pe.
Uiwyriaꞌin Iesui mohey haria -Waku heꞌaito kahato rakatno ereineꞌen e. Waku iharyꞌi kahato rakatno ereineꞌen e. Waku eharyꞌi wywo yn ewaire e. Waku eꞌaito wywo yn ewaire e. Miꞌi etunug pote arehum ewowi e Tupana maꞌato iraniaꞌin wywuat eiwoꞌopytyk pote -Yt naku i en areꞌe e. Woroꞌapiheg aru e Tupana yt iweꞌeg i haria pe. Iꞌewyte wewiat weweneru wuatꞌi piat haria atiꞌatuꞌapiheg yne yne e ahepe. Iꞌewyte wewiat weweneru haria kyiꞌat haria atiꞌatuꞌapiheg e. Hewaire rakaria uimiꞌapiheg wuaria e Tupana. Eꞌaito wywo eharyꞌi wywo kahato hap uimowepiit hap e Tupana.
Maꞌato iraniaꞌin teꞌerokenꞌẽ uimohey hap moherep hamo e. Miꞌi pote miꞌiria aru tukupteꞌen wuatꞌi eꞌat pe mekewat aria emyiꞌa wato pe ytyghe wuk hap ewywuat pe e. Iꞌewyte woꞌopotꞌauka haria paini koꞌi iꞌewyte hewaire hewaire rakaria iꞌewyte wuat minug Tupana motypot haria iꞌewyte woꞌomaꞌatꞌi maꞌatꞌi haria iꞌewyte yt uimohey i haria iꞌewyte yt naku i nug haria miꞌiria typuat i map hanuaria hoꞌopot wuatꞌi eꞌat pe aria ẽty emyiꞌa ewywuat pe e uhepe Aipotypot Iesui atipy kaipywiat morekuat eiam note pyi.
Maꞌato iraniaꞌin me -Ereke ro yt e hin i e. Yt karãpe i -Ereke ro uhetawa pe e paini koꞌi pakup we e. Yt karãpe i -Ereko ro e woꞌoꞌauka haria pe e. Yt karãpe i -Ereke ro e hewaire waire rakaria pe e. Iꞌewyte uwe uwe imotypot mo wuat Tupana miꞌi haria pe -Ereke ro yt e hin i Iꞌewyte uwe uwe miitꞌin potmaꞌatꞌi maꞌatꞌi hat toineꞌen miꞌi hat pe -Ereke ro uhetawa pakup we yt e i e atipy piat.
ကြော်ငြာတွေ